იმ ყველაფერმა, რის გაკეთებასაც პუტინი ეცადა, ან არ იმუშავა, ან სრულიად მოულოდნელი რეაქციები გამოიწვია, – ამის შესახებ საქართველოს პრეზიდენტმა, სალომე ზურაბიშვილმა CNN-თან ინტერვიუში განაცხადა.

მისი თქმით, მოულოდნელობა იყო იმის ნახვა, რომ „ვაგნერის“ აჯანყება სწრაფად დასრულდა პირდაპირი წინააღმდეგობის გარეშე, რაც ჩვეულებრივი რუსული ტრადიციაა.

„ჩემთვის და, ვფიქრობ, თითქმის მთელი მსოფლიოსთვის, პუტინის რეჟიმის წინააღმდეგ, რომელიც ამ მომენტისთვის ომით ნამდვილად დასუსტდა, ასეთი ფორმით აჯანყების ნახვა სრული მოულოდნელობა იყო. მოულოდნელობა იყო ნახვა, როგორ მარტივად შეუძლია ვინმეს საზღვრის გადაკვეთა და ჯერ როსტოვში შესვლა და შემდეგ მოსკოვთან ახლოს, სხვა ქალაქებში. მოულოდნელობა იყო ნახვა, რომ ეს აჯანყება ასე სწრაფად დასრულდა პირდაპირი წინააღმდეგობის გარეშე, რაც ჩვეულებრივი რუსული ტრადიციაა.

უცნაურია, რომ თუნდაც პრიგოჟინს შეუძლია, ენდოს პუტინს, როცა ის უსაფრთხოების გარანტიებს აძლევს, რაც არასდროს არსებობდა რუსეთის ისტორიაში. როდესაც შენ აჯანყებული ან თუნდაც ომის ტყვე ხარ, [რუსეთში] ეს არასდროს გეპატიება. და ეს ახლა რუსეთში ხდება და როგორ შეგიძლია, თუნდაც ლუკაშენკოს ენდო, როდესაც იგი თავად ძლივს იცავს იმ ნაწილობრივ დამოუკიდებლობასაც რუსეთის მზარდი მოთხოვნების პირობებში… ეს ყველაფერი ჩვეულებრივ რუსულ ტრადიციას არ ჰგავს.

ვფიქრობ, რომ ახალ ფაზაში ვართ, უკრაინის წინააღმდეგ რუსეთის მიერ ომის დაწყებიდან რუსეთი ხედავს, რომ მისი ყველა დიდი გეგმა ერთმანეთის მიყოლებით დამარცხდა. ეს ჯერ საბოლოო სამხედრო მარცხი არ არის, მაგრამ იმ ყველაფერმა, რის გაკეთებასაც პუტინი ეცადა, ან არ იმუშავა, ან სრულიად მოულოდნელი რეაქციები გამოიწვია – გაერთიანებული ევროპა, გაერთიანებული და უფრო ძლიერი ნატო, ევროკავშირი, რომელიც ისევ გაფართოებაზე საუბრობს, რაც ისეთ თემას ჰგავდა, რომ ამასთან შეხება არავის უნდოდა.

პუტინისთვის ყველა ნეგატიური შედეგი – მობილიზაციაში წარუმატებლობა, პრიგოჟინის „ვაგნერი“, რომელიც ამ თეატრის ბოლო აქტია, რუსეთის არმია სრულიად შერცხვენილია. ის რუსული არმია, რომელიც მეორე მსოფლიო ომის შემდეგ მსოფლიოს ერთ-ერთ მთავარ არმიად მოიაზრებოდა, ახლა დონეცკში პრიგოჟინის იმედზეა“, – განაცხადა სალომე ზურაბიშვილმა.

მადლობლები ვართ საქართველოს მთავრობის ყველა ნაბიჯისთვის, რომელიც სანქციების გვერდის ავლის არდასაშვებად იქნა გადადგმული, – ამის შესახებ დიდი ბრიტანეთის საელჩოში გაერთიანებული სამეფოს საგარეო, თანამეგობრობისა და განვითარების საქმეთა ეკონომიკის, მეცნიერებისა და ტექნოლოგიების გენერალურმა დირექტორმა, კუმარ აიერმა განაცხადა.

“დავიწყებ იმით, რომ დიდი ბრიტანეთის საგარეო საქმეთა მინისტრი იმყოფებოდა საქართველოში რამდენიმე თვის წინ და ამ ვიზიტისას მან კიდევ ერთხელ დაადასტურა ის პარტნიორობა, რომელიც დიდ ბრიტანეთს აქვს საქართველოსთან და ქართველ ხალხთან… და ამ მხრივ მადლობელი ვართ საქართველოს მთავრობის ყველა ნაბიჯისთვის, რომელიც სანქციების გვერდის ავლის არდასაშვებად იქნა გადადგმული. მეორე მიზანია ის, რომ ჩვენ ვხედავთ და ჩვენ ვიცით, რომ რუსეთის მთავრობა არ გაჩერდება, იგი გააგრძელებს სხვადასხვა გზების ძიებას. ასე რომ, ამ ვიზიტის ერთ-ერთი მიზანია თუ როგორ გავაგრძელოთ ეს ძალისხმევა, რომ საბრძოლო საქონელმა რუსეთში არ მიაღწიოს.

ელჩმა ო’ბრაიენმა სანქციების მნიშვნელობაზე ისაუბრა და მინდა რამდენიმე სიტყვა ვთქვა იმ გავლენაზე, რომელიც ამას რუსეთზე აქვს. უპირველეს ყოვლისა, ამას გავლენა აქვს ბრძოლის ველზე. ვიცით, რომ ბევრი რუსული იარაღის დასავლურ ნაწილებზე არის დამოკიდებული, ნაწილებზე, რომლებიც ჩვენს მიერ დასანქცირდა. ბრძოლის ველის განხილვიდან და ანგარიშებიდან ვიცით, რომ ამ ნაწილების დასავლეთიდან მიღება აღარ შეუძლიათ, ისინი ნაკლები ხარისხის ნაწილებს იყენებენ და მათი იარაღის ეფექტურობაც მცირდება.

ძალიან ღიად და საჯაროდ ვლაპარაკობდით იმ კომპონენტებზე, რომლებზეც ყველაზე მეტად ვართ შეშფოთებულები, ისინი ჩვენს ვებგვერდზეა. ეს იგივე 38 საქონელია, რომლებზეც დიდი ბრიტანეთი, აშშ და ევროკავშირი ფოკუსირებულნი არიან და ყველანი ერთსა და იმავე აზრზე ვართ ფოკუსირებულნი”, – განაცხადა აიერმა.