ოპოზიციამ რეალისტური თემები უნდა დაისახოს და ციდან მიწაზე ჩამოვიდეს – პრეზიდენტის პირდაპირი არჩევის წესის დაბრუნება კარგი იდეაა, თუმცა უფრო მეტად სასურველი ზღაპარია, – ასე ეხმაურება „ევროოპტიმისტების” დეპუტატი რომან გოცირიძე საკონსტიტუციო ცვლილებებთან დაკავშირებით პარტია “საქართველოსთვის” ინიციატივას.

გოცირიძის განცხადებით, „ქართული ოცნება” არ შეცვლის პრეზიდენტის არჩევის იმ წესს, რომლითაც მომავალ პრეზიდენტს პარლამენტი და თვითმმართველობები აირჩევს.

„როდესაც პარლამენტში საკონსტიტუციო ცვლილებებს იღებდნენ, ჩვენ პრეზიდენტის პირდაპირი წესით არჩევის გაუქმებას ვაპროტესტებდით. თუ ოპოზიციას პრეზიდენტის პირდაპირი წესით არჩევა უნდა, ამისთვის საჭიროა არჩევნების არამხოლოდ მოგება, არამედ საკონსტიტუციო უმრავლესობით მოგება. თუ ოპოზიციას საკონსტიტუციო უმრავლესობით მოგების თავი აქვს, მაშინ აშენებულა ქვეყანა და ეს არის!

ჩვენ რეალისტური გეგმები უნდა დავისახოთ – კონსტიტუციაში ცვლილებას იმ რაოდენობის ხმები სჭირდება, რაც ოპოზიციას არც ახლა აქვს და დიდი ალბათობით არც მომავალში ექნება.

ოპოზიციის სამომავლო მიზანი ხელისუფლების შეცვლა და ახალი კოალიციური მთავრობის ჩამოყალიბება უნდა იყოს. საკონსტიტუციო უმრავლესობით ხელისუფლებაში ვერც „ქართული ოცნება” და ვერ ოპოზიცია მოვა”, – განაცხადა რომან გოცირიძემ.

საქართველოს პრემიერ-მინისტრ ირაკლი ღარიბაშვილის ხელმძღვანელობით მთავრობის ადმინისტრაციაში მთავრობის სხდომა გაიმართა.

მთავრობის წევრებმა სამი საკითხი განიხილეს, რომელთა შორის იყო საქართველოს მთავრობის განკარგულების პროექტი უსახლკარო, მძიმე საცხოვრებელ პირობებში მყოფი მრავალშვილიანი ოჯახების განსახლების მიზნობრივი სახელმწიფო პროგრამის დამტკიცების თაობაზე. პროგრამის ფარგლებში მძიმე საცხოვრებელ პირობებში მყოფ 1000-ამდე ოჯახს სახელმწიფო ახალ საცხოვრებელ ფართებს გადასცემს. პროგრამის ჯამური ბიუჯეტი 50 000 000 ლარს შეადგენს.

პროგრამის მიზანი სოციალურად დაუცველი, უსახლკარო მრავალშვილიანი ოჯახების მხარდაჭერა და მათთვის ღირსეული საცხოვრებელი პირობების შექმნაა.

პროგრამის ბენეფიციარი შეიძლება იყოს ოჯახი 3 და მეტი არასრულწლოვანი ბავშვით, რომლის ყველა წევრი რეგისტრირებულია სოციალური მომსახურების სააგენტოს სოციალურად დაუცველი ოჯახების მონაცემთა ერთიან ბაზაში.

პროგრამით სარგებლობა შეუძლიათ ოჯახებს, რომელთა არცერთი წევრი რეგისტრირებული არ არის დევნილთა, ეკომიგრანტთა და საარსებო წყაროებით უზრუნველყოფის სააგენტოს დევნილთა ან ეკომიგრანტი ოჯახების ერთიან ელექტრონულ მონაცემთა ბაზაში. ასევე − თუ უსახლკარო ოჯახის წევრს სახელმწიფოსგან უკვე მიღებული არ აქვს საცხოვრებელი ფართი ან სათანადო ფულადი კომპენსაცია საცხოვრებელი ფართის შესაძენად.

ამ და სხვა კრიტერიუმების შეფასების შემდეგ ოჯახების განსახლების საკითხს შესაბამისი კომისია გადაწყვეტს.

პროგრამა 2025 წლის ბოლომდე გაგრძელდება. ოჯახების განსახლება განხორციელდება საქართველოს ნებისმიერ ადმინისტრაციულ-ტერიტორიულ ერთეულში.

ოპოზიცია განადგურებულია, რაც სამწუხაროა. ქვეყანას დემოკრატიული ოპოზიცია სჭირდება, თუმცა მათი დამსახურებაა, რომ პოლიტიკურ ველზე აღარ შეიმჩნევიან, – ამის შესახებ საპარლამენტო უმრავლესობის წევრმა, რატი იონათამიშვილმა განაცხადა.

იონათამიშვილის თქმით, არჩევნებზე კიდევ ერთხელ გაიმარჯვებს სამართლიანობა და ქვეყანა განვითარების ახალ ეტაპზე გადავა.

„ოპოზიცია ნამდვილად განადგურებულია, რაც, ერთი მხრივ, სამწუხაროა, რადგან ქვეყანას მაინც სჭირდება, რომ დემოკრატიული ოპოზიცია ჰყავდეს. მეორე მხრივ, ეს დამსახურებულია, რადგან რადიკალურმა ოპოზიციამ აირჩია, პოლიტიკურ სივრცეში ყოფილიყო არა ოპოზიცია, არამედ საკუთარი ქვეყნის მტერი. შესაბამისად, დამსახურებულია, რომ ისინი აღარ შეიმჩნევიან პოლიტიკურ ველზე. კოლექტიური „ნაცმოძრაობა“ თავის ამომრჩეველსაც კი სწრაფი ტემპებით კარგავს და შესაძლებელია ვერც კი მივიდეს არჩევნებზე. ამ არჩევნებზე სამართლიანობა კიდევ ერთხელ გაიმარჯვებს და ჩვენი ქვეყანა განვითარების ახალ ეტაპზე გადავა“, – განაცხადა რატი იონათამიშვილმა.

პარტიის „საქართველოსთვის“ გუნდს საპრეზიდენტო ცვლილებებზე საუბარი კურიოზულ სიტუაციაში აყენებს, თუ საერთოდ ეს გუნდი არსებობს, – ამის შესახებ საპარლამენტო უმრავლესობის წევრმა, რატი იონათამიშვილმა განაცხადა.

იონათამიშვილმა კომენტარი გააკეთა პარტიის „საქართველოსთვის“ ინიციატივაზე, კონსტიტუციაში პრეზიდენტის არჩევის წესთან დაკავშირებით ცვლილება განხორციელდეს და საქართველოს მომავალი პრეზიდენტი, საარჩევნო კოლეგიის ნაცვლად, კვლავ პირდაპირი წესით საქართველოს მოქალაქეებმა აირჩიონ.

რატი იონათამიშვილის განმარტებით, ქვეყანაში ძალაუფლების გადანაწილების საუკეთესო წესი არსებობს და მისი გადახედვა მიზანშეწონილი არ არის.

„ეს ხალხი სად შეხვდა ახალ წელს? მათი პირველი განცხადება და თან მსგავსი ინიციატივა ნიშნავს, რომ იდეების კრიზისი აქვთ. ახლა ცდილობენ, კრიზისი არ შეიმჩნიონ, მაგრამ არაფერი გამოუვათ“, – აღნიშნა რატი იონათამიშვილმა.

ევროკავშირის რეკომენდაციებთან დაკავშირებით იქნება საკომიტეტო თუ არასაკომიტეტო ფორმატი, მნიშვნელოვანია ხელისუფლებამ მოისმინოს არამხოლოდ ოპოზიციის, არამედ არასამთავრობო ორგანიზაციებისა და ნებისმიერი დაინტერესებული პირის პოზიცია, – ასე უპასუხა ოპოზიციონერმა დეპუტატმა თამარ კორძაიამ სამუშაო ჯგუფების შექმნის თემაზე დასმულ კითხვას.

კორძაიას თქმით, პარლამენტის კომიტეტებზეც გამოჩნდება, თუ რამდენად მზად არის მმართველი პარტია რეალური ცვლილებებისთვის და განსხვავებული მოსაზრებების გაზიარებისთვის.

“მე წინა სამუშაო ჯგუფებში ვმონაწილეობდი და შევუერთდები ნებისმიერ სამუშაო ჯგუფს, რომელიც ევროინტეგრაციის მიმართულებით საქართველოს მდგომარეობის გაუმჯობესებას ეხება. იქნება საკომიტეტო თუ არასაკომიტეტო ფორმატი, ხელისუფლებამ უნდა მოისმინოს არამხოლოდ ოპოზიციის, არამედ არასამთავრობო ორგანიზაციებისა და ნებისმიერი დაინტერესებული პირის პოზიცია.

ევროპული ღირებულებაა გადაწყვეტილების მიღება მაქსიმალური ჩართულობით, რაც ყველას მოსმენას და ყველას არგუმენტირებული პოზიციის გაზიარებას ნიშნავს”, – განაცხადა თამარ კორძაიამ.