საბოლოო ჯამში, მივაღწიეთ კონსენსუსს საზოგადოებრივი მაუწყებლის კანონთან დაკავშირებით, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ დღეს, საპარლამენტო უმრავლესობის სხდომის შემდეგ განაცხადა.

ამასთან, მამუკა მდინარაძემ მადლობა გადაუხადა საზოგადოებრივი მაუწყებლის სამეურვეო საბჭოს ხელმძღვანელს, ვასილ მაღლაფერიძესა და გენერალურ დირექტორს, თინათინ ბერძენიშვილს კონსულტაციებში ინტენსიური მონაწილეობისთვის.

„კონსულტაციების შედეგად ჩვენ მივედით კონკრეტულ გადაწყვეტამდე – მომდევნო ორი წლის განმავლობაში საზოგადოებრივი მაუწყებლის ბიუჯეტი იქნება იგივე, რაც იყო მიმდინარე წელს. ეს მათ საშუალებას მისცემს, დაასრულონ ძალიან კარგი პროექტი – ახალი შენობა, მთლიანი ინფრასტრუქტურა, მოახდინონ მისი სრული აღჭურვა. ორი წლის შემდეგ, 2026 წლის პირველ იანვარს ამოქმედდება წესი, რომლის მიხედვითაც, საზოგადოებრივი მაუწყებლის დაფინანსება დამოკიდებული იქნება საქართველოში დასაქმებული ადამიანების რაოდენობაზე. უფრო ზუსტად რომ ვთქვათ, ამ ადამიანების რაოდენობის ნამრავლი 64-ზე. დღევანდელი მოცემულობით თუ ავიღებთ წინა წლის დასაქმებულთა რაოდენობას, ეს მთლიანად ფარავს მიმდინარე საოპერაციო ხარჯებს. რა თქმა უნდა, პროგნოზია, რომ გაიზრდება დასაქმებულთა რაოდენობა. ბუნებრივია, დრამატული ზრდა ვერ იქნება, მოსახლეობის რაოდენობას ვერ გადააჭარბებს, უტრირებულად და ნახევრად ხუმრობით რომ ვთქვათ, მაგრამ იქნება ზრდა, მათ შორის, წლევანდელი მონაცემების მიხედვითაც, თანხა დღევანდელ საოპერაციო ხარჯებზე მეტი იქნება. ხელფასების ზრდა და ინფლაციის შესაბამისი, ადეკვატური ზრდა ყველა მიმართულებით მაუწყებელს შიგნით შეიძლება ჰქონდეს და შესაბამისი ხარჯები დაფაროს. დარწმუნებული ვართ, რომ კიდევ იქნება დასაქმებული ადამიანების ზრდა ქვეყანაში, რაც ავტომატურად გამოიწვევს საზოგადოებრივი მაუწყებლის დაფინანსების ზრდას, თუმცა,  ბუნებრივია, ეს არ იქნება ისეთი დინამიკა, როგორიც იყო აქამდე, გაორმაგება და გასამმაგება, როგორც შეიძლებოდა მომხდარიყო, არ იქნება. ასევე, კანონში დაზღვევის სახით იწერება ისიც, რომ შემცირების შემთხვევაში (ასეთი პროგნოზი არ გვაქვს, მაგრამ თეორიული რისკებიც უნდა დავაზღვიოთ), თუ დასაქმებულთა რაოდენობა შემცირდება, ამ შემთხვევაში საზოგადოებრივი მაუწყებლის ბიუჯეტი ამას ავტომატურად არ მიჰყვება და არ შემცირდება“, – განაცხადა მამუკა მდინარაძემ.

საქართველოს პრეზიდენტმა სალომე ზურაბიშვილმა დღეს ჩეხეთის რესპუბლიკაში ოფიციალური ვიზიტი დაიწყო, რომელიც საქართველო – ჩეხეთის 30 წლიანი დიპლომატიური ურთიერთობების პერიოდში, პირველი ოფიციალური ვიზიტია.

საქართველოს პრეზიდენტის ადმინისტრაციის ინფორმაციით, დახვედრის ოფიციალური ცერემონიის შემდეგ, რომელიც პრაღის სასახლეში გაიმართა, საქართველოს პრეზიდენტი ჩეხეთის რესპუბლიკის პრეზიდენტს პირისპირ და გაფართოებულ ფორმატში შეხვდა.

შეხვედრებზე საუბარი შეეხო ევროკავშირის გაფართოებას, საქართველოს ევროინტეგრაციის პროცესს და ქვეყნის კანდიდატის სტატუსთან დაკავშირებით იმ მნიშვნელოვან გადაწყვეტილებას, რომელსაც ჩვენი ქვეყანა ევროპული საბჭოსგან სულ რამდენიმე დღეში ელოდება.

ჩეხეთის პრეზიდენტმა მკაფიო მხარდაჭერა დააფიქსირა საქართველოსათვის ევროკავშირის წევრობის კანდიდატი ქვეყნის სტატუსის მინიჭების პროცესში და საქართველოს სრული მხარდაჭერა გამოუცხადა.

,,ჩვენ მხარი უნდა დავუჭიროთ ყველა ევროპულ ქვეყანას, რომლებიც ჯერჯერობით ამ სისტემის მიღმა არიან და მივცეთ იმედი“, – განაცხადა პეტრ პაველმა.

ოფიციალური ვიზიტის ფარგლებში, პრეზიდენტმა დღეს შეხვედრა გამართა ასევე, დეპუტატთა პალატის თავმჯდომარე მარკეტა პეკაროვასთან.

პრეზიდენტის ოფიციალური ვიზიტი ჩეხეთის რესპუბლიკაში 12 დეკემბერს დასრულდება.

„საქართველოში არეულობის მოსაწყობად იგივე ძალები არიან ჩართული და იხდიან ფულს, რომლებმაც „მიშას წამება” დადგეს”, – ამის შესახებ მედიასთან „ხალხის ძალის” ერთ-ერთმა ლიდერმა, დეპუტატმა მიხეილ ყაველაშვილმა განაცხადა.

მიხეილ ყაველაშვილმა გამჭვირვალობის შესახებ კანონპროექტზეც ისაუბრა, რომელზეც ახლა ევროკავშირი მუშაობს და აღნიშნა, რომ ოპოზიციიდან ვინმეს გამბედაობა უნდა ეყოს, გამოვიდეს და აღიაროს, რომ ახალგაზრდები შეცდომაში შეიყვანეს, როცა ეს კანონპროექტი გააპროტესტებინეს.

„ოპოზიციის მთელი პოლიტიკური ისტებლიშმენტი და ე.წ. სახალხო დამცველი ნინო ლომჯარიაც აცხადებდნენ, რომ სააკაშვილს ვკლავდით, სანამ სტრასბურგმა საპირისპირო არ დაამტკიცა. ამ წნეხს გავუძელით. იმ წნეხსაც გავუძელით, რაც გამჭვირვალობის შესახებ კანონპროექტს მოჰყვა, მაგრამ, ახლა, როცა ევროკავშირი მუშაობს იმავეზე, რითაც არასამთავრობო სექტორს მოუწოდებენ, რომ მათი დაფინანსება გამჭვირვალე იყოს, ერთი ოპოზიციონერი მაინც გამოვიდეს და იკითხოს, ჩვენ რომ გაგვაპროტესტებინეთ ეს კანონი, თქვენ რატომ იღებთო. ამ კანონპროექტის გამო რა არ გვიწოდეს – არ რცხვენია ამ ხალხს დღეს? ნუთუ ვერც ერთმა ვერ უნდა გაბედოს, რომ გამოვიდეს და აღიაროს  შეცდომა და ეს ორმაგი სტანდარტი დაგმოს, ან იმ ახალგაზრდებს უთხრას, რომ კი, შეცდომაში შეიყვანეს? ეს პროცესი არ ჩერდება და გარე ძალები ამას ხვალაც დაგვიგეგმავენ, ამიტომ, საზოგადოების ინფორმირებას არ უნდა მოვეშვათ. ამაზე სულ უნდა ვისაუბროთ”, – განაცხადა მიხეილ ყაველაშვილმა.

სამწუხაროდ, ჩვენი ქვეყნის ჯერ კიდევ მოქმედი მაღალი თანამდებობის პირის მიერ ჩვენი ქვეყნის კონსტიტუცია და კონსტიტუციით გარანტირებული ძირითადი პრინციპები ფეხქვეშ გათელილია, – ამის შესახებ პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა.

ოხანაშვილი სალომე ზურაბიშვილის ჩეხეთში ვიზიტს გამოეხმაურა.

„ნებისმიერი ვიზიტი, რომელიც არ არის მთავრობის მიერ ნებადართული, როგორც ამას საქართველოს კონსტიტუცია ითვალისწინებს და როგორც საკონსტიტუციო სასამართლომ ხაზგასმით განმარტა, საქართველოს ძირითადი კანონის უხეში და მიზანმიმართული დარღვევაა. ასეთი რამ ცდება ყოველგვარ საღ აზრს, ყოველგვარ პატივისცემას შენი ქვეყნისადმი, ქვეყნის ძირითადი ღირებულებებისადმი და იმ პრინციპებისადმი, რომლებიც კონსტიტუციაშია. ეს ყოვლად მიუღებელია. სამწუხაროდ, ჩვენი ქვეყნის ჯერ კიდევ მოქმედი მაღალი თანამდებობის პირის მიერ ჩვენი ქვეყნის კონსტიტუცია და კონსტიტუციით გარანტირებული ძირითადი პრინციპები ფეხქვეშ გათელილია. ასეთი ქცევების გამო პრეზიდენტად წოდება რთულია. ეს მძიმე შემთხვევაა“, – განაცხადა ანრი ოხანაშვილმა.

კონსტიტუციის დამრღვევად წოდებული ადამიანის ჩეხეთში მოგზაურობა საქართველოს პოლიტიკურ იმიჯს არ წაადგება და დამაზიანებელია, – ამის შესახებ პარლამენტის პირველმა ვიცე-სპიკერმა გია ვოლსკიმ განაცხადა, რითაც სალომე ზურაბიშვილის ჩეხეთში ვიზიტს გამოეხმაურა.

ვოლსკის თქმით, მთავრობა საპირისპირო ფორმულით მოსიარულე ადამიანს ვერ მისცემს მანდატს, მთავრობისა და საზოგადოების პოზიცია წარმოადგინოს.

„სალომე ზურაბიშვილის მიერ შემოთავაზებული ფორმულა, რომ მთავრობა არ იმსახურებდა სტატუსს, ახლაც არ იმსახურებს და არც მომავალში დაიმსახურებს, თარგმანში სწორედ ის არის, რასაც ჰქვია – საქართველოს არ დაუჭიროთ მხარი, თუ მის სათავეში დღევანდელი ხელისუფლება იქნება. ჩეხეთის პრეზიდენტი თუ ამბობს, რომ მხარდაჭერაზე იყო საუბარი, ეს ჩეხეთის პრეზიდენტის სწორი დიპლომატიური, პოლიტიკური ხედვიდან გამომდინარეობს და არა სალომე ზურაბიშვილის დამოკიდებულებიდან, რაც გაჟღერებული იყო 26 მაისის ღონისძიებაზე. სრულიად შემარცხვენელი, არაობიექტური, დამაზიანებელი და უზნეო იყო, როცა მან ახალგაზრდებს მიმართა, მისი განცხადებები ცნობილია. ვერავინ იტყვის, რომ პოზიცია შეიცვალა.

არასოდეს იფიქროთ, რომ ბორელი ისეთ განცხადებას გააკეთებს, რაც ქვეყნებთან არ არის შეთანხმებული, რადგან ის ევროკავშირს წარმოადგენს და მან თქვა, ვინ იმსახურებს სტატუსს, რატომ უნდა მიეცეს საქართველოს სტატუსი. მთავრობა ამის საპირისპირო ფორმულით მოსიარულე ადამიანს ვერ მისცემს მანდატს, რომ მთავრობისა და საზოგადოების პოზიცია წარმოადგინოს. კონსტიტუციის დამრღვევისთვის ეს მანდატი შეუსაბამო, არაადეკვატურია. კონსტიტუციის დამრღვევად წოდებული ადამიანის ჩეხეთში მოგზაურობა საქართველოს პოლიტიკურ იმიჯს არ წაადგება და დამაზიანებელია. ევროკავშირმა გადაწყვიტა, რომ საქართველო სტატუსს იმსახურებს. სალომე ზურაბიშვილის ამოცანაა, საზოგადოებაში განცდა შექმნას, რომ კონსტიტუციის დარღვევას შედეგი არ მოჰყვება და საკონსტიტუციო სასამართლოს რეპუტაცია შეულახოს. მისი ამოცანა და დავალებაა, საზოგადოებას სტაბილურობის განცდა არ ჰქონდეს, სტაბილურობის, რომელიც მთავრობამ შექმნა“, – განაცხადა გია ვოლსკიმ.

შალვა პაპუაშვილი „ნაციონალური მოძრაობიდან“ წევრების წასვლას გამოეხმაურა. ამ თემაზე კომენტარი საქართველოს პარლამენტის თავმჯდომარემ ბაქოში, ჟურნალისტებთან საუბრისას გააკეთა.

„თითქოს რაღაც მესამე ძალები იქმნება, თითქოს რაღაც გამიჯვნა არის. სინამდვილეში ეს არის ერთი ქოლგა, „ნაციონალური მოძრაობის“ ქოლგა, რომლის ქვეშაც ყველა ეს პატარა თუ საშუალო დაჯგუფება მოძრაობს. ამიტომ, მთავარი გამოწვევა კვლავ არის „ნაციონალური მოძრაობა“ და მისი იდეოლოგია, რომელიც დაფუძნებულია ერთ რამეზე – ისინი ემსახურებიან არა ქართველი ხალხის ინტერესს, არამედ სხვა პოლიტიკური ჯგუფების – ქვეყნის გარეთ თუ ქვეყნის შიგნით ინტერესებს, რომლებიც აბსოლუტურად დაპირისპირებულია ქართველი ხალხის ინტერესთან. ასე რომ ეს გადაჯგუფებები მხოლოდ ესთეტიკის საკითხია, შინაარსში არაფერი იცვლება. 2024 წელს ქართველ ხალხს არჩევანი ექნება ქართველი ხალხის ინტერესების გამტარებელ „ქართულ ოცნებასა“ და კოლექტიურ „ნაციონალურ მოძრაობას“ შორის“, – განაცხადა პაპუაშვილმა.

„ნაციონალური მოძრაობა“ ოფიციალურად ბაჩო დოლიძემ დატოვა. ნიკა მელიას გუნდის წევრი ამბობს, რომ ახლა ახალი მოძრაობის დროა. „ნაციონალურ მოძრაობას“ გაემიჯნენ ქუთაისის საკრებულოს წევრებიც. პარტია ასევე დატოვა იმერეთის მუნიციპალიტეტში ასეულობით წევრმა.