საქართველოს უმთავრეს სტრატეგიულ პარტნიორებზე თავდასხმით, „ქართული ოცნების” ხელისუფლების მიზანია, რომ ჩვენმა სახელმწიფომ არ მიიღოს კანდიდატის სტატუსი, – ამის შესახებ ნათქვამია პარტია „ლელო საქართველოსთვის“ განცხადებაში.

როგორც „ლელოს“ მიერ გავრცელებულ განცხადებაშია აღნიშნული, სუს-ი ეროვნული უსაფრთხოების დაცვის ნაცვლად, საკუთარი მოსახლეობის მოტყუებითა და შიშის თესვითაა დაკავებული.

„დაშინებულ რუსეთის მსახურ ხელისუფლებას კარგად აქვს გააზრებული, რომ ევროპისგან ხელოვნურად დაშორება გამოიწვევს საქართველოს მოსახლეობის 85%-ის პროტესტს.

პრევენციის მიზნით, ხელისუფლება ცდილობს საზოგადოების დაშინებას გადატრიალების, რევოლუციის თუ ე. წ. “მეორე ფრონტის” შესახებ შეთითხნილი ზღაპრებით. სუს-ის უშედეგო ბრიფინგები ადასტურებს, რომ ეროვნული უსაფრთხოების დაცვის ნაცვლად, სუს-ი საკუთარ მოსახლეობის მოტყუებითა და შიშის თესვითაა დაკავებული.

ამ პროცესში, რუსეთის მსახური ხელისუფლება და მასთან დაქვემდებარებული ყველა ინსტიტუტი კიდევ ერთხელ აზიანებს ჩვენი სახელმწიფოს ევროპულ ინტეგრაციას.

აშკარაა, რომ დღეს სახელმწიფო უსაფრთხოების სამსახურიც, რომელიც მტრული ძალების გავლენებს უნდა უპირისპირდებოდეს, პირიქით რუსეთის დავალებას ასრულებს. დღეს მთელი სახელისუფლო ვერტიკალი მობილიზებულია რუსეთის სანქცირებული აგენტის, ფარცხალაძის და ოკუპანტი ქვეყნის სხვა ჯაშუშების დასაცავად. ამავე დროს, მეორე ხელით იგივე სახელისუფლო ვერტიკალი თავს ესხმის ჩვენს სტრატეგიულ პარტნიორებს, ახორციელებს მათ მიერ ორგანიზებული დემოკრატიული და უსაფრთხო სემინარების მოსმენებსა და დემონიზებას და მათ უყენებს უსაფუძვლო ბრალს უმძიმეს დანაშაულებში.

თუკი “ქართულ ოცნებას” სურს ქვეყნის მძიმე პოლიტიკური ჩიხიდან გამოყვანა, პროტესტისა და მღელვარების გარეშე გაგრძელება, ისტერიული ზღაპრების შეთხზვის ნაცვლად, დაშინებულმა ხელისუფლებამ სჯობს იმუშავოს ევროპულ ინტეგრაციაზე, სტატუსის მისაღებად შესაბამისი რეფორმების გატარებაზე და ჩვენს დასავლელ პარტნიორებთან პოზიტიური დღის წესრიგით მუშაობაზე. “ლელო” ელოდება კანდიდატის სტატუსის მიღებას“, – ნათქვამია განცხადებაში.

ცნობისთვის, სახელმწიფო უსაფრთხოების სამსახური ორგანიზაცია „კანვასის“ მიმართ ჩატარებული საგამოძიებო მოქმედების შესახებ ინფორმაციას ავრცელებს და “მტკიცებულებების ნაწილს” ასაჯაროებს.

სუს-ის ინფორმაციით, 2023 წლის 25 სექტემბერს საქართველოში USAID-ის პროგრამის აღმოსავლეთ-დასავლეთის მართვის ინსტიტუტის მოწვევით ჩამოვიდნენ სერბეთის მოქალაქეები სინისა სიკმანი, იელენა სტოისიჩი და სლობოდან ჯინოვიჩი, რომლებიც დაკავშირებული არიან 2003 წელს საქართველოში განვითარებულ რევოლუციურ მოვლენებთან, სხვადასხვა წლებში კი მათ ასევე კავშირი ჰქონდათ სერბეთში, უკრაინასა და სხვა სახელმწიფოებში მიმდინარე ანალოგიურ პროცესებთან.

„ისინი აქტიურად ახორციელებდნენ საპროტესტო მუხტის წარმოქმნის მეთოდიკისა და ძალადობრივი აქციების ჩატარების ტაქტიკის სწავლებას. წარმოადგენენ ორგანიზაცია „კანვასის“ მმართველ რგოლს, აგრეთვე, სინისა სიკმანი და სლობოდან ჯინოვიჩი არიან ორგანიზაცია „ოტპორის“ ყოფილი წევრები, რომელიც სერბეთში წარმოადგენდა ქართული ორგანიზაცია „კმარას“ ანალოგს“, – აცხადებენ სუს-ში.

სუს-ის თანახმად, აღნიშნული პირების საქართველოში ჩამოსვლის გაცხადებული მიზეზი იყო კულტურის სფეროში მოღვაწე ჯგუფებისთვის ტრენინგების ჩატარება ,,სტრატეგიული არაძალადობრივი ბრძოლის“ საკითხებში, მაგრამ გამოძიებით დადგინდა, რომ საქართველოში მათი ჩამოსვლის მიზანი მხოლოდ ეს არ იყო. კერძოდ, ვიზიტის რეალური დანიშნულება იყო იმ ახალგაზრდებსა და გავლენიან არასამთავრობო ორგანიზაციებთან კომუნიკაციის დამყარება და ტრენინგების ჩატარება, რომლებიც საქართველოში მიმდინარე წლის ოქტომბერ-დეკემბერში დაგეგმილი დესტრუქციული მოქმედებების და კანონსაწინააღმდეგო ქმედებების ბირთვი უნდა გახდნენ.

ომისა და ღალატის პარტიის წარმომადგენლებს უნდათ, ახალგაზრდებს გაუგზავნონ სიგნალი, ცდილობენ, რაღაც ტყუილებზე დაფუძნებული აღქმებით ჩართონ საპროტესტო მოძრაობებში და ამ მუხტის აწევაში შეუწყონ ხელი, ახალგაზრდები დარაზმონ ამისათვის, – ამის შესახებ ჟურნალისტებს ფრაქცია „ქართული ოცნების“ თავმჯდომარემ, მამუკა მდინარაძემ განუცხადა.

მდინარაძეს კითხვა დაუსვეს, პრეზიდენტის ბოლო ქმედებებიდან გამომდინარე, აქვს თუ არა მოლოდინი, რომ სალომე ზურაბიშვილი ლაზარე გრიგორიადისს შეიწყალებს.

ფრაქცია „ქართული ოცნების“ თავმჯდომარის განცხადებით, ოპოზიციის წარმომადგენლებს უნდათ, ახალგაზრდებს სიგნალი გაუგზავნონ, რომ კრიმინალში ჩართულობისა და „მოლოტოვის კოქტეილის“ გამოყენების მიუხედავად, არ დაისჯებიან. მისივე თქმით, თუ საქართველოს პრეზიდენტი გრიგორიადისს შეიწყალებს, ისიც ამ სიგნალის თანამონაწილე იქნება.

„გრიგორიადისის მხარდაჭერა და მისი გათავისუფლების მცდელობა არის სიგნალი, ერთგვარი მესიჯი ახალგაზრდების კრიმინალში ჩართულობის კუთხით და იმისთვის, რომ ასეთი ჩართულობის შემთხვევაში ისინი არ დაისჯებიან. აი, ეს სიგნალი უნდა, რომ გააგზავნოს იმ მავნებლურმა ძალამ, რომელსაც საქართველოში ოპოზიცია ჰქვია. საქართველოს ოპოზიციის მთლიან სპექტრს, რა თქმა უნდა, არ ვეხები, რადიკალური, ომისა და ღალატის პარტიის წარმომადგენლებს ვგულისხმობ, რომელთაც უნდათ, ახალგაზრდებს გაუგზავნონ სიგნალი, ცდილობენ, რომ რაღაც ტყუილებზე დაფუძნებული აღქმებით ჩართონ საპროტესტო მოძრაობებში და ამ მუხტის აწევაში შეუწყონ ხელი, ანუ ახალგაზრდები დარაზმონ ამისათვის. შესაბამისად, სიგნალი და მესიჯი გაუშვან მათთან, რომ იმ შემთხვევაშიც კი, თუ ადამიანი პოლიციელის ცოცხლად დაწვას მოინდომებს, „მოლოტოვის კოქტეილს“ გამოიყენებს პროტესტის გამოხატვის ფორმად, ამ შემთხვევაშიც კი შესაძლებელია, ეს ადამიანი თავისუფალი იყოს, და თუ ამას საქართველოს პრეზიდენტი უზრუნველყოფს, ბუნებრივია, ისიც თანამონაწილე იქნება ამ სიგნალის“, – განაცხადა მამუკა მდინარაძემ.

შესაბამისი უწყებები მზად არიან იმ გამოწვევებზე სათანადო პასუხისთვის, რასაც გარედან თუ შიგნიდან გვახვევენ ის ადამიანები, რომლებსაც განზრახული აქვთ, საქართველოში ძალადობრივი გზით შეიცვალოს ხელისუფლება, რადგან ფიქრობენ, რომ არჩევნებით დღეს ხელისუფლების შეცვლა ოპოზიციას არ შეუძლია, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

მამუკა მდინარაძის თქმით, ქართული, შემდგარი სახელმწიფო ამას არ დაუშვებს.

„საუბარი გვქონდა სუს-ის დღევანდელ ბრიფინგთან დაკავშირებით. ჩვენ ვიცით, რომ რამდენიმე დღის წინ გვქონდა ასევე ახალი ინფორმაცია, რომ საქართველოში იგეგმებოდა, რბილად რომ ვთქვათ, გარკვეული ღონისძიებები. ამის შესახებ სახელმწიფო უსაფრთხოების სამსახურმა გვაცნობა და შეგვიძლია, თამამად ვთქვათ, რომ ნახევარი, რაც ჩვენ გავიგეთ წინა ბრიფინგიდან, უკვე გამართლდა, ახდა, როგორც იტყვიან, მიუხედავად იმისა, რომ ჩვენი ოპონენტები ღლიცინსაც კი არ იშურებდნენ ამ ახალი ინფორმაციის მისამართით. უკვე ვნახეთ, რომ, დიახ, ახალგაზრდების მონაწილეობით ჩატარდა ტრენინგები უცხოური დაფინანსებით და ამის ავტორები და შემოქმედები იყვნენ ორგანიზაცია „კანვასის“ წარმომადგენლები, რომლებიც ასევე დასახელებული იყვნენ სუს-ის წინა ბრიფინგის ტექსტში. მეორე ნახევარი უკვე არის ამ გეგმის აღსრულება, რასაც ქართული სახელმწიფო, შემდგარი ქართული სახელმწიფო არ დაუშვებს და შესაბამისი უწყებები მზად არიან იმ გამოწვევებზე სათანადო პასუხის გასაცემად, რასაც გარედან თუ შიგნიდან გვახვევენ ის ადამიანები, რომლებსაც განზრახული აქვთ, საქართველოში ძალადობრივი გზით შეიცვალოს ხელისუფლება, რადგან ფიქრობენ, რომ ჩვეულებრივი, დემოკრატიული, ლეგიტიმური – ანუ, არჩევნების გზით საქართველოში დღეს ხელისუფლების შეცვლა ქართულ ოპოზიციას არ შეუძლია. ამიტომ ფიქრობენ, რომ შეცვალონ ხელისუფლება ძალადობრივი გზით, ამის შემდეგ უმთავრეს მიზანს წარმოადგენს საქართველოს მეორე ფრონტად ქცევა. ამას არ დაუშვებს ქართული, შემდგარი სახელმწიფო და ქართული საზოგადოება. მხარდაჭერა და ეროვნული ინტერესებიდან გამომდინარე თითოეული მოქალაქის ფიქრი, განსაკუთრებით ეროვნულ და სახელმწიფოებრივ საკითხებზე, არის იმის საფუძველი, რომ ასე მყარად ისაუბროს მმართველმა გუნდმა“, – განაცხადა მამუკა მდინარაძემ საპარლამენტო უმრავლესობის სხდომის შემდეგ გამართულ ბრიფინგზე.

სახელმწიფო უსაფრთხოების სამსახურში გამართულ ბრიფინგზე დღეს განაცხადეს, რომ ორგანიზაცია „კანვასის“ წევრები სასტუმროში შეხვდნენ NGO-ებს, სამოქალაქო აქტივისტებს, გაიმართა დიდი ჯგუფის გადამზადება, რომელმაც გადამწყვეტი როლი უნდა შეასრულოს ხელისუფლების დამხობის პროცესში. მათივე ცნობით, 26-29 სექტემბერს USAID-ის დაფინანსებით ჩატარებულ კონფერენციას ორგანიზება „კანვას – საქართველომ“ და აღმოსავლეთ-დასავლეთ მართვის ინსტიტუტმა გაუწიეს. სუს-მა „კანვასის“ წარმომადგენლების მიმართ ჩატარებული ფარული საგამოძიებო მოქმედების შედეგად მოპოვებული მტკიცებულებების ნაწილი გამოაქვეყნა.