აშშ-ის თავდაცვის სამინისტროში აცხადებენ, რომ ერაყიდან ჯარების გაყვანას არ გეგმავენ. ”ამჟამად, არ ვიცი რაიმე გეგმების შესახებ (გაყვანის გეგმის შესახებ). კვლავაც ძალიან კონცენტრირებულები ვართ ISIS-ის მისიის დამარცხებაზე“, – განაცხადა პენტაგონის პრესსპიკერმა, აშშ-ის საჰაერო ძალების გენერალ-მაიორმა პატრიკ რაიდერმა და დასძინა, რომ აშშ-ის ძალები ერაყში ქვეყნის მთავრობის მიწვევით იმყოფებიან.

რაიდერის თქმით, არ აქვს ინფორმაცია, რომ ბაღდადმა აშშ-ის თავდაცვის სამინისტროს მისი ჯარების გაყვანის გადაწყვეტილების შესახებ შეტყობინება გაუგზავნა.

ცნობისთვის, ერაყის პრემიერ-მინისტრმა, მუჰამედ შია ალ-სუდანმა რამდენიმე დღის წინ განაცხადა, რომ ბაღდადი იწყებს მზადებას ქვეყანაში აშშ-ის ხელმძღვანელობით მოქმედი კოალიციური ძალების გაყვანისთვის, რადგან მათი ყოფნის საფუძველი აღარ არსებობს. ერაყის პრემიერმა ეს განცხადება მას შემდეგ გააკეთა, რაც ბაღდადში, აშშ-ის საჰაერო იერიშის დროს, ირანის მიერ მხარდაჭერილი შიიტური დაჯგუფების, „ჰარაკატ ალ-ნუჯაბას“ ლიდერის, მუშტაკ ჯავად ქაზიმ ალ-ჯავარის ლიკვიდაცია განხორციელდა.

რუსებმა ფრონტზე თავდასხმები გააძლიერეს და თავდასხმების რაოდენობა გაზარდეს, რუსეთის საოკუპაციო ძალებსა და უკრაინის შეიარაღებულ ძალებს შორის ფრონტზე, ბოლო დღე-ღამის განმავლობაში, 67 სამხედრო შეტაკება მოხდა, – ინფორმაციას უკრაინული მედია გენერალურ შტაბზე დაყრდნობით ავრცელებს.

გენშტაბის ცნობით, რუსული ძალები უკრაინის შეიარაღებული ძალების პოზიციების გარღვევას ერთდროულად 7 მიმართულებით ცდილობდნენ. უკრაინელებმა კუპიანსკის მიმართულებით, ხარკოვის ოლქის სინკოვკას დასახლების მახლობლად რუსების 5 თავდასხმა მოიგერიეს. რუსულმა ძალებმა, ლიმანის მიმართულებით, დონეცკის ოლქის ტერნის დასახლების აღმოსავლეთით ორი წარუმატებელი შეტევა განახორციელეს. უკრაინელებმა რუსების კიდევ ორი თავდასხმა ბახმუტის მიმართულებით დონეცკის ოლქის კლეშჩიევკასა და ანდრეევკას რაიონებში მოიგერიეს.

„ავდეევკას მიმართულებით, უკრაინელი დამცველები აგრძელებენ მტრის შეკავებას, რომელიც არ წყვეტს ავდეევკას ალყაში მოქცევის მცდელობებს. ჩვენი ჯარისკაცები მტკიცედ ინარჩუნებენ თავდაცვის ხაზს და მნიშვნელოვან ზარალს აყენებენ დამპყრობლებს. ბოლო 24 საათის განმავლობაში, თავდაცვის ძალებმა ავდეევკას, სევერნისა და ტონენკოეს მახლობლად მტრის 3 თავდასხმა მოიგერიეს, დონეცკის ოლქის პერვომაისკისა და ნეველსკის მახლობლად კი – 15 თავდასხმა“, – აღნიშნულია გენშტაბის ანგარიშში.

მათივე ცნობით, მარინკას მიმართულებით, უკრაინის შეიარაღებული ძალები აგრძელებენ დამპყრობლების შეკავებას დონეცკის ოლქის გეორგიევკასა და ნოვომიხაილოვკას რაიონებში, სადაც მათ 12 შეტევა მოიგერიეს. ამასთან, ზაპოროჟიეს მიმართულებით, რუსული ძალები უკრაინის პოზიციების გარღვევას ცდილობდნენ. ამ მიმართულებით, უკრაინელებმა რუსების შვიდი შეტევა მოიგერიეს.

ტეხასის შტატის ერთ-ერთ ისტორიულ სასტუმროში აფეთქების შედეგად, სულ მცირე, 21 ადამიანი დაშავდა. ინფორმაციას „სიენენი“ ავრცელებს.

მედიის ცნობით, აფეთქებას მსხვერპლი არ მოჰყოლია.

როგორც „სიენენი“ წერს, დაშავებული 21 ადამიანიდან ერთი კრიტიკულ, ხოლო ოთხი მძიმე მდგომარეობაშია.

„სიენენის“ ინფორმაციით, სასტუმროში აფეთქება ბუნებრივმა აირმა გამოიწვია. გამომძიებლები მუშაობენ, რათა აფეთქების გამომწვევ მიზეზებზე მეტი დეტალი დაადგინონ.

იაპონიაში მიწისძვრის შედეგად დაღუპულთა რიცხვი 180-მდე გაიზარდა, – ინფორმაციას ადგილობრივი მედია ავრცელებს.

მათივე ინფორმაციით, იშიკავას პრეფექტურის ოფიციალური პირები აცხადებენ, რომ 120-ზე მეტი ადამიანი ჯერ კიდევ უგზო-უკვლოდ დაკარგულად ითვლება.

განადგურებული გზებისა და კომუნიკაციების გამო, სტიქიის შედეგები ბოლომდე ცნობილი ჯერ კიდევ არ არის. ეს ძირითადად ეხება იშიკავას პრეფექტურის ქალაქებს, ვაჯიმასა და სუზუს. მაშველები და ადგილობრივი ხელისუფლების წარმომადგენლები სტიქიის მასშტაბის შესაფასებლად რამდენიმე რაიონამდე მისვლას ამ დრომდე ვერ ახერხებენ. იშიკავას პრეფექტურაში აცხადებენ, რომ ნოტოს რეგიონში 3 000-ზე მეტი ადამიანი გარე სამყაროსგან იზოლირებულია.

შეგახსენებთ, იაპონიაში 1-ელ იანვარს მიწისძვრების სერია მოხდა, მათგან ყველაზე ძლიერი 7.6 მაგნიტუდის სიმძლავრის იყო.

გერმანიის კანცლერი ოლაფ შოლცი აცხადებს, რომ ევროკავშირის წევრი ქვეყნების უმეტესობა არ აწვდის უკრაინას საკმარის იარაღს და მოუწოდებს მათ, რომ გაზარდონ ძალისხმევა. ამის შესახებ შოლცმა ლუქსემბურგის პრემიერ-მინისტრთან, ლუკ ფრიედენთან შეხვედრის შემდეგ მედიას განუცხადა.

„რაც არ უნდა მნიშვნელოვანი იყოს გერმანიის წვლილი, ეს არ იქნება საკმარისი უკრაინის უსაფრთხოების გრძელვადიან პერსპექტივაში უზრუნველსაყოფად. ამიტომ მოვუწოდებ მოკავშირეებს ევროკავშირში, გააძლიერონ თავიანთი ძალისხმევა უკრაინასთან მიმართებით“, – განაცხადა შოლცმა.

გერმანიის კანცლერმა ასევე აღნიშნა, რომ იარაღის მიწოდება უკრაინისთვის, რაც ევროკავშირის წევრი ქვეყნების უმეტესობას აქვს დაგეგმილი, არ არის საკმარისი.

ამერიკის შეერთებული შტატების სახელმწიფო მდივანი ისრაელშია. ღაზის სექტორში ომის დაწყების შემდეგ, ენტონი ბლინკენი თელ-ავივში უკვე მეოთხედ ჩავიდა. მანამდე კი, ის ახლო აღმოსავლეთის ქვეყნებში იმყოფებოდა. აშშ-ის მთავარი დიპლომატის ვიზიტების მიზანი, კონფლიქტის შეკავება და მისი გაუვრცელებლობაა.

„ყველგან, სადაც მივედი, ვნახე ლიდერები, რომლებიც მოწადინებულნი არიან, რომ თავიდან აირიდონ კონფლიქტის გავრცელება. ისინი ყველაფერს აკეთებენ ესკალაციის შესაჩერებლად, კონფლიქტის გაფართოების თავიდან ასაცილებლად. რეგიონის მომავალი ინტეგრაცია უნდა იყოს, ამისთვის კი, პალესტინის დამოუკიდებელი სახელმწიფო უნდა შეიქმნას.

ყველას, ვისაც ვესაუბრე, ესმის, რომ ეს მარტივი არ იქნება. ჩვენ ყველაფერს ვიაზრებთ, ვიცით, რომ ეს უცებ, ერთ საათში ვერ მოხერხდება, მაგრამ ერთად მუშაობაზე შევთანხმდით. მზად ვართ, რთული გადაწყვეტილებები მივიღოთ“, -აღნიშნა ბლინკენმა.

თეთრი სახლის ჭიშკარს ავტომობილი შეეჯახა.

ინფორმაციას Reuters-ი აშშ-ის საიდუმლო სამსახურზე დაყრდნობით ავრცელებს.

საიდუმლო სამსახურის კომუნიკაციების ხელმძღვანელის, ენტონი გულიელმის განცხადებით, მძღოლი დაკავებულია და ინციდენტის მიზეზის დასადგენად გამოძიება მიმდინარეობს.

მომხდარის მოტივი და სხვა გარემოებები ჯერ უცნობია. დაწყებულია გამოძიება. ინციდენტისას პრეზიდენტი ჯო ბაიდენი ვაშინგტონში არ იმყოფებოდა.