„ევროპული საქართველოს“ თავმჯდომარის, გიგა ბოკერიას განცხადებით, სანამ დეოკუპაცია არ მოხდება, ოკუპირებულ ტერიტორიაზე არსებული კატასტროფული ვითარება მთლიანად ვერ შეიცვლება, „მაგრამ ოკუპაციის პირობებშიც კი საქართველოს ხელისუფლებას აქვს ინსტრუმენტები, რომელიც ვალდებულია, მოქალაქეებისთვის რისკის შესამცირებლად გამოიყენოს“.

ამის შესახებ მან ენგურჰესთან საოკუპაციო რეჟიმისთვის ენერგიის მიწოდებასთან დაკავშირებით გამართულ ბრიფინგზე განაცხადა.

მისი თქმით, ენგურჰესი არის ერთ-ერთი ინსტრუმენტი, რომელიც ნორმალური მთავრობის პირობებში უნდა გამოყენებულიყო საოკუპაციო რეჟიმზე წნეხის მოსახდენად, მაგრამ ამის ნაცვლად, „გვაქვს ვითარება, რომ ბოლო წლების განმავლობაში ჰესი თითქმის მთლიანად საოკუპაციო რეჟიმს ემსახურება”.

„არსებობს გრაფიკი, თუ წლების განმავლობაში როგორ იცვლებოდა ბალანსი არაოკუპირებული საქართველოსთვის მოხმარებული ენერგიისა და საოკუპაციო რეჟიმის მიერ წართმეული ენერგიის მოცულობას შორის. მანამდე არსებობდა 90-იანი წლების შეთანხმება, როდესაც წილი 60/40-ზე იქნებოდა, ეს არ იყოს სასურველი ამბავი, მაგრამ ეს იქნა მიღწეული. ბოლო წლებში, ანუ ამ რეჟიმის პირობებში, 80%-მდე და ზოგჯერ უფრო მეტიც მიეწოდება საოკუპაციო რეჟიმს. ისმის კითხვა რატომ?! მტერთან კომპრომისი შესაძლოა აუცილებელი გახდეს, თუმცა ჩვენ უნდა ვიცოდეთ, თუ რისთვის აკეთებს ის ხელისუფლება, რომელიც წესით ჩვენს ინტერესებს უნდა იცავდეს ამას.

რატომ ვაძლევთ ჩვენს მტერს ენერგიას? რაში არის ეს გაცვლილი? თუ კი ჩვენი მოქალაქეებისთვის მდგომარეობა უარესდება, მკვლელობები გრძელდება და ამისთვის ფასს ჩვენი მტერი არ იხდის, მაშინ ჩნდება ლეგიტიმური ეჭვი, რომ ადგილი აქვს გარიგებას, ან პოლიტიკურ-გეოპოლიტიკურ გარიგებას ჩვენს მტერთან ეროვნული ინტერესების ხარჯზე, ან კომერციულ, ანუ კორუფციულ გარიგებას. (არსებობს ვერსია, რომ ოკუპირებულ ტერიტორიაზე მაინინგი ხდება, რაშიც საქართველოს ხელისუფლებიდან არის ვიღაც ჩართული). სხვა ახსნა ამ ტენდენციას გარდა ჩვენი პირდაპირი მტრისთვის ხელისშეწყობისა, ან ჩვენი ეროვნული ინტერესების ხარჯზე ფულის კეთებისა ამას არ აქვს,“ – აღნიშნა ბოკერიამ.

მისივე თქმით, ენგურჰესის მოხმარების წილი 90-იანი წლების მერე საქართველოს მხრიდან ისედაც შემცირდა, რადგან სხვა ჰესებიც გაჩნდა, ამ ინსტრუმენტით კი შეგვიძლია რუსეთსა და მის მარიონეტებზე ზეწოლა მოვახდინოთ.

„შეგვიძლია ვთქვათ, რომ თუ არ გამოსწორდება იქ ვითარება, ენერგიის მიწოდება მთლიანად ჩაიკეტება მათთვის. ჩვენ ეს შეგვიძლია გავაკეთოთ ჩვენი ენერგეტიკისთვის მნიშვნელოვანი ზარალის გარეშე. ჩვენ რომ ნორმალური მთავრობა გვყავდეს ამ ვითარებას უნდა იძიებდეს უსაფრთხოების სამსახური, ხომ არ გვაქვს საქმე ქვეყნის საბოტაჟთან? – ეს კითხვები საზოგადოებამ მაინც უნდა დასვას რიტორიკულად, რადგან დამაჯერებელი პასუხების იმედი არ გვაქვს.

ეს მაინც უნდა იქცეს თემად, რადგან როცა ხალხი დამნაშავეების დასჯას ითხოვს, სინამდვილეში ჩვენ მოქალაქეების მკვლელობას ვაფინანსებთ. ეს კითხვები უნდა დასვას მედიამ და საზოგადოებამ იმ ხელისუფლების წინაშე, რომელიც სამწუხაროდ, დღეს ჩვენი ქვეყნის ბედზეა პასუხისმგებელი“, – განაცხადა ბოკერიამ.

„ჩვენი მოქალაქეები აბსოლუტურად დაუცველები არიან საოკუპაციო რეჟიმთან მიმართებაში. ამ ადამიანებზე ზრუნვის  ნებაც კი არ ჩანს თქვენგან. ამ პოლიტიკით არათუ საქართველოს იმ მოქალაქეებს, რომლებიც ოკუპირებულ ტერიტორიებზე ცხოვრობენ ერთიან საქართველოში ცხოვრების სურვილი გაუჩნდებათ, არამედ ჩვენს კონტროლირებად ტერიტორიაზე მცხოვრებ მოქალაქეებსაც გაუჩნდებათ ემიგრაციის სურვილი  და ამაზე სტატისტიკაც მეტყველებს“, – განაცხადა პლენარულ სხდომაზე საპარლამენტო პოლიტიკური ჯგუფის „საქართველოსთვის“ წევრმა ალექსანდრე მოწერელიამ.

როგორც მან აღნიშნა, ხელისუფლების ე.წ.პრაგმატულმა პოლიტიკამ ქვეყნას დადებით შედეგი ვერ მოუტანა.

„რუსეთთან ენის მოჩლექით ლაპარაკს აზრი არა აქვს, ამან შედეგი არ გამოიღო. ლავროვი მოგვიწოდებს საზღვრის დემარკაციისკენ, ასევე გვამცნეს, რომ ოჩამჩირეში სამხედრო ბაზის მშენებლობა დაიწყება. მაინტერესებს, რუსეთის თითქმის ყველა ქალაქთან ფრენების აღდგენას და რუსი ტურისტების უკონტროლო შემოშვებამ შედეგი რა გამოიღო? რა მივიღეთ?

მივიღეთ ის, რომ ეკონომიკურად კიდევ უფრო მიჯაჭვული გახდა საქართველო რუსეთზე. სად არის ეგრეთ წოდებული პრაგმატული პოლიტიკის შედეგები?! მინდა „ოცნების“ მესვეურებს მივმართო, იქნებ საზოგადოებას აუხსნათ რუსეთთან ჯერ არნახული და არგაგონილი პრაგმატული პოლიტიკის და დიპლომატიის არსი. სამწუხაროდ, არანაირი  პოლიტიკა და დიპლომატია არ ჩანს. რაც ჩანს, ეს არის რუსეთთან მიმართებაში კაპიტულანტური მიდგომა და საქართველოს სტრატეგიულ მოკავშირეებთან დისტანცირების პოლიტიკა“, – განაცხადა ალექსანდრე მოწერელიამ.

ჩვენი მთავარი სათქმელი ბრიუსელში იყო ის, რომ საქართველოს ადგილი არის ნატო-ში და დღეს, როგორც არასდროს მნიშვნელოვანია საქართველოს ნატო-ში წევრობა, საქართველოს უსაფრთხოების განმტკიცებაში ალიანსის როლის გაზრდა. ჩვენი ქვეყანა ერთგულია ვაშინგტონის ხელშეკრულების პრინციპების. დიდი ხანია მოქმედებს როგორც პასუხისმგებლობიანი წევრი და ბევრად მეტს აკეთებს ევრო-ატლანტიკური უსაფრთხოებისთვის, ვიდრე ზოგიერთი მოკავშირე, – განაცხადა პლენარულ სხდომაზე საპარლამენტო უმრავლესობის წევრმა, ირაკლი ბერაიამ.

როგორც მან აღნიშნა, საქართველოს პარლამენტის თავმჯდომარე, დელეგაციასთან ერთად, ოფიციალური ვიზიტით ნატო-ს შტაბ-ბინას სტუმრობდა, სადაც მონაწილეობა მიიღო ნატო-საქართველოს კომისიის სხდომაში და ასევე შეხვდა გენერალური მდივნის მოადგილეს და ალიანსის წევრი სახელმწიფოების ელჩებს.

„ეს ვიზიტი ადასტურებს საქართველოს უმაღლეს პოლიტიკურ დღის წესრიგში ალიანსში გაწევრების პრიორიტეტულობას, ხაზს უსვამს ნატო-საქართველოს პარტნიორობის ყოვლისმომცველ ხასიათს და პარლამენტის განსაკუთრებულ როლს საქართველოს ევროატლანტიკური ინტეგრაციის პროცესში.

ვიზიტს ასევე ჰქონდა განსაკუთრებული დატვირთვა ევროპული უსაფრთხოებისთვის ამ კრიტიკულად მნიშვნელოვან პერიოდში. ნატო-ში, პარლამენტის თავმჯდომარემ ისაუბრა რუსულ ოკუპაციაზე და მის მძიმე შედეგებზე, დეოკუპაციისთვის საერთაშორისო ძალისხმევის გაზრდის საჭიროებაზე, ასევე, ქართული დემოკრატიის და უსაფრთხოების შემდგომი განმტკიცების, ქვეყნის განვითარების და მოქალაქეების კეთილდღეობის უზრუნველყოფის ამბიციურ დღის წესრიგზე. ის იყო ძალიან პრინციპული, ევროატლანტიკური ინტეგრაციის გზაზე ალიანსის მხრიდან მეტი სიცხადის და ამ გზაზე საქართველოს დაწინაურების აუცილებლობის ხაზგასმაში“, – აღნიშნა ირაკლი ბერაიამ

მისივე განცხადებით, ნატო-ში დელეგაციის ვიზიტის დროს კიდევ ერთხელ გამოჩნდა მოკავშირეების ერთსულოვნება საქართველოს სუვერენიტეტის, ტერიტორიული მთლიანობის და ევროატლანტიკური ინტეგრაციის მხარდაჭერაში.

„აღინიშნა საქართველოს შთამბეჭდავი პროგრესი ინტეგრაციის გზაზე, ფასდაუდებელი წვლილი გლობალურ უსაფრთხოებაში და ჩვენი ქვეყანა კიდევ ერთხელ დაახასიათეს, როგორც ჩემპიონი რეფორმების თვალსაზრისით. მათი თქმით, ალიანსი ერთგულია 2008 წლის ბუქარესტის სამიტის გადაწყვეტილების და ვერცერთი მესამე სახელმწიფო ამას წინ ვერ აღუდგება. ხაზს უსვამენ, რომ საქართველო გახდება ნატო-ს წევრი, რომ ისინი გააგრძელებენ ჩვენს მხარდაჭერას ამ გზაზე, და საკუთარი მოქმედებების, ევროატლანტიკური დღის წესრიგის საქართველოსთან კოორდინაციას.

განსაკუთრებით საამაყოა, როდესაც ნატო-საქართველოს კომისიის სხდომაზე, ოვალურ მაგიდასთან, სადაც წარმოდგენილია ალიანსის 31 სახელმწიფო, საქართველოს პარლამენტის თავმჯდომარეს ესაუბრებიან, როგორც თანასწორ სუბიექტს, როგორც ალიანსის მომავალი წევრი სახელმწიფოს ერთ-ერთ ლიდერს და ისმენენ მისგან საქართველოს შეფასებებს ევროპულ უსაფრთხოებაზე და ქართული სახელმწიფოს ხედვას მის განმტკიცებაზე. ნატო-საქართველოს კომისიის სხდომებზე არის მაქსიმალურად გახსნილი, ნდობაზე დაფუძნებული, საქმიანი და დეტალური დისკუსიის ატმოსფერო“, – განაცხადა საპარლამენტო უმრავლესობის წევრმა.

მისი თქმით, საქართველოს ევროატლანტიკური მისწრაფება და ნატო-სთან პრაქტიკული და პოლიტიკური თანამშრომლობა კიდევ უფრო გაძლიერდა უკრაინის წინააღმდეგ რუსეთის ფართომასშტაბიანი სამხედრო აგრესიის შემდეგ.

„ამას ადასტურებს ნატო-საქართველოს სწავლება და მრავალეროვნული სამხედრო წვრთნები; მადრიდის სამიტის შედეგები, პრემიერ-მინისტრის, საგარეო საქმეთა და თავდაცვის მინისტრების ნატო-ში ვიზიტები; პარლამენტის ჩართულობის ზრდა ნატო-საქართველოს კომისიის სხდომებში, ნატო-ს სამხედრო კომიტეტის და სხვა მაღალი დონის ვიზიტები თბილისშიც და ბრიუსელშიც. ევროატლანტიკური სივრცის სრულფასოვანი უსაფრთხოება წარმოუდგენელი და მიუღწეველია საქართველოს ნატო-ში წევრობის გარეშე, შავი ზღვის რეგიონზე ნატო-ს ღია კარის პოლიტიკის გავრცელების გარეშე. საქართველო დიდი ხანია გასცდა ნატო-ში გაწევრების კრიტერიუმების დაკმაყოფილების ნიშნულს და მზად არის ალიანსში წევრობისთვის. დაუშვებელია ამ გადაწყვეტილების გაწელვა, რადგან ამ კუთხით ბუნდოვანება კვებავს აგრესორ სახელმწიფოს და საზიანოა წესებზე დაფუძნებული საერთაშორისო წესრიგისთვის. საქართველო ითხოვს და ელოდება სამართლიან, დამსახურებულ და დროულ შემხვედრ ნაბიჯებს მოკავშირეების მხრიდან“, – აღნიშნა ირაკლი ბერაიამ.

მას შემდეგ, რაც ქვეყანამ აღიდგინა დამოუკიდებლობა, ძალიან დიდი დარტყმა მიადგა განათლების სისტემას. არაერთი მცდელობა იყო ტრანსფორმაციის, განახლების, განვითარების, მაგრამ შემდეგ იყო ვითომ რეფორმები 2004 წელს ჩატარებული, შეიძლება ითქვას, რომ მოანგრიეს მთელი სისტემა და რაღაც ახლებური ხედვა იქნა წარმოდგენილი, რომელიც ემსახურებოდა რაღაც ექსპერიმენტების ჩატარებას ჩვენს ახალგაზრდებზე, – ამის შესახებ საქართველოს პრემიერ-მინისტრმა ირაკლი ღარიბაშვილმა ზოგადი განათლების მიმდინარე რეფორმის წარდგენის ღონისძიებაზე სიტყვით გამოსვლისას განაცხადა.

მთავრობის მეთაურის თქმით, იყო მცდელობა, რომ შეეცვალათ ეროვნული იდენტობა.

„მოგესალმებით პატივცემულო მეგობრებო, პარლამენტისა და მთავრობის წევრებო, საპატრიარქოს წარმომადგენლებო, ძვირფასო ელჩებო, ძვირფასო პედაგოგებო, მასწავლებლებო, ჩემო მეგობრებო. ჩემთვის დიდი პატივია აქ ყოფნა ბატონმა მინისტრმა ძალიან მნიშვნელოვანი საქმე წამოიწყო და დრეს პატივი გვაქვს, რომ წარმოგიდგინოთ ძალიან მნიშვნელოვანი ხედვა და სტრატეგია, თუ როგორ ესახება მთავრობას და სამინისტროს ზოგადი განათლების განვითარება. ბატონმა გიორგიმ დანიშვნისთანავე ძალიან აქტიურად დაიწყო მუშაობა. ძალიან მნიშვნელოვანი ინიციატივები დაამუშავა, წარმოადგინა თავისი ხედვა, სტრატეგია, თუ როგორ უნდა განვითარდეს, კიდევ უფრო მეტად როგორ უნდა გადავიდეს სხვა ეტაპზე, სხვა სიმაღლეზე განათლების ყველა საფეხური და თუ როგორ უნდა წავიწიოთ წინ. მიუხედავად იმისა, რომ ჩვენი ხელისუფლების დროს, ბოლო 11 წელიწადში ძალიან მნიშვნელოვანი რეფორმები განვახორციელეთ, გამოწვევები კვლავაც რჩება სისტემაში, ვინაიდან, კარგად მოგეხსენებათ, რომ ჯერ კიდევ საბჭოთა კავშირის დანგრევის შემდეგ, მას შემდეგ, რაც ქვეყანამ აღიდგინა დამოუკიდებლობა, ძალიან დიდი დარტყმა მიადგა განათლების სისტემას. არაერთი მცდელობა იყო ტრანსფორმაციის, განახლების, განვითარების, მაგრამ შემდეგ იყო ვითომ რეფორმები 2004 წელს ჩატარებული, შეიძლება ითქვას, რომ მოანგრიეს მთელი სისტემა და რაღაც ახლებური ხედვა იქნა წარმოდგენილი, რომელიც ემსახურებოდა რაღაც ექსპერიმენტების ჩატარებას ჩვენს ახალგაზრდებზე. რაღაც ახალი ქართველის, ახალი ადამიანის გამოყვანა სურდათ მათ. მე ასე ვიტყოდი, რომ რეალურად, ეს იყო მცდელობა, რომ შეეცვალათ ჩვენი ეროვნული იდენტობა, ჩვენი დნმ, ქართველობა. ეს იყო აბსოლუტურად გაუაზრებელი, ილუზია, უტოპია, რომელიც ძალიან მალე დასრულდა.”, – განაცხადა პრემიერ-მინისტრმა.

ღარიბაშვილი მხოლოდ ტექნიკურად კი არ იტყუება, როდესაც ხალხს ეკონომიკურ ზრდას ამადლის, მისი ტყუილი, სინამდვილეში, ივანიშვილის ცნობილი ნარატივის პოლიტიკური მემკვიდრეობაა, ეს ნარატივი ასეთია: „ხალხი ძალიან კარგად ცხოვრობს, მაგრამ ამის შეფასებისთვის ღრმა ანალიზის უნარს არის მოკლებული!“,- ამის შესახებ პარტია „საქართველოსთვის“ წევრმა ბექა ლილუაშვილმა პარლამენტის პლენარულ სხდომაზე სიტყვით გამოსვლისას განაცხადა.

მისივე განცხადებით, გაზრდილ ეკონომიკას ხალხი იმიტომ ვერ გრძნობს, რომ „ასეთია პოლიტიკური კორუფციის ფასი – ეკონომიკა იზრდება, ასევე იზრდება 20-25 ოჯახის საბანკო და არასაბანკო ანგარიშები, იზრდება „ოცნების“ შავი საარჩევნო ყულაბაც“.

„გუშინ საზოგადოებრივი აზრის მორიგი კვლევა გამოქვეყნდა. ღარიბაშვილის „ეკონომიკური დუღილის“ ფენომენი, ტყუილი – ჩვენმა მოქალაქეებმა ამხილეს! მანამდე იყო რუსეთის ხელისუფლება, რომელიც ასევე ღარიბაშვილის ამ ცრუ თვითკმაყოფილებას წყალი შეუყენა და რუსი ტურისტები დაგვამადლა. ამჯერად ხალხმაც პირდაპირ ამხილა. სინამდვილე ასეთია: ეკონომიკა იზრდება – ხალხის პრობლემებიც იზრდება. ანუ ღარიბაშვილი მხოლოდ ტექნიკურად კი არ იტყუება, როდესაც ხალხს ეკონომიკურ ზრდას ამადლის, მისი ტყუილი, სინამდვილეში, ივანიშვილის ცნობილი ნარატივის პოლიტიკური მემკვიდრეობაა. ეს ნარატივი ასეთია: „ხალხი ძალიან კარგად ცხოვრობს, მაგრამ ამის შეფასებისთვის ღრმა ანალიზის უნარს არის მოკლებული!“, არადა, კვლევის მიხედვით: ყოველ მე-10 ოჯახს საჭმლის ფული არ აქვს. ყოველ მე-4 ოჯახს, მხოლოდ საჭმლისთვის ყოფნის შემოსავალი. მთავარ გამოწვევად ქვეყანაში სიღარიბე და უსაფრთხოება სახელდება. მოქალაქეების 16% ემიგრაციაში წასვლას გეგმავს და ამის მთავარი მიზეზი, სწორედ, სამუშაო ადგილების ნაკლებობა და დაბალი ხელფასებია. იცით, რატომა არის ასე? რატომ იზრდება ეკონომიკა, მაგრამ ხალხი ამას ვერ გრძნობს? იმიტომ რომ ასეთია სწორედ პოლიტიკური კორუფციის ფასი – ეკონომიკა იზრდება, ასევე იზრდება 20-25 ოჯახის საბანკო და არასაბანკო ანგარიშები, იზრდება ოცნების შავი საარჩევნო ყულაბაც. თუ სისტემური კორუფცია თქვენს ილუზიებში არ არსებობს, მაშინ რატომ არ შექმენით საგამოძიებო კომისია ქოლცენტრებზე? რატომ არ აფართოებთ დეკლარაციების შემვსებ პირთა წრეს? კიდევ ერთხელ მოვითხოვთ, შექმენით საგამოძიებო კომისია „ჯორჯიან ეარვეისის“ დავალიანების ჩამოწერის საკითხზე! რატომ გეშინიათ? ხომ აგზავნიდით სამთავრობო არხებს, მტკიცებულებები გვინდაო? ნუ გადაეფარებით ამ კომისიებს და გექნებათ! დაელაპარაკეთ ქართველ ხალხს! ესაუბრეთ მოშიმშილე აქციის მონაწილე მასწავლებლებს, რომლებიც აპროტესტებენ განათლების სისტემის მთლიან პოლიტიზებას! ესაუბრეთ ახალგაზრდებს, სადაც ნულოვანი რეიტინგი გაქვთ! ესაუბრეთ ეთნიკურ უმცირესობებს და მშიერ ბავშვებს რეგიონებში! მაგრამ თქვენ ამის რესურსი არ გაქვთ, უზარმაზარი მხარდაჭერა გქონდათ და ახლა, სისტემას ამოფარებულები, მხოლოდ თქვენი კორუფციით ნაშოვნი ფულის დაცვისთვის ზრუნავთ. მხოლოდ კორუფციული ინტერესით მოძრაობთ – ისიც, „ბასლაინში“!“, – განაცხადა ბექა ლილუაშვილმა.

„სულ რამდენიმე დღე დარჩა და ზეიმსაც და ხალხსაც ჩვენ გაჩვენებთ ისევე, როგორც გაჩვენეთ, თუ როგორ შეიძლება ევროკავშირის კანდიდატის სტატუსის მოპოვება ომის, რევოლუციისა და ცალ ფეხზე დგომის გარეშე, ღირსეულად, ამაყად და არა მორჩილებით. ტყუილს მოკლე ფეხი აქვს და იდექით ცალ ფეხზე, თქვენ მაინც მოგწონთ ეგ მდგომარეობა. ქვეყანა კი განაგრძობს წინსვლას”, – მიმართა „ხალხის ძალის” წარმომადგენელმა, დიმიტრი ხუნდაძემ ოპოზიციის წარმომადგენლებსა პარლამენტის პლენარულ სხდომაზე.

მისი თქმით, ოპოზიცია სიცრუეზე დაფუძნებული ორმაგი სტანდარტით მოქმედებს, სიცრუე კი ბოლოს მაინც მჟღავნდება.

„თქვენი ევროპელობის სურვილიც ყალბი რომ იყო, თავადვე ამხილეთ საკუთარი გუნდის წევრები, რომ მათ სტატუსის მინიჭება არ სურდათ და ხელის შესაშლელად დადიოდნენ ევროპაში, მაგრამ საბედნიეროდ, არ გამოუვიდათ და ქვეყანა რამდენიმე დღეში იზეიმებს ამ წინსვლას. ეს ზეიმიც გინდოდათ მიგეთვისებინათ, მაგრამ ხელში შეგრჩათ დიდი დროშა და ცოტა ხალხი.

ნურც პრეზიდენტის იმედი გექნებათ. მან თავისი არჩევნებისთვის ვერ მოაგროვა მხარდამჭერები და თქვენ როგორ მოგიგროვებთ?

ხომ ნახეთ, რომ თურმე არც მიხეილ სააკაშვილს აწამებენ და არც კვდება. მოფერიანდა და არჩევნებისთვის ემზადება. თუმცა, მარტო ის არ ემზადება. გულწასულ და სულწასულ ოპოზიციას არჩევნების შემდგომი პერიოდისთვის ამზადებენ რევოლუცია მიუღწეველი ლობისტები. შემდგომისთვის იმიტომ, რომ არჩევნებში მათგან არაფერი გამოვა.

NDI-მაც შეაშველა თავისი კვლევა, თითქოს ამომრჩევლების 62% გადაუწყვეტელია და ამით ქვეყანაში სურთ მესამე ძალის მოთხოვნის ცრუ განწყობა შექმნან, მაგრამ NDI ისევე ასცდება არჩევნების რეალურ შედეგებს, როგორც ასცდა წინა 8 შემთხვევაში, თუმცა, “ქართული ოცნების” უპირატესობა მაინც ვერ დამალა.

მძიმეა ტყუილის ავტორობა, მძიმეა ცალ ფეხზე დგომა, მძიმეა აგენტობა და მონური ფსიქოლოგია და უპერსპექტივოა ორმაგი სტანდარტებით თამაში.

ტყუილს მოკლე ფეხები აქვს და იდექით ცალ ფეხზე, თქვენ მაინც მოგწონთ ეგ მდგომარეობა. ქვეყანა კი განაგრძობს წინსვლას”, – განაცხადა დიმიტრი ხუნდაძემ.

კეზერას და ჭყიპინას დონეზეა დასული „ნაცმოძრაობა“. კეზერა და ჭყიპინა როცა ხვდებიან ერთმანეთს კვიპროსში და ეს „ნაცმოძრაობის“ გარშემო განსაკუთრებული, სპეციალური თემა ხდება, მიუთითებს, რომ პოლიტიკური პარტია სრულად დეგრადირებულია, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

კობახიძის თქმით, „ნაციონალური მოძრაობის“ დაშლის პროცესი გარკვეული ძალების მხრიდან კოორდინირებულია და გეგმის ნაწილია.

„ნაციონალურ მოძრაობაში“ არის სერიოზული კრიზისი. მეორე მხრივ, საზოგადოებამ ყურადღება უნდა მიაქციოს, რომ დაშლის პროცესი არის კოორდინირებული გარკვეული ძალების მხრიდან. გეგმაა, რომ „ნაციონალურ მოძრაობასთან“ ერთად, ბარიერი გადალახოს კიდევ ერთმა „ნაცურმა“ პოლიტიკურმა ძალამ, ოღონდ არ უნდა ერქვას პარტია „ნაციონალური მოძრაობა“, იქნება ალტერნატიული პარტია. აქ მოიაზრებიან კონკრეტული სუბიექტები, მათ შორის ეს არის „ლელო“, გახარია, სალომე ზურაბიშვილი, ლომჯარია და ამას ემატება მელია. გეგმა იკვრება, რომ „ნაციონალურ მოძრაობასთან“ ერთად, ბარიერი გადალახოს სუბიექტებმა, ამაზე მუშაობენ ვიღაცები. იმედი აქვთ, ეს ადამიანები 6-7 პროცენტს აიღებენ და ოპოზიციიდან პარლამენტში შევა არა მხოლოდ ერთი პოლიტიკური პარტია, არამედ დემატება მეორე პოლიტიკური პარტია, თუმცა თავადაც შეგიძლიათ, დააკვირდეთ მოვლენებს. მეეჭვება, რომ ამ სუბიექტმა,  „ნაცმოძრაობის“ მეორე ფრონტმა ბარიერის გადალახვა შეძლოს“, – განაცხადა კობახიძემ.

ირაკლი კობახიძის განცხადებით, „ნაციონალურ მოძრაობაში“ პროცესებს წარმართავს კეზერაშვილი, თუმცა, კობახიძის თქმით, „მთავარია, ვინ მართავს თვითონ კეზერაშვილს“.

„რეალურად, კეზერაშვილი ხარჯავს მთლიანად ფულს „ნაციონალურ მოძრობაში“. აქედან გამომდინარე, ბუნებრივია, ის წარმართავს პროცესებს. მთავარი ის არის, კეზერაშვილს ვინ მართავს. ეს ცალკე საკითხია. „ნაციონალური მოძრაობის“ დაშლის პროცესი ერთი მხრივ, კრიზისის გამოხატულებაა, მაგრამ ამავე დროს, „ნაცმოძრაობის“ დაშლის პროცესი არის კოორდინირებული. კეზერაშვილმა რომ თავის დროზე ხაბეიშვილი დანიშნა „ნაცმოძრაობის“ თავმჯდომარედ, ესეც მიუთითებს იმ კოორდინაციაზე, რომელიც ამ პროცესის გარშემო შეინიშნება. ვიღაცების ინტერესებშია, რომ დაბლა დაიწიოს „ნაცმოძრაობის“ პროცენტმა, რათა მესამე პარტიამ მოახერხოს ბარიერის გადალახვა. რაღაცნაირად უნდა დააბალანსონ პროცენტები ერთმანეთში. ფიქრობენ, რომ „ნაცმოძრაობა“ 20 პროცენტს თუ აიღებს, ამ შემთხვევაში, „ნაცმოძრაობის“ მეორე ფლანგს – მელია, ზურაბიშვილი, ლომჯარია, გახარია, ხაზარაძე, გაუჭირდებათ ბარიერის გადალახვა. მათაც რომ გადალახონ ბარიერი, „ნაცმოძრაობამ“ ცოტა ნაკლები უნდა მიიღოს. ეს არის მარტივი გეგმა, თუმცა საზოგადოება ამ გეგმას გაშიფრავს“, – განაცხადა კობახიძემ.

ამასთან, როგორც კობახიძემ აღნიშნა, არაერთხელ იყო მცდელობა ეგრეთ წოდებული მესამე ძალის შექმნის, თუმცა ეს პროექტი ყოველ ჯერზე ჩავარდა.

„გახსოვთ, სხვადასხვა დროს იყო მცდელობა, „ნაცმოძრაობის“ გვერდით შეექმნათ ეგრეთ წოდებული მესამე ძალა. 2016 წელს ჯერ იყო „ევროპული საქართველო“, მთელი გეგმა იყო მომზადებული ამის გარშემო, თუმცა ჩავარდა. „ევროპული საქართველო“ ერთ პროცენტსაც კი ვეღარ აიღებს საპარლამენტო არჩევნებზე. 2020 წლის გეგმა იყო „ლელო“, თუმცა, გახსოვთ რომ „ლელომ“ სამი პროცენტი აიღო საბოლოო ჯამში, მესამე იყო გახარია, რომლის მთავარი დავალება იყო, „ქართულ ოცნებას“ არ უნდა მიეღო 43 პროცენტი თვითმმართველობის არჩევნებში, თუმცა ეს გეგმაც ჩავარდა. ყოველ ჯერზე იყო მცდელობა, რომ რეალურად, ნაცური, თუმცა ვითომ მესამე ძალა შექმნილიყო. „ევროპული საქართველოც“ ჩავარდა, „ლელოც“ და გახარიაც. სამივე პროექტი ჩავარდა. ასევე ჩავარდება მეოთხე პროექტიც. ზოგადად, ისეთი დომხალია, წარმოიდგინეთ, ერთად, ერთ პარტიაში შეყრილი ხაზარაძე, გახარია, ზურაბიშვილი, მელია, შეიძლება, გვარამია დაემატოს, ლომჯარია. ასეთ აჯაფსანდალს როგორ შეიძლება, ხუთმა პროცენტმა დაუჭიროს მხარი. ქართული საზოგადოება ბევრად მომწიფებულა, ვიდრე ვიღაცებს ჰგონიათ. ვიღაცები ვერ აცნობიერებენ, რომ საქართველოში საზოგადოება არის მომწიფებული და ასეთ ფიქტიურ „ნაცურ“ გაერთიანებებს აღარ იყიდის“, – განაცხადა კობახიძემ.

მთელი საქართველოსთვის არის სამძიმარი სათქმელი, იმიტომ რომ გვყავს ოკუპაციის კიდევ ერთი მსხვერპლი და ეს არის ტრაგედია, რომელიც ქვეყანას სჭირს, მაგრამ სამწუხაროდ, აქ ზოგიერთი ოპოზიციონერი დეპუტატის მხრიდან გაკეთებული განცხადებები ქვეყნის ინტერესების მტრობაა, – ამის შესახებ საპარლამენტო უმრავლესობის დეპუტატმა, მიხეილ სარჯველაძემ პარლამენტის პლენარულ სხდომაზე განაცხადა.

მან სეპარატისტული რეჟიმის ე.წ. მილიციელის მიერ ცემის შედეგად საქართველოს მოქალაქის, თემურ კარბაიას გარდაცვალების გამო სამძიმარი გამოხატა.

„რა თქმა უნდა, სამძიმრით დავიწყებ. მთელი საქართველოსთვის არის სამძიმარი სათქმელი, იმიტომ რომ გვყავს ოკუპაციის კიდევ ერთი მსხვერპლი. ეს არის ტრაგედია, რომელიც სჭირს ქვეყანას, მაგრამ, სამწუხაროდ, უნდა ვთქვა, რომ აქ ზოგიერთი ოპოზიციონერი დეპუტატის მხრიდან გაკეთებული განცხადებები, საუბარი ენის მოჩლექაზე რუსეთთან დაკავშირებით, დამოკიდებულებების ცვლილების საჭიროებასთან დაკავშირებით და ა.შ. სინამდვილეში, ეს არის გაგრძელება იმისა, რასაც ჰქვია პოლიტიკური დღის წესრიგი და ქვეყნის ინტერესების მტრობა. მტრობას პირდაპირ ვამბობ, იმიტომ რომ რეალურად, ყველას ძალიან კარგად ესმის და უპირველესად, ესმის საქართველოს მოსახლეობის უდიდეს უმრავლესობას, რომ საქართველოს არავითარი ფუფუნება არ აქვს, ისაუბროს სხვა ნებისმიერ რამეზე, გარდა პრაგმატული, სწორი, პრაქტიკული ნაბიჯების გადადგმაზე, რასაც შეუძლია საქართველოს დეოკუპაცია. ხომ კარგად გესმით ყველას ოპოზიციაშიც, მათ შორის, რომ მილიტარისტული განცხადებების კეთება არ არის ის, რაც საქართველოს დეოკუპაციას მოუტანს დღეს, ან რომელიმე მოქალაქის უფლების დაცვას. მე მგონი, ამასაც ყველა კარგად უნდა ხვდებოდეს და ხვდება კიდევ, მაგრამ სამწუხაროდ, ოპოზიციას აქვს დღის წესრიგი ისეთი, რომელიც განაპირობებს ამ შემთხვევაში სრულიად საპირისპიროს ლაპარაკს“, – განაცხადა სარჯველაძემ.

შეგახსენებთ, არსებული ცნობებით, ოკუპირებულ გალის რაიონში საქართველოს მოქალაქეს, თემურ კარბაიას, საოკუპაციო რეჟიმის ე.წ. მილიციის თანამშრომლებმა სიტყვიერი შეურაცხყოფა მიაყენეს და სცემეს. თემურ კარბაია საავადმყოფოში გადაყვანისთანავე გარდაიცვალა.