“თუ უკრაინა დაეცემა…“ – რას წერს Le Point-ი

41
spot_img

„2025 წლის ოქტომბერი. ზაპოროჟიესთან ახლოს მდებარე სამხედრო ბაზის ყაზარმაში უკრაინისა და რუსეთის არმიების სარდლები შეკრებილან. იქვეა უკრაინის პრეზიდენტის მოვალეობის შემსრულებელიც, რომელიც, დათრგუნული სახით, ხელს აწერს კაპიტულაციას  რუსეთის ჯარების მთავარსარდალთან. სამწლიანი ომით გაწამებულმა უკრაინამ გადაწყვიტა, რომ მისი არსებობა რუსეთთან კომპრომისზეა დამოკიდებული. სულ რაღაც ოთხი თვის წინ რუსეთის არმიამ შეტევა დაიწყო და გაარღვია უკრაინის გამაგრებული ზღუდეები როგორც ქვეყნის სამხრეთ-აღმოსავლეთში, ისე ჩრდილო-დასავლეთ ნაწილში და რამდენიმე კვირაში შტურმით აიღო ხარკოვი და ოდესა, უკრაინას ზღვაზე გასასვლელი გადაუკეტა და მრისხანედ სახით დადგა ევროკავშირის ზღურბლთან. რუსეთის პრეზიდენტმა ვლადიმერ პუტინმა ზარ-ზეიმით განაცხადა „დასავლეთის მარცხი“ და „ნაციზმზე მეორედ გამარჯვება“. უკვე დაგეგმილია რუსეთის არმიის გამარჯვების აღლუმი მოსკოვში, წითელ მოედანზე…“, – ასე იწყება ფრანგულ ჟურნალ Le Point-ში გამოქვეყნებული სტატია სათაურით „თუ უკრაინა დაეცემა“, რომელშიც რუსეთ-უკრაინის ომის ჰიპოთეტური დასასრულია გადმოცემული: კიევის სავარაუდო დამარცხება ევროპისთვის კოშმარი იქნება, რუსეთისათვის კი წინსვლის სტიმული.

პუბლიკაციის ავტორია პროფესორი ბრუნო ტეტრე, პარიზის სტრატეგიული კვლევების ფონდის დირექტორი. გთავაზობთ სტატიის დარჩენილი ნაწილის მოკლე შინაარსს:

უკრაინის არმიის კონტრშეტევის ჩაშლამ დასავლეთში სკეპტიციზმი მნიშვნელოვნად გააძლიერა, აშშ-ისა და ევროკავშირის ქვეყნების მმართველმა პოლიტიკურმა ძალებმა ჩათვალეს, რომ უკრაინისადმი დახმარება უკვე რაიმე დადებით შედეგს ვეღარ გამოიღებს, შესაბამისად, სამხედრო და ფინანსურ-ეკონომიკური მხარდაჭერა შესუსტდა. „ამასთან, რუსეთი, როგორც ჩანს, მზადაა მრავალწლიანი ომისათვის და უკრაინის ტერიტორიის სრულად დაპყრობისათვის. თუ სადმე მსოფლიოში არის ქვეყანა, რომელიც მთლიანად სამხედრო ეკონომიკაზეა გადასული, ამ სახელმწიფოს რუსეთი წარმოადგენს“.

რასაკვირველია, მოვლენების განვითარების ასეთი სცენარი კოშმარული იქნება არამარტო უკრაინისათვის, არამედ მთელი ევროპისათვის. პროგნოზი შეიძლება ასეთი იყოს:  არმიის კაპიტულაციისა და ტერიტორიის დიდი ფართობის დაკარგვის შემდეგ უკრაინა უკეთეს შემთხვევაში „ახალი ბელარუსი“ გახდება, რომელიც რუსეთის კონტროლის ქვეშ იქნება, უარეს შემთხვევაში კი – „დიდი დნესტრისპირეთი“ – ევროპის შუაგულში მდებარე შავი ხვრელი,  მოსკოვის გავლენის ქვეშ.

უკრაინის დამარცხება დიდი დარტყმა იქნებოდა ევროპული ერთიანობის პროექტისათვის, რომლის შედეგები მთელ მსოფლიოზე აისახებოდა. მაგალითად, ჩინეთი ყურადღებას მიაქცევდა დასავლეთის უსუსურობას და შეეცდებოდა ტაივანის პრობლემის გადაწყვეტას. მსოფლიო სხვა ქვეყნები, ბრაზილიიდან ინდოეტამდე და სამხრეთ აფრიკამდე, დაინახავდნენ, რომ დასავლეთის მარცხის ვარაუდები რეალიზდება და მათ აღეძვრებათ სურვილი მსოფლიოს ახალ ბატონების თანაზიარები გახდნენ. გარდა ამისა, ევროპა დაკარგავს შანსს რუსეთის ბედზე რაიმე გავლენა მოახდინოს“.

წყარო