ჩვენ დიდი გამარჯვება გვჭირდება ამ საშინელ ხალხზე, – ამ სიტყვებით მიმართა დონალდ ტრამპმა მოსახლეობას. ქალაქ მანჩესტერის სტადიონზე შეკრებილებს ტრამპი პრაიმერიზის წინასაარჩევნო კამპანიის ფარგლებში შეხვდა და მათ აქტიურობისკენ მოუწოდა.

ტრამპმა თავის კონკურენტზე, გაეროში აშშ-ის ყოფილ ელჩზე ნიკი ჰეილიზეც ისაუბრა და ის წარმომადგენელთა პალატის ყოფილ სპიკერთან, ნენსი პელოსიში აერია. მან არაერთხელ დაადანაშაულა ჰეილი, რომელიც ასევე რესპუბლიკური პარტიის წევრია, იმაში რომ მან 2021 წლის 6 იანვარს, შტურმის დროს კაპიტოლიუმის უსაფრთხოება ვერ უზრუნველყო.

აშშ-ის ექსპრეზიდენტმა თავის ამომრჩევლებს პრაიმერიზში აქტიურობისკენ მოუწოდა და პირობა დადო, რომ თეთრ სახლში დაბრუნების შემთხვევაში ამერიკას თავის სიდიადეს დაუბრუნებს და მექსიკის საზღვარს დაკეტავს.

„სამშაბათს ყველაფერი ჩვენ სასარგებლოდ შემობრუნდება. მჯერა, რომ ნიუ ჰემფშირი თავის სათქმელს ხმამაღლა იტყვის, ამიტომაც უნდა შეკრიბოთ ყველა პატრიოტი, ვისაც იცნობთ და რეკორდული რაოდენობის ხმა მოვაგროვოთ. ჩვენ დიდი სხვაობით უნდა მოვიგოთ და ძლიერი სიგნალი მივცეთ ნოემბრის არჩევნებს. მთელი სამყარო გვადევნებს თვალს და ახლა რესპუბლიკელების, ჯანსაღი აზროვნების პარტიის დროა და ამიტომ უნდა გავერთიანდეთ. მოდით არჩევნებზე. ჩვენ ამ საშინელ ადამიანებზე დიდი გამარჯვება გვჭირდება. თუ თქვენ ის ადამიანი გჭირდებათ, ვინც ამერიკას პირველ ადგილზე აყენებს, მაშინ არჩევანი ერთია – დონალდ ტრამპი. თქვენ უნდა მომცეთ იმუნიტეტი და გეუბნებით, რომ მხოლოდ ერთი დღით ვაპირებ დიქტატორობას, როცა [მექსიკასთან] საზღვარს ჩავკეტავთ. ამით ჩემი დიქტატორობა დასრულდება“, – განაცხადა ტრამპმა.

სლოვაკეთის კულტურის მინისტრმა მარტინა შიმკოვიჩოვამ რუსეთის ფედერაციასა და ბელორუსთან კულტურის სფეროში თანამშრომლობის აკრძალვა გააუქმა. ამის შესახებ European Pravda ადგილობრივ ბიუროზე დაყრდნობით წერს.

გამოცემის ცნობით, მარტინა შიმკოვიჩევას 12 იანვრით დათარიღებულ ბრძანებაში აკრძალვის გაუქმების შესახებ წერია, გადაწყვეტილების ძალაში შესვლის თარიღად კი 15 იანვარია დასახელებული.

„მსოფლიოში ათობით სამხედრო კონფლიქტი მიმდინარეობს და ჩვენი აზრით, ხელოვანებმა და კულტურამ არ უნდა გადაიხადონ ამის საფასური“, – ნათქვამია დოკუმენტში.

როგორც European Pravda აღნიშნავს, რუსეთთან და ბელარუსთან ყველანაირი სახის კულტურული თანამშრომლობა 2022 წელს, მას შემდეგ იყო აკრძალული, რაც რუსეთი უკრაინაში შეიჭრა და სრულმასშტაბიანი საომარი მოქმედებები დაიწყო.

რუსეთის საგარეო საქმეთა მინისტრის მოადგილის ალექსანდრ გრუშკოს განცხადებით, ისეთი მასშტაბური წვრთნები, როგორიცაა NATO-ს Steadfast Defender 2024, სამხედრო ინციდენტების რისკს ზრდის. თუმცა, გრუშკო RIA Novosti-სთან ინტერვიუში აღნიშნავს, რო რუსეთს ასეთი წვრთნები არ აშინებს.

„ამ მასშტაბის ნებისმიერი ღონისძიება ზრდის სამხედრო ინციდენტების რისკს, თუმცა ევროპის უსაფრთხოების ინტერესები დღეს ნაკლებად აღელვებთ მათ, ვინც NATO-ს მართავს. მათთვის მთავარია, არსებობა გაუხანგრძლივონ ამერიკული გავლენის ამ ინსტრუმენტს უკვე წაგებულ ბრძოლაში, რათა მსოფლიოში დასავლური ჰეგემონია შეინარჩუნონ“, – აცხადებს რუსეთის საგარეო მინისტრის მოადგილე.

როგორც ალექსანდრ გრუშკოს ამბობს, „პროვოკაციულ დემონსტრაციებს“ არ შეუძლიათ რუსეთის დაშინება, ვინაიდან „რუსეთს აქვს ყველაფერი, რაც თავდაცვისუნარიანობის უზრუნველსაყოფად არის საჭირო“.

პალესტინელების მხარდამჭერი აქცია იტალიაში პოლიციასთნ დაპირისპირებაში გადაიზარდა. სამართალდამცველებმა აქციის მონაწილეების დასაშლელად წყლის ჭავლი გამოიყენეს. დემონსტრაცია ქალაქ ვიჩენცაში, ოქროსა და სამკაულების სავაჭრო გამოფენის ტერიტორიასთან გაიმართა. აქციის მონაწილეები გამოფენაზე ისრაელის პავილიონის განთავსებას აპროტესტებდნენ.

ღაზის სექტორში საომარი მოქმედებების შეწყვეტის მოთხოვნით, საპროტესტი მსვლელობა ბარსელონაშიც მოეწყო. ისმოდა შეძახილები. ადგილობრევებთან ერთად აქციაში პალესტინელებიც მონაწილეობდნენ.