ჩვენს საბოლოო მიზანს წარმოადგენს ნატოში სრულფასოვანი წევრობა. რომელი მექანიზმით იქნება ეს საბოლოოდ განპირობებული, მაპის გარეშე თუ მაპთან ერთად, ამას ალბათ ნაკლები მნიშვნელობა აქვს და ამას უკვე დრო და გარემოებები განაპირობებს, – ამის შესახებ ნატოში საქართველოს ელჩმა, ვიქტორ დოლიძემ ვილნიუსში განაცხადა.

„ჩვენი ძირითადი აქცენტები, როგორც ყოველთვის, გამახვილებულია ჩვენი ქვეყნის სუვერენიტეტზე, ტერიტორიულ მთლიანობაზე, რუსეთთან დაკავშირებულ იმ პრობლემებზე, რომელიც ჩვენი ქვეყნის მილიტარიზაციას, ოკუპაციას და დეოკუპაციას შეეხება და რაც ყველაზე მთავარია, ჩვენს სრულფასოვან წევრობას. ჩვენ ჩვენს ნატოელ კოლეგებს ყოველთვის ვახსენებთ იმის თაობაზე, რომ ჩვენ მიზანს წარმოადგენს ნატოში სრულფასოვანი წევრობა. დღეს მოცემულობა ასეთია, რომ პოლიტიკურ გადაწყვეტილებას საჭიროებს სწორედ ნატოს მხრიდან და ამჯერად ბურთი სწორედ ნატოს მხარესაა და ჩვენ ველოდებით ამ გადაწყვეტილების რაც შეიძლება დროულად მიღებას“, – განმარტა ვიქტორ დოლიძემ.

საქართველოს ვამხნევებ, განახორციელოს რეფორმები და გერმანიის სახელით, ვაცხადებ, რომ გერმანია მხარს უჭერს მას ევროპულ გზაზე, – ამის შესახებ გერმანიის პარლამენტის პრეზიდენტმა, ბერბელ ბასმა შალვა პაპუაშვილთან ერთად გამართულ ბრიფინგზე განაცხადა.

მისი თქმით, საქართველოსა და გერმანიის პარლამენტებს შორის თანამშრომლობა კვლავ გაგრძელდება.

„ჩვენს ქვეყნებს ძალიან ბევრ სფეროში აქვთ პარტნიორული ურთიერთობები. პარლამენტარები ძალიან მჭიდროდ თანამშრომლობენ ერთმანეთთან. ბუნდესტაგის დახმარება მრავალფეროვანია, მაგალითად აღმოსავლეთის პარტნიორობის ფარგლებში; GTZ-ის მეშვეობით ჩვენ ვახორციელებთ ერთობლივ პროექტებს და ეს პროექტები კიდევ უფრო ინტენსიური გახდება. თანამშრომლობა გაგრძელდება ჩვენს პარლამენტებს შორის. დიდი ხანია, გერმანია ახორციელებს საპარლამენტო სტიპენდიის პროგრამას.

რუსეთის ომმა უკრაინაში განსაკუთრებული გავლენა იქონია საქართველოზე და ეს არის ერთ-ერთი მიზეზი, თუ რატომ ჩამოვედი საქართველოში. საქართველოში იციან, თუ რას ნიშნავს რუსული აგრესია. ხვალ მე გავემგზავრები ადმინისტრაციულ ხაზთან.

გასულ წელს საქართველომ ევროკავშირისგან მიიღო გაწევრიანების პერსპექტივა. ეს არის ძალიან ნათელი პერსპექტივა საქართველოსთვის, რაც პირადად ჩემთვის მნიშვნელოვანი იყო. ჩემთვის შთამბეჭდავია, რომ საქართველოს მოსახლეობა თავს ევროპელად თვლის, მაგრამ პრაიდ ფესტივალის ჩაშლის მცდელობა არ იყო კარგი ამბავი. ეს არღვევს შეკრების თავისუფლებას, უმცირესობების უფლებებს და ეს უფლებები არის ევროპული ღირებულებების ერთ-ერთი შემადგენელი ნაწილი. ამ საკითხს სხვა შეხვედრებზე დავუბრუნდები. თუმცა, საქართველოს მე ვამხნევებ, განახორციელოს რეფორმები და გერმანიის სახელით ვამბობ, რომ გერმანია მხარს უჭერს საქართველოს ევროპულ გზაზე“, – განაცხადა ბასმა.

გერმანიის პოლიტიკამ და მხარდაჭერამ კონკრეტული შედეგები მოიტანა, დღეს საქართველო არის სახელმწიფო, რომელმაც უზარმაზარ პროგრესს მიაღწია დემოკრატიული ინსტიტუტებისა და საზოგადოების მშენებლობაში, – ამის შესახებ საქართველოს პარლამენტის თავმჯდომარე შალვა პაპუაშვილმა გერმანიის ბუნდესტაგის პრეზიდენტთან, ბერბელ ბასთან ერთობლივი განცხადებებისას აღნიშნა.

პაპუაშვილის თქმით, დარწმუნებულია, რომ ბუნდესტაგის პრეზიდენტის საქართველოში ვიზიტი საქართველოსა და გერმანიას შორის პარტნიორობის ახალი ეტაპის დასაწყისი იქნება.

„დღეს ისტორიული მოვლენის მომსწრეები ვართ. ვმასპინძლობთ გერმანიის ფედერაციული რესპუბლიკის ბუნდესტაგის პრეზიდენტს ბერბელ ბასს და მის თანმხლებ დელეგაციას. ჩვენთვის დიდი პატივია ბერბელ ბასის მიღება, განსაკუთრებით, იმის გათვალისწინებით, რომ საქართველოს დამოუკიდებლობის აღდგენის დღიდან გერმანიას გამორჩეული როლი ჰქონდა და აქვს ჩვენი ქვეყნის ინსტიტუციურ და სოციალურ-ეკონომიკურ გარდაქმნაში. გერმანიის პოლიტიკამ და მხარდაჭერამ კონკრეტული შედეგები მოიტანა. დღეს საქართველო არის სახელმწიფო, რომელმაც უზარმაზარ პროგრესს მიაღწია დემოკრატიული ინსტიტუტების და საზოგადოების მშენებლობაში. აღნიშნულისთვის მადლობას მოვახსენებთ გერმანიას და მის ხალხს. ჩვენ ასევე მადლიერი ვართ გერმანიის მხრიდან საქართველოს სუვერენიტეტისა და ტერიტორიული მთლიანობის მხარდაჭერისთვის. ჩვენი ქვეყნის დღევანდელი სახელმწიფოებრიობა და სუვერენიტეტი გერმანიის და მისი მსგავსი მეგობრებისა და პარტნიორების დამსახურებაცაა“, – აღნიშნა პაპუაშვილმა.

მისივე თქმით, მოხარულია, რომ ბოლო პერიოდში ორ ქვეყანას შორის არის პოლიტიკური დიალოგის გაღრმავების აქტიური დინამიკა.

„გასული წლის დეკემბერში, გერმანიის ბუნდესტაგის პრეზიდენტის მოწვევით, მე თავად ვიყავი გერმანიაში ვიზიტად; 2023 წლის მარტში გერმანიის საგარეო საქმეთა ფედერალური მინისტრი ანალენა ბერბოკი გვსტუმრობდა თბილისში; ერთი თვის წინ საქართველოს პრემიერ-მინისტრს ბერლინში ჰქონდა ვიზიტი და დიალოგი გერმანიის კანცლერთან; დღეს კი საქართველოს პარლამენტში გვაქვს ბუნდესტაგის პრეზიდენტის მასპინძლობის პატივი. უმაღლესი დონის ეს ურთიერთშეხვედრები და ვიზიტები არც არის გასაკვირი – იგი ასახავს იმ მჭიდრო ხალხთა შორის ურთიერთობებს, ასევე, თანამშრომლობას კულტურის, ეკონომიკის, თავდაცვის, განათლების, ტრანსპორტის, ენერგეტიკის, მეცნიერების და სხვა სფეროებში, რომელიც საუკუნეების მანძილზე ამდიდრებდა და განამტკიცებდა ჩვენს მეგობრობას და პარტნიორობას“, – განაცხადა პაპუაშვილმა.

საქართველოს პარლამენტის თავმჯდომარის თქმით, გერმანიასა და საქართველოს შორის კავშირები დგას დემოკრატიისა და მშვიდობის საერთო ღირებულებებზე.

„გერმანიასა და საქართველოს შორის კავშირები ასევე საერთო მიზნებსა და ინტერესებს ემსახურება. ქართველი და გერმანელი ჯარისკაცები ავღანეთში, მაზარ-ი-შარიფის ბაზაზე წლების მანძილზე ერთმანეთს მხარს უმაგრებდნენ და იბრძოდნენ ამ ფასეულობებისა და ინტერესებისთვის, ევროპის მშვიდობისა და უსაფრთხოებისთვის, გერმანიის და საქართველოს მოსახლეობის კეთილდღეობისთვის.

დღეს, საქართველო კვლავ ისტორიულ პროცესში იმყოფება. 30 წლის წინ გერმანიამ გადამწყვეტი როლი ითამაშა საერთაშორისო თანამეგობრობაში საქართველოს სრულუფლებიან წევრად დამკვიდრების საქმეში. 30 წლის შემდეგ, გერმანიას კვლავ შეუძლია ისტორიული მისიის შესრულება და ევროკავშირის კანდიდატი ქვეყნის სტატუსის საქართველოსთვის მინიჭებით, ჩვენს ქვეყანაში მშვიდობისა და კეთილდღეობის განმტკიცება. იმედი გვაქვს, გერმანია იქნება ევროკავშირში საქართველოს ინტეგრაციის მხარდაჭერის პროცესის ლიდერი.

შეხვედრაზე სწორად აღნიშნულ საკითხებზე გვქონდა საუბარი. დღეს და ხვალ გვექნება სხვა შესაძლებლობაც, რომ უფრო დეტალურად განვიხილოთ ორ ქვეყანას შორის არსებული ურთიერთობების დღის წესრიგი და საპარლამენტო თანამშრომლობის გაღრმავებით ხელი შევუწყოთ ჩვენი მოქალაქეებისთვის სასარგებლო ინიციატივების წამოწყებას.კიდევ ერთხელ მადლობას ვუხდი ბუნდესტაგის პრეზიდენტს ჩამობრძანებისთვის. დარწმუნებული ვარ, საქართველოში მისი ვიზიტი საქართველოსა და გერმანიას შორის პარტნიორობის ახალი ეტაპის დასაწყისი იქნება“, – განაცხადა შალვა პაპუაშვილმა.

საქართველოს პრემიერ-მინისტრმა ირაკლი ღარიბაშვილმა საქართველოში ნიდერლანდების სამეფოს საგანგებო და სრულუფლებიან ელჩთან მააიკე ვან კოლდამთან გამოსამშვიდობებელი შეხვედრა გამართა.

მთავრობის ადმინისტრაციაში გამართულ შეხვედრაზე ორ ქვეყანას შორის ორმხრივი და მრავალმხრივი თანამშრომლობის დღის წესრიგში არსებული საკითხები განიხილეს.

“შეხვედრაზე ასევე განიხილეს საქართველოსა და ნიდერლანდების სამეფოს შორის არსებული პოლიტიკური ურთიერთობების პოზიტიური დინამიკა.

ირაკლი ღარიბაშვილმა მააიკე ვან კოლდამს საქართველოს სუვერენიტეტისა და ტერიტორიული მთლიანობის, ასევე ევროკავშირში ინტეგრაციის პროცესის მხარდაჭერისთვის მადლობა გადაუხადა და მას მომავალ საქმიანობაში წარმატებები უსურვა”, – ნათქვამია მთავრობის ადმინისტრაციის მიერ გავრცელებულ ინფორმაციაში.