რა თქმა უნდა, შს მინისტრი პარლამენტში ინტერპელაციაზე მოვა და ყველა კითხვას ამომწურავ პასუხს გასცემს, თუმცა ისიც უნდა ითქვას, რომ საზოგადოებას ხელისუფლებისგან კითხვებზე ამომწურავი პასუხები უკვე აქვს და კითხვებთან დაკავშირებით რაიმე განსაკუთრებული სიახლე არ არის – ასე ეხმაურება ფრაქცია „ნაციონალური მოძრაობის“ მიერ პარლამენტში ვახტანგ გომელაურის დაბარებას „ქართული ოცნების“ დეპუტატი ირაკლი ქადაგიშვილი.

ქადაგიშვილი იმასაც ამბობს, რომ ოპოზიციისთვის მნიშვნელოვანია არა პარლამენტის დროებითი საგამოძიებო კომისიის შექმნა, არამედ ის, რომ მომხდარ ტრაგედიასთან დაკავშირებული სპეკულაცია მუდმივად დღის წესრიგში ჰქონდეთ.

„ეს არის მიზანი. ჩვენ პრობლემისთვის თვალის გასწორების არ გვეშინია, მაგრამ პრობლემა სხვა რამეშია – ოპოზიცია ცდილობს, რომ ტრაგედიიდან რამენაირად მისი პოლიტიკური ხვალინდელი დღე გამოადნოს. ამისთვის არაფერს ერიდება – არ ერიდება არც მიცვალებულს, არც მიცვალებულის ოჯახის განცდას, არც ტრაგედიას, რომელიც საზოგადოების თითოეულმა წევრმა თანაბრად გაიზიარა. ამ ყველაფერზე სპეკულირებენ. გარკვეული კატეგორიის ადამიანები ჩასაფრებული არიან, რომ ტრაგედია საკუთარი ხვალინდელი დღის წარმატების საფუძვლად აქციონ და როცა ოპოზიცია ამაზე ფიქრობს, ეს სულ სხვა რამეზე მიგვანიშნებს. ეს იმაზე მიგვანიშნებს, რომ ოპოზიციას მომავლის პოზიტიური ხედვა არ გააჩნია და ნებისმიერი ტრაგედიის ხელისუფლების საწინააღმდეგოდ გამოყენებას ცდილობს. მათი ასეთი დამოკიდებულებით თვითლუსტრაციას ეწევიან“, – განაცხადა ირაკლი ქადაგიშვილმა.

არსებული პარლამენტი არანაირ წესს არ იცავს, ამიტომ, არა კომისიის შექმნა, არამედ ხელისუფლების შეცვლა უნდა იყოს მთავარი ამოცანა, – ასე აფასებს „ევროპული საქართველოს“ პოლიტსაბჭოს თავმჯდომარე, გიგი წერეთელი შოვში მომხდარ ტრაგედიაზე პარლამენტში საგამოძიებო კომისიის შექმნის მოთხოვნას.

როგორც გიგი წერეთელმა აღნიშნა, ამ პარლამენტში შეუძლებელია, რომ საგამოძიებო კომისიის ინიციატივას რაიმე განვითარება ჰქონდეს.

„ნებისმიერ ნორმალურ პარლამენტში, სადაც წესები და კანონები იცნობა, საგამოძიებო კომისიის არსებობა ასეთ ტრაგიკულ საკითხთან დაკავშირებით, მითუმეტეს, როცა ბევრი კითხვის ნიშანი არსებობს, სწორი ინიციატივა იქნებოდა, თუმცა არსებული პარლამენტი არანაირ წესს არ იცავს. იგი ორიენტირებულია უმრავლესობის პოზიციის დაცვაზე და ყველაფერს აკეთებს იმისთვის, რომ არანაირ არსებულ კითხვას პასუხი არ გაეცეს. ეს კიდევ ერთხელ მიგვანიშნებს, რომ არა კომისიის შექმნა, არამედ ამ ტიპის ხელისუფლების შეცვლაა ჩვენი მთავარი ამოცანა“,- განაცხადა გიგი წერეთელმა.

ინფორმაციას „ევროპული საქართველოს“ პრესსამსახური ავრცელებს.

არ არსებობს კითხვა, რაზეც „ნაცმოძრაობას” პასუხი არა აქვს – უბრალოდ, ეს არის ხალხი, რომელიც ტრაგედიებით იკვებება და სურს, საკუთარი დღის წესრიგი სწორედ ტრაგედიებსა და ომებზე ააგოს, – ასეთია უმრავლესობის დეპუტატის გურამ მაჭარაშვილის პოზიცია შოვის სტიქიის შედეგებთან დაკავშირებით პარლამენტში შს მინისტრის ვახტანგ გომელაურის ინტერპელაციის წესით დაბარების შესახებ.

მაჭარაშვილის თქმით, აქედან გამომდინარეობს პარლამენტის საგამოძიებო კომისიის შექმნის ინიციატივაც.

მისივე შეფასებით, “ამიტომაც ყოველთვის იქნება 10-0 ოპოზიციის საწინააღმდეგოდ”.

“თუ დააკვირდებით, რადიკალური ოპოზიცია ომებითა და ტრაგედიებით ცხოვრობს. თუ ომი ან ტრაგედია არ არის, ხალხი არავის ახსოვს. როგორც კი ტრაგედია მოხდება ან უნდათ, რომ რამენაირად ომი იყოს, გაცოცხლდებიან და ამბობენ, რომ ხელისუფლება უნდა დაამხონ. ეს არის მათი სტილი”, – განაცხადა გურამ მაჭარაშვილმა.

მისი თქმით, რადიკალური ოპოზიცია და არასამთავრობო სექტორი, რომელიც დეზინფორმაციის გავრცელებაშია მხილებული, ახლა პარტია “ქართული ოცნების” თავმჯდომარესა და შს მინისტრს იმაში ადანაშაულებენ, რომ თითქოს სტიქიისგან გადარჩენილებს ებრძვიან.

“ეს არის სპეკულაციის შემადგენელი ნაწილი. ირაკლი კობახიძე პირველივე დღეებიდან იქ იყო და მისი სახე მთელმა საზოგადოებამ ნახა – თუ როგორი სახე ჰქონდა, როცა პირველ კომენტარს იძლეოდა. ასევე ყველამ იცის, რა მიზეზით არ იყო სტიქიის ადგილზე შს მინისტრი პირველივე დღეებში.

ყველას მშვიდობა და ჯანმრთელობა მისცეს, მაგრამ მაინც და მაინც საკუთარ თავზე უნდა გამოსცადო ის, რომ შემდეგ სხვისი გაიგო?! ხომ არ შეიძლება ყველაფერზე წახვიდე და ყველაფერი იკადრო იმისთვის, რომ როგორმე პოლიტიკური პროცესი მოიგო. ტყუილებისა და დეზინფორმაციის ცეცხლი რომ გაიხსნა, ამაზე ვინმემ ბოდიში მოიხადა?! როცა პირდაპირ ამბობდნენ, რომ თურმე იქ წყალი გუბდებოდა და არავის შეატყობინეს, ამაზე ვინმემ ბოდიში მოიხადა – ის, რასაც არასამთავრობო სექტორი ამბობდა, ტყუილი აღმოჩნდა”, – განაცხადა გურამ მაჭარაშვილმა.

ის, რომ კითხვები არსებობს, ამაში კიდევ ერთხელ დარწმუნდა ქვეყნის მოსახლეობა, როდესაც ჩვენ მოვისმინეთ ეს მავნებლური, ბოროტული და უპასუხისმგებლო განცხადებები, რომელიც გაკეთდა ხელისუფლების მხრიდან. ინტერპელაციის პროცესი სწორედ ამას ითვალისწინებს, რომ დავსვათ კითხვები, რომელიც საზოგადოებას აქვს, – ამის შესახებ“ერთიანი ნაციონალური მოძრაობის” რეგიონულმა მდივანმა, გიორგი ბოტკოველმა განაცხადა.

მისი თქმით, „ქვეყანას არ უნდა ჰყავდეს ისეთი ხელისუფლება, რომელიც გაწირავს ადამიანებს“.

„ის, რომ კითხვები არსებობს, ამაში კიდევ ერთხელ დარწმუნდა ქვეყნის მოსახლეობა, როდესაც ჩვენ მოვისმინეთ ეს მავნებლური, ბოროტული და უპასუხისმგებლო განცხადებები, რომელიც გაკეთდა ხელისუფლების, მთავრობის თუ საპარლამენტო უმრავლესობის მხრიდან. სწორედაც პოლიტიკურად უნდა მივუდგეთ, რომ ქვეყანას არ უნდა ჰყავდეს ისეთი ხელისუფლება, რომელიც გაწირავს ჯერ ადამიანებს და ვინც გადაურჩა სტიქიას მათ ასე დასცინის და ხვალ – ზეგ მათი პასუხისმგებლობის საკითხს დააყენებს. სწორედ ინტერპელაციის პროცესი ითვალისწინებს ამას, რომ ჩვენ იქ გვექნება საშუალება დავსვათ ყველა ის კითხვა, რომელიც აწუხებს არა ამ შემთხვევაში რომელიმე პოლიტიკურ ძალას და „ერთიან ნაციონალურ მოძრაობას“, არამედ მოსახლეობას, რა კითხვებიც ძალიან ბევრი გაჩნდა დღეს ქვეყანაში“, – განაცხადა გიორგი ბოტკოველმა.

პოლიტიკურ ფარსში მონაწილეობის მიღება ჩვენი მიზანი არ არის – სწორედ ამიტომ პარლამენტის დროებითი საგამოძიებო კომისიის შექმნას მხარს არ ვუჭერთ, – აღნიშნული განცხადება პარტია “საქართველოსთვის” დეპუტატმა მიხეილ დაუშვილმა შოვის სტიქიის შედეგებთან დაკავშირებით საგამოძიებო კომისიის შექმნის ინიციატივაზე საუბრისას გააკეთა.

როგორც დაუშვილმა ამ კონტექსტში აღნიშნა, ერთის მხრივ, “ნაციონალური მოძრაობა” მომხდარი ტრაგედიის საკუთარი ვიწრო პოლიტიკური ინტერესებისთვის გამოყენებას ცდილობს, მეორეს მხრივ კი, “ქართული ოცნება” “ნაციონალური მოძრაობის” მავნებლურ ქმედებებს პასუხისმგებლობის თავიდან ასარიდებლად იყენებს.

დაუშვილის თქმით, “ამ ეტაპზე ამ პროცესში შესვლას არ აპირებენ”.

დეპუტატი “ნაციონალურ მოძრაობას” მიმართავს, “ქართული ოცნების” გათეთრებას, გამოძვრენას და მის მაშველ რგოლობას თავი დაანებოს”.

“პარლამენტის საგამოძიებო კომისიის მთავარი მიზანი სიმართლის დადგენა უნდა იყოს – თუ რა მოხდა რეალურად, სად იყო დისფუნქციური სახელმწიფო ინსტიტუტები, გამოვლინდნენ პასუხისმგებელი პირები და მოხდეს მათთვის პასუხისმგებლობის დაკისრება. იმისათვის, რომ საგამოძიებო კომისია ფუნქციური იყოს, სიმართლის დადგენა ყველას ინტერესში უნდა შედიოდეს.

ჩვენ დღეს რეალურად ვხედავთ იმას, რომ ერთის მხრივ, “ნაციონალური მოძრაობა” ცდილობს, რომ მომხდარი უმძიმესი ტრაგედია საკუთარი პოლიტიკური მიზნებისთვის გამოიყენოს, პოლიტიკური დივიდენდებისა და სარგებლის მისაღებად. მეორეს მხრივ, “ქართული ოცნება” “ნაციონალური მოძრაობის” ამ მავნებლურ საქციელს იყენებს იმისთვის, რომ ამ უმძიმეს ტრაგედიაზე არასათანადო რეაგირებაზე პასუხისმგებლობა თავიდან აირიდოს. ჩვენი მიზანი არ არის ამ პოლიტიკურ ფარსში მონაწილეობის მიღება.

ვიდრე ეს პროცესი დაიწყებოდა, ჩვენ კითხვებით პრემიერ-მინისტრს, შს მინისტრს მივმართეთ და ფაქტობრივად, წინასაგამოძიებო მოქმედებები დავიწყეთ, რათა მომხდარზე ჭეშმარიტება დადგინდეს, გამოვლინდეს, სად არ მოქმედებდა სახელმწიფო ინსტიტუტები და თანამდებობის პირები, სად არის მათი პასუხისმგებლობა. თუ ჩვენ კითხვებზე პასუხებს ვერ მივიღებთ, რა თქმა უნდა, ეს საგამოძიებო კომისიის შექმნის ლეგიტიმური საფუძველი შეიძლება გახდეს”, – განაცხადა ჟურნალისტებთან მიხეილ დაუშვილმა.

ვიდრე არჩევნები არ გაქვს მოგებული და გაყალბება დამტკიცებული, არასერიოზული მგონია წინასწარ ფიქრი, როგორ შეიძლება, დაამხო რეჟიმი. მგონი, ზოგიერთებს არ აქვთ იმედი, რომ არჩევნებში კარგ შედეგს მიიღებენ, – ამის შესახებ „გირჩის“ წევრმა, ალექსანდრე რაქვიაშვილმა განაცხადა.

რაქვიაშვილი გამოეხმაურა „გირჩი – მეტი თავისუფლების“ ლიდერის ზურაბ ჯაფარიძის განცხადებას, რომელმაც აღნიშნა: „ოცნების“ ხელისუფლებიდან გაშვების ერთი გზაა რიგგარეშე არჩევნები; მეორეა, რეგულარულ არჩევნებზე უგებ და თუ მაინც არ გაძლევენ საშუალებას, ისევ ქუჩიდან უნდა გაყარო, ყველაზე რეალისტური სცენარი ეს არის“.

რაქვიაშვილის შეფასებით, რიგგარეშე არჩევნები უკვე აღარ დაინიშნება.

„ქართულ ოცნებას“ როცა შეეშინდა საბურთალოზე არჩევნების დანიშვნა, იმიტომაც გავიდა სერგეენკო გვიან პარლამენტიდან, რომ ტექნიკურად შეუძლებელი გახადეს რიგგარეშე არჩევნების დანიშვნა. ასე რომ, ეს საკითხი 2024 წლამდე დასრულებულია. რაც შეეხება საკითხს, რა უნდა გააკეთო, თუ არჩევნებზე დამარცხდი, მარცხსაც გააჩნია. თუ უბრალოდ დამარცხდი, არც არაფერი არ უნდა გააკეთო, უბრალოდ, შეეგუო შედეგს და გააგრძელო ცხოვრება, მაგრამ თუ მიიჩნევ, რომ არჩევნები გაყალბდა, როგორც 2020 წელს მოდაში იყო ეს ყველაფერი, მაშინ შეიძლება, სცადო, ძალით შეცვალო მმართველი გუნდი, მაგრამ ასეთი რაღაცები ყოველთვის ძალიან საშიშია. ვიდრე არჩევნები არ გაქვს მოგებული და გაყალბება – დამტკიცებული, არასერიოზული მგონია წინასწარ ფიქრი, როგორ შეიძლება, დაამხო რეჟიმი რევოლუციით და უფრო იმაზე მიუთითებს, რომ მგონი, ზოგიერთებს არ აქვთ იმედი, რომ არჩევნებში კარგ შედეგს მიიღებენ“, – განაცხადა ალექსანდრე რაქვიაშვილმა.