თბილისის საკრებულოს თავმჯდომარის, გიორგი ტყემალაძის განცხადებით, 15 დეკემბერს, თბილისის საკრებულო თბილისის მერის 2023 წლის ანგარიშს მოისმენს და 2024 წლის ბიუჯეტის პროექტის განხილვა მოხდება.

შესაბამისი განცხადება ტყემალაძემ საკრებულოში დედაქალაქის მერის ანგარიშთან და თბილისის 2024 წლის ბიუჯეტის დამტკიცებასთან დაკავშირებით გააკეთა.

„მიმდინარე 2023 წელი, რომლის შეჯამებაც უნდა მოხდეს, საკმაოდ წარმატებული იყო. ეს წელი ძალიან მნიშვნელოვანი იყო ქალაქის განვითარების მიმართულებით. მერის ანგარიში სხვადასხვა მიმართულებით განხორციელებულ რეფორმებს მოიცავს“, – განაცხადა გიორგი ტყემალაძემ.

საკრებულოს თავმჯდომარემ თბილისის მომავალი წლის ბიუჯეტის პროექტზეც გაამახვილა ყურადღება და აღნიშნა, რომ დედაქალაქის მთავარი ფინანსური დოკუმენტის პროექტი მუნიციპალიტეტს კიდევ უფრო მეტი პროექტის განხორციელების საშუალებას მისცემს.

„საკრებულოში შემოსულია დედაქალაქის ფინანსური დოკუმენტის გადამუშავებული პროექტი, რომელშიც მაქსიმალურად არის გათვალისწინებული თბილისის საკრებულოს რეკომენდაციები. 2024 წლის ბიუჯეტი მნიშვნელოვნად გაზრდილია მიმდინარე ბიუჯეტთან მიმართებით. მისი მოცულობაა 1 763 354,7 ათასი ლარით განისაზღვრება. ეს კიდევ ერთი შესაძლებლობაა იმისთვის, რომ მომავალი წელი კიდევ უფრო დატვირთული იყოს როგორც ინფრასტრუქტურული, ასევე სოციალური კუთხით. ჩვენ გვაქვს საინტერესო პროექტები. დარწმუნებული ვარ, მომავალი წელი კიდევ უფრო წარმატებული იქნება“, – განაცხადა გიორგი ტყემალაძემ.

რომ გითხრათ, პარტიების დაფინანსების წესთან დაკავშირებული ცვლილებებით რაიმე არსებითად იცვლება, ასე არ არის – აქამდეც ყველა პარტიის დაფინანსების უდიდეს ნაწილს ფიზიკური პირების შემოწირულობები შეადგენდა, – ამის შესახებ ჟურნალისტებს “ქართული ოცნების“ დეპუტატმა ბექა დავითულიანმა განუცხადა.

დავითულიანისთვის გაუგებარია, რატომ არ უჭერს ოპოზიცია მხარს “მოქალაქეთა პოლიტიკური გაერთიანებების შესახებ“ კანონში დაგეგმილ ცვლილებებს.

“პარტიების დაფინანსების წესთან დაკავშირებით ინიცირებული ცვლილებები ჩვენი პარტნიორების რეკომენდაციაა – ეს “ქართული ოცნების“ ინიციატივა არ ყოფილა.

ფაქტი და მოცემულობაა ის, რომ აქამდეც ყველა პარტიის დაფინანსების უდიდეს და გადამწყვეტ ნაწილს ფიზიკური პირების შემოწირულობები შეადგენდა. შესაბამისად, რომ გითხრათ, რომ ამით პოლიტიკურ ველზე არსებითად რაიმე იცვლება, ასე არ არის – ვერ ვიგებ ოპოზიცია ცვლილებებს რატომ არ უჭერს მხარს.

თუ ისინი ევროპელ პარტნიორებს გადაარწმუნებენ, რომ აღნიშნული რეკომენდაცია შესასრულებელი არ არის, მისი არმიღების მხრივ პრობლემა არ იქნება“, – განაცხადა ბექა დავითულიანმა.

პარლამენტი, დაჩქარებული წესით, “ქართული ოცნების“ საკანონმდებლო პაკეტს განიხილავს, რომლის მიხედვით, პოლიტიკური პარტიები იურიდიული პირებისგან ფინანსური და მატერიალური შემოწირულებების მიღებას ვეღარ შეძლებენ.

საკანონმდებლო ინიციატივის გათვალისწინებით, იურიდიულ პირებს პარტიებისთვის შემოწირულებების გაცემა აეკრძალებათ. ამავე პროექტით, წინა წლის მთლიანი შიდა პროდუქტის 0.05%-დან 0.04%-მდე მცირდება პარტიის მიერ წლის განმავლობაში გაწეული ხარჯების დასაშვები საერთო ოდენობის ზედა ზღვარი.

როგორც “ქართული ოცნება” განმარტავს, აღნიშნული პროექტის მიღების შემთხვევაში, საქართველო გაითვალისწინებს ვენეციის კომისიის მიერ 2023 წლის 12 ივნისს გამოქვეყნებულ რეკომენდაციას “დეოლიგარქიზაციის შესახებ”, სადაც მითითებულია იურიდიული პირებისთვის პოლიტიკური პარტიების დაფინანსების შესაძლებლობის აკრძალვა.

ევროპული საბჭოს სხდომის დასკვნის ამ დროისთვის არსებული პროექტის მიხედვით, რომელიც ქართულმა მედიასაშუალებებმა მოიპოვეს, ევროპული საბჭო საქართველოსთვის კანდიდატის სტატუსის მინიჭებას თანხმდება.

„ევროპულმა კომისიამ გადაწყვიტა, რომ საქართველოს კანდიდატის ქვეყნის სტატუსი მიანიჭოს, იმის გათვალისწინებით, რომ 2023 წლის 8 ნოემბრის ევროკომისიის რეკომენდაციით განსაზღვრული შესაბამისი ნაბიჯები გადაიდგმება“,- ნათქვამია დასკვნის პროექტში.

რაც შეეხება უკრაინას და მოლდოვას, ამავე პროექტის თანახმად, ევროპული საბჭო იღებს გადაწყვეტილებას, გახსნას გაწევრიანების მოლაპარაკებები აღნიშნულ ორ ქვეყანასთან.

„ევროპულმა საბჭომ გადაწყვიტა, გახსნას გაწევრიანების მოლაპარაკებები უკრაინასთან და მოლდოვის რესპუბლიკასთან. ევროპული საბჭო იწვევს საბჭოს მიიღოს მოლაპარაკების ჩარჩო, იმის გათვალისწინებით, რომ 2023 წლის 8 ნოემბრის ევროკომისიის რეკომენდაციით განსაზღვრული შესაბამისი ნაბიჯები გადაიდგმება“,- ნათქვამია დასკვნის პროექტში.

საქართველოს პროკურატურამ, ადვოკატის მიმართ სასამართლოში საქმის განხილვასთან დაკავშირებით მუქარისა და ძალადობის ფაქტზე, ორ პირს, მათ შორის, ერთ არასრულწლოვანს ბრალდება წარუდგინა. ამის შესახებ ინფორმაციას გენერალური პროკურატურა ავრცელებს.

„შინაგან საქმეთა სამინისტროს მიერ ჩატარებული გამოძიებით დადგინდა, რომ 7 დეკემბერს, თბილისის საქალაქო სასამართლოში, სასამართლო პროცესის დასრულების შემდეგ, ორმა პირმა ბრალდებულის ადვოკატის მიმართ ფიზიკურად იძალადა, მათ შორის არასრულწლოვანი ადვოკატს სიცოცხლის მოსპობით დაემუქრა.

ერთ პირს ბრალდება საქართველოს სისხლის სამართლის კოდექსის 365-ე მუხლის მე-3 ნაწილით (ძალადობა დაცვის განხორციელებასთან და სასამართლოში საქმის განხილვასთან დაკავშირებით), ხოლო არასრულწლოვანს – საქართველოს სისხლის სამართლის კოდექსის 365-ე მუხლის მე-2 და მე-3 ნაწილებით (მუქარა და ძალადობა დაცვის განხორციელებასთან და სასამართლოში საქმის განხილვასთან დაკავშირებით) წარედგინათ.

პროკურატურა ბრალდებულებისთვის აღკვეთის ღონისძიების შეფარდების მოთხოვნით, თბილისის საქალაქო სასამართლოს კანონით დადგენილ ვადაში მიმართავს. შინაგან საქმეთა სამინისტროში სისხლის სამართლის საქმეზე გამოძიება გრძელდება დანაშაულის ჩამდენი სხვა პირების დადგენის მიზნით,”- ნათქვამია ინფორმაციაში.

სალომე ზურაბიშვილს შეუძლია ერთი ხელმოწერით დაამტკიცოს, რომ ის ნამდვილად უჭერს მხარს საქართველოს ევროპულ მომავალს. შესაბამისად, მისი ეს განცხადება ვფიქრობ, რომ ადეკვატურია და სწორია, თუმცა ყოველი დღე არის მნიშვნელოვანი, როცა ადამიანი ატარებს პოლიტიკურ ტყვეობაში ცხოვრებას, – ამის შესახებ „ნაციონალური მოძრაობის” თავმჯდომარემ, ლევან ხაბეიშვილმა განაცხადა, რითაც გამოეხმაურა პრეზიდენტის განცხადებას, რომ მიხეილ სააკაშვილის შეწყალებაზე უარი არ განუცხადებია და შეწყალებაზე კომენტარებს არ აკეთებს, თუ არ ამბობს რომ ვინმეს იწყალებს.

მისივე თქმით, სალომე ზურაბიშვილმა გადაწყვეტილებები ქვეყნისთვის საჭირო ფაქტორების მიხედვით უნდა მიიღოს.

„სალომე ზურაბიშვილს შეუძლია ერთი ხელმოწერით დაამტკიცოს, რომ ის ნამდვილად მხარს უჭერს საქართველოს ევროპულ მომავალს. შესაბამისად, მისი ეს განცხადება, ამ შემთხვევაში, ვფიქრობ, რომ ადეკვატურია და სწორია, თუმცა ყოველი დღე არის მნიშვნელოვანი, როცა ადამიანი ატარებს პოლიტიკურ ტყვეობაში ცხოვრებას. ამიტომ, თუ ეს მისი მხრიდან არის შერბილებული განცხადება, მივესალმები, ნორმალურია. ზოგადად ხდება ხოლმე პოლიტიკაში ასე, ჩვენთვის ძალიან მიუღებელი პოლიტიკური ფიგურაა სალომე ზურაბიშვილი, მიუხედავად ამისა, ჩვენ მისი იმპიჩმენტისთვის მხარი არ დაგვიჭერია, იმიტომ, რომ ჩვენი ქვეყნისთვის ეს სასარგებლო არ იქნებოდა. მანაც არა პირადი შეხედულებით, არამედ ჩვენი ქვეყნის, ხალხის საკეთილდღეოდ და ჩვენც ქვეყანას როგორც სჭირდება, ისე უნდა მიიღოს გადაწყვეტილება. ჩვენ ქვეყანას ნამდვილად არ სჭირდება პუტინის ტყვე საპატიმროში”, – განაცხადა ხაბეიშვილმა.

როგორც მან აღნიშნა, სალომე ზურაბიშვილს შეუძლია დაამტკიცოს, რომ გადაწყვეტილებებს დამოუკიდებლად იღებს. მისი განმარტებით, ეს გამოიხატება, საქართველოს მესამე პრეზიდენტის, მიხეილ სააკაშვილის შეწყალებით.

„მას შეუძლია დაამტკიცოს, რომ არის დამოუკიდებელი, თუ კონკრეტულ გადაწყვეტილებას მიიღებს „ფსბ”-ს აგენტ ფარცხალაძის ბრალით გასამართლებულ მიხეილ სააკაშვილის გათავისუფლებით“, – განაცხადა ხაბეიშვილმა.