მოლაპარაკებები ჯერ კიდევ მიმდინარეობს, გულწრფელად ვიმედოვნებ, რომ ეს ყველაფერი მოგვიტანს სასარგებლო შედეგებს და შემდეგი რამდენიმე დღის განმავლობაში 27 წევრი სახელმწიფო დაამტკიცებს ევროკომისიის პოზიტიურ რეკომენდაციას , – ამის შესახებ საქართველოში ევროკავშირის ელჩმა, პაველ ჰერჩინსკიმ ორბელიანების სასახლეში კამპანიის „ჩვენი ხმა ევროპას“ დასკვნით მიღებაზე განაცხადა.

პაველ ჰერჩინსკის განცხადებით, ევროკავშირში ისტორიული გადაწყვეტილებები ერთიანობასა და კონსენსუსს მოითხოვს, რაც არც ისე მარტივია და თამასა ძალიან მაღალია.

„ქალბატონო პრეზიდენტო, პარლამენტის წვერებო, ძვირფასო ელჩებო. რამდენიმე საათში ჩვენ გვექნება ისტორიული შეხვედრა ბრიუსელში. მინდა გამოვიყენო სიტყვა ისტორიული, რომელიც ამ შემთხევას შეესაბამება. 27 ევროკავშირის ლიდერი, პრემიერ-მინისტრი, პრეზიდენტი, მიიღებს გადაწყვეტილებას ევროკავშირის გაფართოებასთან დაკავშირებით. მე ძალიან მოხარული და ამაყი ვარ, რომ ევროპულმა კომისიამ 8 ნოემბერს ძალიან ცალსახად გაუწია რეკომენდაცია პოტენციურ წევრ სახელმწიფოებს, რომ წაიწიონ წინ, მოახდინონ პაკეტების ადაპტირება, გაწევრიანების მოლაპარაკების დაწყებასთან დაკავშირებით მოლდოვასთან და უკრაინასთან, ხოლო საქართველოსთვის კანდიდატის სტატუსის მინიჭების თვალსაზრისით. იმედი მაქვს, რომ ჩვენი წვერი სახელმწიფოები მიჰყვებიან მჭიდროდ ევროპული კომისიის რეკომენდაციას. როგორც ყველამ ვიცით, ევროკავშირში ამგვარი ისტორიული გადაწყვეტილებები მოითხოვს ერთიანობას, კონსენსუსს. ამ შემთხვევაში ერთიანობა გულისხმობს იმას, რომ ყველა წევრმა სახელმწიფომ უნდა განაცხადოს თანხმობა. ერთიანობა არც ისე მარტივია, ეს არის ძალიან მაღალი თამასა. მოლაპარაკებები ჯერ კიდევ მიმდინარეობს და მე გულწრფელად ვიმედოვნებ, რომ ეს ყველაფერი მოგვიტანს სასარგებლო შედეგებს და შემდეგი რამდენიმე დღის განმავლობაში 27 წევრი სახელმწიფო დაამტკიცებს ევროკომისიის პოზიტიურ რეკომენდაციას“, – განაცხადა ელჩმა.

ევროკავშირის ელჩმა, პაველ ჰერჩინსკიმ მადლობა გადაუხადა საქართველოს პრეზიდენტს, სალომე ზურაბიშვილს კამპანიის „ჩვენი ხმა ევროპას“ და ყველა სხვა მნიშვნელოვანი ინიციატივისათვის, რომელიც საქართველოს მომავალს ეხება.

„ქალბატონო პრეზიდენტო 8 ნოემბერს თქვენ დაიწყეთ ხელმოწერების შეგროვების ინიციატივა, იმ ადამიანებისა, რომლებიც ემხრობიან საქართველოსთვის კანდიდატის სტატუსის მინიჭებას. ეს არის ერთ-ერთი იმ უამრავ ინიციატივათაგანი, რომელიც უკავშირდება სახელმწიფოს მომავალს. მე ძალიან მიხარია, რომ თქვენ ყველანი იღებთ ამ ყველაფერში მონაწილეობას და მხარს უჭერთ საქართველოსათვის კანდიდატის სტატუსის მინიჭებას. თქვენი ხმა ისმის საკმაოდ ნათლად და ხმამაღლა ბრიუსელში და იმედი მაქვს, რომ ეს ასევე გასაგები იქნება ევროკავშირის წევრი სახელმწიფოს 27-ვე დედაქალაქში. დღეს აქ ფაქტობრივად ვიმყოფებით ყველანი, ბევრმა კოლეგამ იმოგზაურა მეზობელი ქვეყნებიდან იმისათვის, რომ აქ ჩამოსულიყო, ზოგიერთი კოლეგა ჩამოვიდა საკუთარი დედაქალაქიდან იმისათვის, რომ მონაწილეობა მიეღო ამ ღონისძიებაში. ჩემთვის დიდი პრივილეგია იქნება, რომ მივიღო ეს ხელმოწერები და ელექტრონულ ფორმატშიო გადავუგზავნო შარლ მიშელს, პრეზიდენტს, რომელიც ჩაატარებს ისტორიულ შეხვედრას, რომელიც დაიწყება დილის 10:00 საათზე. კიდევ ერთხელ გმადლობთ და მეც ვუერთდები პრეზიდენტის განცხადებას, რომ იმედი ვიქონიოთ, კიდევ ერთხელ მოგვეცემა აღნიშვნის შესაძლებლობა და ეს იქნება შესანიშნავი დღე“, – განაცხადა პაველ ჰერჩინსკიმ.

„ზურაბ ჟვანიასთან არის დაკავშირებული ჩვენი შინაარსიანი ევროპული გზა, რადგან მისი მოძრაობა, „მწვანეები“ ძალიან მნიშვნელოვანი მოძრაობა არის ევროპისთვის“, – ამის შესახებ საქართველოს პრეზიდენტმა სალომე ზურაბიშვილმა ორბელიანების სასახლეში კამპანია „ჩვენი ხმა ევროპას“ –  დასკვნით ღონისძიებაზე სიტყვით გამოსვლისას განაცხადა.

პრეზიდენტის თქმით, მისი კამპანია {ჩვენი ხმა ევროპას} მიზნად ისახავდა საზოგადოება ყოფილიყო ჩართული ბოლო მობილიზაციაში.

„ეს კამპანია მიზნად ისახავდა, რომ საზოგადოება ყოფილიყო ჩართული ამ ბოლო მობილიზაციაში, რომელმაც მიგვიყვანა 8 ნოემბრამდე, როცა მივიღეთ ძალიან სასიხარულო დასკვნა და რეკომენდაციები ევროპული კომისიიდან. 15 დეკემბერს ველოდებით კიდევ უფრო სასიხარულო გადაწყვეტილებას.

მნიშვნელოვანი იყო საქართველოს ხმა ყოფილიყო ხმამაღლა ევროპისკენ გაგზავნილი და ეს არ უნდა ყოფილიყო მხოლოდ პრეზიდენტის ხმა და არც რომელიმე ცალკეული ჯგუფის. იმ დღეს ვნახეთ ევროკავშირის უზარმაზარი დროშა, რომელმაც ჩამოიარა რუსთაველი და მივიდა ევროპულ მოედნამდე, ჩვენ ვიმედოვნებთ რომ რუსთაველიდან შევალთ ევროკავშირში და ეს იქნება ერთ-ერთი გადადგმული ნაბიჯი 15 დეკემბერს. ეს იქნება ბოლო ეტაპის საწყისი.

ეს არის გზაჯვარედინი, საქართველომ გაიარა ძალიან ბევრი ეტაპი აქამდე, ეს გზა არ დაწყებულა არც დღეს, არც გუშინ, არც 8 ნოემბერს, არც წინა წელიწადს, როცა მოგვცეს ევროპული პერსპექტივა, რაც ძალიან მნიშვნელოვანი იყო თავისთავად, რადგან პერსპექტივის მინიჭება საქართველოსთვის ნიშნავდა და ნიშნავს, რომ მთელი დისკუსიები მრავალი წლის მანძილზე რაც არსებობდა საქართველოს გეოგრაფიაზე და რამდენადაც ეს გეოგრაფია ხელს უშლიდა თუ არ უშლიდა ჩვენს ევროპულობას, ის დისკუსიები ამით დასრულდა.

ჩვენ ძალიან ბევრი მნიშვნელოვანი ეტაპი გავიარეთ და ეს დაიწყო მაშინ, როცა შევედით ეუთოში. სწორედ ზურაბ ჟვანიას ცნობილი სიტყვით დაიწყო, რომელიც მან წარმოთქვა ეუთოს საბჭოში, როცა ჩვენ გავწევრიანდით. ზურაბ ჟვანიასთან არის დაკავშირებული ჩვენი შინაარსიანი ევროპული გზა, რადგან მისი მოძრაობა, „მწვანეები“ ძალიან მნიშვნელოვანი მოძრაობაა ევროპისთვის.

ეს არის ერთ-ერთი პოლიტიკური მიმართულება, რომელიც კიდევ უფრო მეტად არის გასააქტიურებელი საქართველოში“, – აცხადებს საქართველოს პრეზიდენტი

პრეზიდენტის თქმით, რუსეთი ცდილობს, აურიოს გეგმა და იმედი გამოთქვა, რომ რუსეთის მცდელობები 15 დეკემბერს უშედეგო აღმოჩნდება.