უკრაინის პრეზიდენტმა, ვოლოდიმირ ზელენსკიმ გამორიცხა რაიმე კომპრომისის შესაძლებლობა ნატოში უკრაინის მომავალ წევრობასთან დაკავშირებით აგრესორ სახელმწიფოსთან ტერიტორიებზე შესაძლო მოლაპარაკებების კონტექსტში.

სახელმწიფოს მეთაურმა კომენტარი გააკეთა ინფორმაციაზე, თითქოს შეერთებული შტატები და გერმანია მიზანმიმართულად თავს არიდებენ უკრაინისთვის ჩრდილოატლანტიკურ ალიანსში გაწევრიანების მკაფიო ვადის მიწოდებას იმ შემთხვევისთვის, თუ წევრობის საკითხი რუსეთთან მოლაპარაკების საგანი გახდება.

„დარწმუნებული ვარ, რომ ბაიდენისა და შოლცის მხრიდან მოღალატური პოზიცია არ იქნება, მაგრამ ამავე დროს, უნდა ვთქვა, რომ ჩვენ არასდროს გავცვლით სტატუსს ჩვენს რომელიმე ტერიტორიაზე, თუნდაც ეს იყოს ერთი სოფელი, რომელშიც ერთი ბაბუა ცხოვრობს.

ჩვენ არ დავთმობთ ჩვენს ტერიტორიებს და არასდროს გავცვლით გაყინულ კონფლიქტზე. ეს არასდროს მოხდება. ჩვენმა პარტნიორებმა მკაფიოდ იციან ჩემი პოზიცია“, – აღნიშნა უკრაინის პრეზიდენტმა.

„დიდი შვიდეულის“ წევრმა ქვეყნებმა მიიღეს ერთობლივი დეკლარაცია, რომელშიც უკრაინის მხარდაჭერასა და სხვადასხვა სფეროში უკრაინის მიერ გასატარებელ რეფორმებზეა საუბარი. დეკლარაციაში, რომელიც „დიდი შვიდეულის“ ლიდერებმა ნატო-ს სამიტზე წარადგინეს, აღნიშნულია, რომ „დიდი შვიდეულის“ ქვეყნები მიიღებენ ყოვლისმომცველ ზომებს უკრაინის გრძელვადიანი უსაფრთხოების უზრუნველსაყოფად.

დოკუმენტში ნათქვამია, რომ „დიდი შვიდეულის“ ქვეყნები აპირებენ, უკრაინისთვის შეიმუშაონ „კონკრეტული, ორმხრივი, გრძელვადიანი ვალდებულებები და შეთანხმებები უსაფრთხოების სფეროში“. აღნიშნული დახმარება მოიცავს თანამედროვე სამხედრო აღჭურვილობის მიწოდებას სახმელეთო, საჰაერო და საზღვაო სფეროებში, ასევე წვრთნებს უკრაინული ძალებისთვის, სადაზვერვო ინფორმაციის გადაცემას და დაცვას კიბერშეტევებისგან. ამასთან, „დიდი შვიდეულის“ ქვეყნები გეგმავენ უკრაინის მხარდაჭერას მისი თავდაცვის სფეროს შემდგომ განვითარებაში.

ამასთან, დოკუმენტში აღნიშნულია, რომ მსოფლიოს შვიდი უმსხვილესი ინდუსტრიული ქვეყანა გეგმავს, დაეხმაროს უკრაინას, შექმნას თანამედროვე არმია, რომელსაც შეუძლია, დაიცვას ქვეყანა ახლა და შეაჩეროს რუსეთი მომავალში შემოჭრის საფრთხისგან.

„რუსეთის მომავალი შეიარაღებული თავდასხმის შემთხვევაში, ჩვენ დაუყოვნებლივ გავმართავთ კონსულტაციებს უკრაინასთან და გადავწყვეტთ შესაბამის შემდგომ ნაბიჯებს“, – აღნიშნულია დეკლარაციაში.

დოკუმენტის მიხედვით, ამ თემაზე უკრაინასთან მოლაპარაკებები უნდა დაიწყოს დაუყოვნებლივ და ისინი ჩატარდება ორმხრივ საფუძველზე: „დიდი შვიდეულის“ ჯგუფის ცალკეულ წევრ ქვეყნებსა და უკრაინას შორის.

„დიდი შვიდეულის“ მიერ მიღებული დეკლარაციის მიხედვით, თავის მხრივ, უკრაინა ვალდებულია, განაგრძოს ფართომასშტაბიანი რეფორმები სხვადასხვა სფეროში, მათ შორის კორუფციასთან ბრძოლაში, ასევე გააუმჯობესოს სამართალდამცავი უწყებების, სასამართლოების, კორპორატიული მმართველობისა და საჯარო ადმინისტრაციის მუშაობა. ამასთან, უკრაინამ უნდა განაგრძოს დემოკრატიის, კანონის უზენაესობის, ადამიანის უფლებებისა და სიტყვის თავისუფლების პატივისცემა. მათ შორის ჯარის თავდაცვისა და მოდერნიზაციის სფეროში რეფორმების გაგრძელება და შეიარაღებულ ძალებზე სამოქალაქო კონტროლის გაძლიერება.

ამასთან, იაპონიის პრემიერ-მინისტრმა, ფუმიო კიშიდამ „დიდი შვიდეულის“ წევრი ქვეყნების მიერ შემუშავებული ერთობლივი დეკლარაციის წარდგენის დროს განაცხადა, რომ მომავალში დეკლარაცია ღია იქნება ნებისმიერი ქვეყნისთვის, რომელიც იზიარებს უკრაინის მხარდაჭერის იდეას. მისივე თქმით, „დიდი შვიდეული“ განაგრძობს უკრაინის გვერდით დგომას.

„მოხარული ვარ, რომ დღეს შემიძლია, განვაცხადო უკრაინის მხარდასაჭერი ერთობლივი დეკლარაციის შესახებ. „დიდი შვიდეულის“ ჰიროსიმას სამიტზე, დისკუსიებში ჩართვის გზით, რომელიც მოიცავდა მოწვეული ქვეყნების ფართო სპექტრს, შევთანხმდით, რომ ცალმხრივი მცდელობები სტატუს კვოს ძალისმიერი გზით შესაცვლელად მიუღებელია მსოფლიოს ნებისმიერ წერტილში და რომ დავიცვათ თავისუფალი, ღია, კანონის უზენაესობაზე დაფუძნებული საერთაშორისო წესრიგი. ეს ძალიან მნიშვნელოვანია, რომ „დიდი შვიდეულის“ ლიდერები და ვოლოდიმირ ზელენსკი კიდევ ერთხელ შევიკრიბეთ. მომავალში ეს დეკლარაცია ღია იქნება ნებისმიერი ქვეყნისთვის, რომელიც იზიარებს უკრაინის მხარდაჭერის იდეას. იმედი მაქვს, ბევრი ქვეყანა გადაწყვეტს გაწევრიანებას. „დიდი შვიდეული“ განაგრძობს უკრაინის გვერდით დგომას. ჩვენი სოლიდარობა არასოდეს შეიცვლება“, – განაცხადა ფუმიო კიშიდამ.

ვილნიუსის სამიტზე დეკლარაციას გამოეხმაურა უკრაინის პრეზიდენტი ვოლოდიმირ ზელენსკიც, რომელმაც დეკლარაციას უწოდა მისი ქვეყნისთვის „უსაფრთხოების ქოლგის“ პირველი იურიდიულად სავალდებულო გარანტია.

ჩვენ დავეხმარებით უკრაინას ძლიერი თავდაცვის შექმნაში ხმელეთზე, ჰაერსა და ზღვაზე, – ეს განცხადება აშშ-ის პრეზიდენტმა, ჯო ბაიდენმა „დიდი შვიდეულის“ წევრი ქვეყნების მიერ შემუშავებული ერთობლივი დეკლარაციის წარდგენის დროს განაცხადა.

ჯო ბაიდენის თქმით, დეკლარაცია არის ჩარჩო, რომლითაც განსაზღვრულია უკრაინისთვის უსაფრთხოების გარანტიების გაცემა.

ამასთან, სიტყვით გამოსვლაში ბაიდენმა განსაკუთრებული მადლობა გადაუხადა იაპონიის პრემიერ-მინისტრ ფუმიო კიშიდას.

„ძალიან ცოტა ადამიანია ევროპაში ან ჩრდილოეთ ამერიკის კონტინენტზე, ვინც იფიქრებდა, რომ იაპონიის პრემიერ-მინისტრი უკრაინას მხარს დაუჭერდა. იაპონიამ გაზარდა სამხედრო ბიუჯეტი, ის მიხვდა, რომ როდესაც მსოფლიოს ნებისმიერ ნაწილში 180 ათასი ჯარისკაცი კვეთს საზღვარს, პარავს სუვერენიტეტს სხვა ქვეყანას, მაშინ ეს აისახება მთელ მსოფლიოზე“, – განაცხადა ბაიდენმა.

ბაიდენის განცხადებით, ნატო-უკრაინის საბჭოს სხდომის მონაწილეებმა ერთხმად დაუჭირეს მხარი უკრაინის ნატო-ს მომავალ წევრობას.

აშშ-ის პრეზიდენტმა ასევე ხაზი გაუსვა იმ ფაქტს, რომ ნატო-ს ყველა მოკავშირემ დაუჭირა მხარი უკრაინის ნატო-ში გაწევრიანების გზაზე, გაუქმდეს წევრობის სამოქმედო გეგმის შესრულების მოთხოვნა. ბაიდენის თქმით, უკრაინა განაგრძობს იმ რეფორმების გატარებას, რომლებიც აუცილებელია ალიანსში გასაწევრიანებლად.

„მე და ბატონმა ზელენსკიმ ვისაუბრეთ იმ გარანტიებზე, რომლებიც ჩვენ შეგვიძლია, გავცეთ უკრაინის ნატო-ში გაწევრიანებამდე. ამაზე ვისაუბრეთ უკრაინაში ჩემი ვიზიტის დროს და სხვა შეხვედრებზეც. დღეს გრძელვადიანი ვალდებულებების, რომელსაც ჩვენ ვიღებთ, გამყარებულია იმ გაგებით, რომ გარდამავალ ეტაპზეც მივცემთ უსაფრთხოების გარანტიას, რომელიც მას სჭირდება ნებისმიერი აგრესიისგან დასაცავად. დღეს „დიდი შვიდეულის“ წევრებმა წარვადგინეთ ერთობლივი დეკლარაცია უკრაინის მხარდასაჭერად, რომ მკაფიო გავხადოთ – ჩვენი მხარდაჭერა გაგრძელდება ძალიან დიდხანს“, – განაცხადა ბაიდენმა.

მისივე თქმით, ამ დეკლარაციის წარდგენით იწყება პროცესი, როდესაც „დიდი შვიდეულის“ წევრი სახელმწიფოები და ნებისმიერი სხვა ქვეყანა, რომელსაც აქვს სურვილი, შეუერთდეს დოკუმენტს, დაიწყებენ მოლაპარაკებას უკრაინასთან ორმხრივი უსაფრთხოების ვალდებულებების თაობაზე.

„ჩვენ დავეხმარებით უკრაინას ძლიერი თავდაცვის შექმნაში – ხმელეთზე, ჰაერსა და ზღვაშიც, რაც იქნება სტაბილურობის ძალა რეგიონში და შეაკავებს ნებისმიერ საფრთხეს“, – განაცხადა ბაიდენმა.

ნატოს გენერალურმა მდივანმა, იენს სტოლტენბერგმა განაცხადა, რომ ყველაზე დიდი რისკი იქნება, თუ რუსეთის პრეზიდენტი, ვლადიმირ პუტინი უკრაინაში ომს მოიგებს. ინფორმაციას ამის შესახებ ტელეკომპანია CNN-ი ავრცელებს.

„ევროპაში სრულმასშტაბური ომი მიმდინარეობს და ნატოს მოკავშირეებისთვის არ არსებობს რისკისგან თავისუფალი ვარიანტი, მაგრამ ყველაზე დიდი რისკია, თუ [ვლადიმირ] პუტინი გაიმარჯვებს. სწორედ ამიტომ არის მნიშვნელოვანი ნატოს მოკავშირეებისთვის უკრაინის მხარდაჭერა. ტრაგედია იქნება უკრაინისთვის, თუ [პრეზიდენტი] პუტინი გაიმარჯვებს, მაგრამ ეს საშიში იქნება ჩვენთვის, უფრო დაუცველებს გაგვხდის“, – აღნიშნა ნატოს გენერალურმა მდივანმა.