მავნებელი ხართ თქვენ, ქალბატონო ყოფილო ელჩო, ჩვენი მთავარი პარტნიორი, რომელიც უნდა იყოს მხარდამჭერი დემოკრატიული პროცესების, სიმშვიდის, ქალბატონი დეგნანი, რომელიც არის წარმომადგენელი, კითხვის ნიშნის ქვეშ აყენებს ელექტრონულ არჩევნებს, რომელიც მათი რეკომენდაციით დავნერგეთ, – ამის შესახებ საპარლამენტო უმრავლესობის წევრმა, ირაკლი ზარქუამ აშშ-ის ელჩ კელი დეგნანის მიერ „რადიო თავისუფლებისთვის“ მიცემული ინტერვიუს კომენტირებისას განაცხადა, სადაც არჩევნების შესახებაც არის საუბარი.

ირაკლი ზარქუას თქმით, კელი დეგნანმა ვერ გაითავისა, რომ იყო არა პარტიის, არამედ სახელმწიფოს წარმომადგენელი.

„მავნებელი ხართ თქვენ, ქალბატონო ყოფილო ელჩო, Goodbye, my darling. ე.ი. რა გამოდის, რომ ჩვენი მთავარი პარტნიორი, რომელიც უნდა იყოს მხარდამჭერი დემოკრატიული პროცესებისა და ქვეყნის განვითარების, სიმშვიდის, ქალბატონი დეგნანი, რომელიც არის წარმომადგენელი, კითხვის ნიშნის ქვეშ აყენებს ელექტრონულ არჩევნებს, რომელიც მათი რეკომენდაციით დავნერგეთ. უფრო მეტიც, პრაქტიკაში გამოვიყენეთ ახლა.

შუალედური არჩევნები გვქონდა, მათ შორის კრწანისში, თერჯოლაში და ასე შემდეგ, ავირჩიეთ მერები და ვაპირებთ, გორში გამოვიყენოთ ოქტომბრის თვეში შუალედურ არჩევნებში. სადაც ჩატარდა ელექტრონულად, არცერთი პრობლემა, ხარვეზი არ დაფიქსირებულა და ყველამ, მათ შორის საერთაშორისო დამკვირვებლებმაც, ადგილობრივმა არასამთავრობოებმაც თქვეს, რომ კი, ეს გამართულია და მოქმედებს. ახლა ამას რომ კითხვის ნიშნის ქვეშ დააყენებ 2024-ში, მავნებელი ხართ თქვენ, ქალბატონო ყოფილო ელჩო, მინდა, ეს მოგმართოთ და პირდაპირ გითხრათ, თქვენ თქვენი ვერ გაითავისეთ, ვერ გაითვალისწინეთ, რომ თქვენ არა პარტიის წარმომადგენელი, არამედ სახელმწიფოს წარმომადგენლი იყავით. იმ სახელმიფოსი, რომელზეც იმედებს ვამყარებთ დღემდე და მომავალში დავამყარებთ, რომ ჩვენ ევროპულ და ევროატლანტიკურ ინტეგრაციაში კიდევ უფრო მეტად წინ წავიწიოთ, უფრო მეტად დემოკრატიული საზოგადოება ავაშენოთ და მეტად დემოკრატიული გავხადოთ ეს ქვეყანა და ამით ძლიერი, ეკონომიკურად განვითარებული. თქვენ, სამწუხაროდ, ამ მიმართულებით არცერთი ნაბიჯი არ გადაგიდგამთ, ისევე როგორც დღემდე არ აქვს საქართველოს თავისუფალი ვაჭრობა ამერიკის შეერთებულ შტატებთან და თქვენ ამისთვის არაფერი გაგიკეთებიათ, არც უვიზო მიმოსვლა აქვს საქართველოს ამერიკის შეერთებულ შტატებთან და ამისთვის თქვენ არაფერი გაგიკეთებიათ, არც ინვესტიცია ჩაგიდიათ.

ვსვამ კითხვას – ანაკლიის პორტში რატომ არ დევს ამერიკული ფული, რატომ არ გამოხვედით ინიციატივით თქვენ ან სხვები. ყაზახურ ინვესტიციებს გვტენიდა ის, ვინც იყო იქ შესული. რატომ არ არის? ჩამოდით და ჩადეთ ფული. ხომ არის სტრატეგიულად მნიშვნელოვანი თქვენთვისაც. არ გამოვა ასე ორმაგი სტრანდარტით, ვწუხვარ ამის თქმის საშუალება რომ მომეცით, მაგრამ ეს თქვენ ბრძანეთ. ქართველი ერი, უდიდესი ცივილიზაციის, კულტურის, განათლების მქონე საზოგადოება ვართ და რამენაირად იმასაც გავარკვევდით და გავარკვიეთ, ელექტრონულად როგორ შეიძლება მონაწილეობა მივიღოთ არჩევნებში. ძალიან ვწუხვარ, ქალბატონო ელჩო, მაგრამ თქვენ, როგორც ელჩი, ვერ შედექით და ეს უნდა ითქვას.

ვწუხვარ, თქვენ პოლარიზაცია გაზარდეთ ქართულ საზოგადოებაში თქვენი საქმიანობით, თქვენი განცხადებებით და ამის დემონსტრირებაა ის, რაც ბოლოს მოვისმენთ. ჩვენი პარტნიორები, მათ შორის თქვენ და ყველა, საზოგადოება გვირჩევდა, რომ ელექტრონული არჩევნები 100 პროცენტით გაგვეხადა საქართველოში, რომელიც იქნებოდა მყარი და ყოველგვარი მანიპულაციებისგან დაცული, თურმე ესეც არ მოგწონთ.

რატომ? იმიტომ, რომ ალბათ თქვენ იყავით ერთერთი ერთ-ერთი შემოქმედი, რომ აქ რევოლუციური ტალღა აგორებულიყო და 3-4-ჯერ ჩვენ ეს ჩავახშეთ, რადგან საქართველოს და მისი მოსახლეობის უმრავლესობის ინტერესებში არასდროს შედიოდა ქაოსი, არეულობა და არც მეორე ფრონტის გახსნა, რასაც ეს ხელმოცარულები და რადიკალები ცდილობდნენ. ვწუხვარ, მაგრამ თქვენ ძალიან დიდი შეცდომები დაუშვით და გააგრძელეთ, ბოლოს ამით დააგვირგვინეთ. მქონდა მცდელობა, ბოლოს ლამაზად, ლამაზი სიტყვებით გამეცილებინეთ, მაგრამ სამწუხაროა, რომ ასე მოხდა. ასე რომ, Goodbye, my darling“, – განაცხადა ირაკლი ზარქუამ.

ჩვენი სტრატეგიული პარტნიორების ასეთი ღია განცხადებები მიანიშნებს ერთ რამეზე – სრული მხარდაჭერა ექნება ქართველ ხალხს და შესაბამისად, ეს საქმე ბოლომდე ქართველი ხალხის მისაყვანი იქნება, – ამის შესახებ „ერთიანი ნაციონალური მოძრაობის“ თავმჯდომარემ, ლევან ხაბეიშვილმა განაცხადა, რითაც არჩევნებთან დაკავშირებით, საქართველოში ამერიკის შეერთებული შტატების ელჩის, კელი დეგნანის განცხადებას გამოეხმაურა.

მისივე თმით, „გაფორმება სჭირდება იმას, რომ ქართველ ხალხს რუსული ხელისუფლება არ უნდა“.

„როცა პუტინი, მარგარიტა სიმონიანი, სალავიოვი გაქებს, ეს საქართველოს ხელისუფლებისთვის პრობლემაა. პარალელურად, როცა სტრატეგიული პარტნიორი ამბობს, რომ მანიპულატორი ხარ, გამყალბებელი ხარ, რომ საშიში და სახიფათოა საქართველოს ხელისუფლების მიერ ჩატარებული არჩევნები, ეს არის განაჩენი რუსული პარტიისთვის და შესაბამისად, ქართველმა ხალხმა ეს განაჩენი უნდა აღასრულოს. იმას, რომ რუსული ხელისუფლებაა, იმას, რომ რუსული პარტია არ უნდა ქართველ ხალხს, იმას, რომ ამ რეჟიმში ცხოვრება საქართველოს მოქალაქეს აღარ უნდა, სჭირდება გაფორმება და ჩვენი სტრატეგიული პარტნიორების ასეთი ღია განცხადებები მიანიშნებს ერთ რამეზე, სრული მხარდაჭერა ექნება საქართველოს მოქალაქეს, სრული მხარდაჭერა ექნება ქართველ ხალხს და შესაბამისად, ეს საქმე ბოლომდე ქართველი ხალხის მისაყვანი იქნება,“ – განაცხადა ლევან ხაბეიშვილმა.

არიან ადამიანები, რომლებიც ცდილობენ ძირი გამოუთხარონ აშშ-სა და საქართველოს შორის ახლო, ძლიერ პარტნიორობას. ამას ისინი გარკვეული მიზეზების გამო და კერძო ინტერესებით აკეთებენ, რაც სწორედ ამაზეა გათვლილი, – ამის შესახებ აშშ-ის ელჩმა საქართველოში კელი დეგნანმა „რადიო თავისუფლებასთან“ ინტერვიუში განაცხადა.

მისივე თქმით, აშშ არსად წასვლას არ აპირებს და საქართველოს გვერდით იდგება მანამდე, ვიდრე საქართველოს ხალხი დემოკრატიული მომავლისკენ ისწრაფვის.

„ისინი არ ცდილობენ მხოლოდ აშშ-ის დისკრედიტაციას, არამედ ნებისმიერი დამოუკიდებელი ხმისა, რომელიც გამოდის საქართველოს ევროპული, დემოკრატიული მომავლის სასარგებლოდ. ვთვლი, რომ საქართველოს ხალხი საკმარისად საზრიანია – მინიმუმ ისინი, ვისაც მე შევხვედრივარ, ძალიან საზრიანად უდგებიან ამას. ისინი მიეჩვივნენ ამ სახის რუსულ და პრორუსულ დეზინფორმაციას და ვფიქრობ, შეუძლიათ დაინახონ – როდის ცდილობენ ადამიანები დააზიანონ საქართველოს პარტნიორობა მის უახლოეს მეგობრებთან, ნამდვილ სტრატეგიულ პარტნიორებთან, რომლებიც იქნებიან აქ საქართველოსთვის, ვინაიდან აქ ვართ საქართველოსთან ერთად 30 წელზე მეტია და არსად წასვლას ვაპირებთ. ვიდგებით საქართველოს გვერდით მანამდე, ვიდრე საქართველოს ხალხი დემოკრატიული მომავლისკენ ისწრაფვის“, – განაცხადა კელი დეგნანმა.

„ხალხის ძალის“ წევრებს მოვუწოდებ, „დაგუგლონ“, რატომ წაუყენეს ბრალი ტრამპს – 2024 წლის საპარლამენტო არჩევნებზე „ქართული ოცნებაც“ დაკარგავს ძალაუფლებას და ახლა ცდილობენ, ეს წინასაარჩევნო წელი იყოს ისტერიის და პოლიტიკური ეგზეკუციის მიმართულებით ძალისხმევის წელი, – ამის შესახებ ჟურნალისტებთან პარლამენტში, პოლიტიკური ჯგუფ „ევროოპტიმისტების“ წევრმა ხატია დეკანოიძემ განაცხადა.

დეკანოიძე წინასაარჩევნოდ რეპრესიებს არ გამორიცხავს, თუმცა აღნიშნავს, რომ ივანიშვილის პროექტი „ხალხის ძალის“ სახით, ჩავარდა და ახლა მისი წარმომადგენლები ხმამაღალ განცხადებებს აკეთებენ ყურადღების მისაპყრობად.

„დაგუგლონ“ და წაიკითხონ, რატომ წაუყენეს ბრალი ყოფილ პრეზიდენტ ტრამპს. „ხალხის ძალაში“ ბიძინა ივანიშვილმა ჩადო საკმაოდ დიდი რესურსი და ის მოიაზრებოდა „ქართული ოცნების“ განაყოფად, რომელსაც არჩევნებზე პრორუსული ამომრჩევლის (ძალიან ცოტა) ხმები უნდა წაეღო. ახლა გვაქვს მოცემულობა, როცა რუსული კანონის ჩავარდნის შემდეგ „ხალხის ძალა“ არის გაკოტრებული, ივანიშვილის ეს პროექტი ჩავარდა, „ხალხის ძალა“ ვერაფერს იზამს არჩევნებზე, ვერანაირ მხარდაჭერას ვერ მიიღებს და აკეთებენ ხმამაღალ განცხადებებს. ივანიშვილის ეს გაკოტრებული პროექტი საბოლოოდ გაპარტახებულია, სწორედ ამიტომ ცდილობენ გაკოტრებული პოლიტიკოსების განცხადებებით ყურადღება მიიპყრონ. რეპრესიებს მე, რა თქმა უნდა, არ გამოვრიცხავ, მაგრამ ვიმეორებ ეს არის ივანიშვილის გაკოტრებული პროექტი, რომელიც ახმოვანებს ხოლმე „ქართული ოცნების“ ინიციატივებს, მაგრამ მათ უნდა ესმოდეთ, არათუ „ხალხის ძალა“, 2024 წლის საპარლამენტო არჩევნებზე „ქართული ოცნებაც“ დაკარგავს ძალაუფლებას, ამიტომაც ახლა ცდილობენ, ეს წინასაარჩევნო წელი იყოს ისტერიის და პოლიტიკური ეგზეკუციის მიმართულებით ძალისხმევის,“ – განაცხადა დეკანოიძემ.

ინფორმაციისთვის, „ხალხის ძალა“ მიიჩნევს, რომ უნდა აღიძრას სისხლის სამართლის საქმე საქართველოს კონსტიტუციური წესრიგის წინააღმდეგ შეთქმულებისა და ქართველი ხალხის მოტყუების გამო.

როგორც მოძრაობის მიერ გავრცელებულ განცხადებაშია აღნიშნული, იმედოვნებენ, რომ პროკურატურა სერიოზულად დაინტერესდება ამ საკითხით.

„ამერიკულმა პროკურატურამ ამერიკის ყოფილ პრეზიდენტს, დონალდ ტრამპს წაუყენა კიდევ ერთი ბრალი ხმამაღალი სათაურით: „შეთქმულება შეერთებული შტატების მოტყუებისთვის“. საბრალდებო დოკუმენტში ნათქვამია, რომ „არჩევნების დღიდან ორ თვეზე მეტი ხნის განმავლობაში, ბრალდებული ავრცელებდა სიცრუეს, რომ არჩევნები გაყალბდა და რეალურად მან გაიმარჯვა. ეს პრეტენზიები მცდარი იყო, რაც ბრალდებულმა იცოდა, მაგრამ მაინც გამოთქვამდა, რათა უნდობლობისა და ბრაზის ინტენსიური ატმოსფერო შეექმნა და არჩევნების ადმინისტრირების მიმართ საზოგადოების რწმენა შეერყია“.

გამოდის, რომ ამერიკული სტანდარტით, საქართველოში დასაჭერი ყოფილა მთელი ოპოზიცია, ყველა ოპოზიციური ტელევიზიის ხელმძღვანელი და მდიდარი NGO-ების ყველა თავმჯდომარე. იგივეს ვერ შევკადრებთ ამერიკის ელჩს და ევროკავშირის მაშინდელ „ამერიკელ“ ელჩს, მიუხედავად იმისა, რომ მათ ქართველი ხალხის მოტყუება თავადაც სცადეს, ოპოზიციის ყალბი ბრალდებები არჩევნების გაყალბების შესახებ პოლიტიკურ კრიზისად მონათლეს და ამ ყველაფრის საფუძველზე, მმართველ პარტიას 19 აპრილის კაბალურ შეთანხმებაზე მოაწერინეს ხელი,“ – აღნიშნულია განცხადებაში.

ბუნებრივია, რომ კონსტიტუციით და კანონმდებლობით აკრძალულია პოლიტიკური პარტიების დაფინანსება პირდაპირ თუ არა პირდაპირ, აქედან გამომდინარე, შესაბამისი უწყება ამას თუ გამოიკვლევს, ძალიან კარგი იქნება, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.

მაჭარაშვილი გამოეხმაურა „რეგიონული განვითარების და ხელშეწყობის ცენტრის“ განცხადებას, რომელიც აუდიტის სამსახურს მიმართავს, დაიწყოს მოკვლევა პარტიების მიერ არასამთავრობო ორგანიზაციების შექმნის გზით უკანონო შემოწირულებების მიღებასთან დაკავშირებით.

მაჭარაშვილის თქმით, კანონმდებლობაში შევიდა ცვლილება და სექტემბრიდან ეს ფუნქციები გადავა ანტიკორუფციულ ბიუროზე.

„ის საკითხი, რომ პოლიტიკური პარტიების დიდ ნაწილს აქვს შექმნილი ე.წ ენჯეოები იმისთვის, რომ უცხოეთიდან დაფინანსდნენ, ეს აღიარებითი ჩვენებები თავად ამ პარტიების ლიდერებს აქვთ. „დროას , „გირჩი მეტი თავისუფლების“ ლიდერების განცხადებები, რომ დიახ, ისინი ფინანსდებიან სხვადასხვა სახით, მათ შორის უცხოეთიდან. ბუნებრივია, რომ კონსტიტუციით და კანონმდებლობით აკრძალულია პოლიტიკური პარტიების დაფინანსება პირდაპირ თუ არა პირდაპირ, აქედან გამომდინარე, შესაბამისი უწყება ამას თუ გამოიკვლევს, ძალიან კარგი იქნება იმისთვის, რომ არა მხოლოდ პოლიტიკოსების განცხადებები და მტკიცებულებები იქნება, არამედ უფრო მეტი დეტალი იქნება ცნობილი, რომელი პარტია საიდან, რომელი უცხოური ძალიდან ფინანსდება. ეს პირდაპირ აკრძალულია, რომ რომელიმე პოლიტიკური პარტია დაფინანსდეს უცხოური ძალისგან, რაც ხდება და ამ ხალხს აღიარებითი ჩვენები აქვს მიცემული“, – განაცხადა მაჭარაშვილმა.

ევროკავშირის წევრი ქვეყნები აკვირდებიან როგორ ასრულებს საქართველო რეფორმებს და შეუძლია თუ არა ქვეყანას გაერთიანება ამ რეფორმებზე სამუშაოდ. საქართველოს ჯერაც აქვს დრო ამის საჩვენებლად. 12-ვე რეკომენდაცია ასი პროცენტით რომც არ შესრულდეს, ვფიქრობ, წევრი ქვეყნები აკვირდებიან, რამდენად მოწადინებულია საქართველო შეასრულოს ეს ამოცანები, – ამის შესახებ აშშ-ის ელჩმა საქართველოში კელი დეგნანმა „რადიო თავისუფლებასთან“ ინტერვიუში განაცხადა.

მისივე თქმით, ბევრ სფეროში ჩანს კარგი პროგრესი, მაგრამ ეს პროცესია, ის უნდა გაგრძელდეს და თუკი შეჩერდება იმის გამო, რომ ადამიანებს ერთად მუშაობა და კომპრომისებზე წასვლა არ სურთ, სწორედ ეს იქნება პრობლემა.

„იყო შესაძლებლობა და კვლავაც არის შესაძლებლობა, რომ პოლიტიკურმა ლიდერებმა გამოიჩინონ გამბედაობა, გამონახონ ძალა – გვერდზე გადადონ განსხვავებები და რეალურად იმუშაონ 12 რეკომენდაციის შესრულებაზე. ევროკავშირმა საქართველოს მისცა მკაფიო გზამკვლევი კანდიდატის სტატუსისკენ. მათ ეს ძალიან მარტივად წარმოადგინეს – საჭიროა მხოლოდ მიჰყვეთ ამ ნაბიჯებს. ვიმედოვნებ, ამ რამდენიმე თვესა და კვირაში პოლიტიკური ლიდერები გვერდზე გაწევენ განსხვავებებს და მუყაითად იმუშავებენ ამ 12 რეკომენდაციის შესრულებაზე, რადგან ეს საქართველოს საუკეთესო ინტერესებშია. კომპრომისი ძნელია და სწორედ ამიტომ არის საჭირო გამბედაობა, დიდი გამბედაობა. კიდევ გავიმეორებ – თუკი შენი მიზანია ემსახურო საქართველოს საუკეთესო ინტერესებს, ეს საჭიროებს კომპრომისს ყველასგან. მნიშვნელობა არ აქვს ამას “19 აპრილის შეთანხმებას” დაარქმევ, ევროკავშირთან ასოცირების შეთანხმებას თუ 12 რეკომენდაციას. ეს ყველაფერი გულისხმობს ერთსა და იმავე რეფორმებს, რომლებზეც საქართველო მუშაობს წლების, ათწლეულების განმავლობაში და ბევრ სფეროში შთამბეჭდავ პროგრესსაც მიაღწია, იქნება ეს საარჩევნო რეფორმა, სასამართლო რეფორმა თუ სხვა. ბევრ სფეროში ჩანს კარგი პროგრესი, მაგრამ ეს პროცესია, ის უნდა გაგრძელდეს და თუკი ის შეჩერდება იმის გამო, რომ ადამიანებს ერთად მუშაობა არ სურთ, არ სურთ კომპრომისებზე წასვლა, სწორედ აქ ვხედავთ პრობლემას.

ევროკავშირის წევრი ქვეყნები აკვირდებიან აგრეთვე, როგორ ასრულებს საქართველო ამ რეფორმებს და შეუძლია თუ არა ქვეყანას გაერთიანება ამ რეფორმებზე სამუშაოდ. ვთვლი, რომ საქართველოს ჯერაც აქვს დრო ამის საჩვენებლად. 12-ვე რეკომენდაცია ასი პროცენტით რომც არ შესრულდეს, ვფიქრობ, წევრი ქვეყნები აკვირდებიან, რამდენად მოწადინებულია საქართველო შეასრულოს ეს ამოცანები, ვინაიდან, ცხადია, მუშაობა გაგრძელდება. კანდიდატის სტატუსი არის შემდეგი ქვაკუთხედი წევრობისკენ მიმავალ გზაზე. ევროკავშირის წევრებს დეკემბრამდე, სულ რაღაც თვეები აქვთ, რომ დაინახონ – არის თუ არა აქ მმართველობა ფოკუსირებული იმაზე, რის შესახებაც საქართველოს ხალხმა მკაფიოდ განაცხადა. ხალხს კი სურს ევროპული მომავალი“,- განაცხადა კელი დეგნანმა.

როგორც მან აღნიშნა, დასაკარგი დრო არ არის. საქმის მიხედვის დროა და იმის დრო, რომ ევროკავშირის წევრ ქვეყნებს დაანახო – საქართველო ნამდვილად ამ გზის ერთგულია.