გია კორკოტაშვილი ბიძინა ივანიშვილს მიმართავს.

” ბევრ რამეში ცდება ბიძინა თბილისი არ იცის… შენი ერთგული მაინც აირჩიე ხოლმე ვინმე, რამდენი პრეზიდენტიც აირჩიე იმდენმა სარი დაგიდო, ან შენ არ ვარგიხარ, ან ჩვენ რაღას გვერჩი ?!”- განაცხადა   გია კორკოტაშვილმა რადიო “ჯორჯიან თაიმსის” ეთერში გადაცემაში  “დროული დიალოგი ეკა სეხნიაშვილთან ერთად”

https://www.facebook.com/TVGeorgiantimes1/videos/338850528572034

სამწუხაროა, რომ საქართველოს წუნდებულობაზე ამ მეტად მანკიერ საუბარში ოპოზიციას აჰყვა პრეზიდენტიც. რაღაც ეტაპზე კი გაჩნდა იდეა, რომ საქართველოს წუნდებულობაზე საუბარი იქცეს საქართველოს პოზიციად და რომ ეს პრეზიდენტმა განახორციელოს საქართველოს სახელით, ეს კი ნამდვილად ვერ მოხდება, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ პარლამენტის პლენარულ სხდომაზე განაცხადა.

მისი თქმით, საქართველოს არაფერი დაეწუნება კანდიდატის სტატუსის მოსაპოვებლად.

„ჩვენი ქვეყნისთვის ევროპული მომავალი არის უმნიშვნელოვანესი და მთავარი პრიორიტეტი. ეს რომ საერთო, ეროვნული მიზანი იყო, სწორედ ამის გათვალისწინებით იყო, რომ გაჩნდა საქართველოს კონსტიტუციაში 78-ე მუხლი და ეს მოხდა სწორედ „ქართული ოცნების“ ხელისუფლების და კონკრეტულად ირაკლი კობახიძის დაუღალავი შრომით. ძალზედ დასანანია, რომ ჩვენი ქვეყნის ოპოზიციისთვის საერთო ეროვნულ პრიორიტეტთან შედარებით უფრო მეტი მნიშვნელობა შეიძინა ხელისუფლებასთან ქიშპობამ და დაპირისპირებამ. მათი სურვილი და ინტერესია, რომ დააზიანონ ხელისუფლება, თუნდაც ამას შეეწიროს ქვეყნის ეს მეტად მნიშვნელოვანი ინტერესი და ამის გამო დაიწყეს იმ აზრის გავრცელება და დანერგვა, თითქოს და საქართველო არ იმსახურებს კანდიდატის სტატუსს, არადა გადასარევად იციან, რომ საქართველო ამ სტატუსს იმსახურებდა შარშანაც, იმსახურებს ახლაც და არც ერთი სხვა ქვეყნის ფონზე, საქართველოს არაფერი არ დაეწუნება. იციან ისიც, რომ აბსოლუტურად არათავსებადია ქვეყნის პერსპექტივებთან იმის მტკიცება, რომ დაუმსახურებლად მოხდეს სტატუსის მონიჭება. რა არ მოიფიქრეს საქართველოს წუნდებულობაზე რიტორიკით გამოწვეული ამ უხერხულობის თავიდან ასარიდებლად – ხან ხალხი იმსახურებს და ქვეყანა არა, ხან ფული ხარჯეს სანქციების დაწესებისთვის, ხან ისიც თქვეს, რომ საქართველო კი არ იმსახურებს კანდიდატის სტატუსს, მაგრამ მაინც სწორი იქნება კანდიდატის სტატუსის მონიჭებაო. საბედნიეროდ, იმედია, რომ ამად დაშვრნენ. სამწუხაროა, რომ საქართველოს წუნდებულობაზე, ამ მეტად მანკიერ საუბარში ოპოზიციას აჰყვა პრეზიდენტიც. რაღაც ეტაპზე კი გაჩნდა იდეა, რომ საქართველოს წუნდებულობაზე საუბარი იქცეს საქართველოს პოზიციად და რომ ეს პრეზიდენტმა განახორციელოს საქართველოს სახელით – ეს კი ნამდვილად ვერ მოხდება. საქართველოს ხელისუფლება არ თვლის, რომ საქართველოს რაიმე წუნი აქვს და არ იმსახურებს კანდიდატის სტატუსს, ამიტომ პრინციპულია, რომ არავის მიეცეს უფლება, რომ საქართველოს საგარეო ურთიერთობებში წარმომადგენლობისას საქართველოს სახელით დააფიქსიროს პოზიცია ჩვენი ქვეყნის წუნდებულობაზე, საქართველოსთვის სტატუსის დაუმსახურებლობაზე.

მიუხედავად კონსტიტუციის ამ განაწესისა, რომ პრეზიდენტი მხოლოდ საქართველოს მთავრობის სახელით წარმოადგენს საქართველოს, საგარეო ურთიერთობებში – პრეზიდენტმა გადაწყვიტა, რომ მან მაინც დამოუკიდებლად და მთავრობის თანხმობის გარეშე უნდა წარმართოს წარმომადგენლობა. არ არსებობს იდეა, რომელიც გაამართლებდა კონსტიტუციაზე მაღლა დადგომა, ანუ არაფერი გაამართლებს კონსტიტუციური წესრიგის უგულებელყოფას და საქართველოს სახელით იმის მტკიცებას, თითქოს საქართველო კანდიდატის სტატუსს არ იმსახურებს. ჩვენი ქვეყნის მოსახლეობამ და ამ ქვეყნის ყველა გულშემატკივარმა კარგად იცის, რომ საქართველოს ნამდვილად არაფერი დაეწუნება კანდიდატობის მოსაპოვებლად“, – განაცხადა სარჯველაძემ.

„ნაციონალური მოძრაობა” თვეების განმავლობაში ახორციელებდა პრეზიდენტზე უხეშ ზეწოლას როგორც ქვეყნის შიგნით, ისე გარეთ თავის მოკავშირეების გამოყენებით, არავის გაუკვირდება, თუ ამას გააგრძელებენ მომავალშიც, – ამის შესახებ ჟურნალისტებთან პარლამენტის ვიცე- სპიკერმა არჩილ თალაკვაძემ განაცხადა, რითაც უპასუხა კითხვას, რამდენად ელოდება, რომ “ნაციონალურმა მოძრაობამ” შესაძლოა, იმპიჩმენტის საკითხით ივაჭროს პრეზიდენტთან მიხეილ სააკაშვილის გასათავისუფლებლად.

ამასთან, როგორც თალაკვაძემ აღნიშნა, იმპიჩმენტი არის დემოკრატიის ნაწილი, „მათ შორის, იმ ქვეყნებში, რომელიც ჩვენთვის სამაგალითოა დემოკრატიის თვალსაზრისით“.

„მაგალითად აშშ -ში იყო უახლოეს წარსულში გამოყენებული, ევროკავშირის არაერთ ქვეყანაში და რა თქმა უნდა ბუნებრივია, საქართველოც როგორც დემოკრატიული სახელმწიფო კონსტიტუციის დარღვევის შემთხვევაზე რეაგირებს ისე, როგორც თავმოყვარე სახელმწიფოს შეეფერება.

„ნაციონალური მოძრაობა” პოლიტიკური ვაჭრობის პარტიად გადაიქცა, ტრაგედიებით დაწყებული დამთავრებული პოლიტიკური მოვლენებით, ყოველთვის ვაჭრობაშია ჩართული და აქ გასაკვირი არაფერია. ისინი თვეების განმავლობაში ახორციელებდნენ პრეზიდენტზე უხეშ ზეწოლას როგორც ქვეყნის შიგნით ისე გარეთ, თავის მოკავშირეების გამოყენებით და არავის გაუკვირდება თუ ამას გააგრძელებენ მომავალშიც. ეს არის უთავმოყვარეო რადიკალური ოპოზიცია, რომელიც პრეზიდენტს უკანონოდ არჩეულად მოიხსენიებდა, უმძიმეს შეურაცხყოფას აყენებდა და ამბობდა, რომ არასდროს აღიარებდა, თუმცა, რამდენიმე თვეში ნახეთ, რომ ეხვეწებოდნენ შეწყალების გამოცემას და ახლა ევროპული კურსის საუკეთესო დამცველადაც მოიხსენიებენ. ასეთი არათანმიმდევრული პოლიტიკის გამო არის “ნაციონალური მოძრაობა” და რადიკალური ოპოზიცია პოლიტიკურ თავდაღმართში და თუ რა შედეგებს მიიღებენ ისინი, ყველა ერთად დავინახავთ,”- განაცხადა თალაკვაძემ.

ერთადერთ რამეს შეიძლება ემსახურებოდეს, ეს არის პრეზიდენტის აქტივობის შეზღუდვა ან მისი პოლიტიკური შევიწროება,- ასე ეხმიანება პრეზიდენტის საპარლამენტო მდივანი გიორგი მსხილაძე უმრავლესობის ლიდერების განცხადებებს, რომლებიც პრეზიდენტის კონსტიტუციის დარღვევაში ადანაშაულებენ და იმპიჩმენტის პროცესს იწყებენ.

მსხილაძე აცხადებს, რომ პრეზიდენტი მის ვალდებულებას ასრულებს.

„საქართველოს პრეზიდენტი ასრულებს თავის უმაღლეს ვალდებულებას, ეს არის ხალხის ნება, პრეზიდენტი ასრულებს იმ საარჩევნო დაპირებას, რომლის ქვაკუთხედიც იყო ქვეყნის ევროკავშირში და ნატო-ში ინტეგრაცია და კონსტიტუციურ ვალდებულებას, რომლითაც ყველა ზომა უნდა მიიღოს ევროკავშირში და ნატო-ში ინტეგრაციისთვის. ეს არის ტექნიკური საკითხი, რომელიც წამოიწყო უმრავლესობამ და „ქართულმა ოცნებამ“. ერთადერთ რამეს შეიძლება ემსახურებოდეს, ეს არის პრეზიდენტის აქტივობის შეზღუდვა ან მისი პოლიტიკური შევიწროება. ამაზე მეტს დღეს ვერაფერს გეტყვით. იმპიჩმენტის პროცედურა საკმაოდ დროში გაწელილია, ამიტომ მოვლენების განვითარებას დაველოდოთ“, – განაცხადა მსხილაძემ.

სალომე ზურაბიშვილს თუ მართლა სურს, საქართველო დაუახლოვდეს ევროკავშირი, გაათავისუფლოს უკანონო პატიმარი სააკაშვილი. მან ჯერ თავისი საქმე გააკეთოს და შემდეგ იაროს საზღვარგარეთ, – ამის შესახებ „ნაციონალური მოძრაობის“ წევრმა, გიორგი ბარამიძემ განაცხადა.

მისივე თქმით, იმპიჩმენტთან დაკავშირებით სალომე ზურაბიშვილთან „ნაციონალურ მოძრაობას“ არანაირი კონსულტაციები არ ექნება.

„ქალბატონი ზურაბიშვილი არის ივანიშვილის მაფიოზური და რუსული რეჟიმის ნაწილი – მათი „პრინციპული“ არჩევანი და ეს ყველამ კარგად ვიცით. მათ დასვეს ის ამ თანამდებობაზე არჩევნების გაყალბების გზით და ეს არის მათი შიდა ამბავი. ბუნებრივია, არც ერთი პატრიოტული, ოპოზიციური პარტია არ აპირებს ხელისუფლების შიდა ბინძურ თამაშებში ჩართვას, მით უმეტეს მათი ხუშტურებისა და სურვილების მიხედვით, რომ შური იძიონ ახლა სალომე ზურაბიშვილზე, რადგან გააქტიურდა ევროპულ ფრონტზე და ევროპული მიმართულებით ცდილობს, საქართველოს ადვოკატირება გააკეთოს. ეს არ აწყობს ხელისუფლებას, რადგან მანამდე ძალიან კმაყოფილი იყვნენ მისით. მაგალითად, იმ დროს, როდესაც ივანიშვილთან ერთად, საქართველოს ადანაშაულებდა ომის დაწყებაში, ამ მოღალატეობრივ განცხადებასთან დაკავშირებით ძალიან კმაყოფილი იყვნენ და ახლა ევროკავშირში რომ დადის საქართველოს ადვოკატირებისთვის, ეს არ მოსწონთ. „რუსული ოცნების“ წარმომადგენლებმა იციან, რომ ხმები არ ეყოფათ, რადგან ამ ბინძურ თამაშში არავინ აპირებს ჩართვას, არც „ნაციონალური მოძრაობა“ და არც სხვა ნამდვილი ოპოზიციური პარტიები. ჩვენ გვინდა, ქალბატონ ზურაბიშვილს კიდევ ერთხელ მოვუწოდოთ და ვურჩიოთ, რომ ევროპელ მეგობრებთან ერთად სიარული ზოგადად კარგია, მაგრამ პირველ ყოვლისა, მან უნდა გააკეთოს ის, რაც აქ არის გასაკეთებელი და რაც მას შეუძლია, არა მხოლოდ შეუძლია, არამედ ევალება საქართველოს კონსტიტუციით.

თუ მას მართლა აქვს სურვილი, საქართველო დაუახლოვდეს ევროკავშირს და ევროპულ სტანდარტებს, გაათავისუფლოს უკანონო პატიმარი, პუტინის მძევალი უკანონო პატიმრობიდან. ამით შეამციროს პოლარიზაცია, რომლის შემცირებაზეც არის ერთ-ერთი პუნქტი. მან ჯერ თავისი საქმე გააკეთოს და შემდეგ იაროს საზღვარგარეთ. წინააღმდეგ შემთხვევაში, ისინიც იფიქრებენ, რომ ის არ არის გულწრფელი. არანაირი მოლაპარაკებები იმპიჩმენტის წინ და იმპიჩმენტთან დაკავშირებით ქალბატონ ზურაბიშვილთან არ იქნება. გეუბნებით, რა არის მისი გასაკეთებელი და რა აქვს „ნაციონალურ მოძრაობას“ მიმართვა, მოთხოვნა ქალბატონი ზურაბიშვილისადმი, რომელიც დე ფაქტო პრეზიდენტია და მას შეუძლია, თავისი დე ფაქტო უფლებამოსილებები გამოიყენოს. ეს მისი მოვალეობაა კონსტიტუციით“, – განაცხადა გიორგი ბარამიძემ.

ჩვენ წინასწარ გვქონდა ინფორმაცია, რომ კეზერაშვილი და ხაზარაძე „მთავარ არხთან“ დაკავშირებით ერთმანეთში დალაგდნენ და ეს დაადასტურა გიორგი გაბუნიამ გამოსვლაში, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ პარლამენტში ჟურნალისტებს განუცხადა. ჟურნალისტებმა კობახიძეს კითხვა დაუსვეს „მთავარი არხის“ გენერალური დირექტორის, გიორგი გაბუნიას იმ განცხადებაზე, რომ ტელეკომპანია „ნაციონალური მოძრაობის“ ტელევიზია აღარ არის.

როგორც კობახიძემ აღნიშნა, „მთავარი არხი“ ახლა მოემსახურება კოლექტიურ „ნაცმოძრაობას“ და არა მხოლოდ პარტია „ნაცმოძრაობას“.

„ერთგვარი თამაშია. წინასწარ გვქონდა ჩვენ ინფორმაცია, რომ კეზერაშვილი და ხაზარაძე „მთავარ არხთან“ დაკავშირებით ერთმანეთში დალაგდნენ. ანუ „მთავარი არხი“ მოემსახურება ახლა კოლექტიურ „ნაცმოძრაობას“ და არა მხოლოდ პარტია „ნაცმოძრაობას“. ეს იქნება კეზერაშვილის ხაზიც და ხაზარაძის ხაზიც. ეს ინფორმაცია ჩვენ გვქონდა წინასწარ და ამის დადასტურება იყო საბოლოო ჯამში, გიორგი გაბუნიას გამოსვლა. ერთმანეთში დალაგდნენ. ნახავთ, ახლა როგორ გაგრძელდება სარედაქციო პოლიტიკა, დამატებით გამოიკვეთება „ლელოს“ ხაზი „მთავარი არხის“ სარედაქციო პოლიტიკაში. სხვათა შორის, ამაში ფინანსებიც არის ჩართული. ჩვენი ინფორმაციით, კეზერაშვილთან ერთად ხაზარაძეც დააფინანსებს არხს“, – განაცხადა ირაკლი კობახიძემ.

გაუგებარია, როგორ უნდა განხორციელდეს საქართველოში ე.წ. დეპოლარიზაცია, როდესაც ოპოზიციის რადიკალური ნაწილი ახერხებს და ბუნებრივ კატასტროფებზეც კი პოლიტიკური ქულების დაწერას ცდილობს, – ამის შესახებ „ქართული ოცნების“ თავმჯდომარე ირაკლი კობახიძემ პარლამენტის პლენარულ სხდომაზე განაცხადა.

მისი თქმით, ოპოზიციის ამგვარი დამოკიდებულებების პირობებში ე.წ. დეპოლარიზაციას განხორციელება არ უწერია.

„ევროკავშირის ერთ-ერთი რიგით პირველი მოთხოვნა არის დეპოლარიზაცია. ამ ფონზე ვნახეთ, რომ ჩვენი პოლიტიკური ოპონენტები ტრაგედიებსაც კი ქვეყანაში პოლარიზაციის გაღვივებისთვის იყენებენ. გაუგებარია, როგორ უნდა განხორციელდეს საქართველოში ე.წ. დეპოლარიზაცია, როდესაც ოპოზიციის რადიკალური ნაწილი ახერხებს და ბუნებრივ კატასტროფებზეც კი პოლიტიკური ქულების დაწერას ცდილობს. ოპოზიციის რადიკალური ნაწილი და მათი მედიასაშუალებები დღემდე თავს ესხმიან არამხოლოდ მმართველ გუნდს, არამედ ჩვენს გმირ მაშველებსაც კი. რა თქმა უნდა, ოპოზიციის ამგვარი დამოკიდებულებების პირობებშიც კი ე.წ. დეპოლარიზაციას განხორციელება არ უწერია“, – განაცხადა ირაკლი კობახიძემ.

ის ასევე გამოეხმაურა პრეზიდენტის იმპიჩმენტის საკითხს და აღნიშნა, რომ რადიკალური ოპოზიცია ცდილობს საქართველოს კონსტიტუციის უხეში დარღვევა ევროპულ მოვლენად წარმოაჩინოს.

„როგორც მოგეხსენებათ, ოპოზიციის რადიკალური ნაწილი ცდილობს ნებისმიერი მოვლენა სარკისებურად წარმოაჩინოს. ყველას გახსოვთ, როგორ ატყუებდნენ ისინი მოსახლეობას და ამერიკულ კანონს რუსულ კანონს უწოდებდნენ. ახლა ისინი ცდილობენ საქართველოს კონსტიტუციის უხეში დარღვევა ევროპულ მოვლენად წარმოაჩინონ. ქართული საზოგადოება არის ტრადიციული ევროპული ღირებულებების მატარებელი საზოგადოება და მერწმუნეთ კონსტიტუციის უხეშ დარღვევას ევროპულ მოვლენად ვერაფრით იყიდით. როდესაც „ნაციონალური მოძრაობა“ იყო ხელისუფლებაში, კონსტიტუციაზე ძალადობა მისი ერთ-ერთი უმთავრესი შტრიხი იყო. შესაბამისად, ლოგიკურია, რომ კოლექტიური „ნაცმოძრაობა“, „ლელო“, „გახარიები“, „ ჯაფარიძის გირჩი“ და სხვები დღეს, ოპოზიციის რიგებიდან ამ ხელწერით მოქმედებთ. ქართულმა საზოგადოებამ ეს ძალიან კარგად იცის და მერწმუნეთ, კონსტიტუციაზე მოძალადე პოლიტიკოსებს ხელისუფლებაში ხალხი აღარასდროს დაგაბრუნებთ“, – განაცხადა კობახიძემ.

იმპიჩმენტის საკითხი არ გვაინტერესებს და ამაში არანაირ მონაწილეობას არ მივიღებთ – ბიძინა ივანიშვილის “სამეფო კარის თამაშები” არ არის ჩვენთვის საინტერესო, – ამის შესახებ „ნაციონალური მოძრაობის” თავმჯდომარე ლევან ხაბეიშვილმა განაცხადა.

მისი თქმით, იმპიჩმენტის საკითხი ივანიშვილის თამაშია, ხოლო თუ ზურაბიშვილი ქვეყნის ევროპულ მომავალზე ფიქრობს, მიხეილ სააკაშვილი უნდა შეიწყალოს.

„სალომე ზურაბიშვილის იმპიჩმენტის საკითხი არის მოგონილი ივანიშვილის და რუსული პარტიის. ვფიქრობთ, ორივე მხარე რუსული თამაშის შემადგენელი ნაწილია. ეს საკითხი არ აინტერესებს მოსახლეობის უდიდეს უმრავლესობას, მათ აინტერესებთ შოვის ტრაგედიაზე პასუხი; რა ეშველებათ მევენახეებს, რომელთა მოსავალი დაისეტყვა; რა ეშველება თხილის ფასს; სოციალურ – ეკონომიკურ პრობლემებს და ამაზე პასუხის ნაცვლად, გვაჩეჩებენ თემას, რომელიც არ აინტერესებს დედამიწის ზურგზე არავის, გარდა ივანიშვილ-კობახიძე- ღარიბაშვილის ბანდ-ფორმირებისა. ეს საკითხი ჩვენ არ გვაინტერესებს, ეს არის ივანიშვილის რუსული თამაში, თითქოს ზურაბიშვილი როგორი კეთილი და კარგია. თუ ასეთია, ასე უყვარს ქვეყანა, ევროპულ მომავალზე ფიქრობს, მაშინ მის ხელთ არსებული ინსტრუმენტი უნდა გამოიყენოს და სააკაშვილი უნდა გაათავისუფლოს, ამას არ აკეთებს. ამიტომ ჩვენ ეს საკითხი არ გვაინტერესებს და ყველამ კარგად უნდა იცოდეს, ამაში არანაირ მონაწილეობას არ მივიღებთ.

ბიძინა ივანიშვილის თამაშში მონაწილეობას არ ვაპირებ და ცალსახად შემიძლია გითხრათ, ეს საკითხი არ აინტერესებს საქართველოს მოქალაქეებს. ბიძინა ივანიშვილის “სამეფო კარის თამაშები” არ არის ჩვენთვის საინტერესო თემა. პრეზიდენტ სააკაშვილის თავისუფლების თემას რაც შეეხება, ვალდებულიც კი არის პრეზიდენტი, რომელიც კონსტიტუციას და საქართველოს ევროპულ მომავალს უნდა იცავდეს და ამ ევროპული მომავლის შემაფერხებლად რომ არის ქცეული სააკაშვილის ტყვეობა, რომ უზრუნველყოს სააკაშვილის თავისუფლება. ის ამას არ აკეთებს და მონაწილეობას იღებს ივანიშვილის თამაშებში. ჩვენ არ გვაინტერესებს ივანიშვილის და კობახიძის დაგეგმილი თამაშები, რომელზეც შემდეგ მედია სივრცეში მიმდინარეობს საუბარი, ნაცვლად იმ თემებისა, რომელიც მოქალაქეებს აინტერესებთ“, – განაცხადა ხაბეიშვილმა.