საქართველო, როგორც დასავლეთის საყრდენი, ისე უნდა პოზიციონირებდეს რეგიონში მშვიდობისა და სტაბილურობის მისაღწევად, – ამის შესახებ ოპოზიციონერმა დეპუტატმა, თეონა აქუბარდიამ განაცხადა.

მისივე თქმით, ის, რომ საქართველოს უმნიშვნელოვანესი ფუნქცია ჰქონდა რეგიონში გრძელვადიანი მშვიდობის განვითარების თვალსაზრისით, ეს მოცემულობა მნიშვნელოვნად შეიცვალა, რამდენადაც შუამავლობის კარგად დაწყებული პროცესი ვერ გაგრძელდა ისე, როგორც სასურველი იყო.

„ამის მტკიცებულება მოლდოვაში სომხეთისა და აზერბაიჯანის ლიდერების შეხვედრა იყო. რა თქმა უნდა, საქართველო კიდევ უფრო აქტიური უნდა იყოს, ვიდრე ახლა არის. ეს უნდა გაკეთდეს, რათა ჩვენს რეგიონში იყოს მშვიდობა და სტაბილურობა. პრემიერ-მინისტრმა განაცხადა, რომ რეგიონში თავიანთ განვითარებას საქართველო, სომხეთი და აზერბაიჯანი თავად უნდა წყვეტდნენ, მაგრამ როცა ამას საქართველო ამბობს, რომელსაც ევროკავშირში გაწევრიანება უნდა, ეს არც თუ ისე სწორად აღსაქმელია, რადგან ერთადერთი ძალა, რომელიც რეგიონის განვითარებას მკვეთრად უპირისპირდება, რუსეთია თავისი საოკუპაციო პოლიტიკით და მცდელობით. ამიტომ საქართველო, როგორც დასავლეთის საყრდენი, ისე უნდა პოზიციონირებდეს რეგიონში მშვიდობისა და სტაბილურობის მისაღწევად“, – განაცხადა თეონა აქუბარდიამ.

საქართველოს პრემიერ-მინისტრმა, ირაკლი ღარიბაშვილმა აზერბაიჯანის პრეზიდენტთან, ილჰამ ალიევთან ერთობლივ ბრიფინგზე განაცხადა: „სამხრეთ კავკასიის სამივე ქვეყანამ უნდა შევძლოთ, თავადვე გადავწყვიტოთ რეგიონის საკითხები, ჩვენი შემდგომი განვითარება, ჩვენი მომავალი უნდა იყოს მშვიდობიანი, სტაბილური“.

აზერბაიჯანის პრეზიდენტმა, ილჰამ ალიევმა ირაკლი ღარიბაშვილს მადლობა გადაუხადა: „მადლობა ირაკლი ღარიბაშვილს, რომ გვთავაზობს ფასილიტატორის როლს, თუ სომხეთის თანხმობა იქნება, მყისიერად დავიწყებთ შეხვედრებს აქ, საქართველოში“.

„ქართული ოცნება“ ძალიან წვალობს, დიდი სურვილი აქვთ პრეზიდენტის იმპიჩმენტის. რეგლამენტში ცვლილებებმა დაგვანახა, რომ მათ პრობლემა აქვთ გუნდის შიგნითაც, – ამის შესახებ “ნაციონალური მოძრაობის” დეპუტატმა დავით კირკიტაძემ ჟურნალისტებთან განაცხადა.

როგორც მან აღნიშნა, პრეზიდენტის იმპიჩმენტზე მათი პოზიცია იგივე რჩება და პროცესში მონაწილეობას არ აპირებენ. რაც შეეხება ცვლილებებს, კირკიტაძის განცხადებით, საჯაროობას ემხრობიან, თუმცა, იქვე დეპუტატი დასძენს, რომ წინააღმდეგი არიან იმ პრაქტიკის, რომ “ქართულმა ოცნებამ” კანონები მათი პოლიტიკური ინტერესების გათვალისწინებით შეცვალოს.

“თქვენ გახსოვთ ის 4 ღირსეული ადამიანი, რომელთაც თავის დროზე მხარი არ დაუჭირეს რუსულ კანონს, მათგან დავით სერგეენკოს გარდა, არც ერთი აღარ არის პარლამენტის წევრი, ისინი იძულებული გახადეს დაეტოვებინათ პარლამენტი ან სამუშაო ადგილი შეეცვალათ. ახლა რეგლამენტში ცვლილებებს აპირებენ იმისთვის, რომ ვინმეს კიდევ არ ჰქონდეს ცდუნება, რომ იმპიჩმენტის მავნებლურ პროცესს მხარი არ დაუჭიროს. ჩვენ მომხრე ვართ, ყველა კენჭისყრა ღია იყოს, არც ერთ ეტაპზე არაფერი დასამალი არ გვქონია. ღიაობის და საჯაროობის მომხრე ვართ, თუმცა, წინააღმდეგი ვართ იმ მანკიერი პრაქტიკის, როცა “ქართული ოცნება” საკუთარი ინტერესებით ჭრის და კერავს კანონებს და არ ადარდებთ მოქალაქეთა ბედი, მხოლოდ ძალაუფლების შენარჩუნებაზე ზრუნავენ და ყველა იმ ადამიანის დასჯაზე, რომელიც ქვეყნის მხარეს არის და არ ემსახურება ივანიშვილს,”- განაცხადა კირკიტაძემ.

ინფორმაციისთვის, პარლამენტის მიერ თანამდებობის პირების თანამდებობაზე არჩევისა და თანამდებობიდან გათავისუფლების თაობაზე გადაწყვეტილების ფარული კენჭისყრით მიღების წესი იცვლება – ასეთ გადაწყვეტილებებს პარლამენტი ფარულის ნაცვლად, ღია კენჭისყრით მიიღებს.

რეგლამენტში ცვლილებების პროექტით, ღია კენჭისყრის წესი მათ შორის თანამდებობის პირის იმპიჩმენტის წესით გადაყენების საკითხზე კენჭისყრის შემთხვევებზე გავრცელდება.

კენჭისყრისას ფარულობის წესი მხოლოდ პარლამენტის თავმჯდომარის არჩევის შემთხვევაში შენარჩუნდება, რადგან კონსტიტუციის თანახმად, მისი არჩევა ფარული კენჭისყრით უნდა მოხდეს.

რეგლამენტში ცვლილებებს დავარქვათ კობახიძის მორიგი ოხუნჯობა – ევროპა ჩვენგან ელოდება სასამართლო, საარჩევნო, ანტიკორუფციულ რეფორმებს, კობახიძემ მოიფიქრა რეფორმები, რომ ორი ვიცე-სპიკერი დაამატოს, – ამის შესახებ ჟურნალისტებთან “სტრატეგია აღმაშენებლის” დეპუტატმა პაატა მანჯგალაძემ განაცხადა.

რაც შეეხება თანამდებობის პირის არჩევისა და თანამდებობიდან გათავისუფლებასთან დაკავშირებული კენჭისყრის ღიაობის საკითხს, რომელიც ასევე პრეზიდენტის იმპიჩმენტსაც ეხება, მანჯგალაძე აღნიშნავს, რომ მისთვის გამჭვირვალობა პრობლემა არ არის, თუმცა, ეს ცვლილებები მოწყვლადი დეპუტატების კონტროლის გაძლიერებას ემსახურება.

“არჩევნებზე ადამიანებს ავალებენ, გადაუღონ მათ გაკეთებულ არჩევანს სურათი და გამოიტანონ, პარლამენტის წევრებს ამას ხომ არ ეტყოდნენ? ამ ქმედების ცივილიზებული ვერსიაა ეს ცვლილებები, ტელეფონით გამოტანის ნაცვლად, პირდაპირ იქნება ადამიანების სახელები და გვარები და მათი გადაწყვეტილება ცნობილი. ცვლილებები სჭირდებათ იმისთვის, რომ ვინც შანტაჟს, მოსყიდვას ექვემდებარება, ის ადამიანები გააკონტროლონ. არანაირ მეტ დემოკრატიას და თავისუფლების ხარისხს არ ემსახურება.

ამას დავარქვათ კობახიძის მორიგი ოხუნჯობა, ხუმრობა, რადგან მაშინ, როცა ევროპა ჩვენგან ელოდება სასამართლო, საარჩევნო, ანტიკორუფციულ რეფორმებს, კობახიძემ მოიფიქრა რეფორმები, რომ ორი ვიცე-სპიკერი დაამატოს (პარლამენტში), ხმის მიცემა გამჭვირვალე გახადა და ეს ყოფილა თურმე საქართველოს ამოცანა. მე პირადად გამჭვირვალობაში არანაირ პრობლემას არ ვხედავ, ისედაც ვამბობდი, რას ვუჭერდი მხარს და რას არა, მაგრამ არიან მოწყვლადი დეპუტატები შანტაჟის და მოსყიდვის მიმართ, ამ ხალხის თავისუფლება იზღუდება, თორემ პაატა მანჯგალაძე გამჭვირვალე იქნება, ნახევრად გამჭვირვალე თუ სიფრიფანა, ამით არაფერი იცვლება ჩემთვის. მთელი მსოფლიო ელოდება რეფორმებს და “ქართულმა ოცნებამ” წინა კვირას გვითხრა, სერგო ჩიხლაძე რომ ეწერებოდა ხოლმე ხანდახან ჟურნალისტებს, ესაა პრობლემაო, მეორე პრობლემა თურმე ის ყოფილა, რომ ორი დამატებით ვიცე- სპიკერი არ გვყავს და ის, რომ პროცესები უნდა იყოს გამჭვირვალე, რათა კობახიძეს რამე არ გამორჩეს შემთხვევით პარლამენტში,”- განაცხადა მანჯგალაძემ.

ის ასევე გამოეხმაურა პარტია “საქართველოსთვის” წევრის, ანა ბუჩუკურის განცხადებას, რომ “ქართულ ოცნებას” და “ნაციონალურ მოძრაობას” ბევრი აქვს სავაჭრო, საერთო ბიზნესინტერესებიც აქვთ და იმპიჩმენტთან დაკავშირებით ფარული მოლაპარაკებები მიმდინარეობს. მანჯგალაძის თქმით, ეს განცხადებები ამ პარტიისთვის ამომრჩეველთა ნიშის შექმნას ემსახურება.

“მეტი რა უნდა თქვას ბუჩუკურმა, როგორ გამოკვეთოს თავის ნიშა? წამოსულია “ქოცებიდან”, “ქოცი” არ ენდობა. მოდის ოპოზიციაში და ისინიც არ ენდობიან და რაღაც ხომ უნდა თქვას?!”- აღნიშნა მანჯგალაძემ.

პარლამენტის ბიუროს სხდომის დახურვა შესაძლებელი იქნება. შესაბამისი ცვლილებები რეგლამენტში შედის, რომელიც პარლამენტის ბიუროს დღევანდელ სხდომაზე წარედგინება.

პროექტში აღნიშნულია, რომ, როგორც წესი, პარლამენტის ბიუროს სხდომა საჯაროა, თუმცა ბიუროს სხდომა შეიძლება დაიხუროს, თუ ამას მოითხოვს ბიუროს წევრი და მის მოთხოვნას მხარს დაუჭერს სხდომაზე დამსწრე ბიუროს წევრთა უმრავლესობა.

ცვლილებებით კონკრეტდება, რომ პარლამენტის ბიუროს სხდომის დახურვის საკითხი განიხილება დახურული წესით და დახურულ სხდომაზე დამსწრე პირთა წრეს სხდომის თავმჯდომარე დაადგენს.

პარლამენტის წევრს, რომელსაც პლენარულ სხდომას ან კომიტეტის სხდომას დაატოვებინებენ, ხელფასიდან ხუთი პროცენტი დაუკავდება. შესაბამისი ცვლილებები რეგლამენტში შედის, რომელიც ბიუროს სხდომას დღეს წარედგინება.

დღეს მოქმედი რეგლამენტით, დეპუტატს ხელფასიდან გარკვეული პროცენტი მხოლოდ სხდომების გაცდენისთვის უკავდება. ეს ეხება როგორც პლენარულ სხდომას, ასევე კომიტეტის სხდომას.

პროექტით კი განისაზღვრება, რომ პარლამენტის წევრს, რომლის მიმართაც შესაბამის დღეს სხდომის მიმდინარეობის პერიოდით კომიტეტის სხდომის დარბაზის ან სხდომათა დარბაზის დატოვების მოთხოვნა იქნება გამოყენებული, დაუკავდება შესაბამისი თვის ხელფასის 5%.