ისრაელის პრემიერ-მინისტრმა ბენიამინ ნეთანიაჰუმ ქვეყნის სამხრეთ რეგიონის წარმომადგენელ პოლიტიკოსებს შეხვედრაზე განუცხადა, რომ ომი “ახლო აღმოსავლეთის რეგიონს გარდაქმნის“. ინფორმაციას ისრაელის პრემიერ-მინისტრის ოფისი ავრცელებს.

„ვიცი, რომ თქვენ მძიმე და საშინელი რამ გადაიტანეთ. ის, რასაც „ჰამასი” გამოცდის, იქნება მკაცრი და საშინელი – ჩვენ უკვე იმ ბრძოლის შუა ეტაპზე ვართ, რომელიც ახლა დავიწყეთ“, – განაცხადა ნეთანიაჰუმ და დასძინა: “ჩვენ ვაპირებთ გარდავქმნათ ახლო აღმოსავლეთი”.

ნეთანიაჰუმ პოლიტიკოსები სიმტკიცისთვის შეაქო და აღნიშნა, რომ მომავალ ბრძოლას დრო დასჭირდება.

ისრაელის თავდაცვის ძალები ლიბანში სამხედრო ოპერაციას ახორციელებს. ინფორმაციას BBC-ი ავრცელებს.

ისრაელის თავდაცვის ძალების განცხადებით, ლიბანში სტრატეგიულ სამიზნეებზე ვერტმფრენების გამოყენებით შეტევები მიმდინარეობს.

სოციალურ ქსელებში ლიბანში ჰეზბოლას სადამკვირველო პოსტის დაბომბვის კადრები ვრცელდება.

ისრაელის თავდაცვის ძალების მიერ გავრცელრბული ინფორმაციით, დღეს მათ სულ მცირე ორი შეიარაღებული პირი მოკლეს, რომლებიც ლიბანიდან ისრაელში შესვლას ცდილობდნენ.

იერუსალიმში და ქალაქის სიახლოვეს სარაკეტო თავდასხმის მანიშნებელი სირენის ხმა იმის. ამის შესახებ ინფორმაცია „ბიბისი“ ავრცელებს. ადგილობრივი მცხოვრებლები იუწყებიან, რომ აფეთქებების ხმა ესმით.

მანამდე ცნობილი გახდა, რომ „ჰამასმა“ იერუსალიმის მიმართულებით რაკეტები გაუშვა.

როგორც „ჰამასის“ წევრები აცხადებენ, ეს არის პასუხი ისრაელის არმიის მიერ პალესტინელების საცხოვრებელ სახლებზე განხორციელებულ იერიშებზე.

ევროპულმა კომისიამ პალესტინისთვის 691 მილიონი ევროს ოდენობის დახმარების შეჩერების გადაწყვეტილება მიიღო.

„ისრაელისა და მისი ხალხის წინააღმდეგ ტერორიზმისა და სისასტიკის მასშტაბები გარდამტეხი მომენტია“, – წერს ევროპული სამეზობლო პოლიტიკისა და გაფართოების საკითხებში ევროკომისარი ოლივერ ვარჰეი „ტვიტერის“ გვერდზე.

მიღებული გადაწყვეტილება ნიშნავს, რომ პალესტინის დახმარებისთვის მომავალი გადახდები დაუყოვნებლივ შეჩერებულია, ხოლო ახალი ბიუჯეტის შესახებ განხილვები გაურკვეველი ვადით გადაიდო.

ცნობისთვის, ევროკავშირი პალესტინის ერთ-ერთი მთავარი ფინანსური მხარდამჭერია და 2021-2024 წლებში 1.18 მილიარდი ევროს ოდენობის დახმარების პროგრამა იყო გათვალისწინებული.

რუსეთის საგარეო საქმეთა მინისტრის, სერგეი ლავროვის თქმით, “პალესტინის სახელმწიფოს” შექმნა ისრაელში მშვიდობის დამყარების ყველაზე სანდო გზაა.

ლავროვმა ამის შესახებ არაბული ქვეყნების ლიგის გენერალურ მდივან, აჰმედ აბულ გეითთან გამართულ პრესკონფერენციაზე ისაუბრა.

“პალესტინის სახელმწიფოს შექმნა, რომელიც ისრაელის გვერდით იქნება, არის კონფლიქტის მოგვარების ყველაზე სანდო გზა. ჩვენ ვერ დავეთანხმებით მათ, ვინც ამბობს, რომ უსაფრთხოების დამყარება მხოლოდ ტერორიზმთან ბრძოლით არის შესაძლებელი”. – ამბობს ლავროვი.

ღაზის სექტორიდან ჰამასის ისრაელზე მოულოდნელი თავდასხმა 7 ოქტომბერს, ადგილობრივი დროით დილის 7 საათზე დაიწყო, როცა ისრაელის მიმართულებით ტერორისტებმა ასობით რაკეტა ისროლეს, პარალელურად კი სამხრეთით მდებარე ქალაქებში შეიჭრნენ.

თავდასხმა ერთდროულად ხმელეთიდან, ზღვიდან და ჰაერიდან განხორციელდა. ისრაელისთვის ეს სრულიად მოულოდნელი აღმოჩნდა.

თავდასხმის თარიღამდე ერთი დღით ადრე შესრულდა იომ კიპურის ომის (ეგვიპტისა და სირიის ისრაელზე თავდასხმის) 50 წლისთავი – ექსპერტების ნაწილი მიიჩნევს, რომ ეს შემთხვევითობა არ არის.

ჰამასის ტერორისტებმა დახოცეს ისრაელის ასობით მოქალაქე, მათ შორის, ქალები, ბავშვები და მოხუცები.

ტყვედ აიყვანეს ისრაელის ჯარისკაცები და სამოქალაქო პირები. ტერორისტები ტყვეებს, მათ შორის, ბავშვებს არაადამიანურად ეპყრობიან. მათი ნაწილი ღაზის სექტორში ბრბოს თვალწინ, აღლუმით ჩამოატარეს და ვიდეოები გაავრცელეს.

საპასუხოდ ისრაელმა ჰამასის წინააღმდეგ ანტიტერორისტული ოპერაცია “რკინის ხმლების” დაწყება გამოაცხადა და ტერიტორიების გათავისუფლებასთან ერთად ღაზის სექტორზე სარაკეტო იერიშების მიტანა დაიწყო.

8 ოქტომბერს ისრაელმა საომარი მდგომარეობა ოფიციალურად გამოაცხადა. პრემიერმინისტრი ნეთანიაჰუ ამბობს, რომ ჰამასი “ძლევამოსილი შურისგებისთვის” უნდა მოემზადოს. ღაზის სექტორში მცხოვრებლებს ისრაელი ტერიტორიის დატოვებისკენ მოუწოდებს.

აზერბაიჯანის პრეზიდენტის, ილჰამ ალიევის თქმით, სომხეთთან ნებისმიერ ახალ კონფლიქტზე პასუხისმგებლობა საფრანგეთს დაეკისრება. ეს განცხადება ილჰამ ალიევმა მას შემდეგ გააკეთა, რაც პარიზი ერევანს სამხედრო აღჭურვილობის გადაცემას დაჰპირდა.

„საფრანგეთის მიერ სომხეთისთვის შეიარაღების გადაცემა არის მიდგომა, რომელიც არა მშვიდობას, არამედ ახალ დაპირისპირებას ემსახურება, და თუ რეგიონში რაიმე ახალი დაპირისპირება მოხდება, მაშინ დამნაშავე ამაში იქნება საფრანგეთი“, – ნათქვამია განცხადებაში, რომელიც აზერბაიჯანის პრეზიდენტს, ილჰამ ალიევსა და ევროკავშირის საბჭოს პრეზიდენტს, შარლ მიშელს შორის გამართული მოლაპარაკებების შემდეგ გამოქვეყნდა.

ამავე განცხადებაში ნათქვამია, რომ ილჰამ ალიევი გრანადაში საფრანგეთის პოზიციის გამო არ ჩავიდა.

საფრანგეთის საგარეო საქმეთა სამინისტროში აზერბაიჯანის პრეზიდენტის განცხადებაზე კომენტარი არ გაუკეთებიათ.

ჩინეთისა და აშშ-ს ურთიერთობები კაცობრიობის მომავალზე ახდენს გავლენას, – ამის შესახებ ჩინეთის პრეზიდენტმა სი ძინპინმა დღეს პეკინში ამერიკელი სენატორების დელეგაციასთან შეხვედრისას განაცხადა.

„ის თუ როგორი ურთიერთობები ექნებათ ჩინეთსა და ამერიკის შეერთებულ შტატებს ცვლილებებისა და არეულობის პირობებში, კაცობრიობის მომავალსა და ბედს განსაზღვრავს.

მე ბევრჯერ მითქვამს, მათ შორის აშშ-ის რამდენიმე პრეზიდენტისთვის, რომ ჩვენ ათასი მიზეზი გვაქვს ჩინეთ-აშშ-ს ურთიერთობების გასაუმჯობესებლად, მაგრამ არცერთი მათ დასაზიანებლად“, – განუცხადა სი ძინპინმა აშშ-ის სენატის უმრავლესობის ლიდერ ჩაკ შუმერს შეხვედრისას და დაამატა, რომ ჩინეთ-აშშ-ს ურთიერთობა არის „ყველაზე მნიშვნელოვანი ორმხრივი ურთიერთობა სამყაროში“.

ჩაკ შუმერმა ჩინეთის პრეზიდენტს შეხვედრისთვის მადლობა გადაუხადა და აღნიშნა, რომ „აშშ და ჩინეთი ერთად ქმნიან მიმდინარე საუკუნეს“.