7 ოქტომბერს, ადგილობრივი დროით 06:30 საათზე, ისრაელზე სარაკეტო დარტყმა დარტყმა განხორციელდა. მომხდარზე პასუხისმგებლობა “ჰამასმა” აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა “ომისთვის მზადყოფნის მდგომარეობა” გამოაცხადა და ღაზას სექტორში “ჰამასის” ობიექტებზე იერიში დაიწყო.
გაერომ უკვე გამოაქვეყნა შედეგები, რომლებიც სამ დღეში მოჰყვა ისრაელისა და “ჰამასის” შეიარაღებულ დაპირისპირებას. გაეროს ჰუმანიტარულ საკითხთა კოორდინაციის სამმართველოს მონაცემებით, ორივე მხრიდან დაღუპულთა რიცხვი 1600-ს აჭარბებს. ღაზის სექტორში საკუთარი სახლები დატოვა 187 500-ზე მეტმა ადამიანმა.
გაეროს მიერ 9 ოქტომბერს, ღამით გამოქვეყნებულ ანგარიშში, ისრაელის მედიის მონაცემებზე დაყრდნობით წერია, რომ ისრაელში მოკლულია 900-ზე მეტი ადამიანი – როგორც ამ ქვეყნის მოქალაქეები, ისე უცხოელები. დაიჭრა სულ მცირე 2 616 ადამიანი. ისრაელის წყაროთა თანახმად, “ჰამასმა” დაატყვევა და ღაზაში იძულებით წაიყვანა 50-ზე მეტი სამხედრო და სამოქალაქო პირი, მათ შორის ბავშვები და ქალები. პალესტინელთა შეიარაღებული ჯგუფები აცხადებენ, რომ ტყვედ ჰყავთ 150-ზე მეტი ადამიანი.
ღაზის სექტორის ჯანდაცვის სამინისტროს მონაცემებით, ღაზაში მოკლულია სულ მცირე 687 და დაჭრილია 3 800 ადამიანი. კიდევ 17 პალესტინელი დაიღუპა და 296 დაიჭრა მდინარე იორდანეს დასავლეთ სანაპიროზე.
“ღაზას სექტორი, რომლის დაბომბვაც ისრაელის რეჟიმმა დაიწყო, მსოფლიოში ადამიანების ყველაზე დიდი ციხე ღია ცის ქვეშ. 16 წლის განმავლობაში ამ ტერიტორიაზე 2 მილიონზე მეტი პალესტინელი მძევლად იქცა”-ნათქვამია ირანის საელჩო მედიის დეპარტამენტის მიერ “ჯორჯიან თაიმსისთვის” გამოგზავნილ განცხადებაში, რომელსაც უცვლელად გთავაზობთ:
“ოკუპირებულ პალესტინაში ამჟამინდელი ვითარება პალესტინელი ხალხის თვითგამორკვევის, ლეგიტიმური უფლების ხანგრძლივი უარყოფის, პალესტინელებისა და მათი ტერიტორიის წინააღმდეგ ისრაელის მუდმივი აგრესიის, პალესტინაში მუსლიმებისა და ქრისტიანების წმინდა ადგილების, მათ შორის ალ-აქსას მეჩეთის მუდმივი შეურაცხყოფისა და სიონისტური რეჟიმის სახელმწიფო ტერორიზმის მიმართ საერთაშორისო საზოგადოების გულგრილობის შედეგია.
ბოლო 18 თვის განმავლობაში ისრაელმა გააძლიერა სამხედრო თავდასხმები ოკუპირებულ დასავლეთ სანაპიროს ჩრდილოეთ ნაწილში, სადაც მხოლოდ ივლისში პალესტინელ ლტოლვილთა ბანაკზე თავდასხმას 12 პალესტინელი ემსხვერპლა, ხოლო 100-მდე დაიჭრა.
56 წლის მანძილზე ისრაელის არმია ყველა საერთაშორისო კანონმდებლობის დარღვევით იკავებდა დასავლეთ სანაპიროს, სადაც დაახლოებით 3 მილიონი პალესტინელი ცხოვრობს.
ღაზას სექტორი, რომლის დაბომბვაც ისრაელის რეჟიმმა დაიწყო, მსოფლიოში ადამიანების ყველაზე დიდი ციხე ღია ცის ქვეშ. 16 წლის განმავლობაში ამ ტერიტორიაზე 2 მილიონზე მეტი პალესტინელი მძევლად იქცა.
ის, რაც ისრაელელებმა, განიცადეს ბოლო რამდენიმე დღეა, პალესტინელები, მრავალი წლის განმავლობაში ყოველდღიურად განიცდიან. გაეროს მონაცემებით, მხოლოდ ბოლო 2 წლის განმავლობაში, სიონისტური ძალების თავდასხმების შედეგად 350-ზე მეტი პალესტინელი დაიღუპა, მათ შორის 50-ზე მეტი ბავშვი. წლებია, სიონისტი სამხედროები, ყველაზე ამაზრზენი ფორმით კლავენ, აპატიმრებენ და აწამებენ პალესტინელ ქალებსა და ბავშვებს, რაზეც მსოფლიო არ რეაგირებს.
ირანი და ზოგიერთი სხვა ქვეყანა, წლების განმავლობაში აფრთხილებდნენ, რომ ამგვარი ვითარების გაგრძელება შეუძლებელია. შეუძლებელია უგულებელვყოთ მილიონობით ადამიანის თავისუფლებისა და სიცოცხლის უფლება, უარყოთ ყველა მშვიდობიანი გზა პალესტინელების უფლებების განსახორციელებლად.
სწორედ ამ გაფრთხილებების იგნორირებამ გამოიწვია პალესტინელთა ბოლოდროინდელი რეაქცია საკუთარი უფლებების დასაცავად.
პალესტინის წინააღმდეგობის მოძრაობის ბოლო გადაწყვეტილებები და ქმედებები ეფუძნება თვითგამორკვევის ძირითად პრინციპს და არის სრულიად ლეგიტიმური პასუხი – შვიდი ათწლეულის მჩაგვრელ ოკუპაციასა და ისრაელის რეჟიმის უთვალავ დანაშაულზე. პალესტინელებს, რომლებიც ესწრაფვიან საკუთარ უფლებათა აღდგენას, ირანი სოლიდარობას უცხადებს და მხარს უჭერს წინააღმდეგობის მოძრაობისა და ჩაგრული პალესტინელების ძალისხმევას, აქტიურად განახორციელონ თავიანთი თანდაყოლილი და განუყოფელი უფლებები ოკუპაციისა და აგრესიის წინააღმდეგ. თუმცა, ხაზგასასმელია ის მნიშვნელოვანი ფაქტი, რომ ირანი პალესტინელთა ქმედებებში არ ერევა.
პალესტინელები, თავად წყვეტენ, რა პასუხი გასცენ ოკუპაციასა და სიონისტთა დანაშაულებს.
ირანის ისლამური რესპუბლიკის მხარდაჭერა პალესტინის მიმართ სრულიად შეესაბამება გაერთიანებულ ერთა ორგანიზაციის ძირითად დებულებებს, მათ შორის ერთა თვითგამორკვევის პრინციპს. ეს იქნება ირანის ძირითადი პოზიცია პალესტინის ოკუპაციის დასრულებამდე.
ვურჩევთ დასავლეთის ქვეყნებს, არ გაიმეორონ წარსულის შეცდომები და ღაზას სექტორში ჰუმანიტარული კატასტროფის თავიდან ასაცილებლად ქმედითი ნაბიჯები გადადგან. ისრაელის რეჟიმი, გასული რამდენიმე დღის მანძილზე ბომბავს დასახლებულ რეგიონებს და ხოცავს სამოქალაქო პირებს. ბოლო დღეებში დაბომბვას ემსხვერპლა 700-ზე მეტი პალესტინელი, მათ შორის 140 ბავშვი. ისრაელმა ღაზას სექტორს წყალმომარაგება შეუწყვიტა და საწვავისა და საკვების მიწოდებასაც ხელს უშლის.
გაეროს გენერალურმა მდივანმა ასევე ღაზას სექტორის სრული ალყის გამო შეშფოთება გამოთქვა. ისრაელის არმიის მიერ საცხოვრებელი კორპუსების დაბომბვა და მსგავსი ალყის შემორტყმა, რომელიც მოსახლეობის შიმშილით ამოწყვეტას გულისხმობს და მათი სიკვდილით დასრულდება, გაერთიანებული ერების ორგანიზაციის დებულებათა მიხედვით, სამხედრო დანაშაულია. ამის მიუხედავად, დასავლეთი ისრაელის მიერ ჩადენილ სამხედრო დანაშაულებზე თვალს ხუჭავს, ხოლო დასავლური მედია, პალესტინის კრიზისის საფუძვლისა და მიზეზთა გაშუქების ნაცვლად, კვლავაც აგრძელებს სინამდვილის დამახინჯებას”- ნათქვამია ირანის ისლამური რესპუბლიკის საელჩოს მედიის დეპარტამენტის განცხადებაში.
