პენტაგონის ხელმძღვანელმა ლოიდ ოსტინმა განაცხადა, რომ კრემლის ლიდერის ვლადიმერ პუტინის უგუნურმა და უკანონო შეჭრამ უკრაინაში ევროპაში ომი გააჩაღა, სწორედ ამიტომ დღეს, მსოფლიოს უფრო მეტად სჭირდება ნატო, ვიდრე ოდესმე. აღნიშნულის შესახებ ოსტინის განცხადებაშია ნათქვამი, რომელიც ნატოს დაარსებიდან 75 წლის იუბილესთან დაკავშირებით პენტაგონის ვებგვერდზე გამოქვეყნდა.

„21-ე საუკუნეში ნატო რჩება ჩვენი საერთო უსაფრთხოების საყრდენად და ამ დიდი თავდაცვის ალიანსისადმი ერთგულება რჩება ამერიკის შეერთებული შტატების წმინდა მოვალეობად“, – ნათქვამია ოსტინის განცხადებაში.
მისი თქმით, დღეს 32-წევრიანი ალიანსი უფრო დიდი, ძლიერი და ერთიანია, ვიდრე ოდესმე.

„პუტინის უგუნურმა ქმედებამ და უკანონო შეჭრამ უკრაინაში დააბრუნა ომი ევროპაში. დღეს მსოფლიოს უფრო მეტად სჭირდება ნატო, ვიდრე ოდესმე“, – განაცხადა ოსტინმა.
მისი თქმით, შეერთებული შტატები და მისი მოკავშირეები ადასტურებენ თავიანთ ვალდებულებას, განიხილონ თავდასხმა ერთ მოკავშირეზე, როგორც თავდასხმა ყველაზე.

„ჩვენი ვალდებულება მეხუთე მუხლის მიმართ ურყევი რჩება“, – დასძინა ლოიდ ოსტინმა.

აშშ-ის სახელმწიფო მდივანმა, ენტონი ბლინკენმა განაცხადა, რომ უკრაინა საბოლოოდ შეუერთდება ნატოს, რადგან ნატოს წევრი ქვეყნების მხრიდან უკრაინის მხარდაჭერა კვლავ მყარია.

„უკრაინა გახდება ნატოს წევრი. [ვაშინგტონის] სამიტზე ჩვენი მიზანია დავეხმაროთ უკრაინას ამ წევრობისკენ ხიდის აშენებაში“, – აღნიშნა აშშ-ის სახელმწიფო მდივანმა.

“უცხოური აგენტების კანონის” ხელახლა შემოტანით “ქართული ოცნება” ღალატობს ყველას ნდობას, ვინც დაუღალავად მუშაობდა, რათა საქართველოს კანდიდატის სტატუსი მიღებაში დახმარებოდა.

ამის შესახებ ევროპარლამენტარი სვენ მიქსერი სოციალურ ქსელში წერს.

„უცხოური აგენტების კანონის ხელახლა შემოტანით პარტია “ქართული ოცნება” შლის უფრო ღრმა ევროპული ინტეგრაციისადმი ქართველების მისწრაფებებს და ღალატობს ყველას ნდობას, ვინც დაუღალავად მუშაობდა, რათა საქართველოს კანდიდატის სტატუსი მიღებაში დახმარებოდა”, – წერს მიქსერი სოციალურ ქსელ X-ზე.

ცნობისთვის, “უცხოური გავლენის გამჭვირვალობის შესახებ“ კანონის პროექტი პარლამენტში 3 აპრილს ხელახლა დააინიცირეს.

ვეწინააღმდეგები საქართველოს მთავრობის ნებისმიერ მცდელობას, ხელახლა წარადგინოს კანონპროექტი უცხოეთის აგენტების ან გავლენის შესახებ, რადგან ეს წინააღმდეგობაშია საქართველოში დემოკრატიული ინსტიტუტების განმტკიცების ძალისხმევასთან, – ამის შესახებ ნატო-ს გენერალურმა მდივანმა, იენს სტოლტენბერგმა განაცხადა.

სტოლტენბერგის თქმით, საქართველომ უნდა იმუშაოს რეფორმებზე, რათა დაუახლოვდეს ნატო-ს და ევროკავშირს.

„ევროკავშირსაც ძალიან მკაფიო პოზიცია აქვს ამასთან დაკავშირებით. რამდენიმე კვირის წინ ვსტუმრობდი თბილისს და ჩემი მთავარი გზავნილი შეეხებოდა რეფორმების მნიშვნელობას, დემოკრატიული ინსტიტუტების განმტკიცებას. ასევე მკაფიოდ ვთქვი, რომ ქართველ ხალხს სურს დემოკრატიული, აყვავებული მომავალი ევროპულ და ევროატლანტიკურ ოჯახში. ნებისმიერი კანონი, რომელიც წარადგენს უცხოეთის აგენტის იდეას, ვშიშობ, იმოქმედებს ძალიან ბევრ მედიასაშუალებაზე, რომლებიც ოპერირებენ საერთაშორისო ასპარეზზე და საქართველოშიც, და ძირის გამოუთხრის საქართველოს ძლიერ, დემოკრატიულ საზოგადოებად გადაქცევის იდეას“, – განაცხადა იენს სტოლტენბერგმა.

„უცხოური გავლენის გამჭვირვალობის შესახებ“ საკანონმდებლო ინიციატივა პარლამენტში უკვე დაინიცირდა. ცვლილებები მომავალი კვირის ორშაბათს ბიუროს სხდომას წარედგინება, რის შემდეგაც მასზე მსჯელობა დაიწყება. „ქართულ ოცნებაში“ განმარტეს, რომ კანონპროექტი პარლამენტში დაინიცირდა ზუსტად იმავე ტექსტით, როგორც შარშან იყო დაინიცირებული, ერთადერთი განსხვავებით – კანონპროექტში ტერმინი „უცხოური აგენტი“ შეიცვალა და წარდგენილია შემდეგი ვარიანტი: „უცხოური ძალის ინტერესების გამტარებელი ორგანიზაცია“.

საფრანგეთის პრეზიდენტის, ემანუელ მაკრონის განცხადებით, ეჭვი არ ეპარება, რომ პარიზის ოლიმპიადას რუსეთი სამიზნეში ამოიღებს. აღნიშნულის შესახებ მაკრონმა პარიზში ახალი ოლიმპიური საწყლოსნო ცენტრის გახსნის ღონისძიებაზე ისაუბრა.

„არანაირი ეჭვი არ მეპარება, მათ შორის ინფორმაციის კუთხით“, – განაცხადა ემანუელ მაკრონმა რუსულ საფრთხეებთან დაკავშირებული კითხვის საპასუხოდ.

ემანუელ მაკრონმა გასულ თვეებში უფრო მკაცრი პოზიცია დაიკავა რუსეთის წინააღმდეგ. ის აცხადებს, რომ მოსკოვი უნდა დამარცხდეს. საფრანგეთის პრეზიდენტი არ გამორიცხავს, რომ ერთ დღეს ევროპული ჯარები უკრაინაში წავიდნენ. საფრანგეთის მთავრობამ ასევე მიიღო უფრო მკაცრი ზომები ევროპაში სავარაუდო რუსული დეზინფორმაციის მცდელობების წინააღმდეგ.

ტაივანში სამაშველო სამუშაოები გრძელდება. მაშველებმა კუნძულის ერთ-ერთი კურორტიდან 400-მდე ადამიანის გამოყვანა შეძლეს, რომლებიც ტერიტორიის დატოვებას დამოუკიდებლად ვერ ახერხებდნენ.

ამასთან, სამაშველო ვერტმფრენმა 6 მაღაროელი გადაარჩინა, რომლებიც კლდეების ჩამონგრევის შემდეგ ნანგრევებში მოყვნენ.

ბოლო მონაცემებით, ძლიერი მიწისძვრის შედეგად დაღუპულთა რიცხვმა 10-ს მიაღწია, სხვადასხვა დაზიანება კი 1 100-მდე ადამიანმა მიიღო. ტაივანის აღმოსავლეთ სანაპიროზე 7,4 მაგნიტუდის სიმძლავრის მიწისძვრა 3 აპრილს მოხდა. ტაივანის ოფიციალური უწყების ცნობით, ეს არის ყველაზე ძლიერი მიწისძვრა, რაც კუნძულზე ბოლო 25 წლის განმავლობაში დაფიქსირდა.