ნაკლებად მჯერა იმის, რომ მიხეილ სააკაშვილი გავუშვათ და პოლარიზაცია დასრულდება, – ამის შესახებ ოპოზიციონერმა დეპუტატმა, იაგო ხვიჩიამ განაცხადა.

როგორც იაგო ხვიჩიამ აღნიშნა, სალომე ზურაბიშვილს მიხეილ სააკაშვილის შეწყალების კომპეტენცია აქვს.

„არ მგონია, რომ შეწყალებაზე პუტინთან საუბარი ჭრიდეს. მგონია, რომ სხვა გზა არის მოსაფიქრებელი. ან პუტინის პატიმარს არ უნდა ვეძახდეთ და სხვა ვინმეს პატიმარს უნდა ვეძახდეთ, რომ სწორედ მას ვთხოვდეთ მის შეწყალებას. მიხეილ სააკაშვილის საზღვარგარეთ გადაყვანას ვითხოვდით, რადგან საერთაშორისო მიმართულებით შარში არ გავხვეულიყავით, მაგრამ ეს ამბავი არ გამოვიდა და ამას მხარს არც „ნაცმოძრაობა“ უჭერდა. მგონია, რომ მისი გათავისუფლებისთვის სხვა გზები უნდა ვიპოვოთ. ნაკლებად მჯერა იმის, რომ მიხეილ სააკაშვილი გავუშვათ და პოლარიზაცია დასრულდება. რაც შეეხება სალომე ზურაბიშვილს, მას აქვს კომპეტენცია მიხეილ სააკაშვილის შეწყალების. მგონია, რომ მიხეილ სააკაშვილის დროს არ უფრთხილდებიან და ზურაბიშვილის თემას გამოაგდებენ, რომ სულ გათავისუფლების მოლიდინში იყოს“, – განაცხადა იაგო ხვიჩიამ.

კონკრეტული დამნაშავე იხდის სასჯელს და არავის აქვს უფლება, უპატივცემულოდ მოექცეს საქართველოს სასამართლოს, საქართველოს სახელმწიფოს და ამ ქვეყნის მოსახლეობის უმრავლესობის შეხედულებას, – ამის შესახებ ადამიანის უფლებათა დაცვის კომიტეტის თავმჯდომარე მიხეილ სარჯველაძემ განაცხადა.

სარჯველაძემ კომენტარი გააკეთა ევროპარლამენტარ ანა ფოტიგას განცხადებაზე, რომ ევროპარლამენტის რეზოლუციაში მისი მოთხოვნით შევიდა შესწორება, რომელიც მოუწოდებს სალომე ზურაბიშვილს, შეიწყალოს მიხეილ სააკაშვილი.

მიხეილ სარჯველაძის შეფასებით, მსგავსი ინიციატივები პროვოკაციულია.

„მიმაჩნია, რომ ასეთი ინიციატივები ანგაჟირებული ევროპარლამენტარების მხრიდან, ანგაჟირებულზე მეტად საქართველოში კონკრეტული პოლიტიკური პარტიის მიმართ მიკერძოებული ევროპარლამენტარებისგან პროვოკაციულია. არ ვიცი, ვინმე თუ აცნობიერებს იმ გარემოებას, რა რეპუტაცია აქვს მიხელ სააკაშვილს საქართველოში, რა შეიძლება მოჰყვეს, მათ შორის საქართველოში ევროპის მიმართ განწყობების თვალსაზრისით ასეთი ტიპის გადაწყვეტილებებს და მოსაზრებებს. ალბათ ცოტა მეტი პასუხისმგებლობით უნდა უდგებოდნენ ასეთ ინიციატივებს, რადგან შეიძლება, ძალიან სერიოზულად დააზიანოს პროევროპული განწყობები საქართველოში. არ ვიცი, ამას თუ აცნობიერებს ვინმე, ვინც ასეთი ტიპის ინიციატივებს აყენებს, ვინც მსჯელობს საქართველოს ფარგლებს გარეთ მაგალითად, იმ ფოტოებით, რომლებიც იყო სრული სპეკულაცია და ფარსი. გამომზეურდა, რომ არც დემენციას ჰქონდა ადგილი, არც მოწამვლას და ა.შ. ყველასთვის გასაგებია, რომ უბრალოდ კონკრეტული დამნაშავე იხდის სასჯელს და არცერთ შემთხვევაში არავის აქვს უფლება, უპატივცემულოდ მოექცეს საქართველოს სასამართლოს, საქართველოს სახელმწიფოს და ქართველი საზოგადოების, ამ ქვეყნის მოსახლეობის უმრავლესობის შეხედულებას. ამიტომ არ აქვს უფლება არც ფოტიგას და არც არავის სხვას, ვინც ავანტიურისტულად უყურებს ქართული საზოგადოების პოზიციებს, მის შეხედულებებსა და პრინციპულ პოზიციას“, – განაცხადა მიხეილ სარჯველაძემ.

საქართველოს პარლამენტის თავმჯდომარე შალვა პაპუაშვილი სოციალურ ქსელში პოსტს აქვეყნებს, სადაც აღნიშნავს, რომ საქართველომ კიდევ უფრო განიმტკიცა ლიდერის პოზიცია ევროპაში.

როგორც პაპუაშვილი წერს, ფონდ „ჰერითიჯის“ 2024 წლის ეკონომიკური თავისუფლების რეიტინგში საქართველომ კვლავ გაიუმჯობესა შედეგები და „მთავრობის კეთილსინდისიერების“ მაჩვენებლით 38-ე ადგილი დაიკავა.

„ამ რეიტინგით საქართველო პირველად ევროპის საუკეთესო ოცეულშია და უსწრებს ევროკავშირის წევრ 11, ნატო-ს წევრ 13 და ევროკავშირის კანდიდატ ყველა ქვეყანას.

შედარებისთვის, 2012 წელს საქართველო 69-ე ადგილზე იყო და ე.წ. რეპრესიული მმართველობის ზონას მიეკუთვნებოდა.

აღნიშნული რეიტინგი ითვალისწინებს ისეთ ფაქტორებს, როგორებიცაა: ქრთამის, გამოძალვის, ნეპოტიზმის, მფარველობის და გაფლანგვის სიმცირე“, – წერს შალვა პაპუაშვილი.

ჰერითიჯის“ 2024 წლის ეკონომიკური თავისუფლების რეიტინგში მთავრობის კეთილსინდისიერებით საქართველო ევროპის საუკეთესო ოცეულშია და უსწრებს ევროკავშირის წევრ 11, ნატოს წევრ 13 და ევროკავშირის კანდიდატ ყველა ქვეყანას -შალვა პაპუაშვილი

ევროპარლამენტარი ანა ფოტიგა აცხადებს, რომ ევროპარლამენტის რეზოლუციაში მისი მოთხოვნით ორი შესწორება შევიდა. ფოტიგა სოციალურ ქსელში წერს, რომ ერთი ცვლილება ეხება საქართველოს ყოფილი პრეზიდენტის, მიხეილ სააკაშვილის გათავისუფლებას, ხოლო მეორე საქართველოს ოკუპირებულ ტერიტორიებს.

დოკუმენტში, რომელსაც ანა ფოტიგა ავრცელებს, აღნიშნულია, რომ ამ შესწორების მიხედვით, „ევროპარლამენტი კიდევ ერთხელ მოუწოდებს, ჰუმანიტარული ნიშნით გათავისუფლდეს საქართველოს ყოფილი პრეზიდენტი მიხეილ სააკაშვილი და მიმართავს პრეზიდენტ სალომე ზურაბიშვილს, გამოიყენოს მიხეილ სააკაშვილის შეწყალების კონსტიტუციური უფლება. ეს კი, ხელს შეუწყობს ქვეყანაში პოლიტიკური პოლარიზაციის შემცირებას“.

ანა ფოტიგას შესწორების თანახმად, დოკუმენტში ასევე „მკაცრად გმობენ რუსეთის გეგმებს, ოკუპირებულ აფხაზეთში, კონკრეტულად კი ოჩამჩირეში მუდმივი საზღვაო ბაზის აშენებას და მოუწოდებენ საერთაშორისო საზოგადოებას, მხარი დაუჭიროს ყველა ძალისხმევას საქართველოს სუვერენიტეტისა და ტერიტორიული მთლიანობის უხეში დარღვევის დასასჯელად“.

„მიხეილ სააკაშვილი პუტინის პირადი მტერი და პატიმარია. ჩვენ არ უნდა მივცეთ მას საშუალება, რომ ციხეში მოკვდეს.

აფხაზეთი და სამხრეთ ოსეთი რუსეთის მიერაა ოკუპირებული და ისინი საქართველოს უნდა დაუბრუნდეს.

დღეს ევროპარლამენტმა საქართველოს მხარდასაჭერად მიიღო ჩემ მიერ შეტანილი ორი ცვლილება“,- წერს ანა ფოტიგა „ტვიტერში“.

ევროპარლამენტში ორი რეზოლუცია მიიღეს, რომლებშიც საქართველოს მხარდამჭერი განცხადებებიც შევიდა.

ევროპარლამენტში ორ რეზოლუციას უყარეს კენჭი, სადაც საქართველოს მიმართ მხარდამჭერი განცხადებებია გაკეთებული.

ანგარიშები 2023 წლის საერთო საგარეო უსაფრთხოების პოლიტიკისა და თავდაცვის განხორციელების შესახებ მომზადებულია ევროპარლამენტარების, დევიდ მაკალისტერისა და სვენ მიქსერის მიერ.

დოკუმენტებში გამოთქმულია მხარდაჭერა საქართველოს ევროინტეგრაციის მიმართ და მკაცრად არის დაგმობილი რუსეთის მიმდინარე ოკუპაცია საქართველოს აფხაზეთისა და ცხინვალის რეგიონებში. დევიდ მაკალისტერის რეზოლუციას 338 ხმით 86-ის წინააღმდეგ დაუჭირეს მხარი, სვენ მიქსერის რეზოლუციას კი 350 დეპუტატი 91-ის წინააღმდეგ მიემხრო.

ანგარიშში აღნიშნულია, რომ საქართველომ რუსული სამხედრო აგრესია ჯერ კიდევ 2008 წლის აგვისტოში განიცადა; დოკუმენტი მკაცრად გმობს რუსეთის მიერ საქართველოს რეგიონების, აფხაზეთისა და ცხინვალის რეგიონის/სამხრეთ ოსეთის მიმდინარე უკანონო ოკუპაციას, კიდევ ერთხელ ადასტურებს საქართველოსა სუვერენიტეტისა და ტერიტორიული მთლიანობის მხარდაჭერას და ხაზს უსვამს, რომ რუსეთის მავნე მცდელობები ევროპაში სუვერენული სახელმწიფოების საზღვრების იძულებით შეცვლის თაობაზე სერიოზულ საფრთხეს უქმნის ევროკავშირის უსაფრთხოებას; მოუწოდებს ევროკავშირს და წევრ ქვეყნებს, გააძლიერონ უსაფრთხოების თანამშრომლობა უკრაინასთან, საქართველოსა და მოლდოვის რესპუბლიკასთან, განსაკუთრებით ჰიბრიდული საფრთხეების, დეზინფორმაციისა და კიბერუსაფრთხოების წინააღმდეგ საბრძოლველად.

დოკუმენტი დადებითად აფასებს ევროპული საბჭოს მიმართ ევროკომისიის მიერ გაცემულ რეკომენდაციას, მიანიჭოს საქართველოს კანდიდატის სტატუსი „იმ დათქმით, რომ შემდგომი ზომები იქნება მიღებული დეზინფორმაციასთან ბრძოლის, საერთო საგარეო და უსაფრთხოების პოლიტიკასთან შესაბამისობის, საპარლამენტო ზედამხვედველობის განხორციელების გაუმჯობესებისა და პოლიტიკური პოლარიზაციის, დეოლიგარქიზაციისა და კორუფციის აღმოფხვრის კუთხით. ხაზს უსვამს ქართველი ხალხის ლეგიტიმურ ევროპულ მისწრაფებებსა და, შესაბამისად, აღნიშნავს ევროკავშირის მხარდაჭერის მნიშვნელობას ქვეყნისთვის, აქცენტით სამოქალაქო საზოგადოების აქტორებზე, რომლებიც საქართველოს ევროკავშირში ინტეგრაციაზე მუშაობენ. მიუთითებს, მასტაბილიზებელ პოტენციურ როლზე, რომელიც საქართველოს სამხრეთ კავკასიაში შეუძლია, შეასრულოს“.

დოკუმენტი მოუწოდებს ევროკავშირის ინსტიტუტებს და წევრ სახელმწიფოებს, გადადგან გადამწყვეტი ნაბიჯები, რათა უზრუნველყონ, რომ რუსეთმა შეასრულოს თავისი ვალდებულებები, რომელიც ევროკავშირის შუამავლობით 2008 წლის 12 აგვისტოს ცეცხლის შეწყვეტის შესახებ შეთანხმებით აიღო. კერძოდ, გაიყვანოს თავისი სამხედრო და უსაფრთხოების ძალები საქართველოს ოკუპირებული ტერიტორიებიდან, დაუშვას ადგილზე საერთაშორისო უსაფრთხოების მექანიზმების განთავსება და ევროკავშირის სადამკვირვებლო მისიას რუსეთის მიერ ოკუპირებულ საქართველოს რეგიონებში – აფხაზეთსა და ცხინვალის რეგიონში/სამხრეთ ოსეთში შეუფერხებელი წვდომა მიანიჭოს; ასევე მოუწოდებს ევროკავშირის ინსტიტუტებსა და წევრ ქვეყნებს, კიდევ უფრო გააძლიერონ ევროკავშირის სადამკვირვებლო მისიის შესაძლებლობები და გააფართოონ მისი მანდატი; ასევე მოუწოდებს ევროკავშირის ინსტიტუტებს და წევრ ქვეყნებს, გამოიყენონ ტერმინი „ოკუპაცია“, როგორც ეს დადგენილია ადამიანის უფლებათა ევროპული სასამართლოს შესაბამისი დადგენილებებითა და სისხლის სამართლის საერთაშორისო სასამართლოს გამოძიებით, საქართველოს რეგიონების, აფხაზეთისა და ცხინვალის რეგიონის/სამხრეთ ოსეთის მიმართ, რომლებიც უკანონოდ არის ოკუპირებული და რუსეთის ეფექტურ კონტროლქვეშაა.

ასევე, დოკუმენტი მკაცრად გმობს საქართველოს რეგიონების ოკუპაციასა და მავრთულხლართებისა და სხვა ხელოვნური ბარიერების მოწყობას საოკუპაციო ხაზის გასწვრივ, საქართველოს მოქალაქეების ხშირ უკანონო დაკავებას და გატაცებას და ადამიანის უფლებათა სხვა დარღვევებს ადგილზე;

ანგარიში კიდევ ერთხელ მოუწოდებს ევროკავშირს, განაგრძოს ჩართულობა რუსეთ-საქართველოს კონფლიქტის მშვიდობიანი მოგვარებისთვის, ყველა არსებული ინსტრუმენტის ეფექტურად გამოყენებით, მათ შორის სამხრეთ კავკასიასა და საქართველოში კრიზისის საკითხებში სპეციალური წარმომადგენლის, ჟენევის საერთაშორისო მოლაპარაკებების, ინციდენტების პრევენციისა და მათზე რეაგირების მექანიზმების, ევროკავშირის სადამკვირვებლო მისიისა და მისი არაღიარებისა და ჩართულობის პოლიტიკის გამოყენებით; მიესალმება ევროკავშირის დახმარებას საქართველოს მიმართ ევროპის მშვიდობის ფონდის ფარგლებში და მოუწოდებს ევროკავშირს, შემდგომშიც ჩაერთოს საქართველოსთან უსაფრთხოების სფეროში თანამშრომლობაში, პრიორიტეტულ სფეროებში, რომლებიც განსაზღვრულია სტრატეგიულ კომპასში, კერძოდ, გააძლიეროს საქართველოს უსაფრთხოების სექტორის მდგრადობა კრიზისების მართვის სფეროში, ჰიბრიდული საფრთხეების აღმოფხვრასა და თავდაცვითი შესაძლებლობების გაძლიერებაში.

დოკუმენტი მიესალმება ევროპული საბჭოს 2023 წლის 4 მაისის გადაწყვეტილებას, ევრაზიის თანამშრომლობის ფონდის ფარგლებში საქართველოს თავდაცვის ძალების მხარდასაჭერად 30 მილიონი ევროს გამოყოფის შესახებ; ხაზს უსვამს ამ პარტნიორი ქვეყნების მხარდაჭერის შემდგომი გაზრდის აუცილებლობას მათი საჭიროებების შესაბამისად.