აქციის ორგანიზატორების მხრიდან ამ დღეებში ვნახეთ სრული ისტერია. გახსოვთ, როდესაც ჩხრეკა ტარდებოდა უჩა აბაშიძის ბინაში და დააკავეს, როგორ უცებ მოხდა ადამიანების ორგანიზება და მცდელობა, ხელი შეეშალათ პოლიციისთვის მუშაობაში, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა.

პაპუაშვილის თქმით, „ადამიანი, რომელიც წარმოჩენილი იყო არასამთავრობო სექტორის ლიდერად, ამ აქციების ერთ-ერთ სულისჩამდგმელად, აღმოჩნდა, საბოლოო ჯამში, ვინც არის“.

„„ნაციონალური მოძრაობა“ ისევ საკუთარი სახით წარმომდგარია ასეთი ადამიანების სახით. აღმოჩნდა, რომ „ნაციონალური მოძრაობა“ ისევ იმავე მეთოდებით, რაც მას ჰქონდა 2012 წლამდე, ფარულად იწერს ინტიმურ სცენებს და ამით აშანტაჟებს ადამიანებს. შინაგან საქმეთა სამინისტროში განაცხადეს, რომ არის ასეულობით ჩანაწერი, სადაც მათ შორის არიან ცნობადი სახეები. ეს არის ზუსტად სკანდალი ამ ყველაფერში, ვინაიდან შანტაჟი ზუსტად ამას გულისხმობს, რომ შემდეგ ისინი დაიყოლიონ სხვადასხვა ქმედებაზე. რა თქმა უნდა, ეს ახდენს ბევრი ადამიანის დისკრედიტირებას, ეჭვისა და კითხვის ნიშნის ქვეშ აყენებს ზოგიერთი აქტიური ადამიანის მოტივაციას, რამდენად არის ეს დაკავშირებული შანტაჟთან, თუ ეს არის მათი გულწრფელი პოზიცია.

არის ეჭვები, საერთოდ რა დგას ამის უკან. ეს სპეცსამსახურების სტილში განხორციელებული აქტივობა, როდესაც სხვა ადამიანის ინტიმური ცხოვრების კადრებს იწერ და ქმნი შემდეგ შანტაჟის რაღაც ქსელს, რაში იყენებენ ამას საზოგადოებისთვის ცნობად სახეებზე, ეს უკვე სხვა საკითხია.

ხედავთ, რომ „ნაციონალური მოძრაობა“ თავისი მეთოდებით თურმე არსად წასულა და როგორც „ნაციონალურ მოძრაობას“ აკეთებინებდნენ ვიღაცები იმ ჩანაწერებს, რომ შემდეგ საზოგადოება ემართათ ცნობადი სახეებისა და მათზე შანტაჟის მეშვეობით, თურმე ზუსტად იგივე მეთოდები მიდის ახლა, რათა საზოგადოების განწყობები მართონ ცნობადი სახეების მეშვეობით“, – განაცხადა პაპუაშვილმა.

მისივე განცხადებით, „სწორედ ასეთი ამაზრზენი დანაშაულები გვაგონებს „ნაციონალური მოძრაობის“ მმართველობის პერიოდს“.

„ეს ადამიანი, რომელიც არასამთავრობო სექტორის ლიდერად იყო წარმოჩენილი, ამ აქციების ერთ-ერთ სულისჩამდგმელად და ორგანიზატორად, აღმოჩნდა, ვინც არის, საბოლოო ჯამში. სწორედ ასეთი ამაზრზენი დანაშაულები გვაგონებს ჩვენ „ნაციონალური მოძრაობის“ მმართველობის პერიოდს და ვხედავთ, რომ ახლა უკვე ამ სექტორს ამოფარებული იგივე მოქმედებებს აგრძელებენ.

ამიტომ მნიშვნელოვანია, შინაგან საქმეთა სამინისტრომ დეტალურად შეისწავლოს ყველა ეს ჩანაწერი, რა თქმა უნდა, დაზარალებულებს დაუკავშირდებიან, თუმცა თავისთავად უკვე სკანდალია.  გამოდის, რომ იქმნებოდა გარკვეული მექანიზმი ადამიანების შანტაჟისა, რათა შემდეგ ზეგავლენა მოეხდინათ, სავარაუდოდ, საზოგადოებრივ აზრზე“, – განაცხადა შალვა პაპუაშვილმა.

კონგრესმენების წერილში პირდაპირ წერია, რომ საქართველო იზოლირდება დასავლეთისგან, ხაზი გასმულია ძალადობაზე სამოქალაქო აქტივისტების მიმართ, პირდაპირ წერია ლევან ხაბეიშვილის სასტიკ ანგარიშსწორებაზე, საქართველო ახლა არის გზის გასაყარზე და ჩვენ, „ნაციონალურ მოძრაობას“ გვინდა მკაფიოდ განვაცხადოთ, რომ ყველაფერი, რაც დაკავშირებულია საქართველოს ბელარუსიზაციასთან დაუყოვნებლივ უნდა შეწყდეს, – ამის შესახებ „ერთიანი ნაციონალური მოძრაობის“ საგარეო მიმართულების მდივანმა, ზურაბ ჭიაბერაშვილმა განაცხადა, რითაც აშშ-ის კონგრესის 29 წევრის წერილს გამოეხმაურა.

ჭიაბერაშვილის განცხადებით, რასაც „ქართული ოცნება“ აკეთებს შეუთავსებელია საქართველოს კონსტიტუციასთან, დემოკრატიასთან და საერთაშორისო ვალდებულებებთან.

„გვსურს გამოვეხმაუროთ შეერთებული შტატების კონგრესის 29 წევრის წერილს. ასევე პრეზიდენტ ბაიდენის მრჩეველს უსაფრთხოების საკითხებში ჯერ სალივანის განცხადებებს. კონგრესმენებიც და ბატონი სალივანიც ძალიან მკაფიოდ მიუთითებენ, რომ საქართველოში გვაქვს სერიოზული უკან დახევა დემოკრატიის თვალსაზრისით და ის, რასაც „ქართული ოცნება“, ივანიშვილის რეჟიმი აკეთებს შეუთავსებელია საქართველოს კონსტიტუციასთან, დემოკრატიასთან, საერთაშორისო ვალდებულებებთან, ასევე 2009 წლის შეერთებული შტატების და საქართველოს სტრატეგიული პარტნიორობის შესახებ შეთანხმებასთან.

წერილში მითითებულია ივანიშვილის 29 აპრილის განცხადება, რომელიც შეერთებული შტატების მიერ აღქმულია როგორც სრულიად ახალი ეტაპი საქართველოს სამწუხარო განვითარებაში და მასში ცხადად არის საქართველოს იზოლაცია დასავლეთისაგან და ქვეყანაში ავტორიტარული რეჟიმის დამყარება. ასევე, ხაზი გასმულია ძალადობაზე, რომელსაც მიმართავს ივანიშვილის რეჟიმი და წერილში პირდაპირ საუბარია ძალადობაზე სამოქალაქო აქტივისტების მიმართ და მასში პირდაპირ ნახსენებია ლევან ხაბეიშვილის სასტიკი ანგარიშსწორების შემთხვევა. ნათქვამია, რომ ოპოზიციური პარტიის ლიდერისადმი და პარლამენტის წევრისადმი ასეთი მოპყრობა სრულიად გაუგონარია. და მესამე, ეს არის ღიად ანტიდასავლური რიტორიკა და ქმედება, არა მხოლოდ ივანიშვილის განაცხადში, არამედ მას შემდეგ, რასაც მიმართავს ივანიშვილის რეჟიმი და პრემიერი კობახიძე, ამიტომ კარგად უნდა გვესმოდეს რა იქნება ამის ფასი.

რა თქმა უნდა, ქართულ საზოგადოებას და ჩვენ ნაკლებად გვაღელვებს ის სანქციები, მათ შორის ფინანსური სანქციები, რომელიც ქვეყნის ამ მდგომარეობაში ჩაგდებაზე პასუხისმგებელ პირებს დაუწესდებათ. პირდაპირ არის ნათქვამი, რომ ივანიშვილის რეჟიმის ამ ქმედებებს პირდაპირ მიჰყავს საქართველო ბელარუსიზაციის გზით. ასევე, წერილში ნახსენებია ბელორუსიის დემოკრატიული აქტი, რომელიც კონგრესმა თავის დროზე მიიღო, და რომელიც სამწუხროდ, აისახება არა მხოლოდ რეჟიმზე, არამედ ხალხზე. საუბარია იმაზე, რომ ქართველმა ხალხმა შეიძლება მიიღოს უზარმაზარი ზიანი, რაც შეიძლება იყოს სავიზო შეზღუდვები ქართველი ხალხისთვის და უზარმაზარი ფინანსური დახმარების შეწყვეტა. ამიტომ საქართველო ახლა არის გზის გასაყარზე და „ნაციონალურ მოძრაობას“ გვინდა მკაფიოდ განვაცხადოთ, რომ ყველაფერი, რაც დაკავშირებულია საქართველოს ბელარუსიზაციასთან დაუყოვნებლივ უნდა შეწყდეს. უნდა შეწყდეს პირველ რიგში, ძალადობა, რომელსაც სჩადის კრიმინალთან შეზრდილი სამართალდამცავი სტრუქტურები და პოლიცია, კანონი უნდა იყოს გაწეული. არანაირი კანონის მოდიფიცირება არ არის მისაღები ქართული საზოგადოებისათვის, რადგან კანონის შემოღების მოტივაცია სრულიად ნათელია, ეს არის საქართველოს მოწყვეტა დასავლეთიდან და რა თქმა უნდა, უნდა დაკმაყოფილდეს მინიმალური სტანდარტები, რომ ქართველ ხალხს მომდევნო არჩევნებში მიეცეს თავისი ნების სრულფასოვნად გამოხატვის საშუალება. ძალიან დიდი მნიშვნელობა აქვს, რომ მოსალოდნელი სანქციების ფონზე, ყველა მიმართულებით შეწყდეს ეს ანტიქართული, ანტიდასავლური, ანტიდემოკრატიული ქმედებები. უნდა შეწყდეს ძალადობა, ყველა დაკავებული უნდა გათავისუფლდეს და შეწყდეს საქმეები მათზე, აღიკვეთოს ძალადობა როგორც პოლიციის ისე პოლიციასთან შეზრდილი ზონდერ ჯგუფების. კანონი უნდა იყოს უპირობოდ უკან გაწვეული და ქართველ ხალხს უნდა მიეცეს საშუალება ეს რეჟიმი შეცვალოს მშვიდობიანად მომავალ საპარლამენტო არჩევნებზე“, – განაცხადა ზურაბ ჭიაბერაშვილმა.

რადიკალი ანარქისტები როდესაც თავს ესხმიან პოლიციას, ეს არის მიუღებელი, ეს არის ხელის აღმართვა სახელმწიფოზე, ეს უნდა იყოს დასჯილი და არავითარი კომპრომისი აქ არ შეიძლება, – ამის შესახებ „ქართული ოცნების“ თავმჯდომარემ, ირაკლი ღარიბაშვილმა ბორჯომში ჟურნალისტებს განუცხადა.

„მინდა, მკაფიოდ განვაცხადო, რომ ქვეყანაში არ უნდა გაჩნდეს და მე კატეგორიულად წინააღმდეგი ვარ დაუსჯელობის სინდრომის. ეს არის საშინელება. ძირს უთხრის სახელმწიფოს ძლიერებას, სუვერენიტეტს, ყველაფერს. როგორც შეიძლება, რომ პოლიციელს ქვებს უშენენ ეს რადიკალი ანარქისტები და გაუგებარი არარაობები?! ქვებს უშენენ, პროვოკაციაზე მიდიან, წვავენ პოლიციის მანქანებს, თავს ესხმიან სახელმწიფო უწყებებს. ეს არის ძალიან მძიმე დანაშაული. ამის გამო რა ხდება ამერიკაში, ევროპაში? ყველგან, ყველა ნორმალურ, ძლიერ სახელმწიფოში სახელმწიფო უწყებებისგან არის ძალიან მკაფიო, ძლიერი პასუხი“, – აღნიშნა ღარიბაშვილმა.

ღარიბაშვილის თქმით, გმობს ყველანაირ ძალადობას, ვის წინააღმდეგაც არ უნდა იყოს მიმართული.

„მანამდე ვიხილეთ დეპუტატების წინააღმდეგ მიმართული ძალადობა, პოლიტიკოსების თუ სხვა აქტორების წინააღმდეგ მიმართული. არ შეიძლება, ძალადობა უნდა დავასრულოთ. როცა ხედავს ადამიანი ძალადობას, როცა ხედავენ ამ ფაშისტების აქტიურობას, ყოფილი ხელისუფლების წარმომადგენლებს ვგულისხმობ, და ეს სხვა არაფერია, თუ არა ფაშიზმი, რაც მათ წარსულში აქვთ ჩადენილი, ხალხში ეს ძალადობა და აგრესია იმატებს. მიუღებელია, ჩვენ უნდა დავმშვიდდეთ, დავწყნარდეთ. როცა საჯაროდ გამოდიან ეს აგრესიული ანარქისტები და თავს ესხმიან პოლიციას, ეს არის მიუღებელი, ეს არის ხელის აღმართვა სახელმწიფოზე, ეს უნდა იყოს დასჯილი და არავითარი კომპრომისი აქ არ შეიძლება, სწორედ ეს დაუსჯელობა წარმოშობს სხვა ტიპის ძალადობას, ყველა ხედავს კადრებს, რომ თავს ესხმიან პოლიციელებს“, – განაცხადა ირაკლი ღარიბაშვილმა.

წავიკითხე სენატორების, კონგრესმენების წერილი, ვნახე ჯეიკ სალივანის განცხადება, არ არის მოსაწონი, საჭიროა დიალოგი, საუბარი ჩვენს ევროპელ და ამერიკელ მეგობრებთან, მეტი ახსნა, პოზიციების მეტი დაახლოება და, საბოლოო ჯამში, რაღაც გამოსავლის პოვნა, – ამის შესახებ „ქართული ოცნების“ თავმჯდომარემ, ირაკლი ღარიბაშვილმა განაცხადა.

მისი თქმით, სტრატეგიულ პარტნიორებთან აუცილებელია მჭიდრო დიალოგი, ურთიერთობა, მაგიდასთან მოლაპარაკება, საჯაროდ მსგავსი თემების და, მით უმეტეს, ნეგატიური თემების განხილვა მისასალმებელი არ არის.

„წავიკითხე წერილიც, ვნახე სალივანის განცხადებაც და ეს არ არის მოსაწონი, რა თქმა უნდა, მიუღებელია და გავიმეორებ, საჭიროა დიალოგი, საუბარი ჩვენს ევროპელ და ამერიკელ მეგობრებთან, მეტი ახსნა გვჭირდება, პოზიციების მეტი დაახლოება და, საბოლოო ჯამში, რაღაც გამოსავლის პოვნა. გამოსავალი ყოველთვის არსებობს, მთავარია, ჩვენ უნდა ვეძებოთ ისეთი გამოსავალი, რომელიც ჩვენს ქვეყანას გააძლიერებს და არა ისეთი, რომელიც დაასუსტებს. ამერიკა ჩვენი მრავალი ხნის პარტნიორია, მეგობარი სახელმწიფო და საჭიროა მათთან მუშაობა და დიალოგი. ვფიქრობ, დადგა დრო, სხვა ეტაპზე გადავიდეს ურთიერთობა. აუცილებელია ჩვენს სტრატეგიულ პარტნიორებთან მჭიდრო დიალოგი, ურთიერთობა, მაგიდასთან უნდა მოვილაპარაკოთ, საჯაროდ ასეთი თემების და, მით უმეტეს, ნეგატიური თემების განხილვა არ არის მისასალმებელი. მე გავეცანი კონგრესმენების წერილს, მანამდე სენატორების წერილი იყო, არ არის ეს კარგი“, – განაცხადა ირაკლი ღარიბაშვილმა.

„ქართული ოცნების“ თავმჯდომარემ ევროკავშირთან მოლაპარაკების გახსნაზეც ისაუბრა და აღნიშნა, რომ როდესაც უკრაინას და მოლდოვას გაუხსნეს ამის შესაძლებლობა და საქართველოს არა, დასავლეთში დიდი შეცდომა დაუშვეს, რადგან „ჯერ საქართველო იმსახურებდა ამას და შემდეგ უკრაინა და მოლდოვა“.

„შარშანწინ სტატუსი რომ არ მოგვცეს, ესეც არ იყო სამართლიანი გადაწყვეტილება, მაგრამ ახლა უნდა დავმშვიდდეთ ყველანი, ეს ძალადობაც არ შეიძლება, მით უმეტეს, არ შეიძლება პოლიციელებზე ძალადობა და ვგმობ. ერთადერთი, თუ ვინმეს კანონით აქვს მინიჭებული იარაღის თუ სპეცსაშუალებების გამოყენების უფლება, არის პოლიცია, სხვას არავის ამ ქვეყანაში. ამიტომ, როცა იარაღიან და ამ მანდატით აღჭურვილ ადამიანს თავს ესხმი და პროვოკაციაზე მიდიხარ, მით უმეტეს, ვიღაც ნაძირალები „მოლოტოვის კოქტეილებს“ რომ ესროდნენ და შემდეგ ეს ჩვენი მოღალატე პრეზიდენტი იწყალებდა ასეთ კრიმინალებს, ეს წარმოშობს ძალადობას, ეს არის მიუღებელი და ამაზე უნდა აიმაღლოს საზოგადოებამ ხმა და თქვენ, მათ შორის“, – განაცხადა ირაკლი ღარიბაშვილმა.

დარბიან „ენჯეოების“ წარმომადგენლები და იცავენ არა ჩვენი ქვეყნის, არამედ უცხო სახელმწიფოების ინტერესებს, უნდა დასრულდეს უცხო სახელმწიფოების ინტერესების გაფეტიშება, – ამის შესახებ „ქართული ოცნების“ თავმჯდომარემ, ირაკლი ღარიბაშვილმა პრემიერ-მინისტრ ირაკლი კობახიძის გზავნილებსა და გამჭვირვალობის კანონპროექტთან დაკავშირებით ჟურნალისტებს ბორჯომში განუცხადა.

ღარიბაშვილის თქმით, უნდა დასრულდეს უცხო სახელმწიფოს ინტერესებისადმი გაფეტიშებული დამოკიდებულება.

ამასთან, კითხვაზე, „შედგა თუ არა პარტნიორებთან საუბარი ვეტოსთან დაკავშირებით“, ღარიბაშვილმა აღნიშნა: „არ ვიცი, დეტალებზე თავად ისაუბრა პრემიერმა. დაველოდოთ, ჩემი პასუხი იქნება, რომ დაველოდოთ. ჯერ კიდევ არის დრო, მესამე მოსმენით უნდა იყოს მიღებული ეს კანონი, შემდეგ ვეტოს დაძლევამდეც დრო არის“.

ირაკლი ღარიბაშვილის განცხადებით, დღეს საქართველოს სჭირდება ვითარების დამშვიდება, სტაბილურობა და განვითარება.

„ქვეყანაში დღეს ოფიციალურად დარეგისტრირებულია 31 ათასი არასამთავრობო ორგანიზაცია. ეს, ერთი მხრივ, შეიძლება, კარგია, მაგრამ, მეორე მხრივ, ცოტა არაბუნებრივი სიტუაციაა. ე.ი. ყველა ფიქრობს, რომ გახდეს „ენჯეოს“ წარმომადგენელი. მე წინააღმდეგი არ ვარ, ისე არ გამიგოთ, რომ წინააღმდეგი ვარ „ენჯეოებისა“ და სამოქალაქო საზოგადოების, პირიქით, მომხრე ვარ, იყოს ძლიერი სამოქალაქო საზოგადოება, მაგრამ ეს ორგანიზაციები უნდა ემსახურებოდნენ ჩვენი ქვეყნის ინტერესებს. თქვენ ახსენეთ ოკუპაცია, ამ საკითხებს უნდა ემსახურებოდნენ და არა ისე, რომ „ენჯეო“ იდგეს მთავრობის ადმინისტაციისა და პარლამენტის წინ და ითხოვდეს მთავრობის გადადგომას მაშინ, როდესაც ჩვენი ქვეყნის 20 პროცენტი ოკუპირებულია, რუსის ჯარი გვიდგას თბილისიდან 40 კილომეტრში.

მინდა, შეგახსენოთ ყველას, ერთ-ერთი ცნობილი ენჯეოელიტის წარმომადგენელი, ყოფილი სახალხო დამცველი ნინო ლომჯარია, როცა იყო ძალიან რთული მდგომარეობა, უკრაინაში ახალი დაწყებული იყო ომი, მე მაშინ ძალიან მკაფიოდ განვაცხადე, რომ საქართველო დაიცავს მხოლოდ ქართულ, მხოლოდ ჩვენი ქვეყნის ინტერესებს. გახსოვთ, გამოვიდა ეს ქალბატონი და თქვა, მირჩევნია, ბომბები ცვიოდეს თბილისშიო და ამის მთქმელი ქალბატონი როგორ შეიძლება, პირადად მე, როგორც მოქალაქემ, ჩავთვალო ჩვენი ქვეყნის ინტერესების გამტარებლად? ის ხომ იმ მომენტშიც და დღესაც ატარებდა, ატარებს სხვა ქვეყნის თუ ქვეყნების ინტერესებს. ვარაუდის დონეზე და მისი გამონათქვამებიდან გამომდინარე, შეიძლება ამ დასკვნის გაკეთება.

სამარცხვინოა, მე მრცხვენია, როცა საუბრობენ, თუ რომელ ქვეყანას უნდა ვემსახუროთ. როგორ შეიძლება, აგენტობის და უცხო ქვეყნების ინტერესების გატარების ლეგალიზებაზე ვისაუბროთ, კატასტროფაა, სირცხვილია, გვიყურებს მთელი რეგიონი, მეზობლები გვიყურებენ და რა ხდება აქ? გამოდიან, დარბიან „ენჯეოების“ წარმომადგენლები და იცავენ არა ჩვენი ქვეყნის, არამედ უცხო სახელმწიფოების ინტერესებს. უნდა დასრულდეს ეს უცხო სახელმწიფოს ინტერესების გაფეტიშება. ყველას პატივი უნდა ვცეთ, უნდა შევიძინო მეგობრები, დავიცვათ ჩვენი ინტერესები, მაგრამ, პირველ რიგში, უნდა ვიფიქროთ ჩვენი ქვეყნის ინტერესებზე. შიშის კანკალით არ უნდა ვილაპარაკოთ, პარტნიორები უნდა შევიძინოთ, გავაძლიეროთ ურთიერთობა ამერიკელებთან, ევროპელებთან, ყველასთან“, – განაცხადა ირაკლი ღარიბაშვილმა.