„ნაციონალური მოძრაობა“ არის ბოლშევიკური მოძრაობა. ესენი არიან ის ადამიანები, რომლებსაც ამჟამად აქვთ მოსხმული ევროკავშირის დროშა. ამ დროშის ქვეშ ცდილობენ განახორციელონ თავიანთი ბოლშევიკური იდეები. არაერთი ზეწოლა ვიხილეთ უკვე ფეხბურთელებზე,- ამის შესახებ იუსტიციის მინისტრმა რატი ბრეგაძემ ჟურნალისტებს განუცხადა.

მისივე შეფასებით, „სპორტსმენებზე და საზოგადოების სხვადასხვა წარმომადგენელზე მიმდინარეობს აქტიური ფსიქოლოგიური ზეწოლა“.

„ზოგადად სპორტსმენებზე და საზოგადოების სხვადასხვა წარმომადგენელზე მიმდინარეობს აქტიური ზეწოლა. პირველ რიგში, ეს არის ფსიქოლოგიური ზეწოლა იმიტომ, რომ იმ ადამიანებს, რომელთა აზრსაც რომელიმე სპორტსმენი შეიძლება არ იზიარებდეს, არ აწყობთ ეს ყველაფერი და ცდილობენ, რომ განახორციელონ პირდაპირ ფსიქოლოგიური ტერორი ადამიანებზე, რომლებიც მათ აზრს არ იზიარებენ. ბევრჯერ მითქვამს და არც ახლა მომერიდება იმის თქმის, რომ „ნაციონალური მოძრაობა“ არის ბოლშევიკური მოძრაობა. ესენი არიან ის ადამიანები, რომლებსაც ამჟამად აქვთ მოსხმული ევროკავშირის დროშა. ამ დროშის ქვეშ ცდილობენ განახორციელონ თავიანთი ბოლშევიკური იდეები. არაერთი ზეწოლა ვიხილეთ უკვე ფეხბურთელებზე”,- განაცხადა რატი ბრეგაძემ.

გარდა ამ თემისა, მინისტრი გამოეხმაურა გავრცელებულ ფარულ ჩანაწერებს, სადაც ფიგურირებენ, მათ შორის „ნაციონალური მოძრაობის“ წევრი აკაკი მინაშვილი და პარტია „ახალის“ ლიდერი ნიკა გვარამია. როგორც მინისტრმა აღნიშნა, “ყველამ ვიცით, რა დამოკიდებულება აქვს “ნაციონალურ მოძრაობას” ეკლესიის მიმართ”.

„ნაციონალურ მოძრაობას” რა დამოკიდებულება აქვს ეკლესიასთან და ნებისმიერ ადამიანთან, ყველამ ვიცით. ასევე, რა დამოკიდებულება აქვთ განსხვავებული აზრის მქონე ადამიანებთან, ესეც ვიცით. საერთოდ რაზეა საუბარი? ადამიანებს აწამებდნენ ამ სიტყვის სრული მნიშვნელობით. შესაბამისად, საზოგადოებისთვის აქ უცხო არაფერი არ არის. ახლა ცდილობენ საზოგადოებას თავი ანგელოზებად მოაჩვენონ. ეს არის ის რეჟიმი, რომელმაც დაამკვიდრა, რომ სისტემას ჰქონოდა უფლება გაეუპატიურებინა ადამიანები”,- განაცხადა მინისტრმა.

ბოლო დღეების განმავლობაში, მათ შორის გუშინ ღამე, საქართველოს კონსტიტუციის და საქართველოს მოქალაქეების წინააღმდეგ განხორციელებულ ძალადობრივ მოქმედებებზე პასუხისმგებლობას ვაკისრებთ პირადად რუს ოლიგარქ ბიძინა ივანიშვილს. მოუწევს ყველა დანაშაულზე აგოს პასუხი ქართული მართლმსაჯულების წინაშე, – ამის შესახებ პარტია „ლელოს“ ერთ-ერთმა ლიდერმა, დეპუტატმა, ანა ნაცვლიშვილმა ბრიფინგზე განაცხადა, რითაც გუშინ „ნაციონალური მოძრაობის“ წევრ დიმიტრი ჩიქოვანსა და “ჭავჭავაძის ცენტრის” მკვლევარ, გია ჯაფარიძეზე განხორციელებულ თავდასხმის ფაქტს გამოეხმაურა.

როგორც ნაცვლიშვილმა აღნიშნა, ლაჩრების დასაშინებელი ამ ქვეყანაში არავინ არის.

“ბოლო დღეების განმავლობაში, მათ შორის, გუშინ ღამე, საქართველოს კონსტიტუციის და საქართველოს მოქალაქეების წინააღმდეგ განხორციელებულ ძალადობრივ მოქმედებებზე პასუხისმგებლობას ვაკისრებთ პირადად რუს ოლიგარქ ბიძინა ივანიშვილს. მოუწევს ყველა დანაშაულზე აგოს პასუხი ქართული მართლმსაჯულების წინაშე. დანაშაულის თანამონაწილეა, ასევე, შინაგან საქმეთა სამინისტრო, რომელიც გადაქცეულია პარტიის ქვედანაყოფად, მოქალაქეებზე განხორციელებულ დანაშაულებზე მყისიერი რეაგირების ნაცვლად, დაკავებულია დანაშაულის ჩაფარცხვით, ყალბი არაკანონიერი მოქმედებებით.

მინდა გავაფრთხილო ყველა, ვინც ხელს აფარებს დანაშაულს და ფორმალური გამოძიების იმედად ტოვებს ძალადობრივ მოქმედებას, რომ პირადად გახდება სამართლებრივი პასუხისმგებლობის ობიექტი, მათაც მოუწევთ მართლმსაჯულების წინაშე წარდგენა.

რაც შეეხება იმ პირებს, ვინც ჩართულია სატელეფონო კამპანიაში, როგორც დამკვეთები, ასევე შემსრულებლები ყველა ინდივიდუალურად იქნებით იდენტიფიცირებულები, მოგიწევთ პასუხი აგოთ დანაშაულზე. რასაც აკეთებთ სისხლის სამართლის დანაშაულია, მიუხედავად იმისა, რომ რუსი ოლიგარქის დავალებას ასრულებთ, ვერ ამოეფარებით მას. მინდა მივმართო მოქალაქეებს, ის რაც ასე აშინებს ოლიგარქს და მის მიერ მართულ ინსტიტუციებს, ეს ხართ თქვენ, ქართველი ხალხის მტკიცე ერთობა, რომელმაც აჩვენა ოლიგარქს, რომ ერთ მხარეს დგანან მართალი, ძლიერი ათიათასობით მოქალაქეები, რომელიც იცავენ სამშობლოს, მეორე მხარეს დგანან ლაჩრები, რომლებიც სახის დამალვით უკნიდან მიპარვით ცდილობენ, რომ დააშინონ ადამიანები. ასეთი ლაჩრების დასაშინებელი ამ ქვეყანაში არავინ არის. გავაგრძელებთ ქვეყნის დაცვას, მტკიცედ დგომას, რომ საქართველო არ დაბრუნდეს რუსეთში, ჩვენ მომავალი ევროპაშია“,- აღნიშნა ნაცვლიშვილმა.

ცნობისთვის, “ჭავჭავაძის ცენტრის” მკვლევარს, გია ჯაფარიძეს ფიზიკურად გაუსწორდნენ. მას ქალა-ტვინის ტრავმა აქვს, მისი მდგომარეობა სტაბილურია და უტარდება კვლევები. ამასთან, გუშინ, „ნაციონალური მოძრაობის“ წევრს, დიმიტრი ჩიქოვანს საკუთარ სახლთან დაესხნენ თავს.

არასდროს არ ვიკადრებ და არ გავბედავ იმას, რომ ვიღაცას განსხვავებული აზრი და პოლიტიკური შეხედულება ჰქონდეს და მას დავემუქრო ოჯახით, შვილებით, შეურაცხყოფა მივაყენო – მე პირადად მომიწია შემეცვალა ტელეფონი, მაგრამ არ გამითიშავს, ყველა ნომრის იდენტიფიცირება ხდება, ვინ არიან ეს ადამიანები, – ამის შესახებ „ქართული ოცნების“ გენერალურმა მდივანმა კახა კალაძემ განაცხადა, რითაც იმ ადამიანების საჯარო ბაზის შექმნის საჭიროება შეაფასა, ვინც სოციალურ ქსელში მუქარითა და სიძულვილის ენის გავრცელებით გამოირჩევიან.

როგორც კალაძემ აღნიშნა, საქართველოში პრეტენზია გვაქვს ევროპულობაზე, მაგრამ განსხვავებული აზრის მოსმენის შესაძლებლობა და მიმღებლობა არ გვაქვს.

„მე მაქვს ყველა მასალა იმასთან დაკავშირებით, მაგალითად, როგორი შეურაცხყოფა მიდიოდა ჩვენს ფეხბურთელებზე, თავისი „სქრინებით“, სახელებითა და გვარებით. ამ ადამიანებს არანაირი კავშირი არ აქვთ ევროპულ ღირებულებებთან, ეს არის ჩვეულებრივი ფაშიზმი, ეს არის ის, რასაც ყველა უნდა შევეწინააღმდეგოთ და ყველა უნდა დავუპირისპირდეთ. როგორ შეიძლება განსხვავებული მოსაზრების გამო, ადამიანს უწოდო მოღალატე, ან „დააბულინგო“ იმისთვის, რომ რაღაც აზრი დააფიქსიროს – შეიძლება მას დისტანცირება უნდა რაღაც კონკრეტული თემისგან ან საკითხისგან, შეიძლება ვერ ერკვევა, შენ რატომ ძალადობ ფსიქოლოგიურად და რატომ გინდა, რომ ეს ადამიანი “დააბულინგო”, შეურაცხყოფა მიაყენო, დაემუქრო?

მე პირადად მომიწია შემეცვალა ტელეფონი, მაგრამ არ გამითიშავს, არ იფიქროთ, რომ გავთიშე, ყველა ნომრის იდენტიფიცირება ხდება, ვინ არიან ეს ადამიანები, რას წარმოადგენენ და საზოგადოებამ უნდა იცოდეს ყველა ამ ადამიანის შესახებ. მე არასდროს არ ვიკადრებ და არ გავბედავ იმას, რომ ვიღაცას განსხვავებული აზრი და პოლიტიკური შეხედულება ჰქონდეს და მას დავემუქრო ოჯახით, დავემუქრო შვილებით, შეურაცხყოფა მივაყენო – არ არის ეს სწორი ფორმა და სწორი დამოკიდებულება. მაგრამ ეს ადამიანები აგრძელებენ იმ მეთოდებით მუშაობას, ბრძოლას, სადაც წესები არ არსებობს. ყველაფერს კადრულობენ, ეს არის ფაშიზმი, ლიბერალიზმით შენიღბული ფაშიზმი და ეს ერთხელ და სამუდამოდ უნდა დავამთავროთ ქვეყანაში“,- განაცხადა კალაძემ.

ცნობისთვის, „ქართული ოცნების“ პოლიტსაბჭოს გადაწყვეტილებით, შეიქმნება მონაცემთა ბაზა, სადაც განთავსდება ინფორმაცია ადამიანებზე, „რომლებიც ძალადობაში, სხვა კანონსაწინააღმდეგო ქმედებებში, მუქარასა და შანტაჟში არიან ჩართულნი, ან ამგვარ ქმედებებს საჯაროდ იწონებენ“.

ერთადერთი სიმღერა, რომელიც თავში მომდის, როდესაც ასეთი დანაშაულები ხდება, არის: „დაბრუნება სსრკ-ში“, – ასე ეხმაურება ევროპარლამენტარი მაიკლ გალერი თბილისში წუხელ მომხდარ თავდასხმებს.

მისი თქმით, ჯერ კიდევ არ არის გვიან, საქართველოში ერთიანი კოორდინირებული სამოქალაქო მოძრაობის გზით ერთიანი პოლიტიკური პლატფორმა ჩამოყალიბდეს, რომელიც არჩევნებში მმართველი პარტია „ქართული ოცნების“ ალტერნატივა იქნება.

„ჯერ არ არის გვიანი საქართველოში მოხდეს რეაგირება ერთიანი კოორდინირებული სამოქალაქო მოძრაობის გზით, რომელიც საბოლოოდ პოლიტიკური პლატფორმის ჩამოყალიბებას გამოიწვევს, რომელიც არჩევნებში „ქართული ოცნების“ ალტერნატივა იქნება“, – წერს ევროპარლამენტარი სოციალურ ქსელში.

შეცდომა იქნება არჩევნებზე ზედმეტი იმედების დამყარება, მით უმეტეს მას შემდეგ, რაც 29 აპრილს ივანიშვილმა მათი გაყალბება დააანონსა, – ამის შესახებ საქართველოს მესამე პრეზიდენტი მიხეილ სააკაშვილი სოციალურ ქსელში წერს.

სააკაშვილის განცხადებით, არჩევნებს თუ ივანიშვილი ჩაატარებს, „ეს იმას ნიშნავს, რომ რუსეთი გადაყლაპავს საქართველოს“.

„ამ რთულ დღეებში საჭიროა შემდეგი მომენტების გათვალისწინება:

შეცდომა იქნება არჩევნებზე ზედმეტი იმედების დამყარება, მით უმეტეს მას შემდეგ, რაც 29 აპრილს ივანიშვილმა მათი გაყალბება დააანონსა.

არჩევნებს თუ ივანიშვილი ჩაატარებს, ეს იმას ნიშნავს, რომ რუსეთი გადაყლაპავს საქართველოს. არჩევნები უნდა ჩაატაროს დროებითმა (გარდამავალმა, ტექნიკურმა) მთავრობამ. შემოდგომაზე არჩევნებია აშშ-ში და საქართველოსთვის აღარავის ეცლება. ტრამპის გამარჯვების შემთხვევაში ივანიშვილს აქვს იმედი, რომ ის მოუხსნის მას სანქციებს, თუ კიდევაც სახ. დეპარტამენტი მანამდე მას დაასანქცირებს.

რუსეთი უფრო სუსტია მოკლე დისტანციაზე, მას აბნევს და აშინებს მოულოდნელობა, სპონტანურად შექმნილი ვითარება, ისეთი, ჩვენთან რომ არის ახლა. გრძელ დისტანციაზე, სხვადასხვა ხერხის გამოყენებით, ინფორმაციის გაყალბებით, ადამიანების მოსყიდვით რუსეთი ძალას იკრებს და მისი გამარჯვების შანსი იზრდება. ჩვენთვის ეს წაგებულ თამაშში შესვლაა. არ უნდა მივცეთ ეს შანსი რუსეთს.

თავის დროზე იანუკოვიჩმა დასავლეთს მიმართა თხოვნით, მიეცათ მისთვის არჩევნების ექვსი თვით გადავადების უფლება. დასავლეთი დათანხმდა, დათანხმდა უკრაინის ხელისუფლებაც. ერთადერთი, ვინც არ დათანხმდა, იყო აჯანყებული „მაიდანი“ და შედეგად იანუკოვიჩი გაიქცა.

ასე რომ არ მომხდარიყო, უკრაინა დიდი ხნის უკან, იმ ექვს თვეში, გადაყლაპული ექნებოდა პუტინს.

აუცილებელია ყველა ამ პროცესმა მშვიდობიანად ჩაიაროს.

ხალხს დიდი ძალა აქვს“, – წერს მიხეილ სააკაშვილი.

არაკეთილსინდისიერმა ჯო ბაიდენმა, იცის თუ არა ეს, განაცხადა, რომ შეუჩერებს იარაღის მიწოდებას ისრაელს, რომელიც ღაზაში „ჰამასის“ ტერორისტების აღმოსაფხვრელად იბრძვის, – ასე ეხმაურება აშშ-ის ყოფილი პრეზიდენტი და პრეზიდენტობის „რესპუბლიკელი“ კანდიდატი, დონალდ ტრამპი აშშ-ის პრეზიდენტ ჯო ბაიდენის განცხადებას.

მისი თქმით, ჯო ბაიდენი „ჰამასის“ მხარესაა, მას მსოფლიო III მსოფლიო ომისკენ მიჰყავს.

„ჰამასმა“ მოკლა ათასობით უდანაშაულო მშვიდობიანი მოქალაქე, მათ შორის ჩვილები და ჯერ კიდევ მძევლად ჰყავს ამერიკელები, თუ ისინი ჯერ კიდევ ცოცხლები არიან. მიუხედავად ამისა, არაკეთილსინდისიერი ჯო ამ ტერორისტების მხარესაა. ბაიდენი არის სუსტი, კორუმპირებული და მსოფლიო პირდაპირ III მსოფლიო ომისკენ მიჰყავს. გახსოვდეთ – ეს ომი ისრაელში, ისევე, როგორც ომი უკრაინაში, არასდროს დაიწყებოდა, მე რომ თეთრ სახლში ვყოფილიყავი. მაგრამ ძალიან მალე, ჩვენ დავბრუნდებით და კიდევ ერთხელ მოვითხოვთ მშვიდობას ძალით!“, – წერს ტრამპი სოციალურ ქსელ Truth Social-ში.

შეგახსენებთ, ჯო ბაიდენმა განაცხადა, რომ შეაჩერებს ამერიკული იარაღის ისრაელისთვის მიწოდებას, თუ პრემიერ-მინისტრი, ბენიამინ ნეთანიაჰუ ქალაქ რაფაჰში შეჭრის გადაწყვეტილებას მიიღებს.

2012 წელს „ნაცმოძრაობის“ წარმომადგენლებს მივეცით შესაძლებლობა, გაეაზრებინათ თავიანთი დანაშაულები, ღირსეულად ეღიარებინათ და ჯანსაღი პოლიტიკური პროცესი გაეგრძელებინათ – საქართველოს განვითარებაში შეეტანათ წვლილი, მაგრამ დავინახეთ მათი ქმედებები, – ამის შესახებ მედიასთან „ხალხის ძალის“ პოლიტიკურმა მდივანმა, დეპუტატმა მიხეილ ყაველაშვილმა განაცხადა.

მისი თქმით, „ნაცმოძრაობა“ ერთ დღეში განადგურდება და შეწყვეტს არსებობას, გარედან, უცხოეთიდან რომ არ ჰქონდეს მხარდაჭერა.

„დღეს გავრცელდა ჩანაწერები, რომელთა მთავარი მოქმედი პირები არიან „ნაცმოძრაობის“ დავიწყებული სახეები. მაგალითად, ონიანი, რომელიც პირდაპირ არბევდა „ნაცმოძრაობის“ დროს აქციებს. მინაშვილზე აღარ ვლაპარაკობ, მგონი, ერთ-ერთია, ვინც [რუსეთისთვის სასარგებლო იმ] რეზოლუციას მოაწერა ხელი. მელია, გვარამია… ეს ადამიანები შეუძლებელია, რომ შეიცვალონ. 2012 წელს „ნაცმოძრაობის“ წარმომადგენლებს მივეცით შესაძლებლობა, გაეაზრებინათ თავიანთი დანაშაულები, ღირსეულად ეღიარებინათ და ჯანსაღი პოლიტიკური პროცესი გაეგრძელებინათ – საქართველოს განვითარებაში შეეტანათ წვლილი, მაგრამ დავინახეთ მათი ქმედებები.

უფრო მეტსაც გეტყვით – ეს ძალა, „ნაცმოძრაობა“, ერთ დღეში განადგურდება და შეწყვეტს არსებობას, გარედან რომ არ ჰქონდეს მხარდაჭერა. ამის ფაქტებია, თუ როგორ სულდგმულობენ უცხოური ძალებით“, – განაცხადა ყაველაშვილმა.