რაც უფრო მეტი პროდუქცია გავა ჩვენი უცხოეთში მათ შორის, რუსეთში, ამით იხეირებს ჩვენი ქვეყანა და ექსპორტი, – ამის შესახებ რუსეთთან ურთიერთობის საკითხებში პრემიერ-მინისტრის ყოფილმა სპეციალურმა წარმომადგენელმა ზურაბ აბაშიძემ მთავრობის სხდომის შემდეგ განაცხადა.

მისივე განცხადებით, რისკები არსებობს, რომლებსაც ყურადღების მიქცევა სჭირდება.

„საქართველო პირნათლად ასრულებს იმ ვალდებულებებს, რაც საერთაშორისო სანქციებთან არის დაკავშირებული. მაგრამ ვაჭრობა მიმდინარეობს, საკმაოდ დიდი მოცულობაა. ამას დიდი ყურადღება სჭირდება, რამეთუ ძალიან ბევრი ქართული კომპანიაა ჩართული ამ სავაჭრო ურთიერთობებში. 2010 წელს ჩვენი სავაჭრო ურთიერთობები სრულად მორღვეული იყო ამ ბალანსის თვალსაზრისით. რუსეთიდან იმპორტი 10-ჯერ მეტი იყო ვიდრე ექსპორტი საქართველოდან. ეს მას შემდეგ, რაც რუსეთმა საქართველოს წინააღმდეგ ემბარგო შემოიღო. შემდგომ, რუსეთი გახდა მსოფლიო სავაჭრო ორგანიზაციის წევრი და მან გარკვეული პასუხისმგებლობა აიღო. ამ ვალდებულებების შესაბამისად და ზოგადად, ჩვენი ძალისხმევითაც მოხერხდა ის, რომ ექსპორტი და იმპორტი, ეს ძალიან დიდი სხვაობა მეტ- ნაკლებად დაბალანსდა. 2010 წელს ჩვენი ექსპორტი იყო 34 მილიონი. იმპორტი იყო 10-ჯერ მეტი. ანუ, იქიდან 10-ჯერ მეტი შემოდიოდა. ახლა ეს შეიცვალა და ასეთი დისბალანსი აღარ არის. ჩვენი ექსპორტი ძალიან გაზრდილია. დიახ, ვთვლი, რომ საქართველოს ექსპორტის გაზრდა ნებისმიერ ქვეყანაში კარგია. ამან მილიარდობით ჩვენი პროდუქციის გატანის საშუალება მოგვცა რუსეთში ამ წლების განმავლობაში. ეს ფული საქართველოში შემოვიდა. რისკები არის, რა თქმა უნდა, ამაზე ჩვენ ყოველთვის ვსაუბრობდით. ამ რისკებს ძალიან დიდი ყურადღების მიქცევა უნდა. ყველაზე მნიშვნელოვანი გახლავთ ის, რომ ჩვენი საგარეო ვაჭრობა დივერსიფიცირებულია. რუსეთის წილი ზოგადად, სავაჭრო ბრუნვაში სადღაც, 11,2%-ია. შარშან ეს ასე იყო, არ არის ეს ძალიან დიდი ციფრი. ყველაზე დიდი პარტნიორი თუკი ავიღებთ ჩვენ ევროკავშირის ქვეყნებს, როგორც ერთ ბაზარს, როგორც არის სინამდვილეში, სამჯერ მეტია საქართველოს სავაჭრო ბრუნვა ევროკავშირთან, ვიდრე სხვა რომელიმე ქვეყანასთან. მეორე ადგილზე თურქეთია, მესამეზე – რუსეთის ფედერაცია. თუმცა ექსპორტსა და იმპორტს შორის ხშირად არის ცვლილებები, ხან ერთი ქვეყანა ჩაანაცვლებს რუსეთს მესამე – მეოთხე ადგილზე, ხან მეორე ქვეყანა. რაც უფრო მეტი პროდუქცია გავა ჩვენი უცხოეთში მათ შორის, რუსეთში, ამით იხეირებს ჩვენი ქვეყანა და ექსპორტი“,- განაცხადა ზურაბ აბაშიძემ.

დღეს დილით მქონდა შეხვედრა საქართველოში ევროკავშირის ელჩთან, ასევე გერმანიის ელჩთან. ამ შეხვედრების ფორმატში გამოვხატეთ ჩვენი შეშფოთება იმ ფაქტთან დაკავშირებით, რომლის მომსწრენიც გავხდით და ვნახეთ ის ადამიანი, რომელიც კონკრეტულ შეხვედრებში მონაწილეობდა, – ამის შესახებ ილია დარჩიაშვილმა მთავრობის სხდომის შემდეგ გამართულ ბრიფინგზე განაცხადა.

საგარეო საქმეთა მინისტრმა აღნიშნა, რომ საქართველოს მთავრობის პოზიცია ზურაბ ადეიშვილთან მიმართებით ცალსახაა.

„ჩვენ მიგვაჩნია და გვაქვს ეს პოზიცია ჩამოყალიბებული, რომ საქართველოს კანონმდებლობით, მსჯავრდებული ადამიანები, რომლებიც ძალიან მძიმე დანაშაულებში არიან ეჭვმიტანილი და ბრალდებული, მსგავსი ტიპის საჯარო აქტივობებში არ უნდა მონაწილეობდნენ ჩვენს პარტნიორ, მეგობარ ქვეყნებში. შესაბამისად, მქონდა შესაძლებლობა, ელჩებთან ამ საკითხზე კონკრეტულად მესაუბრა.

ზოგადად, ბოლო პერიოდში, გვახსოვს კიდევ სხვა ადამიანებიც, რომლებიც თავისუფლად გადაადგილდებიან ევროკავშირის შიგნით, რომელთა მიმართაც მძიმე პრეტენზიები და მძიმე ბრალდებები არსებობს.

შესაბამისად, აუცილებლად ვფიქრობთ, რომ მსგავსი ტიპის რეაქცია ჩვენს მეგობრებთან უნდა გამოგვეხატა, რადგან ჩვენთვის მიუღებელია ძალიან მძიმე დანაშაულებში ბრალდებული ადამიანები იღებდნენ ასეთი ტიპის საჯარო ღონისძიებებში მონაწილეობას, ესწრებოდნენ შეხვედრებს, რომლებსაც მართავენ ჩვენი უახლოესი მეგობრები და პარტნიორები“, – განაცხადა დარჩიაშვილმა.

საქართველოს საგარეო საქმეთა სამინისტროში საქართველოში ევროკავშირის ელჩთან პაველ ჰერჩინსკისთან და საქართველოში გერმანიის ფედერაციული რესპუბლიკის ელჩთან პეტერ ფიშერთან შეხვედრა გაიმართა, რა დროსაც ელჩებს ოფიციალურად გადაეცათ ქართული მხარის შეშფოთება ევროკავშირსა და გერმანიის ფედერაციულ რესპუბლიკაში გამართულ ვიზიტებსა და შეხვედრებში საქართველოს სასამართლოს მიერ სისხლის სამართლის დამნაშავედ აღიარებული და ძებნილი პირის, ზურაბ ადეიშვილის მონაწილეობის გამო.

ჩვენ მივესალმებით თუკი აზერბაიჯანის მხარე მიიღებს შესაბამის გადაწყვეტილებას და გახსნის საზღვარს, – ამის შესახებ საგარეო საქმეთა მინისტრმა ილია დარჩიაშვილმა მთავრობის სხდომის დასრულების შემდეგ კითხვის საპასუხოდ განაცხადა.

თუმცა ამასთან, როგორც მინისტრმა აღნიშნა, მან ამ დროისთვის არ იცის რას უკავშირდება აზერბაიჯანის გადაწყვეტილება, ჩაკეტილი ჰქონდეს სახმელეთო საზღვარი. დარჩიაშვილის თქმით, ამ მხრივ ბევრი ნიუანსი არ არსებობს.

„ჩვენ, რა თქმა უნდა, მივესალმებით, რომ სრულად იყოს საზღვრები გახსნილი იმისთვის, რომ ტურიზმი კიდევ უფრო განვითარდეს. ჩვენი მეზობელი და სტრატეგიული პარტნიორი ქვეყნიდან ჩვენ ძალიან ბევრი ვიზიტორი გვყავდა და გვინდა, რომ ეს მომავალშიც გაგრძელდეს. საზღვართან დაკავშირებით მათ აქვთ კონკრეტული არგუმენტები, ეს არ ეხება საქართველოს მხოლოდ. ზოგადად, მათ კონკრეტული შეხედულებები აქვთ მათი საზღვრების გახსნასთან დაკავშირებით, ამიტომ აქ ძალიან რთულია რამე გითხრათ. ჩვენ მივესალმებით თუკი აზერბაიჯანის მხარე მიიღებს შესაბამის გადაწყვეტილებას და გახსნის საზღვარს.

ბევრი ნიუანსია აქ, მე არ მინდა აზერბაიჯანული მხარის პოზიციებზე გესაუბროთ. ჩვენ ვიცით, რომ კოვიდი იყო ერთი მიზეზი, როდესაც უსაფრთხოების თვალსაზრისით იყო საზღვრები ჩაკეტილი, შემდგომ, თქვენ იცით, როგორ განვითარდა მოვლენები რეგიონში უსაფრთხოების თვალსაზრისით, ამიტომ მე ვერ გეტყვით აზერბაიჯანის პოზიციას, თუ რატომ აქვთ მას ეს გადაწყვეტილება. მივესალმებით თუ მიიღებენ გადაწყვეტილებას და კიდევ უფრო გაუადვილდებათ მათ მოქალაქეებს საქართველოში ჩამობრძანება“,- განაცხადა დარჩიაშვილმა.

ე.წ. ვეტინგთან დაკავშირებით ჩვენი პასუხი მკაფიოა, ადეიშვილისა და წოწორიას რეფორმები საქართველოში არასდროს გატარდება, – მის შესახებ საქართველოს პარლამენტის თავმჯდომარე შალვა პაპუაშვილმა განაცხადა.

პაპუაშვილის თქმით, საქართველოში ყველა მოსამართლე ავსებს ქონებრივ დეკლარაციას, რომელიც საჯაროა.

„რაც შეეხება კეთილსინდისიერების შემოწმებას, სინამდვილეში, ყველა მოსამართლე ავსებს ქონებრივ დეკლარაციას და ეს დეკლარაციები არის საჯარო. ბოლო პერიოდში ვატყობ, რომ მედიაც ინტერესდება ამით. კი ბატონო, დაინტერესდით და, დარწმუნებული ვარ, მოსამართლეები გაგცემენ პასუხს თავიანთ ქონებასთან დაკავშირებით. ეს არის შემოწმება, სხვა რამე კი არ გაკეთდა უკრაინასა და მოლდოვაში.

საფუძველი არის ქონების დეკლარაციების წარდგენა და მისი გადამოწმება. ქონების დეკლარაციები წარდგენილია, მათ შორის მოსამართლეების დიდი ნაწილი მოხვედრილია მონიტორინგში არასამთავრობო ორგანიზაციების მოთხოვნის საფუძველზე და ანტიკორუფციული ბიურო ჩაღრმავებულ მონიტორინგს განახორციელებს როგორც მოსამართლეების, ისე პარლამენტის წევრების მიმართ არის ჩაღრმავებული მონიტორინგი. ყველაფერი არის საჯარო, შეგიძლიათ, მოიკითხოთ. რაც შეეხება ე.წ. ვეტინგს და მაგალითად მოჰყავთ ზურაბ ადეიშვილის მიერ უკრაინაში ჩატარებული რეფორმა, ასევე ზურაბ ადეიშვილის მიერ მოლდოვაში ჩატარებული რეფორმა, ჩვენი პასუხი არის მკაფიო – ადეიშვილის და წოწორიას რეფორმები საქართველოში არასდროს აღარ ჩატარდება. მათ ეს სცადეს, გააკეთეს 20 წლის წინ და რა შედეგებიც იყო, ეს საქართველომ ნახა. საქართველოს მაგალითად ვინც უსახავს უკრაინასა და მოლდოვას, ადეიშვილს და წოწორიას, ჯერ დაფიქრდეს, ვის მაგალითს გვისახავს და შემდეგ მიიღებენ პასუხს, რომ ადეიშვილისა და წოწორიას რეფორმებს საქართველოში არავინ გაატარებს“, – განაცხადა შალვა პაპუაშვილმა.

ქართველ ხალხს აქვს ერთი, მაგრამ ძალიან მკაცრი პრიორიტეტი ევროკავშირთან მიმართებაში. ეს არის ის, რომ ევროკავშირი არ უნდა იქცეს იმ სივრცედ, სადაც თავს აფარებენ ქართველი კრიმინალები, – ამის შესახებ პარლამენტის თავმჯდომარემ შალვა პაპუაშვილმა ბრიუსელსა და გერმანიაში ზურაბ ადეიშვილის შეხვედრების კომენტირებისას განაცხადა.

„გარდა ამ შეხვედრებისა კიდევ უფრო დამაფიქრებელი იყო გერმანიისა და ევროკავშირის საელჩოების განცხადებები, რომელიც ჩვენ მოვისმინეთ გასულ კვირას. სამწუხაროდ, ნაცვლად იმისა, რომ ქართველ ხალხს მოესმინა წუხილი საელჩოების მხრიდან იმის გამო, რომ ასეთი შეხვედრები შედგა და მოგვესმინა განმარტებები, თუ რასთან გვქონდა საქმე, მათმა განცხადებებმა დატოვა შთაბეჭდილება, რომ იყო მცდელობა ზურაბ ადეიშვილთან, კრიმინალთან, ამ დონეზე შეხვედრების ნორმალიზებისა. ეს რა თქმა უნდა, არის აბსოლუტურად მიუღებელი და ძალიან ვწუხვარ, რომ საელჩოებს ჰქონდათ ასეთი რეაქცია იმ სამართლიან აღშფოთებაზე, რომელიც იყო საზოგადოებაში. ქართველი ხალხი მოელის, რომ ის ღირებულებები, რომელსაც ჩვენ ვიზიარებთ ევროკავშირთან და რომლის გამოც ვისწრაფვით ევროკავშირისკენ, იქნება გაზიარებული ევროპის ყველა ქალაქში, ყველა დონეზე და შესაბამისად, იქნება რეაგირებები. ქართველ ხალხს აქვს ერთი, მაგრამ ძალიან მკაცრი პრიორიტეტი ევროკავშირთან მიმართებაში. ეს არის ის, რომ ევროკავშირი არ უნდა იქცეს იმ სივრცედ, სადაც თავს აფარებენ ქართველი კრიმინალები და არ უნდა მოხდეს ნორმალურ ჭრილში წარმოჩენა იმ ადამიანების, რომლებმაც საქართველოში შექმნეს წამების, ღირსების შელახვის, ბიზნესის რეკეტის სისტემა“, – აღნიშნა პაპუაშვილმა.

უნდა შევიმუშაოთ სისხლის სამართლის კოდექსში ცვლილებები, რომელთა საფუძველზეც, გამკაცრდება სასჯელები დიდი ოდენობით ხე-ტყის უკანონო ჭრასთან დაკავშირებით, – ამის შესახებ საქართველოს პრემიერ-მინისტრმა ირაკლი კობახიძემ მთავრობის სხდომაზე განაცხადა.

პრემიერის თქმით აღნიშნულ კანონპროექტზე მუშაობა უახლოეს პერიოდში დაიწყება.

„რამდენიმე ადამიანმა მომმართა ხე-ტყის უკანონო ჭრის საკითხზე. იყო კონკრეტული საუბრები იმასთან დაკავშირებით, რომ კონკრეტულ რეგიონებში, ხეობებში იჭრებოდა ტყეები. მე არ მაქვს ფაქტები და მტკიცებულებები, ვერ ვიტყვი ვერაფერს იმაზე, რამდენად არის ეს ფაქტები ნამდვილი, თუმცა ყველა შემთხვევაში ჩვენ გვჭირდება მაქსიმალური ყურადღება იმისათვის, რომ მოხდეს ასეთი შესაძლო დანაშაულის პრევენცია. ბატონი ოთარ შამუგია დღეს არ ესწრება მთავრობის სხდომას, არის შვებულებაში და მასთან გვექნება მოგვიანებით კომუნიკაცია ამ საკითხზე. მინდა, რომ სამინისტრომ მაქსიმალური ყურადღება დაუთმოს ამ საკითხს, ასევე ძალოვანმა უწყებებმა, მათ შორის შინაგან საქმეთა სამინისტრომ. ძალიან მძიმე დანაშაულია ზოგადად ხე-ტყის უკანონო ჭრა, განსაკუთრებით, როცა საქმე ეხება დიდი ოდენობით ხე-ტყის უკანონო ჭრას. სხვა მძიმე დანაშაულებებს რომ შევადაროთ, ეს არანაკლებ მძიმე დანაშაულია, გამომდინარე იქიდან, რომ ნადგურდება სტრატეგიული რესურსი ჩვენი მომავალი თაობებისთვის და მოსახლეობისთვის. აქედან გამომდინარე, აქაც გვჭირდება მაქსიმალური ყურადღება და მაქსიმალური სიმკაცრე, მათ შორის, მე ვფიქრობ, რომ უნდა შევიმუშაოთ სისხლის სამართლის კოდექსში ცვლილებები, რომელთა საფუძველზეც, გამკაცრდება სასჯელები დიდი ოდენობით ხე-ტყის უკანონო ჭრასთან დაკავშირებით და ამ კანონპროექტზე დავიწყებთ დაუყოვნებლივ მუშაობას”, – განაცხადა ირაკლი კობახიძემ.