კელი დეგნანს ჰკითხეთ, რა იგულისხმა ძირის გამომთხრელ საქმიანობაში? არჩევნებზე გამოჩნდება, ვინ რა ძირის გამოთხრას აპირებს თუ არ აპირებს, – ამის შესახებ  საპარლამენტო უმრავლესობის წევრმა, გია ვოლსკიმ განაცხადა.

ვოსლკის კითხვა დაუსვეს კელი დეგნანის განცხადებასთან დაკავშირებით, სადაც მან აღნიშნა: „სამწუხაროდ, მივიჩნევ, რომ საქართველოს ევროკავშირისკენ მიმავალი გზისთვის ძირის გამოთხრის მიზნობრივი კამპანია მიმდინარეობს“.

გია ვოლკის განაცხადებით, უმრავლესობიდან დეპუტატები საწინააღმდეგო მოსაზრებებს თუ აფიქსირებენ, ეს დასავლეთის სტრატეგიული მიმართულებისგან გადახვევას არ ნიშნავს.

„საპირისპირო აზრების ჭიდილი არ უნდა გაგვიკვირდეს. ამერიკის შეერთებულ შტატებში ათი წელი გავატარე, ამერიკისა და სხვა ქვეყნის წარმომადგენლებს შორის საკმაოდ მწვავე გადაძახილები მინახავს, მათ შორის მაღალი ტრიბუნებიდან, გაერო-ში იქნება თუ ვაშინგტონში. ასეთი პოლემიკა აბსოლუტურად ნორმალური დემოკრატიული პროცესის ნაწილია და წარმოუდგენელ ანომალიად არ უნდა მივიჩნიოთ, ევროპისგან, დასავლეთის სტრატეგიული მიმართულებისგან გადახვევას არ ნიშნავს. სახელმწიფომ თავისი სტრატეგია ჩამოაყალიბა და ოპტიმალური ვარიანტი შეარჩია, რათა გადარჩეს ფიზიკურად და თავისი ხალხი სამშვიდობის გაიყვანოს. ჩვენ რაიმე საწინააღმდეგო მოსაზრებები თუ გვაქვს, თუნდაც ამერიკის ელჩის მოსაზრებებთან დაკავშირებით, რომელსაც მიაჩნია, რომ ელექტრონული არჩევნები შეიძლება, გაყალბდეს ან მოუწოდებს საზოგადოებას, გამოვიდნენ, რევოლუციურ პროცესში ჩაერთონ, ნორმალურია, თუ ამას ვუპასუხებთ. ყოველ შემთხვევაში – ამერიკელებისთვის, და ვიღაცისთვის შეიძლება, ნორმალური არ იყოს. მთავარია, მართალი იყო და შენს ქვეყანას ემსახურებოდე, რათა ამ ურთულეს პერიოდში მისი სამშვიდობოს გაყვანა უზრუნველყო.

კელი დეგნანს ჰკითხეთ, რა იგულისხმა ძირის გამომთხრელ საქმიანობაში. ეს პირველი განცხადება არ არის, თუნდაც კელი დეგნანისგან. ანომალიურად არ უნდა მივიჩნიოთ, თუ აზრთა სხვადასხვაობა არსებობს, ეს ამერიკელისთვის გასაკვირი არ არის. ასეთ დემოკრატიაზე ვითარდებოდა და ვითარდება დღესაც, მომავალშიც ამ დემოკრატიაზე იქნება აგებული ამერიკის შეერთებული შტატები. აზრთა და შეხედულებათა დაპირისპირებასთან დაკავშირებით დასკვნები საზოგადოებამ უნდა გამოიტანოს. არჩევნებზე აუცილებლად გამოჩნდება, ვინ როგორ ფიქრობს და ვინ რა ძირის გამოთხრას აპირებს თუ არ აპირებს“, – განაცხადა გია ვოლკსიმ.

თბილისის საკრებულოს წევრი ვლადიმერ ბოჟაძე ოპოზიციონერ კოლეგებს მიმართავს და აცხადებს, რომ ოპოზიციის წარმომადგენლები მთელი ერთი კვირაა საზოგადოებას ატყუებენ და დეზინფორმაციას ავრცელებენ ყველგან: კომისიებზე, სხდომებზე და მათ მიერ მართულ მედიებში. ეს განცხადება ვლადიმერ ბოჟაძემ საკრებულოს დღევანდელ სხდომაზე გააკეთა.

„ბევრ ტყუილს და დეზინფორმაციას ვისმენთ თქვენგან კომისიებზეც, სხდომებზეც, თქვენს მართვად მედიებშიც და დღესაც და გუშინაც. მთელი ერთი კვირაა საზოგადოებას  ატყუებთ, თითქოს ჩვენ დღეს რაიმე პროექტს ვამტკიცებთ და არა განაშენიანების რეგულირების გეგმას (გრგ-ს).

სანამ თქვენ ეს ორმაგი სტანდარტები გექნებათ, მანამდე გაყოფილი გეყოლებათ ეს ქვეყანა თქვენიანებად და სხვისიანებად და მანამდე  მთელი საქართველოსთვის სხვისიანები იქნებით“, –  განაცხადა ვლადიმერ ბოჟაძემ სხდომაზე.

მისივე თქმით, ოპოზიციის წარმომადგენლებს  მხოლოდ ის გრგ-ები მოსწონთ, რომლებიც მათ  პარტიებთან დაკავშირებულ ბიზნესმენებს ეხება.

„ლისი დეველოპმენტი მოგწონთ? ხაზარაძის გამო ჭაობად გადაქცეული ლისის ტბა მოგწონთ? სანამ მხოლოდ თქვენთან დაკავშირებული ადამიანების გრგ-ები მოგეწონებათ და არ მოგეწონებათ ისინი, ვინც ამ ქვეყანას განვითარებას მოუტანს, მანამდე სულ ასეთ მდგომარეობაში იქნებით. დამთავრდა ამ ქვეყანაში დრო, როდესაც ამომრჩეველს ატყუებდით“,  –  განაცხადა ვლადიმერ ბოჟაძემ.

თბილისის საკრებულოს პარტია „საქართველოსთვის” წევრები საქართველოს პროკურატურას მიმართავენ, თბილისში დაგეგმილ სამშენებლო პროექტებთან დაკავშირებით გამოძიება დაიწყოს და დაადგინოს, იკვეთება თუ არა პოლიტიკური კორუფცია „ქართული ოცნების” დეპუტატებისა და მათი ოჯახის წევრების მხრიდან.

აღნიშნულის შესახებ განცხადება „საქართველოსთვის” წევრმა გიორგი შარაშიძემ პარტიის წევრებთან ერთად თბილისის საკრებულოში გააკეთა. ამასთან, ოპოზიციური პარტიის წარმომადგენელი მიმართავს თბილისის საკრებულოს, რომ დედაქალაქში დაგეგმილ ურბანულ პროექტებთან დაკავშირებით ანტიკორუფციული კომისია შეიქმნას.

„დღეს, კალაძის მორჩილი უმრავლესობა თბილისის საკრებულოში, სამწუხაროდ, აპირებს, რომ მხარი დაუჭიროს ურბანული კატასტროფის გამომწვევ სამშენებლო დეველოპერულ პროექტებს, რაც კიდევ უფრო გაურთულებს ცხოვრებას უამრავ მოქალაქეს და ამავე დროს, გაამდიდრებს პრივილეგირებულ რამდენიმე ოჯახს. მიუხედავად იმისა, რომ „ოცნებისთვის” კარგად არის ცნობილი ყველა ის ნეგატიური შედეგი, რაც ურბანული თვალსაზრისით ამ პროექტების განხორციელებამ შეიძლება გამოიწვიოს, „ოცნება” მზადაა კალაძის მაფიოზურ ჯგუფს თბილისელების ინტერესების საწინააღმდეგოდ დაუკანონოს უკანონო საქმიანობა. მიგვაჩნია, რომ ერთდროულად ხუთი მასშტაბური სამშენებლო პროექტის დაჩქარებული წესით საკრებულოს დამტკიცება, მაღალი საზოგადოებრივი ინტერესის მიუხედავად, არ მომხდარა სათანადო საჯარო განხილვები და დაინტერესებულ მხარეებს: ურბანისტებს, არქიტექტორებს, ხელოვნებათმცოდნეებს, სეისმოლოგებს, გეოლოგებს, ტრანსპორტის სპეციალისტებს არ მისცემიათ პროცესში ჩართვის სათანადო საშუალება, წარმოადგენს პოლიტიკური კორუფციის და „ოცნების” მიერ დაწყებული არჩევნების გაყალბების კომპლექსური გეგმის შემადგენელ ნაწილს. მაშინ, როცა „ოცნებამ” საკანონმდებლო დონეზე პარტიას დაუქვემდებარა ცესკო, მაშინ, როცა ქვეყანაში აღარ დარჩა არცერთი დამოუკიდებელი ინსტიტუტი, რომელმაც უნდა უზრუნველყოს არჩევნების სამართლიან გარემოში ჩატარება „ოცნება” გადადის არჩევნების გაყალბებისთვის მზადების აქტიურ ფაზაში და ამჯერად, უკვე „შავი ფულის” დაჩქარებული მობილიზებით ცდილობს შეავსოს პარტიის ფორმალური საარჩევნო ყულაბა. მივმართავთ საქართველოს პროკურატურას დაიწყოს გამოძიება და და დაადგინოს, არის, თუ არა პოლიტიკური კორუფცია „ოცნების” დეპუტატებისა და მათი ოჯახის წევრების, „ოცნების” მოქმედი პრემიერ-მინისტრის უახლოესი ნათესავის და „ოცნების” შემომწირველთა კომპანიებისთვის თბილისის იერსახისათვის სრულიად შეუსაბამო და მოქალაქეთა უსაფრთხოებისთვის საფრთხის შემცველი სამშენებლო პროექტებისთვის დაჩქარებული წესით ნებართვების გაცემა. ასევე მივმართავთ თბილისის მერს, ბატონ კალაძეს, საზოგადოებას აუხსნა, რატომ იცრუა და მოატყუა ხალხი, როცა განაცხადა, რომ „ლაგუნა ვერე” საჩუქრად გადაეცემოდა თბილისს. ასევე მივმართავთ თბილისის საკრებულოს დაუბრუნდეს ჩვენი ინიციატივის განხილვას პოლიტიკური კორუფციის პრევენციის მიზნით თბილისის საკრებულოში ანტიკორუფციული კომისიის შექმნასთან დაკავშირებით, რადგან ვერ ვხედავთ სხვა უფრო ეფექტურ მექანიზმს, რაც თბილისის მრავალმილიონიან ბიუჯეტს და სამშენებლო ბიზნესის არაფორმალურ ლობიზმს კორუფციული რისკებისგან დააზღვევს”, – განაცხადა გიორგი შარაშიძემ.

თბილისის საკრებულოს უმრავლესობის წევრი გივი ჩხარტიშვილი ქალაქში განსახორციელებელ პროექტებთან დაკავშირებით ოპოზიციის მიერ გამოთქმულ ბრალდებებს გამოეხმაურა. როგორც „ფრაქცია „ქართული ოცნება-დემოკრატიული საქართველოს“ თავმჯდომარის მოადგილემ განაცხადა, ქალაქის განვითარებისთვის დაგეგმილ პროექტებთან დაკავშირებით, ოპოზიციასთან შინაარსობრივ განხილვაში შესვლა შეუძლებელია, რადგან ოპოზიციის წარმომადგენლები ყველანაირად ცდილობენ ხელი შეუშალონ ქვეყანაში ინვესტიციების შემოდინებას და ქალაქის განვითარებას.

„კოლექტიურ ოპოზიციასთან ქალაქისთვის მნიშვნელოვან პროექტებზე საუბარს აზრი არ აქვს, რადგან ისინი ყველანაირად ცდილობენ ხელი შეუშალონ ქვეყნის განვითარებას, ინვესტიციების შემოდინებას და ახალი პროექტების განხორციელებას. მათ არ მოსწონთ არცერთი პროექტი, რომელიც ქალაქის საკეთილდღეოდ ხორციელდება. ადამიანებთან, რომლებიც მოღალატეობრივ ქმედებებში არიან მხილებულნი, ქალაქის განვითარებაზე საუბარი რთულია. ისინი ლობიზმში იმ მილიონებს იხდიან, რომელიც ჩვენს ქვეყანას მოპარეს. ეს თანხები 2008 წლის ომიდან არის წაღებული,“– განაცხადა გივი ჩხარტიშვილმა.

ქართველ ხალხს სურს, გახდეს ევროკავშირის, ნატო-ს წევრი, ამერიკის შეერთებულ შტატებს კი ნამდვილად დიდ პატივად მიაჩნია და ამაყობს, რომ მხარს უჭერს საქართველოს ამ გზაზე, – ამის შესახებ საქართველოში აშშ-ის ელჩმა, კელი დეგნანმა განაცხადა.

მისივე თქმით, საქართველოს მხრიდან უაღრესად შთამბეჭდავი პროგრესი იხილა.

„ნამდვილად დიდი პატივი იყო, მემსახურა საქართველოში, ამ შესანიშნავ ქვეყანაში ამერიკის შეერთებული შტატების ელჩის თანამდებობაზე. უაღრესად დიდ კეთილგანწყობას ვგრძნობდი სხვადასხვა რეგიონში უამრავი კეთილი ქართველის მხრიდან, რომლებიც მასპინძლობას და კეთილგანწყობას იჩენდნენ ჩემ მიმართ, რომელიც გულიდან მომდინარეობდა, თავიანთი ოჯახების კარს მიღებდნენ, მმასპინძლობდნენ სახლებში, თემებში, მიზიარებდნენ გამოცდილებას, იმედებს, გამოწვევებს და მუდამ ვაფასებდით ამ აზრთა გაცვლას.

მუდამ ვმუშაობდით საქართველოს მხარდასაჭერად, რომელიც მხარს უჭერს უამრავი ქართველის თავდადებას – იქნება ეს არასამთავრობო ორგანიზაციები, სამოქალაქო ორგანიზაციები, სამთავრობო უწყებები, რომლებიც საქართველოს საუკეთესო ინტერესების დასაწინაურებლად მუშაობენ. უკანასკნელი 30-წლიანი პარტნიორობის განმავლობაში ჩვენი მხარდაჭერა ეხმარებოდა საქართველოს, უკეთ დაეცვა საკუთარი საზღვრები, შეეჩერებინა აგრესია, მოეხდინა ეკონომიკის სტიმულირება, რაც ხელს შეუწყობდა სამუშაო ადგილების შექმნას, რომ ქართველებს ჰქონოდათ შესაძლებლობა, ენახათ მომავალი თავისი ქვეყნისთვის, თავისი თემებისთვის. ეს, მთლიანობაში, ხელს შეუწყობდა საქართველოს ეკონომიკის გაძლიერებას და ხელს ვუწყობდით საქართველოს მდგრადი, გამძლე, დემოკრატიული ინსტიტუტების შექმნაში. ეს არის ქართველი ხალხის მკაფიო არჩევანი. მათ სურთ, გახდნენ ევროკავშირის, ნატო-ს წევრები, ამერიკის შეერთებულ შტატებს კი ნამდვილად დიდ პატივად მიაჩნია და ამაყობს, რომ მხარს უჭერს საქართველოს ამ გზაზე.

ჩვენ ვიხილეთ უაღრესად შთამბეჭდავი პროგრესი საქართველოს მხრიდან. ვგეგმავთ, გავაგრძელოთ ამ პროცესის მხარდაჭერა. ნამდვილად წუხილს გამოვხატავ, რომ მიწევს საქართველოს დატოვება. დარწმუნებული ვარ, ყველა, ვინც ჩემამდე მუშაობდა ჩემს თანამდებობაზე, ამავეს გრძნობდა. დამშვიდობება მიწევს საქართველოს მრავალ მოქალაქესთან, ვისთანაც ჩამომიყალიბდა მეგობრობა, ვინც მეხმარებოდა ამ უნიკალური კულტურის, უნიკალური ქვეყნის ტრადიციების ისტორიის გაგებაში. თან წავიღებ შესანიშნავ მოგონებებს. ნამდვლად მეღიმება ხოლმე, როგორც კი ვიხსენებ ჩემს მეგობრებს თუშეთში, რაჭაში, სვანეთში, აჭარაში, სამცხე-ჯავახეთში, ქვეყნის ყველა რეგიონში, იმერეთში – ვიხსენებ შესანიშნავ გამოცდილებას, მათი მხრიდან გამოწვდილ ხელს ჩემი და ჩემი კოლეგების მიმართ. ჩვენ ვამაყობთ იმ პარტნიორობით, რომელიც ამერიკასა და საქართველოს 30 წლის განმავლობაში აქვთ. ჩემთვის ეს შესაძლებლობაა, დაგემშვიდობოთ, მაგრამ აგრეთვე გამოვხატო უღრმესი მადლიერება ყველა ქართველის მიმართ, ვინც ასეთ სითბოს, მხარდაჭერას იჩენდა და ნამდვილად ამერიკის მეგორები არიან“, – განაცხადა კელი დეგნანმა.

თბილისის საკრებულოში, სადაც დედაქალაქში დაგეგმილ მშენებლობებთან დაკავშირებით, სხდომა მიმდინარეობს, ოპოზიცია ითხოვს, რომ გარკვეული პროექტები არ განხორციელდეს.

“შეაყარე კედელს ცერცვი”- ეს არის თქვენი მმართველობის ცენტრალური გამოვლინება. ეს სისტემა, ეს კედელი ერთხელ და სამუდამოდ უნდა დაინგრეს. ჩვენი სიტყვები ასე აბუჩად ასაგდები თუ არის, ამას ძალიან მალე ხალხი გაჩვენებთ”, – მიმართა საკრებულოს უმრავლესობის წევრებს პარტია “ხალხისთვის” წარმომადგენელმა ნინო წულაძემ.

“სხდომიდან სხდომამდე პერფორმანსებს ხვეწთ”, – უპასუხა წულაძეს საკრებულოს თავმჯდომარე გიორგი ტყემალაძემ.

ამასთან, ტყემალაძის თქმით, ოპოზიციის წარმომადგენლები უმეტეს შემთხვევაში არიან პოლიტიკურად ანგაჟირებულნი და ხშირად პოზიციას ამ კონტექსტში გამოხატავენ.

თბილისის საკრებულოში სხდომაზე დეპუტატები დედაქალაქში დაგეგმილ სამშენებლო პროექტებს განიხილავენ, რომელთაგან ხუთს ოპოზიცია ეწინააღმდეგება. პროექტებს შორისაა “ლაგუნა ვერეს” ტერიტორიაზე დაგეგმილი მშენებლობა, ალექსიძის ქუჩაზე, King David-ის მიმდებარედ 40-სართულიანი შენობის პროექტი, ჭავჭავაძის გამზირზე მულტიფუნქციური სასტუმრო-ცათამბჯენის და დიდ დიღომში, ახალი უბნის მშენებლობის საკითხი.

სამწუხაროდ, მივიჩნევ, რომ მიზნობრივი კამპანია მიმდინარეობს, რაც მიმართულია საქართველოს ევროკავშირისკენ მიმავალი გზისთვის ძირის გამოთხრაზე, – ამის შესახებ საქართველოში ამერიკის შეერთებული შტატების ელჩმა, კელი დეგნანმა დღევანდელ პრესკონფერენციაზე განაცხადა.

როგორც კელი დეგნანმა აღნიშნა, აშშ ეხმარება საქართველოს, რომ განაგრძოს პროგრესი ევროპის გზაზე.

„საქართველოს მოქალაქეების უმრავლესობა კვლავ ერთგულია ამ გზის. იმედი გვაქვს, რომ ამ გზაზე პროგრესი იქნება მომავალშიც. როგორც აღვნიშნე, მნიშვნელოვანი, შთამბეჭდავი მიღწევები არის უკვე გაკეთებული. მრავალ სამინისტროსთან ადგილობრივ დონეზეც ვთანამშრომლობთ, ვეხმარებით იმ ნაბიჯებში, რომლებიც საჭიროა საქართველოს მიერ ევროკავშირისა და ნატო-ს წევრობის დასაკმაყოფილებლად. გვსურს, საქართველოს ჰქონდეს წარმატება ამ მისწრაფებაში. ზუსტად ამიტომაც ვთანამშრომლობთ საქართველოსთან ასე მჭიდროდ ათწლეულების განმავლობაში. ჩვენ განვაგრძობთ საქართველოსთან თანამშრომლობას ამ გზაზე. ჩვენ ერთგულები ვართ საქართველოში წარმატებისა. პოლიტიკოსები – პოლიტიკოსები არიან. პირადად არ ვიღებ ნამდვილად, რასაც ამბობენ ჩემ შესახებ. მივიჩნევ, რომ არიან ადამიანები, ვინც ზედმეტ ემოციას იჩენს. ფოკუსი, კონცენტრაცია უნდა იყოს სამუშაოს შესრულებაზე. გაწერილია საგზაო რუკა, გადასადგმელია კონკრეტული ნაბიჯები, მთავრობისა და პოლიტიკის შემქმნელები თუ გაჰყვებიან ამ საგზაო რუკას, რომელიც მათ მიეცათ, და ინკლიზიურ პორცესს, ეს დაადასტურებდა იმ ერთგულებას, რომელსაც პოლიტიკური ლიდერები იჩენენ საქართველოში, რომ შეასრულონ საკუთარი მოსახლეობის მოთხოვნა, გადავიდნენ, სულ მცირე, შემდგომ ნაბიჯზე ევროკავშირის წევრობის. ეს პოლიტიკურ სიმამაცესაც ითხოვს ამ რთული სამუშაოს შესასრულებლად. რეფორმები რთულია და ყველამ იცის ეს. სამწუხაროდ, მივიჩნევ, რომ მიზნობრივი კამპანია მიმდინარეობს, რაც მიმართულია საქართველოს ევროკავშირისკენ მიმავალი გზისთვის ძირის გამოთხრაზე“, – განაცხადა ელჩმა.

მისივე თქმით, ქართველები შეჩვეული არიან და პრორუსული დეზინფორმაციის კამპანიის მომსწრენი ყოფილან ადრეც.

„ფაქტობრივად, შეტევა ხორციელდებოდა მრავალი წლის განმავლობაში, თუ არა ათწლეულების განმავლობაში საქართველოს მოქალაქეებზე. დარწმუნებული ვარ, ჭეშმარიტება ქართველებისთვის არის ხელმისაწვდომი. მედია ამას ხელს უწყობს და საქართველოს მოქალაქეები ინფორმირებულ არჩევანს გააკეთებენ. არ შევხვედრივარ იმ ადამიანებს, ვინც კომენტარს აკეთებენ ჩემზე. ისინი არ შემხვედრიან და პირადად ვერ მივიღებ ნამდვილად, თუმცა მივიჩნევ, რომ ძალზედ მნიშვნელოვანია, ისინი, ვინც ცდილობენ, რომ დააბნიონ ქართველები, ვინც ცდილობენ, გაყონ ეს საზოგადოება ან შეინარჩუნონ ეს გაყოფა და პოლარიზაცია, ეს ადამიანები გვერდით გავწიოთ. საქართველოს მოქალაქეებმა სიმართლე უნდა მოისმინონ. არ ვთვლი, რომ ვინმეს უნდა ეშინოდეს სიმართლისა. იმედი მაქვს, მედია გააგრძელებს საზოგადოებისთვის დაბალანსებული, ზუსტი ინფორმაციის, ანგარიშისა და ცნობების მიწოდებას. ეს ძალზედ მნიშვნელოვანი როლია დემოკრატიისთვის“, – განაცხადა დეგნანმა.