„ნაციონალური მოძრაობის“ თავმჯდომარე ლევან ხაბეიშვილი პარტიის თავმჯდომარეობიდან მის შესაძლო გადაყენებაზე გავრცელებულ ინფორმაციას პასუხობს.
ხაბეიშვილის თქმით, აღნიშნულზე საუბარი სირცხვილია.
„სიგიჟეა, სირცხვილია. შვიდი ენა რომ იცის, ის კაცი მძევლად გყავთ აყვანილი“, – აღნიშნა ხაბეიშვილმა.
დღეს გავრცელდა ინფორმაცია, რომ, შესაძლოა, „ნაციონალური მოძრაობის“ თავმჯდომარეობიდან ლევან ხაბეიშვილი გადააყენონ და ამის მიზეზად ინგლისურის არცოდნა სახელდება.
ოპოზიციონერმა დეპუტატმა ხატია დეკანოიძემ პარლამენტის თავმჯდომარე შალვა პაპუაშვილს მიმართა და მოუწოდა, რომ სასამართლო სისტემასთან დაკავშირებით საგამოძიებო კომისიის შექმნის საკითხი დღევანდელი პლენარული სხდომის დღის წესრიგში შეეტანათ.
„სამწუხაროა, „ქართული ოცნება“ ისევ კრემლის პროპაგანდას იმეორებს და ამბობს, რომ ომი საქართველომ დაიწყო. ეს ნამდვილად ძალიან მძიმე და საქართველოს ეროვნული ინტერესებისთვის საზიანოა. თქვენთვის ეს ინტერესები მნიშვნელოვანი არასოდეს ყოფილა, მხოლოდ პარტიული ინტერესი გქონდათ და ასევე, იმ ადამიანის ინტერესს აკმაყოფილებდით, რომელსაც უსაფრთხოებასა და ეროვნულ ინტერესთან არანაირი საერთო არ აქვს. ჰააგის სასამართლოს გადაწყვეტილების შემდეგ, ამ დარბაზში კიდევ ისმის, რომ საქართველოში დაიწყო ომი. ეს სამარცხვინოა, განსაკუთრებით 24 თებერვლის შემდეგ.
რაც შეეხება კანონის უზენაესობას, ვფიქრობ, რომ დროში აბნეულები ხართ. 2012 წელს თქვენი გუნდი სწორედ ადამიანის უფლებების დაცვის, სხვადასხვა ღირსების დაცვის პრინციპით მოვიდა ხელისუფლებაში. მაშინ საზოგადოება გირგვლიანის საქმეზე და ა.შ. სასამართლოს სამართლიანად აკრიტიკებდა და აღმოჩნდა, რომ სწორედ ის ადამიანები, რომლებიც მაშინ მსგავს კრიტიკულ საქმეებში ფიგურირებდნენ, გადმოიყვანეთ, გულში ჩაიხუტეთ, „კლანი“ გაანოყიერეთ. არ დაგავიწყდეთ, რომ ეს ადამიანები ჩვენი დასავლელი პარტნიორებისთვისაც მიუღებლები არიან.
„კლანის“ მოსამართლეებისთვის სანქციების დაწესება ნიშნავს იმას, რომ საქართველოში კანონის უზენაესობა და მართლმსაჯულება არ არსებობს. დავით მათიკაშვილი რამდენიმე წუთის წინ გამოგონილი გზავნილებით საუბრობდა. ბატონო დავით, სუს-ის კრებსებში მოხვდა ის, როგორ დავდიოდი მე ექიმთან, როგორ ვესაუბრებოდი დედაჩემს, რას ველაპარაკებოდი ჩემს შვილს. როგორ გგონიათ, გვჯერა, რომ თქვენ „ქოლ ცენტრების“ არსებობის შესახებ არ იცოდით? თქვენ ფარავდით ორგანიზებულ დანაშაულს და 13000-მდე ახალგაზრდა ჩართეთ მასში. ყველაფერი, რაც ოპოზიციას ეხება, ნებისმიერი პირადი საუბარი, სუს-ის მიერ კონტროლირებადია. ახლა მაინტერესებს, როგორ აღმოჩნდა, რომ ამხელა ორგანიზებული დანაშაული არსებობდა და თქვენ არ იცოდით.
ბატონო შალვა, მოგიწოდებთ, რომ საგამოძიებო კომისიის საკითხი გამოიტანოთ. რამდენიმე წლის წინ, ორი შვილის ახალგაზრდა დედა მოსამართლე ჩხიკვაძემ ციხეში 6 თვით არაფრისთვის გაუშვა. ეს ქალი ახლა სასჯელს იხდის მაშინ, როდესაც ფარცხალაძე 5000- ლარიანი გირაოთი გამოუშვით. ჰკითხეთ მოსამართლე ჩხიკვაძეს, რატომ გაუშვა 2 შვილის დედა ციხეში 6 წლით. სწორედ ასეთი მოსამართლეების გამოსავლენად უნდა შეიქმნას საგამოძიებო კომისია“, – განაცხადა ხატია დეკანოიძემ.
„ძალიან გეშინიათ დროებითი კომისიის და ცდილობთ, რაღაც ხრიკებით როგორმე კენჭისყრა გადაავადოთ, მაგრამ ვერაფერი გიშველით“, – ამის შესახებ დეპუტატმა რომან გოცირიძემ პარლამენტის პლენარული სხდომაზე განაცხადა.
გოცირიძემ ხელისუფლებას მოუწოდა, რომ სასამართლოში სისტემურ პრობლემებთან დაკავშირებით საგამოძიებო კომისიის შექმნის კენჭისყრა დროულად ჩაატარონ.
„ამერიკის მთავრობის მიერ მოსამართლეების დასანქცირება, ეს არის მხოლოდ დასაწყისი, ამიტომ, როგორც იტყვიან, ჩათრევას ჩაყოლა ჯობია. ნუ გადადებთ კენჭისყრას, შევქმნათ დროებითი კომისია, რომელშიც იქნება პოლიტიკური მართლმსაჯულებისა და კორუმპირებული კლანის კიდევ უფრო მხილება“, – განაცხადა გოცირიძემ.
ცნობისთვის, ოპოზიციონერი დეპუტატები სასამართლოში სისტემურ პრობლემებთან და კორუფციასთან დაკავშირებით საგამოძიებო კომისიის შექმნას ითხოვენ.
„ნაციონალური მოძრაობის” პოლიტსაბჭოს თავმჯდომარის, დეპუტატ ლევან ბეჟაშვილის განცხადებით, ნიკა მელიას მიერ გახსნილი ახალი ოფისი პარტიული ბიუჯეტიდან არ დაფინანსდება.
როგორც ბეჟაშვილმა ჟურნალისტებს განუცხადა, ცალკე ოფისი პარტიულ სტრუქტურად ვერ მოიაზრება და ის, შესაძლოა, პირადი ეგოს დაკმაყოფილებას ემსახურებოდეს.
„ერთიანი ნაციონალური მოძრაობის”არანაირი ცალკე ოფისი პარტიული ბიუჯეტიდან არ და ვერ დაფინანსდება. პარტიას აქვს ცენტრალური და რეგიონალური ოფისები. პარტია ერთიანი, სტრუქტურული ორგანიზმია, პარტიაში გადაწყვეტილებას იღებს პარტიის ახლად არჩეული თავმჯდომარე, სამდივნო და აღმასრულებელი ორგანოები. ამიტომ, ცალკე რაიმე სეპარატისტული ოფისების შექმნა შეიძლება ემსახურებოდეს პირადი ეგოს დაკმაყოფილებას – ოფისი, კაბინეტი და ა.შ. მაგრამ პარტიის სტრუქტურად ეს ვერ მოიაზრება.
ნებისმიერი თავდასხმები “ნაციონალურ მოძრაობაზე”, სეპარატიზმი, ბუნებრივია, არ ემსახურება პარტიის ინტერესებს, ამიტომ მნიშვნელოვანია, ყველამ გავითავისოთ, რომ არჩევნები დამთავრდა. პარტიას ხელმძღვანელი ორგანოები ჰყავს. მოსწონს ეს ვინმეს თუ – არა, ეს დადგენილი წესია, რომელსაც პარტიის ყველა წევრი უნდა დაემორჩილოს”,- განაცხადა ლევან ბეჟაშვილმა.
რაც შეეხება პარტიის ზოგიერთი წევრის მოსაზრებას, რომ „ნაციონალურ მოძრაობაში” ვადამდელი არჩევნები უნდა ჩატარდეს, ბეჟაშვილი ამბობს, რომ აღნიშნული სუბიექტებისგან სეპარატიზმის მცდელობაა, რადგან ისინი არჩევნების შედეგებს ვერ ეგუებიან.
„ადამიანები უნდა შეეჩვიონ იმას, რომ არჩევნებმა გადაწყვიტა პარტიის ხელმძღვანელობის და თავმჯდომარის ლეგიტიმურობის საკითხი. ცალკე ოფისების ნოსტალგია გვერდზე უნდა გადაიდოს და ყველა ნაბიჯი უნდა გადაიდგას ერთიანობისთვის. თავდასხმები, სეპარატიზმის მცდელობა მომდინარეობს სხვა სუბიექტებისგან და ისინი არ ეგუებიან არჩევნების შედეგებს. ამიტომ საუბრობენ ვადამდელ არჩევნებზე. უნდა მიიღონ არსებული რეალობა, წინააღმდეგ შემთხვევაში, თუ მათ სხვა პოლიტიკური გეგმები აქვთ, „ნაციონალური მოძრაობა” ხელს ვერ შეუშლით”,- განაცხადა ლევან ბეჟაშვილმა.
გარდა ამის, ლევან ბეჟაშვილმა უპასუხა კითხვას გავრცელებულ ინფორმაციაზე, რომ „ინგლისური ენის არცოდნის გამო პარტიის თავმჯდომარეობიდან ხაბეიშვილის გადაყენება იგეგმება და ამ პოსტზე ლევან ბეჟაშვილისა და პეტრე ცისკარიშვილის კანდიდატურები განიხილება”. ბეჟაშვილი ინფორმაციას არ ადასტურებს.
„ინფორმაციას არ ვადასტურებ, აბსოლუტურად შეუსაბამოა რეალობასთან და არ ვიცი, რას ემსახურება ამ საკითხის წინ წამოწევა”,- განაცხადა ლევან ბეჟაშვილმა.
საქართველოს ყოფილი პრეზიდენტის, მიხეილ სააკაშვილის დედის, გიული ალასანიას განცხადებით, სააკაშვილი ისეა დასუსტებული, რომ ფეხზე ვერ დგება.
ალასანიამ კიდევ ერთხელ აღნიშნა, რომ ოჯახი და დაცვის მხარე მიხეილ სააკაშვილისთვის სასჯელის დროებით გადავადებას ითხოვს.
„მოვითხოვთ სასჯელის დროებით გადავადებას. ჩემთვის სრულიად გაურკვეველი სასჯელის დროებით გადავადებაზეა აქ საუბარი, რომ ადამიანს შესაძლებლობა მიეცეს, ჯანმრთელობა აღიდგინოს. ამ საავადმყოფოში ასეთი შევიდა, ახლა როგორც არის?
საშინელი სისუსტე აქვს, ფეხზე ვერ დგება. რა ვიცი, რა გითხრათ. სიცხე და წნევაც სულ აქვს, როგორც წესი“, – აღნიშნა გიული ალასანიამ.
სასამართლოსთან დაკავშირებით დროებითი საგამოძიებო კომისიის შექმნის საკითხზე კენჭისყრა პარლამენტში დღეს არ ჩატარდება.
როგორც ჟურნალისტებს პარლამენტის საპროცედურო საკითხთა კომიტეტის თავმჯდომარემ, ირაკლი ქადაგიშვილმა განუცხადა, კენჭისყრა ხვალ ჩატარდება.
„ოპოზიციას მობილიზაციის პრობლემა თუ აქვს, ეს არავის პრობლემა არ არის. მიმაჩნია, რომ საგამოძიებო კომისია იქმნება პოლიტიკური ჩარევის ინსტრუმენტად სასამართლო ხელისუფლებაში. ალბათ ოპოზიციის დიდი ნაწილის მხრიდან მცდელობა იქნება იმის, რომ 12 რეკომენდაციის ერთ-ერთი პუნქტი, რომელიც სასამართლოს ეხება, მაქსიმალურად დააზიანონ. დარწმუნებული ვარ, რომ ამ კომისიის მუშაობის შედეგი იქნება ის, რომ ის პროპაგანდა, რომელიც ამ წლების განმავლობაში ჰქონდათ გაშლილი სასამართლო ხელისუფლების დაზიანებისთვის, აღმოჩნდება, რომ არის ჩვეულებრივი პროპაგანდა, რომლის უკან არანაირი ფაქტები არ არის“, – განაცხადა ქადაგიშვილმა.
იმისთვის, რომ ოპოზიციამ სერიოზულობა კიდევ ერთხელ აჩვენოს დღეს საზოგადოებას, იქნებ თავი შეიწუხოს ოპოზიციის წევრებმა და დღესაც გამოცხადდნენ სხდომაზე, ხვალაც გამოცხადდნენ და ზეგაც, – ასე უპასუხა პარლამენტის თავმჯდომარე შალვა პაპუაშვილმა „რესპუბლიკური პარტიის“ ლიდერ ხათუნა სამნიძეს მის მიერ ბიუროს სხდომაზე დაყენებულ ინიციატივასთან დაკავშირებით, რომ სასამართლო სისტემაში კორუფციული ფაქტების გამოსაძიებლად საგამოძიებო კომისიის შექმნა კენჭისყრაზე დღესვე დადგეს.
შალვა პაპუაშვილის თქმით, აღნიშნული ინიციატივა დღის წესრიგშია, თუმცა კენჭისყრაზე დღეს არ გავა. აღნიშნულს ბიურო სხდომაზე ხმაური მოჰყვა.
შეგახსენებთ, რომ სასამართლო სისტემაში კორუფციული და სხვა კანონის საწინააღმდეგო ქმედებათა შემსწავლელი დროებითი საგამოძიებო კომისიის შექმნის საკითხს პარლამენტში ოპოზიცია აყენებს.
ხაბეიშვილი აირჩიეს იმისთვის, რომ ერთგვარი გარდამავალი ფიგურა ყოფილიყო ნიკანორ მელიადან კეზერაშვილის პირდაპირ კანდიდატობამდე, – ამის შესახებ, საპარლამენტო უმრავლესობის წევრმა ბექა დავითულიანმა განაცხადა.
„თავიდანვე ცხადი იყო, რომ ხაბეიშვილი იყო დროებითი ფიგურა. ძალიან ღრმა და სერიოზული არ იყო მისი არჩევა. ეს ხდებოდა იმისათვის, რომ ერთგვარი გარდამავალი ფიგურა ყოფილიყო ნიკანორ მელიადან კეზერაშვილის პირდაპირ კანდიდატობამდე. „ნაციონალურ მოძრაობას“ არ შეუძლია დემოკრატიულ გარემოში ოპერირება“, – აღნიშნა დავითულიანმა.
„ნაციონალურ მოძრაობაში“ თავმჯდომარის პოსტზე ლევან ხაბეიშვილის ლეგიტიმაცია ისევ კითხვის ნიშნის ქვეშ დგება. ორად გაყოფილ პარტიაში ახალი თავმჯდომარის საქმიანობით უკმაყოფილო მელიას გუნდი ღიად მიანიშნებს, რომ ლევან ხაბეიშვილი საარჩევნოდ გაცემულ დაპირებებს ვერ ასრულებს, რაც შესაძლოა პარტიაში ახალი არჩევნების ჩატარების საფუძველი გახდეს.
თბილისის ქუჩები სისტემატურად მოირეცხება. ამის შესახებ დედაქალაქის მერმა, კახა კალაძემ “ფეისბუქზე“ ვიდეო ჩართვისას განაცხადა.
როგორც დედაქალაქის მერი განმარტავს, საჭიროების შემთხვევაში, იმისთვის, რომ ბევრი ქუჩა მოირეცხოს, სახანძრო-სამაშველო სამსახურის მანქანებსაც გამოიყენებენ.
„მინდა მოგაწოდოთ ინფორმაცია ახალ პროექტზე. პროექტი გულისხმობს ქალაქში დასუფთავების სამუშაოებს. ორშაბათიდან კარგი ამინდია და შეგვიძლია დავიწყოთ აღნიშნული სამუშაოების წარმოება, რომელიც მიზნად ისახავს ქუჩების მორეცხვას და დასუფთავებას, ამას სისტემატური ხასიათი უნდა მიეცეს. ზაფხულის ცხელ დღეებში მნიშვნელოვანია ქუჩები ირწყვებოდეს და სუფთავდებოდეს. ყველაფერი მაქსიმალურად მოწესრიგებული უნდა იყოს – საავტომობილო გზები, ტროტუარები.
მინდა ანდრია ბასილაიას (მერის მოადგილე) დავავალო ამ პროექტის განხორციელება. თუ აუცილებლობა მოითხოვს, შეგვიძლია ვთხოვოთ შინაგან საქმეთა სამინისტროს და საგანგებო სიტუაციების მართვის სამსახური დაგვეხმარება, გამოიყენეთ სახანძრო მანქანები იმისთვის, რომ ბევრ ქუჩაზე მოვახერხოთ შესვლა და დასუფთავების სამუშაოების წარმოება. ისე მოამზადეთ პროექტი, რომ 24 აპრილიდან დავიწყოთ სამუშაოების განხორციელება“,- აღნიშნავს კალაძე.
თავის მხრივ, როგორც „თბილსერვის ჯგუფის“ დირექტორი დავით ფაჩულია განმარტავს, პროექტი მთელი ზაფხულის განმავლობაში განხორციელდება და ყოველდღე 100-ზე მეტი ქუჩა მოირეცხება. სამუშაოებით 00:00 საათიდან 07:30 საათამდე გაგრძელდება.
American Idol-ის ტურში, ქართველი მომღერლის ნუცა ბუზალაძის შთამბეჭდავ გამოსვლას „ბრავო რეკორდსის“ დამფუძნებელი, ზაზა შენგელია სოციალურ ქსელში აფასებს.
„ნუცამ ჰავაის ტურში ნამდვილი ფურორი მოახდინა! როგორც მოგეხსნებათ, 24 მონაწილე 2 დღის განმავლობაში, 2 ნაკადად გამოდიოდა (12 მონაწილე 16 აპრილს, 12 მონაწილე 17აპრილს). ნუცა თავის დღეს, ანუ 17 აპრილს, მისი გამოსვლის ვიდეო ნახვებით ამ წუთისთვის პირველ ადგილზეა (300 000 ნახვა) და უნდა ვივარაუდოთ, რომ, შესაბამისად, ბევრ ხმებსაც დააგროვებს და გადავა მომდევნო ტურში.
ნუცას გამოსვლის შეფასებები არაერთგვაროვანია. რასაც ვაკვირდები ამერიკული აუდიტორიის პროფაილებს, რომლებიც ნუცას გამოსვლაზე კომენტარებს ტოვებენ, უფრო განათლებული და რესპექტაბელური აუდიტორია აღფრთოვანებულია ნუცას გამოსვლით და, შესაბამისად, პოზიტიური შეფასებები აქვთ, ამერიკის დაბალი კლასი და სოფლად მცხოვრები აუდიტორია უფრო კრიტიკულია მის მიმართ, რაც ასევე აბსოლუტურად ახსნადი და გასაგებია…
მადლობა ყველას, ვინც არ დაიზარა და მისცა ხმა ნუცას და კიდევ მარაგში გვაქვს დაახლოებით 3,5 საათი (საქართველოს დროით 14:00-მდე) ხმის მისაცემად.
ჩემი პროგნოზი: ნუცა, ჩემი აზრით, გადასულია მომდევნო ტურში და ამას მთელს საქართველოს ვულოცავ! თუმცა, ვფიქრობ, ნუცამ მომდევნო ტურისთვის უფრო „სწორი“ სიმღერა უნდა შეარჩიოს, მით უფრო, რომ „რედნეკები“’ ლუპით აკვირდებიან მისი გამოსვლის ყველა დეტალს და ესეც ბუნებრივია.
მომდევნო ორი ტური, როგორც ვიცი, ზედიზედ ხვალ და ზეგ, ანუ 19 და 20 აპრილს გაიმართება, რის შემდგომაც კონკურსში მთლიანობაში 12 მონაწილე დარჩება და ყველაზე მეტად სწორედ ამ ტურებში დასჭირდება დახმარება. დეტალებს უახლოეს პერიოდში მოგაწვდით“, – წერს ზაზა შენგელია სოციალურ ქსელში.
რუსეთის საოკუპაციო ძალების წარმომადგენლებმა ქარელის მუნიციპალიტეტის სოფელ დვანის მიმდებარე ოკუპირებულ ტერიტორიაზე უკანონოდ დააკავეს საქართველოს მოქალაქე. ინფორმაციას ამის შესახებ სახელმწიფო უსაფრთხოების სამსახური ავრცელებს.
როგორც სუს-ში აცხადებენ, უკანონოდ დაკავების შესახებ ინფორმაციის მიღებისთანავე, სახელმწიფო უსაფრთხოების სამსახურის მიერ გააქტიურდა ევროკავშირის სადამკვირვებლო მისიის მიერ ოპერირებული ცხელი ხაზი.
„ინციდენტის შესახებ დაუყოვნებლივ ეცნობა საერთაშორისო პარტნიორებსა და ჟენევის საერთაშორისო დისკუსიების თანათავმჯდომარეებს.
ამოქმედებულია ყველა არსებული მექანიზმი უკანონოდ დაკავებული საქართველოს მოქალაქის უმოკლეს ვადებში გასათავისუფლებლად.
საქართველოს ოკუპირებულ ტერიტორიებზე, ისევე როგორც საოკუპაციო ხაზის გასწვრივ ჩადენილ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას“, – აღნიშნულია სუს-ის ინფორმაციაში.
ბრწყინვალე შვიდეულის სამშაბათს, გორში ტრადიციულად ოქონობას აღნიშნავენ. დღესასწაული ოქონის ხატს უკავშირდება, რომელიც მე-12 საუკუნიდან გორის მფარველად მიიჩნეოდა.
ოქონის მშენებარე ტაძარში ატენისა და გორის მიტროპოლიტი ანდრია სადღესასწაულო წირვას აღავლენს.წირვის შემდეგ კი ქალაქის ქუჩებში ტრადიციული მსვლელობა გაიმართება. სასულიერო პირები მოსახლეობას დალოცავენ და ქუჩებს აკურთხებენ.
ოქონობის დღესასწაული ატენისა და გორის მიტროპოლიტ ანდრიას ლოცვა-კურთხევით 2004 წელს აღდგა და წელს მეჩვიდმეტედ აღინიშნება.
მის: ქ.თბილისი, მ.კოსტავას 59
ტელ: +995 32 93 44 05
ელ.ფოსტა: editor@geotimes.ge
© Geotimes.ge | By view.ge