ფინანსთა მინისტრ ლაშა ხუციშვილის განცხადებით, მიზნობრივი ჯგუფების სოციალური დახმარებებისთვის გამოყოფილი მილიარდ 519 მილიონი ლარიდან 578 მილიონი ლარი მიიმართება სოციალურად დაუცველთა ბაზაში 16 წლამდე ასაკის ბავშვების დახმარებებზე.

აღნიშნულის შესახებ ფინანსთა მინისტრმა პარლამენტში „მინისტრის საათის“ ფორმატში გამოსვლისას ისაუბრა.

„მოგეხსენებათ, აღნიშნული დამხარება თითოეულ ბავშვზე 2020 წელს შეადგენდა 50 ლარს, ხოლო წელს პირველი ივლისიდან მისი ოდენობა 4-ჯერ არის გაზრდილი და 200 ლარს შეადგენს. გარდა ბავშვთა დახმარებისა, სოციალურად დაუცველი ოჯახების დახმარებებისთვის გათვალისწინებულია 267 მილიონი ლარი. გასულ წელს, პარლამენტის მიერ დამტკიცებული საკანონმდებლო ცვლილებების გათვალისწინებით, სახელმწიფო პენსიის შესაბამისად, იზრდება შეზღუდული შესაძლებლობის მქონე პირთა სოციალური გასაცემლებიც, კერძოდ, 18 წლამდე ასაკის, ასევე, მკვეთრად გამოხატული შეზღუდული შესაძლებლობის მქონე პირთა გასაცემელი იზრდება 50 ლარით, ხოლო დანარჩენი კატეგორიების გასაცემელი 20 ლარის ოდენობით; ჯამში, შეზღუდული შესაძლებლობის მქონე პირთა გასაცემლებზე 2024 წელს მიიმართება 365 მლნ ლარზე მეტი“, – განაცხადა ლაშა ხუციშვილმა.

მისი თქმით, მიზნობრივი სოციალური დახმარებების ფარგლებში, 2024 წელს, ასევე, იზრდება საყოფაცხოვრებო სუბსიდიის მოცულობაც.

„საყოფაცხოვრებო სუბსიდიის მიმღები ძირითადი კატეგორია პოლიტიკური რეპრესიების მსხვერპლთა ოჯახის წევრები, ასევე, 9 აპრილს დაზარალებულები არიან. აღნიშნული საკითხი დაყენებულ იქნა ბიუჯეტის პირველადი ვარიანტის განხილვისას და გადამუშავებულ ვარიანტში გათვალისწინებულია სუბსიდიის ზრდა. მოგეხსენებათ, საყოფაცხოვრებო სუბსიდია თანხობრივად დაყოფილია 3 კატეგორიად და მომდევნო წელს დაგეგმილია სამივე კატეგორიის გაზრდა, კერძოდ: 7- ლარიანი სუბსიდია იზრდება 40 ლარამდე; 22 ლარიანი სუბსიდია განისაზღვრება 60 ლარით; 44 ლარიანი სუბსიდია იზრდება 80 ლარამდე.

გარდა ზემო აღნიშნულისა, სოციალური დახმარებების ფარგლებში, მნიშვნელოვანი ახალი პროგრამაა გათვალისწინებული. სამწუხაროდ, დღეს ჩვენს ქვეყანაში პირველადი შეფასებით, ათასამდე მრავალშვილიანი ოჯახი ცხოვრობს, რომელთაც არ გააჩნიათ ნორმალური საცხოვრებელი პირობები. აღნიშნულის გათვალისწინებით, ვიწყებთ ახალ პროგრამას, რომლის ფარგლებშიც, მომდევნო 2 წლის განმავლობაში შესყიდული იქნება მათთვის საჭირო საცხოვრებელი ფართები, სადაც ამ ოჯახებს და მათ მცირეწლოვან ბავშვებს, შეეძლებათ ღირსეულ პირობებში ცხოვრება. 2024 წელს ახალი პროგრამის დასაფინანსებლად გამოყოფილია 25 მილიონი ლარი“, – განაცხადა ფინანსთა მინისტრმა, ლაშა ხუციშვილმა.

გარდა ამისა, ხუციშვილმა ჯანდაცვის პროგრამებზეც ისაუბრა და განაცხადა, რომ 2024 წელს ჯანდაცვის პროგრამების დაფინანსება 100 მილიონ ლარზე მეტით იზრდება და 1 მილიარდ 802 მილიონ ლარს შეადგენს.

როგორც მან აღნიშნა, აღნიშნული თანხის ნახევარზე მეტი, 1 მილიარდ 35 მილიონი ლარი საყოველთაო ჯანდაცვის პროგრამის დაფინანსებას ხმარდება, სადაც 2024 წელს არაერთი მნიშვნელოვანი სიახლეა გაუმჯობესების მიმართულებით, მათ შორის, გაფართოვდება ქრონიკული დაავადებების პროგრამა და პენსიონერები მთელი წლის განმავლობაში უზრუნველყოფილი იქნებიან ყველა ქრონიკული დაავადებისთვის საჭირო მედიკამენტებით; დაიწყება ონკოლოგიური დაავადებების ადრეული დიაგნოსტიკის მიზნით მაღალტექნოლოგიური კვლევების დაფინანსება, რაც ყოველთვის დიდ სირთულეს წარმოადგენდა; ასევე, მედიკამენტების მწარმოებლებთან მიღწეული შეთანხმებით მიღებული ეკონომიის ხარჯზე, შესაძლებელი გახდება გამოყოფილი ლიმიტების ფარგლებში, ონკოლოგიური მკურნალობის სრული კურსის დაფინანსება; გაგრძელდება ონკოლოგიური დიაგნოზის მქონე ბავშვების მკურნალობა საზღვარგარეთ, რაც უზრუნველყოფს მკურნალობის სრულყოფილ კურსზე ხელმისაწვდომობას; პირველადი ჯანდაცვის მიმართულებით, გამოყოფილია 210 მილიონი ლარი, რომლის ფარგლებშიც განხორციელდება სასწრაფო დახმარების პერსონალის ხელფასების 10%-იანი ზრდა, ასევე სოფლის ექიმებისა და ექთნების ანაზღაურების 100 ლარით ზრდა.

მინისტრის განცხადებით, სამედიცინო დაწესებულებების რეაბილიტაციისა და აღჭურვის მიზნით, გამოყოფილია 90 მილიონ ლარზე მეტი. პირველადი ჯანდაცვის განვითარების მიზნით, მომდევნო წელს პროგრამის ფარგლებში, განხორციელდება 100-მდე ამბულატორიის სარეაბილიტაციო სამუშაოები.

სირცხვილია, რომ ერთადერთი დარგი, რომელსაც ფულს არ უმატებთ, ფსიქიკური ჯანდაცვის სფეროა, ჩაგრავთ ყველაზე დაჩაგრულ ადამიანებს, – ასე მიმართა „ევროოპტიმისტების“ ხელმძღვანელმა რომან გოცირიძემ პარლამენტში ფინანსთა მინისტრს, ლაშა ხუციშვილს, რომელიც 2024 წლის ბიუჯეტის პროექტის გადამუშავებულ ვერსიას წარადგენს.

ამასთან, გოცირიძემ ფინანსთა მინისტრს ჰკითხა, თუ რატომ იზრდება ყველა საარჩევნო წელს მთავრობის სარეზერვო ფონდი.

„თქვენი მოხსენებიდან გავიგეთ, რომ ყველას ყველაფერი ეზრდება და ძალიან საამაყოდ მიგაჩნიათ ამ წინასაარჩევნო პერიოდის პოლიტიკური ბიუჯეტის წარმოდგენისას ნათქვამი თქვენი სიტყვები, მაგრამ ერთი პატარა რამე შეგეშალათ. ნუთუ, ერთადერთი დარგი, რომელსაც ზრდა ნული თეთრით აქვს, ეს არის ჯანდაცვის სამინისტროში ფსიქიკური ჯანდაცვის პროგრამა. 50 მილიონი ჰქონდა შარშან, 50 მილიონი ექნება მომავალ წელს, ზრდა – ნული, ჩაგრავთ ყველაზე დაჩაგრულ ადამიანებს. კეთილი ინებეთ და ბიუჯეტის ხელახლა შემოტანის დროს, 10-15 მილიონი გაუზარდეთ, ვინაიდან მომავალ წელს მედიკამენტების და იჯარის ფასებიც გაიზრდება, უარესდება და უარესდება იგივე თუნდაც, მკურნალობის ხარისხი, ვინაიდან ხარისხიანი წამლების ჩანაცვლება ხდება იაფი წამლებით. უბრალოდ, სირცხვილია, რომ ერთადერთი დარგი, რომელსაც ფულს არ უმატებთ, ფსიქიკური ჯანდაცვის სფეროა.

ფაქტობრივად, გაძარცვა ქვეყანა იუსტიციის სამინისტრომ, თითქმის, 300 მილიონი ლარი გაქვთ გადახდილი 2016 წლიდან 2024 წლის ჩათვლით, ადვოკატების მომსახურებაში. რა ხელშეკრულებებს დებთ ისეთებს, რომ საერთაშორისო არბიტრაჟებში და საერთაშორისო სასამართლოებში კომპანიებს ქირაობთ, რომლებმაც, თქვენს მიერ გაფუჭებული საქმეები უნდა გამოასწორონ. შეკითხვა, 80 მილიონი დოლარი – ეს საადვოკატო მომსახურება არაა, ადვოკატმა წაიღო ფული და წააგო – 80 მილიონი დოლარი, რომელიც თქვენ „ინტერრაოსთან“ წააგეთ, ეს ბიუჯეტში რატომ არ არის ჩადებული, რა მოლაპარაკებები გაქვთ ამ „ინტერრაოსთან“, იქნებ გაგვაგებინოთ.

მესამე კითხვა, რატომ იზრდება მთავრობის სარეზერვო ფონდი, ყოველთვის იყო 50, 55, 40 მილიონი ლარი, ახლა 80 მილიონი ლარი გახადეთ. მთავრობის სარეზერვო ფონდის ანალიზს თუ დააკვირდებით, ყოველ სარჩევნო წელს იზრდება“, – განაცხადა გოცირიძემ.

1 აშშ დოლარის ოფიციალური ღირებულება 2.6981 ლარი გახდა. ეროვნული ბანკის მიერ გამოქვეყნებული მონაცემების თანახმად, დღევანდელი ვაჭრობის შედეგად 1 აშშ დოლარის ღირებულება 2.6981 ლარი გახდა. კურსი, რომელიც დღეს მოქმედებდა, 2.6970 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0011 ლარი შეადგინა.

რაც შეეხება ევროს, მისი კურსი 2.8932 ლარია. მაშინ, როცა დღეს მოქმედი კურსი 2.8836 ლარს შეადგენდა. შესაბამისად, ევროს ცვლილებამ 0.0096 ლარი შეადგინა.

დღევანდელი ვაჭრობის შედეგად მიღებული კურსები ძალაში ხვალ შევა.

ფინანსთა მინისტრ ლაშა ხუციშვილის განცხადებით, წლის მეორე ნახევრიდან ფიქსირდება ინფლაციის მკვეთრი დასტაბილურება, რასაც, მისი თქმით, ხელი შეუწყო როგორც მაკროეკონომიკურმა პოლიტიკამ და ფისკალურმა კონსოლიდაციამ, ასევე საერთაშორისო ფასების დასტაბილურებამ, მედიკამენტებზე რეფერენტული ფასების მექანიზმის შემოღებამ და თურქეთის ბაზარზე წვდომამ.

„პანდემიიდან მოყოლებული, მსოფლიოში მიმდინარე მოვლენების გამო, მნიშვნელოვნად დაირღვა მიწოდების ჯაჭვები, რამაც მსოფლიო ბაზრებზე სურსათისა და ენერგომატარებლების მნიშვნელოვანი ზრდა განაპირობა, რაც პოსტპანდემიურ პერიოდში მთელ მსოფლიოში სამომხმარებლო ფასების მნიშვნელოვანი ზრდის მიზეზი გახდა. აქედან გამომდინარე, საქართველოში 2021-2022 წლებში არსებული ინფლაცია, ძირითადად, განპირობებული იყო სურსათისა და უალკოჰოლო სასმელებისა და ტრანსპორტის კომპონენტებით, რომლებმაც მსოფლიო ბაზარზე ფასების კლების გამო, 2023 წელს ინფლაციის ტემპის შემცირებაში უკვე დადებითი გავლენა მოახდინეს“, – განაცხადა ფინანსთა მინისტრმა, ლაშა ხუციშვილმა.