,,ჯერ ნახევარი წელი არკვევდნენ – ლეგიტიმური დეპუტატები არიან თუ არა”- ქართველიშვილი

21:22 - 02/05/2023

საკუთარი რიგებიდან შეარჩიეს ყველაზე „ჭკვიანი და გამოცდილი“ (დავით უსუფაშვილი), რომელმაც А4 ფორმატის ფურცელზე საგულდაგულოდ რაღაც ტექსტი მოამზადა 50 ოპოზიციონერი დეპუტატის ხელმოწერით და რაღაცის მოთხოვნა გადასცა შალვა პაპუაშვილს საგამოძიებო კომისიის შექმნის თაობაზე“, – ასე გამოეხმაურა დღეს პარლამენტის პლენარულ სხდომაზე ოპოზიციის ქმედებებს „ხალხის ძალის“ წევრი დავით ქართველიშვილი.

მისი თქმით, ოპოზიციამ ვერ ისარგებლა კიდევ ერთი შანსით და საკუთარი პროცედურული უფლება ჩააგდო.

„ვინ ვართ, რანი ვართ, სად ვართ, რატომ ვართ, ვაართ კი, როგორ ვართ“ – დღეს ამ საკითხებზე მსჯელობდნენ ერთპროცენტიანი რეიტინგის მქონე ოროსანი დეპუტატები, რომლებმაც ან არ იცოდნენ, ან დაეზარათ, ან სპეციალურად ჩააგდეს თავისივე პროცედურული უფლება და მოვალეობა: ბიუროზე ხელახლა დაერეგისტრირებინათ საკუთარი მოთხოვნა საპარლამენტო კომისიის შექმნის თაობაზე. სესიის მიმდინარეობისას, პარლამენტის თავმჯდომარემაც კი კიდევ ერთი პროცედურული შესაძლებლობა მისცა უიღბლო საპარლამენტო „გამომძიებლებს“ – უშუალოდ მისთვის მიემართათ თავისი „გულისტკივილით“, თუმცა თუ „ფიზიკაში“ ხარ ოროსანი, დიდი ალბათობით ეს ნიჭი „ქიმიაშიც“ გამოგყვება. ვერ ისარგებლეს კიდევ ერთი შანსით.

ასეა თუ ისე – ვერც კომისია შექმნეს და ვერც ამ ტექსტის თავში დასმულ შეკითხვებს უპასუხეს. ამიტომ საკუთარი რიგებიდან შეარჩიეს ყველაზე „ჭკვიანი და გამოცდილი“ (დავით უსუფაშვილი), რომელმაც А4 ფორმატის ფურცელზე საგულდაგულოდ რაღაც ტექსტი მოამზადა 50 ოპოზიციონერი დეპუტატის ხელმოწერით და რაღაცის მოთხოვნა გადასცა შალვა პაპუაშვილს საგამოძიებო კომისიის შექმნის თაობაზე. საკუთარი გამბედაობა უფრო დამაჯერებელი რომ ყოფილიყო, უსუფაშვილი „ქართულ ოცნებას“ დაემუქრა საკონსტიტუციო სასამართლოში ჩივილით „კონსტიტუციის დარღვევის“ გამო, რაზეც პარლამენტის თავმჯდომარემ საბავშვო კონსტიტუციაზე დაყრდნობა ქვეყნის პარლამენტში არასერიოზული უწოდა.

ასე რომ ზემოაღნიშნული კითხვები საკუთარ თავთან, ოპოზიციას კვლავ პასუხგაუცემელი დარჩათ. ჯერ ნახევარი წელი არკვევდნენ – ლეგიტიმური დეპუტატები არიან თუ არა, „გაყალბებული“ თუ „გაუყალბებელი“ არჩევნების შედეგად. ბანკიდან პირველივე სადეპუტატო ხელფასის ჩარიცხვის შესახებ SMS-მა მათი ეჭვები ნაწილობრივ გაფანტა. შემდეგ ზოგიერთი თავისი კოლეგის ხან მანდატის, ხან პარტიული სიების გაუქმების, ხან ბოიკოტის გამოცხადების, ხან ბოიკოტის შეწყვეტის პროცესებს ადევნებდნენ თვალყურს და ამ „ღვაწლში“ რამდენჯერ რა ინიციატივით გამოვიდნენ, იმდენჯერ „ფეხი მოიტეხეს“ ჯერ კიდევ სარეგლამენტო-საპროცედურო სტადიაზე. დღეს სახლში ვინ ვის როგორ შეხვდება არ ვიცი, მაგრამ განრისხებულ კელი ბიცოლას ცოტა ხანი სჯობს არ დაენახონ“, – წერს დავით ქართველიშვილი სოციალურ ქსელში.

„ფაქტ-მეტრის“ ვერდიქტი არის მანიპულირება”- ცერცვაძე

21:04 - 02/05/2023

„მრავალპროფილური ანალიტიკური ცენტრის „ფაქტ-მეტრის“ ვერდიქტით საქართველოს ჯანდაცვის მინისტრის განცხადება, რომ „სახელმწიფოსა და დარგის სპეციალისტების ძალისხმევით C ჰეპატიტის გავრცელება საქართველოში 67%-ით არის შემცირებული“ შეფასებულია, როგორც მანიპულირება იმ საბაბით, რომ C ჰეპატიტის ელიმინაციის პროგრამის სამიზნეები დღემდე ბოლომდე შესრულებული არ არის.

სინამდვილეში სწორედ „ფაქტ-მეტრის“ ვერდიქტი არის მანიპულირება, რომელიც მიზნად ისახავს მთელს მსოფლიოში სამაგალითოდ მიჩნეული C ჰეპატიტის ელიმინაციის პროგრამის დისკრედიტაციას და მოსახლეობის იმაში დარწმუნებას, რომ დღევანდელ საქართველოში და კონკრეტულად ჯანდაცვაში არ შეიძლება რაიმე კარგად ან ძალიან კარგად კეთდებოდეს“, – ამის შესახებ სოციალურ ქსელში ინფექციური პათოლოგიისა და შიდსის ცენტრის დირექტორი თენგიზ ცერცვაძე წერს.

„სადღეისოდ საქართველოში აღნიშნული პროგრამის ფარგლებში C ჰეპატიტზე გამოკვლეულია 2 600 000 უნიკალური პირი, რაც მთლიანი მოზრდილი მოსახლეობის 92%-ს შეადგენს. ნამკურნალევი და განკურნებულია 80 ათასამდე ავადმყოფი (ნამკურნალევ ავადმყოფებში განკურნება 99%-ია, როცა სამიზნე მაჩვენებელი მხოლოდ 95% იყო). საქართველოში არ მოიძებნება სხვა რომელიმე ცალკე აღებული ჯანდაცვითი პროექტი (საყოველთაო ჯანდაცვას თუ არ ჩავთვლით), რომელსაც ამდენი ავადმყოფის სიცოცხლე გადაერჩინოს და მოსახლეობისთვის ამდენი სიკეთე მოეტანოს.

რაც შეეხება კონკრეტულ ფაქტს – მინისტრის განცხადებაში გაჟღერებული ფაქტი, რომ C ჰეპატიტის გავრცელება ქვეყანაში 67%-ით არის შემცირებული, არის არა მანიპულირება, არამედ აბსოლუტური ჭეშმარიტება. კერძოდ: 2015 წელს ამერიკის CDC-ის და საქართველოს NCDC-ის ერთობლივი კვლევით დადგენილი იყო, რომ საქართველოში ქრონიკული C ჰეპატიტი ჰქონდა ზოგადი მოსახლეობის 5.4%-ს, ხოლო 2021 წლის ზაფხულში ჩატარებული ზუსტად იგივე ტიპის კვლევამ უჩვენა, რომ ქრონიკული C ჰეპატიტის გავრცელება მოსახლეობაში იყო სულ 1.8%, ანუ შემცირებული იყო 67%-ით. ამასთან აღსანიშნავია, რომ ბოლო კვლევის შემდეგ თითქმის 2 წელია გასული და ძალიან დიდი ალბათობით სადღეისოდ ქრონიკული C ჰეპატიტის გავრცელება კიდევ უფრო მეტად იქნება შემცირებული. რაც შეეხება პროგრამასთან დაკავშირებულ სხვა მონაცემებს, მინისტრი თავის განცხადებაში მათ საერთოდ არ შეხებია და შესაბამისად, რაიმე მანიპულირებაზე ლაპარაკი ვერ იქნება.

პროგრამის განხორციელებასთან დაკავშირებით კი სინამდვილე ასეთია:

მსოფლიო გამოცდილებით ისეთი მეგაპროექტები, როგორიც C ჰეპატიტის ელიმინაციაა, თავდაპირველად განსაზღვრულ ვადებში ვერასოდეს ეტევა, მაგრამ ამბიციური ორიენტირების დასახვა მიღებული პრაქტიკაა. ჩვენ შემთხვევაშიც ასე იყო. ამერიკულმა მხარემ საქართველოსთან პროგრამის რეალურად შესრულებაზე ხელშეკრულება თავიდანვე, ხაზს ვუსვამ თავიდანვე, გააფორმა არა ხუთი წლის, არამედ ათი წლის ვადით, ანუ 2025 წლამდე (და არა 2020 წლამდე) და სწორედ ამ ვადებში უნდა შესრულდეს პროგრამის სამიზნეები. რაც შეეხება 2020 წელს, ეს იყო საქართველოს ამბიციური პირობითი/წინასწარი ორიენტირები ქვეყნის შიგა მოხმარებისთვის და ძალისხმევის მობილიზებისთვის და არავითარი ვალდებულება 2020 წლისთვის პროგრამის უცხოელი პარტნიორების წინაშე ქვეყანას არ ჰქონია. ასეთი ვალდებულებები ქვეყანას აქვს მხოლოდ 2025 წლისთვის და ეს ოფიციალურად ასახულია პროგრამის სტრატეგიის საბოლოო ვარიანტში.

ცნობისთვის, ჯანმოს ჰეპატიტების გლობალური სტრატეგია მხოლოდ 2030 წლისთვის ითვალისწინებს C ჰეპატიტის ახალი შემთხვევების (ისიც მხოლოდ ახალი შემთხვევევის და არა გავრცელების) შემცირებას 90%-ით. ამასთან ჯანმომ კარგად იცის, რომ ქვეყნების დიდი უმეტესობა ამ ვადებშიც ვერ ჩაეტევა, მაგრამ საჭიროდ თვლის, რომ ამბიციური მიზნები და ორიენტირები იყოს დასახული. სწორედ ამიტომ არის, რომ ჩვენი პროგრამა უწყვეტად გრძელდება და ჩვენი ამერიკელი და საერთაშორისო პარტნიორების მხრიდან (ამერიკის CDC, საერთაშორისო ტექნიკურ მრჩეველთა ჯგუფი – TAG, კომპანია Gilead) რომლებიც პროგრამის უმკაცრეს და დეტალურ მონიტორინგს ახორციელებენ, არცერთ ეტაპზე არცერთი, თუნდაც მინიმალური პრეტენზიაც კი არ გამოთქმულა. პირიქით – ისინი ყველა ეტაპზე თვლიდნენ და თვლიან, რომ პროგრამა მოსალოდნელზე მეტი წარმატებით სრულდება და ეს მიუხედავად იმისა, რომ COVID პანდემიის გამო თითქმის 3 წელი პრაქტიკულად დავკარგეთ. სხვას რომ ყველაფერს თავი დავანებოთ, წარუმატებელი პროგრამისთვის და ცუდი მენეჯმენტის შემთხვევაში კომპანია Gilead ასეთ სერიოზულ ინვესტიციებს აღარ გააგრძელებდა. რა გვაძლევს საფუძველს ვიფიქროთ, რომ C ჰეპატიტის ელიმინაციის პროგრამა 2025 წლისთვის წარმატებით შესრულდება – ის, რომ პროგრამის დაწყებიდან 6 წლის მანძილზე (2015-დან 2021 წლამდე) მოხერხდა ქრონიკული C ჰეპატიტით ავადმყოფთა რაოდენობის 67%-ით (1.8%-მდე) შემცირება და პროგრამის მთავარ სამიზნე ნიშნულამდე (C ჰეპატიტის გავრცელების 90%-ით – ანუ 0.5%-მდე შემცირება 2025 წლისთვის) დარჩენილია მხოლოდ 23% (სადღეისოდ, ალბათ კიდევ უფრო ნაკლები), რისი შესრულებაც დარჩენილ დროში პრობლემას არ წარმოადგენს. ამასთან ძალისხმევა ძირითადად კონცენტრირებულია სწორედ იმ პირებზე, რომელთაც დადგენილი აქვთ C ჰეპატიტის დიაგნოზი, მაგრამ უარს აცხადებენ შემდგომ კვლევებსა და მკურნალობაზე. სამწუხაროდ, ასეთი ავადმყოფები არც თუ ისე ცოტაა. პაციენტების დამყოლობა ერთ-ერთი ყველაზე ძნელი პრობლემაა და არამარტო C ჰეპატიტის და არამარტო საქართველოს შემთხვევაში. აღსანიშნავია, რომ საქართველოსგან განსხვავებით სხვა ქვეყნებში, როგორც წესი, მკურნალობენ მხოლოდ იმ C ჰეპატიტით ავადმყოფებს, რომლებიც თვითონ მიმართავენ ექიმს და გამოთქვამენ გამოკვლევის და მკურნალობის სურვილს. საქართველოში კი ხდება C ჰეპატიტით ავადმყოფების აქტიური გამოვლენა (მოძიება) მთელი მოსახლეობის სკრინინგით, მათ შორის კარდაკარ ჩამოვლით და ყველა გამოვლენილი C ჰეპატიტით ავადმყოფის დარწმუნება, რომ ჩაიტარონ მკურნალობა. სწორედ ეს არის ძირითადი განსხვავება C ჰეპატიტის ელიმინაციასა და C ჰეპატიტის მკურნალობაზე გაფართოებულ ხელმისაწვდომობას შორის. პაციენტთა დამყოლობის გაზრდის მიზნით ჩვენ გავაფართოვეთ სერვისების მიწოდება პირველადი ჯანდაცვის რგოლებსა და სათემო ორგანიზაციებში, რაზეც რამდენიმე წლის წინ ოცნებაც კი არ შეიძლებოდა.

აღსანიშნავია, რომ 2019 წლის 11 აპრილს ქ ვენაში ევროპის ღვიძლის შემსწავლელი ასოციაციის (EASL) ღვიძლის საერთაშორისო ფონდმა საქართველო (პირველად მსოფლიოში) დააჯილდოვა ვირუსული ჰეპატიტების ელიმინაციის ბრწყინვალების ცენტრის (Centre of Excellence in Viral Hepatitis Elimination) სტატუსით. 2021 წელს აშშ CDC-იმ საქართველოს C ჰეპატიტის ელიმინაციის პროგრამის გუნდს გადასცა ჯილდო – აშშ CDC-თან ბრწყინვალე პარტნიორობისთვის (The Excellence in Partnering award from the US CDC to Georgian Hepatitis C Elimination team.), ხოლო 2023 წელს საქართველოს დაავადებათა კონტროლისა და საზოგადოებრივი ჯანმრთელობის ეროვნულ ცენტრში ჯანმოს ვირუსული ჰეპატიტების ელიმინაციის კოლაბორაციული ცენტრი გაიხსნა (ასეთი ევროპაში სულ ორია: ბერლინსა და თბილისში). 2022 წლის 20 სექტემბერს ქ. ნიუ იორკში გაეროს 77-ე გენერალური ასამბლეიის სესიის დღეებში გაიმართა ჰეპატიტების ელიმინაციის გაეროს ქარტიის „მეგობართა ჯგუფის“ დაფუძნების საინიციატივო ჯგუფის მაღალი დონის შეხვედრა, რომლის ძირითადი მიზანი იყო მსოფლიოში C ჰეპატიტის ელიმინაციის, როგორც გლობალური ჯანდაცვის ერთ-ერთი მნიშვნელოვანი პრობლემის გადაჭრის ხელშეწყობა, მათ შორის C ჰეპატიტის ელიმინაციის დარგში ყველაზე წარმატებული ქვეყნების გამოცდილების გაზიარების გზით. შეხვედრაზე C ჰეპატიტის ელიმინაციის დარგში გლობალური ლიდერი ქვეყნის სტატუსით (“Georgia is a global leader in hepatitis C elimination”) მიწვეული იყო საქართველოს ჯანდაცვის მინისტრი ბ-ნი ზურაბ აზარაშვილი, რომელსაც წილად ხვდა პატივი შეხვედრაზე გაეკეთებინა მოხსენება C ჰეპატიტის ელიმინაციის პროგრამის ქართული მოდელის შესახებ და სპეციალური მიმართვით მიემართა მსოფლიო ქვეყნებისთვის C ჰეპატიტის ელიმინაციისათვის ძალისხმევის გაერთიანების მოწოდებით. აღარაფერს ვამბობ ამერიკული მხარის მიერ პროგრამის შესრულებაში მონაწილე დაწესებულებებისა და ცალკეული სპეციალისტებისათვის გაცემულ გრანტებსა და წახალისებებზე, რომლებიც დღემდე გრძელდება.

ელემენტარულია, რომ პროგრამის ცუდად შესრულებისა და ცუდი მენეჯმენტისთვის (როგორც ეს „ფაქტ-მეტრს“ უნდა წარმოადგინოს) ასეთი მაღალ ჯილდოებს და აღიარებას არ იძლევიან. შეადარეთ ყველაზე ავტორიტეტული საერთაშორისო ინსტიტუციების და „ფაქტ-მეტრის“ შეფასებები და დასკვნები თვითონ გააკეთეთ.

აღსანიშნავია, რომ საქართველო C ჰეპატიტის ელიმინაციაში მსოფლიოში პირველ სამოდელო ქვეყნად არა მხოლოდ ქვეყნის მცირე მასშტაბის და C ჰეპატიტის მაღალი გავრცელების (ასეთი ქვეყნები სხვებიც არის) გამო შეირჩა, არამედ პირველ რიგში იმიტომ, რომ ამერიკულმა მხარემ და საერთაშორისო ექსპერტებმა ჩათვალეს, რომ საქართველო სხვა ქვეყნებზე (მათ შორის განვითარებულ ქვეყნებზე) უკეთ შეძლებდა ამ პროგრამის შესრულებას და ისინი ქვეყნის შესაძლებლობებს პროგრამის დაწყებამდე თითქმის ერთი წელი ამოწმებდნენ. სხვანაირად რამდენიმე მილიარდიან ინვესტიციებს მაინცდამაინც საქართველოსთვის არავინ გაიღებდა.

საქართველო შეზღუდული ეკონომიკური რესურსების მქონე განვითარებადი ქვეყანაა და ამიტომ მისი ჯანდაცვა მთლიანობაში გაცილებით უფრო სუსტია განვითარებული ქვეყნების ჯანდაცვასთან შედარებით. მით უფრო დასაფასებელია, რომ C ჰეპატიტის ელიმინაციის დარგში საქართველო აღიარებულია მსოფლიო ლიდერ ქვეყნად, ხოლო თვით პროგრამამ საქართველოს მოსახლეობას უდიდესი, ფასდაუდებელი სიკეთე მოუტანა.

ზოგადად ბოლო წლებში ქვეყნის ჯანდაცვაში ძალიან ბევრი რამ გაკეთდა, რასაც მოსახლეობა თავის თავზე გრძნობს. მოსახლეობას აღარ ეშინია ავად გახდომის და იმისთვის, რომ მკურნალობისთვის სახლების გაყიდვა მოუწევს. ამჟამად ჯანდაცვაში მიმდინარეობს რიგი სიღრმისეული სისტემური რეფორმები (მედიკამენტებზე ფასების შემცირება, საყოველთაო ჯანდაცვაში DRG მოდელზე გადასვლა, ინფექციების კონტროლი და ანტიმიკრობული რეზისტენტობა, B ჰეპატიტის ელიმინაციის პროგრამა, პირველადი ჯანდაცვის რგოლის გაძლიერება და სხვ.), რომელთა დამთავრების შემდეგ ქვეყანა მიიღებს განახლებულ, კიდევ უფრო ხელმისაწვდომ და მაღალი ხარისხის ჯანდაცვას“, – აღნიშნულია ცერცვაძის განცხადებაში.

ევროკომისიამ უკრაინიდან ევროპის ხუთ ქვეყანაში მარცვლეულის ექსპორტი აკრძალა

20:42 - 02/05/2023

ევროკომისიამ უკრაინიდან აღმოსავლეთ ევროპის ხუთ ქვეყანაში მარცვლეულის ექსპორტი აკრძალა. ზომები ეხება მხოლოდ ოთხ სასოფლო-სამეურნეო პროდუქტს – ხორბალს, სიმინდის, რაფსს და მზესუმზირას თესლს.

ამ პერიოდის განმავლობაში, უკრაინული ხორბალი, სიმინდი, რაფსი და მზესუმზირას თესლი თავისუფალ მიმოქცევაში იქნება ევროკავშირის ყველა წევრ ქვეყანაში, გარდა ბულგარეთის, უნგრეთის, პოლონეთის, რუმინეთის და სლოვაკეთისა.

ამავდროულად, მარცვლეულის ტრანზიტული გადაზიდვა აღნიშნული ქვეყნების გავლით კვლავ შესაძლებელი იქნება.

ზომები ძალაში 2 მაისს შევა და 2023 წლის 5 ივნისამდე გაგრძელდება. საჭიროების შემთხვევაში, შეზღუდვები შესაძლოა, 5 ივნისის შემდეგაც გაგრძელდეს.

როგორ ემზადება რუსეთი უკრაინის კონტრშეტევისთვის?

20:16 - 02/05/2023

უკრაინის მიერ გაცხადებული კონტრშეტევის მოლოდინში რუსული მხარე მზადებას იწყებს, რის გამოც ამ უკანასკნელმა ფრონტის ხაზებზე ბრძოლის ინტენსივობა შეამცირა, – ამის შესახებ უსაფრთხოებისა და თავდაცვის საკითხებში ანალიტიკოსმა, მაიკლ კლარკმა Sky News-თან საუბრისას განაცხადა.

მისივე თქმით, რუსეთის თავდაცვით ზღუდეებს აშენებს და შესაძლო უკან დახევისთვის ემზადება.

„მათ [რუსებმა] შეწყვიტეს ინტენსიური შეტევები ჩრდილოეთში, ხოლო სამხრეთსა და სამხრეთ-დასავლეთში ისინი, სავარაუდოდ, უკან დასახევად ემზადებიან. ზაპოროჟიედან ყირიმისკენ მიმავალ გზაზე ისინი უზარმაზარ თხრილებს ამზადებენ.

რაც შეეხება უკრაინისთვის გადაცემულ იარაღს, ნატოს მონაცემებით მათ უკვე მიიღეს იმ ტექნიკისა და აღჭურვილობის 98%, რასაც დაჰპირდნენ. უკრაინის ჯარს ახლა ჯამში აქვს 230 ახალი საბრძოლო ტანკი და დაახლოებით 1 550 ერთეული ჯავშანტექნიკა. ჩვენ ვიცით, რომ მათ აქვთ აღჭურვილობა, მაგრამ საინტერესოა „მოაწყვეს“ თუ არა ისინი ისე, რომ სწორად გამოიყენონ. თუ ისინი [უკრაინელები] ყველაფერს გააკეთებენ, მაშინ მათ ტერიტორიების დასაბრუნებლად საკმარისი ტექნიკა და აღჭურვილობა აქვთ“, – განაცხადა კლარკმა.

„თქვენს მანდატს უფრო სერიოზულად თუ მიუდგებით, მიხვდებით, სად უნდა იდგეთ”- პაპუაშვილი უსუფაშვილს

19:07 - 02/05/2023

„თქვენს მანდატს უფრო სერიოზულად თუ მიუდგებით, მიხვდებით, სად უნდა იდგეთ, – ასე უპასუხა საქართველოს პარლამენტის თავმჯდომარემ შალვა პაპუაშვილმა „ლელოს“ ერთ-ერთ ლიდერს, დეპუტატ დავით უსუფაშვილს, რომელმაც პარლამენტის თავმჯდომარეს 50 ოპოზიციონერი დეპუტატის ხელმოწერა და მოთხოვნა გადასცა საგამოძიებო კომისიის შექმნის თაობაზე.

შალვა პაპუაშვილის განცხადებით, არასერიოზულია პარლამენტში საბავშვო კონსტიტუციის გამოყენება.

„ბატონო დავით, მე აქედან ვერ დავინახე ზუსტად, თუ არ ვცდები, საბავშვო კონსტიტუციაა, რაც ხელში გიჭირავთ. ბატონო დავით, თქვენ თქვენს მანდატს თუ უფრო სერიოზულად მიუდგებით და თქვენ ქვეყანას თუ მიუდგებით უფრო სერიოზულად და არა საბავშვო კონსტიტუციის დონეზე, ვფიქრობ, თქვენც მიხვდებით, სად უნდა იდგეთ და თქვენი კოლეგებიც მიხვდებიან“, – განაცხადა შალვა პაპუაშვილმა.

„თავს დამნაშავედ არ ვცნობ“ – აჩიკო მეფარიძე სასამართლო პროცესზე გამოცხადდა

19:02 - 02/05/2023

თბილისის საქალაქო სასამართლოში მომღერალ აჩიკო მეფარიძის საქმის განხილვა გრძელდება. დღეს, სასამართლოში გამოცხადდა ბრალდებული, რომელმაც მოსამართლის კითხვაზე – ცნობს თუ არა თავს დამნაშავედ, განაცხადა – „არა“.

პროკურატურა მომღერალს მოქალაქე ლელა ჯუღელის მიმართ ძალადობის განხორციელებას და მუქარას ედავება.

„ლელა ჯუღელი ამჟამად იმყოფება გერმანიაში. ძალადობის აქტის შემდეგ ყური დაუზიანდა და ექიმთან არის ვიზიტზე. მისი პოზიცია არ შეცვლილა და არც შეიცვლება – ითხოვს მოძალადის უმკაცრეს დასჯას კანონის ფარგლებში“, – განაცხადა დაზარალებულად ცნობილის უფლებადამცველმა.

აქამდე, აჩიკო მეფარიძე სასამართლო სხდომებს ჯანმრთელობის მდგომარეობის მიზეზით არ ესწრებოდა. საქმეზე მომდევნო სხდომა ხვალ არის ჩანიშნული.

აჩიკო მეფარიძესა და ლელა ჯუღელს შორის ინციდენტი თბილისში, 2022 წლის აპრილში მოხდა. ჯუღელის თქმით, ინციდენტის შემდეგ მეფარიძე ავტომობილით დაეწია და სიტყვიერი და ფიზიკური შეურაცხყოფა მიაყენა.

მომღერალს ბრალი სისხლის სამართლის კოდექსის 126-ე, ფიზიკური ძალადობის და 151-ე, მუქარის მუხლებით აქვს წაყენებული. აღნიშნულ ბრალდებაზე მაქსიმალურ სასჯელად ერთი წლით თავისუფლების აღკვეთაა გათვალისწინებული.

აჩიკო მეფარიძეს 5 000-ლარიანი გირაო აქვს შეფარდებული.

რატომ არ მონაწილეობს საქართველო მრავალეროვნულ სწავლება “დამცველი 2023”-ში – თავდაცვის სამინისტრო განცხადება

18:47 - 02/05/2023

თავდაცვის უწყება „დამცველი 2023“-ში საქართველოს თავდაცვის ძალების მონაწილეობასთან დაკავშირებით განცხადებას ავრცელებს.

როგორც განცხადებაშია აღნიშნული, თავდაცვის ძალები მუდმივად მონაწილეობს და მასპინძლობს საერთაშორისო წვრთნებს საბრძოლო შესაძლებლობების გაზრდის მიზნით.

„საქართველოს თავდაცვის სამინისტრო ეხმიანება ცალკეული საინფორმაციო საშუალებებისა და პოლიტიკური დღის წესრიგით მოქმედი პირების მიერ აშშ-ის ევროპული სარდლობის მიერ ორგანიზებულ მრავალეროვნულ სწავლება „დამცველი 2023“-ში (Defender 2023) საქართველოს თავდაცვის ძალების მონაწილეობის საკითხის შესახებ გავრცელებულ ინფორმაციას. სამწუხაროდ, აღნიშნული მიკერძოებულად გავრცელებული ინფორმაცია წარმოადგენს მორიგ პროვოკაციას თავდაცვის უწყების მიმართ. საზოგადოებისთვის განვმარტავთ, რომ თავდაცვის ძალები მუდმივად მონაწილეობს და მასპინძლობს საერთაშორისო წვრთნებს საბრძოლო შესაძლებლობების გაზრდის მიზნით. მათ შორის, ყოველწიურად მასპინძლობს საქართველო-აშშ-ის ერთობლივ, მასშტაბურ მრავალეროვნულ წვრთნებს, როგორიცაა „ღირსეული პარტნიორი“ და „მტკიცე სული“. 2022 წლიდან უკვე დაწყებულია შესაბამისი დაგეგმვის აქტივობები სწავლება „მტკიცე სული 2023“-ის წარმატებით ჩატარების მიზნით. უფრო მეტიც, ნატო-ს სხვა წევრ და პარტნიორ ქვეყნებთან ერთად, მიმდინარე წელს თავდაცვის უწყებამ მონაწილეობა მიიღო ოთხ საერთაშორისო სწავლებაში, კერძოდ, თურქეთში (WINTER 23), გერმანიაში (DYNAMIC FRONT 23), სლოვაკეთში (SLOVAK SHIELD 23) და ნიდერლანდებში (STEADFAST COBALT 23) და ასევე, წლის ბოლომდე დაგეგმილია სწავლებები თურქეთში (EURASIAN PEACE 23; ANATOLIA; ERCYIES), ესტონეთში (SPRING STORM 23), პოლონეთში (CWIX 23), ბულგარეთში (IMMEDIATE RESPONSE 23), რუმინეთში (SABER GUARDIAN 23), ინგლისში (SEA BREZZE 23), გერმანიაში (SABER JUNCTION 23; COMBINED RESOLVE 19), აზერბაიჯანში (CAUCASIAN EAGLE 23; ETERNITY 23), იტალიაში (SJEx/STEADFAST JACKAL) და საქართველოში (MAPLE ARCH 23), რომლებშიც ქართველი სამხედროები იქნებიან ჩართულნი.

რაც შეეხება უშუალოდ სწავლება „დამცველი 2023“-ში (Defender 2023) საქართველოს მონაწილეობას, მოგახსენებთ რომ, თავდაცვის ძალების მიზნებიდან და ამოცანებიდან გამომდინარე, ჩვენს მთავარ სტრატეგიულ პარტნიორთან აქტიური კომუნიკაციითა და მათი რეკომენდაციით გადაწყდა, მეტი ძალისხმევა და რესურსები მიმართულიყო ისეთ საერთაშორისო და ადგილობრივ სწავლებებზე, რომლებიც უფრო მეტად ითვალისწინებენ ზემოთ აღნიშნულ ამოცანებს, მათ შორის საბრძოლო მზადყოფნის გაზრდას, ნატოს წევრ და პარტნიორ ქვეყნებთან ურთიერთთავსებადობის ამაღლებას, გამოცდილების გაზიარებას და პროფესიული უნარების გაუმჯობესებას“, – ნათქვამია აგანაცხადებაში.

„ოპოზიციური სპექტრი რეალურად დიდი ხანია, გასულია პოლიტიკური თამაშიდან” – მეგრელიშვილი

18:31 - 02/05/2023

„ამ არჩევნებში „ნაციონალურ მოძრაობას“ საკუთარი სიცოცხლისუნარიანობის განსასაზღვრად აუცილებლად უნდა მიეღო მონაწილეობა თუნდაც იმიტომ, რომ შეეფასებინა საკუთარი ძალა, ანუ რა დარჩა „ნაციონალური მოძრაობიდან“. ეს იქნებოდა ძალიან კარგი საზომი, რომ 2024 წლისთვის თავიანთი მინუსები პლუსებად ექციათ, მაგრამ ვერ გაბედეს და ვფიქრობ, სწორია, რომ ვერ გაბედეს, რადგან ეს მათთვის პოლიტიკური ცივი შხაპი იქნებოდა და საზოგადოება კიდევ ერთხელ დაინახავდა, რომ ისინი არიან პოლიტიკურად გაკოტრებულნი,“ – ამის შესახებ „ხალხის ძალის“ წევრმა თამთა მეგრელიშვილმა ტელეკომპანია „პოსტივის“ ეთერში ისაუბრა.

მისი თქმით, ამ არჩევნებმა მმართველ პარტიასაც და ოპოზიციასაც დაანახა, თუ რა დონეზე არიან პოლიტიკურად, თუმცა უმჯობესი იქნებოდა, ოპოზიციას უფრო ზუსტი შედეგის მისაღებად მონაწილეობა მიეღო მასში, მაგრამ ეს ვერ გაბედეს, რადგან წინასწარვე მოელოდნენ უარყოფით შედეგებს.

„ოპოზიციური სპექტრი რეალურად დიდი ხანია, გასულია პოლიტიკური თამაშიდან. მათი დღის წესრიგი ძირითადად არის დესტრუქცია. რატომღაც ისინი უკვე წლებია, ელოდებიან, რომ ქვეყანაში მოხდეს გადატრიალება, რევოლუცია და ამით მოვიდნენ ხელისუფლებაში, რაც ცალსახად გამორიცხულია, რადგან ხელისუფლების წყარო არის ხალხი და ხალხს არ სურს, ამგვარად სიტუაციისა და მმართველობის შეცვლა ქართულ სახელმწიფოში. რაც შეეხება გამოქვეყნებულ კვლევებს, ყველა კვლევამ, რომელიც აქამდე ჩატარებულა და რაც უახლოეს წარსულში ჩატარდა, IRI-ს კვლევამ, შინაარსობრივად მართლაც დაკარგა აზრი, რადგან არჩევნები არის ვარაუდის გარეშე პირდაპირ გამოხატული ნება ამომრჩევლისა, რომელიც გვეუბნება პოლიტიკურ „კი“-ს ან „არა“-ს. აქედან გამომდინარე, ამ არჩევნებმა კიდევ ერთხელ ხაზგასმით დაანახა ყველას, ოპოზიციასაც და პოზიციასაც, პოლიტიკურად და რა დონეზე არიან. უფრო მეტიც, ამ არჩევნებში „ნაციონალურ მოძრაობას“ საკუთარი სიცოცხლისუნარიანობის განსასაზღვრად აუცილებლად უნდა მიეღო მონაწილეობა თუნდაც იმიტომ, რომ შეეფასებინა საკუთარი ძალა, ანუ რა დარჩა „ნაციონალური მოძრაობიდან“. ეს იქნებოდა ძალიან კარგი საზომი, რომ 2024 წლისთვის თავიანთი მინუსები პლუსებად ექციათ, მაგრამ ვერ გაბედეს და ვფიქრობ, სწორია, რომ ვერ გაბედეს, რადგან ეს მათთვის პოლიტიკური ცივი შხაპი იქნებოდა და საზოგადოება კიდევ ერთხელ დაინახავდა, რომ ისინი არიან პოლიტიკურად გაკოტრებულნი,“ – განაცხადა თამთა მეგრელიშვილმა.

ნუგზარ თაბუნიძე -ახალგაზრდა ოქროს ხელებით

18:14 - 02/05/2023

ახალგაზრდა ოქროს ხელებით – ხალხურ მედიცინაში შეტანილი წვლილისთვის

ნუგზარ თაბუნიძე ახალგაზრდა, ნიჭიერი ექიმია, რომელიც უკვე რამდენიმე წელიწადია, რაც ხერხემლის დაავადებებით შეწუხებულ ადამიანებს უნიკალური საგვარეულო მალამოთი მკურნალობს და ეფექტური შედეგები აქვს.

თბილისში ნუგზარ თაბუნიძეზე ლეგენდები დადის – მის სამედიცინო კაბინეტში პაციენტები ტკივილით შედიან და გაღიმებული სახეებით გამოდიანო. სწორედ ამიტომაც ის , ჩვენი ლოკალური კვლევების თანახმად, ნამდვილად იმსახურებს ჯილდოს- ქართულ ხალხურ მედიცინაში შეტანილი წვლილისთვის და 2023 წლის ამ ნომინაციის მფლობელიც ხდება.

ნუგზარ თაბუნიძე: ,,თაბუნიძეების საგვარეულო მალამო, ოფიციალური წყაროებით, ჯერ კიდევ ერეკლე მეორის დროიდან იღებს სათავეს, თუმცა ეს მხოლოდ დოკუმენტურად დადასტურებული არქივია და არ გამოვრიცხავთ, ჩვენი ოჯახის სამედიცინო ფესვები მანამდეც არსებობდა. უბრალოდ, ჩანაწერები ამ დროიდან მოგვეპოვება.
პაციენტს, რომელიც მომმართავს, შემიძლია მივუდგე ტრადიციული მედიცინით და ასევე, ჩვენი საგვარეულო მკურნალობის მეთოდით. ეს მკურნალობა არის ჩვენი გვარისა და საქართველოს საგანძური – სრულიად ნატურალური, ბუნებრივი და ათეული ბალახისეული შემადგენლობით. ჩვენ მიერ აღნიშნული მალამო ყოველდღიურად მზადდება და მალფუჭებადია, რაც მისი გაყიდვის უფლებას არ გვაძლევს .

როგორც მოგეხსენებათ, მთელი ჩვენი სხეული ხერხემალზე არის აგებული. მისი დაავადებები გადასცემს ტკივილს სხეულის სხვადასხვა წერტილს. შეიძლება, გვტკიოდეს თავი, კიდურები და ეს ტკივილი არ გვაძლევდეს საშუალებას, რომ თავისუფლად ვიმოძრაოთ. ცხოვრება კი მოძრაობაა! არანაირი ოპერაცია ხერხემალზე არ გვაძლევს განკურნების სრულ გარანტიას და ამიტომ, ეს მხოლოდ უკიდურესი ეტაპია, რასაც ადამიანმა უნდა მიმართოს. ეს არ არის ახალი დაავადებები. უწინ, საუკუნეების განმავლობაში, ჩვენი წინაპრები, ოპერაციების გარეშეც კურნავდნენ ისეთ დაავადებებს, როგორიცაა: თიაქარი, რადიკულიტი, დისკოზი, პროლაპსი, პროტრუზიო, დისკოპათია, ართროზი, იშიასი, მარილების დაგროვება, ჰიგრომა, პოდაგრა, ნერვის ანთება. მეც სწორედ აღნიშნულ დაავადებებს ვკურნავ. ეს გახლავთ ინდივიდუალურად შერჩეული სამკურნალო კურსი, რომელიც სხვადასხვა პაციენტის შემთხვევაში სხვადასხვაა. არ მოითხოვს განსაკუთრებულ პროცედურებს, არც დიეტასა და კვების სპეციალურ რაციონს. თუმცა, ზოგადად, სასურველია, რომ ცხიმიან პროდუქტს მოვერიდოთ და ზედმეტი წონა მოვიცილოთ.

ვამაყობ, რომ ამ დარგის და ძირძველი ტრადიციების წარმომადგენელი ვარ. მიმაჩნია, რომ ეს ღვთისგან დალოცვილი საქმეა, ამიტომაც მადლობელი ვარ უფლის და მამაჩემის, რომ ამ საქმეს მაზიარა“.

“ქოლ – ცენტრის“ საქმეს შეეწირა ჩემი შვილი”- თამარ ბაჩალიაშვილის მამა

18:05 - 02/05/2023

გარდაცვლილი პროგრამისტის თამარ ბაჩალიაშვილის მამის ჯუმბერ ბაჩალიაშვილის განცხადებით,მისი შვილი “ქოლ – ცენტრის”საქმეს შეეწირა.

როგორც ჯუმბერ ბაჩალიაშვილმა ჟურნალისტებთან საუბრისას განაცხადა,თამარ ბაჩალიაშვილმა, გარდაცვალებამდე ერთი თვით ადრე, თავად უთხრა, რომ საქმე “ქოლ – ცენტრს” ეხებოდა.

ჯუმბერ ბაჩალიაშვილის მისი შვილის საქმის ხელახალ გამოძიებას მკვლელობის მუხლით ითხოვს.

„შეკერილი საქმეა, რა თქმა უნდა. დაწყებიდან გაყალბდა ეს საქმე. ხელახლა გამოძიება მკვლელობაზე უნდა დაიწყოს. რასაც სერგო შუბითიძე იძახის, სიმართლეა. ასეთი ხალხი კიდევ არიან, კიდევ გამოჩნდებიან. ახლა უკვე დაიწყო ეს ტალღა, მოვლენ და მოვლენ.

„ქოლ – ცენტრის“ საქმეს შეეწირა ჩემი შვილი. ლილუაშვილი კურირებდა. ლილუაშვილი ვის დავალებას ასრულებდა, ეს მერე გამოჩნდება. სუს-მა მომიკლა შვილი, ეს ნაღდია.

გარდაცვალებამდე ერთი თვით ადრე მითხრა, მე ვიცი, რომ ლილუაშვილი კურირებს ამ საქმესო. მამა, რაღაცას მიზამენო ასე იძახდა. ასე უცებ ვერ დავტოვებ ამ სამსახურსო,“ – განაცხადა ჯუმბერ ბაჩალიაშვილმა.

ტელეკომპანია “ფორმულასთან” ინტერვიუში გარდაცვლილი თამარ ბაჩალიაშვილის საქმის ყოფილმა გამომძიებელმა, სერგო შუბითიძემ განაცხადა, რომ ბაჩალიაშვილის გარდაცვალების საქმესთან დაკავშირებით ბევრი საეჭვო გარემოებაა და მას თვითმკვლელობის ვერსიის არ სჯერა.

ამ განცხადების შემდეგ, პროკურატურამ თამარ ბაჩალიაშვილის გარდაცვალების სისხლის სამართლის საქმეზე მტკიცებულებათა შესაძლო ფალსიფიკაციის ფაქტზე გამოძიება დაიწყო და გამომძიებელი სერგო შუბითიძე გამოკითხვაზე დაიბარა

თამარ ბაჩალიაშვილის გარდაცვალების საქმის ყოფილმა გამომძიებელმა, სერგო შუბითიძემ პროკურატურაში დღეს ჩვენება არ მისცა და მაგისტრატი მოსამართლის წინაშე დაკითხვა მოითხოვა.

სერგო შუბითიძის ადვოკატის, მარიამ მაღრაძის განცხადებით კი, შუბითიძის ამ პოზიციის დაფიქსირების შემდეგ ახლა პროკურატურა სასამართლოს მიმართავს.
მისივე თქმით, შუბითიძემ რომ მაგისტრატი მოსამართლის წინაშე დაკითხვა მოითხოვა, არ ნიშნავს მისი მხრიდან გამოძიებისთვის უნდობლობის გამოცხადებას. დამატებით სხვა დეტალებზე, მათ შორის, რის თქმას აპირებს გამოძიებისთვის შუბითიძე, არც ყოფილი გამომძიებელი და არც მისი ადვოკატი არ საუბრობენ.

სერგო შუბითიძემ სატელევიზიო ინტერვიუში თამარ ბაჩალიაშვილის საქმეზე საუბრისას მტკიცებულებების ფალსიფიცირებაზე გააკეთა განცხადება. როგორც მან აღნიშნა, საქმის გამოძიების პროცესში იყო ჩართული, ვიდრე მის შესწავლას თბილისის პროკურატურა დაიწყებდა.

შეგახსენებთ, 23 წლის თამარ ბაჩალიაშვილი 2020 წლის 18 ივლისს გაუჩინარდა. ის რამდენიმე დღის შემდეგ, თეთრიწყაროს ტყეში, საკუთარ მანქანაში გარდაცვლილი იპოვეს. გამოძიების ინფორმაციით, ბაჩალიაშვილმა სიცოცხლე თვითმკვლელობით დაასრულა და საქმე დაიხურა.

“ნატოს მიერ მიწოდებული იარაღი არ უნდა იყოს გამოყენებული რუსეთის ტერიტორიაზე დარტყმებისთვის” – ოლაფ შოლცი

18:00 - 02/05/2023

გერმანიის კანცლერმა, ოლაფ შოლცმა განაცხადა, რომ არსებობს შეზღუდვები იმაზე, თუ როგორ უნდა გამოიყენოს უკრაინამ დასავლეთის მიერ მიწოდებული იარაღი.

„ჩვენთვის ძალიან მნიშვნელოვანია, რომ იარაღი, რომელსაც ჩვენ უკრაინას ვაწვდით და რომლითაც უკრაინას შეუძლია დაიცვას თავი, არ იყოს გამოყენებული რუსეთის ტერიტორიაზე დარტყმებისთვის“, – აღნიშნა გერმანიის კანცლერმა.

გერმანიის კანცლერმა ასევე განაცხადა, რომ უკრაინის დახმარება აუცილებელია, მაგრამ ასევე ყველაფერი უნდა გაკეთდეს იმისათვის, რომ არ მოხდეს ომი რუსეთსა და ჩრდილოატლანტიკურ ალიანსს შორის.

“გაბონის წყლებში, გემიდან ორი ქართველი მეზღვაური გაიტაცეს” – საზღვაო ტრანსპორტის სააგენტო

17:24 - 02/05/2023

საზღვაო ტრანსპორტის სააგენტოს ინფორმაციით, გაბონის ტერიტორიულ წყლებში ღუზაზე მდგომი გემიდან ორი ქართველი მეზღვაური გაიტაცეს.

როგორც სააგენტო „ფეისბუქის“ საკუთარ გვერდზე აღნიშნავს, შემთხვევა 2 მაისს, ღამის საათებში მოხდა.

„სამხრეთ აფრიკაში საქართველოს საკონსულოდან მიღებული ინფორმაციის თანახმად, 2 მაისს, ღამის საათებში, გაბონის ტერიტორიულ წყლებში ღუზაზე მდგომი გემიდან გაიტაცეს სამი მეზღვაური, მათ შორის ორი საქართველოს მოქალაქეა. გემზე დარჩენილ მეზღვაურებს საფრთხე არ ემუქრებათ.

საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტო, საგარეო საქმეთა სამინისტროსთან ერთად აქტიურად მუშაობს, მათ შორის საკრუინგო და გემთმფლობელ კომპანიებთან ჩვენი მეზღვაურების ტყვეობიდან გამოსახსნელად.

სააგენტოს წარმომადგენლები უკვე დაუკავშირდნენ ოჯახის წევრებს და მიაწოდეს დეტალური ინფორმაცია.

ქართველი მეზღვაურების უსაფრთხოებიდან გამომდინარე, მოგიწოდებთ თავი შეიკავოთ დეტალებისა და რამე სახის მაიდენტიფიცირებელი ინფორმაციის საინფორმაციო საშუალებებით გავრცელებისგან“, – აღნიშნულია საზღვაო ტრანსპორტის სააგენტოს მიერ გავრცელებულ ინფორმაციაში.

1...2,0082,0092,010...2,137 Page 2,009 of 2,137