ჩვენი ბარიერი 5% ვერ იქნება, ჩვენი ბარიერია 40-45%, – ამის შესახებ პარტია „სტრატეგია-აღმაშენებლის” ლიდერმა, გიორგი ვაშაძემ 2024 წლის საპარლამენტო არჩევნებზე და ბარიერის შესახებ საუბრისას განაცხადა.

გიორგი ვაშაძის თქმით, თუ საარჩევნო ბარიერის ცვლილება დაინიცირდება, მაშინ მას მხარს დაუჭერენ, თუმცა „გამარჯვების“ პლატფორმამ ბარიერის დაწევის გარეშეც იცის, როგორ უნდა დაამარცხოს „ქართული ოცნება“.

„გამოვა ეს საკითხი? ჩვენ მას მხარს დავუჭერთ. ჩვენ გვაქვს ჩვენი ბარიერი. გამარჯვების კოალიცია „ნაციონალური მოძრაობა – სტრატეგია აღმაშენებლის“ ამოცანაა გავიდეთ პირველ ადგილზე არჩევნებში. ჩვენი ბარიერი 5% ვერ იქნება , ჩვენი ბარიერია 40-45%, რომელიც უნდა გადავლახოთ და ამის გადალახვას ვაპირებთ. აუცილებლად ხალხთან ერთად გავიმარჯვებთ ამ არჩევნებში. დანარჩენ ბუღალტერიაში ვერ შევალ. შემოვა კანონი, მივცემ ხმას, არ შემოვა? მაინც ვიცით როგორ უნდა გავუშვათ რუსული რეჟიმი ხელისუფლებიდან“, – განაცხადა გიორგი ვაშაძემ.

პირველი ადგილისთვის რომ იბრძოლოს, ამისთვის მიხეილ სააკაშვილს ბევრი ზღაპარი აქვს მოსაყოლი , – ამის შესახებ პარტია „გირჩის“ლიდერმა, იაგო ხვიჩიამ მედიასთან განაცხადა. იაგო ხვიჩიას განცხადებით, იმის გამო, რომ წინასაარჩევნო კონსტრუქცია ჯერ ჩამოყალიბებული არ არის, მიხეილ სააკაშვილი პოზიციების გამოხატვისგან თავს იკავებს.

,,ათას ერთი ღამის ზღაპრები რომ წარმოვიდგინოთ, მიხეილ სააკაშვილი ყოველდღიურად ერთ ამბავს უნდა ჰყვებოდეს. ამბავი პირველი – როგორ შევქმენი პროკურატურა; ამბავი მეორე – როგორ შევქმენი სასამართლო; ამბავი მესამე – ეკონომიკის სამინისტროს როგორ ვმართავდი; ამბავი მეოთხე – გუბერნატორებს რა როლი ჰქონდა ჩვენ დროს; ამბავი მეექვსე – სპეცდანიშნულების რაზმების ხელმძღვანელობა როგორ ხდებოდა და როგორ ხდებოდა ისეთი დავალებების მიცემა, რომელიც საჯარო არ იყო“, – განაცხადა იაგო ხვიჩიამ.

საფრანგეთი სამხრეთ კავკასიის რეგიონში ახალი ომების გაჩაღებისთვის ნიადაგს ამზადებს. ამის შესახებ აზერბაიჯანი პრეზიდენტმა ილჰამ ალიევმა კონფერენციაზე “დეკოლონიაზაცია: ქალების გაძლიერება და განვითარება” სიტყვით გამოსვლისას განაცხადა.

ალიევის თქმით, საფრანგეთი უარს ვერ ამბობს თავის კოლონიალურ პოლიტიკაზე, პატივს არ სცემს იმ ერების უფლებებსა და თავისუფლებისკენ სწრაფვას, რომლებიც ევროპის მიღმა ცხოვრობენ.

“საფრანგეთი სტაბილურობას არღვევს არა მხოლოდ თავის ყოფილ და ახლანდელ კოლონიებში, არამედ ამავდროულად ჩვენს რეგიონშიც – სამხრეთ კავკასიაში, სადაც მხარს უჭერს სეპარატისტულ ტენდენციებსა და სეპარატისტებს. მილიტარისტულ პოლიტიკას ატარებს სომხეთის შეიარაღებით, სომხეთში რევანშისტულ ძალებს აქეზებს, ნიადაგს ამზადებს ჩვენს რეგიონში ახალი ომების გაჩაღებისთვის. ამავდროულად, საფრანგეთი გაეროს უშიშროების საბჭოს მუდმივი წევრის თავის სტატუსს ბოროტად იყენებს თავისი მიკერძოებული, არაობიექტური პოლიტიკის გასატარებლად, სხვადასხვა რეგიონებში გეოპოლიტიკური ინტრიგებით არის დაკავებული, სახელმწიფოების წინააღმდეგ ზეწოლის საშუალებად დასავლური ორგანიზაციების გამოყენებას ცდილობს”, – განაცხადა ალიევმა.

როდესაც სასამართლოში დავით გარეჯის საქმეზე პროცესი მიმდინარეობს, თუკი პრობლემა რეალურია, პრემიერ მინისტრმა უნდა ახსნას, რატომ არ საუბრობს ამ თემაზე აზერბაიჯანულ მხარესთან ორმხრივი შეხვედრების დროს? – არც ერთ შეხვედრაზე აზერბაიჯანულ მხარესთან ეს საკითხი არ დასმულა, პრემიერ მინიტრს პირში წყალი აქვს ჩაგუბებული! – ამის შესახებ ჟურნალისტებთან “ლელოს“ დეპუტატმა ანა ნაცვლიშვილმა განუცხადა.

ნაცვლიშვილის შეფასებით, ყოველივე ეს ადასტურებს, რომ “გარეჯი საქართველოა“ შიდა მოხმარების თემაა.

“გაუგებარია, როდესაც ამხელა ამბავია შექმნილი და ეს არის საქართველოს მოქალაქეებისთვის მგრძნობიარე თემა, ჩვენ საქართველოს პრემიერ მინისტრისა და აზერბაიჯანის უმაღლესი ხელისუფალის არაერთი მაღალი დონის შეხვედრა ვნახეთ და პრემიერ – მინიტრს პირში წყალი აქვს ჩაგუბებული – არც ერთ შეხვედრაზე აზერბაიჯანულ მხარესთან ეს საკითხი არ დასმულა.

რას ნიშნავს ეს? – ე.წ. “გარეჯი საქართველოა“ შიდა მოხმარების თემაა. თუ პრემიერი მართლა წუხს და ამ საქმეში მართლაც არსებობს საფუძველი, რომ საქართველოს ინტერესები შელახულია, მაშინ ამ პერიოდის განმავლობაში აზერბაიჯანულ მხარესთან არა ერთი შეხვედრა შედგა და არც ერთხელ არ მოგვისმენია, რომ ირაკლი ღარიბაშვილმა ილჰამ ალიევთან ეს საკითხი დააყენა პირისპირი შეხვედრების თუ სხვა ფორმატში“, – განაცხადა ანა დოლიძემ.

დავით გარეჯის საქმეზე ყოფილი პრემიერ-მინისტრის, ზურაბ ნოღაიდელის დაკითხვა დასრულდა. ის მხარეების კითხვებს თითქმის, ორი საათის განმავლობაში პასუხობდა.

2005-2007 წლებში, ნოღაიდელი პრემიერ-მინისტრი და უშიშროების საბჭოს წევრი იყო.

როგორც სასამართლო პროცესზე ჩვენების მიცემისას ნოღაიდელმა განაცხადა, სასაზღვრო ზოლთან დაკავშირებული საკითხები პრეზიდენტის კომპეტენციაში შედიოდა და საბჭოს სხდომებსაც ის იწვევდა.

„ქართული ოცნების“ პარტიული კონფერენციები იმერეთის მხარესა და რეგიონებში დასრულდა. ბოლო კონფერენციები დღეს ხარაგაულში, ჭიათურასა და საჩხერეში ჩატარდა, რომელზეც ადგილობრივი ორგანიზაციების თავმჯდომარეები და ბიუროს წევრები აირჩიეს.

პარტიული კონფერენციები იმერეთის მხარის თორმეტივე მუნიციპალიტეტში გაიმართა.

„ქართული ოცნების“ ხარაგაულის ორგანიზაციას ხარაგაულის მუნიციპალიტეტის მერი, კობა ლურსმანაშვილი უხელმძღვანელებს;

ჭიათურის ორგანიზაციას – ჭიათურის მუნიციპალიტეტის მერი, გივი მოდებაძე;

საჩხერის ორგანიზაციას – საჩხერის მუნიციპალიტეტის მერი, ლევან ივანაშვილი;

ზესტაფონის ორგანიზაციას – ზესტაფონის მუნიციპალიტეტის მერი ვასილ გველესიანი;

თერჯოლის ორგანიზაციას – თერჯოლის მუნიციპალიტეტის მერი, მანუჩარ რობაქიძე;

ტყიბულის ორგანიზაციას – ტყიბულის მუნიციპალიტეტის მერი დავით ჩერქეზიშვილი;

სამტრედიის ორგანიზაციას – სამტრედიის მუნიციპალიტეტის მერი, დავით ბახტაძე;

ხონის ორგანიზაციას – ხონის მუნიციპალიტეტის მერი, ლადო ჯურხაძე;

წყალტუბოს ორგანიზაციას – წყალტუბოს მუნიციპალიტეტის მერი, გენადი ბალანჩივაძე.

ქუთაისის ორგანიზაციას – ქუთაისის მუნიციპალიტეტის საკრებულოს თავმჯდომარის პირველი მოადგილე, გია ბასილაძე,

ვანის ორგანიზაციას – ვანის მუნიციპალიტეტის საკრებულოს თავმჯდომარე, ალექსანდრე ლილუაშვილი

ბაღდათის ორგანიზაციას – ბაღდათის მუნიციპალიტეტის მერი, კახა ენუქიძე.

სულ „ქართული ოცნების“ კონფერენციები იმერეთის, გურიის, რაჭა-ლეჩხუმ-ქვემო სვანეთის, შიდა ქართლის, მცხეთა-მთიანეთის, სამეგრელო-ზემო სვანეთის, ქვემო ქართლის, სამცხე-ჯავახეთისა და კახეთის 73 მუნიციპალიტეტში ჩატარდა.

სააკაშვილი რუსეთის ციხეში რომ იჯდეს, დარწმუნებული ვარ პუტინსაც სთხოვდა შეწყალებას ისე, რომ ნამუსი არ შეაწუხებდა, – ამის შესახებ საპარლამენტო უმრავლესობის წევრმა, ფრაქცია „ქართული ოცნების“ თავმჯდომარის მოადგილემ, ბექა დავითულიანმა „ქრონიკაში“ განაცხადა.

„სააკაშვილმა ჩუმად მიიღო სხვა ქვეყნის მოქალაქეობა და სხვა ქვეყნის თანამდებობის პირი გახდა. იმ დანაშაულებზე რომ აღარაფერი ვთქვა, რაც მან თავისი პრეზიდენტობის პერიოდში ჩაიდინა და რაზეც სისხლის სამართლის პასუხისმგებლობა აქვს დაკისრებული, ეს უცხო ქვეყნის მოქალაქე უკანონოდ ცდილობდა ქართულ პოლიტიკაში ჩარევას. შემოიარა საზღვარზე კანონ დარღვევით, კონკრეტული სისხლის სამართლებრივი დანაშაული ჩაიდინა და ახლა იხდის სასჯელს. ეს არის ის ადამიანი, ვინც სალომე ზურაბიშვილს პირადად ხან აგენტს ეძახდა და ხან უშვერი სიტყვებით მოიხსენიებდა და დღეს შეწყალებას სთხოვს. მისი სიტყვები სასამართლოზე, რომ შვილებს მამა დაუბრუნეთო, სხვას არაფერს ნიშნავდა. სააკაშვილისგან პრინციპულობას და მაღალ მორალს რომ ამ ქვეყანაში აღარავინ ელის. სააკაშვილი რუსეთის ციხეში რომ იჯდეს, დარწმუნებული ვარ პუტინსაც სთხოვდა შეწყალებას ისე, რომ ნამუსი არ შეაწუხებდა. მე საარჩევნო კამპანიას ციხიდან ვერ ვაწარმოებო, რომ ამბობს, მოქალაქეობა არ აქვს და რას ეუბნება სალომე ზურაბიშვილს, გამომიშვი რომ კიდევ ერთი უკანონობა დავამატო ჩემ საქმესო?!“ – აღნიშნა დავითულიანმა.