საქართველოს ცენტრალური საარჩევნო კომისიის თავმჯდომარე, გიორგი კალანდარიშვილი და „ერთიანი ნაციონალური მოძრაობის“ წევრი, ლაშა ფარულავა „ჰოლიდეი ინნ თბილისში” გამართულ პრეზენტაციაზე ერთმანეთს სიტყვიერად დაუპირისპირდნენ.

სიტყვიერი დაპირისპირება ლაშა ფარულავას პროტესტს მოჰყვა, რომელიც აცხადებდა, რომ 1 -ელ ოქტომბერს გამართული შუალედური/რიგგარეშე არჩევნების და აღნიშნულ არჩევნებზე გამოყენებული ელექტრონული საშუალებების შესაბამისობის დასადგენად აუდიტორული კომპანიის შერჩევა დახურული და გასაიდუმლოებული იყო და ამის შესახებ ოპოზიციამ არაფერი იცოდა.

ასევე, ლაშა ფარულავა ამტკიცებს, რომ აუდიტორულ კომპანიას აშშ-ში პრობლემები აქვს, მის წინააღმდეგ მიმდინარეობს არაერთი სასამართლო დავა და მისი რეპუტაცია კითხვის ნიშნის ქვეშ დგას.

„ერთადერთი შეკითხვა მაქვს – ასეთი დაბალი სტანდარტებით აპირებენ არჩევნების ჩატარებას? ეს ჩვენთვის არის მიუღებელი, მათ შორის მიუღებელია ასეთი დაბალი სტანდარტით არჩეული და ლეგიტიმაციის არ მქონე თავმჯდომარემ ჩაატაროს ისეთი მნიშვნელოვანი პროცესი, რომელიც გველოდება 2024 წელს, ამიტომ მოვედი აქ და ამ შეკითხვას დავსვამ ყველგან. ჩვენ გვინდა გამჭვირვალე, სამართლიანი და თავისუფალი არჩევნები და ასე თავისუფალი არჩევნები არ ტარდება.

ჩვენ პრეტენზია გაგვაჩნია იმასთან დაკავშირებით, პროცესი იყო დახურული, არ არის გამჭვირვალე და ასეთი დაბალი სტანდარტით ჩატარებული არჩევნები ჩვენთვის არის მიუღებელი. თავისუფალი სამყაროსთვის ასეთი პროცესი არის მიუღებელი და შევეწინააღმდეგებით, არავის არ ჰქონდეს იმის ილუზია, რომ ასეთი ჩავარდნებით ჩავატარებინებთ არჩევნებს. პროცესი უნდა იყოს გამჭვირვალე და სამართლიანი.

მოქალაქეთა პოლიტიკური გაერთიანება „ერთიანი ნაციონალური მოძრაობა“ ჩვენი ემიგრანტებისთვის, ისინი, ვინც ამ ქვეყნიდან გააქციეს, ჩვენი პატრიოტებისათვის ვითხოვთ ონლაინ არჩევნებს, ჩვენ ამ საკანონმდებლო ინიციატივას მალე ოპოზიციასთან ერთად შევიტანთ საკანონმდებლო ორგანოში. მიუღებელია იმ სტანდარტით არჩევნების ჩატარება, როგორიც ვიხილეთ 2020 და 2021 წლებში. ასეთი დახურული პროცესით, თავისუფალი გამჭვირვალე და სამართლიანი არჩევნები არ ჩატარდება“, – განაცხადა ლაშა ფარულავამ.

ცესკო-ს თავმჯდომარის, გიორგი კალანდრიშვილის განცხადებით, ლაშა ფარულავა ღონისძიებაზე „ასარევად არის მოსული“.

„აპელირება იმაზე, თითქოს კომისიის წევრებმა რაიმე ინფორმაცია იმაზე, აუდიტორული კომპანიის შერჩევასთან მიმართებაში არ ჰქონდათ, ეს არის სიცრუე. არა თუ ახლა, ორი თვით ადრე იყო ცნობილი ამ პროცესის დაწყებისა და ინცირების შესახებ“, – განაცხადა კალანდრიშვილმა.

ცნობისთვის, „ჰოლიდეი ინნ თბილისში” ცესკოს თავმჯდომარე ელექტრონული საშუალებების გამოყენებით 1 ოქტომბერს გამართული შუალედური/რიგგარეშე არჩევნების და აღნიშნულ არჩევნებზე გამოყენებული ელექტრონული საშუალებების შესაბამისობის აუდიტის შედეგების პრეზენტაცია გამართა.

სამწუხაროდ, ჩვენ გვყავს არა ოპოზიცია, არამედ რევკომი თავისი მიხეილ სააკაშვილითა და ყველა იმ ადამიანით, ვინც ცდილობს, რომ ამომრჩეველს დესტაბილიზაცია შესთავაზოს – დესტაბილიზაციაზე ფიქრის არც საფუძველი, არც მიზეზი არ არსებობს და ბუნებრივია, ამის უფლება არავის აქვს, – ეს განცხადება ჟურნალისტებთან “ქართული ოცნების” დეპუტატმა მიხეილ სარჯველაძემ გააკეთა.

სარჯველაძემ ხაზგასმით აღნიშნა, რომ ლეგიტიმურად ჩატარებული არჩევნების პირობებში ოპოზიციას წარმატების არავითარი რესურსი არ გააჩნია.

“ამას თავადაც კარგად ხვდებიან, ამიტომ წინასწარ იმზადებენ პლაცდარმს, რადგან შემდგომ განაცხადონ, თითქოს არჩევნები გაყალბდა. 2020 წლის არჩევნების დროსაც ლაპარაკობდნენ იმის თაობაზე, თითქოს არჩევნები გაყალბდა, მაგრამ მოგვიანებით, როცა საქმე საქმეზე მიდგა, ერთი მტკიცებულებაც წარმოდგენაც კი ვერავინ შეძლო.

ახლაც, წინასწარ იციან რა, რომ მარცხისთვის არიან განწირულნი, შეეცდებიან, ისე წარმოადგინონ, თითქოს არჩევნებისთვის რაღაც პრობლემას აქვს ადგილი და შემდგომ რევოლუციური სცენარების განვითარებაზე იფიქრონ”, – განაცხადა მიხეილ სარჯველაძემ.

ჩვენ გვჭირდება იმგვარი მმართველობა, რომლის მიზანიც საქართველოს რეალური ევროინტეგრაცია იქნება, ამისთვის კი ცვლილებაა საჭირო, – ამის შესახებ „ევროპული საქართველოს“ პოლიტსაბჭოს თავმჯდომარე, გიგი წერეთელმა განაცხადა.

ის გამოეხმაურა კანდიდატის სტატუსთან მიმართებით არსებულ დისკუსიას და აღნიშნა, რომ ჩვენ დღეს მკაფიო სურათი გვექნებოდა კანდიდატის სტატუსთან დაკავშირებით იმ შემთხვევაში, თუ ხელისუფლება ადეკვატურ ნაბიჯებს გადადგამდა მის მოსაპოვებლად და არა საპირისპიროს.

„ეს უნდა იყოს მთავარი საკითხი, ჩვენ გვჭირდება იმგვარი მმართველობა, რომელიც რეალურად ამ დღის წესრიგს მიანიჭებს პრიორიტეტს და გააკეთებს ყველაფერს იმისთვის, რომ არა მხოლოდ სტატუსი მოგვანიჭონ, არამედ გაგრძელდეს ევროკავშირის წევრობისკენ საქართველოს სვლა, სწორედ ამისთვის არის საჭირო მმართველობის ცვლილება“, – განაცხადა გიგი წერეთელმა.

რეკომენდაციები სამწუხაროდ, არ არის შესრულებული, მაგრამ სხვა მიზეზებია, რის გამოც ევროკავშირი დადებით გადაწყვეტილებას მიიღებს, – ამის შესახებ პარტია „საქართველოსთვის“ წევრმა, ანა ბუჩუკურმა განაცხადა.

ბუჩუკური აცხადებს, რომ “ქვეყანას სტატუსი უკვე აქვს” და ამის მიზეზად გეოპოლიტიკურ ფაქტორებს და ხალხის არჩევანს ასახელებს.

ბუჩუკური აცხადებს, რომ „ასოცირებულ ტრიოში“ საქართველო მოწინავე პოზიციებზე იყო ყოველთვის, რაც მნიშვნელოვანი ფაქტორია.

“რეკომენდაციები საერთოდ, ამ შემთხვევაში, რელევანტური არ არის სამწუხაროდ, როცა ჩვენ ვამბობთ, რომ ქვეყანას აქვს სტატუსი მიღებული, ერთ – ერთი გეოპოლიტიკური მიზეზია. ევროკავშირს კარგად ესმის, რომ თუ საქართველო ევროკავშირის კარის მიღმა დარჩება, ეს რუსეთის გავლენის გაზრდას ნიშნავს. რა თქმა უნდა, მნიშვნელოვანი ფაქტორი და არგუმენტი ევროკავშირის მხრიდან არის ის, რომ მოწინავე პოზიციებზე იყო საქართველო ყოველთვის, მათ შორის უკრაინასთან და მოლდოვასთან მიმართებით და მესამე, ეს არის ხალხის განწყობა, რომელმაც მარტში რუსული კანონი არ მიაღებინა ხელისუფლებას. ხალხი, რომელიც ბოლო 30 წელია თავისუფლებისთვის და დასავლური მომავლისთვის იბრძვის.

რაც შეეხება რეკომენდაციებს, სამწუხაროდ, არ არის შესრულებული, მაგრამ სხვა მიზეზებია, რის გამოც ევროკავშირი დადებით გადაწყვეტილებას მიიღებს”, – განაცხადა ბუჩუკურმა.

არ გამოვრიცხავ, რომ “ქართულმა ოცნებამ” ევროკავშირი და მათი რომელიმე წარმომადგენელი შეცდომაში შეიყვანა – რა დაჩქარებული წესითაც მიიღეს “მაუწყებლობის კანონი”, იმ დაჩქარებული წესით უნდა გაუქმდეს , – ამის შესახებ „გირჩის“ დეპუტატმა იაგო ხვიჩიამ განაცხადა.

როგორც მან აღნიშნა, “ქართულ ოცნებას” ცვლილებების მიღების არგუმენტი გამოეცალა.

“ზოგადად, არ გამოვრიცხავ, “ქართულმა ოცნებამ” ევროკავშირი და მათი რომელიმე წარმომადგენელი შეცდომაში შეიყვანა, თითქოს კარგ კანონს იღებდნენ, რადგან „ტვინი შეჭამეს“ ამ კანონის განხილვის დროს, რომ ეს ყველაფერი ევროპის 12 – პუნქტიან გეგმაში წერია და ა.შ.. საბოლოო ჯამში, აღმოჩნდა, რომ არავის მოუთხოვია ამათთვის სიძულვილის ენის თუ განსაკუთრებით, უხამსობის ასეთი ტიპის რეგულირება. გამოვიდა, რომ კანონი მიიღეს ტყუილი არგუმენტით, რომ ევროპელები გვთხოვენო. გამოვიდნენ ევროკავშირის წარმომადგენლები ჩვენთან და თქვეს, რომ მათ ეს არ მოუთხოვიათ. ჩემი აზრით, რაც უნდა გაკეთდეს, რა დაჩქარებული წესითაც მიიღეს ეს კანონი, იმ დაჩქარებული წესით უნდა გაუქმდეს, რადგან მთავარი არგუმენტი გამოეცალა ამ კანონის მიღებას”, – განაცხადა ხვიჩიამ.

ინფორმაციისთვის, ევროკავშირის წარმომადგენლობაში “ინტერპრესნიუსს” „მაუწყებლობის შესახებ“ კანონის თაობაზე განუცხადეს, რომ “უხამსობის“ ცნება დირექტივის ნაწილი არ არის და დირექტივის ფარგლებში რეგულირებას არ საჭიროებს.

მათივე განცხადებით, ქართულ მხარესთან კონსულტაციების განმავლობაში, ევროკომისია ყოველთვის ხაზგასმით აღნიშნავდა მარეგულირებელი კომისიის რეალური დამოუკიდებლობისთვის შემდგომი მუშაობის აუცილებლობას.

ევროკავშირის წარმომადგენლობაში აცხადებენ, რომ ჩვეულებრივ, ევროკავშირის დირექტივები მათი შესრულების ზუსტ წესს არ კარნახობენ და ევროკავშირის წევრი ქვეყნები გარკვეულწილად თავისუფლები არიან გადაწყვეტილების მიღებისას, თუ როგორ გადაიტანონ დირექტივები ეროვნულ კანონმდებლობაში.

“საქართველოს შემთხვევაში, განსაკუთრებით ახლა, როდესაც ქვეყანა ევროკავშირში გაწევრიანების გზაზეა, აუცილებელია, რომ მისი კანონმდებლობა გარკვეულ დებულებებსა და პრინციპებს შეესაბამებოდეს,”- აცხადებენ ევროკავშირის წარმომადგენლობაში.