მანიფესტი ორმაგ ინტერპრეტაციას არ ექვემდებარება, თუ გვინდა, ვიბრძოლოთ და ერთ ნავში ვიყოთ, მაშინ ხელი უნდა ჩავკიდოთ ერთმანეთს, თუ არა, მშვიდობით უნდა დავსვათ წერტილი, – ამის შესახებ გიგი უგულავამ „ნაციონალური მოძრაობის“ მიერ გამოქვეყნებულ მანიფესტთან დაკავშირებით განაცხადა.

„ვფიქრობ, პროცესებს, რომელიც პარტიაში მიმდინარეობს, მას წერტილი უნდა დაესვას, ან იქით ან აქეთ. რაც არ უნდა რთული და მძიმე იყოს ეს, ჩემთვის პირადად, ძალიან მძიმეა, რადგან ბევრი ჩემი ამხანაგი და თანამებრძოლი იქითაც არის და აქეთაც, მაგრამ ის, რასაც მთელი წელია, ვუყურებთ, ეს არის უბრალოდ ამომრჩევლის ზურგის შექცევა. დღეს, როდესაც სახელმწიფოებრიობას გვართმევენ, როცა ამ პარტიის ლიდერი ციხეში ზის, ამის უფლება ჩვენ არ გვაქვს. ამიტომ მგონი, ეს მანიფესტი ორმაგ ინტერპრეტაციას არ ექვემდებარება, თუ გვინდა, რომ ვიბრძოლოთ და ერთ ნავში ვიყოთ, მაშინ ხელი უნდა ჩავკიდოთ ერთმანეთს, თუ არადა, მშვიდობით უნდა დავსვათ წერტილი. წერტილის დასმაში ვგულისხმობ იმას, რომ ან ამ „ბარდაგს“ ვუსვამთ წერტილს, ან ვაგრძელებთ. ამას წერტილი უნდა დაესვას“, – განაცხადა გიგი უგულავამ.

იმისთვის, რომ დავამარცხოთ რუსული რეჟიმი, ჩვენ გვჭირდება უპრეცედენტო ერთობა და გამარჯვების რწმენა. ვირწმუნოთ გამარჯვების და გავერთიანდეთ გამარჯვებისთვის, – ამის შესახებ „ნაციონალური მოძრაობის“ ერთ-ერთმა ლიდერმა, თინა ბოკუჩავამ „ვარდების რევოლუციის“ 20 წლისთავთან დაკავშირებით ღონისძიებაზე სიტყვით გამოსვლისას განაცხადა.

ამასთან, თინა ბოკუჩავას განცხადებით, ბიძინა ივანიშვილის „რუსულმა რეჟიმმა“ საქართველოს მესამე პრეზიდენტი, მიხეილ სააკაშვილი „ვარდების რევოლუციის“ იდეებისთვის და მიღწევებისთვის დაატყვევა.

„დღეს თქვენს წინაშე პირველ სპიკერად და დღევანდელი დღის მთავარ გმირად უნდა იდგეს პრეზიდენტი მიხეილ სააკაშვილი. პრეზიდენტი მიხეილ სააკაშვილია „ვარდების რევოლუციის“ მთავარი გმირი ქართველ ხალხთან ერთად. მთავარი სულის ჩამდგმელი და მთავარი შემოქმედი. სწორედ ამიტომ დაატყვევა ივანიშვილის რუსულმა რეჟიმმა მიხეილ სააკაშვილი, სწორედ „ვარდების რევოლუციის“ იდეებისთვის და მიღწევებისთვის, ამიტომ იმყოფება ის დღეს საპყრობილეში. ამ სულისშემძვრელ უსამართლობას ჩვენ უნდა შევებრძოლოთ და ის დროულად უნდა დავასრულოთ. მე მჯერა, რომ ეს ძალიან მალე მოხდება და ჩვენ ერთად გავაგრძელებთ „ვარდების რევოლუციას“.

პრეზიდენტი სააკაშვილი აწამეს, მოწამლეს, მაგრამ ვერ მოკლეს, რადგან ვერ მოკლეს მასში „ვარდების რევოლუციის“ იდეა. ერთიანი,ძლიერი, დემოკრატიული, ევროპული, თავისუფალი საქართველოს იდეა. ეს არის მთავარი იდეა, რომელიც ამოძრავებდა „ვარდების რევოლუციას“ და რომელიც ამძრავებს პრეზიდენტ სააკაშვილს და გვამოძრავებს ჩვენ. ეს არის იდეა, რომელიც ცოცხლობს თითოეული ჩვენგანის გულში, გონებაში და ამიტომ ვერასდროს მოკლავს მას ვერც ივანიშვილი და ვერც პუტინი.

სწორედ ამიტომ მჯერა დღეს, გამარჯვების და იმის, რომ ჩვენ ერთიანობით, მათ შორის კოალიციური ერთობით, გამარჯვების შემდეგ გავაგრძელებთ „ვარდების რევოლუციის“ იდეას და მივიყვანთ ბოლომდე ჩვენს მიზანს, რომ ჩვენი ქვეყანა შევიდეს ევროკავშირში და ნატოში და საქართველო შედგეს როგორც წარმატებული სახელმწიფო“, – განაცხადა თინა ბოკუჩავამ.

“ნაციონალური მოძრაობის” ერთ-ერთი ლიდერის ზურაბ ჭიაბერაშვილის განცხადებით, ვინც “ნაციონალური მოძრაობის” მანიფესტს არ შეუერთდება, ეს ფაქტობრივად, ნიშნავს იმას, რომ მას დამოუკიდებელი პოლიტიკური ცხოვრება ექნება.

როგორც ზურაბ ჭიაბერაშვილმა ჟურნალისტებს განუცხადა, პარტიის კარი მანიფესტზე ხელმოწერისთვის ყველასთვის ღიაა.

“მანიფესტი არის “ნაციონალური მოძრაობის” განაცხადი, რომ გვაქვს ღია პლატფორმა და ვისაც აქვს სურვილი შემოერთდეს იმ პრინციპებს, რაც მანიფესტშია ჩამოწერილი, კარი ყველასთვის ღიაა. ვინც პარტიის გაუმართლებელი კრიტიკით და პარტიის ლეგიტიმურად არჩეული სტრუქტურების ეჭვქვეშ დაყენებით ცდილობს, რომ პარტია დაასუსტოს, ის თვითონ აყენებს თავს პარტიის გარეთ. პარტიაში ამ მანიფესტზე გადაწყვეტილება მიღებულია. ახლა გადაწყვეტილება ინდივიდუალურად მისაღები აქვს იმ ადამიანებს, ვინც ამ მანიფესტს ნებისმიერი ფორმით შემოერთდება, იქნება ეს სოციალური მედია, ტელევიზია თუ ა.შ. თუ არ შემოერთდება, დამოუკიდებელ გზას აირჩევს. ჩვენ გაგვიხარდება, თუ პარტიას ისინიც შემოერთდებიან, ვისი განცხადებებიც მთელი ამ ხნის განმავლობაში სამწუხაროდ, პარტიის საწინააღმდეგოდ იყო მიმართული. ეს მათი არჩევანი იქნება. “ნაციონალური მოძრაობა” ღიაა ყველასთვის, ვინც მანიფესტს შემოერთდება, ხოლო ვინც არ შემოერთდება, დამოუკიდებელი პოლიტიკური ცხოვრება ექნება”, – განაცხადა ჭიაბერაშვილმა.

კითხვაზე, ნიშნავს თუ არა ეს განცხადება იმას, რომ ასეთ შემთხვევაში ისინი პარტია “ნაციონალურ მოძრაობას” დატოვებენ, ჭიაბერაშვილმა განმარტა: “გადაწყვეტილება არის მანიფესტი და ახლა მანიფესტზე შეერთება-არ შეერთებაზე გადაწყვეტილებას ინდივიდუალურად იღებენ”.

ამნისტიაზე, იდეურ ერთობაზე საუბარი გვესმის ადამიანისგან, რომელიც „ნულოვან ტოლერანტობას“ ქადაგებდა და ყველანი ციხეშიო, გაჰყვიროდა. მას  ხალხი ბრიყვი ჰგონია, – ამის შესახებ პარლამენტის დიასპორის საკითხთა კომიტეტის თავმჯდომარემ, ბექა ოდიშარიამ განაცხადა.

ოდიშარიას თქმით, არჩევნებში „ქართული ოცნება“ გაიმარჯვებს და ოპოზიციას, გაერთიანების გარდა, სხვა შანსი არ აქვს.

„ამნისტიაზე, იდეურ ერთობაზე საუბრობენ და ეს ვისგან გვესმის? იმ ადამიანისგან ხომ არ გვესმის, რომელიც ნულოვან ტოლერანტობას ქადაგებდა და ყველანი ციხეშიო, პარლამენტის ტრიბუნიდან გაჰყვიროდა. ეს ადამიანი ამ ყველაფერს მორჩეს. მატყუარა და ავანტიურისტი რომ არის, ეს გასაგებია. ხალხი ბრიყვი, სულელი და მეხსიერების გარეშე ჰგონია, რაც მეორე უბედურებაა. რაც შეეხება ოპოზიციის გაერთიანებას, ვინ უნდა შეიკრიბოს? „ლელოს“ და გახარიას ერთმანეთი დეკლარირებულად სძულთ. ნულს პლუს ნული არის ნული, მაგრამ აქ პარადოქსია – ერთს პლუს ერთი და კიდევ ერთი არის ნული. არჩევნებში „ქართული ოცნება“ გაიმარჯვებს და მათ, გაერთიანების გარდა, სხვა შანსი არ აქვთ. ეს მათი ბოლო შანსია. „სტრატეგია აღმაშენებელი“ მიხვდა, რომ ერთპროცენტიანია და „ნაციონალურ მოძრაობას“ გაუერთიანდა, პრაგმატული გადაწყვეტილებაა. ხაბეიშვილმა პარტია დაშალა, ყველა გაუშვა და მანჯგალაძე შერჩა. გუშინწინ ხაბეიშვილი კეზერაშვილს ლანძღავდა და მისი ხელდასმული გახდა, ვაშაძე სააკაშვილს ლანძღავდა და „გამარჯვების პლატფორმის“ ლიდერი გახდა. არ ვიცი, ბოლოს ვის და როგორ გაამარჯვებინა“, – განაცხადა ბექა ოდიშარიამ.

“ქართული ოცნება”, რომელიც ბიძინობას აღნიშნავს და სკოლის სახელმძღვანელოებში შეაქვს ეს თარიღი, სხვას არ უნდა მოუწოდებდეს, ვინ რა თარიღი აღნიშნოს, – ასე ეხმაურება ვარდების რევოლუციის“ 20 წლისთავთან დაკავშირებით მმართველი გუნდის წარმომადგენლების განცხადებებს “ნაციონალური მოძრაობის” თავმჯდომარე, თინა ბოკუჩავა.

მისი თქმით,  „ვარდების რევოლუცია“ მოსახლეობის უდიდესი უმრავლესობისთვის გარდამტეხი მომენტი იყო საქართველოს უახლეს ისტორიაში.

“სწორედ “ვარდების რევოლუციის” რეფორმების შედეგად შეიქმნა თანამედროვე ქართული სახელმწიფო და გზა გაეკაფა ქვეყანას ევროპისკენ. ასე რომ, თუ “რუსულ ოცნებას” სურს, რომ ბიძინობა აღნიშნოს, აღნიშნონ მათ ბიძინობა, ჩვენ აღვნიშნავთ “ვარდების რევოლუციას”, გიორგობას და დარწმუნებული ვარ, მომავალ წელს ამ დროს საქართველოს ეყოლება კოალიციური, ევროპული ხელისუფლება, რომელიც უკვე ერთობლივად აღნიშნავს “ვარდების რევოლუციის” 21 წლისთავს”, – განაცხადა ბოკუჩავამ.

რაც შეეხება ერთობის მანიფესტს, ბოკუჩავა აცხადებს, რომ ვინც მანიფესტს ხელს არ მოაწერს, თავად აღმოჩნდება პარტიის მიღმა. მისივე თქმით, სავარაუდოდ, გარიცხვის მექანიზმი წესდებაში გაწერილია, თუმცა, მიიჩნევს, რომ პარტიის დატოვება პოლიტიკური გადაწყვეტილებაა, რომელიც თავად პოლიტიკოსმა უნდა მიიღოს.

“ადამიანებს, რომლებიც სამწუხაროდ, ნამდვილად არ იყვნენ ერთობაზე ორიენტირებულნი, ტყვეობაში მყოფი მიხეილ სააკაშვილი შესაძლებლობას აძლევს, ხელი მოაწერონ ერთობის მანიფესტს და კვლავ გავერთიანდეთ საერთო გამარჯვებისთვის და იმ დიდი ბრძოლისთვის, რომელიც 2024 წლის არჩევნებამდე გველოდება. მე მხოლოდ იმედი შემიძლია გამოვთქვა, რომ ეს ადამიანები ამ შესაძლებლობას გამოიყენებენ, თუ არ გამოიყენებენ, როგორც პრეზიდენტმა სააკაშვილმა განმარტა, თავად აღმოჩნდებიან პარტიის მიღმა. პროცედურულ ტექნიკური ნაწილით არ დავინტერესებულვარ, თუმცა დარწმუნებული ვარ, გარიცხვის მექანიზმი წესდებაში არის გაწერილი, სავარაუდოდ, ან პოლიტსაბჭოს თავმჯდომარე, ან გენმდივანი ან პოლიტსაბჭო იღებს ამ გადაწყვეტილებას. სამართლებრივი ტექნიკური ნიუანსებით არ დავინტერესებულვარ, რადგან ვთვლი, რომ პარტიის დატოვება არის პოლიტიკური გადაწყვეტილება, რომელიც თავად პოლიტიკოსმა უნდა მიიღოს და ასე ხდებოდა ყოველთვის, მაგრამ იმედი მაქვს, რომ ეს ადამიანები გამოიყენებენ ერთობის მანიფესტის შესძლებლობას”, – განაცხადა ბოკუჩავამ.