ღაზის სექტორში მიმდინარე სახმელეთო ოპერაცია ომის მეორე ეტაპია ძალიან მკაფიო მიზნებით – თქვა ისრაელის პრემიერ მინისტრმა ჟურნალისტებისთვის გამართულ პრესკონფერენციაზე.

ნეთანიაჰუმ მედიის შეკითხვებს, ღაზაში დატყვევებული მძევლების ოჯახის წევრებთან შეხვედრის შემდეგ უპასუხა.

ნეთანიაჰუმ აღნიშნა, რომ ისრაელის სახმელეთო ჯარები შევიდნენ, “ბოროტების ციხესიმაგრეში” (ღაზას სექტორს), ჰამასის ლიკვიდაციისა და მძევლების გათავისუფლების მიზნით.

ჯარისკაცები და მეთაურები ახლა ღაზას სექტორში არიან, ისინი ყველგან არიან განლაგებული.  ეს იქნება ხანგრძლივი და რთული ომი. ჩვენ გავიმარჯვებთ – ამბობს ნეთანიაჰუ.

მან უარყო ბრალდებები, რომელიც დღეს თურქეთის პრეზიდენტმა გააკეთა და ისრაელს “ომის დამნაშავე” უწოდა, თუმცა ერდოღანი არ უხსენებია.

„ჩვენ არ უნდა დაგვადანაშაულონ ომის დანაშაულებში, ეს ფარისევლობაა. ჩვენ ვართ ყველაზე მორალური არმია მსოფლიოში” – თქვა ისრაელის პრემიერმინისტრმა.

ნეთანიაჰუს თქმით, ისრაელის არმია სიფრთხილის ზომებს იღებს მშვიდობიანი მოსახლეობის დასაცავად. მან ჰამასი დაადანაშაულა კაცობრიობის წინააღმდეგ დანაშაულის ჩადენაში და აღნიშნა, რომ  დაჯგუფება ხალხს ცოცხალ ფარად იყენებს.

პრესკონფერენციამდე ბენიამინ ნეთანიაჰუ მძევლების ოჯახის წევრებს შეხვდა და პირობა დადო, რომ ყველაფერს გააკეთეს მათი ახლობლების სახლში დასაბრუნებლად.

მძევლები ჰამასის მებრძოლებმა 7 ოქტომბერს, სამხრეთ ისრაელზე უპრეცედენტო თავდასხმის დროს აიყვანეს. არსებული მონაცემებით, ტერორისტების ტყვეობაში 229 პირია. მათ შორის, ბავშვები, მოხუცები და სამხედრო მოსამსახურეები.

ისრაელის მთავრობის ცნობით, მძევლებიდან მინიმუმ 135 უცხოელია, ან ორმაგი მოქალაქეობა აქვს.

ისრაელმა დღეს ოფიციალურად გამოაცხადა , რომ ომი ახალ ეტაპზე გადავიდა. თავდაცვის მინისტრის, იოავ გალანტის თქმით, ისრაელის არმია გააგრძელებს ოპერაციას, რომელიც ღამით დაიწყო ღაზის სექტორში და რომელიც მიზნად ისახავს ჰამასის გვირაბებისა და სხვა ინფრასტრუქტურის განადგურებას, ასევე ისლამისტური მოძრაობის ლიდერების ლიკვიდაციას.

ისრაელის ფართომასშტაბიანმა სახმელეთო ოპერაციებმა ღაზაში შეიძლება კატასტროფული შედეგები გამოიწვიოს, შესაძლოა კიდევ ათასობით მშვიდობიანი მოქალაქე დაიღუპოს, – ამის შესახებ გაეროს ადამიანის უფლებათა უმაღლესმა კომისარმა ვოლკერ თურქმა განაცხადა.

ვოლკერ თურქმა მოუწოდა ორივე მხარეს და რეგიონში გავლენის მქონე სხვა მხარეებს, ყველაფერი გაეკეთებინათ კონფლიქტის დეესკალაციისთვის.

„წუხანდელი დაბომბვა და სახმელეთო ოპერაციები ისრაელის ძალების მხრიდან ღაზაში, გავრცელებული ინფორმაციით, ყველაზე ინტენსიური იყო, რამაც ეს საშინელი კრიზისი ძალადობისა და ტკივილის ახალ დონეზე გადაიყვანა. სამოქალაქო მოსახლეობის გაჭირვება და ტანჯვა მძიმდება, ისრაელის დარტყმებმა სატელეკომუნიკაციო დანადგარებზე ღაზას მოსახლეობა გარესამყაროს მოსწყვიტა“, – აღნიშნა ვოლკერმა.

პალესტინის მხარდამჭერ აქციაზე რეჯეფ თაიფ ერდოღანის მიერ გაკეთებული განცხადების შემდეგ, ისრაელმა თურქეთიდან დიპლომატები გამოიხმო. გამოხმობის მიზანი ორ ქვეყანას შორის ურთიერთობის ხელახალი შეფასებაა.

„თურქეთის მზარდი რიტორიკის ფონზე, მე დიპლომატიურ წარმომადგენლებს მივეცი ინსტრუქცია, დაბრუნდნენ თურქეთიდან, რათა ხელახლა შევაფასოთ ისრაელი-თურქეთის ურთიერთობა”. – თქვა ისრაელის საგარეო საქმეთა მინისტრმა, ელი კოენმა.

თურქეთსა და ისრაელს შორის დიპლომატიური ურთიერთობა სრულად ცოტა ხნის წინ აღდგა.

28 ოქტომბრის აქციაზე ერდოღანმა ისრაელს ომის დამნაშავე უწოდა.

მოხარული ვარ, რომ საქართველომ თავი შეიკავა გაეროს რეზოლუციის მხარდაჭერისგან, – ამის შესახებ საქართველოში ისრაელის ელჩმა, ჰადას მეიცადმა „ქრონიკაში“ განაცხადა.

„მე ვერ ვხსნი, რატომ მისცა ზოგიერთმა ქვეყანამ ხმა ამ რეზოლუციას გაეროში. მოხარული ვარ, რომ საქართველომ თავი შეიკავა რეზოლუციის მხარდაჭერისგან და მხარი დაუჭირა მასში „ჰამასის“ მოხსენიებას. უნდა დავიწყოთ იმით, რომ ომის დაწყების შემდეგ ჩვენ ვხედავთ აშკარა ნაკლებობას ნათელი და მკაფიო დაგმობისა. ჩვენთვის ძნელი წარმოსადგენია ის ფაქტი, რომ ბავშვები ამოჟლიტეს და ზოგიერთი ამ ბარბაროსებს ეძახის თავისუფლებისთვის მებრძოლებს, მათ არომანტიზებს. ბავსვებს კლავდნენ, გოგონებს აუპატიურებდნენ და ეს ყველაფერი დოკუმენტირებულია. ეს არის საზიზღარი რეზოლუცია. მოწოდება ცეცხლის შეწყვეტაზე იმ პირობის გარეშე, რომ დაუყოვნებლივ უნდა განთავისუფლდეს 229 მძევალი. მე არ ვიცი ამას რა დავარქვა“, – აღნიშნა ისრაელის ელჩმა.

გაეროს გენერალურმა ასამბლეამ რეზოლუცია მიიღო, რომელიც ღაზის სექტორში ცეცხლის შეწყვეტისკენ მოუწოდებს. დოკუმენტში, რომელიც იორდანიამ წარადგინა, “ჰამასი” არ არის მოხსენიებული, როგორც ტერორისტული ჯგუფი.

ღაზას სექტორში საომარი მოქმედებების შეჩერება სასწრაფოდ არის საჭირო, რათა შესაძლებელი გახდეს ჰუმანიტარულ დახმარებაზე წვდომა, – ამის შესახებ ევროკავშირის უმაღლესი წარმომადგენელი ჯოზეფ ბორელი X-ის პირად გვერდზე წერს.

„ღაზა სრულიად ჩაბნელებულია და იზოლაციაშია მაშინ, როდესაც მასიური დაბომბვა გრძელდება. გაერო-ს პალესტინელი დევნილების დახმარების სააგენტო გვაფრთხილებს ღაზას მოსახლეობის სასოწარკვეთილი მდგომარეობის შესახებ ელექტროენერგიის, საკვების, წყლის გარეშე. ძალიან ბევრი მშვიდობიანი მოქალაქე დაიღუპა, მათ შორის ბავშვები. ეს საერთაშორისო ჰუმანიტარულ სამართალს ეწინააღმდეგება. საომარი ქმედებების შეჩერება სასწრაფოდ არის საჭირო, რათა შესაძლებელი გახდეს ჰუმანიტარულ დახმარებაზე წვდომა. მშვიდობიანი მოსახლეობის წინააღმდეგ ყველა თავდასხმას ვგმობთ, მათ შორის ისრაელის წინააღმდეგ განურჩეველი სარაკეტო თავდასხმების გაგრძელებას და ვითხოვთ ყველა მძევლის დაუყოვნებლივ და უპირობო გათავისუფლებას” – წერს ბორელი.

რუსეთის საგარეო საქმეთა მინისტრის, სერგეი ლავროვის თქმით, ისრაელის მიერ ღაზის დაბომბვა საერთაშორისო სამართალს ეწინააღმდეგება და ქმნის კატასტროფის რისკს, რომელიც შეიძლება, ათწლეულების განმავლობაში გაგრძელდეს, – ამის შესახებ Al Jazeera წერს.

„მიუხედავად იმისა, რომ ჩვენ ვგმობთ ტერორიზმს, კატეგორიულად არ ვეთანხმებით, რომ თქვენ [ისრაელს] შეგიძლიათ, ტერორიზმს უპასუხოთ საერთაშორისო ჰუმანიტარული სამართლის ნორმების დარღვევით, მათ შორის – ძალის განურჩევლად გამოყენებით იმ ობიექტებზე, რომლებშიც მშვიდობიანი მოქალაქეების, მათ შორის მძევლების ყოფნის შესახებ ფლობთ ინფორმაციას. თუ ღაზა განადგურდება და მისი ორი მილიონი მცხოვრები ამ ტერიტორიიდან განიდევნება (როგორც ამას ისრაელსა და მის ფარგლებს გარეთ მყოფი ზოგიერთი პოლიტიკოსი ვარაუდობს), ეს გამოიწვევს კატასტროფას მრავალი ათწლეულის, შესაძლოა, საუკუნეების განმავლობაშიც კი”, – თქვა ლავროვმა.

ლიბანისა და ისრაელის საზღვარზე მზარდი დაძაბულობის ფონზე ჭურვი სამხრეთ ლიბანში გაეროს სამშვიდობო მისიის (Unifil) შტაბბინაში ჩამოვარდა, – ამის შესახებ გაეროს წარმომადგენელმა განაცხადა.

ჭურვი არ აფეთქდა და არავინ დაშავებულა, მაგრამ დაზიანდა ბაზა.

Unifil-ი მუშაობს თავდასხმის  წარმოშობის დადგენაზე.

ლიბანური დაჯგუფება „ჰეზბოლასა“ და ისრაელის სამხედროებსა შორის ცეცხლის გახსნა საღვრის გასწვრივ, ბოლო სამი კვირის განმავლობაში გახშირდა.