პარლამენტის არცერთი თავმჯდომარე, მათ შორს „ოცნების“ მმართველობის პირობებში, ასეთ უკანონო და დრაკონულ გადაწყვეტილებებს, როგორსაც თქვენ იღებთ, არ იღებდა – სრულიად გაუმართლებელია თქვენი გადაწყვეტილება, რომ დეპუტატებს პრეზიდენტ სააკაშვილთან შესვლის შესაძლებლობა ერთპიროვნულად აუკრძალოთ, – ასე მიმართა საპარლამენტო ფრაქცია „ნაციონალური მოძრაობის“ თავმჯდომარე თინა ბოკუჩავამ ბიუროს სხდომაზე პარლამენტის თავმჯდომარეს, შალვა პაპუაშვილს.

ბოკუჩავას თქმით, სააკაშვილი ივანიშვილის მთავარი პოლიტიკური ოპონენტია და მასთან პირადი კომუნიკაცია პარლამენტის წევრებისთვის მნიშვნელოვანია.

„სრულიად გაუმართლებელი და უკანონოა თქვენი გადაწყვეტილება, რომ ერთპიროვნულად აუკრძალოთ ყველა დეპუტატს პრეზიდენტ სააკაშვილთან შესვლის შესაძლებლობა, რომელიც ივანიშვილის რეჟიმის პოლიტიკური ტყვეა. თქვენ არაერთხელ მოგმართეთ, მათ შორს ყველა ოპოზიციონერი დეპუტატის სახელით და ეს არ არის მხოლოდ „ნაციონალური მოძრაობის“ მოთხოვნა. პრეზიდენტი სააკაშვილი არის ივანიშვილის მთავარი პოლიტიკური ოპონენტი და მასთან პირადი კომუნიკაცია მნიშვნელოვანია პარლამენტის წევრებისთვის. არ გაქვთ არანაირი სამართლებრივი საფუძველი. გასაგებია, რომ ივანიშვილის სურვილებს უსიტყვოდ ასრულებთ, მაგრამ პარლამენტის არცერთი თავმჯდომარე, მათ შორს „ოცნების“ მმართველობის პირობებში, ასეთ უკანონო და დრაკონულ გადაწყვეტილებებს, როგორსაც თქვენ იღებთ, არ იღებდა. ძალიან გთხოვთ, განმარტოთ ივანიშვილის მონურ მორჩილებას რით ადასტურებთ, რომ პარლამენტის წევრებს უკრძალავთ პრეზიდენტ სააკაშვილის მონახულების შესაძლებლობას“,- განაცხადა თინა ბოკუჩავამ.

დივერსიაზე ვინ ვინ და მიხეილ სააკაშვილი, უცხო ქვეყნის მოქალაქე, რომელიც კონტეინერით შემოიპარა საქართველოში, არ უნდა საუბრობდეს, – ამის შესახებ საქართველოს პარლამენტის თავმჯდომარემ შალვა პაპუაშვილმა განაცხადა.

„ერთადერთი დივერსია, რომელიც ჩვენ ვნახეთ იყო 2022 წლის ოქტომბერში, როდესაც მიხეილ სააკაშვილი შემოიპარა კონტეინერით საქართველოში. ზუსტად ეს იყო დივერსიული ქმედება, რომელიც უცხო ქვეყნის სპეცსამსახურის მიერ იყო დაგეგმილი და მიხეილ სააკაშვილი, როგორც უცხო ქვეყნის სპეცსამსახურის მიერ მართული ადამიანი შემოაპარეს კონტეინერით არჩევნებამდე ორი დღით ადრე იმისთვის, რომ ქვეყანა აერიათ, დესტაბილიზაცია მოეხდინათ“, – განმარტა შალვა პაპუაშვილმა.

მავნებელია, ვინც სტატუსს ეწინააღმდეგება, იქნება ის ქართველი თუ არაქართველი. გული მისკდება, ისე ველოდები სტატუსს, – ამის შესახებ პარტია „მოქალაქეების“ ლიდერმა, ალეკო ელისაშვილმა განაცხადა.

ელისაშვილის თქმით, სტატუსის მიღებით ქვეყანა სარგებელს მიიღებს.

„მმართველი გუნდისგან განსხვავებით, არ ვიცი, მოგვცემენ თუ არა სტატუსს. ამბობდნენ, შანსები 50-50-ზე არის, ახლა შანსებმა მოიმატაო. მინდა, სტატუსი მივიღოთ, გული მისკდება, ისე მინდა. უარყოფითი დასკვნა რომ იყოს და სტატუსი ვერ მივიღოთ, ეს ჩვენი ძალიან დიდი მარცხი იქნება. სტატუსს თუ მივიღებთ, უბრალო ხალხი იხეირებს, მაგალითად, მძღოლები, რომლებსაც სტატუსის მოპოვების შემდეგ მიეცემათ უფლება, დიდ სატვირთო მანქანებზე, ტრაილერებზე დასხდნენ ევროპაში. ძალიან იხეირა მოლდოვამ, ეს მათთვის კარგი შემოსავალია. უკრაინა ვერ ხეირობს, რადგან ქვეყნიდან კაცების გასვლა აკრძალულია. ასევე, სტატუსის მიღების შემდეგ გაგვეზრდება ფონდებზე წვდომა. ჩვენნაირი პატარა ქვეყნისთვის სტატუსის მიღება იქნება ძალიან მნიშვნელოვანი. სტატუსს ვინც ეწინააღმდეგება, ის მავნებელია, ქართველი იქნება თუ არაქართველი. გული მისკდება, ისე ველოდები სტატუსს. მოგვცემენ თუ არა სტატუსს, მარჩიელობას არ ვაპირებ. მაკრონს და შოლცს მე არ შევხვედრივარ პირისპირ, რომ მათთვის მეკითხა. ვინც მათ ხვდება, იმას არ უშვებენ – აგერ, სალომე ზურაბიშვილს არ უშვებენ. მინდა, რომ სტატუსი მოგვცენ.

მეც ვხვდები ხოლმე უცხოელებს, მათ შორის საზღვარგარეთ და საქართველოშიც. ჩემთან ასე პირდაპირ დახურულ შეხვედრაზე უცხოელებს შეშფოთება არ გამოუთქვამთ. ჩემთვის დაუსვამთ კითხვები, სტატუსის მიღების შემთხვევაში რა მოხდება, რა შეიცვლება საქართველოში და ვერმიღების შემთხვევაში რა შეიცვლება, როგორ ვფიქრობ მე და ჩემი პარტია, რა არგუმენტებია ერთის ან მეორის სასარგებლოდ. ჩვენ ვამბობთ, რომ რა მნიშვნელობა აქვს, „ქართული ოცნებაა“ ხელისუფლებაში თუ არა, სტატუსი უნდა მიიღოს ხალხმა და არა – მთავრობამ. პირდაპირ რომ ეთქვათ, სხვებს არ უნდათ და თქვენ რას ფიქრობთო, ასეთი რამ ჩვენი პარტიის პრაქტიკაში არ ყოფილა. ხათუნას და ხატიას ასეთი რამ თუ უთხრეს, მათ ჰკითხეთ. ქართველი პოლიტიკოსი თუ ვინმეა ასეთი, რომელიც უცხოელებს ეუბნება, საქართველოს არ მისცეთ სტატუსი, რადგან „ქართული ოცნებაა“ ხელისუფლებაშიო, მავნებელია, ვერ ვხდები, როგორ უნდა ეწინააღმდეგებოდე სტატუსის მიღებას, სტატუსით იხეირებს ხალხი“, – განაცხადა ალეკო ელისაშვილმა.

სააკაშვილი მწვავე კონკურენციას გრძნობს, რადგან მისი გუნდი ფულისა და ტელევიზიების გადანაწილებით არის დაკავებული, ამიტომ სურს, ყურადღების ცენტრში დარჩეს, – ამის შესახებ პარლამენტის ვიცე-სპიკერმა, არჩილ თალაკვაძემ განაცხადა.

არჩილ თალაკვაძეს კითხვა დაუსვეს დღევანდელ სასამართლო პროცესზე მიხეილ სააკაშვილის დისტანციურად ჩართვის დროს გაკეთებულ განცხადებებზე.

„მიხეილ სააკაშვილს ბევრი მნახველი ჰყავს, ვინც იმ ინფორმაციებს ისმენს, რაც მას სიამოვნებს და მოსწონს. ასევე ის უყურებს ტელევიზორს, სამოქალაქო კლინიკაში იმყოფება და მისი პირობები მაღალ მოთხოვნებს აკმაყოფილებს. სამწუხაროა, რომ მისი გარემოცვა პირობებზე სპეკულაციებს ისევ აგრძელებს. რიტორიკა შეცვალეს, თუმცა ეს ადამიანები არ ჩერდებიან და ლობისტების დაქირავებას აგრძელებენ. სააკაშვილის განცხადებებს ერთადერთი მიზანი აქვს – მისი გუნდი, მისი პარტიის გუნდი ფულისა და ტელევიზიების გადანაწილებით არის დაკავებული და სააკაშვილი მწვავე კონკურენციას გრძნობს, რის გამოც სურს, ყურადღების ცენტრში და ყოველდღიურ ნიუსებში დარჩეს“, – განაცხადა არჩილ თალაკვაძემ.

მიხეილ სააკაშვილის განცხადებებს თუ გადავხედავთ, სრულიად ნათელია, რომ ეს არის ადამიანი, ვინც აშკარად გამოხატავს სურვილს, ზრახვას, რომ ქვეყანაში იყოს დესტაბილიზაცია, არეულობა და ამისთვის ყველაფერს აკეთებს, – ამის შესახებ საპარლამენტო უმრავლესობის წევრმა, ალუდა ღუდუშაურმა განაცხადა.

ღუდუშაურის თქმით, სწორედ სააკაშვილია ის, ვინც ამ მიზნისთვის დიდი ნაბიჯი გადადგა.

„სააკაშვილმა უნდა გასცეს პასუხი მთავარ კითხვას: რა მიზანს ემსახურებოდა ქვეყანაში იმ ფორმით შემოსვლა? მისი მიზანი იყო, არეულობა და დესტაბილიზაცია მოეწყო, უფრო მეტიც, ქართველი ხალხის სისხლისღვრა. მათი მთავარი ამოცანაა, ნებისმიერ ფასად ხელში ჩაიგდონ ხელისუფლება. ქვეყანაში დესტაბილიზაციის მოწყობის საშუალებას არავის მივცემთ. ქვეყანას არეულობა და დაპირისპირება არ სჭირდება, სჭირდება სტაბილურობა და მშვიდობა. თუ ფიქრობენ, რომ თავიანთი განცხადებებით თავს გადაიზღვევენ, ვერავინ დააღწევს თავს იმ მძიმე პასუხისმგებლობას, რასაც ქვეყანაში არეულობის მოწყობა ჰქვია. სააკაშვილი და მისი ბანდა დაინტერესებული არიან, რომ ქვეყანაში არეულობა და სისხლისღვრა იყოს. ეს ადამიანები ჩვენი გმირი პოლიციელების მიმართ „მოლოტოვის კოქტეილის“ სროლას და მათ ცოცხლად დაწვას ამართლებდნენ. ესენი არიან ამის წამახალისებელები“, – აღნიშნა ალუდა ღუდუშაურმა.

ღუდუშაურის განმარტებით, როგორც ჩანს, საქართველო სამართლიანად მიიღებს კანდიდატის სტატუსს, ამიტომ არის მცდელობა, ეს პროცესი გააუბრალოონ და ითხოვენ ხელისუფლების შეცვლას.

„კარგად გვახსოვს მათი ზრახვა, რომ სტატუსის არმოცემის შემთხვევაში აპოკალიფსს მოაწყობდნენ. ახლა ცდილობენ, რომ ეს პროცესი გააუბრალოონ. სააკაშვილი უღირსად და ამორალურად იქცევა. არ მგონია, რომ დედამიწაზე დარჩენილია ვინმე, ვინც მას ღირსებისა და მორალის მქონე პირად აღიქვამს. ეს არის ადამიანობისგან დაცლილი, ფარჩაკი და ბოროტი ადამიანი, რომელიც საქართველოს განვითარებას პირდაპირ ებრძვის. ეს გვაძლევს კიდევ მეტ მოტივაციას, რომ ქვეყანა წინ წავიდეს და განვითარდეს. ქვეყანას ნათელი მომავალი აქვს და არა ისეთი, როგორიც სააკაშვილს, ადეიშვილს უნდათ“, – განაცხადა ალუდა ღუდუშაურმა.

საქართველოს პრემიერ-მინისტრ ირაკლი ღარიბაშვილის ხელმძღვანელობით მთავრობის სხდომა გაიმართა.

მინისტრთა კაბინეტის წევრებმა დღის წესრიგით გათვალისწინებულ 15 საკითხზე იმსჯელეს.

სხდომაზე განიხილეს პროექტი, რომლის მიხედვითაც ონკოლოგიური ქირურგია როგორც გეგმური, ისე გადაუდებელი ოპერაციები, ქვეყნის მასშტაბით, ყველა ონკოპაციენტს (გარდა საბიუჯეტო სახსრებით დაზღვეული პირებისა) დაუფინანსდება. მათ შორის არიან დაზღვეული ვეტერანები და ის პაციენტებიც, რომელთა წლიური შემოსავალი 40 000 ლარზე მეტია.

მიმდინარე წლის აგვისტოდან გადაწყვეტილებით ჰორმონოთერაპია, ქიმიოთერაპია, სხივური თერაპია და მედიკამენტები, ქვეყნის მასშტაბით, ყველა ონკოლოგიურ პაციენტს უფინანსდებოდა. დღეს − საქართველოს მთავრობის მიერ დამტკიცებული ცვლილების მიხედვით − მოქალაქეებისთვის თანაბრად იქნება ხელმისაწვდომი როგორც ქიმიო/ჰორმონო/სხივური თერაპიებისა და მედიკამენტების, ისე ონკოლოგიური ქირურგიის დაფინანსება.

აღნიშნული გადაწყვეტილებით ონკოლოგიური დაავადებების მკურნალობა, საყოველთაო ჯანდაცვის პროგრამის ფარგლებში, თითოეული ბენეფიციარისთვის, მათი შემოსავლის მიუხედავად, თანაბრად ხელმისაწვდომი იქნება.

მინისტრთა კაბინეტის წევრებმა ასევე განიხილეს პროექტი, რომლის მიხედვითაც სტომატოლოგიური მომსახურების მიმწოდებელთათვის ახალი სტანდარტები წესდება. ჯანდაცვის სამინისტროს ინიციატივით მკაცრდება როგორც საქმიანობის დაწყების, ისე – ოპერირების წესები. ცვლილებების მიზანი პაციენტის უსაფრთხოების დაცვა და თანამედროვე სტანდარტების შესაბამისი სერვისების უზრუნველყოფაა.

ცვლილების მიხედვით, სტომატოლოგიური დაწესებულებებისთვის განახლდა, დაზუსტდა და უფრო დეტალურად გაიწერა ინფექციის პრევენციის, კონტროლის, სტერილიზაცია-დეზინფექციისა და სამედიცინო ნარჩენების მართვის აუცილებელი კრიტერიუმები. პროცესის უკეთ სამართავად სავალდებულო გახდა დაწესებულებაში ინფექციების კონტროლზე პასუხისმგებელი პირის გამოყოფა.

სტომატოლოგიური დაწესებულება ვალდებული ხდება, უზრუნველყოს თანამშრომელთა პროფილაქტიკური იმუნიზაცია B ჰეპატიტზე და სკრინინგი C ჰეპატიტზე ექვს თვეში ერთხელ.

ცვლილებებით განსაზღვრული მოთხოვნები, არსებული სტომატოლოგიური კაბინეტებისა და კლინიკებისთვის, სავალდებულო 2024 წლის იანვრიდან იქნება. ახალი დაწესებულებები კი მხოლოდ ამ სტანდარტების დაკმაყოფილების შემთხვევაში შეძლებენ საქმიანობის დაწყებას.

საქართველოს მთავრობის სხდომაზე ასევე იმსჯელეს 75 დევნილი ოჯახისთვის (196 პირი) საერთო სარგებლობაში არსებული ფართების საკუთრებაში გადაცემის საკითხზე. გადასაცემი ქონება თბილისსა და დაბა წყნეთში მდებარეობს. საუბრისას პრემიერ-მინისტრმა ხაზი გაუსვა, რომ მთავრობისთვის ერთ-ერთი უპირველესია დევნილი ოჯახებისთვის ღირსეული საცხოვრებელი პირობების შექმნა, შესაბამისად, ეს პროცესი აქტიურად გაგრძელდება, რომ არცერთი დევნილი ოჯახი არ დარჩეს სახელმწიფოს ყურადღების გარეშე.

გარდა ამისა, სხდომაზე განიხილეს ხუთი ელექტროსადგურის განვითარებისა და ხელშეწყობის პროექტი, რომელთა განხორციელებისთვის ტექნიკურ-ეკონომიკური კვლევები უნდა ჩატარდეს. მთავრობის სხდომაზე წარდგენილი ჰიდროსადგურების ჯამური დადგმული სიმძლავრე 118 მგვ-ზე მეტია, ხოლო ჯამურად განსახორციელებელი ინვესტიცია 167 მილიონ აშშ დოლარს აჭარბებს.

ტექნიკურ-ეკონომიკური კვლევების წარმატებით დასრულების შემთხვევაში პროექტები შიდა ქართლის რეგიონში, კერძოდ − ქარელის, ხაშურისა და კასპის მუნიციპალიტეტებში განხორციელდება.