ნიდერლანდების პრემიერ-მინისტრმა მარკ რუტეს განცხადებით, საქართველოს მთავრობის მეთაურთან შეხვედრაზე განიხილავენ უკრაინაში მიმდინარე რუსეთის აგრესიას, ასევე საქართველოში მიმდინარე პროცესებს.

„ჩვენ ძალიან მჭიდროდ ვმუშაობთ საქართველოსთან. უკრაინის წინააღმდეგ რუსეთის მიერ განხორციელებული საშინელი აგრესია გავლენას ახდენს მთელს რეგიონზე, მათ შორის საქართველოზე და მოლდოვაზე. რა თქმა უნდა ჩვენ განვიხილავთ ამ საკითხებს და საქართველოში მიმდინარე პროცესებს“, – ამბობს მარკ რუტე. მედიის კითხვას – რა იქნება შეხვედრაზე მისი მთავარი გზავნილი, ნიდერლანდების პრემიერი ასე პასუხობს: „ცხადია, ყველა საკითხზე ერთ მოსაზრებაზე არ ვართ, მაგრამ მთლიანობაში რაც შეეხება საქართველოს ევროპულს ორიენტაციას, ფაქტია, რომ საქართველო მუშაობს წინსვლისთვის კანდიდატის სტატუსის მისაღებად და კიდევ ერთხელ ვიმეორებ, რომ ევროკომისიაზეა დამოკიდებული რეკომენდაციის გაცემა. ცხადია, ამ თემებს განვიხილავთ“. მარკ რუტემ ასევე უპასუხა შეკითხვას, დაუჭერს თუ არა მხარს საქართველოსთვის ევროკავშირის კანდიდატის სტატუსის მინიჭების საკითხს. „მხოლოდ ჩემზე არ არის დამოკიდებული. ყოველთვის ევროკომისია ევროპული საბჭოსთვის გასცემს რეკომენდაციას, თუ რა შემდგომი ნაბიჯი გადაიდგას. გასული წლის ივნისში მივიღეთ გადაწყვეტილება კანდიდატის სტატუსის მინიჭების შესახებ მოლდოვასა და უკრაინისთვის, მაგრამ გვქონდა საქართველოზე სიღრმისეული განხილვა. საქართველომ იცის, რომ ჩვენ მივყვებით პროცესს და დიდი იმედი გვაქვს შემდეგ ეტაპზე გადასვლის“, – აცხადებს ნიდერლანდების პრემიერ-მინისტრი.

“იმედი მაქვს, რომ რამდენიმე წელიწადში იქნებით ევროკავშირის წევრი,” – ამის შესახებ პოლონეთის პრეზიდენტმა ანდჟეი დუდამ რეიკიავიკში მიმდინარე ევროპის საბჭოს სახელმწიფოებისა და მთავრობების მეთაურების მე-4 სამიტის გახსნის ცერემონიაზე, მედიასთან განაცხადა.

„ქრონიკის“ კითხვას – დაუჭერს თუ არა მხარს წლის ბოლოს საქართველოსთვის ევროკავშირის კანდიდატის სტატუსის მინიჭების საკითხს, პოლონეთის პრეზიდენტი ასე პასუხობს:

„დიახ, დიახ. მე მხარს ვუჭერ ევროკავშირის ღია კარის პოლიტიკას. 2004 წელს გაწევრიანდა პოლონეთი ევროკავშირში და ჩემი აზრით, ევროკავშირის კარი ღია უნდა იყოს ახალი წევრებისთვის, ახალი კანდიდატებისთვის და საქართველო ერთ-ერთია მათ შორის. მთლიანობაში მე მხარს ვუჭერ საქართველოს. მე წლებია საქართველოს მხარდამჭერი ვარ“, – განაცხადა ანდჟეი დუდამ.

რეიკიავიკში ევროპის საბჭოს სახელმწიფოებისა და მთავრობების მეთაურების მე-4 სამიტი გაიხსნა. სამიტში საქართველოს პრემიერ-მინისტრიც მონაწილეობს. მთავრობის მეთაური სამიტის მონაწილეებს სიტყვით მიმართავს.

ოპოზიცია აწარმოებს კამპანიას კანდიდატის სტატუსის წინააღმდეგ და ამ კამპანიაში ძალიან კარგად ჯდება იუსტიციის საბჭოს არამოსამართლე წევრების ვერ არჩევა, აქედან გამომდინარე, ერთი წელია, არ გვეუბნებიან, ვის დაუჭერენ მხარს, – ამის შესახებ პარტია „ქართული ოცნების“ თავმჯდომარე ირაკლი კობახიძემ მედიასთან განაცხადა. კობახიძის თქმით, საკითხი კენჭისყრაზე დადგება და საზოგადოება კიდევ ერთხელ დაინახავს, ვის რა დამოკიდებულება აქვს პროცესის მიმართ, რასაც ჰქვია კანდიდატის სტატუსის მიღება. ოკუპანტი ქვეყნის მიერ ცალმხრივად გაუქმებული სავიზო რეჟიმი და აღდგენილი პირდაპირი ფრენები. მმართველი გუნდის პოზიცია და ხედვები. სტუმარი: პარტია „ქართული ოცნების“ თავმჯდომარე ირაკლი კობახიძე მსგავსი: ოკუპანტი ქვეყნის მიერ ცალმხრივად გაუქმებული სავიზო რეჟიმი და აღდგენილი პირდაპირი ფრენები. მმართველი გუნდის პოზიცია და ხედვები. სტუმარი: პარტია „ქართული ოცნების“ თავმჯდომარე ირაკლი კობახიძე „დაახლოებით ერთი წელია, ვართ ამ რეჟიმში, ასარჩევი გვყავს იუსტიციის საბჭოს არამოსამართლე წევრები, ხუთი წევრია ასარჩევი 90 ხმით, შესაბამისად, საჭიროა ოპოზიციის წარმომადგენელთა ხმებიც მათ ასარჩევად. ჩვენ დიდი ხანია, ვსაუბრობთ, რომ ჩვენთვის მისაღებია 15-მდე კანდიდატი, ეს არაერთგზის ითქვა საჯაროდ ჩვენი მხრიდან. ესენი არიან ის კანდიდატები, რომლებიც, ჩვენი აზრით, აკმაყოფილებენ როგორც კომპეტენციის კრიტერიუმს, ასევე კეთილსინდისიერების კრიტერიუმებს, რომლებმაც სათანადოდ წარმოაჩინეს თავი გასაუბრებაზე. ასეთი მიუკერძოებელი, დამოუკიდებელი, კვალიფიციური იურისტები არიან წარმოდგენილი და მათ შორის შესაძლებელია ხუთი წევრის არჩევა. ჩვენ მზად ვართ, მხარი დავუჭიროთ ხუთ კანდიდატს. ჩვენი აზრით, ხუთზე მეტიც არის ისეთი, რომელიც იმსახურებს იუსტიციის საბჭოს წევრობას. კონსულტაციების საფუძველზე მზად ვართ, 15 –დან ხუთს დავუჭიროთ მხარი.ასევე ვთქვით, რომ არ გვინდა ამ გვარების ჩვენგან დასახელება, გამომდინარე იქიდან, რომ ოპოზიციას დარჩეს მაქსიმალური სივრცე, არ შეიზღუდოს ზედმეტად. აქედან გამომდინარე, ჩვენ თავს ვიკავებთ მათი დასახელებისგან. იმის რისკიც არის, რომ ჩვენ რომ ვიტყვით 15-ს, მაინცდამაინც ამ 15-ის მიღმა დაასახელონ სხვები და ა.შ. მართალია, არ ესწრებოდა მათი უმეტესობა გასაუბრებებს, მაგრამ არსებობს ჩანაწერები, ჩართონ, ნახონ ჩანაწერები, მათ შორის ბიოგრაფიებს გადახედონ და ნახონ, ვის ეკუთვნის მათგან იუსტიციის საბჭოს წევრობა. ისინი ხომ ამბობენ, რომ უნდა იყოს მიუკერძოებელი, კომპეტენტური ადამიანი, ვინც უნდა აირჩეს ამ თანამდებობაზე. აქედან გამომდინარე, რა აბრკოლებთ ასეთი კანდიდატების დასახელების დროს? ვფიქრობ, აბრკოლებთ ერთადერთი რამ, მათ აქვთ ერთგვარი თვითმიზანი, როგორც არ უნდა შეეძლოთ, ხელი შეუშალონ იუსტიციის საბჭოს წევრების არჩევას და უზრუნველყონ ამ პუნქტის არშესრულება. ისინი აწარმოებენ კამპანიას კანდიდატის სტატუსის წინააღმდეგ და ამ კამპანიაში ძალიან კარგად ჯდება იუსტიციის საბჭოს არამოსამართლე წევრების ვერ არჩევა, აქედან გამომდინარე, ერთი წელია, არ გვეუბნებიან, ვის დაუჭერენ მხარს“, – განაცხადა კობახიძემ

„გული შესტკივა, რომ საქართველოს ხელისუფლებას ქვეყანა არასწორი მიმართულებით მიჰყავს. ის, როგორც ძალიან წარმატებული ქართველი, იბრძვის უკრაინელებისა და ქართველებისთვის, ქართულ პოლიტიკაში მის მოსვლაზე დღეს საუბარი არ არის“, – ამის შესახებ „ნაციონალური მოძრაობის“ წევრმა კობა ნაყოფიამ ქართულ პოლიტიკაში უკრაინის რადაში ფრაქცია „ხალხის მსახურის“ თავმჯდომარის, დავით არახამიას შესაძლო მოსვლის შესახებ დასმულ შეკითხვაზე საპასუხოდ განაცხადა.

მისივე თქმით, არახამია უკრაინულ პოლიტიკაში ძალიან გავლენიანი პირია, რომლის წინააღმდეგაც საქართველოს ხელისუფლება პროპაგანდას მიზანმიმართულად ეწევა.

„ჩვენ ბევრი გვისაუბრია საქართველოზე, მაგრამ ქართულ პოლიტიკაში მის მოსვლაზე საუბარი არ ყოფილა, ეს შემიძლია დაგიდასტუროთ. გარკვეულწილად ის ჩართულია პროცესებში, აღშფოთებულია უკრაინის მიმართ „ქართული ოცნების“ დამოკიდებულებით. იგი გახლავთ ერთ-ერთი ყველაზე გავლენიანი ადამიანი უკრაინულ პოლიტიკაში, ეს ადამიანი არის ქართველი, ქართულს სწავლობს, მას მართლა უნდოდა ამის გაკეთება და თავისუფალ დროს ამაზე მუშაობს. უყვარს თავისი ენა, სამშობლო და თავისი ხალხი და იმის მაგივრად, რომ გვიხაროდეს და მის შესაძლებლობებს სწორად ვიყენებდეთ, მის წინააღმდეგ ხელისუფლებამ ჩართო საშინელი პროპაგანდა“, – განაცხადა ნაყოფიამ „ტვ პირველის“ ეთერში.

ავიაკომპანია Georgian Airways-ის თანამშრომლები რუსეთთან ფრენების აღდგენის შემდეგ საზოგადოებისგან მიღებული კრიტიკის ფონზე ღია წერილს ავრცელებენ. „ბოლო დღეების განმავლობაში ხშირად მოვისმინეთ „ჯორჯიან ეარვეისის“ მიმართ შეურაცხმყოფელი განცხადებები რუსეთის მიმართულებით ფრენების აღდგენასთან დაკავშირებით. ავიაკომპანიის წინააღმდეგ დაწყებულია ბინძური კამპანია, სრულიად დაუმსახურებლად „გვამკობენ“ მიუღებელი ეპითეტებით. ყველაზე გულსატკენი არის ჩვენს პატრიოტულ გრძნობებზე მოყენებული თავდასხმა. მოღალატეებს გვეძახიან, რატომ ფიქრობთ რუსეთის მიმართულებით რეისების შესრულებაზეო. ყველა ამ უსაფუძვლო ბრალდების ავტორის გასაგონად გვსურს განვაცხადოთ, რომ სახელმწიფოებს შორის სავიზო რეჟიმის დაწესება ან მოხსნა, საავიაციო მიმოსვლის შეწყვეტა ან აღდგენა რომელიმე ავიაკომპანიის პრეროგატივა არ არის, ამას სახელმწიფოები წყვეტენ. ჩვენ პოლიტიკური ორგანიზაცია არ ვართ, აქედან გამომდინარე, პოლიტიკურ გადაწყვეტილებებს არ ვიღებთ. ჩვენ ქართველი ხალხის დაკვეთა უნდა შევასრულოთ და საქართველოს მოქალაქეებს რა მიმართულებით ექნებათ მგზავრობის სურვილი, იმ მიმართულებებს უნდა მოვემსახუროთ. ქართველი ხალხის სამსახურში დგომის გარდა სხვა პოლიტიკა ჩვენ არ გაგვაჩნია. ჩვენ ქართველი ხალხის ინტერესებს ომის პირობებშიც ვემსახურებოდით და მშვიდობის პირობებშიც მოვემსახურებით. „ჯორჯიან ეარვეისი“ ის ავიაკომპანიაა, რომლის დამფუძნებლები და თანამშრომლები ახდენდნენ აფხაზეთის ომის დროს ცეცხლმოკიდებული სოხუმიდან ბავშვების, ქალების, მოხუცებისა და დაჭრილების ევაკუაციას და გარდაცვლილი მებრძოლების გადმოყვანას საკუთარი სიცოცხლის რისკის ფასად. ბევრი მათგანი შეეწირა ამ საქმეს. ამიტომ, უნამუსობა, უტიფრობა და უსამართლობაა როდესაც ქვეყნის მოღალატეს უწოდებ იმ ხალხს, რომლებსაც საომარ ოპერაციებში მონაწილეობისთვის და იქ გამოჩენილი თავდადებისთვის სახელმწიფო ჯილდოები აქვთ მიღებული. 2008 წლის ომის დროს ჯორჯიან ეარვეისი იყო ერთადერთი ავიაკომპანია, რომელმაც არ შეწყვიტა ფრენები და საქართველოში ჩამოიყვანა ასობით უცხოელი ჟურნალისტი და პოლიტიკოსი, რომლებმაც მთელ მსოფლიოს აჩვენეს ქართველი ხალხის იმჟამინდელი ტრაგედია. მივმართავთ პროვოკატორებს, ამასაც ქვეყნის ღალატად აფასებთ?! თუმცა, თქვენისთანა გარეწრებისგან ესეც არ იქნება გასაკვირი. აქვე ხაზგასასმელია, რომ „ჯორჯიან ეარვეისში“ ამჟამადაც დასაქმებულია საქართველოს ტერიტორიული მთლიანობისთვის მებრძოლი გმირები.სამარცხვინოა, როცა ჩვენს კომპანიას ვინმე უბედავს მოღალატის დაძახებას!შეუიარაღებელი თვალითაც კარგად ჩანს, რომ ამ ბინძური კამპანიის უკან დგას ის მართული ძალები, რომლებიც უცხოეთიდან მიღებული გრანტების გასამართლებლად მზად არიან საკუთარი ქვეყნისა და ხალხის ინტერესის წინააღმდეგ წავიდნენ. ჩვენ გვწამს ბრძენი ქართველი ხალხის, რომელიც საღად შეაფასებს შექმნილ ვითარებას და დადგება სიმართლის მხარეს. სიმართლე კი ერთია – „ჯორჯიან ეარვეისი“ იყო, არის და იქნება საქართველოსა და ქართველი ხალხის ინტერესების სამსახურში მდგომი ავიაკომპანია.მოვუწოდებთ პოლიტიკას მიტმასნილ და ორ გროშზე დაგეშილ ავაზაკებს, ჩვენ მტრის არტილერიას, ტანკებსა და სამხედრო თვითმფრინავებს არ შევუშინებივართ და მით უმეტეს ვერ შეგვაშინებენ თქვენისთანა კომიკური არარაობები. ავიაკომპანიის წინააღმდეგ არც კი გაიფიქროთ რაიმე პროვოკაცია, თორემ მიიღებთ კანონით გათვალისწინებულ უმკაცრეს პასუხს“, – აღნიშნულია კომპანიის თანამშრომლების განცხადებაში.

ჩვენი გზავნილია, რომ გვსურს ყველას გაერთიანება იმის უზრუნველსაყოფად, რომ ჩვენ დავიცავთ დემოკრატიულ ღირებულებებს, ფუნდამენტურ პრინციპებს. დღევანდელი შეხვედრა ასევე არის ჩვენი სრული მხარდაჭერის გამოხატულება უკრაინის მიმართ, – ამის შესახებ ევროპული საბჭოს პრეზიდენტმა, შარლ მიშელმა რეიკიავიკში მიმდინარე ევროპის საბჭოს სახელმწიფოებისა და მთავრობების მეთაურების მე-4 სამიტზე განაცხადა.

მიშელის თქმით, სამიტი აჩვენებს, რომ ლიბერალური დემოკრატიები ერთად არიან ფუნდამენტური პრინციპების დასაცავად.

„ვიცით, რომ უკრაინელები იბრძვიან ჩვენი დემოკრატიული ღირებულებებისთვის, ჩვენი ფუნდამენტური პრინციპებისთვის. სწორედ ამიტომ ჩვენ კიდევ ერთხელ მკაფიოდ უნდა დავადასტუროთ ფინანსური, პოლიტიკური მხარდაჭერა, სამხედრო მხარდაჭერა ასევე ძალიან მნიშვნელოვანია. დღეს და ხვალ ჩვენ ვაჩვენებთ, რომ ლიბერალური დემოკრატიები ერთად არიან ფუნდამენტური პრინციპების დასაცავად, ჩვენი მოქალაქეების სასარგებლოდ ყველგან ევროპაში“, – განაცხადა შარლ მიშელმა.

ევროპის საბჭოს სახელმწიფოებისა და მთავრობების მეთაურების მე-4 სამიტი რეიკიავიკში დღეს გაიხსნა. სამიტში საქართველოს პრემიერ-მინისტრიც მონაწილეობს. ირაკლი ღარიბაშვილი სამიტის მონაწილეებს სიტყვით მიმართავს.

„ჩემთვის, როგორც პარლამენტის თავმჯდომარისთვის, ეს იყო პირველი ოფიციალური ვიზიტი აზერბაიჯანში. ჩვენს პარლამენტებს შორის არის განსაკუთრებული მჭიდრო თანამშრომლობა, როგორც პოლიტიკურ დონეზე, ისე აპარატების სახით,“ – ამის შესახებ საქართველოს პარლამენტის თავმჯდომარემ შალვა პაპუაშვილმა ბაქოში სამუშაო ვიზიტის შეჯამების დროს განაცხადა.

როგორც საქართველოს პარლამენტის თავმჯდომარემ აღნიშნა, საქართველოს და აზერბაიჯანის პარლამენტებს შორის არსებობს მტკიცე თანამშრომლობა. მისი თქმით, როდესაც საუბარია სტრატეგიული პროექტების მნიშვნელობაზე რეგიონში, ეს სწორედ ის იდეები და პროექტებია, რომლებიც ჰეიდარ ალიევმა და მისმა თანამედროვე ქართველმა და თურქმა პოლიტიკოსებმა წამოიწყეს და სწორედ, ამ შედეგებს ვხედავთ ჩვენ დღეს, როდესაც ჩვენი რეგიონის მნიშვნელობა სულ უფრო იზრდება.

„ჩვენ გვაქვს კომიტეტებს შორის ძალიან ინტენსიური თანამშრომლობა. მალე იგეგმება კულტურის კომიტეტებს შორის მემორანდუმის ხელმოწერა თანამშრომლობასთან დაკავშირებით და დღეს გვქონდა საუბარი აზერბაიჯანის პარლამენტის თავმჯდომარესთან შეხვედრაზე, რომ შეიძლება უფრო გავაფართოვოთ სექტორული კომიტეტების რაოდენობა, რომლებსაც ერთმანეთთან ექნებათ ურთიერთობა. ამიტომ, საკმაოდ ნაყოფიერი იყო ჩვენი ვიზიტი ამ მხრივაც. რაც შეეხება, მთლიანად ვიზიტს და ღონისძიებას, რომელიც დღეს გაიმართა, საიუბილეო სხდომა აზერბაიჯანის პარლამენტის, რომელიც ეძღვნებოდა ჰეიდარ ალიევის 100 წლის იუბილეს, საქართველოს პარლამენტის სახელით შესაძლებლობა მქონოდა მიმემართა მილი მეჯლისისთვის ამ საიუბილეო სხდომაზე და მესაუბრა იმ განსაკუთრებულ როლზე, რომელიც ჰეიდარ ალიევმა არა მხოლოდ აზერბაიჯანის ჩამოყალიბებისა და განვითარებისთვის შეიტანა, არამედ მისი წვლილი, ასევე, დიდია მთლიანად რეგიონის და საქართველოს როლის წამოწევისთვის.

დღეს, როდესაც ჩვენ ვსაუბრობთ სტრატეგიულ პროექტებზე, რომელიც აკავშირებს ევროპას აზიასთან, ეს სწორედ ის იდეები და პროექტებია, რომლებიც თავის დროზე, ჰეიდარ ალიევმა და მისმა თანამედროვე ქართველმა და თურქმა პოლიტიკოსებმა წამოიწყეს და სწორედ ამ შედეგებს ვხედავთ ჩვენ დღეს, როდესაც ჩვენი რეგიონის მნიშვნელობა სულ უფრო იზრდება,“ – განაცხადა შალვა პაპუაშვილმა.