რუსეთმა უკრაინაში, ომის დაწყების შემდეგ, 196 920 ჯარისკაცი დაკარგა, მათგან 610 ბოლო ერთ დღეში. ამის შესახებ ინფორმაციას უკრაინის შეიარაღებული ძალების გენერალური შტაბი ავრცელებს.

უწყების ცნობით, გასული დღის განმავლობაში უკრაინელებმა რუსების კუთვნილი 14 საარტილერიო სისტემა, 12 ჯავშანტექნიკა, 4 ტანკი და სხვა საბრძოლო ტექნიკა გაანადგურეს.

უკრაინის გენშტაბის მიერ გავრცელებული ინფორმაციის თანახმად, ჯამში, ომის დაწყებიდან დღემდე, განადგურებულია 3 740 ტანკი, 7 287 ჯავშანმანქანა, 3 053 საარტილერიო სისტემა, 557 ერთეული ზალპური ცეცხლის რეაქტიულ სისტემა, 310 საჰაერო თავდაცვის სისტემა, 308 თვითმფრინავი, 294 ვერტმფრენი, 2 627 ოპერატიულ-ტაქტიკური დონის უპილოტო საფრენ აპარატი, 970 ფრთოსანი რაკეტა, 18 გემი/ნავი, 5 984 საავტომობილო ტექნიკა და საწვავის ავზი, 391 ერთეული სპეცტექნიკა.

აშშ-ის ყოფილი პრეზიდენტის და 2024 წლის საპრეზიდენტო არჩევნებზე „რესპუბლიკელების“ საპრეზიდენტო კანდიდატის, დონალდ ტრამპის განცხადებით, ის არ ფიქრობს იმაზე, ვინ უნდა გაიმარჯვოს უკრაინის წინააღმდეგ რუსეთის ომში, არამედ სურს, რომ „შეწყდეს ყველას სიკვდილი“.

„მინდა, ყველას სიკვდილი შეწყდეს. ისინი იხოცებიან. რუსები და უკრაინელები. მინდა, რომ მათ შეწყვიტონ სიკვდილი და მე ამას 24 საათში გავაკეთებ“, – აღნიშნა ტრამპმა CNN-თან ინტერვიუში.

აშშ-ის ექსპრეზიდენტის თქმით, ის არ ფიქრობს “გამარჯვებისა და წაგების თვალსაზრისით. ვფიქრობ საკითხი მოგვარების კუთხით ისე, რომ შევწყვეტთ ყველა ამ ადამიანის მკვლელობა“.

დონალდ ტრამპის განცხადებით, შეხვდება უკრაინის პრეზიდენტს, ვოლოდიმირ ზელენსკის რუსეთის პრეზიდენტ ვლადიმერ პუტინს და უკრაინის ომს 24 საათში მოაგვარებს. ამასთან, კითხვაზე, თვლის თუ არა, რომ ვლადიმერ პუტინი ომის დამნაშავეა, ტრამპმა უპასუხა, რომ ეს საკითხი მოგვიანებით უნდა განიხილონ.

„თუ თქვენ იტყვით, რომ ის არის ომის დამნაშავე, გაცილებით რთული იქნება შეთანხმების მიღწევა, რათა ომი შეწყდეს. თუ ის ომის დამნაშავე იქნება, ხალხი მას ხელში ჩაიგდებს და სიკვდილით დასჯის – ის უფრო ძლიერად იბრძოლებს, ვიდრე სხვა ვითარებაში“, – აღნიშნა ტრამპმა.

მისი თქმით, პუტინი „ჭკვიანი კაცია“, მაგრამ “უზარმაზარი შეცდომა დაუშვა”.

„რა თქმა უნდა, ის ჭკვიანია. მათ უნდათ, რომ თქვათ, რომ ის სულელი ადამიანია. ის სულელი ადამიანი არ არის და ძალიან მოხერხებულია. ჩემი აზრით, პუტინმა ცუდი შეცდომა დაუშვა,“- აღნიშნა ტრამპმა. როდესაც დაზუსტება სთხოვეს, აშშ-ის ყოფილმა პრეზიდენტმა დასძინა: „მისი შეცდომა იყო [უკრაინაში] შესვლა. ის არასოდეს შევიდოდა, მე რომ პრეზიდენტი ვყოფილიყავი”.

ომის 442-ე დღე. დონბასში მძიმე ბრძოლები გრძელდება. ყველაზე ცხელ წერტილად კვლავ ბახმუტი რჩება. უკრაინის სახმელეთო ძალების მეთაურის, ოლექსანდრ სირსკის ინფორმაციით, ფრონტის ცალკეულ მონაკვეთებზე მტერმა ვერ გაუძლო უკრაინელი დამცველების შეტევას და ორ კილომეტრამდე მანძილზე უკან დაიხია.

ბახმუტის მიმართულებით მტერმა ზოგიერთ მონაკვეთზე 2 კილომეტრით უკან დაიხია. ამის შესახებ უკრაინის სახმელეთო ჯარების მეთაური ალექსანდრე სირსკი “ტელეგრამის” პირად გვერდზე წერს.

“ბახმუტის მიმართულებით გააზრებული თავდაცვის შედეგად ჩვენი ქვედანაყოფების ეფექტური ქმედებების შედეგებს ვიღებთ. მათ შორის წარმატებულ კონტრიერიშებს ვაწარმოებთ. ფრონტის ცალკეულ მონაკვეთებზე მტერმა ვერ მოახერხა უკრაინელი დამცველების ზეწოლის შეკავება და 2 კილომეტრამდე უკან დაიხია”, – წერს სირსკი.

მისი თქმით, უკრაინელების გააზრებულმა თავდაცვითმა ოპერაციებმა “ვაგნერის” მომზადებული ძალები გამოფიტეს, რის შედეგადაც ისინი იძულებულნი იყვნენ პოზიციები რუსეთის ფედერაციის რეგულარული ჯარის უარესად მომზადებული ქვედანაყოფებისთვის დაეთმოთ, რომლებმაც მარცხი განიცადეს და უკან დაიხიეს.

“ჩვენ ძალებს საიმედოდ უკავიათ ფრონტი და მტერს წინ წაწევის საშუალებას არ აძლევენ. ბახმუტისთვის ბრძოლა გრძელდება”, – აღნიშნა სირსკიმ.

უკრაინული ძალები პოზიციებს ინარჩუნებენ მარინკის მიმართულებითაც. ბოლო 24 საათის განმავლობაში უკრაინელებმა ოკუპანტთა 30-მდე შეტევა მოიგერიეს.

უკრაინის ქალაქ ზაპოროჟიეში წუხელ, საჰაერო იერიშის დროს, აფეთქების ხმები ისმოდა, – ინფორმაციას უკრაინული მედია ავრცელებს.

მათივე ინფორმაციით, ქალაქსა და ოლქში საჰაერო განგაშია გამოცხადებული.

ზაპოროჟიეს საკრებულოს მდივანმა, ანატოლი კურტევმა ქალაქის მცხოვრებლებს მოუწოდა, სასწრაფოდ გადავიდნენ თავშესაფრებში და საფრთხის დასრულებამდე იქ დარჩნენ.