ჩვენ, ჩვენ თავს მივხედავთ ხაბეიშვილის რჩევის გარეშე. ხაბეიშვილმა თავის თავს მიხედოს, – ასე გამოეხმაურა პარტია „საქართველოსთვის“ ერთ-ერთი ლიდერი, პარლამენტის წევრი ანა ბუჩუკური „ნაციონალური მოძრაობის“ თავმჯდომარის, ლევან ხაბეიშვილის განცხადებას, რომ ოპოზიციურ პროდასავლურ პარტიებს კიდევ ერთხელ სთავაზობს საერთო სტრატეგიას და არა გაერთიანებას, „რადგან კვლევაც აჩვენებს, რომ „ნაციონალურ მოძრაობას“ არავისთან გაერთიანება არ სჭირდება“.

გიორგი გახარიას მიმართ ნეგატივის დაბალი დონე IRI-ის კვლევითაც დასტურდება. მე გარწმუნებთ, რომ გიორგი გახარიას პარტია ისეთ შედეგს დადებს, რომ ძალიან ბევრს მოულოდნელად მოეჩვენება. მე ამაში გარწმუნებთ.- აცხადებს ბუჩუკური

რუსეთისთვის, ეგზისტენციალურ საფრთხეს წარმოადგენს ჩვენი დათმობა და ამერიკისთვის, ეს არის უბრალოდ წარუმატებლობა საგარეო პოლიტიკაში… – ამის შესახებ საზოგადოებრივი ორგანიზაცია „პოლიტიკური არჩევანის“ დამფუძნებელმა, რომან კაკულიამ მედიასთან განაცხადა. „გასაგები ხდება, რომ ეს არ არის ის რუსეთი, რომელიც დაიპყრობს ხვალ ვარშავას, მერე გადავა დავუშვათ „ბალტიისპირეთის “ ქვეყნებში და მერე წავა და წავა. ეს მას არ შეუძლია, გასაგებია. ეს ხომ უფრო ამძაფრებს უკრაინაში მის მიერ ატომური იარაღის გამოყენების საფრთხეს. გამოდის, რომ მისთვის ეგზისტენციალური საფრთხეა… ჩვენ სხვა საფრთხე ვართ, სხვა ღირებულება გვაქვს რუსეთისთვის და ამერიკისთვის სხვა ვართ. ანუ ეგზისტენციალურ საფრთხეს წარმოადგენს ჩვენი დათმობა და ამერიკისთვის, ეს არის უბრალოდ წარუმატებლობა საგარეო პოლიტიკაში. ამაში ერთი და იგივე ფასს არ იხდიან, ამაშია ჩვენი უბედურება და ვინც ამას ითვალისწინებს, მაინცდამაინც პრორუსი რატომ დავარქვა“, – განაცხადა რომან კაკულიამ.

მიუხედავად იმისა, რომ მიხეილ სააკაშვილი ძალიან ცუდადაა, ძალიან მძიმედაა, ჩათვალა, რომ ჩუმად ვერ იქნება და მხოლოდ მისი სიცოცხლე არაა მნიშვნელოვანი, – ამის შესახებ „ნაციონალური მოძრაობის“ ერთ-ერთმა ლიდერმა, დიმიტრი შაშკინმა მედიასთან განაცხადა.

დიმიტრი შაშკინის განმარტებით, მიხეილ სააკაშვილი სწორედ იმიტომ ჩამოვიდა საქართველოში, რომ ხედავდა, საით მიექანება ქვეყანა.

„მიუხედავად იმისა, რომ იბრძვის თავისი სიცოცხლისთვის, მიხეილ სააკაშვილმა ჩათვალა, რომ ახლა, რაც შეუძლია, რაც მის ძალებში შედის, დაეხმაროს ქართველ ერს. მისი მონაწილეობა ამ პროცესში იქნება ძალიან მნიშვნელოვანი. მისი შესაძლებლობები არის შეზღუდული ჯანმრთელობიდან და იქიდან გამომდინარე, რომ ჩაკეტილია ციხეში, თუმცა, როდესაც ხედავს, რას აკეთებს ღარიბაშვილი, ბიძინა ივანიშვილი, რას აკეთებს „რუსული ოცნება“, მიუხედავად იმისა, რომ იბრძვის თავისი სიცოცხლისთვის, თქვა, რომ მაინც ჩავერთვები ამ საქმეში იმიტომ, რომ ახლა თუ ჩვენ რუსეთში გაგვაქანეს და რუსეთის გუბერნია გავხდით, ე. ი. ყველაფერი იყო უაზრო“, – განაცხადა დიმიტრი შაშკინმა.

დიმიტრი შაშკინი გადაცემაში იუსტიციის მინისტრის, რატი ბრეგაძის განცხადებასაც გამოეხმაურა, რომლის თქმითაც, როდესაც სააკაშვილი ჯანმრთელობის მდგომარეობა მისცემთ ამის საშუალებას ისინი მას პენიტენციურ დაწესებულებაში გადაიყვანენ.

დიმიტრი შაშკინის მტკიცებით, რატი ბრეგაძე სადიზმის გამო პასუხს აგებს.

„რატი ბრეგაძე თავისი სადიზმის გამო პასუხს აგებს. მე აბსოლუტურად დარწმუნებული ვარ, ქართველი ხალხის წინაშე აგებს პასუხს იურიდიულად, ამ სადიზმის გამო. რასაც ის ახლა აკეთებს, ეს არის ადამიანის უფლებების დარღვევა, რომელიც საერთაშორისო დევნას ექვემდებარება, რომელიც არის საერთაშორისო დანაშაული. ივანიშვილი კარგად იქნება, საზღვარგარეთ იქნება, ამ ხალხს მოუწევს პასუხისმგებლობის თავის თავზე აღება“, – განაცხადა დიმიტრი შაშკინმა.

Edison Research-ის კვლევა ადასტურებს, რომ „ნაციონალური მოძრაობა“ არის ნომერ პირველი ევროპული პარტია საქართველოში, – ასე გამოეხმაურა „ერთიანი ნაციონალური მოძრაობის“ თავმჯდომარე ლევან ხაბეიშვილი Edison Research-ის კვლევას.

ლევან ხაბეიშვილის განცხადებით, მნიშვნელოვანია, ოპოზიციას ჰქონდეს საერთო სტრატეგია, ხოლო ქართველმა ხალხმა უნდა გადაწყვიტოს, როგორი კოალიციური მთავრობა უნდა შემდეგ ხელისუფლებაში

“Edison Research-ის კვლევაც ადასტურებს, რომ „ნაციონალური მოძრაობა“ არის ნომერ პირველი ევროპული პარტია საქართველოში, ასე მიიჩნევს ქართველი ხალხი, რადგან „რუსული ოცნებას“ არანაირი კავშირი არ აქვს ევროპულ ღირებულებებთან და შესაბამისად, „ნაციონალური მოძრაობა“ არის მთავარი ძალა რუსი ოლიგარქიული რეჟიმის დამარცხებაში. ასევე მნიშვნელოვანია და კარგია, რომ ამ შედეგების მიხედვით სხვა ოპოზიციურ პროდასავლურ პარტიებს აქვთ გარკვეული შედეგები, ჩვენ მხოლოდ მივესალმებით, მეტიც, მნიშვნელოვანია ახლა მათ „ნაციონალური მოძრაობის“ გარეშე იფიქრონ მათ გაერთიანებაზე, რადგან „ნაციონალური მოძრაობის“ გარშემო დამატებით სხვა ერთობები და ასევ ვთქვათ შემომატებები აუცილებლად ექნება, ამ მიმართულებით ვმუშაობთ და მნიშვნელოვანია, სხვა პროდასავლური ძალებიც გაძლიერდნენ, გაერთიანდნენ და მე კიდევ ერთხელ ვთავაზობ მათ, საერთო სტრატეგიას და არა ვინმესთან გაერთიანებას, რადგან ეს კვლევაც ჩვენებს, რომ „ნაციონალური მოძრაობას“ არავისთან გაერთიანება არ სჭირდება, ჩვენ ჩვენი ელექტორატი გვყავს, მეტიც, არის მზარდი, ამაზე ვმუშაობთ ყოველდღიურ რეჟიმში. ამიტომ, მნიშვნელოვანია, ბიძინა ივანიშვილის, რუსული რეჟიმის წინააღმდეგ გვქონდეს საერთო გეგმა, სტრატეგია და საერთო ჯამში მისმა აღმატებულებამ, ქართველმა ხალხმა გადაწყვიტოს, როგორი კოალიციური მთავრობა უნდა შემდეგ ხელისუფლებაში“, – განაცხადა ლევან ხაბეიშვილმა.

საქართველოს პრემიერ-მინისტრმა ჟურნალისტების კითხვებს უპასუხა. მთავრობის მეთაურმა მედიასთან საუბრისას აღნიშნა, რომ თუ ქვეყანა კანდიდატის სტატუსს მიიღებს, ეს ავტომატურად შეამცირებს პოლარიზაციის ხარისხს.

„მათ ვუთხარი, რომ ასეთ ვითარებაში, საქართველოს გამოყოფა იქნება სტრატეგიული შეცდომა დასავლეთის და ეს არ შედის არც დასავლეთის, არც ჩვენს ინტერესებში. ასევე მკაფიოდ ვუთხარი ჩვენს მეგობრებს, რომ რა თქმა უნდა, ჩვენი სურვილი თუ არის პოლარიზაციის დასრულება, აუცილებლად უნდა მოგვანიჭონ სტატუსი, იმიტომ, რომ ეს არის ერთ-ერთი მთავარი სპეკულაციის საგანი და პოლარიზაციის წყარო. თუ ქვეყანა მიიღებს კანდიდატის სტატუსს, ეს ავტომატურად, მინიმუმ გაანახევრებს პოლარიზაციის ხარისხს,“- განაცხადა პრემიერმა.

რუსეთმა დასავლეთის ეკონომიკური ბლოკადა გაარღვია. „რია ნოვოსტის“ ინფორმაციით, ამის შესახებ რუსეთის ფედერალური საბაჟო სამსახურის ხელმძღვანელის მოვალეობის შემსრულებელმა რუსლან დავიდოვმა განაცხადა.

„ზემო ლარსზე, ამჟამად, ეკონომიკური ბლოკადის რღვევა ხორციელდება, რომელიც ევროპის ქვეყნებმა დაგვიწესეს. ჩვენ შეგვიძლია „ჩრდილოეთ-სამხრეთის“ დერეფნით 15 მილიონი ტონა ტვირთის გატარება“, – განაცხადა მან.

დავიდოვის თქმით, გასულ წელს 5.5 თვის განმავლობაში, ჩრდილოეთ კავკასიის საბაჟო ადმინისტრაციის რეგიონში საბაჟოს თანამშრომლებმა ორივე მიმართულებით მიმავალი 5,6 მილიონი ტონა ტვირთი დაამუშავეს, ხოლო მიმდინარე წლის იმავე პერიოდში – უკვე 7,8 მილიონი ტონა.

„ვფიქრობ, რომ წელს ჩრდილოეთ კავკასიაში 15 მილიონი ტონა ბრუნვას გადავაჭარბებთ. მხოლოდ ზემო ლარსში გვაქვს სავაჭრო ბრუნვის 20 პროცენტზე მეტი ზრდა, – განაცხადა სამსახურის უფროსის მოვალეობის შემსრულებელმა.

საბაჟო სამსახურში განაცხადეს, რომ მიმდინარე წლის 15 ივნისს სატვირთო ტრანსპორტისთვის დამატებითი კონტროლის ხაზების ამოქმედების შემდეგ, საზღვრის გადაკვეთაზე, ყოველდღიურად, საშუალოდ, დაახლოებით, 1,2 ათასი სატვირთო მანქანა გადის, ხოლო რეკონსტრუქციამდე – ათასზე ნაკლები გადიოდა.

დავიდოვი დღეს ჩრდილოეთ ოსეთში სამუშაო ვიზიტის ფარგლებში ზემო ლარსის საგუშაგოს ეწვია. უწყების ინფორმაციით, ახლა ზემო ლარსზე 39 ზოლია: 12 სატვირთო მანქანებისთვის, ორი ავტობუსებისთვის, ერთი სარეზერვო და 24 მსუბუქი ავტომობილებისთვის.