ღაზის სექტორისა და ეგვიპტის საზღვართან მდებარე რაფაჰის საკონტროლო-გამშვებ პუნქტზე გადაადგილება გარკვეული დროით შეზღუდული იყო. როგორც The New York Times-ი წერს, ამის მიზეზი ის გახდა, რომ „ჰამასი“ შეეცადა თავისი დაჭრილი მებრძოლები ანკლავიდან გაეყვანა. გაზეთს ამის შესახებ ჯო ბაიდენის ადმინისტრაციის წარმომადგენელმა განუცხადა.

მისი თქმით, დაჯგუფებამ ისრაელს, აშშ-სა და ეგვიპტეს, ლტოლვილებთან და უცხო ქვეყნის მოქალაქეებთან ერთად ევაკუაციისთვის, დაჭრილი პალესტინელების სია არაერთხელ წარუდგინა, თუმცა შემოწმებამ აჩვენა, რომ „ჰამასის“ სიიდან ბევრი ადამიანი ტერორისტია.

თურქეთი აცხადებს, რომ იწვევს თავის ელჩს ისრაელიდან კონსულტაციებისთვის იმის გამო, რომ ისრაელმა უარი თქვა ღაზაში ცეცხლის შეწყვეტაზე.

თურქეთის საგარეო საქმეთა სამინისტრომ განაცხადა, რომ საკირ ოზქან ტორუნლარი გაიწვიეს „ღაზაში განვითარებული ჰუმანიტარული ტრაგედიის გამო, რომელიც გამოწვეული იყო ისრაელის მიერ მშვიდობიანი მოსახლეობის წინააღმდეგ განხორციელებული თავდასხმებითა და ცეცხლის შეწყვეტაზე ისრაელის უარით“.

ისრაელი აცხადებს, რომ აპირებს ომის გაგრძელებას, ვიდრე არ გაანადგურებს „ჰამასის“ ძალაუფლებას ღაზაში. ასევე, ისრაელის პრემიერ-მინისტრმა, ბენიამინ ნეთანიაჰუმ განაცხადა, რომ ცეცხლი არ შეწყდება, ვიდრე ღაზაში მყოფი 240-ზე მეტი მძევალი არ გათავისუფლდება.

უკრაინის პრეზიდენტი ვოლოდიმირ ზელენსკი ნამდვილად გეგმავდა მომავალ კვირას ისრაელში ჩასვლას, მაგრამ Channel 12-ის მიერ აღნიშნულ საკითხთან დაკავშირებით ინფორმაციის გავრცელების შემდეგ, ზელენსკის ვიზიტი კითხვის ნიშნის ქვეშ დადგა. ამის შესახებ The Times of Israel-ს უკრაინელმა დიპლომატმა განუცხადა.

„მას {ზელენსკის} სურდა ვიზიტი გამხდარიყო საჯარო მაშინ, როდესაც ფეხს ისრაელის მიწაზე დადგამდა. ის ძალიან იმედგაცრუებულია“, – ამბობს უკრაინელი დიპლომატი.

„2022 წლის თებერვალში უკრაინაში რუსეთის შეჭრის შემდეგ არც ისრაელის პრემიერ-მინისტრი ბენიამინ ნეთანიაჰუ ჩასულა კიევში და ზელენსკი ისრაელში. ზელენსკის და ნეთანიაჰუს ერთმანეთს, ნიუ-იორკში შეხვდნენ ერთმანეთს“, – წერს ისრაელის მედია.

აღმოსავლეთ ესპანეთში ქარიშხლის შედეგად გამოწვეულმა ხანძარმა ტყის დიდი მასშტაბი გაანადგურა. ესპანეთის 4 ქალაქიდან ევაკუირებულია 850 ადამიანი. ამის შესახებ AP ადგილობრივ ხელისუფლებაზე დაყრდნობით იუწყება.

დაახლოებით 200 მეხანძრე და ჯარისკაცი არმიის საგანგებო რეაგირების განყოფილებიდან ხანძრის ჩასაქრობად იყო მობილიზებული.

ვალენსიის რეგიონალური მთავრობა აცხადებს, რომ ტყის ხანძრის ლოკალიზების პროცესში ჩართული იქნება ხუთი სახანძრო თვითმფრინავი და ვერტმფრენი.

რეგიონის ხელმძღვანელმა კარლოს მეისონმა მოსახლეობას მოუწოდა, თავი აარიდონ მოგზაურობას და ტყეებში აქტივობებს.

მეისონის თქმით, მთიან და ტყიან ადგილებში ხანძრის გავრცელება ძირითადად ქარის გამო ხდება.

ბერლინში პალესტინის მხარდამჭერი აქცია იმართება. ინფორმაციას „თაიმს ოფ ისრაელი” ავრცელებს.

როგორც მედია წერს, დაახლოებით 6 000 დემონსტრანტი შეიკრიბა ბერლინის ქუჩებში და ითხოვს ღაზის სექტორში ისრაელის დარტყმების შეწყვეტას.
ჟურნალისტების ცნობით, აქციის მონაწილეები გამოდიან ლოზუნგებით – „გადავარჩინოთ ღაზა“ და „შეაჩერე გენოციდი“.

დემონსტრაციაზე დაახლოებით 1 000 პოლიციელი მორიგეობს, რათა თავიდან აიცილონ შესაძლო შეტაკებები. პოლიციამ აკრძალა ნებისმიერი სახის საჯარო ან წერილობითი განცხადება, რომელიც არის ანტისემიტური ან ძალადობის მხარდამჭერი.

როგორც მედია წერს, პალესტინელების მხარდასაჭერად რამდენიმე ათასი მომიტინგე დასავლეთ გერმანიის ქალაქ დუსელდორფშიც შეიკრიბა.

არც ერთი ქვეყანა არ შეეგუება მშვიდობიანი მოსახლეობის მკვლელობას. ასე უპასუხა აშშ-ის სახელმწიფო მდივანმა ჟურნალისტს, რომელმაც შემდეგი კითხვა დასვა: „რას მიაღწია ისრაელმა თავისი ოპერაციით, გარდა იმისა, რომ დაახლოებით 10 000 ადამიანი მოკლა?“.

ამასთან, ენტონი ბლინკენის თქმით, მშვიდობიანი მოქალაქეების დასაცავად აუცილებელია ზომების მიღება და აღნიშნა, რომ ისრაელის ხელისუფლებასთან საუბრისას, ხაზი გაესვა იმ ნაბიჯებს, რომლებიც მათ მშვიდობიანი მოსახლეობისთვის ზიანის მიყენების შესამცირებლად უნდა გადადგან.

ევროკავშირისკენ გზაზე უკრაინამ შესანიშნავ შედეგს მიაღწია, – ამის შესახებ ევროკომისიის პრეზიდენტმა ურსულა ფონ დერ ლაიენმა კიევში უკრაინის პრეზიდენტ ვოლოდიმირ ზელენსკისთან გამართულ ერთობლივ პრესკონფერენციაზე განაცხადა.

„უნდა ვთქვა, რომ შესანიშნავს პროგრესს მიაღწიეთ. მომავალ კვირას ამას დავადასტურებთ, როდესაც ევროკომისია გაფართოების შესახებ თავის ანგარიშს წარადგენს,” – განაცხადა ფონ დერ ლაიენმა.

ევროკომისიის პრეზიდენტის თქმით, ევროკავშირზე შთაბეჭდილება მოახდინა იმ რეფორმებმა, რომლებსაც უკრაინა შუაგულ ომში ატარებს.

„არ უნდა დაგვავიწყდეს, რომ საკუთარი არსებობისთვის იბრძვით და ამავდროულად, ღრმა რეფორმებს ატარებთ საკუთარ ქვეყანაში. სასამართლო სისტემის რეფორმას ახდენთ, ოლიგარქების გავლენას ებრძვით, ფულის გათეთრებას ებრძვით…

ვიცი, რომ გამორჩეული რეფორმების დასრულების პროცესში იმყოფებით. თუ ეს მოხდება, ამაში დარწმუნებული ვარ, მაშინ გაწევრიანების პროცესის შემდგომ ეტაპზე გადასვლის უკრაინული ამბიციური მიზანი მიღწეული იქნება,” – განაცხადა ფონ დერ ლაიენმა.