ზახაროვა დღე და ღამე მთვრალია, „ლოთ-ბაზარა“ ქალია, დაბჟუტურობს რაღაცას. მე არ მინდა დავიჯერო, რომ ქართული ინტერესების საწინააღმდეგოდ ჩვენი ხელისუფლება რუსეთთან რაღაც კულუარულ მოლაპარაკებებს მართავს – ეს იქნება ღალატი, – ამის შესახებ ჟურნალისტებთან „მოქალაქეების“ დეპუტატმა ალეკო ელისაშვილმა განაცხადა.

მისი თქმით, მას სურს ხვალ ამ საკითხზე პრემიერ-მინისტრს დაუსვას კითხვა, როცა პარლამენტში მოუსმენენ.

“ფრენების კატეგორიული წინააღმდეგი ვარ და რკინიგზის ხომ მით უფრო, ფრენების და სარკინიგზო მიმოსვლის აღდგენა ერთი და იგივე სიბრტყე არ არის. ეს არის ერთ-ერთი კითხვა, რასაც დავუსვამ ღარიბაშვილს და თუ მოვახერხე, ფორმატს გააჩნია, მინდა ეს ვკითხო. არავითარ შემთხვევაში არ შეიძლება აფხაზეთის გავლით, ამ ვითარებაში, რკინიგზის აღდგენა. აქ ყველაზე პრინციპული საკითხია, სად იქნება საბაჟო და სასაზღვრო პუნქტი – ენგურზე თუ ფსოუზე. ჩვენ თუ ამას გავაკეთებთ ენგურზე, ეს ნიშნავს, გვიღიარებია აფხაზეთის დამოუკიდებლობა. ამ ვითარებაში საერთოდ არაფერი იქნებოდა მისაღები. ერთადერთ შემთხვევაში იქნებოდა რკინიგზის გახსნა მეტ-ნაკლებად მისაღები, თუ ქართული დროშა იქნებოდა ფსოუზე, თუ ფსოუზე იქნებოდა ქართული საბაჟო და სასაზღვრო პუნქტი. სხვა შემთხვევაში ეს იქნება მართლა ღალატი ქართული სახელმწიფოს ინტერესების. მარია ზახაროვა რომ დღე და ღამე მთვრალია და ერთი ლოთი ქალია, “ლოთ ბაზარა”, დაბჟუტურობს რაღაცას და მე არ მინდა დავიჯერო, რომ ეს მართლა ხდება და ქართული ინტერესების საწინააღმდეგოდ ჩვენი ხელისუფლება რაღაც კულუარულ მოლაპარაკებებს მართავს,” – განაცხადა ელისაშვილმა.

ინფორმაციისთვის, რუსეთის საგარეო საქმეთა სამინისტროს წარმომადგენლის, მარია ზახაროვას განცხადებით, რუსეთი აფხაზეთის გავლით სომხეთის რესპუბლიკაში მიმავალი რკინიგზის გახსნისთვის ძალისხმევას არ დაიშურებს.

ჩვენ თავის დროზე ავიღეთ პასუხისმგებლობა, საჯაროდ გამოვაცხადეთ, რომ საქართველო მყარად დაიცავს ფინანსურ სანქციებთან დაკავშირებულ საკითხებს, ეს კიდევ ერთხელ დადასტურდა, ჩვენმა პარტნიორებმა საკუთარი თვალით ნახეს, რაზეც ჩვენ ყოველდღიურად ვსაუბრობთ, – ამის შესახებ საქართველოს საგარეო საქმეთა მინისტრმა, ილია დარჩიაშვილმა განაცხადა.

„გუშინ დასრულდა ძალიან მნიშვნელოვანი ვიზიტი, ევროკავშირის სპეციალური წარმომადგენლის, დევიდ ო’სალივანის საქართველოში ვიზიტი, რომელიც კოორდინირებს სანქციებთან დაკავშირებულ საკითხებს ევროკავშირიდან. მასთან ერთად, საქართველოში იმყოფებოდა მაღალი რანგის დიპლომატი ჯიმ ო’ბრაიანი აშშ-დან, რომელიც ასევე ამ თემატიკაზე მუშაობს ა კუმარ იერი დიდი ბრიტანეთიდან. ამ ფორმატში პარტნიორების ვიზიტი ძალიან მნიშვნელოვანია“, – აღნიშნა ილია დარჩიაშვილმა.

მინისტრის განმარტებით, სტუმრებს მიეცათ შესაძლებლობა, საქართველოში ენახათ გადადგმული ნაბიჯები, უზარმაზარი ძალისხმევა, რომელიც ხელისუფლებამ გასწია და სწევს ამ ძალიან რთულ ვითარებაში.

„ზოგადად, ჩვენ ვართ პასუხისმგებლობის მქონე ქვეყანა, პასუხისმგებლობის მქონე მთავრობა. თავის დროზე ავიღეთ პასუხისმგებლობა, საჯაროდ გამოვაცხადეთ, რომ საქართველო მყარად დაიცავს ფინანსურ სანქციებთან დაკავშირებულ საკითხებს. ეს კიდევ ერთხელ დადასტურდა და ჩვენმა პარტნიორებმა საკუთარი თვალით ნახეთ ის, რაზეც ჩვენ ყოველდღიურად ვსაუბრობთ. საქართველო გააგრძელებს აქტიურ მუშაობას ამ მიმართულებით, ძალიან მჭიდრო კოორდინაციას ჩვენს პარტნიორებთან“, – განმარტა დარჩიაშვილმა.

საგარეო უწყების ხელმძღვანელი ოპოზიციის წარმომადგენლების მიერ გაკეთებულ განცხადებებსაც გამოეხმაურა.

„კიდევ ერთხელ დარჩნენ გაწბილებულნი ჩვენი ოპონენტები, რადგანაც ხშირად გვესმოდა მათი მხრიდან შეფასებები, საფუძველს მოკლებული ბრალდებები. ეს კეთდებოდა მათი ვიწროპოლიტიკური დღის წესრიგიდან გამომდინარე. ამით ისინი აზიანებდნენ ჩვენი ქვეყნის რეპუტაციას, იმიჯს. მათგან ინსპირირებული, ჩვენ ასევე გვესმოდა არაერთი ევროპელი ჟურნალისტისა თუ პოლიტიკოსის საფუძველს მოკლებული განცხადებები საქართველოსთან მიმართებით. ჩვენ გავაგრძელებთ მუშაობას მომავალში, რათა საქართველომ გააგრძელოს იმ შედეგების გაუმჯობესება, რომლებიც გვაქვს“, – აღნიშნა დარჩიაშვილმა.

მისი თქმით, საქართველოს ძალა სიმართლეშია და საომარი მოქმედებების დაწყებიდან, საქართველოს მხრიდან ფინანსური სანქციების გვერდის ავლის არც ერთი ფაქტი არ დაფიქსირებულა.

ევროკომისია გამოაქვეყნებს ზაფხულის შემდეგ ანგარიშს გაფართოების შესახებ. ევროპული საბჭო მიიღებს გადაწყვეტილებებს წლის ბოლოს, სავარაუდოდ დეკემბერში, – ამის შესახებ ევროპული საბჭოს პრეზიდენტმა შარლ მიშელმა  განაცხადა.

„რაც შეეხება საქართველოს, მივესალმებით ახლახან გადადგმულ ნაბიჯებს საქართველოში და ჩვენ გავაკეთებთ ყველაფერს საქართველოს ძალისხმევის მხარდასაჭერად, მაგრამ ვნახავთ, თუ როგორი იქნება ანგარიში და ბევრია საქართველოზე დამოკიდებული. რეკომენდაციების შესრულება იქნება ყველაზე მნიშვნელოვანი იმისათვის, რომ ევროპულმა საბჭომ მიიღოს გადაწყვეტილებები საქართველოზე წლის ბოლოს“, – განმარტა შარლ მიშელმა “ქრონიკასთან”.