დედაქალაქის მერის, კახა კალაძის განმარტებით, დამოუკიდებლობის დღისადმი მიძღვნილ ღონისძიებას აქვს თავისი სლოგანი, შესაბამისი კამპანია და დეკორაციებიც ყოველ წელს იცვლება.

როგორც მან მედიასთან საუბრისას აღნიშნა, ევროკავშირის დროშასთან დაკავშირებით, ოპოზიციის მიერ ატეხილი აჟიოტაჟი არის სპეკულაცია და სიბინძურე, რაც საზოგადოების შეცდომაში შეყვანას ემსახურება.

„ეს არის მორიგი სპეკულაცია და ჩვეულებრივი სიბინძურე, რასაც კადრულობენ კონკრეტული ადამიანები. 26 მაისი არის საქართველოს დამოუკიდებლობის დღე და ცხადია, უნდა იყოს ქართული დროშა. ასევე, ყოველ დამოუკიდებლობის დღეს გვქონდა შესაბამისი სლოგანი და შესაბამისი შინაარსის კამპანია მიმდინარეობდა. მაგალითად, ერთ-ერთი იყო კამპანია, როცა მთავარი თემა იყო შოთა რუსთაველის „ვეფხისტყაოსანი“. მაშინ პარლამენტის შენობაზე საქართველოს დროშა საერთოდ არ იყო გამოფენილი და ამ პოემიდან ამონარიდები იყო წარმოდგენილი. გასულ წელს კამპანიის მთავარი ხაზი იყო ევროპა, დეკორაციებიც შესაბამისი იყო, მათ შორის ევროკავშირის დროშები.

სპეკულაციები საჭირო არ არის. არ ვიცი ეს სიბინძურე რას ემსახურება. შეიძლება ვინმეს მცდელობა ჰქონდა, რომ საზოგადოებისთვის დაეჯერებინა ან ეს ყველაფერი „ქართული ოცნების“ წინააღმდეგ გამოეყენებინა. ხალხი ყველაფერს ხვდება. სიმართლე ყოველთვის გაირკვევა და ადამიანებს ინფორმაციაზე ხელმისაწვდომობაც აქვთ“, – აღნიშნა დედაქალაქის მერმა.

მისივე თქმით, ევროინტეგრაცია და ევროპული მომავალი არის დღევანდელი ხელისუფლების მიზანი, ეს ჩანაწერი კონსტიტუციაშიც არის გაკეთებული, თუმცა უპირველესი ქვეყნის ტერიტორიული მთლიანობის აღდგენაა.

„ჩვენ ხშირად გვახსენებენ იმას, რომ კონსტიტუციაში გიწერიათ ევროინტეგრაცია და ევროპული მომავალიო. რა თქმა უნდა, ეს გვიწერია და სწორედ ჩვენი გუნდის გადაწყვეტილებით, გაკეთდა ეს ჩანაწერი. მაგრამ ისიც არ უნდა დაგვავიწყდეს, რომ პირველ რიგში, ქვეყნის ტერიტორიული მთლიანობის აღდგენა გვიწერია. ეს არის მნიშვნელოვანი და მერე უკვე სხვა დანარჩენი.

ჩვენ კონკრეტულ ნაბიჯებს ვდგამთ ევროინტეგრაციის მიმართულებით, ვასრულებთ 12-პუნქტიან გეგმას. ოპოზიცია კი ხელის შეშლის მეტს არაფერს აკეთებს. ყველაფერს ვაკეთებთ და შევასრულებთ. შემდეგ კი, ევროკავშირზეა დამოკიდებული, რა გადაწყვეტილება იქნება მიღებული“, – განაცხადა მან.

ფრაქცია „ქართული ოცნების“ თავმჯდომარის მამუკა მდინარაძის განმარტებით, საქართველო რუსეთს სანქციებს არ და ვერ უწესებს იმიტომ, რომ ეს საქართველოს უფრო დააზიანებს, ვიდრე რუსეთს.

როგორც მან ჟურნალისტებს განუცხადა, ეს პრინციპული დამოკიდებულება ქართველების ინტერესებიდან გამომდინარეობს და არ გადაიხედება.

„საქართველოს მყარი პოზიციაა, რომ არცერთი სანქცირებული ბორტი საქართველოში არ დაჯდება. საქართველოს მყარი პოზიციაა, რომ ამ ქვეყნიდან უკრაინას პოლიტიკური მხარდაჭერა აქვს და ეს ყველაფერი ერთმანეთს ხელს არ უშლის. საქართველო რუსეთს სანქციებს არ და ვერ უწესებს იმიტომ, რომ ეს საქართველოს უფრო დააზიანებს, ვიდრე რუსეთს. მხოლოდ იმიტომ, რომ რაღაც პოზა დავიჭიროთ, ჩვენი ქვეყნის და მოსახლეობის დაზიანებას ნამდვილად არ ვაპირებთ. ამისთვის არ მგონია, რომ ვინმემ საქართველოს დასჯა უნდა მოინდომოს. ჰააგაშიც კი ვითხოვთ, რომ მხარი დავუჭიროთ იმ დოკუმენტს, რომელიც რუსეთის წინააღმდეგ არის, თუმცა, მეორე მხრივ, სანქციებს არ ვაწესებთ. ამიტომ არის ის, რომ ფრენები არის თავისუფლად. ცალმხრივად დაწესებული სანქციები რუსეთმა ცალმხრივად მოხსნა. როდესაც ვითხოვდით ამერიკელ, ევროპელ პარტნიორებთან ერთად ამის მოხსნას, ჩვენ თვითონ ამ სანქციების დაწესებას და შესაბამისად, ქართველების დაზიანებას არ ვაპირებთ. ამიტომ, ჩვენი პოზიცია არის ერთი მხრივ, ძალიან სახელმწიფოებრივი, ეროვნული, რომელიც ქართველების ინტერესებიდან გამომდინარეობს და ეს პრინციპული დამოკიდებულება არ გადაიხედება“,-განაცხადა მდინარაძემ.

„ქართული ოცნების“ თავმჯდომარის ირაკლი კობახიძის განცხადებით, ევროკავშირის რეკომენდაციები ივნისის ბოლოსთვის იქნება შესრულებული და თუ სამართლიანი შეფასებაც იქნება, გადაწყვეტილება საქართველოს მიმართ დადებითი უნდა იყოს.

როგორც მან ჟურნალისტებს განუცხადა, მოლოდინი ოპტიმისტურია, თუმცა შანსები 50/50-ზეა.

„ივნისის ბოლოსთვის ყველა რეკომენდაცია იქნება პირნათლად შესრულებული, აქედან გამომდინარე, თუ იქნება სამართლიანი შეფასება ამჯერად, რა თქმა უნდა, ეს შეფასება ჩვენი ქვეყნის მიმართ იქნება დადებითი. ასეთ შემთხვევაში კანდიდატის სტატუსის მინიჭებასთან დაკავშირებით, დეკემბერშიც ევროკავშირმა უნდა მიიღოს დადებითი გადაწყვეტილება, თუ, რა თქმა უნდა, იქნება სამართლიანი გადაწყვეტილება, განსხვავებით შარშანდელი ივნისის გადაწყვეტილებისგან. ჩვენი მოლოდინი ამ კუთხით არის ოპტიმისტური, თუმცა ეს არის პოლიტიკური გადაწყვეტილება და შანსები არის 50/50-ზე.

ივნისში დასრულდება ყველა რეფორმის განხორციელება 12 პუნქტის შესაბამისად. რაც შეეხება დეპოლარიზაციას, დეპოლარიზაცია ნიშნავს იმას, რომ ორივე მხარემ უნდა გადადგას ნაბიჯები. პირველ რიგში, რადიკალურმა ოპოზიციამ. პოლარიზაციის ქვეშ სინამდვილეში რადიკალიზმი იფუთება. პოლარიზაციაში გულისხმობენ რას, ვიღაცამ უნდა გირტყას ფეხებში და შენ არ უნდა გქონდეს ამაზე რეაქცია. დეპოლარიზაცია არის ის, როცა რადიკალები წყვეტენ რადიკალურ ქმედებებს და ასეთ დროს, ბუნებრივია, ხელისუფლებას არანაირი ინტერესი არ აქვს თვითონ იმოქმედოს რადიკალურად“, – განაცხადა კობახიძემ.

უკრაინელებს სურთ დაშანტაჟება მეორე ფრონტის სანაცვლოდ – ვერავითარი სანქციის, შანტაჟის ქვეშ ბიძინა ივანიშვილს ვერ აიძულებენ, რომ ხელი მოაწეროს საკუთარი ქვეყნის განადგურებას, – ამის შესახებ „ქართული ოცნების“ თავმჯდომარემ, ირაკლი კობახიძემ უკრაინის მხრიდან მმართველი გუნდის დამფუძნებლის, ბიძინა ივანიშვილის შესაძლო სანქცირებასთან დაკავშირებით განაცხადა.

მისივე თქმით, უშიშროების საბჭოს მდივანი, პრეზიდენტის მრჩეველი პირდაპირ ითხოვენ საქართველოში მეორე ფრონტს და ამის მისაღწევად, შანტაჟის ინსტრუმენტის ამოქმედებას ცდილობენ.

„ჩვენთვის ამას არავითარი მნიშვნელობა არ აქვს. ჩვენთვის მნიშვნელობა აქვს კონკრეტულ მოცემულობას. მოცემულობა არის ის, რომ ბიძინა ივანიშვილის მიმართ სანქციები უკვე დიდი ხანია მოქმედებს. ეს არის დე-ფაქტო სანქციები, რომელიც მოქმედებს შვეიცარიული ბანკის მეშვეობით. ბიძინა ივანიშვილმა წერილით გაახმოვანა ის ინფორმაცია, რომელიც უკავშირდებოდა მასთან კონკრეტულ კომუნიკაციას და როგორც მან აღნიშნა, პირდაპირი იყო მინიშნება ამასთან დაკავშირებით, რომ მის მიმართ არის მოთხოვნა და ის არ შეასრულებს არც ერთ შემთხვევაში ისეთ მოთხოვნას, რომელიც შეიძლება უკავშირდებოდეს ჩვენი ქვეყნის განადგურებას. ვერავითარი სანქციის, შანტაჟის ქვეშ ბიძინა ივანიშვილს ვერ აიძულებენ, რომ ხელი მოაწეროს საკუთარი ქვეყნის განადგურებას. პირდაპირ ითხოვენ მეორე ფრონტს საქართველოში. პირდაპირ უშიშროების საბჭოს მდივანი, პრეზიდენტის მრჩეველი ითხოვენ მეორე ფრონტს საქართველოში და მეორე მხრივ, ცდილობენ რაღაც შანტაჟის ინსტრუმენტი აამოქმედონ. როცა ერთი მხრივ, ითხოვ მეორე ფრონტს და მეორე მხრივ, ითხოვ სანქციებს, აქ ძალიან ნათლად ჩანს, რა არის მათი ინტერესი. მათ სურთ დაშანტაჟება მეორე ფრონტის სანაცვლოდ,“ – განაცხადა კობახიძემ.

„ნაციონალურმა მოძრაობამ“ უკვე მივმართეთ დღეს დილით ოფიციალური წერილით სემეკს. ვითხოვთ რიგგარეშე სხდომის მოწვევას და დოლარის კურსის ცვლილებასთან ერთად, ჩვენი მოსახლეობისთვის ელექტროენერგიისა და გაზის გადასახადის გაიაფებას, – ამის შესახებ „ნაციონალური მოძრაობის“ ლიდერმა ლევან ხაბეიშვილმა პარტიის ოფისში გამართულ ბრიფინგზე განაცხადა.

მისი თქმით, იმის გამო, რომ ლარი გამყარდა, შესაძლებელი გახდა, რომ ფასმა ელექტროენერგიაზე 4 თეთრით, ხოლო ბუნებრივ აირზე 6-7 თეთრით დაიკლოს.

„იმ პირობებში, როცა „რუსულ პარტიას“ „ლავ სთორი“ აქვს კრემლთან, პუტინთან, როცა ვხედავთ, რომ ევროკავშირის დროშები საერთოდ გააქრეს, იმ პირობებში, როცა, ფაქტობრივად, რუსეთ-უკრაინის ომში რუსულ პარტიას უჭირავს რუსეთის მხარე, ამის პარალელურად ქართველ ხალხს, მოსახლეობას ძარცვავენ რუსულად. რუს ოლიგარქს ივანიშვილს სხვანაირად არ შეუძლია, რუსულად უნდა გაძარცვოს ქართველი ხალხი და ამიტომ არ უნდა ევროკავშირში, სადაც ასეულობით მილიონს ვეღარ მოპარავს ქართველ ხალხს და ქართველი ხალხის ხარჯზე ვეღარ გამდიდრდება. ჩვენ რამდენიმე კვირის წინ მოვითხოვეთ დოლარის კურსის ცვლილების პარალელურად, შემცირებულიყო ტარიფები ელექტროენერგიაზე, გაზზე და წყალზე, იმიტომ, რომ როცა მოუმატეს მოსახლეობას ელექტროენერგიის და გაზის გადასახადი, მაშინ აუწყეს, რომ დოლარის კურსი ძალიან მაღალიაო და შესაბამისად, ამიტომ მოიმატა ტარიფმაო, თუმცა როგორც კი ლარმა გამყარება დაიწყო, ეს არ შეეტყო არავის. მოსახლეობას ჭირის დღესავით სძულს ქვითრის მოსვლა, იმიტომ, რომ ამ ქვითრის გადახდა მერე ძალიან უჭირს. გუშინ დავით ნარმანიამ, სემეკის თავმჯდომარემ, დაადასტურა, რომ ტარიფების შემცირება შესაძლებელია, მაგრამ არ ამცირებენ იმიტომ, რომ არ იციან, როგორ გაგრძელდება სიტუაცია ქვეყანაში და დოლარის კურსი რა მდგომარეობაში იქნება.

დღესვე შესაძლებელია დოლარის კურსის შესაბამისად, მინიმუმ 4 თეთრით -ელექტროენერგიის და 6-7 თეთრით გაზის გაიაფება. ამიტომ, ჩვენ ვითხოვთ სემეკისგან სასწრაფოდ სხდომის ჩატარებას და გუშინ რომ დაადასტურა დავით ნარმანიამ, რომ შესაძლებელია ფასის კლება, ოფიციალურად მოახდინონ ტარიფების კლება ჩვენი მოსახლეობისთვის.“,- განაცხადა ლევან ხაბეიშვილმა.

“როდესაც „ქართული ოცნება“ მოვიდა ხელისუფლებაში, თვისებრივად შეიცვალა 26 მაისის, როგორც მთავარი საერო დღესასწაულის კონცეფცია ჩვენს ქვეყანაში, რუსთაველის გამზირი გახდა არა რაღაც ტიპის სამხედრო ჩვენებების ადგილი, როგორც ეს მაგალითად ჩემს ბავშვობაში ხდებოდა, არამედ ბავშვებისთვის, ახალგაზრდებისთვის, ოჯახებისთვის, ყველასთვის სასიამოვნო, სასეირნო, საგანმანათლებლო და სასიამოვნო დღე”, – ამის შესახებ კულტურის მინისტრმა, თეა წულუკიანმა განაცხადა.

მისივე თქმით, 26 მაისისადმი მიძღვნილი ღონისძიებები საზოგადოებაში პოპულარობით სარგებლობს, რაც ოპოზიციას არ მოსწონს.

„ასევე, უმნიშვნელოვანესი დღე, როდესაც ჩვენი წვევამდელები დებენ ფიცს სამშობლოს წინაშე. ეს ზოგადი კონცეფცია. რაც ჩვენ დავამკვიდრეთ და როგორც ვხედავთ საზოგადოებაში ძალიან დიდი პოპულარობით სარგებლობს, ეჭვი მაქვს, რომ ოპოზიციას, რომელიც მხოლოდ დესტრუქციით არის დაკავებული, ძალიან არ მოსწონს და ადარდებს. ამავე კონცეფციის ნაწილია, რომ ყოველ წელს ვაცხადებთ კონკრეტულ თემატიკას. როდესაც სამინისტროები ვინაწილებთ, ვინ რომელ ადგილას, რომელ რეგიონში გამართავს ამა თუ იმ ღონისძიებას, ყოველთვის ერთი და იმავე თემატიკის გარეშემო ვტრიალებთ. შარშან თემატიკა ოფიციალურად შერჩეული გახლდათ ევროპისკენ, ამიტომაც ყველაფერი იყო შეფუთული ქართულ და ევროპულ ევროკავშირის დროშებით, ემბლემატიკა იქნებოდა ეს თუ სხვა, მათ შორის დროშები. ასევე. მახსოვს, როდესაც ჩვენ ვიზალიბერალიზაციის პროცესი გვქონდა, მაშინაც 26 მაისი ვიზეიმეთ სწორედ ამ ორი ატრიბუტიკით, ემბლემებით. ხოლო წელს. თემატიკად შერჩეულია თავისუფლება, თავისუფლებისკენ, ამ თემატიკის გარშემო ვტრიალებთ და ბუნებრივია ალბათ, რომ ჩვენი მთავარი ემბლემატიკა და ასე ვთქვათ მასალა, რომელსაც დიზაინერები და ღონისძიების ორგანიზატორები იყენებენ, სწორედ არის ჩვენი ეროვნული დროშა, ჩვენი ეროვნული ფერები. ამიტომ, ის სპეკულაციები, რაც დღეს გვესმის, არის თითიდან გამოწოვილი. უკვე ამ ადამიანებს ახასიათებთ, რომ ყველაფერში დაინახონ ნეგატივი ან ეძებონ სკანდალი, რადგან როგორც ბატონმა გივი თარგამაძემ თქვა, მათი ემბლემა უკვე არის უბრალოდ ტრიპაჩობა და ტრიპაჩული აქციები. რაკი ვერ გადააყირავეს მთავრობა, ახლა უკვე დიზაინერების კრიტიკით არიან დაკავებული“, – განაცხადა წულუკიანმა.