საქართველოს საზოგადოებრივი მაუწყებელი განცხადებას ავრცელებს.

განცხადებაში განმარტებულია გადაცემების დახურვის მიზეზი და ნათქვამია, რომ საზოგადოებრივი მაუწყებლისთვის კატეგორიულად მიუღებლად რომელიმე გადაცემის ირგვლივ საკითხის პოლიტიზება.

საზოგადოებრივი მაუწყებლის განცხადებით, რესტრუქტურიზაცია მოცემული ფინანსური ცვლილებებიდან გამომდინარე დაიგეგმა.

“საზოგადოებისთვის ცნობილია, რომ მაუწყებლობის შესახებ კანონში შეტანილი ცვლილებებით შეიცვალა მაუწყებლის დაფინანსების მოდელი და წესი. ასევე ცნობილია, რომ 2024 წელს მაუწყებელი იცვლის შენობას და გადადის ახალ მისამართზე, ეს კი უკავშირდება ინფრასტრუქტურულ და ტექნოლოგიურ ცვლილებას, რაც, თავის მხრივ, ზრდის ორგანიზაციის კაპიტალურ ხარჯებს.

არსებული მოცემულობა ახალი რეალობის წინაშე აყენებს ორგანიზაციას, რომელიც ვალდებულია, ერთი მხრივ, შეინარჩუნოს უწყვეტი მაუწყებლობა, შეასრულოს ნაკისრი შინაარსობრივი ვალდებულებები და, მეორე მხრივ, ახალი გარემოებიდან გამომდინარე, შეცვალოს დაგეგმილი პროგრამირება.

საზოგადოებრივ მაუწყებელზე არსებული ყველა გადაცემა ერთნაირად ღირებული, ხარისხიანი და მნიშვნელოვანია. მრავალფეროვნება – ინფორმირება, შემეცნება, გართობა და სპორტი, რომელიც ნებისმიერი საზოგადოებრივი მაუწყებლის ქვაკუთხედია, ითვალისწინებს ყველა ტიპის მაყურებლის გემოვნების დაკმაყოფილებას და გამორიცხავს გადაცემების პოლიტიზებას.

არხზე წლების განმავლობაში არსებობს სხვადასხვა პოლიტიკური, სოციალური თუ კულტურული შინაარსის პროგრამები და ეს მიდგომა უცვლელი რჩება, რესტრუქტურიზაცია დაიგეგმა მოცემული ფინანსური ცვლილებებიდან გამომდინარე და სხვადასხვა ფორმით შეეხება ყველა პროექტს, ასევე ორგანიზაციის თითოეულ თანამშრომელს.

კატეგორიულად მიუღებლად მიგვაჩნია რომელიმე გადაცემის ირგვლივ საკითხის პოლიტიზება, რადგან ამ ეტაპისთვის არსებული ცვლილებებიდან გამომდინარე, თითოეულ გადაცემაზე დანაკლისი ექნება სხვადასხვა ტიპის მაყურებელს, საკუთარი გემოვნებისა და პრეფერენციების მიხედვით.

იხურება სრულად არხი „ტელესკოლა“;

„დღის კოდი“;

„გორგილაძის აუტანელი სიმსუბუქე“;

„ფერმა“;

„თავისუფალი ხედვა გიორგი გვიმრაძესთან ერთად“;

„ჰოპლა ჩვენ ვცოცხლობთ“;

„ნატალიასთან და დათუნასთან ერთად“;

„კაცები PLAY“;

ასევე ცვლილებებთან დაკავშირებით მოლაპარაკება მიმდინარეობს ყველა გარეწარმოების (6 კომპანია) კომპანიასთან.

გამომდინარე იქიდან, რომ საზოგადოებრივი მაუწყებლის 2024 წლის ბიუჯეტი დამტკიცდა 14 დეკემბერს, გუშინ კი დასრულდა ყველა პროექტის შემოქმედებით ჯგუფებთან პირისპირ კომუნიკაცია, დღეს გაცნობებთ არსებულ ვითარებას, ვისთვისაც მნიშვნელოვანია საზოგადოებრივი მაუწყებლის იდეა, რადგან ინტერპრეტაცია მხოლოდ ხელს შეუშლის რეალური სურათის დანახვას.“, – აღნიშნულია განცხადებაში.

დღეიდან, ქუთაისის საერთაშორისო აეროპორტის ბაზაზე ევროპის ყველაზე სწრაფად მზარდმა ავიაკომპანია Wizz Air-მა საჰაერო ხომალდების რაოდენობა ოთხამდე გაზარდა და ქუთაისი-კოპენჰაგენი-ქუთაისის მიმართულებით პირდაპირი რეგულარული ფრენების განხორციელება დაიწყო, – ამის შესახებ ინფორმაციას აეროპორტების გაერთიანება ავრცელებს.

მათივე ცნობით, მეოთხე ბაზირებული AIRBUS 321neo საჰაერო ხომალდით, პირდაპირი რეგულარული რეისები დანიის დედაქალაქის მიმართულებით ქუთაისიდან კვირაში ორი სიხშირით სრულდება.

„ქუთაისის საერთაშორისო აეროპორტში ამ დღესთან დაკავშირებით დახვედრის ოფიციალური ცერემონიალი გაიმართა, რომელსაც საქართველოს აეროპორტების გაერთიანების გენერალური დირექტორი ირაკლი ქარქაშაძე, საქართველოს პარლამენტის წევრი ზაზა ლომინაძე და DMO იმერეთის ხელმძღვანელი მარიამ დევიძე დაესწრნენ. პირველ რეისს კოპენჰაგენიდან 165 მგზავრი ჩამოჰყვა. საქართველოს აეროპორტების გაერთიანების ორგანიზებით, რეისის პირველ მგზავრებს ტრადიციულად სიმბოლური საჩუქრები დაურიგდათ.

ამ დრომდე, საქართველოსა და დანიის სამეფოს შორის, პირდაპირი საჰაერო მიმოსვლა არ არსებობდა. მეოთხე ბაზირებული ხომალდის ფარგლებში სიხშირეები გაიზარდა სხვადასხვა მიმართულებებზე და ზოგიერთი მიმართულება კვირაში 3 და 4 სიხშირით სრულდება“, – აღნიშნულია გავრცელებულ ინფორმაციაში.

დროებით ოკუპირებულ გალში მოკლული ვიტალი კარბაიას ცხედარს ექსპერტიზა გუშინ ჩაუტარდა. „მოძრაობა აფხაზეთისთის“ წერს, რომ კაცი ცემის შედეგად მიყენებული დაზიანებებით გარდაიცვალა.
„დღეს აფხაზეთში, გალში – სოფელ წარჩეში მიწას მიაბარეს ე.წ. მილიციელების – ზარაქუა, კვეკვესქირი და აბშილავას მიერ ცემით მოკლულ ვიტალი კარბაია. ჩვენი ინფორმაციით გუშინ საღამოს გალის რაიონის ხელმძღვანელის მიერ იყო მოთხოვნა, ჩატარებულიყო ექსპერტიზა, რომელიც ჩაუტარდა. ექსპერტიზამ დაამტკიცა ცემის შემდგომ მიყენებული დაზიანების შედეგად გარდაცვალება”, – ვკითხულობთ მოძრაობის ფეისბუკგვერდზე.

ცნობისთვის, 9 დეკემბერს ოკუპირებულ გალში საოკუპაციო რეჟიმის ე.წ. მილიციის თანამშრომლებმა ჩხრეკის მიზნით გააჩერეს და სასტიკად სცემეს საქართველოს მოქალაქე,თემურ (ვიტალი) კარბაია.მოგვიანებით ის ე.წ. მილიციის განყოფილებაში გადაიყვანეს, სადაც, სავარაუდოდ, ფიზიკური ანგარიშსწორება გაგრძელდა.მიყენებული დაზიანებების გამო, კარბაია სოხუმის საავადმყოფოში მიყვანისთანავე დაიღუპა.

საბურთალოს რაიონში კიდევ ერთი ქუჩის რეაბილიტაცია სრულდება. 18 დეკემბრიდან ადამ მიცკევიჩის ქუჩაზე საავტომობილო მოძრაობა სრულად აღდგება. ინფორმაციას თბილისის მერია ავრცელებს.

საბურთალოს რაიონის გამგეობის დაკვეთით მიმდინარე ინფრასტრუქტურული პროექტის ფარგლებში უკვე მოეწყო ტროტუარები, პანდუსები და სანიაღვრე ქსელი; მიწისქვეშა კაბელ-არხებში განთავსდა საჰაერო ელექტროსადენები და სრულად მოწესრიგდა ბუნებრივი აირის დაზიანებული მიწისქვეშა ქსელი.

ამ ეტაპისათვის, 7800 კვ. მ გზის სავალ ნაწილზე სრულდება ასფალტის საფარის დაგება და გარე განათების ახალი ქსელის მოწყობა. გარდა ამისა, აქტიურ რეჟიმში მიმდინარეობს მთლიანად ტერიტორიის მოწესრიგების სამუშაოები, რომლის ფართობი ჯამში 19 800 კვადრატული მეტრია.

პროექტის ბოლო ეტაპის სამუშაოებს საბურთალოს რაიონის გამგებელი გიზო ვასაძე და თბილისის საკრებულოს მაჟორიტარი დეპუტატი ავთანდილ ცინცაძე გაეცნენ. პროექტისათვის ბიუჯეტიდან 2 000 000 ლარი გამოიყო.

15 დეკემბრიდან იმ აბონენტებს, რომლებსაც „სილქსატის“ მომსახურეობა გაეთიშებათ, სატელევიზიო მაუწყებლობის მიღება „აზერსპეისის“ (Azerspace 46E) თანამგზავრიდან საქართველოს მთელ ტერიტორიაზე უფასოდ შეეძლებათ.

კერძოდ, „აზერსპეისის“ თანამგზავრიდან შემდეგი ქართული არხების მიღებაა შესაძლებელი: საზოგადოებრივი მაუწყებლის პირველი არხი, აჭარა ტვ, იმედი, GDS, ტვ პირველი, მთავარი არხი, ფორმულა, რუსთავი 2, მარაო, კომედი არხი, POS TV, ობიექტივი, ტვ 25, საზოგადოებრივი მაუწყებლის მეორე არხი და მარნეული ტვ.

იმისთვის, რომ აბონენტებმა „აზერსპეისის“ თანამგზავრიდან სიგნალის მიღება შეძლონ, საჭიროა რამდენიმე ტექნიკური საკითხის უზრუნველყოფაა, კერძოდ, „აზერსპეისის“ სამაუწყებლო სიგნალის მისაღებად, აუცილებელია თანამგზავრული ანტენის (თეფშისა) და მიმღების (ე.წ. Set Top Box) შეძენა და მონტაჟი. იმ შემთხვევაში, თუ თეფშს რაიმე შენობა ან მთა ფარავს, საჭირო იქნება მისი ისე განთავსება, რომ სიგნალი დაიჭიროს. ხოლო, იმ აბონენტებს, რომელთაც თეფში უკვე აქვთ, ერთჯერადად მხოლოდ მიმღების შეძენა დასჭირდებათ.

„აზერსპეისის“ თანამგზავრის სამაუწყებლო სიგნალის მისაღებად აუცილებელია შემდეგი ტექნიკური პარამეტრების გამოყენება: თანამგზავრი Azerspace 1 აღმოსავლეთ განედის 46 გრადუსი /East 46°, მიღების სიხშირე/Downlink Frequency: 11095Mhz, პოლარიზაცია/Polarization: ჰორიზონტალური/Horizontal, სიმბოლური სიჩქარე/Symbol Rate: 30000 KBit/s, შესწორების კოდი/FEC Rate: 5/6.

გარდა „აზერსპეისისა“, აბონენტების ნაწილს „სილქსატის“ ჩანაცვლება „სტერეო +“-ის ციფრული ტელევიზიის სისტემითაც შეუძლიათ, თუმცა, „სტერეო+“ ყველა იმ გეოგრაფიულ არეალში, სადაც „სილქსატის“ მიღება იყო შესაძლებელი, არ იჭერს. „სტერეო+“-ის სისტემაში ჩასართავად, საჭიროა ციფრული ტელევიზიის მიმღებისა (DVB-T2 სტანდარტის ე.წ „სეთობოქსი“) და ანტენის კომპლექტის შეძენა. ანტენის დამონტაჟება უმჯობესია აივანზე ან სახურავზე. მონტაჟის შემდეგ, ანტენა კაბელით (კოქსიალური) მიმღებს, ხოლო მიმღები ტელევიზორს უნდა შეუერთდეს.