საბედნიეროდ პაატა მანჯგალაძის ქცევის ავკარგიანობაზე არ არის დამოკიდებული საქართველოს პროგრესი. ეს ძალიან კარგი ამბავია იმიტომ, რომ რეალურად ეს უპასუხისმგებლო დამოკიდებულებები, რომელსაც ხშირ შემთხვევაში ოპოზიცია ავლენს, ამ შემთხვევაში ვგულისხმობ იმას, რომ მათი არჩეული სტრატეგიაა ის, რომ რეკომენდაციების შესრულებას, ევროინტეგრაციას ხელი შეეშალოს იმისთვის, რომ ეს დაჰბრალდეს ხელისუფლებას და ეს გამოიყენონ პოლიტიკურ ბატალიებში. ეს არის მათი ამოცანა და დღის წესრიგი.“- ამის შესახებ ადამიანის უფლებათა კომიტეტის თავმჯდომარემ, მიხეილ სარჯველაძემ 12 რეკომენდაციის შესასრულებლად სამუშაო ჯგუფებში ოპოზიციის მონაწილეობაზე და მათ პასუხისმგებლობაზე საუბრისას განაცხადა. „თუკი დღეს არჩეული გვყავს 3 არამოსამართლე წევრი ევროკომისიისა, ეს სწორედ იმის გამოა, რომ ხუთივეზე შეთანხმება ვერ შევძელით. მხოლოდ იმან განაპირობა ეს გარემოება, რომ ოპოზიციას ასეთი არასწორი, მანკიერი სტრატეგია აქვს არჩეული. სამწუხაროა, მაგრამ ეს არის რეალობა, რომელიც გვაქვს.“- აღნიშნა სარჯველაძემ. როგორც მიხეილ სარჯველაძემ განაცხადა, დეპოლარიზაციის მიმართულებით ყველაზე სწორი გამოსავალი, რაც მმართველმა გუნდმა ოპოზიციას შესთავაზა, თითოეულ პუნქტთან დაკავშირებით სამუშაო ჯგუფების შექმნა იყო. მისივე თქმით, როდესაც ამ შეთავაზებაზე უარს იღებ, ეს იმას ნიშნავს, რომ დეპოლარიზაციის მიმართულებით ოპოზიციას ხელის შეშლის სურვილი აქვს. „დეპოლარიზაციის მიმართულებით, ყველაზე სწორი გამოსავალი იყო ის, რაც ჩვენ შევთავაზეთ პირველივე დღეებში, როდესაც მივიღეთ ევროპული რეკომენდაციები. გამოვედით ინიციატივით, ირაკლი კობახიძის ბრიფინგი იყო, რომელმაც თქვა, რომ თითოეულ პუნქტთან დაკავშირებით ვქმნით სამუშაო ჯგუფებს. სამუშაო ჯგუფის მთელი ფუნქცია ის კი არ იყო, რომ მე განსხვავებულად ვიმუშავებდი, არა, მთავარი ფუნქცია იმაში მდგომარეობდა, რომ ერთობლივად მუშაობა წარმართულიყო. ამ შეთავაზებაზე, რომელიც იყო ჩვენი კეთილგანწყობის დემონსტრირება, მათ შორის, ოპოზიციასთან ერთად მუშაობის თვალსაზრისით, როდესაც იღებ ცივ უარს, ეს იმას ნიშნავს, რომ დეპოლარიზაციის მიმართულებით ოპოზიციას სურვილი აქვს, რომ ხელი შეგიშალოს. აბსოლუტურად გაშიშვლდა პრობლემა რაში მდგომარეობდა და დაინახა ყველამ, რომ რეალურად ისინი დესტრუქციულად იყვნენ განწყობილები. ამისგან თავდაცვის მიზნით გააკეთეს მუშაობის სიმულაცია, როდესაც მოითხოვეს რიგგარეშე სხდომის ჩატარება. სხდომისა, რომელზედაც განსახილველი საკითხი არ არსებობდა. საზოგადოებაც ძალიან კარგად ხვდება, რომ ეს არის დასტური იმისა, რომ ხელისუფლების წინააღმდეგ ბრძოლაში ოპონენტები გამოიყენებენ ასეთ არგუმენტს, როგორიც არის ხელის შეშლა ქვეყნისთვის, რომ შემდგომ წარმატებას მიაღწიოს ევროინტეგრაციის მიმართულებით.“- განაცხადა მიხეილ სარჯველაძემ.

ზოგადად ყველაფერში და განსაკუთრებით პოლიტიკაში, ყველაზე მნიშვნელოვანი არის კონტექსტი, არცერთი მოცემულობა არ არსებობს კონტექსტის გარეშე რა კონტექსტში ვართ?! – მთელი მსოფლიოს განვითარებული ნაწილი უპრეცედენტოდ უჭერს მხარს საქართველოს, რომ ევროატლანტიკური სივრცის წევრი გავხდეთ, ყველა სახელმწიფო დისტანცირდება რუსეთისგან და ამ დროს, ამ კონტექსტში, საქართველოს მთავრობა თითზე ჩამოსათვლელ ქვეყნებთან ერთად ყველაფერს აკეთებს, რომ დაუახლოვდეს რუსულ პოლიტიკას და გახდეს მისი ნაწილი, მაგრამ ამ ყველაფერს ქართველი ხალხის გვერდის ავლით აკეთებს და მეტიც, საკუთარი ამომრჩევლის დიდი ნაწილის ნებასაც არ გამოხატავს, – ამის შესახებ „ნაციონალური მოძრაობის” ყოფილმა თავმჯდომარემ ნიკა მელიამ გადაცემაში „პოლიტიკური ამბები” განაცხადა.

„მჯერა, რომ 2012 წელს „ქართული ოცნების” მხარდამჭერების დიდ ნაწილსაც ამ გზის გასავლელად არ აურჩევიათ ეს პარტია, რომ ინტენსიური მუშაობით მთელი სახელმწიფო რუსეთისკენ წაეყვანათ. დღეს ქვეყნის წინაშე არსებული გამოწვევები საერთოდ არ საჭიროებს პარტიულ თანამდებობას. ვცდილობდი, ასი დღე არ ვყოფილიყავი აქტიური, რომ გასულიყო გარკვეული პერიოდი და ხელი არ შემეშალა ახალი მენეჯმენტისთვის, მაგრამ მომდევნო სამი თვე განსაკუთრებით აქტიური ვიქნები.

თერთმეტი წლის წინ, ამ პარტიას იმ დროს შემოვუერთდი, როცა ბევრი ადამიანი აქტიურობას წყვეტდა თვიდან თვემდე, ჩემს მეორე ოჯახად იქცა ეს პარტია, არჩევნების შემდეგ კი სიმართლითა და ღირსებით მართვა ვუსურვე ახალ მენეჯმენტს, მაგრამ ხუთ დღეში არაფორმალურმა მმართველმა ხიდები ჩაანგრევინა.
სამწუხაროდ, პარტია არ არის იმ ყველაფრის ღირსი, რაც დღეს ხდება.

ვიყავი, ვარ და ვიქნები იქ, სადაც არის გამარჯვებისა და წარმატების მოტანის შესაძლებლობა ამ ქვეყნისთვის.
მჯერა, რომ სანამ პოლიტიკაში ფარისევლობისა და მლიქვნელობის ხარისხი ბოლომდე არ აღმოიფხვრება ან მნიშვნელოვნად არ შემცირდება, უკეთეს შემთხვევაში ვიდგებით იქ, სადაც ვართ…
პოლიტიკური პარტიის შექმნის ამბიცია ბევრ პოლიტიკოსს გასჩენია საკუთარი ამბიციების დასაკმაყოფილებლად. მე პარტიას ვუყურებ როგორც ინსტრუმენტს, რომ ხედვა რომელიც გაქვს, განახორციელო და ემსახურო პრინციპებს – ბევრი ადამიანი ასე არ ფიქრობდა და შედეგად რას ვხედავდით?! – ორი ან სამი ლიდერი გაერთიანდებოდა და შემდეგ, ხალხი შემოეშლებოდათ, რადგან არც პრინციპების და იდეის გამო არ მომხდარა პარტიის შექმნა.
ვიყავი და ვრჩები მებრძოლად – ამ ქვეყნის საკეთილდღეოდ და არა იმიტომ, რომ გამარჯვება მოვიპოვოთ და ვიღაცამ ბიძინა ივანიშვილი ჩაანაცვლოს. მაქვს არეალი და ვმოქმედებ ისე, როგორც მნიშვნელოვნად მიმაჩნია. მომავალი გვაჩვენებს რა იქნება საჭირო.
წინასაარჩევნო კამპანია იყო გაჩაღებული, რომ მელიას არ უნდოდა მიხეილ სააკაშვილის ჩამოსვლა – დიახაც, ბევრისგან განსხვავებით, ჩამოდიო რომ ეძახდნენ, მე საფრთხეებს ვხედავდი.
ამორალურობაა, რასაც ბოლო დღეებში ვხედავ – პოლიტპატიმრებს აჯიბრებენ. ნიკა გვარამიას თავისუფლება საერთო ბრძოლას რომ ენერგიას შემატებს, ბევრი ადამიანია დარწმუნებული, მათ შორის თავად მიხეილ სააკაშვილი. ნიკა გვარამია ციხეში ხისტი, მაგრამ მართალი სიტყვის გამო ზის, რომელიც ძალიან სტკიოდა ბიძინა ივანიშვილს და რასაც დღეს ვხედავ, არ არის მისაღები და აქაც ჩანს, რომ ენმ-ის მიმართ მიუღებლობა იზრდება და არა მიმღებლობა.

არ არის ნიშნის მოგებისა და მხილების დრო, მაგრამ არც დუმილის დროა – ეს ქვეყანა მარცხს ვეღარ გადაიტანს. ვიღაცები ცდილობენ ბიძინა ივანიშვილის საპირწონედ დაიყენონ თავი და კი არ შეცვალონ, არამედ ჩაანაცვლონ იგი. ახლა გამოვლენ ვიღაცები და იტყვიან, კეზერაშვილისა და მერაბიშვილის აქეთ ყოფნა არ სჯობს, ვიდრე ბიძინა ივანიშვილისკენ რომ იყვნენო?! – მაპატიეთ, მაგრამ 2017 წელს, როდესაც პარტია გაიყო, ეს ადამიანები იქით იყვნენ და ამის დამსახურებით ავდექით ფეხზე. ვანო მერაბიშვილმა რომ გამოაცხადოს, რომ „ქართულ ოცნებას” უჭერს მხარს, დაგანახებთ რა მხარდაჭერა დაემატება ენმ-ს და რა დააკლდება „ქართულ ოცნებას”, ამ ქვეყანაში ვცხოვრობ და ვიცი.

ჩვენ არაერთი კარგი და კვალიფიციური პროგრამა გვქონია, მაგრამ ჩვენი გზავნილები საზოგადოების ძალიან დიდ ნაწილთან არ მიდიოდა, 20% არც კითხულობდა. მოსახლეობას აინტერესებს, რომ მოვალთ დავჩაგრავთ თუ არა, რადგან გამოყოლილი აქვთ ეს განცდა და ემოცია… გიყურებენ და ფარდის უკან იმ ადამიანებს ხედავენ, ვის გამოც 2012 წელს “ქართულ ოცნებას” მისცეს ხმა“, – განაცხადა ნიკა მელიამ.