საქართველოს და პოლონეთს შორის სტრატეგიული ურთიერთობა მოსაფრთხილებელია, მაგრამ მათაც უნდა გაითვალისწინონ საფრთხე, რომელიც საქართველოს ემუქრება ფინანსური, მედია რესურსების და იმ ადამიანების ჩართულობით, რომლებმაც გადაწყვიტეს, დააზიანონ საქართველო, უფრო რბილი, დიპლომატიური განცხადება იყო მათგან მოსალოდნელი , – ამის შესახებ პარლამენტის პირველმა ვიცე- სპიკერმა გია ვოლსკიმ განაცხადა, რითაც “ვივამედში” მომხდარ ინციდენტთან დაკავშირებით პოლონეთის საელჩოს განცხადებას გამოეხმაურა.

მისივე თქმით, მომხდარზე ინფორმაციის გასაჯაროება და განცხადებები, რომელიც საქართველოს ხელისუფლების წარმომადგენლებმა გააკეთეს, თავდაცვისთვის იყო საჭირო.

“ისტორიას ახსოვს დიპლომატიურ ურთიერთობებში, როცა გარკვეული სკანდალური საკითხი არც მთლად ბოლომდეა ხოლმე გარეთ გამოტანილი, მაგრამ არ ახსოვს ისტორიას ასეთი კანონდარღვევა, რომელიც ამ პოლონელმა ექიმმა ჩაიდინა. ორმხრივ ურთიერთობას ჩრდილი ვერ უნდა მიაყენოს ამ თაღლითურმა მოქმედებამ, რაც ამ ექიმმა ჩაიდინა. რაც მთავარია, ჩვენს მეგობრებს, პარტნიორებს, პოლონურ მხარეს, ალბათ, კარგად ესმის და ხედავს, რა პროცესებიც ვითარდება, თუნდაც ბოლო დღეებში, რაც რევოლუციურმა კომიტეტმა განახორციელა, რომ დაუწესდეს ქვეყანას სანქციები სააკაშვილის გამო. როცა ასეთი არაორდინალური სიტუაცია, სკანდალური სიტუაციის შექმნა სურთ საქართველოს გარშემო, ასეთი ბინძური მეთოდებით, სახელმწიფო თავს იცავს კონკრეტული განცხადებების კეთებით, მედიას იმ ინფორმაციის გაშუქებას ვერავინ აუკრძალავს, რაც ხელთ აქვს. ეს არის თავდაცვისთვის გადადგმული ნაბიჯი, რათა ოფიციალურად აღებულ ნიმუშს არავითარი საფრთხე აღარ დაემუქროს. როცა ასეთი დიდი სკანდალი გორდება ასეთ არაორდინალურ სიტუაციაში, რომელიც საქართველოს გარშემო მისმა არაკეთილისმსურველებმა შექმნეს, ეს ძალიან მცირედია, რითაც საქართველომ თავი დაიცვა, როცა ეს ინფორმაცია საჯარო გახადა, რათა არანაირი საფრთხე არ დაემუქროს ოფიციალურ ნიმუშს.

ასეთ დროს, (პოლონური მხარისგან) ჯერ უნდა კეთდებოდეს განმარტებები და განცხადება, რომ არავითარი საშიშროება ოფიციალურ ნიმუშს არ ემუქრება და არანაირი თაღლითურად გატანილი, დაბინძურებული ნიმუში არ იქნება მხედველობაში მიღებული. ამის შემდეგ შეიძლება ითქვას შეუთანხმებლობაზე, რაც ორ მხარეს შეიძლება გააჩნდეს. რაც შეეხება ორმხრივ პოლიტიკურ ურთიერთობებს, აქ საფრთხე არ და ვერ უნდა არსებობდეს, საქართველოს და პოლონეთს შორის სტრატეგიული ურთიერთობა არის მოსაფრთხილებელი, მაგრამ მათაც უნდა გაითვალისწინონ საფრთხე, რომელიც საქართველოს ემუქრება ამხელა ფინანსური, მედია რესურსების და ადამიანების ჩართულობით, რომლებმაც გადაწყვიტეს დააზიანონ საქართველო რეპუტაციულად, მათ უნდა გაითვალისწინონ, რა თქმა უნდა, ეს ვითარება და უფრო რბილი, დიპლომატიური განცხადება იყო მათგან მოსალოდნელი და საჭირო”, – განაცხადა ვოლსკიმ.

ძალიან მკაფიოდ შემიძლია გითხრათ – არა, 5%-იანი საარჩევნო ბარიერის დაწევის საკითხი დღის წესრიგში არ დგას! – ამის შესახებ პარლამენტში ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

მდინარაძე ხაზგასმით ამბობს, რომ 5%-იანი საარჩევნო ბარიერის შენარჩუნების პირობებში მმართველი გუნდის მხრიდან არავითარი პირობა არ ირღვევა და ამაზე საუბარი არასწორია.

„შარშან ირაკლი კობახიძემ თქვა შემდეგი, რომ თუ იმ წელს საქართველო კანდიდატის სტატუსს მიიღებდა, ამისთვის მზად ვიყავით, მაგრამ არ თქმულა, რომ თუ საქართველო სტატუსს გაისად, ოდესღაც და იმის შემდეგ მიიღებს, ბარიერს დავწევთ. ასეთი დაპირება არ ყოფილა, მსგავსი რამე არ თქმულა.

ნებისმიერი მემორანდუმი, შარლ მიშელის შეთანხმება, რომელშიც ჩვენი ევროპელი კოლეგები იყვნენ ჩართული, იმის გამო ანულირდა, რომ მისი არც ერთი პუნქტის შესრულებაში „ნაციონალურ მოძრაობას“ და სხვა ოპოზიციურ პარტიას მონაწილეობა არ მიუღია. პირიქით, მის საპირისპიროდ იმოქმედეს. შარლ მიშელის შეთანხმებას „ნაციონალურმა მოძრაობამ“ ხელი საერთოდ არ მოაწერა.

ევროპის უმრავლეს ქვეყნებში ისევე როგორც ჩვენთან 5%-იანი საარჩევნო ბარიერია, რასაც თავისი იურიდიული ახსნაც აქვს – ბალანსი ყოველთვის მოსაძებნია ორ დიდ ინტერესს შორის. არის უსაფრთხოებასთან დაკავშირებული საკითხები და სხვა რისკები, რასაც კონსტიტუციონალისტები თეორიასა და პრაქტიკაში განიხილავენ ხოლმე, მეორე მხრივ, არსებობს პლურალიზმისა და მრავალპარტიულობის ინტერესიც. ევროპის ქვეყნების ნახევარზე მეტმა გადაწყვიტა, რომ 5%-იანი ბარიერი ორივე ინტერესს ყველაზე კარგად აბალანსებს”, – განაცხადა მამუკა მდინარაძემ.

სამწუხაროდ, პოლონური მხარე აპელირებს რამდენად რელევანტური, კანონიერი და თანამშრომლობის გათვალისწინებით იყო კადრები გამოქვეყნებული – ეს იმას ნიშნავს, რომ თავად ფაქტზე სათქმელი არაფერი აქვს, – ამის შესახებ ჟურნალისტებს ფრაქცია “ქართული ოცნების” თავმჯდომარემ მამუკა მდინარაძემ განუცხადა.

როგორც მან აღნიშნა, პოლონური მხარე დისკუსიაში შემოვიდა, „მაგრამ როცა დისკუსიას მხარეები ჰყავს, ჰყავს მართალი მხარეც“.

მდინარაძის თქმით, მიხეილ სააკაშვილს მოწამვლის არანაირი ნიშანი არა აქვს და ამის გაყალბებას ცდილობდნენ.

„განცხადება არ წამიკითხავს, მაგრამ თქვენ რაც წამიკითხეთ, იქიდან არ იკითხება სინანული და ძალიან სამწუხარო ფაქტის აღიარება, რომელიც რომ არ გამოქვეყნებულიყო, რამდენიმე დღეში ყალბი დასკვნა გვექნებოდა, რომლის წინააღმდეგ არანაირი მტკიცებულება არ იარსებებდა და შემდეგ თქვენ მკითხავდით, თუ ასეთი ფაქტი მოხდა, რატომ არ გამოაქვეყნეთ, არ უთხარით საზოგადოებასო. ჩვენ ყალბი დასკვნა გვექნებოდა, რომ თითქოს, სააკაშვილი მოწამლულია. ამის შემდეგ არავინ გვაპატიებდა ქართულ სახელმწიფოს, რომ ეს კადრები არ გავასაჯაროვეთ და არ დავდეთ. სამწუხარო რეალობა იკვეთება, რომ მთავარზე არ არის აქცენტი და გადატანილია სხვა მიმართულებით, რამდენად სწორი იყო ამის გამოქვეყნება. რამდენიმე დღეში იქნებოდა ყალბი დასკვნა, რაზეც სალაპარაკო აღარ იქნებოდა და მთელ მსოფლიოს შესაღდებოდა თითქოს სააკაშვილი მოწამლულია. ამაში თავად ექიმი ჩართული კი არ იყო, შემოქმედი იყო როგორ უნდა გაყალბებულიყო დასკვნა, ამაზე ვერავინ იკამათებს. ჩემი აზრია, რომ უნდა გასაჯაროებულიყო, რადგან ყალბი დასკვნა დაგვეწეოდა, რაზეც თავს ვეღარ ვიმართლებდით. თავად ფაქტი არის ძალიან ცუდი და მიზნად ისახავდა გაყალბებას”, – განაცხადა მამუკა მდინარაძემ.

პოლონეთის საგარეო უწყების განცხადებით, მიხეილ სააკაშვილის შესახებ პოლონელი ექიმების ინციდენტი განიმარტა საქართველოს საგარეო საქმეთა მინისტრთან და პენიტენციური სამსახურის გადაწყვეტილება, რომ მათი ჩხრეკის ჩანაწერი გამოაქვეყნოს, კარგი თანამშრომლობის პრინციპებს ეწინააღმდეგება.

ზურაბიშვილზე მძლავრი ზეწოლა მიდის, რომ სააკაშვილის შეწყალებაზე სიტყვები “არა და არასდროს” უკან წაიღოს, შეიძლება გაუჭირდეს კიდეც თავის დაღწევა, – ამის შესახებ ფრაქცია “ქართული ოცნების” თავმჯდომარე მამუკა მდინარაძემ განაცხადა, რითაც უპასუხა კითხვას, თუ როგორ შეაფასებს იმას, რომ აშშ- ის იუსტიციის დეპარტამენტის ვებ – გვერდზე გამოქვეყნებულ დოკუმენტების თანახმად, “ნაციონალური მოძრაობა” და მათი ლობისტები სააკაშვილის გათავისუფლების ინსტრუმენტად ზურაბიშვილის ფაქტორს განიხილავს.

მდინარაძე აცხადებს, რომ მძლავრი ზეწოლის მიუხედავად, ზურაბიშვილს გაუჭირდება საკუთარი სიტყვების უკან წაღება.

“ზურაბიშვილმა ერთ შემთხვევაში “ნაცმოძრაობას” გაუმართლა, ახლა მიდის მასზე ზეწოლა, რომ სიტყვები “არა და არასდროს” უკან წაიღოს და ეს ზეწოლა არ არის მარტივი, მძლავრია, შეიძლება გაუჭირდეს კიდეც მისგან თავის დაღწევა. თუმცა, საბოლოო ჯამში მე მგონია, მართლა ძალიან გაუჭირდება და მის სიტყვებს “არა და არასდროს” უკან ვერ წაიღებს. რაც უფრო პრინციპულად დადგება ის ამ პოზიციაზე, დამიჯერეთ და ამას მომავალი გვაჩვენებს, რომ მასზე ზეწოლა კიდევ უფრო გაძლიერდება,”- განაცხადა მდინარაძემ.

მიხეილ სააკაშვილთან პოლონელი ექიმების ვიზიტის დროს მომხდარი ინციდენტი განიმარტა საქართველოს საგარეო საქმეთა მინისტრთან შეხვედრისას და ამ კონტექსტში, სპეციალური პენიტენციური სამსახურის გადაწყვეტილება, რომ პოლონელი ექიმის ჩხრეკის ჩანაწერი გამოაქვეყნოს, კარგი თანამშრომლობის პრინციპებს ეწინააღმდეგება, – ამის შესახებ პოლონეთის საგარეო საქმეთა სამინისტროს განცხადებაშია ნათქვამი, რომელსაც საქართველოში პოლონეთის საელჩო ავრცელებს.

ამასთან, უწყების განმარტებით, არც ინციდენტი და არც საქართველოს ხელისუფლების მიერ მისი გამოაშკარავება გავლენას არ მოახდენს პაციენტის ჯანმრთელობის მდგომარეობის და ქართველი ექიმების საქმიანობის შეფასებაზე და არც გამოკვლევების შედეგების გაანალიზების პროცესზე.

„პოლონეთის საგარეო საქმეთა სამინისტრო იუწყება, რომ 2023 წლის 17 ივლისს პოლონეთის საელჩოს საქმეთა დროებითი რწმუნებული დაბარებულ იქნა საქართველოს საგარეო საქმეთა სამინისტროში, პოლონელი ექიმების მიერ საავადმყოფოში მყოფი საქართველოს ყოფილი პრეზიდენტის, მიხეილ სააკაშვილის მონახულებისას მომხდარ ინციდენტთან დაკავშირებით. პოლონური მხარე აფასებს საქართველოს მთავრობის გადაწყვეტილებას და კმაყოფილებას გამოხატავს იმის გამო, რომ პოლონელ ექიმებს მიეცათ ყოფილი პრეზიდენტის მონახულებისა და გასინჯვის შესაძლებლობა და აქვე ხაზს უსვამს ქართველი ექიმების სრულ ჩართულობას მისი მკურნალობის პროცესში. თბილისში, „ვივამედის კლინიკაში, პრეზიდენტ მიხეილ სააკაშვილთან პოლონელი ექიმების ვიზიტის დროს, რომლის მიზანი იყო ყოფილი პრეზიდენტის დახმარება, მოხდა შეთანხმებასთან შეუსაბამო, განუზრახველი და გაუთვალისწინებელი ინციდენტი, რაც დაუყოვნებლივ გაირკვა ადგილზევე და შემდეგ განიმარტა საქართველოს საგარეო საქმეთა მინისტრთან შეხვედრისას. ამ კონტექსტში, საქართველოს იუსტიციის სამინისტროს დაქვემდებარებაში არსებული სპეციალური პენიტენციური სამსახურის გადაწყვეტილება, გამოაქვეყნოს პოლონელი ექიმის ჩხრეკის ჩანაწერი და საქართველოს სახელმწიფო ორგანოების წარმომადგენლების არაერთი ემოციური განცხადება ეწინააღმდეგება კარგი თანამშრომლობის პრინციპებს. პოლონური მხარე ხაზგასმით აღნიშნავს, რომ არც ინციდენტი და არც საქართველოს ხელისუფლების მიერ მისი გამოაშკარავება გავლენას არ მოახდენს პაციენტის ჯანმრთელობის მდგომარეობის და ქართველი ექიმების საქმიანობის შეფასებაზე და არც გამოკვლევების შედეგების გაანალიზების პროცესზე.პოლონური მხარე იმედოვნებს ქართველ პარტნიორებთან თანამშრომლობის უცვლელად გაგრძელებას და გამოთქვამს მზადყოფნას შემდგომი ქმედებებისთვის, რომელიც მიზნად ისახავს ჩვენი ქართველი პარტნიორებისა და საქართველოს ყოფილი პრეზიდენტის, მიხეილ სააკაშვილის დახმარებას“,- აღნიშნულია საელჩოს მიერ გავრცელებულ განცხადებაში.

შეგახსენებთ, სპეციალურმა პენიტენციურმა სამსახურმა მესამე პრეზიდენტთან, მიხეილ სააკაშვილთან პოლონელი ექიმების ვიზიტთან დაკავშირებით განცხადება და კადრები გაავრცელა. განცხადების თანახმად, ვიზიტის განმავლობაში, ერთ-ერთი პოლონელი ექიმისგან ადგილი ჰქონდა „გაუგებარ ინციდენტს“, კერძოდ, მსჯავრდებულ მიხეილ სააკაშვილისგან აღებული ნიმუში, პოლონელმა ექიმმა გადაახვია ქაღალდში და ცდილობდა მის მალულად გატანას ფეხსაცმლის მეშვეობით. ამასთან, უწყება განმარტავს, რომ ოფიციალური წესით აღებული ხნიმუშის გატანის უფლება მათ მისცა სამსახურმა, შესაბამისად, აღნიშნული ქმედება „ექიმის მხრიდან სამედიცინო ეთიკურ და სამართლებრივ ნორმებთან შეუსაბამო საქციელს კიდევ უფრო მეტად მატებს ბუნდოვანებას”.

პრეზიდენტის ადმინისტრაციის მუშაობაში ან პრეზიდენტის მიღებულ გადაწყვეტილებებში შემჩნეოდა დიდი დოზით „ნაციონალური მოძრაობის“ მიმართ სიმპათიები, – ამის შესახებ ჟურნალისტებთან ადამიანის უფლებათა კომიტეტის თავმჯდომარე მიხეილ სარჯველაძემ განაცხადა, რითაც პრეზიდენტის ადმინისტრაციიდან „ნაციონალურ მოძრაობაში“ ალექსანდრე კრევო-ასათიანის გადასვლას გამოეხმაურა.

„ცუდად გამოიყურება, როდესაც აღმოჩნდება, რომ არც თუ უმნიშვნელო თანამდებობაზე მომუშავე ადამიანი აღმოჩნდება, რომ პირველივე დაძახებაზე იშიფრება როგორც „ნაციონალური მოძრაობის“ ინტერესების გამტარი მოხელე“, – აღნიშნა მიხეილ სარჯველაძემ.

პრეზიდენტის ადმინისტრაციიდან „ნაციონალურ მოძრაობაში“ ალექსანდრე კრევო-ასათიანი გადავიდა, რომელიც ფრაქციაში საგარეო მიმართულების სამსახურის უფროსის მოადგილედ დაინიშნა და რომელმაც პრეზიდენტის პოზიციების გახმოვანება დაიწყო. პრეზიდენტის ადმინისტრაციამ განცხადება გაავრცელა, რომლის თანახმადაც ალექსანდრე კრევო-ასათიანი არასდროს იკავებდა პრეზიდენტის მრჩევლის პოზიციას და ის იყო სტაჟიორი.