პარლამენტის სასესიო დარბაზში, პლენარული სხდომის შესვენების დროს ოპოზიციის წარმომადგენლებსა და ფრაქცია „ქართული ოცნების“ თავმჯდომარე, მამუკა მდინარაძეს შორის სიტყვიერი დაპირისპირება მოხდა. დაპირისპირების დროს დარბაზში მედია არ იმყოფებოდა, თუმცა ინციდენტის ამსახველ ვიდეოჩანაწერს „ნაციონალური მოძრაობის“ წევრი, დეპუტატი ანა წითლიძე ავრცელებს, სადაც ჩანს, რომ მამუკა მდინარაძის გაღიზიანება ოპოზიციის მხრიდან „მოღალატის“ შეძახილმა გამოიწვია.

„ყველამ დაიმახსოვრეთ, დედას შევიგინები, როგორც კი მაგ სიტყვას ახსენებთ. რამე გინდა, მითხარი? დედას შევიგინები მოღალატეს ახსენებთ თუ არა, იმიტომ, რომ მთელი ცხოვრება რუსულ საქმეს აკეთებდით. აგერ, დევი [ჭანკოტაძე] ხომ არის? თქვი, აბა, დაგაბრალეს თუ არა ომის დაწყება რეზოლუციით? თქვენ ხართ ქვეყნის მტრები და მოღალატეები“, – მიმართა მამუკა მდინარაძემ ოპოზიციის დეპუტატებს.

მდინარაძეს „ნაციონალური მოძრაობის“ ერთ-ერთმა წევრი ანა წითლიძე გამოეხმაურა. „მაგარი ბიჭი ხარ? კამერები არ არის და შეგიძლია [კამათი], თუ რა არის, ვერ გავიგე?“ – განაცხადა წითლიძემ, რაზეც მდინარაძემ უპასუხა: „ხო, მაგარი ბიჭი ვარ…შენ ხომ იღებ[ვიდეოს], გადაიღე. ქვეყნის მოღალატე ხარ, იმიტომ, რომ „ნაცი” ხარ, შენ ხარ რუსული საქმის მკეთებელი და პროვოკატორი, ტუტუცი გოგო ხარ, უზრდელი ხარ”, – მიმართა მდინარაძემ ანა წითლიძეს.

ამის შემდეგ ანა წითლიძემ მდინარაძეს უთხრა, რომ ის მოღალატეა. „რუსი მოღალატე, გაეთრიე მართლა. რამდენს ბედავ, უზრდელო. კამერები გაიყვანა ბიჭმა, დგას 50 კაცში და „ბლატაობა” შეუძლია “, – აღნიშნა წითლიძემ.

მამუკა მდინარაძემ წითლიძეს უპასუხა, რომ მას თავს არ უყადრებს და ზოგადად, ყველას მისამართით საუბრობს.

„მოღალატე სიტყვის შეჩვევას თავი დაანებეთ! მთელი ცხოვრება თქვენ აკეთებდით რუსეთის საქმეს“, – მიმართა ოპოზიციას მდინარაძემ.

აშშ-ის ელჩის განცხადებამ, თითქოს უკრაინული კანონი იყო გამოწვეული ვენეციის კომისიიდან და არ იქნებოდა დასკვნა, გარკვეულწილად ხელი შეუწყო რადიკალური ოპოზიციის დეზინფორმაციულ ნარატივს, გუშინ აღმოჩნდა, რომ ელჩის ინფორმაცია არ იყო ზუსტი, რაც სამწუხაროა, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

მისივე თქმით, ელჩის განცხადებამ გარკვეულწილად ცუდი როლი შეასრულა მიმდინარე პროცესებში და გააღრმავა პოლარიზაცია.

„ჩვენ ვამბობდით, რომ უკრაინის კანონი ვინაიდან იყო ვენეციის კომისიის განსჯის საგანი, ჩვენ ვაპირებდით, დავლოდებოდი უკრაინის კანონზე ვენეციის კომისიის მოსაზრებას, გახსოვთ, შარშან ატეხილი პანიკა ოპოზიციის მხრიდან, გინდა თუ არა, ჩვენც უნდა წარვადგინოთო, არადა, ზუსტად ასლი იყო ამ კანონის. ჩვენ მაშინ ვთქვით, რომ დაველოდებოდით. სამწუხაროდ, აშშ-ის ელჩმაც განაცხადა მაშინ, თითქოს უკრაინული კანონი იყო გამოწვეული ვენეციის კომისიიდან და არ იქნებოდა ამაზე დასკვნა. გუშინ აღმოჩნდა, რომ ეს ინფორმაცია არ იყო ზუსტი, რაც სამწუხაროა. მაშინ ამ რადიკალური ოპოზიციის დეზინფორმაციულ ნარატივს გარკვეულწილად ხელი შეუწყო ელჩის არასწორმა ინფორმაციამ, თითქოს გამოწვეული იყო უკრაინული კანონი. სამწუხაროდ, მაშინდელმა განცხადებამ თავისი ცუდი როლი შეასრულა და ზიანი მიაყენა ზოგადად პოლიტიკურ პროცესებს, მათ შორის პოლარიზაციის გაღრმავებას, რეპუტაციული ზიანი მიაყენა ქვეყანას, თითქოს აქ ჯიუტი ხელისუფლებაა, რომელიც არ წარადგენს კანონპროექტს ვენეციის კომისიაში. არადა, რასაც ვამბობდით, ის დადასტურდა გუშინ, ველოდებოდით უკრაინულ კანონს“, – განაცხადა პაპუაშვილმა.

აშშ-ის ელჩმა, კელი დეგნანმა 2022 წლის 22 ნოემბერს განაცხადა, რომ, მისი ინფორმაციით, უკრაინამ დეოლიგარქიზაციის კანონი ვენეციის კომისიიდან გამოიწვია.

ამასთან, ვენეციის კომისიამ მიმდინარე წლის 12 ივნისს გამოაქვეყნა დასკვნა უკრაინულ კანონპროექტზე, რომლის სახელწოდებაა: „ვენეციის კომისიის 135-ე პლენარულ სესიაზე მიღებული მოსაზრება ეროვნული უსაფრთხოებისთვის საფრთხის აღკვეთის შესახებ კანონზე, რომელიც დაკავშირებულია საზოგადოებრივ ცხოვრებაში მნიშვნელოვანი ეკონომიკური ან პოლიტიკური წონის მქონე პირების (ოლიგარქების) გადაჭარბებულ გავლენასთან“.

როგორც უკრაინული კანონის შეფასებაშია ნათქვამი: „ამ ეტაპზე, ვიდრე არ შეიცვლება არსებული „პერსონალური მიდგომის“ არსი, ოლიგარქების შესახებ კანონში მნიშვნელოვანი ცვლილებებიც კი არ აღმოფხვრის გარდაუვალ შეუთავსებლობას ევროპის საბჭოს სტანდარტებთან ადამიანის უფლებების, დემოკრატიისა და კანონის უზენაესობის სფეროში. ამგვარად, ვენეციის კომისიამ დაასკვნა, რომ კანონი არ უნდა იქნას გამოყენებული არსებული ფორმით და უნდა იქნას გამოყენებული „სისტემური“ მიდგომა. აქედან გამომდინარე, რეკომენდაციაა, რომ ქვეყანაში ოლიგარქიული გავლენის წინააღმდეგ საბრძოლველად უკრაინის ხელისუფლებამ კანონიერად გადადოს ოლიგარქების შესახებ კანონის შესრულე

საქართველოს პარლამენტის თავმჯდომარის, შალვა პაპუაშვილის განცხადებით, დემოკრატია და „ნაციონალური მოძრაობა“ ერთმანეთთან შეუთავსებელი ცნებებია.

„ნაცმოძრაობას“ რომ დემოკრატიულ პროცესთან რაიმე საერთო ჰქონდეს, ეს გამორიცხულია. ეს პარტია ხელისუფლებაში თუ ოპოზიციაში ყოფნის დროს ერთადერთი რითაც გამოირჩევა, ძალადობა ან ძალადობისკენ მოწოდებაა, ასევე, წამების სისტემის შექმნით და ადამიანის სიტყვიერად ღირსების შელახვით. დემოკრატია და „ნაცმოძრაობა“ ერთმანეთთან შეუთავსებელი ცნებებია“, – განაცხადა შალვა პაპუაშვილმა.

საქართველოს პრემიერ-მინისტრი ირაკლი ღარიბაშვილი ბელგიის სამეფოს პრემიერ-მინისტრს ალექსანდერ დე კროოს შეხვდა. პრემიერ-მინისტრებს შორის შეხვედრა ჯერ პირისპირ, შემდეგ კი გაფართოებულ ფორმატში გაიმართა.

შეხვედრაზე ყურადღება გამახვილდა საქართველოსა და ბელგიის სამეფოს შორის მჭიდრო პარტნიორულ ურთიერთობებზე ორმხრივ და მრავალმხრივ ფორმატებში. განხილულ იქნა ორ ქვეყანას შორის სხვადასხვა სფეროში თანამშრომლობის გაღრმავების შესაძლებლობები, მათ შორის, სავაჭრო-ეკონომიკური, ინვესტიციების, ტურიზმის, განათლების, მეცნიერებისა და კულტურის მიმართულებით.

შეხვედრაზე განსაკუთრებული აქცენტი გაკეთდა საქართველოს ევროპული პერსპექტივის აღიარების ისტორიულ გადაწყვეტილებაზე. აღინიშნა, რომ ევროკომისიის 12 რეკომენდაცია საქართველოს მიერ თითქმის შესრულებულია. ამ ფონზე, ირაკლი ღარიბაშვილმა ხაზგასმით აღნიშნა წლის ბოლოს საქართველოსთვის კანდიდატის სტატუსის მინიჭების კრიტიკული მნიშვნელობა როგორც საქართველოს ევროპული მომავლის, ისე გეოპოლიტიკურ კონტექსტში. პრემიერ-მინისტრის თქმით, საქართველო იმსახურებს კანდიდატის სტატუსს, რაც ხელს შეუწყობს ქვეყანაში პოლარიზაციის შემცირებას.

ბელგიის სამეფოში საქართველოს პრემიერ-მინისტრის ორმხრივი ვიზიტი ხელოვნების საერთაშორისო ფესტივალის – „ევროპალია-საქართველოს“ პროგრამის წარდგენის პარალელურად იმართება. ფესტივალი წელს სრულად ეძღვნება საქართველოს, რაც უნიკალურ შესაძლებლობას ქმნის ევროპის პოლიტიკურ ცენტრში საქართველოს ევროპული ისტორიის, იდენტობისა და კულტურის წარმოსაჩენად. ირაკლი ღარიბაშვილის თქმით, „ევროპალია-საქართველოს“ განსაკუთრებული დატვირთვა აქვს იმ ფონზე, როდესაც წლის ბოლოს ქვეყანა კანდიდატის სტატუსის მინიჭებას ელოდება.

პრემიერ-მინისტრებს შორის შეხვედრის დასრულების შემდეგ ხელი მოეწერა ურთიერთგაგების მემორანდუმს საქართველოს საგარეო საქმეთა სამინისტროსა და ბელგიის სამეფოს ფედერალური საჯარო სამსახურის საგარეო საქმეთა, საგარეო ვაჭრობისა და განვითარების თანამშრომლობის სამინისტროებს შორის თანამშრომლობის შესახებ.

ინფორმაციას საქართველოს პრემიერ-მინისტრის პრესსამსახური ავრცელებს.

იქ, სადაც ოლიგარქიული მმართველობა არსებობს, ოლიგარქიული მმართველობის შესახებ კანონის მიღებას აზრი არა აქვს, – ამის შესახებ პოლიტიკური ჯგუფის “ევროოპტიმისტების” ხელმძღვანელმა რომან გოცირიძემ განუცხადა.

გოცირიძის განცხადებით, კონტექსტის გათვალისწინებით “ოლიგარქიული მმართველობის შესახებ” კანონი საქართველოსთვის რეპრესიული იქნება.

მისი თქმით, ამ მხრივ უკრაინა და მოლდოვა სხვა მდგომარეობაშია, ხოლო საქართველო სხვა მდგომარეობაში იმყოფა.

“თურმე ხელისუფლებაში ოლიგარქები არ არიან, მასთან დაკავშირებული ბიზნესმენები ოლიგარქები არ არიან და ჩვეულებრივი ბიზნესმენები არიან, თურმე ბიძინა ივანიშვილი ოლიგარქი არ არის და მას ხელისუფლებაზე არავითარი გავლენა არა აქვს… და ვინ არიან ოლიგარქები? – ოლიგარქები ოპოზიციურად განწყობილი დეპუტატები არიან! პრაქტიკულად ამას ნიშნავს ადამიანების ოლიგარქთა რეესტრში შეყვანა, რის შემდეგაც მათ მიმართ პოლიტიკური რეპრესიები დაიწყება.

ვენეციის კომისიამ ისტორიული დასკვნა დადო – თუკი ვამბობდით, რომ საქართველოში არის ოლიგარქიული მმართველობა და ეს უფრო მეტად აღიქმებოდა როგორც პოლიტიკური შეფასება და ტერმინი, ყველაზე დიდმა სამართლებრივმა ექსპერტმა – ვენეციის კომისიამ დაადგინა, რომ საქართველოში არაფორმალური ოლიგარქიული მმართველობა არსებობს და იქ, სადაც ოლიგარქიული მმართველობა არსებობს, ოლიგარქიული მმართველობის შესახებ კანონის მიღებას აზრი არა აქვს”, – განაცხადა რომან გოცირიძემ.

პარლამენტმა 13 ივნისის პლენარული სხდომის ბოლო საკითხად „დეოლიგარქიზაციის შესახებ“ კანონის პროექტი განიხილა და 81 – მომხრე, 2 – წინააღმდეგი, მეორე მოსმენით მიიღო.

ბელგიის სამეფოს პრემიერ-მინისტრთან შეხვედრაზე რეგიონული და გლობალური გამოწვევები, ორმხრივი ურთიერთობები და საქართველოს ევროპული მისწრაფებების მხარდაჭერა განვიხილეთ-ამის შესახებ საქართველოს პრემიერ-მინისტრი ირაკლი ღარიბაშვილი სოციალურ ქსელ „ტვიტერში” წერს.

მთავრობის მეთაური ბელგიის სამეფოს საქართველოს სუვერენიტეტისა და ტერიტორიული მთლიანობის ურყევი მხარდაჭერისთვის მადლობას უხდის.

„ძალიან კარგი საუბარი შედგა ბელგიის სამეფოს პრემიერ-მინისტრთან ალექსანდერ დე კროოსთან. განვიხილეთ რეგიონული და გლობალური გამოწვევები, ორმხრივი ურთიერთობები და საქართველოს ევროპული მისწრაფებების მხარდაჭერა. საქართველოს სუვერენიტეტისა და ტერიტორიული მთლიანობის ურყევი მხარდაჭერისთვის ბელგიის სამეფოს მადლობელი ვართ”,- წერს ირაკლი ღარიბაშვილი.