“ნუცა, მიიღეთ ჩემი საყვედური და გამოწვდილი ხელიც… – გიორგი კეკელიძე

11:15 - 26/06/2023

კეკელიძე ბუზალაძე — "თქვენ უსათუოდ იმღერებთ ხვალაც, ოღონდ უკვე გეცოდინებათ საკუთარი შეცდომის შესახებ, აღარ გაიმეორებთ და ვიცი, სხვასაც მოუწოდებთ, რომ რუსეთი ოკუპანტია და კრემლი სისხლიანი"

“უხერხულია იმ ქალაქში რამის საჯაროდ ზეიმი, საიდანაც გაცემული ბრძანებებით, ყოველდღე უდანაშუალო ბავშვებს ხოცავენ” – ეროვნული ბიბლიოთეკის დირექტორი, მწერალი გიორგი კეკელიძე, სოციალურ ქსელში მომღერალ ნუცა ბუზალაძეს მიმართავს.

“ვფიქრობდი მე, ადამიანი, რომელმაც ჯოჯოხეთური წელი გამოივიარე და დღემდე ვებრძვი სიტყვებისგან დამჩნეულ საშინელ კვალს. სხვა საკითხია – სამართლიანს თუ უსამართლოს, სხვა საკითხია ისიც – ამგვარი მასშტაბური იყო ის ამბავი თუ გაცილებით ვიწრო. მეტი ქომაგი მყავდა თუ ნაკლები. ადამიანი ხომ აღქმების არსებაა და დარდი მიზეზით არ იზომება. მით უფრო, რომ ეს დღეები რთული გამოდგა – მაქვს ხოლმე მსგავსი ჩაშვებები, ფსკერს მოვინახულებ და ისევ ამოვყვინთავ – ეგ არ არის ახლა მთავარი.

ჰოდა, დავსვი კითხვები და ვუპასუხე. სამართლიანი იყო საზოგადოების აღფოთება? – სრულიად. უნდა ყოფილიყო ასეთი მწვავე? – დიახ!

სხვანაირად ყველა ამგვარი ამბავი,

ნელნელა, ნორმად შემოგვეპარება ოკუპირებულ, ბევრჯერ გათელილ და სისხლნანთხევ ქვეყანაში, ისედაც სასარგებლო იდიოტებით და მეხუთე კოლონით ,,განებივრებულში”. ოკუპანტს კი სხვა არაფერი უნდა, ეს არის მისი მთავარი სამუშაო – შემოგვაგუოს წაგლეჯილი ტერიტორიები, გამოდევნილი მოქალაქეები, დახოცილი გმირები ლოზუნგებით:

,,ხელოვნება და პოლიტიკა”, ,,სპორტი და პოლიტიკა” სხვადასხვაა”. გავა დრო და ახალ თაობას ასე განცდა გაუბაცდება. ასე, რომ: არ შეიძლება ახლა მოსკოვში ჩასვლა და იქ სიმღერა. არ შეიძლება, რადგან ეს ხმა აუცილებლად მისწვდება ანწუხელიძის ოჯახის სამუდამოდ ღიად დარჩენილ ფანჯრებს.

იძულებითი იყო ბოდიში? – ცხადია. თუმცა თავისი არსით, ყველა ბოდიში იძულებითია – ან გარემოება გკარნახობს ან სინდისი. არავის მოუგონია მისი მოტივაციის ამომცნობი დეტექტორი. შესაბამისად, ბოდიში უნდა მიიღო. ადეკვატური იყო ბოდიშის ფორმა? ცხადია, არა. დრო, კონტექსტი და გარემოება არის აღსაქმელი. ჯობდა, ეს ,,მეგობრის დაბადების დღე” საერთოდ არ ეხსენებიათ

– უხერხულია იმ ქალაქში რამის საჯაროდ ზეიმი, საიდანაც გაცემული ბრძანებებით, ყოველდღე უდანაშუალო ბავშვებს ხოცავენ.

ასე რომ, რაც გუშინ მოხდა და ითქვა – აუცილებელი იყო – თუნდაც სხვა მსგავსი დღეების ასარიდებლად.

და ის, რაც დღეს უნდა ითქვას:

მე ვიცი ჩვენი საზოგადოების საშინელი თვისება – იყოს საოცრად აღგზნებული და ერთიანი ჩაქოლვისას – თუმცა ეს მხოლოდ ჩვენებური საქმე არ გახლავთ – ადამიანებს გვჩვევია ზოგადად. ისიც ვიცი, რომ ამ ტალახის მსროლელთა შორის, ბევრი უბრალოდ ჩასაფრებული და მომლოდინე, ბევრიც ასმაგი სტანდარტით აღსავსე, ზოგიც კიდევ, წესითა და რიგით, ამგვარი ლანძღვისას უუფლებო იყო – მაგრამ ეს არაფერს ცვლის. ვერც მანდ განსაზღვრავ ლიმიტს. როცა რამე შეგეშლება, ვერ მოითხოვ, მაინცდამაინც სელექციურად გაკრიტიკებდნენ.

იყვნენ ისეთებიც, ვინც მისი კარიერა დაიწუნა. გამოგიტყდებით, ჩემი მუსიკალური გემოვნება იმ მიმართულებას და შესრულების მანერას დიდად არ სცნობს, რომელსაც ნუცა წარმოადგენს. თუმცა, ეს არაფრით ნიშნავს, რომ ცუდი მომღერალია საკუთარ ჟანრში და რომ მისი წარმატება უმნიშვნელო იყო. სრულიად პირიქით.

მაგრამ მთავარი, რის გამოც დღეს გაწუხებთ კაცი, ვისაც გუშინ მკაცრი სიტყვები არ დაუშურებია, არის სხვა. და ეს სხვა, გულგრილად ნასროლი ფრაზაა: ნუცა ბუზალაძე დამთავრდა!

ვინ მოგცა შენ უფლება, მეორე ადამიანი, ცოცხალი ადამიანი, ,,დამთავრებულად” გამოაცხადო? საიდან მიინიჭე ეს გამანადგურებელი ძალა? მაშ, სად გაქრა, ადამიანად ყოფნის მთავარი უპირატესობა და მისტერია – ფერისცვალების აქტი. შეცვლის, შეცდომის გამოსწორების, გადალახვის, ახლის ქმნის, მონანიების, თავიდან დაბადების. სად გაქრა ადამიანთა მიერ მოგონილი უმთავრესი საყრდენი ყოფიერების – მეტანოია? რატომ აღარ უტოვებ შემცდარს გზას და ყველა სავალს გამალებით უხერგავ, რაც უნდა ყალბად გეჩვენებოდეს მისი ბოდიში ან გაწყობდეს, რომ ყალბი იყოს? რა სამართალია ის სამართალი, რომელიც არც ვადას სცნობს დანაშაულის თუ შეცდომის გამოსყიდვის, არც სურვილს ატარებს ამისას?

თანაც ეგეცაა – იქ მყოფთაგანს, ბოდიში, სხვას არავის მოუხდია. ზოგი საერთოდ აქეთ შემოგვედავა ლამის.

მე ამგვარი სამართლისგან შორს ვდგები. ამგვარი სამართალი ვერ ააშენებს მომავლის საზოგადოებას. ჩემი მომავალი არა განადგურების, არამედ ახსნის და გარდაქმნის, შეცვლის და ახალი გზებისაა – ჩვენ უნდა ვიყოთ მკაცრები, მაგრამ ეს სიმკაცრე უნდა გულისხმობდეს მეორე, გაწვდილ ხელს – ადამიანის ორმოდან ამოსაყვანად. ეს არის ჩემი გზა.

ასე, რომ Nutsa Buzaladze , მიიღეთ ჩემი აუცილებელი საყვედური და ამავდროულად გამოწვდილი ხელიც – თქვენ უსათუოდ იმღერებთ ხვალაც, ოღონდ უკვე გეცოდინებათ საკუთარი შეცდომის შესახებ, აღარ გაიმეორებთ და ვიცი, სხვასაც მოუწოდებთ, რომ რუსეთი ოკუპანტია და კრემლი სისხლიანი, რომ ჩვენი ქვეყანა აუცილებლად გაიმარჯვებს გრძელ და უსამართლო ომში, რომ დევნილები დაბრუნდებიან, რომ გმირებს დიდება და დიდება უკრაინას! და რაც მთავარია – საქართველოს!

p.s. და თუ არ ნანობს და არ შეიცვლება – ამას დრო გვაჩვენებს. ბევრი მუსიკოსი და მომღერალია, ვინც 2008 წლის შემდეგ, რუსეთში კონცერტებს აწყობდა, ძალიან ბევრი – კარგიც და ცუდიც. გაგიკვირდებათ, ისეთები და კონტექსტიც გაგიკვირდებათ, სად და როგორ. არ ვაპირებ მათ ჩამოთვლას – ,,NAME AND SHAME,, – არ არის ჩემი სპორტის კატეგორია. მით უფრო, რომ დღეს ისინი სწორ პოზიციას იჭერენ და საჯაროდაც გამოდიან – რა იძულებით და მიზეზით – მე ეგ არ ვიცი და დიდად არც მაინტერესებს. სწორედ ეს არის ამ წერილის პათოსი და ასევე სათქმელია ამ საუკუნის შავი ჭირის, ,,გაუქმების კულტურის” წინააღმდეგ და კიდევ ერთხელ შეხსენება იმის, რომ რუსეთი ოკუპანტია. ეს არის და ეს”, – წერს კეკელიძე.

საზოგადოებაში აჟიოტაჟი გამოიწვია ნუცა ბუზალაძის რუსეთში ჩასვლამ და სიმღერის შესრულებამ. როგორც მოგვიანებით მომღერალმა განმარტა, ის მეგობრის დაბადების დღის წვეულებაზე იმყოფებოდა და ყოველგვარი ჰონორარის გარეშე იმღერა. “თავს ვალდებულად ვთვლი, აგიხსნათ ყველაფერი…” – ნუცა ბუზალაძე მიმართვას ავრცელებს

“ესაა ბულინგი, ფსიქოლოგიური ტერორი, სისასტიკე, დაუნდობლობა…” – ირმა ინაშვილი ნუცა ბუზალაძეზე

11:09 - 26/06/2023

“პატრიოტთა ალიანსის” ლიდერი, ირმა ინაშვილი სოციალურ ქსელში, მომღერალ ნუცა ბიზალაძის წინააღმდეგ აგორებულ კამპნიას გამოეხმაურა ეხმაურება:

“ადამიანთა სისასტიკესა და დაუნდობლობას საზღვარი რომ არა აქვს, დღეს, აი, ამ საშინელი რეალობის (მორიგჯერ) გაცნობიერების დღე იყო. ზოგი პირდაპირ აშანტაჟებდა და ლანძღავდა ნუცა ბუზალაძეს, ზოგიც უფრო ცბიერად იქცეოდა: თან, მიყვარხარ… ჩემი მეგობარი ხარ, მაგრამ მაინც საჯაროდ გაკრიტიკებ(?!)… ესეც “მეგობრობაში” ახალი სტანდარტია, ეტყობა.

თუ მეგობარი ხარ, დალოცვილო, საჯაროდ რას მწერ და რას მიწუნებ საქციელს. გაჩუმდი, დამშვიდდი, კლავიატურაზე თითების კაკუნის ვნებას მოერიე და შენი წუხილი პირადად გამიზიარე, იქნებ შენი აზრები და პოზიციაა მცდარი და არა ჩემი. იქნებ შენ ვერ ხედავ სამყაროს სწორად, მაგრამ არა… თვითონ “კრისტალურები” არიან, თურმე, მოსკოვებში არ უვლიათ და აი, ნუცა ბუზალაძე მეგობრის წვეულებაზე მოსკოვში როგორ ჩავიდა, ამ ფაქტმა აღაშფოთა “კრისტალურთა” “უმანკო” გული. არ გიცნობდეთ მაინც. ეს “კრისტალურები” საათების წინ პრიგოჟინის მხურვალე გულშემატკივრები იყვნენ, თუ მეხსიერება არ მღალატობს. მოსკოვშიც დაფრინავენ და ბიზნესსაც შესანიშნავად უძღვებიან. რუსეთ- ამერიკის ორმაგ აგენტურაზე ახლა არ შევჩერდები. სტაბილური ჰონორარი აქვთ, არ უგვიანებენ ხელფასს. სამაგიეროდ, მთელ ქვეყანას კრემლის აგენტად აცხადებენ. აღარ დარჩა საქართველოში გლეხი, ექიმი, პედაგოგი, ტაქსის მძღოლი და ოფიციანტი, რუსეთის აგენტად რომ არ გამოაცხადონ.

გული არა გაქვთ თქვენ. აგური გაქვთ აშკარად, გულის ნაცვლად, თორემ სხვაგვარად იფიქრებდით, სხვაგვარად ისაუბრებდით და სხვაგვარად მოიქცეოდით. მოიქცეოდით ისე, როგორც ადამიანები და არა, როგორც მტაცებელი ცხოველები. სიბნელე და წყვდიადი სხვა არაფერია, თუ არა ამგვარი აზროვნება: ბრტყელი, ცივი, ბასრი.

არავითარი დანაშაული ნუცა ბუზალაძეს არ ჩაუდენია, რომ აიძულეთ ამდენი ბოდიში მოეხადა. ზუსტად თქვენნაირები უდანაშაულო კაცს ლონდონიდან ბომბეიმდე გვირაბის გაყვანას აღიარებინებდნენ. ეს ხართ თქვენ.

და ესაა ბულინგი, ესაა ფსიქოლოგიური ტერორი, ესაა სისასტიკე, ესაა დაუნდობლობა, ესაა
სრულიად ანტიადამიანური, ანტიჰუმანური კამპანია. ვისაც შეაშინებენ, შეჭამენ! ამიტომ არავინ არ უნდა დანებდეს ამათ.

როგორც მხეცი არ უნდა გრძნობდეს, რომ შეგაშინათ, ისე ამათ არ უნდა მისცეთ საშუალება, რომ გაგტეხონ!

ნიჭიერება, მამაცი გული, მხნეობა, სულის სიმტკიცე არ აკლია ნუცას. არავის მოატეხინო ფრთები, არავის!
P.S.რაც შეეხება რადიოების პროტესტს, სასაცილო და ამაზრზენია ეს რეაქცია. ხვალვე ვთხოვ ჩემს კოლეგებს, ჩემს მეგობრებს, რადიო “ობიექტივის”- 105.1 ხელმძღვანელობას, რომ შეუზღუდავი დრო დაუთმონ ნუცა ბუზალაძის შემოქმედებას”,- წერს ირმა ინაშვილი.

როგორც ცნობილია, მომღერალმა ნუცა ბუზალაძემ გულშემატკივრებს იმის გამო მოუბოდიშა, რომ რამდენიმე დღის წინ, მოსკოვში, მეგობრის დაბადების დღეზე იმყოფებოდა და იქ მყოფ ქართველ მომღერლებთან ერთად, სიმღერა „სამშობლო“ შეასრულა.

“წლევანდელი წელი გარდამტეხი იქნება ომში” – ბოლო ცნობები ცხელი წერტილიდან

10:56 - 26/06/2023

რუსეთ-უკრაინის ომის 488-ე დღე

უკრაინის რამდენიმე ოლქში წუხელ საჰაერო განგაში გამოცხადდა, ოდესაში ძლიერი აფეთქებების ხმები ისმოდა.

ოპერატიული სარდლობა „სამხრეთის“ ინფორმაციით, რუსული ძალები თავს ესხმიან ოდესის ოლქს.

„მიმდინარეობს საბრძოლო სამუშაოები, მუშაობს საჰაერო თავდაცვა, მათ შორის ქალაქის თავზე“, – აცხადებენ სარდლობაში.

ამასთან, თავდაპირველად საჰაერო ძალებმა განაცხადა, რომ დონეცკის, დნეპროპეტროვსკის, ზაპოროჟიეს, პოლტავას, ხარკოვისა და ხერსონის ოლქებში არსებობდა ბალისტიკური იარაღის გამოყენების საფრთხე. საჰაერო ძალები ასევე იუწყებოდა რიგ ოლქებში უპილოტო საფრენი აპარატების თავდასხმის საფრთხის შესახებ და შავი ზღვიდან „კალიბრის“ ტიპის ფრთოსანი რაკეტების გაშვების საფრთხის შესახებ.

მოგვიანებით, საჰაერო ძალებმა გამოაცხადა, რომ ბალისტიკური იარაღის გამოყენების საფრთხე აღარ არსებობდა, თუმცა, იმ ტერიტორიებზე, სადაც საჰაერო განგაში იყო გამოცხადებული, კვლავ არსებობდა დრონების გამოყენების საფრთხე.

უკრაინის თავდაცვის ძალების ავიაციამ, გასული დღის განმავლობაში, მოწინააღმდეგის ცოცხალი ძალის დისლოკაციის ადგილებს 8 დარტყმა მიაყენა, – ამის შესახებ უკრაინის შეიარაღებული ძალების გენერალური შტაბის ანგარიშშია აღნიშნული.

უწყების ცნობით, უკრაინელმა დამცველებმა, ერთ დღეში, მტრის კუთვნილი ოპერატიულ-ტაქტიკური დონის 6 სადაზვერვო დრონი გაანადგურეს.

გარდა ამისა, გენერალური შტაბის ანგარიშში საუბარია უკრაინელი არტილერისტების წარმატებებზე.

„სარაკეტო და საარტილერიო ქვედანაყოფებმა, გასული დღე-ღამის განმავლობაში, მართვის 2 პუნქტს, პერსონალისა და სამხედრო ტექნიკის თავშეყრის 3 ტერიტორიას, საბრძოლო მასალის 4 საწყობს, 10 საარტილერიო ქვედანაყოფს და მტრის კიდევ 3 მნიშვნელოვან სამიზნეს დაარტყეს“, – აცხადებენ გენშტაბში.

ამასთან, გენერალური შტაბის ანგარიშში საუბარია უკრაინის ტერიტორიაზე რუსული ძალების მიერ განხორციელებულ თავდასხმებზე.

„ოკუპანტებმა, გასული დღის განმავლობაში, ზაპოროჟიეს ოლქში სამოქალაქო სამიზნეების წინააღმდეგ S-300 ტიპის 6 მართვადი რაკეტა გამოიყენეს. გარდა ამისა, მტერმა განახორციელა 33 საჰაერო დარტყმა და მრავალჯერადი სარაკეტო სისტემებიდან ცეცხლი 45-ზე მეტჯერ გახსნა“, – აცხადებენ გენშტაბში.

უკრაინის თავდაცვის მინისტრის, ოლექსი რეზნიკოვის განცხადებით, ამჟამინდელი კონტრშეტევა „მოსამზადებელი ოპერაციაა“ და ის წარმატებული იქნება, როდესაც სრულად ამოქმედდება.

“ეს არის ერთგვარი მოსამზადებელი ოპერაცია. თუმცა მან დასძინა, რომ როგორც კი ის სრულად ამოქმედდება, წარმატებული იქნება და გამარჯვებამდე ერთი ნაბიჯით მიგვაახლოებს“, – აღნიშნა რეზნიკოვმა.

მისი თქმით, უკრაინა ძალიან ფრთხილია, როცა საქმე მის მამაც და მოტივირებულ მებრძოლებს ეხება და ცდილობს, მათი სიცოცხლის გადარჩენას მაშინ, როცა რუსეთი თავის ჯარისკაცებს „ხორცსაკეპ მანქანად“ იყენებს.

„ჩვენ მოვიგებთ ამ ომს, რადგან ჩვენ ვიბრძვით ჩვენი ქვეყნისთვის. წლევანდელი წელი გარდამტეხი იქნება ომში”, – განაცხადა რეზნიკოვმა.

“ავდეევკაზეც გვაქვს წინსვლა! უშუალოდ დონეცკის შემოგარენს მიადგნენ ჩვენები”

10:33 - 26/06/2023

ალექსი პეტრიაშვილი სოციალურ ქსელში უკრაინაში მიმდინარე მოვლენებს ეხმაურება

“პრიგოჟინი ბელარუსში კოლმეურნეობის თავმჯდომარედ, ტულის გუბერნატორი ალექსი დიუმინი – ურდოს თავდაცვის მინისტრად? შოიგუ???? #რუსკივაენიკარაბლიდინახუი ს მიმართულებითო, ასე ამბობენ ბოროტი ენები თვით ურდოსტანშიც კი! გენ.შტაბის უმფროსი გერასიმოვიც ზედ მიყვებაო! ისე, უბრალოდ გაყენებთ საქმის კურსში, თორემ ყველას ბოლო ერთია! მიფარჩაკებული პუტლერი თუ ამას შეყლაპავს, მაგას თვითონ შესანსლავენ მალე!
სახ.მდივანმა ენტონი ბლინკენმა არ ვიცი ეს გულისხმა თუ არა, როდესაც თქვა რომ 1-დღიანმა ჯანყმა გამოავლინა რუსეთის არმიის სისუსტეები და პუტინს უახლოეს კვირებში და თვეებში ბევრ რამეზე მოუწევს პასუხების გაცემაო! ვნახოთ, ვნახოთ!

ჩვენებმა გუშინ კიდევ ერთი კა-52 “ალიგატორი” დაუმატეს წინა დღეს ვაგნერელების მიერ ჩამოყრილ ვერტმფრენებს და ილ-22-ს! 15-მდე პილოტი დაბრიდეს თავისიანებმა და ტიპები ამბობენ არაფერი მომხდარაო! ჯარებში ისედაც ხო კაი განწყობა იყო და ახლა სულ მთლად ამაღლდებოდნენ!

ამასობაში გუშინ ჩვენებმა ხერსონის ოლქში ისევ ჩაარჭეს პლაცდარმი ალიოშკების დასახლებასთან, დაჩების მიდამოებში! ისეთი გაუდაბნოებულია უზარმაზარი ტერიტორია ჰესის აფეთქების შემდეგ, რომ ერთი დიდი იერიშის მიმართულებად ნამდვილად გამოდგება!

ბახმუტის მიმართულებითაც წაიწიეს წინ კურდიუმოვკისკენ და მდინარე სევერსკი დონეცის დასავლეთ სანაპირო და ბახმუტის მიმდებარე ტყის მასივები სულ გაწმინდეს ურდოსგან!

ზაპოროჟიეში სტარომლინოვკის მიმართულებაზე 15 კვადრატული კილომეტრი გაათავისუფლეს ჩვენებმა და მიიწევენ წინ როვნოპოლის მიმართულებით!

ავდეევკაზეც გვაქვს წინსვლა! უშუალოდ დონეცკის შემოგარენს მიადგნენ ჩვენები!
ლუჰანსკში სამეთაურო პუნქტი დაუბაბანეს გუშინ ჩვენებმა შტორმ შედოუს რაკეტებით!
კრემინას მიმართულებით გრძელდება ბრძოლები!

გერმანია მოგავწვდის 45 საარტილერიო სისტემა გეპარდს წლის ბოლომდე და კიდევ 2 ჰსთ სისტემას ირის ტ!
უკრაინა გაიმარჯვებს 2023-ში! პუტლერის რეჟიმი განადგურდება 2023-ში!
დიდება ერს!
სიკვდილი მტერს!”- წერს ალექსი პეტრიაშვილი.

“ეს ორმაგი „შემთხვევითი“ ერთდროული ვიზიტი მოსკოვში – კოტე კემულარია და მეუფე ნიკოლოზი, ძალზე საინტერესოა”

10:33 - 26/06/2023

კოტე კემულარიას ყოველთვის ჰქონდა ახლო, აგენტურული ურთიერთობები პუტინის მარჯვენა ხელთან, რუსეთის უშიშროების საბჭოს ამჟამინდელ მდივან ნიკოლოზ პატრუშევთან, – ამის შესახებ სოციალურ ქსელში „ხალხის ძალის“ წევრი, ანალიტიკოსი დავით ქართველიშვილი წერს.

„ობიექტივის პირდაპირ ეთერში, გადაცემის უკანასკნელ წუთზე დიმიტრი ლორთქიფანიძე -მ გაგვანდო ექსკლუზიური ინფორმაცია: “თბილისი-მოსკოვის პირდაპირი რეისით, 23 მაისს ისარგებლა ნაცების ღვაწლმოსილმა იდეოლოგმა კოტე კემულარიამ, რომელსაც რუსეთის პრეზიდენტის ადმინისტრაციაში ჰქონდა შეხვედრები”.

რატომღაც არ გამიკვირდა. კოტე კემულარიას ყოველთვის ჰქონდა ახლო, აგენტურული ურთიერთობები პუტინის მარჯვენა ხელთან, რუსეთის უშიშროების საბჭოს ამჟამინდელ მდივან ნიკოლოზ პატრუშევთან. რუსეთის ფედერაციაში ელჩად მუშაობის პერიოდში ეს ურთიერთობები კიდევ უფრო გამყარდა და როგორც ვხედავთ, არც ამჟამად შეწყვეტილა.

ძალიან საინტერესოა, რომ კოტე კემულარიასთან ერთდროულად, მოსკოვში გაფრინდა სააკაშვილის მოძღვარი მეუფე ნიკოლოზიც (საპატრიარქოსთან შეთანხმების გარეშე) – ეს ფაქტი კი უკვე იმ კატეგორიიდანაა, ერთდროულად ამერიკის ერთსა და იგივე ქალაქის, ერთსა და იგივე სასტუმროს, ერთსა და იგივე სართულზე სრულიად “შემთხვევით” სააკაშვილი და გახარია რომ ვიხილეთ თავის დროზე.

საქართველოში ორი დღის განმავლობაში მიმდინარე “მევარპრიგოჟინი”-ს ოპერაციის ფონზე (მეორე ფრონტის გახსნის მერამდენე წარუმატებელი მცდელობის ელემენტებით), ეს ორმაგი “შემთხვევითი” ერთდროული ვიზიტი: ნიკოლოზ პატრუშევთან (დიდი ალბათობით) და პატრიარქ კირილესთან – ოპერატიული და პოლიტიკური თვალსაზრისით ძალზე საინტერესოც არის და ყურადსაღები“, – წერს ქართველიშვილი.

თბილისს დღეს სანქციების საკითხებში ევროკავშირის სპეციალური წარმომადგენელი დევიდ ო’სალივანი ეწვევა

10:18 - 26/06/2023

სანქციების საკითხებში ევროკავშირის სპეციალური წარმომადგენელი დევიდ ო’სალივანი ორდღიანი ვიზიტით თბილისს დღეს ეწვევა, – ამის შესახებ ინფორმაციას საქართელოში ევროკავშირის წარმომადგენლობა ავრცელებს.

ევროკავშირის წარმომადგენლობის ინფორმაციით, ის საქართველოს ხელისუფლებასთან განიხილავს საერთო ინტერესების სფეროში შემავალ საკითხებს, კერძოდ, სანქციებსა და მათ ეფექტიან განხორციელებას.

„ვიზიტის მიზანია პირდაპირი საკომუნიკაციო არხის გახსნა და სამომავლო თანამშრომლობაზე დაფუძნებლული დიალოგის ჩამოყალიბება. საქართველოს ხელისუფლებამ თანამშრომლობის დიდი მზადყოფნა გამოხატა იმ საკითხებთან დაკავშირებით, რომლებიც განსაკუთრებული მნიშვნელობისაა სპეციალური წარმომადგენლის ვიზიტისთვის და არის იმედი, რომ მჭიდრო თანამშრომლობა გაგრძელდება.

ვიზიტის ფარგლებში, ხვალიდან გაიმართება შეხვედრები საქართველოს პრემიერ-მინისტრთან ირაკლი ღარიბაშვილთან, საგარეო საქმეთა მინისტრთან ილია დარჩიაშვილთან, ვიცე-პრემიერთან და ეკონომიკის მინისტრთან ლევან დავითაშვილთან, ფინანსთა მინისტრთან ლაშა ხუციშვილთან, ეროვნული ბანკის პრეზიდენტის მოვალეობის შემსრულებელთან და გენერალურ პროკურორთან ირაკლი შოთაძესთან. დევიდ ო’სალივანი, ასევე, ბიზნესის წარმომადგენლებს შეხვდება.

ვიზიტის ფარგლებში გაიმართება ო’სალივანის შეხვედრა პრესასთან.

ეს იქნება ერთობლივი ვიზიტი, რომელშიც ასევე მონაწილეობენ აშშ-ს სახელმწიფო დეპარტამენტის სანქციების კოორდინაციის ოფისის ხელმძღვანელი, ელჩი ჯიმ ო’ბრაიენი და გაერთიანებული სამეფოს საგარეო, თანამეგობრობისა და განვითარების ოფისის გენერალური დირექტორი ეკონომიკის, მეცნიერებისა და ტექნოლოგიების სფეროში, კუმარ აიერი“,- ნათქვამია ინფორმაციაში.

26 ივნისის ასტროლოგიური პროგნოზი

23:13 - 25/06/2023

ვერძი

დღეს შესაძლოა ყურადღების ცენტრში მოექცეთ, განსაკუთრებით აქტუალურია სასიყვარულო თემები. სიყვარულის ქარცეცხლში გახვეული ნუ დაკარგავთ ობიექტურობას.

კურო

სასურველია ჩართოთ ინტუცია და მოიძიოთ ახალი ფინანსური წყაროები ან თქვენი ჰობი აქციოთ საყვარელ საქმედ, რომელიც თქვენს განწყობასა და კეთილდღეობაზე დადებითად იმოქმედებს.

ტყუპები

საინტერესო იქნება მოსინჯოთ თქვენი წერის ნიჭი, გააკეთეთ ჩანახატები, დაიწყეთ დღიურის წარმოება, წერეთ თქვენი შთაბეჭდილებები, იაქტიურეთ ინტერეტ სივრცეში, შეიძინეთ ახალი მეგობრები სოციალურ ქსელებში.

კირჩხიბი

თქვენ განწყობის ადამიანი ხართ, ამასთანავე მეტად ხელგაშლილი და კეთილიც, მაგრამ არ შეგიძლიათ დაფაროთ თქვენი ემოციები და ამიტომ სასურველია მხოლოდ პოზიტიური განცდები ამოაფრქვიოთ ირგვლივმყოფებთან.

ლომი

ლომის ზოდიაქოს ნიშანს მართავს მზე, ცენტრალური ფიგურა მზის სისტემისა, ამიტომ ახლა ლომების – ანუ თქვენი დროა! დღეს დიდი სიხარული გელოდებათ! აივსეთ მზის ენერგიით, დაგეგმეთ მომავალი და იცხოვრეთ ლაღად და გაცნობიერებულად!

ქალწული

ნუ აიღებთ საკუთარ თავზე ზედმეტ პასუხისმგებლობას, ნუ შეეცდებით ნებისმიერ ფასად წინ აღმართულ ბარიერებს რქებით შეასკდეთ, დაზოგეთ საკუთარი ძალები.

სასწორი

ყურადღება მიაქციეთ დეტალებს, შეცვალეთ, გაალამაზეთ, კორექციები შეიტანეთ პირად სივრცეში, შეგიძლიათ წარმატებით დაიწყოთ უცხო ენების შესწავლა.

მორიელი

შანსი გაქვთ დადებითი თვისებების წარმოჩენით თავი გამოიჩინოთ და აიმაღლოთ რეპუტაცია. არაორდინალური მიდგომებით საქმისა და სამყაროს მიმართ თქვენ ყველას მართლაც გააოცებთ.

მშვილდოსანი

იყავით მეტად თავდაჯერებული და თქვენი აქტიური პოზიციით უკან გაიყოლეთ თანამოაზრეები, აუცილებლად მიაღწევთ წარმატებას, მაგრამ ბევრი რამაა დამოკიდებული თქვენს ფსიქოლოგიურ განწყობაზე.

თხის რქა

ნუ წამოიკიდებთ ტვირთად ზედმეტ ვალდებულებებს, გარდა მეუღლისა და ოჯახის წევრებისა, ენდეთ მხოლოდ მათ ვინც გიყვართ.

მერწყული

გამოიყენეთ თქვენი გამოცდილება და გააანალიზეთ განვლილი პერიოდი, შეიტანეთ შესაბამისი ცვლილებები თქვენს გეგმებსა და საქმიანობაში. იმოქმედეთ ფრთხილად და მოზომილად.

თევზები

იდუმალებითა და მისტიკით მოსილი ეს თევზები მცხუნვარე მზეს უფრთხის, ახლა თქვენთვის საუკეთესოა დასვენება ზღვაზე, ქალაქიდან მოშორებით, საღამოს საათებში სეირნობა. მეტი დრო დაუთმეთ ჯანმრთელობას.

რამდენად უსაფრთხოა შავი ზღვა საქართველოში – სპეციალისტების შეფასებები და პროგნოზები

21:51 - 25/06/2023

ქიმიური და მიკრობიოლოგიური დაბინძურების საფრთხე შავ ზღვაში – კახოვკის ჰიდროელექტროსადგურის განადგურების გამო, შავი ზღვა მძიმე დაავადებების გავრცელების წყაროდ იქცა. ზღვაში დიდი ოდენობით ტოქსიკური ნივთიერებები ჩაიღვარა. რეალური საფრთხე, წყალში მოხვედრილი შხამ-ქიმიკატებია, რომლებსაც ფერმერები საცავებში ინახავდნენ. სპეციალისტებმა ამონიუმის აზოტის, ნიტრატების, ქლორიდების, რკინის და მყარი ნივთიერებების ჭარბი რაოდენობა აღმოაჩინეს. შავი ზღვის მარილიანობა მკვეთრად შემცირდა და ოდესასთან ახლოს, ზღვის მარილიანობა თითქმის სამჯერ არის დაკლებული, რაც ზღვაში მტკნარი წყლის შედინებით იხსნება.

ქოლერა, ბოტულიზმი, ციმბირული წყლული – ეს არის იმ დაავადებების მცირე ჩამონათვალი, რომელიც შესაძლოა შავი ზღვიდან გავრცელდეს. უკრაინიდან მიღებული ინფორმაციის საფუძველზე, მოსახლეობა პანიკამ მოიცვა. ახლა ყველას აინტერესებს, წარმოადგენს თუ არა საქართველოს შავი ზღვის სანაპირო ზოლში ბანაობა საფრთხეს? – ამ კითხვაზე სპეციალისტებს ერთი პასუხი აქვთ – არა!

პრობლემა რეალურია უკრაინისთვის. ქვეყანამ ოფიციალურად აკრძალა ბანაობა და თევზაობა შავი ზღვის სანაპიროზე, ოდესაში. უკრაინის მოსახლეობას წყლის დეზინფექციისთვის სპეციალური ტაბლეტების გამოყენებას ურჩევენ – ამ წამლებს ადგილობრივი ხელისუფლება არიგებს.

ადგილობრივები ყოველდღიურად ავრცელებენ კადრებს, სადაც ჩანს, რომ ზღვა მწვანე ფერისაა. როგორც აცხადებენ, აქვს არასასიამოვნო სუნიც. შავი ზღვის სანაპირომ უჩვეულოდ მწვანე ფერი მიიღო ანექსირებული ყირიმის სანაპირო ზოლშიც. ეკოლოგები მოსალოდნელი რისკების შესახებ უკრაინის მეზობელ ქვეყნებსაც აფრთხილებენ.

შავი ზღვის მონიტორინგი გაძლიერდა რუმინეთში. სპეციალისტების შეფასებით, ქიმიური ნაერთებით და სხვა უცნობი ნივთიერებებით დაბინძურებული ტალღა, შავი ზღვის რუმინულ წყლებში რამდენიმე დღეში შეაღწევს, შემდეგ ბულგარეთში გადავა, სადაც უკვე მიიღეს მკაცრი ზომები. შეიქმნა სპეციალური ჯგუფები, რომლებიც წყლის ხარისხს ამოწმებენ. ბულგარეთის შემდეგ კი არის თურქეთის 1329 კილომეტრიანი სანაპირო ზოლი. თურქეთი, ისევე როგორც საქართველო აგრძელებს წყლის ხარისხის შემოწმებას და დაკვირვებას.

გაჩნდა კითხვა, მოაღწევს თუ არა მომწამვლელი ნივთიერებები შავი ზღვის საქართველოს სანაპირო ზოლამდე.

წლის რომელ მონაკვეთში, როგორ მოძრაობს და ცირკულირებს შავი ზღვის დინება – მთავარი დინება გარს უვლის ზღვას საათის ისრის საწინააღმდეგო მიმართულებით ნაპირებთან ახლოს. ამ შეკრული წრის შიგნით გამოიყოფა იმავე მიმართულების ორი ციკლონური დინება – დასავლეთ და აღმოსავლეთ მხარე, რომელიც ზღვას ფაქტობრივად ორ ნაწილად ყოფს.

შავ ზღვაში დინების სიჩქარე დაახლოებით 20-30 სანტიმეტრია წამში. მანძილი კი, რომელიც დინებამ უნდა გაიაროს დაახლოებით 1300 კილომეტრი. ეს ნიშნავს იმას, რომ ჩვენამდე მოსაღწევად რამდენიმე თვე დასჭირდება. თუმცა, როგორც სპეციალისტები ამბობენ, შავი ზღვის მარილიანობა ხელს უშლის ბაქტერიოლოგიური დაბინძურების გავრცელებას. ექსპერტები ვარაუდობენ, რომ ამ პერიოდამდე შავი ზღვა ჯანსაღი ეკოსისტემის გათვალისწინებით, ბალანსის აღდგენას მოახერხებს.

სხვა ქვეყნებთან ერთად, საქართველოც მუდმივად ამოწმებს შავ ზღვაში წყლის ხარისხს. გარემოს ეროვნული სააგენტო შავი ზღვის წყლის ხარისხის მონიტორინგს ცხრა სადგურზე ყოველთვიურად აწარმოებს, რითაც ისაზღვრება ძირითადი ფიზიკურ-ქიმიური პარამეტრები მარილიანობის ჩათვლით, ასევე, წყალში გახსნილი ჟანგბადისა და ბიოგენური ელემენტების შემცველობა. ხორციელდება მძიმე მეტალებისა და ორგანული დამაბინძურებლების კვლევა ზედაპირულ და ფსკერისპირა ფენაში.

მწვანე კონცხი, ბათუმის ნავსადგური, ჭოროხის შესართავი, სარფი, გრიგოლეთი ერთი, გრიგოლეთი ორი, ურეკი, ყვავილნარი, ფოთი მალთაყვა – ეს ის სადგურებია, სადაც მუდმივად ხდება წყლის ხარისხის შემოწმება.

მაგალითად, ამ თვეში მარილიანობა 13-დან 16%-მდე მერყეობს. ტემპერატურა საშუალოდ 21-22 გრადუსია, მოწმდება ნიტრატების, ასევე ამონიუმის და ფოსფატების შემცველობა. მოწმდება ელექტროგამტარობაც.

,,რუსეთში რაც მოხდა, ამ ქვეყანას ასუსტებს” – ბოკერია

20:45 - 25/06/2023

სულ უნდა გვახსოვდეს, რომ როგორც არ უნდა დასუსტდეს მტერი, ჩვენ თუ არ ვიქნებით ფორმაში, ეგ ვერ გვიშველის, – ამის შესახებ „ევროპული საქართველოს“ თავმჯდომარემ, გიგა ბოკერიამ დღევანდელ აქცია-პერფორმანსზე განაცხადა, სადაც პარტიის ორგანიზებით ფილმის – „რუსეთს ცრემლების არ სჯერა“ ჩვენება გაიმართა.

„საქართველოს ყველა ნორმალურ მოქალაქეს და პატრიოტს ახარებს ჩვენი მტრის დასუსტება. ის, რაც რუსეთში მოხდა, ამ ქვეყანას ასუსტებს. უმძიმესი დარტყმა მიიღო ხელისუფლებამ. ყველას სურდა, რომ კიდევ უფრო დიდი დარტყმა მიეღო, მაგრამ ეს აჩვენებს, რომ ეს ისტორიული ფანჯარა შესაძლებლობის იხსნება. ამავე დროს, სულ უნდა გვახსოვდეს, რომ როგორც არ უნდა დასუსტდეს მტერი, ჩვენ თუ არ ვიქნებით ფორმაში, ეგ ვერ გვიშველის”, – განაცხადა გიგა ბოკერიამ.

,,თამარ ბაჩალიაშვილის საქმის გამომძიებელი სერგო შუბითიძე პოლიტიკური პატიმარია”- ხაბეიშვილი

20:35 - 25/06/2023

„ნაციონალური მოძრაობის“ თავმჯდომარე ლევან ხაბეიშვილი აცხადებს, რომ გარდაცვლილი პროგრამისტის, თამარ ბაჩალიაშვილის საქმის გამომძიებელი სერგო შუბითიძე პოლიტიკური პატიმარია.

ხაბეიშვილი ეხმაურება მოწმის მიერ ცრუ ჩვენების მიცემით მართლმსაჯულებისთვის ხელის შეშლის ფაქტზე ყოფილი გამომძიებელის სერგო შუბითიძის დაკავებას.

“ქოლცენტრების საქმის გამო მოკლეს ახალგაზრდა ადამიანი. გააუბედურეს ოჯახი, სრულიად საქართველო შოკში ჩავარდა, ანგელოზი გოგონას მკვლელობით. შემდეგ, გააყალბეს საქმე, ხელი დააფარეს მკვლელს (მკვლელებს), დამკვეთებს – ყველაფერი ამას ადასტურებს.

საქმის გამომძიებელმა, რამდენიმე კვირის წინ ამხილა სისტემა, მოჰყვა ფალსიფიცირებული საქმის შესახებ და ივარაუდა, რომ ეს იყო შეკვეთილი მკვლელობა, რომელსაც ხელს აფარებდა რუსული პარტია … ამასობაში, დააკავეს გამომძიებელი, რომელმაც ამხილა სისტემა და მოჰყვა სიმართლე. სიმართლე დააპატიმრეს და დაადეს ბორკილები. უპირობოდ პოლიტიკური პატიმარია, სიმართლის პატიმარი”, – წერს ხაბეიშვილი „ფეისბუქზე“.

საქართველოს პროკურატურის ინფორმაციით, მოწმის მიერ ცრუ ჩვენების მიცემით მართლმსაჯულებისთვის ხელის შეშლის ფაქტზე, სასამართლოს განჩინების საფუძველზე, გარდაცვლილი პროგრამისტის, თამარ ბაჩალიაშვილის საქმეზე ყოფილი გამომძიებელი სერგო შუბითიძე დააკავეს.

„საქართველოს არა „დეოლიგარქიზაციაზე“, არამედ „დეოლიგოფრენიზაციაზე“ აქვს მისაღები კანონი”- ქართველიშვილი

19:51 - 25/06/2023

[პრიგოჟინმა] შექმნა ილუზია, რომ მიისწრაფვიან მოსკოვისაკენ, პუტინის „აყირავების“ მიზნით. პრიგოჟინ-პუტინის ამ „ვირეშმაკობას“ მხურვალე ტაშს უკრავდა ყველა – კიევი, ვაშინგტონი, ბრიუსელი და ქართველი სექტანტები“ – ამის შესახებ „ხალხის ძალის“ წევრმა, დავით ქართველიშვილმა, სოციალურ ქსელში დაწერა.

„საქართველოს არა „დეოლიგარქიზაციაზე“, არამედ „დეოლიგოფრენიზაციაზე“ აქვს მისაღები კანონი. ოღონდ „ვენეციაში“ არ უნდა გადაიგზავნოს. დიდი ალბათობით, ეს კანონი მათაც ეხება. ახლა რა მოხდა:

„გალავარეზებით“ დაკომპლექტებული 40 ათასიანი ელიტარული საჯარისო ფორმირების დისლოკაციის ადგილი მდებარეობდა კიევიდან მნიშვნელოვნად დაშორებულ მანძილზე. კიევამდე მათ აშორებდა უკრაინული სამხედრო ფორტიფიკაციებით და შეიარაღებული ძალებით გადატენილი ტერიტორია.

ამ დროს დასავლეთის სრული მხარდაჭერით, ჩვენი ნაც-ოლიგოფრენების ზეიმის ფონზე, „ვაგნერზე“ დასაწესებელი სანქციების დღის წესრიგიდან ამოღების პარალელურად სულ რამდენიმე საათში „ვაგნერმა“ შექმნა ილუზია, რომ მიისწრაფვიან მოსკოვისაკენ, პუტინის „აყირავების“ მიზნით. სრული დამაჯერებლობისთვის დედაქალაქიდან „სპეცბორტით“ გააქრეს პრეზიდენტიც. მაგრამ, „მოსკოვამდე“ ვერ მისულ „ვაგნერს“ გზაში დააწიეს „ბედნიერი ამბავი“: ლუკაშენკომ გადააფიქრებინა პრიგოჟინს ამბოხი, პუტინმა აპატია მას და კბილებამდე შეიარაღებულმა ძალებმა გადაუხვიეს ბელარუსში. ამჟამად ეს მონსტრი განლაგებულია კიევთან და ბალტიისპირეთის ქვეყნებთან საკმაოდ მცირე (3 საათის სავალ) მანძილზე.

მანამდე კი ბელარუსში შეიტანეს ტაქტიკური ბირთვული იარაღი და მისი დასავლეთის სამიზნეში აყვანა ახლა უკვე „ცოტა“ გაჭირდება. პრიგოჟინ-პუტინის ამ „ვირეშმაკობას“ მხურვალე ტაშს უკრავდა ყველა – კიევი, ვაშინგტონი, ბრიუსელი და ქართველი სექტანტები. ვინც ამ სიგიჟეს ტაშს არ უკრავდა, ტრადიციულად „პუტინის ხელისუფლება“ და „რუსული პროექტი“ ვყოფილვართ.

ერთ დღეში რუსეთის ამ სპეცოპერაციის მხარდამჭერი იყო ჩვენი მეხუთე კოლონის უკლებლივ ყველა წევრი – ხუხაშვილით დაწყებული, სალომე ზურაბიშვილით დამთავრებული. ქართულ მდიდარ ენაში არც კი ვიცი რა ეპითეტები შევურჩიო ამ ჰომო საპიენსებს (?). ამიტომ დავიწყე „დეოლიგოფრენიზაციის“ კანონის საჭიროებით, რომელსაც რაც გინდა უწოდონ, მაგრამ „რუსული“ ნამდვილად ვეღარ იქნება“, – წერს ქართველიშვილი.

თამარ ბაჩალიაშვილის საქმის ყოფილი გამომძიებელი სერგო შუბითიძე დააკავეს

18:47 - 25/06/2023

პროკურატურამ თამარ ბაჩალიაშვილის საქმის ყოფილი გამომძიებელი სერგო შუბითიძე დააკავა. საქართველოს გენერალური პროკურატურის ინფორმაციით, დაკავებულს ბრალდება საქართველოს სისხლის სამართლის კოდექსის 370-ე მუხლის პირველი ნაწილით წარედგინება, რაც მოწმის მიერ ცრუ ჩვენების მიცემით მართლმსაჯულებისთვის ხელის შეშლას გულისხმობს.

უწყებაში აღნიშნავენ, რომ პროკურატურა ბრალდებულის მიმართ აღკვეთის ღონისძიების სახით პატიმრობის შეფარდების შუამდგომლობით თბილისის საქალაქო სასამართლოს კანონით დადგენილ ვადაში მიმართავს.

„საქართველოს პროკურატურამ მოწმის მიერ ცრუ ჩვენების მიცემით მართლმსაჯულებისთვის ხელის შეშლის ფაქტზე, სასამართლოს განჩინების საფუძველზე, ერთი პირი დააკავა.

2023 წლის 29 აპრილს, თამარ ბაჩალიაშვილის გარდაცვალებიდან თითქმის 3 წლის შემდეგ, დაკავებულმა ერთ-ერთ ტელეკომპანიას ინტერვიუ მისცა, თამარ ბაჩალიაშვილის გარდაცვალების ფაქტის გამოძიებასთან დაკავშირებული გარკვეული გარემოებების შესახებ.

ინტერვიუს მიმდინარეობის დროს გაცხადებული ინფორმაციის გადამოწმების მიზნით დაუყოვნებლივ დაიწყო გამოძიება.

სასამართლოში მოწმედ დაკითხვისას ბრალდებულმა, ტელეკომპანიისთვის მიწოდებული ინფორმაცია გაიმეორა, რაც არაერთ ტყუილს შეიცავდა და მიზნად ისახავდა თამარ ბაჩალიაშვილის ოჯახის, საზოგადოების, საგამოძიებო უწყებისა და მართლმსაჯულების შეცდომაში შეყვანას.

ინტერვიუს მიმდინარეობისას, ისევე როგორც სასამართლოში დაკითხვის დროს, ბრალდებულმა განაცხადა, რომ თამარ ბაჩალიაშვილის გვამის აღმოჩენის შემდგომ, საქმეზე გამოძიება უშუალოდ მან დაიწყო.

საქმეზე ჩატარებული გამოძიებით დადგინდა, რომ თამარ ბაჩალიაშვილის გაუჩინარების ფაქტზე გამოძიება დაიწყო 2020 წლის 19 ივლისს, საქართველოს შინაგან საქმეთა სამინისტროს ქვემო ქართლის პოლიციის დეპარტამენტის თეთრიწყაროს რაიონული სამმართველოში. მოცემული მომენტისთვის ბრალდებული პოლიციის ხსენებულ განყოფილებაში საერთოდ არ მუშაობდა და სისხლის სამართლის საქმის მასალებით დადგენილია, რომ გამოძიება დაიწყო არა ბრალდებულმა, არამედ გამომძიებელმა ჯიმშერ აფციაურმა.

ბრალდებულმა ასევე განაცხადა, რომ თამარ ბაჩალიაშვილის გვამის აღმოჩენის დღეს, დაახლოებით 16:00-16:30 დროის პერიოდში, სანამ შემთხვევის ადგილის დათვალიერება დასრულდებოდა, მასთან გამომძიებელი ელგუჯა აპუაშვილი მივიდა, რომელმაც თამარ ბაჩალიაშვილის კუთვნილი ტელეფონი დაულუქავ მდგომარეობაში მოუტანა. ბრალდებულის მონათხრობით, თითქოს, ელგუჯა აპუაშვილმა მას ასევე გადასცა ლუქი და უთხრა, რომ ბრალდებულს უნდა დაელუქა თამარ ბაჩალიაშვილის ტელეფონი. ბრალდებულის ჩვენებით, მობილური ტელეფონი იყო გაწმენდილ მდგომარეობაში, რომელიც მან დალუქა და ელგუჯა აპუაშვილს უკან გაატანა. მისივე განმარტებით, 2020 წლის 23 ან 24 ივლისს, მობილური ტელეფონის დათვალიერების მიზნით, გახსნა მის მიერვე დალუქული პაკეტი, რის თაობაზე შეადგინა შესაბამისი ოქმი.

ჩატარებული გამოძიებით დადგინდა, რომ 2020 წლის 22 ივლისს, 13:35 საათიდან 19:20 საათამდე დროის მონაკვეთში, დათვალიერდა თეთრიწყაროს რაიონის სოფელ მაწევანის ტერიტორია და თამარ ბაჩალიაშვილის ავტომანქანა. საგამოძიებო მოქმედების მიმდინარეობისას თამარ ბაჩალიაშვილის ავტომანქანიდან, სხვა ნივთებთან ერთად, ექსპერტ-კრიმინალისტებმა ამოიღეს მისი კუთვნილი მობილური ტელეფონი. შემთხვევის ადგილის დათვალიერების ოქმის თანახმად, გამომძიებელი ელგუჯა აპუაშვილი საგამოძიებო მოქმედებაში არ მონაწილეობდა. უფრო მეტიც, შემთხვევის ადგილის დათვალიერებისას უწვეტად მიმდინარეობდა საგამოძიებო მოქმედების პროცესის ვიდეოგადაღება, ასევე განხორციელდა ადგილმდებარეობის და შემთხვევის ადგილის ფოტოგრაფირება. ვიდეოჩანაწერში ნათლად და მკაფიოდ ჩანს, რომ გამომძიებელი ელგუჯა აპუაშვილი არ მონაწილეობს შემთხვევის ადგილის დათვალიერებაში.

რაც შეეხება იმას, რომ თითქოსდა ელგუჯა აპუაშვილმა თამარ ბაჩალიაშვილის კუთვნილი მობილური ტელეფონი ბრალდებულს მიუტანა დაულუქავ მდგომარეობაში, გასუფთავებული და მასზე არ აღინიშნებოდა არანაირი ლაქა, შემთხვევის ადგილის დათვალიერების ფოტო და ვიდეომასალით დასტურდება, რომ ავტომანქანიდან ამოღებული მობილური ტელეფონი, შესაბამისი პროცედურის დაცვით, შემთხვევის ადგილზევე დაილუქა: ტელეფონი დასვრილი იყო გვამიდან გამოჟონილი სითხით და მატლებით, რის გამოც ექსპერტების მიერ სპეციალურ მაგიდაზე არსებულ თაბახის ფურცელზე მოთავსების შემდგომ, შეხვეულ იქნა დოლბანდში და დაილუქა სპეციალურ პაკეტში.

იმავე დალუქული სპეციალური პაკეტით, ისე, რომ არ მომხდარა მისი გახსნა, 2020 წლის 23 ივლისს, თამარ ბაჩალიაშვილის მობილური ტელეფონი, მასზე არსებული კვალის ნიმუშების აღების მიზნით, არა ბრალდებულის, არამედ სხვა გამომძიებლის მიერ იგზავნება შინაგან საქმეთა სამინისტროს საექსპერტო კრიმინალისტიკურ დეპარტამენტში. აღნიშნული დეპარტამენტის 2020 წლის 24 ივლისის წერილით ირკვევა, რომ გამომძიებელს თამარ ბაჩალიაშვილის მობილური ტელეფონი, დალუქული სახით, სამ სხვა პაკეტთან, მათ შორის – მობილური ტელეფონიდან აღებულ ე.წ. „შემკვრივებულ მასასთან“ ერთად უბრუნდება. დალუქული მობილური ტელეფონი, იმავე დღეს, იგზავნება ლ. სამხარაულის სახელობის სასამართლო ექსპერტიზის ეროვნულ ბიუროში საექსპერტო კვლევისთვის, საიდანაც, ექსპერტიზის დასკვნასთან ერთად, საგამოძიებო ორგანოს უბრუნდება 2020 წლის 12 აგვისტოს. 2020 წლის 22 ივლისიდან 12 აგვისტომდე პერიოდში, დალუქული მობილური ტელეფონის გახსნა არცერთი გამომძიებლების მიერ არ მომხდარა.

ჩატარებული გამოძიების ფარგლებში გამოიკითხა ექსპერტი, რომელმაც 2020 წლის 23 ივლისს თამარ ბაჩალიაშვილის კუთვნილი მობილური ტელეფონიდან ნიმუშები აიღო. ექსპერტმა გამოკითხვისას განმარტა, რომ გამომძიებლის მიერ წარმოდგენილი ნივთიერი მტკიცებულება – მობილური ტელეფონი იყო დალუქული შინაგან საქმეთა სამინისტროს საექსპერტო კრიმინალისტიკური სამსახურის სპეციალურ პაკეტში და მისი მთლიანობა დარღვეული არ ყოფილა. ექსპერტის ჩვენებით, ნივთმტკიცების გახსნისას აღმოჩნდა, რომ მობილური ტელეფონი ჭრელი ფერის დამცავით მოთავსებული იყო თეთრი ფერის ქაღალდის კონვერტში, შეხვეული იყო სამედიცინო დოლბანდში, ნივთმტკიცების პაკეტში იყო მატლები. ექსპერტის ჩვენება სრულ თანხვედრაშია საექსპერტო დასკვნის ფოტოილუსტრაციასთან, საიდანაც დასტურდება, რომ ექსპერტთან მობილური ტელეფონი მივიდა შემთხვევის ადგილზე მისი დალუქვისას არსებული მდგომარეობით და შუალედში ლუქის გახსნას ადგილი არ ჰქონია – შემთხვევის ადგილზე გამოყენებული სპეცპაკეტის გახსნის შემთხვევაში, შეუძლებელი იქნებოდა მისი პირვალდენი მდგომარეობის აღდგენა. ასევე, აღსანიშანვია, რომ ბრალდებულის მიერ ინტერვიუს დროს ხსენებული ლუქის გამოყენება, სპეცპაკეტის შემთხვევაში საერთოდ არ ხდება – სპეცპაკეტი განკუთვნილია ნივთების დასალუქად და ცალკე ლუქის დაწებებას/დაკვრას არ საჭიროებს.

შესაბამისად, უტყუარად დასტურდება, რომ თამარ ბაჩალიაშვილის მობილური ტელეფონი დაილუქა შემთხვევის ადგილზე და ამავე, დალუქულ მდგომაროებაში, მეორე დღეს, 23 ივლისს, გადაიგზავნა შინაგან საქმეთა სამინისტროს საექსპერტო კრიმინალისტიკურ დეპარტამენტში, ხოლო შემდგომ – ლ. სამხარაულის სახელობის ექპერტიზის ეროვნულ ბიუროში, საიდანაც დაბრუნდა 2020 წლის 12 აგვისტოს. ამდენად, ცალსახაა, რომ 22 ივლისს თამარ ბაჩალიაშვილის მობილური ტელეფონი, დაულუქავ მდგომარეობაში, ბრალდებულთან ვერ მოხვდებოდა და ის მომდევნო დღეებში ტელეფონს ვერ დაათვალიერებდა.

რაც ყველაზე მნიშვნელოვანია, სისხლის სამართლის საქმის ფარგლებში, მობილური ოპერატორებიდან გამოთხოვილი ინფორმაციით დგინდება, რომ 2020 წლის 22 ივლისს, 16:46 საათამდე ბრალდებული იმყოფება რუსთავში, ხოლო 16:48 საათზე უკვე ფონიჭალაშია და მოემართება თბილისისკენ, სადაც რჩება 23 ივლისის 01:29 საათამდე. შესაბამისად, იმ პერიოდში, როდესაც სერგო შუბითიძე უთითებს ელგუჯა აპუაშვილის მიერ ტელეფონის მიტანას, თამარ ბაჩალიაშვილის კუთვნილი მობილური ტელეფონი არის შემთხვევის ადგილას და გამომძიებლების, ექსპერტების და ადვოკატის მონაწილეობით ხორციელდება მობილური ტელეფონის ამოღების პროცედურები. თავად სერგო შუბითიძე კი ამდროს იმყოფება თბილისში.

ბრალდებულმა სასამართლოში ჩვენების მიცემისას ასევე ისაუბრა, რომ თითქოსდა თამარ ბაჩალიაშვილის ტელეფონში შენახული იყო მხოლოდ 2020 წლის 18 ივლისის შემდგომი პერიოდის ინფორმაცია, ხოლო მანამდე არსებული ინფორმაცია წაშლილი იყო.

აღნიშნულ გარემოებებთან დაკავშირებითაც გამოძიებით დადასტურდა, რომ ბრალდებული სასამართლოს აწვდის ცრუ ჩვენებას, ვინაიდან, თამარ ბაჩალიაშვილის კუთვნილი მობილური ტელეფონი არ გახსნილა ლევან სამხარაულის სახელობის ექსპერტიზის ეროვნულ ბიუროში გადაგზავნამდე. შესაბამისად, არ დათვალიერებულა არც ერთი გამომძიებლის მიერ, მათ შორის – არც სერგო შუბითიძის მიერ. ვინაიდან, არ იყო ცნობილი თამარ ბაჩალიაშვილის მობილური ტელეფონის ე.წ. ფასკოდი. სამხარაულის ბიუროს ექსპერტებმა, მხოლოდ სპეციალური პროგრამის მეშვეობით შეძლეს მობილური ტელეფონის მეხსიერებაში შეღწევა, რის შედეგადაც ტელეფონში არსებული ინფორმაციის ამოღება მოხდა. ამოღებული ინფორმაციით ცალსახად დასტურდება, რომ 2020 წლის 18 ივლისამდე პერიოდის ინფორმაცია თამარ ბაჩალიაშვილის მობილურ ტელეფონში არსებობდა.

გარდა ამისა, ბრალდებულმა სატელევიზიო ინტერვიუში და სასამართლოში მიცემული ჩვენებისას განმარტა, რომ მან თამარ ბაჩალიაშვილის საქმეზე გამოკითხა იმ კომპანიის თანამშრომლები, სადაც დასაქმებული იყო თამარ ბაჩალიაშვილი. მას წინასწარ განუსაზღვრეს ის კითხვები, რომლებიც უნდა დაესვა მოწმეებისთვის. ბრალდებულის განმარტებით, მან გამოკითხა კომპანიის 4-6 თანამშრომელი.

აღნიშნული ინფორმაციის გადასამოწმებლად, თამარ ბაჩალიაშვილის გარდაცვალების საქმიდან ამოღებულ იქნა კომპანია „ზეგის“ თანამშრომლების გამოკითხვის ოქმები, რომელთა მიხედვით დადგინდა, რომ არცერთი მათგანი არ არის შედგენილი ბრალდებულის მიერ. მიუხედავად ამისა, გამოძიების ფარგლებში ხელახლა გამოიკითხა აღნიშნული კომპანიის ყველა, 45-ვე თანამშრომელი, რის შედეგადაც კიდევ ერთხელ დადგინდა, რომ ბრალდებულს არც ერთ მათგანთან არანაირი შეხება არ ჰქონია.

შესაბამისად, აღნიშნულ ნაწილშიც, დაკავებულმა, სასამართლოს, მიაწოდა ცრუ ინფორმაცია.

საზოგადოებას კიდევ ერთხელ შევახსენებთ, რომ თამარ ბაჩალიაშვილის ოჯახის მოთხოვნით, 2020 წლის 29 ივლისს, გამოძიების დაწყებიდან 10 დღის შემდეგ, სისხლის სამართლის საქმე გამოსაძიებლად გადაეცა შინაგან საქმეთა სამინისტროს ცენტრალური კრიმინალური პოლიციის დეპარტამენტს. ამის შემდგომ ოჯახმა მოითხოვა საქმის გადაცემა პროკურატურისთვის, რაც ასევე დაკმაყოფილდა და 2020 წლის 17 აგვისტოს სისხლის სამართლის საქმე გადაეცა თბილისის პროკურატურას.

საქართველოს პროკურატურაში თამარ ბაჩალიაშვილის გარდაცვალების სისხლის სამართლის საქმეზე გამოძიების მიმდინარეობის პროცესში, პროკურატურის გამომძიებლების მიერ ჩატარდა 1000-ზე მეტი საგამოძიებო/საპროცესო მოქმედება, მათ შორის მოწმის სახით გამოიკითხა 600-ზე მეტი პირი, ჩატარდა ათეულობით ექსპერტიზა. დამუშავდა და გაანალიზდა ვიდეო ჩანაწერები, რის შედეგადაც დადგინდა თამარ ბაჩალიაშვილის გადაადგილების მარშრუტები, ასევე დამუშავდა სატელეფონო ზარები. აღდგა და შესწავლილი იქნა ყველა ის ინფორმაცია, რომელიც შენახული იყო თამარ ბაჩალიაშვილის ტელეფონსა და კომპიუტერში. სამართლებრივი დახმარების ფარგლებში, ამერიკის შეერთებული შტატების შესაბამისი უწყებების დახმარებით სოციალურ ქსელ facebook-იდან და Instagram-იდან გამოთხოვილი იქნა თამარ ბაჩალიაშვილის facebook და Instagram ანგარიშებთან“ დაკავშირებული სრული ინფორმაცია. გარდა ამისა, ჩატარდა არაერთი საგამოძიებო და საპროცესო მოქმედება, რის შედეგადაც დადგინდა არამხოლოდ თამარ ბაჩალიაშვილის გარდაცვალების ბოლო დღეების ქრონოლოგია, არამედ გამოძიებისთვის მნიშვნელოვანი ბოლო წლების გარემოებები და ფაქტები. სწორედ პროკურატურის გამომძიებლების მიერ მოპოვებული მტკიცებულებების ერთობლივმა ანალიზმა უტყუარად დაადასტურა ის ფაქტი, რომ თამარ ბაჩალიაშვილის მიმართ რაიმე უკანონო ქმედებას ადგილი არ ჰქონია და მან სიცოცხლე თვითმკვლელობით დაასრულა.

რაც შეეხება დაკავებულს, სისხლის სამართლის საქმეზე ჩატარებული დაახლოებით 1 500 საგამოძიებო და საპროცესო მოქმედებიდან, მის მიერ მოწმის სახით გამოკითხულია სამედიცინო ექსპერტი და გამომძიებელი, ასევე, მან თამარ ბაჩალიაშვილის გვამზე დანიშნა სამედიცინო ექსპერტიზა, შეადგინა 11 ნიმუშის აღების ოქმი, 2 ინფორმაციის გამოთხოვის ოქმი, 4 დათვალიერების ოქმი და 2 ამოღების ოქმი. სხვა საგამოძიებო მოქმედებები ხსენებულ პირს თამარ ბაჩალიაშვილის სისხლის სამართლის საქმეში არ ჩაუტარებია.

დაკავებულს ბრალდება საქართველოს სისხლის სამართლის კოდექსის 370-ე მუხლის 1-ლი ნაწილით წარედგინება, რაც მოწმის მიერ ცრუ ჩვენების მიცემით მართლმსაჯულებისთვის ხელის შეშლას გულისხმობს.

პროკურატურა ბრალდებულის მიმართ აღკვეთის ღონისძიების სახით პატიმრობის შეფარდების შუამდგომლობით თბილისის საქალაქო სასამართლოს კანონით დადგენილ ვადაში მიმართავს.

საზოგადოებას ასევე შევახსენებთ, რომ თამარ ბაჩალიაშვილის გარდაცვალების საქმეზე სხვადასხვა პერიოდში ადგილი ჰქონდა ოჯახის წევრებისა და საზოგადოების შეცდომაში შეყვანის მიზნით მტკიცებულებათა ფალსიფიკაციის ფაქტებს.

მტკიცებულებათა ფალსიფიკაციის ფაქტზე ორი პირის მიმართ დაიწყო სისხლის სამართლებრივი დევნა“, – ნათქვამია პროკურატურის ინფორმაციაში.

1...1,8201,8211,822...2,177 Page 1,821 of 2,177