ლევან ხაბეიშვილი ირაკლი ღარიბაშვილის დაპატიმრებას ითხოვს. ამის შესახებ მან დღეს გამართულ ბრიფინგზე განაცხადა.

“გუშინ ტვ პირველმა გაასაჯაროვა კონკრეტული დოკუმენტაცია, საიდანაც ირკვევა, რომ ეს ფრენები, რომელზეც ჩვენ ვსაუბრობთ და მისი [ღარიბაშვილის] ვოიაჟი დაახლოებით 200 000 ლარამდე დაუჯდებოდა ბიუჯეტს. ასევე ციხე-რესტორანში, სადაც მან მის მეუღლეს გადაუხადა დაბადების დღე, დაახლოებით 700 000 ლარი დაჯდებოდა. საუბარია ორ ღონისძიებაზე, მის დასვენებაზე და დაბადების დღეზე, რაშიც 900 000 ლარამდე დახარჯავდა ირაკლი ღარიბაშვილი.

ეს კაცი, ირაკლი ღარიბაშვილი ნამდვილად არის დასაჭერი. ამიტომ, პროკურორი რომ ჰქვია, ბიძინა ივანიშვილის კიდევ ერთი თანაშემწე რომ გახლავთ, შოთაძეს ვგულისხმობ, უამრავი სისხლის სამართლის დანაშაული აქვს მას ჩადენილი ამ დრომდე და მინდა მას ვუთხრა, რომ თუ ახლა, ამ წუთებში კონკრეტულ ღონისძიებებს არ დაიწყებს ირაკლი ღარიბაშვილის წინააღმდეგ და მას ბორკილებს არ დაადებს, ისიც ისეთივე თანამონაწილეა ამ დანაშაულების, რაც ჩამოვთვალე, რაც ვნახეთ, როგორც ირაკლი ღარიბაშვილი. ამიტომ, ჩვენი მთავარი მოთხოვნა მდგომარეობს ირაკლი ღარიბაშვილის ციხეში გაშვებაში, რომ ის უნდა იყოს დაკავებული”,-თქვა ხაბეიშვილმა.

მივმართავ ღარიბაშვილს – ინამუსე და წადი, გეყო რაც ძარცვე ეს ქვეყანა, წადი და შეეშვი ამ ქვეყანას, შეეშვი საქართველოს , – ამის შესახებ “სტრატეგია აღმაშენებლის” ლიდერმა გიორგი ვაშაძემ ბრიფინგზე განაცხადა.

მისივე თქმით, პრემიერ მინისტრი ირაკლი ღარიბაშვილი არის სახე იმ სისტემის, რომელიც ბიძინა ივანიშვილმა ჩამოაყალიბა.

“გუშინ, ნოდარ მელაძის გადაცემაში ჩვენ ვნახეთ, რა დონეზეა გახრწნილი სისტემა. გახრწნილობის პიკი შეიძლება ვუწოდოთ იმ ჩარტერების სკანდალს, რომელიც ჩვენ ვიხილეთ. პრემიერ მინისტრი, რომელსაც არ სცალია შოვისთვის, გურიაში სტიქიით დაზარალებული ადამიანებისთვის, პირდაპირ საბოტაჟშია ევროკავშირში ინტეგრაციის პროცესთან, თავისი პირადი მიზნებისთვის იყენებს სახელმწიფო ხარჯებს და იმ ხალხის გადასახადებს, რომლისთვისაც უნდა ეშველათ, როდესაც შოვის ტრაგედიაში მძიმე ვითარებაში იყვნენ.

ეს არ არის ის საქართველო, რომელიც ჩვენ გვინდა, რომ ავაშენოთ. ღარიბაშვილი არის სახე იმ სისტემის, რომელიც ჩამოაყალიბა ბიძინა ივანიშვილმა “ჭამეთ, ძარცვეთ ქვეყანა, ხალხი. მთავარია, იყავით ჩემი ერთგულები, მთავარია რუსული დავალებები შეასრულოთ” – ეს არის შინაარსი იმის, რაც ჩვენ ვნახეთ.

15 სექტემბერი მოდის, სკოლაში რამდენი ბავშვი მივა დახეული ფეხსაცმლით, რამდენ ბავშვს არ ექნება ტანსაცმელი, ან წიგნები. პრემიერ – მინისტრის შვილისთვის თურმე ჩარტერული რეისებია ხელმისაწვდომი, რომ გაფრინდეს ამერიკაში სასწავლებლად. ეს არის ის უსამართლობა, რაც ქვეყანაში ხდება. მათთვის ეკონომიკა ორნიშნადაც იზრდება და სამნიშნადაც. იმ დონეზე არიან უკვე, რომ უზარმაზარ წვეულებებს აწყობენ – აბა, პატარა დაბადების დღეს ხომ არ გადაიხდის პრემიერ – მინისტრის მეუღლე?! შვილი სპეც. რეისით უნდა წაიყვანო, აბა ჩვეულებრივ თვითმფრინავში ხომ არ ჩაჯდება, ხომ არ ეკადრება მას ეს ყველაფერი?! ეს არის სწორედ რუსული სტანდარტით ქვეყნის მართვა, როცა ხალხი არის უბედურებაში, ხოლო ელიტა არის ზემდიდარი.

ცალ-ცალი “კალოშით” მოსული ადამიანები დაეპატრონნენ დიდძალ ქონებას ხალხის ხარჯზე.

ევროკავშირი მათ შორის, ნიშნავს პასუხი ვაგებინოთ ასეთ ადამიანებს. ასეთი პრემიერ მინისტრით და ასეთი “ქართული ოცნებით” ჩვენ ევროკავშირის წევრი ვერ გავხდებით.

მივმართავ ღარიბაშვილს, ინამუსე და წადი, გეყო რაც ძარცვე ეს ქვეყანა, წადი და შეეშვი ამ ქვეყანას, შეეშვი საქართველოს”, – განაცხადა გიორგი ვაშაძემ.

პარტია „ლელო“ პრემიერ-მინისტრ, ირაკლი ღარიბაშვილის წინააღმდეგ იმპიჩმენტის პროცედურას იწყებს და საპარლამენტო ოპოზიციას მოუწოდებს, ინიციატივას შეუერთდნენ.

საქმე ეხება მედიით გავრცელებულ ინფორმაციას, რომლის თანახმად პრემიერ-მინისტრმა სამთავრობო თვითმფრინავი პირადი ვიზიტებისთვის გამოიყენა.

„ლელოში“ აცხადებენ, რომ აღნიშნული არის სისხლის სამართლის დანაშაული და საქმე გვაქვს სამსახურებრივი უფლებამოსილების ბოროტად გამოყენებასთან, რაზეც შესაბამის ორგანოებს გამოძიება უკვე დაწყებული უნდა ჰქონდეთ.

„გუშინ ყველამ ნოდარ მელაძის საგამოძიებო, საავტორო გადაცემაში ვიხილეთ დადასტურებული ფაქტი იმ აღვირახსნილი ქმედებისა, რასაც ჰქვია საქართველოს მთავრობის, ამ შემთხვევაში, საქართველოს პრემიერ-მინისტრის პირდაპირ, სახელმწიფო ბიუჯეტის სახსრების საკუთარი სურვილისა და ინტერესებისამებრ გამოყენება. ეს არის პირდაპირ სისხლის სამართლის სავარაუდო დანაშაული. აქ საქმე ჩვენ გვაქვს სამსახურებრივი უფლებამოსილების ბოროტად გამოყენებასთან. გუშინ, როდესაც ეს გადაცემა ეთერში გადიოდა, რომელიც სავსეა პირდაპირი მტკიცებულებებით და აღიარებითი ჩვენებებით პირველ წყაროდან, რომელმაც მაგალითად ფრენა განახორციელა და ასე შემდეგ, ამასთან დაკავშირებით უნდა დაწყებულიყო გამოძიება, წესით საქართველოს გენერალურ პროკურატურაში უკვე დაწყებულიც უნდა იყოს გამოძიება, ასევე, ინფორმაცია გამოძიების დაწყების შესახებ უკვე გავრცელებულიც უნდა იყოს და შესაბამისი პროცედურები უნდა მიმდინარეობდეს, მაგრამ ჩვენ კარგად ვიცით, რომ პროკურატურა მსგავს შემთხვევაში, არა თუ გამოძიებას არ იწყებს, არამედ არანაირ წინასაგამოძიებო ქმედებებს არ ახორციელებს და პირდაპირ შეიძლება ითქვას, რომ კანონს არღვევს და არანაირ საგამოძიებო მოქმედებებს არ აწარმოებს. ამის მაგალითია შოვის ტრაგედია.

ყველა ზემოთ აღნიშნულიდან გამომდინარე, პარტია „ლელომ“ გადაწყვეტილება მიიღო დაიწყოს იმპიჩმენტის პროცედურები პრემიერ-მინისტრ, ირაკლი ღარიბაშვილის სავარაუდო დანაშაულის ჩადენასთან დაკავშირებით. აღნიშნულს ითვალისწინებს საქართველოს კონსტიტუციის 48-ე მუხლი, სადაც პირდაპირ წერია, რომ სავარაუდო დანაშაულის ჩადენის შემთხვევაში, თუ არსებობს დანაშაულის ნიშნები და ეს დანაშაულის ნიშნები სახეზეა. ყველამ კარგად ვიხილეთ, თუ რა ხდება, რა აღვირახსნილი სიტუაციაა და რა უკანონობა ხდება. აქედან გამომდინარე, ჩვენ ვიწყებთ იმპიჩმენტის პროცედურებს და მოვუწოდებთ ჩვენს ოპოზიციონერ კოლეგებს საქართველოს პარლამენტში, ასევე, საქართველოს პარლამენტის წევრებს, ოპოზიციური პარტიის წევრებს შემოგვიერთდნენ. ყველას ვისთვისაც სულერთი არ არის, რომ ამ ქვეყანაში კანონი არ არსებობს, ყველასთვის, ვისთვისაც სულერთი არ არის ქვეყანაში კორუფცია იქნება თუ არა, მოვუწოდებ მათ, რომ იმპიჩმენტის პროცედურებს შემოუერთდეს“, – განაცხადა სამუშიამ.