პარლამენტის თავმჯდომარის, შალვა პაპუაშვილის განცხადებით, საქართველოსთვის კანდიდატის სტატუსის მინიჭება იქნება არამხოლოდ ხელისუფლების საქმიანობის შეფასება და დაფასება, არამედ ეს იქნება უსამართლობის გამოსწორება.

როგორც მან ჟურნალისტებს განუცხადა, ხვალ ევროკომისიის დასკვნასთან დაკავშირებით პოზიტიური მოლოდინი აქვს.

„ევროკომისიისგან დასკვნის გამოქვეყნებას ველოდებით, გვაქვს პოზიტიური მოლოდინები. ჩვენ, განსაკუთრებით ბოლო ორი თვის განმავლობაში, ინტენსიურად ვმუშაობდით ევროკომისიასთან. სწორედ ეს, ბოლო ორი თვის, განსაკუთრებით მჭიდრო თანამშრომლობა გვაძლევს იმის იმედს, რომ შეფასება იქნება პოზიტიური – შესაძლებელი იქნება შემდეგ ეტაპზე გადასვლა, კანდიდატის მიღების მხრივ. კიდევ ერთხელ მინდა ხაზი გავუსვა, რა თქმა უნდა, საქართველო შარშან ივნისშივე იმსახურებდა კანდიდატის სტატუსს. რა თქმა უნდა, საქართველო ასოცირებულ ტრიოში უკრაინასა და მოლდოვასთან შედარებით იყო ლიდერი, რჩება ლიდერად, ამიტომ, რა თქმა უნდა, შარშანდელი გადაწყვეტილება საქართველოსთან მიმართებით იყო უსამართლო. ამიტომ კანდიდატის სტატუსის მინიჭება იქნება არამხოლოდ საქართველოს ხელისუფლების საქმიანობის შეფასება და დაფასება, არამედ ეს იქნება უსამართლობის გამოსწორება.

რაც შეეხება საუბრებს იმაზე, რომ თითქოს, ეს გადაწყვეტილება მიღებული იქნება გეოპოლიტიკის, ქართველი ხალხის გამო და ა.შ. შარშან ივნისში ქართველი ხალხი რაიმე სხვანაირი ხალხი იყო? თუ შარშან ივნისში ქართველ ხალხს ევროკავშირი პატივს არ სცემდა? თუ გეოპოლიტიკა იყო სხვანაირი? თუ შავი ზღვა დაშრა და სახმელეთო საზღვარი გაგვიჩნდა ევროკავშირთან? არაფერი არ მხრივ არა შეცვლილა. გეოპოლიტიკურად იმდენადვე მნიშვნელოვნები ვართ, როგორც ვიყავით შარშან, ივნისში; ქართველი ხალხი იმდენადვე იმსახურებს ახლა, როგორც იმსახურებდა შარშან, ივნისში; ასე რომ, პოზიტიური გადაწყვეტილების მოლოდინი გვაქვს და იმედი მაქვს, რომ შეფასებაც და დაფასებაც იქნება“,- განაცხადა პაპუაშვილმა.

მისივე თქმით, ხვალ გამოცხადებული პოზიტიური გადაწყვეტილება იქნება ქვეყნისთვის დიდი მიღწევა.

„მიუხედავად 1.5 – წლიანი საბოტაჟისა, რომელსაც ოპოზიცია და რამდენიმე “ენჯეო” ეწეოდა, თუ შევძლებთ, რომ ევროკავშირი პოზიტიურად განვაწყოთ, ესეც, რა თქმა უნდა, დიდი მიღწევა იქნება. წელიწად ნახევრის განმავლობაში, ყველაფერი სცადეს, დაწყებული აქციით, რომელიც რამდენიმე “ენჯეომ” მოაწყო იმავე დღეს როცა 12 რეკომენდაცია გამოცხადდა. პირველი რეკომენდაცია იყო დეპოლარიზაცია, მათ კი დაიწყეს პოლარიზაციის გაღრმავება და მოითხოვეს მთავრობის გადადგომა. მოითხოვეს, რომ მათ დაეკომპლექტებინათ მთავრობა. შემდეგ ხდებოდა სამუშაო ჯგუფების ბოიკოტირება, პარალელური პროცესების შექმნა, აწარმოებდნენ საქართველოს გაშავების კამპანიას, რომელიც ეხებოდა სანქციების გვერდის ავლის დაბრალებას, მიხეილ სააკაშვილის ვითომ წამებას. გაიხსენეთ ყველა ის დეზინფორმაცია, რომელიც საქართველოს წინააღმდეგ მოდიოდა ოპოზიციის მხრიდან და ამის მიუხედავად თუ იქნება დადებითი გადაწყვეტილება, ეს ჩვენი ხელისუფლებისა და ხალხის დიდი მიღწევა იქნება,“- განაცხადა პაპუაშვილმა.

7 ნოემბერი არის უმძიმესი დღე საქართველოს უახლოეს ისტორიაში. იყო უმძიმესი, ვისაც ახსოვს რასთან გვქონდა საქმე, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განაცხადა.

„ეს იყო სრულიად სამართლიანი პროტესტი საქართველოს მოქალაქეების იმჟამინდელი, სრულიად არანორმალური მმართველობის წინააღმდეგ. ამ დღის კულმინაცია იყო ის მოვლენები, რომელიც მედიის წინააღმდეგ განვითარდა. იმ ხელისუფლების მესვეურების მხრიდან ახლა საუბარი ვინმეს მიმართ ჭკუის დამრიგებლური, თუნდაც მედიის თავისუფლებაზე, გამოხატვის თავისუფლებაზე, შეკრებისა და მანიფესტაციის თავისუფლებაზე, ეს ყველაფერი ჰგავს მგლის თავზე სახარების კითხვას“, – აღნიშნა მიხეილ სარჯველაძემ.

2007 წლის 7 ნოემბრის მოვლენებიდან 16 წელი გავიდა. 7 ნოემბერს აქციის დარბევისა და „ტელეიმედში“ შეჭრის საქმეზე ბრალდებულნი არიან: მიხეილ სააკაშვილი, ზურაბ ადეიშვილი, გიგი უგულავა, დავით კეზერაშვილი და ვანო მერაბიშვილი.

ჩვენ ველოდებით ამაზე რეაქციებს, როგორც შეფასებებს ჩვენი საერთაშორისო პარტნიორების მხრიდან, ისე შესაბამისად, დამნაშავეების დასჯას და მთავრობა ამ მხრივ არის ძალიან აქტიური, – ამის შესახებ საქართველოს პარლამენტის თავმჯდომარე შალვა პაპუაშვილმა სოფელ კირბალთან მომხდარ ფაქტთან დაკავშირებით განაცხადა.

როგორც შალვა პაპუაშვილმა აღნიშნა, ეს უმძიმესი ფაქტი არის ოკუპაციის მძიმე შედეგი, რომელიც საფრთხეს უქმნის არა მხოლოდ იქ მცხოვრებ მოსახლეობას, არამედ მთლიანად სახელმწიფოს, ამიტომ მნიშვნელოვანია ოკუპაციის დასრულება.

“რაც შეეხება თავად ფაქტს, ეს არის სწორედ ის, რაზეც ჩვენ ვსაუბრობთ. ოკუპაციის მძიმე შედეგი, რომელიც არა მხოლოდ და განსაკუთრებით, საოკუპაციო ხაზის გასწვრივ მცხოვრებ მოსახლეობას ეხება ყოველდღიური საფრთხე, მათი სიცოცხლისთვის და უსაფრთხოებისთვის არის მთლიანად სახელმწიფოს წინაშე გამოწვევა და ამიტომაც არის მნიშვნელოვანი ოკუპაციის დასრულება.

2008 წელს ევროკავშირის შუამავლობით ხელი მოეწერა ცეცხლის შეწყვეტის შესახებ დოკუმენტს, რომელიც დღემდე არ სრულდება, ამიტომ მნიშვნელოვანია, რომ საერთაშორისო თანამეგობრობამ გააძლიეროს ზეწოლა რუსეთზე, რომ შესრულდეს ხელშეკრულება, დასრულდეს ოკუპაცია, რაც ნიშნავს ჩვენი მოსახლეობისთვის, საოკუპაციო ხაზის გასწვრივ განსაკუთრებით უსაფრთხოების მხრივ უფრო დაცულ მდგომარეობას. ამიტომაც არის მნიშვნელოვანი ევროკავშირის გადაწყვეტილებაც და ჩვენი სვლა ევროკავშირისკენ, ვინაიდან ეს გადაწყვეტილებებიც, საბოლოო ჯამში, ხელს უწყობს როგორც მშვიდობიან დასრულებას და ქვეყნის ტერიტორიული მთლიანობის მშვიდობიან აღდგენას, შესაბამისად ოკუპაციის დასრულებას“, – განაცხადა შალვა პაპუაშვილმა.

7 ნოემბერი ჩვენი ქვეყნის ისტორიაში უმაგალითო ძალმომრეობის ნათელი მაგალითია, – ამის შესახებ ფრაქცია „ქართული ოცნების“ თავმჯდომარის მოადგილემ, საპარლამენტო უმრავლესობის წევრმა, გია ცაგარეიშვილმა განაცხადა.

მისი თქმით, საქართველოს ისტორიაში უპრეცედენტო მოვლენაა, როდესაც ქვეყნის პრეზიდენტი შეიარაღებულ ძალებს საკუთარ ხალხს უპირისპირებდა.

„სპეცოპერაცია, რომელიც დაგეგმა და განახორციელა მიხეილ სააკაშვილმა საკუთარი ხალხისა და ქვეყნის წინააღმდეგ იმის მცდელობა იყო, რომ ქვეყანაში თავისუფალი სიტყვა, დემოკრატიული ოპოზიცია, მთლიანად ხალხი დაეთრგუნათ, მოესპოთ და გაენადგურებინათ. ეს საქართველოს ისტორიაში უპრეცედენტო მოვლენაა, როდესაც ამ ქვეყნის პრეზიდენტი შეიარაღებულ ძალებს საკუთარ ხალხს უპირისპირებდა“, – აღნიშნა გია ცაგარეიშვილმა.

2007 წლის 7 ნოემბრის მოვლენებიდან 16 წელი გავიდა. 7 ნოემბერს აქციის დარბევისა და „ტელეიმედში“ შეჭრის საქმეზე ბრალდებულნი არიან: მიხეილ სააკაშვილი, ზურაბ ადეიშვილი, გიგი უგულავა, დავით კეზერაშვილი და ვანო მერაბიშვილი.

აღმოსავლეთ პარტნიორობის საკითხებში ევროკავშირისა და ევროკავშირის წევრი ქვეყნების სპეციალურ წარმომადგენლებთან საქართველოს ევროკავშირთან ინტეგრაციის პროცესი განვიხილეთ, საუბარი გვქონდა საქართველოს შესახებ ევროკომისიის უახლოეს დღეებში მოსამზადებელ გადაწყვეტილებაზე, რომელიც, ჩვენი, ყველას მოლოდინით უნდა იყოს დადებითი და საქართველოს კანდიდატის სტატუსი მიენიჭოს, – ამის შესახებ ეკონომიკის მინისტრმა, ლევან დავითაშვილმა ეკონომიკის სამინისტროში გამართული შეხვედრის შემდეგ განაცხადა.

როგორც ეკონომიკის სამინისტროს მიერ გავრცელებულ ინფორმაციაში ვკითხულობ, შეხვედრას ბელგიის, ჩეხეთის, დანიის, ესტონეთის, ფინეთის, საფრანგეთის, გერმანიის, საბერძნეთის, ირლანდიის, იტალიის, ლატვიის, ლიეტუვას, ლუქსემბურგის, ნიდერლანდების სამეფოს, პოლონეთის, რუმინეთის, სლოვაკეთის, ესპანეთისა და შვედეთის წარმომადგენლები ესწრებოდნენ.

უწყების ცნობით, როგორც ვიცე-პრემიერმა აღნიშნა, აღმოსავლეთ პარტნიორობის საკითხებში ევროკავშირისა და ევროკავშირის წევრი ქვეყნების სპეციალურ წარმომადგენლებთან შეხვედრაზე იმ პროგრესის შესახებ ისაუბრეს, რომელიც საქართველოს ევროპული პერსპექტივის მოპოვების შემდეგაც გააჩნია. მინისტრის თქმით, საქართველომ 100-ზე მეტი მარეგულირებელი აქტი მიიღო ბოლო წლის განმავლობაში, რითაც, ფაქტობრივად, ევროკავშირის ყველა მოთხოვნას უპასუხა.

„რა თქმა უნდა, ჩვენი მოლოდინია, რომ საქართველო მიიღებს არა მხოლოდ კანდიდატის სტატუსს, არამედ წარმატებით გააგრძელებს ევროპაში ინტეგრაციის პროცესს“,- განაცხადა ლევან დავითაშვილმა.

მისივე ინფორმაციით, მხარეებმა საქართველოს ეკონომიკაში მიმდინარე ტენდენციები განიხილეს, საუბარი შეეხო ასევე გამოწვევებს, რომლებიც რეგიონში არსებობს.

„ჩვენმა მეგობრებმა, კოლეგებმა დადებითად შეაფასეს ის პროგრესი, რომელიც ქვეყანას ეკონომიკური განვითარების კუთხით გააჩნია, განსაკუთრებით ბოლო წლებში. აღინიშნა კიდეც, რომ საქართველო საკმაოდ დამაჯერებლად ახორციელებს რეფორმებს, რომლებიც მაგალითის მიმცემია სხვა ქვეყნებისთვის. ვისაუბრეთ ევროკავშირთან ეკონომიკური თანამშრომლობის პერსპექტივებზეც, განსაკუთრებით ხაზი გაესვა დაკავშირებადების საკითხებს – ეს იყო ზუსტად საქართველოს ინიციატივა ევროკავშირში ინტეგრაციის პროცესში, რომელიც ევროკავშირისთვისაც ისეთივე სასარგებლო უნდა იყოს, ისე როგორც საქართველოსთვის“, – აღნიშნა მინისტრმა.

ლევან დავითაშვილმა ხაზი ასევე, კავშირების გამყარებასა და გაუმჯობესებას გაუსვა როგორც სატრანსპორტო-ლოგისტიკური, ისე ელექტროენერგიის პირდაპირი მიწოდების კუთხით, რასაც შეხვედრაზე მნიშვნელოვანი ყურადღება დაეთმო. მათ შორის, განხილული იყო შავი ზღვის წყალქვეშა კაბელის მშენებლობისა და ევროკავშირთან ციფრული დაკავშირების საკითხები.

„ეს ყველაფერი მნიშვნელოვანია არამხოლოდ ჩვენი ეკონომიკისთვის, არამედ ძალიან მნიშვნელოვანია ევროპის ეკონომიკური უსაფრთხოებისთვისაც“, – აღნიშნა ვიცე-პრემიერმა.

„ქართული ოცნების“ ე.წ. პოლიტიკა კიდევ უფრო დაუცველს ტოვებს მოქალაქეებს – სუს- ის განცხადება ბმაშია „ქართული ოცნების” კაპიტულანტურ პოლიტიკასთან, – ამის შესახებ ოპოზიციონერმა დეპუტატმა, თეონა აქუბარდიამ განაცხადა.

მისი თქმით, „ქართული ოცნება” მშვიდობის მანტიას ირგებს, თუმცა, ქვეყანაში არ არის მშვიდობა. ამასთან, დეპუტატი აღნიშნავს, რომ ოკუპაციის კუთხით “ქართული ოცნების” წევრების მხრიდან წინა ხელისუფლებისკენ “თითის გაშვერა” მიუთითებს, რომ ისინი არ აღიარებენ საკუთარ პასუხისმგებლობას ოკუპაციასა და მის შედეგებთან გამკლავების თვალსაზრისით.

„გუშინ ოკუპანტებმა მოგვიკლეს ყოფილი სამხედრო და ეს კიდევ ერთხელ ხაზს უსვამს რუსულ ოკუპაციას, რომელიც არ არის დასრულებული შედეგი. პარლამენტში გვაქვს მიღებული შესაბამისი დადგენილება, ისევე როგორც არსებობს 2018 წელს მიღებული მთავრობის დადგენილება, ტატუნაშვილი – ოთხოზორიას სია და მაშინ, როცა ხელისუფლების წარმომადგენლები თითს იშვერენ წინა ხელისუფლებისკენ, ისინი არ აღიარებენ იმ პასუხისმგებლობას, რომელიც მოქმედ ხელისუფლებას აქვს რუსულ ოკუპაციასა და მის შედეგებთან გასამკლავებლად. წლის დასაწყისში ოკუპირებული ცხინვალის ახალგორის ე.წ. პროკურორად დაინიშნა ტატუნაშვილის მკვლელების სიაში მყოფი პირი – გურწიევი, მაშინ ხელისუფლებას მოვუწოდე რეაგირება გაეკეთებინა მთავრობის დადგენილების შესაბამისად, თუმცა ამაზე ხმა არ ამოუღიათ, რაც ნიშნავს, რომ ტატუნაშვილი- ოთხოზორიას სიაში მყოფი დამნაშავეების დაკავებაზე “ქართულ ოცნებას” არ უმუშავია და მათი ე.წ. პოლიტიკა კიდევ უფრო აძლიერებს რუსულ საფრთხეებს და კიდევ უფრო დაუცველს ტოვებს ჩვენს მოქალაქეებს. რუსეთთან მიმართებით ახორციელებს არასწორ პოლიტიკას, თითქოს მშვიდობის დამცველის მანტიის მორგება, ხოლო ჩვენ ვხედავთ, რომ მშვიდობა არ გვაქვს ქვეყანაში და არ გვექნება მანამ, სანამ რუსი ოკუპანტი დგას ჩვენს მიწაზე,”- განაცხადა აქუბარდიამ.

ის ასევე გამოეხმაურა სუს- ის განცხადებას და აღნიშნა, რომ სუს- მა თავდაპირველად, მკვლელობას უწოდა გარდაცვალება, ხოლო ადგილზე მყოფ მესამე მოქალაქეზე, რომელმაც გაქცევით უშველა თავს და გორის პოლიციაში კითხავდნენ, საზოგადოებას ინფორმაცია არ მიაწოდა.

„სუს- ის ორი განცხადება ორი საათის ინტერვალით, რა თქმა უნდა, გამოწვეული იყო იმ საჯარო პოზიციით, რასაც ჩვენი მოქალაქეები გამოხატავდნენ. მათ თქვეს, რომ ოკუპირებულ ტერიტორიაზე მოხდა ეს ფაქტი და მე არ მესმის, რატომ იყო ხაზგასმა ოკუპირებულ ტერიტორიაზე, მათ მკვლელობას უწოდეს გარდაცვალება და ორი საათის შემდეგ გადააკეთეს გარდაცვალება მკვლელობის ფაქტად, მაგრამ არ გვითხრეს საქართველოს მესამე მოქალაქეზე, რომელმაც თავი დააღწია გაქცევით და ის იკითხებოდა გორის პოლიციაში. ამის შესახებ არ მესმის რატომ უნდა ვიგებდეთ რადიო „თავისუფლების” ჟურნალისტისგან და რატომ არ გააკეთა ამაზე განცხადება სუს-მა. სუს- ის განცხადება ბმაშია „ქართული ოცნების” კაპიტულანტურ პოლიტიკასთან,”- განაცხადა აქუბარდიამ.