ევროკავშირის უმაღლესი წარმომადგენელი, ევროკომისიის ვიცე-პრეზიდენტი ჯოზეფ ბორელი საქართველოშია.

ჯოზეფ ბორელს თბილისის საერთაშორისო აეროპორტში საქართველოს საგარეო საქმეთა მინისტრი ილია დარჩიაშვილი და საქართველოში ევროკავშირის ელჩი პაველ ჰერჩინსკი დახვდნენ.

ვიზიტის ფარგლებში, ევროკავშირის უმაღლეს წარმომადგენელს საქართველოს პრეზიდენტი სალომე ზურაბიშვილი მიიღებს. ჯოზეფ ბორელი ასევე შეხვდება საქართველოს პრემიერ-მინისტრს, ირაკლი ღარიბაშვილს. პრემიერ-მინისტრთან შეხვედრის შემდეგ ერთობლივი პრესკონფერენცია გაიმართება. ბორელი ასევე შეხვდება საქართველოს საგარეო საქმეთა მინისტრს, ილია დარჩიაშვილს.

ევროკავშირის ვიცე-პრეზიდენტი ასევე შეხვდება პარლამენტში წარმოდგენილი პოლიტიკური პარტიებისა და სამოქალაქო საზოგადოების წარმომადგენლებს.

ვიზიტის ფარგლებში, ჯოზეფ ბორელი ევროკავშირის სადამკვირვებლო მისიის საქმიანობასაც გაეცნობა.

ევროკავშირის საგარეო ქმედებათა სამსახურში აცხადებენ, რომ ქვეყანაში ბორელის პირველი ოფიციალური ვიზიტი, ამჟამინდელი უფლებამოსილებებით, საშუალებას მისცემს მას, განიხილოს პროგრესი საქართველოს ევროინტეგრაციის გზაზე და ასევე გაცვალოს აზრები უფრო ფართო საგარეო პოლიტიკასა და რეგიონულ საკითხებზე.

დარწმუნებული ვარ, „ნაციონალურ მოძრაობაში“ დაპირისპირება უფრო გაღრმავდება, მერწმუნეთ, გავერთობით, – ამის შესახებ დედაქალაქის მერმა, კახა კალაძემ ჟურნალისტებს განუცხადა კითხვის საპასუხოდ, რომელიც „ნაციონალურ მოძრაობაში“ მიმდინარე პროცესებს ეხებოდა.

კახა კალაძის თქმით, „ნაციონალურ მოძრაობაში“ დაპირისპირების პროცესი დიდი ხანია, დაწყებულია.

„ყველა ვხედავთ, რა ვითარებაა „ნაციონალურ მოძრაობაში“. ეს დაპირისპირება დღეს და გუშინ არ დაწყებულა, დიდი ხნის განმავლობაში გრძელდება. მგონია, რომ აღნიშნული დაპირისპირება კიდევ უფრო გაღრმავდება. ბოლო დღეების განმავლობაში კონკრეტული პოლიტიკოსების მხრიდან აღიარებით ჩვენებებს ვისმენთ. დარწმუნებული ვარ, დაპირისპირების პროცესი კიდევ უფრო გაღრმავდება და საინტერესო გახდება. მერწმუნეთ, გავერთობით“, – განაცხადა კახა კალაძემ.

“ღარიბაშვილი შემჩნეულია კორუფციაში, არსებობს „კახური კლანი“ და ამაზე თავად „ქართული ოცნების“ ლიდერები საუბრობდნენ თავის დროზე”- ასე ეხმაურება “სტრატეგია აღმაშენებლის” დეპუტატი, პაატა მანჯგალაძე ინფორმაციას იმის თაობაზე, რომ ღარიბაშვილი ჩარტერული რეისით იმყოფებოდა აშშ-ში და აღნიშნა, რომ ჩარტერით გაფრენა რამდენიმე ათობით ათასი დოლარი ღირს და ახლა მნიშვნელოვანია პრემიერ-მინისტრის განმარტება, თუ საიდან ჰქონდა ეს თანხა და ვინ გადაიხადა.

„ჩვენ ვიცით, რომ ღარიბაშვილი შემჩნეულია კორუფციაში, არსებობს „კახური კლანი“ და ამაზე თავად „ქართული ოცნების“ ლიდერები საუბრობდნენ თავის დროზე. ახლა ისე გამოვიდეს, რომ ჩარტერის ფული ღარიბაშვილს მამამ გადაუხადა, აქამდე არ დავიდეს ეს ყველაფერი. მე ამაში ვხედავ კორუფციის რისკებს, მეტსაც ვიტყვი, ის არის კორუმპირებული. საკუთარ მეუღლეს რომ ბორჯომის პარკი გადასცა 49 წლით, ეს არის პირდაპირი მისი კორუფციული მადის დადასტურება”, – განაცხადა მანჯგალაძემ.

პრემიერ-მინისტრ ირაკლი ღარიბაშვილის აშშ-ში განხორციელებულ ვიზიტთან დაკავშირებით მთავრობის სტრატკომმა განცხადება გაავრცელა, სადაც აღნიშნულია, რომ მიზანმიმართულად ვრცელდება ცრუ ინფორმაცია იმის შესახებ, რომ ირაკლი ღარიბაშვილი შვილთან ერთად აშშ-ში თითქოსდა ჩარტერული რეისით გაემგზავრა. სტრატკომი განმარტავს, რომ საუბარი იყო ჩარტერულ ფრენაზე, რომელიც განხორციელდა თბილისიდან ევროპის ერთ-ერთი ქალაქის მიმართულებით, ხოლო აშშ-ის მიმართულებით პრემიერ-მინისტრი რეგულარული რეისით გაემგზავრა.

“კერძო ვიზიტისას პრემიერ-მინისტრის მგზავრობის, ასევე ჩარტერული (კომერციული) რეისის თუ ნებისმიერი სხვა ხარჯი სახელმწიფო ბიუჯეტიდან არ გაწეულა”, – ნათქვამია განცხადებაში.

მთავრობის სტრატკომი პრემიერ-მინისტრ ირაკლი ღარიბაშვილის აშშ-ში განხორციელებულ ვიზიტთან დაკავშირებით განცხადებას ავრცელებს.

როგორც განცხადებაშია აღნიშნული, მიზანმიმართულად ვრცელდება ცრუ ინფორმაცია იმის შესახებ, რომ პრემიერ-მინისტრი ირაკლი ღარიბაშვილი შვილთან ერთად აშშ-ში თითქოსდა ჩარტერული რეისით გაემგზავრა.

„საზოგადოების შეცდომაში შეყვანის მიზნით, მიზანმიმართულად ვრცელდება ცრუ ინფორმაცია იმის შესახებ, რომ პრემიერ-მინისტრი ირაკლი ღარიბაშვილი შვილთან ერთად აშშ-ში თითქოსდა ჩარტერული რეისით გაემგზავრა. საზოგადოების ინფორმირების მიზნით განვმარტავთ, რომ პრემიერ-მინისტრი როგორც ოფიციალური და სამუშაო, ისე კერძო ვიზიტების დროს აშშ-ში მგზავრობს სამგზავრო თვითმფრინავით, სხვადასხვა ავიაკომპანიის რეგულარული, კომერციული რეისებით. კიდევ ერთხელ განვმარტავთ, რომ საუბარი იყო ჩარტერულ ფრენაზე, რომელიც განხორციელდა თბილისიდან ევროპის ერთ-ერთი ქალაქის მიმართულებით, ხოლო აშშ-ის მიმართულებით პრემიერ-მინისტრი რეგულარული რეისით გაემგზავრა. კერძო ვიზიტისას პრემიერ-მინისტრის მგზავრობის, ასევე ჩარტერული (კომერციული) რეისის თუ ნებისმიერი სხვა ხარჯი სახელმწიფო ბიუჯეტიდან არ გაწეულა“,-აღნიშნულია განცხადებაში.