კარვით იქნება თუ უკარვოდ, დაპირისპირებაა დაგეგმილი – კარვების არსებობის შემთხვევაში, ამის ორგანიზება უკეთ შეიძლება მოხდეს,- ამის შესახებ პარლამენტის პირველმა ვიცე- სპიკერმა გია ვოლსკიმ კანონში დაგეგმილი ცვლილებების კომენტირებისას განაცხადა, რომლის თანახმად, შეკრებისა და მანიფესტაციების დროს დროებითი კონსტრუქციების მოწყობასთან დაკავშირებით კანონი მკაცრდება და ახალი ამკრძალავი ნორმები ამოქმედდება.

ვოლსკის თქმით, მას შემდეგ რა ინფორმაციაც სუს-მა გამოაქვეყნა, არ ჰგონია, რომ რელევანტურია შეკითხვა იმასთან დაკავშირებით, საჭიროა თუ არა კანონში ცვლილებების დაჩქარებულად მიღება.

„კარავზე იყო ლაპარაკი, უსაფრთხოების სამსახური გარკვეულ გეგმებზე ლაპარაკობდა და ამ გეგმების ერთ ერთი ფრაგმენტი იყო, რომ კარავში უნდა მოხდეს რაღაცის აფეთქება, ან რაღაც ისეთის შეტანა, რომელიც ხელს შეუწყობს დესტაბილიზაციისთვის პროცესების განვითარებას. ზოგადად, მანიფესტაცია არავის შეუზღუდავს, მაგრამ მანიფესტაციები, რომლებიც იგეგმება, არის ის სცენარი, რომელზეც ჩვენ არაერთხელ გვითქვამს. კარვით იქნება თუ უკარვოდ, დაპირისპირებაა დაგეგმილი, რასაკვირველია, კარვების არსებობის შემთხვევაში, ამის ორგანიზება უკეთ შეიძლება მოხდეს,“ – განაცხადა ვოლსკიმ.

ცნობისთვის, მმართველი გუნდი შეკრებისა და მანიფესტაციების დროს დროებითი კონსტრუქციების მოწყობასთან დაკავშირებით კანონის გამკაცრებასა და ახალი ამკრძალავი ნორმების ამოქმედებას გეგმავს. „ქართული ოცნების“ დეპუტატების ინიციატივით განსახილველად მზად არის „შეკრებებისა და მანიფესტაციების” შესახებ კანონში ცვლილებები, რომლის გათვალისწინებით, შეკრებისა და მანიფესტაციის მონაწილეებს დროებითი კონსტრუქციების მოწყობა ეკრძალებათ თუ მისი მოწყობა: საფრთხეს უქმნის შეკრების ან მანიფესტაციის მონაწილეებს ან სხვა პირებს; ხელს უშლის პოლიციის მიერ საზოგადოებრივი წესრიგისა და უსაფრთხოების დაცვას; იწვევს საწარმოს, დაწესებულების ან ორგანიზაციის ნორმალური ფუნქციონირების შეფერხებას; შეკრების ან მანიფესტაციის ჩატარებას არ უკავშირდება. ამასთან, კანონის პროექტის მიხედვით, „საჯარო სივრცის იერსახის დამახინჯების თავიდან აცილების მიზნით“, შეკრების ან მანიფესტაციის მონაწილეებს დროებითი კონსტრუქციის მოწყობა იმ შემთხვევაშიც ეკრძალებათ, თუ მისი მოწყობის გარეშე შეკრების ან მანიფესტაციის ჩატარება არსებითად არ ფერხდება. კანონპროექტის განმარტებით ბარათში, „შეკრებებისა და მანიფესტაციების შესახებ“ კანონში ცვლილების განხორციელების მიზეზად სახელმწიფო უსაფრთხოების სამსახურის მიერ 18 სექტემბერს გავრცელებული განცხადებაა დასახელებული.

სუს-ის გამოძიება არის მცდელობა, გადაფარონ ისეთი მნიშვნელოვანი საკითხი, როგორიც არის, მაგალითად, ფარცხალაძის აგენტობა, – ამის შესახებ „ნაციონალური მოძრაობის“ წევრმა, ანა წითლიძემ განაცხადა.

მისივე თქმით, სახელმწიფო უსაფრთხოების სამსახური ერთ-ერთი ყველაზე სამარცხვინო ორგანიზაციაა.

„სუს-ის მიერ დაწყებული გამოძიება გადატრიალების მცდელობით არაერთხელ გვინახავს. დაახლოებით ასეთ ხუთ საქმეზე მე პირადად ვარ დაკითხული ამ 11 წლის განმავლობაში. ხან საბურავების რევოლუციას გვაბრალებდნენ და ხან კიდევ რას, თუმცა არცერთი საქმე ბოლომდე არ მისულა. იმიტომ, რომ ეს საქმეები ყოველთვის იყო პოლიტიკური ნონსენსი და ყოველთვის რაღაცის გადასაფარად სჭირდებოდათ. სუს-ის მიერ დაწყებული გამოძიებაც ახლა არის იმის მცდელობა, გადაფარონ ისეთი მნიშვნელოვანი საკითხი, როგორიც არის, მაგალითად, ფარცხალაძის აგენტობა და სხვა მიზანი ამას არ აქვს.

სახელმწიფო უსაფრთხოების სამსახური ერთ-ერთი ყველაზე სამარცხვინო ორგანიზაციაა. მინდა, ამ განცხადების პასუხად ვკითხო, სად იყო სუს-ი და რას აკეთებდა, რიდესაც საქართველოს გენერალური პროკურორი რუსეთის აგენტი იყო? რას აკეთებდა, როდესაც რუსეთის აგენტი ფარცხალაძე კოორდინირებას უწევდა სამართალდამცავ ორგანოებს და ერეოდა არჩევნებში? რას აკეთებს ახლა, როდესაც ამერიკის მიერ უკვე ოფიციალურად აგენტად დეკლარირებული ფარცხალაძე თავისუფლად გადაადგილდება საქართველოში და მას არავინ არაფერს არ უზღუდავს? როგორიც არ უნდა იყოს სუს-ის მცდელობა, რომ აბსურდული ბრალდებები შექმნას, მას აუცილებლად მოუწევს მთავარ კითხვებზე პასუხის გაცემა“, – განაცხადა ანა წითლიძემ.

სახელმწიფო უსაფრთხოების სამსახურში გამართულ ბრიფინგზე დღეს განაცხადეს, რომ ორგანიზაცია „კანვასის“ წევრები სასტუმროში შეხვდნენ NGO-ებს, სამოქალაქო აქტივისტებს, გაიმართა დიდი ჯგუფის გადამზადება, რომელმაც გადამწყვეტი როლი უნდა შეასრულოს ხელისუფლების დამხობის პროცესში. მათივე ცნობით, 26-29 სექტემბერს USAID-ის დაფინანსებით ჩატარებულ კონფერენციას ორგანიზება „კანვას – საქართველომ“ და აღმოსავლეთ-დასავლეთ მართვის ინსტიტუტმა გაუწიეს. სუს-მა „კანვასის“ წარმომადგენლების მიმართ ჩატარებული ფარული საგამოძიებო მოქმედების შედეგად მოპოვებული მტკიცებულებების ნაწილი გამოაქვეყნა.

სუს-მა არარსებული მტერი გამოიგონა და საკუთარ თავს მოუძებნა საქმე, რომ ამ „მტრებმა“ ვერ მოუწყონ არარსებული და არშემდგარი რევოლუცია, – ამის შესახებ „გირჩის“ წევრმა, იაგო ხვიჩიამ განაცხადა.

მისივე თქმით, „არარსებულ მტრებთან ბრძოლაში ისინი აუცილებლად გაიმარჯვებენ“

„ზოგადად, პოსტსაბჭოთა ქვეყანაში და საბჭოთა სისტემაში უშიშროების სამსახურების მოვალეობა იყო, შეინარჩუნოს ხელისუფლებაში არსებული ძალები და მას მოაშოროს კონკურენტები. როდესაც ხელისუფლებას რაღაც პრობლემები ექმნება, საჭიროა ახალი მტრების გამოგონება, რომ ადამიანების ყურადღება გადავიდეს არა საქმეების კეთებაზე, არამედ იმაზე, რა ეფექტურად ებრძვიან არარსებულ მტრებს. ასეთი არარსებული მტერი გამოიგონა ახლა სუს-მა და საკუთარ თავს მოუძებნა საქმე, რომ ამ „მტრებმა“ ვერ მოუწყონ არარსებული და არშემდგარი რევოლუცია. ამ არარსებულ მტრებთან ბრძოლაში ისინი აუცილებლად გაიმარჯვებენ და ამაში მიიღებენ პრემიებს. მოგეხსენებათ, ახალი ბიუჯეტით, სუს-ის დაფინანსება იზრდება და საჭიროა ახალ-ახალი საქმეების გამოგონება. როგორც წესი, უშიშროების სამსახურებისთვის ახალ-ახალი საქმეები არის ახალ-ახალი მტრების აღმოჩენა და მათ წინააღმდეგ ბრძოლა. თუ ეს მტრები არ არსებობენ, ყველა ვარიანტში ამოცანა ფრიადზე გაქვს შესრულებული. მჯერა ჩემი კოლეგების, ოპოზიციონერების, რომ ისინი არანაირი რევოლუციის მომწყობები არ არიან. ეს არც არასდროს უფიქრიათ. რევოლუციონერობანას თამაშით, სინამდვილეში, ქართველ ხალხს ატყუებენ, თითქოს რამის გამკეთებლები არიან და მათ არ უშვებენ ქუჩაში ხელისუფლების გადასაყენებლად“, – განაცხადა იაგო ხვიჩიამ.

ამასთან, იაგო ხვიჩიას კითხვით მიმართეს სახელმწიფო უსაფრთხოების სამსახურის იმ ინფორმაციასთან დაკავშირებით, რომლის მიხედვითაც, 26-29 სექტემბერს ჩატარებული კონფერენცია, რომელსაც ორგანიზება გაუწიეს „კანვას – საქართველომ“ და აღმოსავლეთ-დასავლეთ მართვის ინსტიტუტმა, USAID-ის დაფინანსებული იყო.

„ეს ანტიამერიკული კამპანიის ნაწილია – ამერიკულ ინსტიტუტებს სახელი უნდა გაუტყდეთ და ყველა უნდა იყოს ჩათრეული რაღაც ბრძოლაში, რომელსაც შემდეგ შენ სასტიკ ომს გამოუცხადებ და ამ ომში გამარჯვებული გამოხვალ. პრობლემა იმაში მდგომარეობს, რომ, სინამდვილეში, ამით ამერიკელ პარტნიორებთან ვიფუჭებთ საქმეს და არა იმაში, რომ USAID-ი მანამდე ან ამის მერე გახდება რევოლუციური იდეების მხარდამჭერი ან ჩვენი ოპოზიციონერი კოლეგები მოახერხებენ რევოლუციის მოწყობას. რევოლუციას ამ ქვეყანაში ახდენს ხალხი და ჩემი კოლეგებიც, სუს-იც, ხელისუფლებაც ხელს უშლის მათ, გაერკვნენ, რა პრინციპების საფუძველზე უნდა მოხდეს ხელისუფლების ცვლილება და რა იქნება ხალხის ახალი დაკვეთა. ეს რომ არ მოხდეს, ამიტომ არის მოწყობილი მედიაისტერია ქვეყანაში არარსებულ ამბებზე“, – აღნიშნა იაგო ხვიჩიამ.

სახელმწიფო უსაფრთხოების სამსახურში გამართულ ბრიფინგზე დღეს განაცხადეს, რომ ორგანიზაცია „კანვასის“ წევრები სასტუმროში შეხვდნენ NGO-ებს, სამოქალაქო აქტივისტებს, გაიმართა დიდი ჯგუფის გადამზადება, რომელმაც გადამწყვეტი როლი უნდა შეასრულოს ხელისუფლების დამხობის პროცესში. მათივე ცნობით, 26-29 სექტემბერს USAID-ის დაფინანსებით ჩატარებულ კონფერენციას ორგანიზება „კანვას – საქართველომ“ და აღმოსავლეთ-დასავლეთ მართვის ინსტიტუტმა გაუწიეს. სუს-მა „კანვასის“ წარმომადგენლების მიმართ ჩატარებული ფარული საგამოძიებო მოქმედების შედეგად მოპოვებული მტკიცებულებების ნაწილი გამოაქვეყნა.

სუს-ის და ღარიბაშვილის განცხადებები კვლავ ემსახურება ანტიდასავლურ პროპაგანდას, ომის შიშის დანერგვასა და ბოდვას, რომ თითქოს ისინი მეორე ფრონტის გახსნისგან გვიცავენ, – ამის შესახებ „ევროპული საქართველოს“ თავმჯდომარემ, გიგა ბოკერიამ აღნიშნა, რითაც „რევოლუციურ სცენარებთან“ დაკავშირებით, სახელმწიფო უსაფრთხოების სამსახურისა და პრემიერ-მინისტრის განცხადებებს გამოეხმაურა.

მისი თქმით, საზოგადოებამ დამატებით უნდა მიაქციოს ყურადღება, თუ ვისთან აიდენტიფიცირებს ივანიშვილის რეჟიმი თავს.

„მილოშევიჩი, რუსეთის ვასალი დიქტატორი, რომელმაც არჩევნებში მარცხის აღიარებაზე უარი თქვა და ამას მოჰყვა მის წინააღმდეგ გამოსვლები. შევარდნაძის უკორუმპირებულესი და რუსეთის მიერ ინფულტრირებული რეჟიმი, რომელმაც ასევე კატასტროფული მარცხი არ აღიარა არჩევნებზე, რასაც მოჰყვა ვარდების რევოლუცია. იანუკოვიჩი, რომელმაც ღიად და დამარცვლით თქვა, რომ რუსეთის ვასალია, უკრაინის სახელმწიფოებრიობაზე უარს იძახის, არ უნდა ევროპასთან ასოცირება, უვიზო მიმოსვლა და თავისუფალი ვაჭრობა, ანუ ღალატი გამოაცხადა, რასაც ასევე მოჰყვა გამოსვლები. მილოშევიჩი, იანუკოვიჩი და შევარდნაძე ვართ ჩვენო, პირდაპირ გვეუბნებიან, არ დავუშვებთ და ჩვენც ასე მოვექცევით თქვენს პროტესტსო“, – აღნიშნა გიგა ბოკერიამ.

მისივე თქმით, „აქედან უნდა გააკეთოს ქართველმა საზოგადოებამ დასკვნა, თუ რამდენად მნიშვნელოვანი ეროვნული ამოცანაა ამ რეჟიმის დემოკრატიულად ცვლილება, სანამ დასავლეთისგან იზოლირებული, რუსეთის პირისპირ მარტო არ დაგვტოვა და სახელმწიფოებრიობის დაცვა დიდი მსხვერპლი არ დაგვიჯდა“.

თუ ადამიანს არ უნდა, რიყეზე ისე გავა, ქვას ვერ დაინახავს – ნახეთ კადრები! ვერაფერს ხედავთ საეჭვოს?! – ეს განცხადება პარლამენტის ბიუროს სხდომაზე, ოპოზიციის მისამართით პარლამენტის თავმჯდომარემ შალვა პაპუაშვილმა გააკეთა.

ბიუროს სხდომაზე “შეკრებებისა და მანიფესტაციების შესახებ“ კანონში დაგეგმილი ცვლილებების ინიცირებას და პროექტის დაჩქარებული წესით განხილვის გადაწყვეტილებას ცხარე კამათი მოჰყვა, რაზეც პაპუაშვილმა ოპოზიციონერ კოლეგებს მიმართა, რომ “თუ არ სურთ, ვერაფერს დაინახავენ“.

„ყველა თქვენი არგუმენტი შეგიძლიათ კომიტეტზე წარმოადგინოთ და გქონდეთ ცხარე კამათი, როგორც კომიტეტის, ასევე პარლამენტის პლენარული სხდომის დროს.

ყველა, ვინც ამ ქვეყნის არევას ცდილობს, ერთადერთი რასაც ემსახურება, ემსახურება რუსეთის ინტერესს – წერტილი! თუ ამაზე ვთანხმდებით, ყველა ჩვენი თუ სხვისი ქმედება ამ პერსპექტივიდან შევაფასოთ. შესაბამისად, ბიურო შეთანხმდა, რომ საქართველოში არეულობის მცდელობა არის მხოლოდ რუსეთის ინტერესი“, – განაცხადა შალვა პაპუაშვილმა.

მმართველი გუნდი შეკრებისა და მანიფესტაციების დროს დროებითი კონსტრუქციების მოწყობასთან დაკავშირებით კანონის გამკაცრებასა და ახალი ამკრძალავი ნორმების ამოქმედებას გეგმავს.

“ქართული ოცნების“ დეპუტატების ინიციატივით მომზადებული პროექტის გათვალისწინებით, შეკრებისა და მანიფესტაციის მონაწილეებს დროებითი კონსტრუქციების მოწყობა ეკრძალებათ თუ მისი მოწყობა: – საფრთხეს უქმნის შეკრების ან მანიფესტაციის მონაწილეებს ან სხვა პირებს; ხელს უშლის პოლიციის მიერ საზოგადოებრივი წესრიგისა და უსაფრთხოების დაცვას; იწვევს საწარმოს, დაწესებულების ან ორგანიზაციის ნორმალური ფუნქციონირების შეფერხებას; შეკრების ან მანიფესტაციის ჩატარებას არ უკავშირდება.

ამასთან, კანონის პროექტის მიხედვით, „საჯარო სივრცის იერსახის დამახინჯების თავიდან აცილების მიზნით“, შეკრების ან მანიფესტაციის მონაწილეებს დროებითი კონსტრუქციის მოწყობა იმ შემთხვევაშიც ეკრძალებათ, თუ მისი მოწყობის გარეშე შეკრების ან მანიფესტაციის ჩატარება არსებითად არ ფერხდება.

საქართველოს კულტურის, სპორტისა და ახალგაზრდობის მინისტრის, ვიცე-პრემიერის, თეა წულუკიანის განცხადებით, საქართველოს პრეზიდენტი სალომე ზურაბიშვილი საერთაშორისო ასპარეზზე სახელმწიფოს ინტერესებს, დიდი ხანია, არ იცავს.

როგორც წულუკიანმა მთავრობის სხდომის შემდეგ გამართულ ბრიფინგზე განაცხადა, ზურაბიშვილი საერთაშორისო ასპარეზზე არ მუშაობს ქვეყნის ევროპული მომავლისთვის.

„მან როდესაც მოგვმართა ნებართვით, მიიღო უარი და მთავრობამ არ გასცა ნებართვა საერთაშორისო ვიზიტების განხორციელებაზე. ეს სწორედ ამის გამო იყო – ჩვენ ხშირად მოვისმინეთ, რომ, პრეზიდენტის აზრით, თურმე ჩვენი ქვეყანა სტატუსს არ იმსახურებს. რა თქმა უნდა, როდესაც ადამიანი ამას ამბობს, მას არ აქვს ან არ სურს, ჰქონდეს წარმოდგენა, რას აკეთებს მთავრობა. არ სურს, ჰქონდეს წარმოდგენა, რამხელა შრომა გასწიეს საკანონმდებლო ორგანომ და საპარლამენტო უმრავლესობამ. არც ეს უნდა, რომ იცოდეს. პრეზიდენტს ჰგონია, რომ თავისი კონკრეტული, ინდივიდუალური აზრები საერთაშორისო ასპარეზზეა გამოსაფენი“, – განაცხადა თეა წულუკიანმა.

ამასთან, თეა წულუკიანს კითხვა დაუსვეს რუსეთის ფედერაციის საბჭოს საერთაშორისო ურთიერთობათა კომიტეტის თავმჯდომარის, გრიგორი კარასინის განცხადებაზე: „კარასინი ამბობს, რომ საქართველოს პრეზიდენტს პოლიტიკური შიზოფრენია აქვს. ასე გალანძღა მან საქართველოს პრეზიდენტი და ეს ლანძღვა მოჰყვა ზურაბიშვილის იმ განცხადებას, სადაც ზურაბიშვილმა თქვა: „რუსეთს თუ არ გააჩერებენ უკრაინაში, ვლადიმერ პუტინი თავს დაესხმება ბალტიის ქვეყნებს ან საქართველოს“. თქვენთვის რამდენად არის მისაღები აგრესორი ქვეყნის ერთ-ერთი პოლიტიკური ლიდერის მხრიდან პრეზიდენტის ლანძღვა და ხომ არ ფიქრობთ, ეს უნდა იყოს იმის საფუძველი, რომ კარასინი-აბაშიძის ფორმატი, რომელსაც, ოპოზიციის თქმით, შედეგი საერთოდ არ მოაქვს, უნდა გაუქმდეს?“

თეა წულუკიანის თქმით, შეიძლება, თავად უფრო მეტსაც ფიქრობდეს საქართველოს პრეზიდენტზე, მაგრამ აბსოლუტურად მიუღებელია, როდესაც უცხო ქვეყნის წარმომადგენელი საქართველოს პრეზიდენტს ასე ახასიათებს.

„რაც შეეხება კარასინის განცხადებას, ღიად უნდა გითხრათ, რომ პირადად არ მომისმენია, ამიტომ იმის მიხედვით გპასუხობთ, რაც თქვენ მითხარით და იმედი მაქვს, ეს სწორად არის გადმოცემული და მან ასე თქვა. მან თუ ეს ნამდვილად ასე თქვა, ჩემი პასუხი შემდეგია, რომ მე შეიძლება, უფრო მეტსაც ვფიქრობდე საქართველოს პრეზიდენტზე, მაგრამ აბსოლუტურად მიუღებელია, როდესაც უცხო ქვეყნის და სახელმწიფოს წარმომადგენელი ჩვენი ქვეყნის პრეზიდენტს ასე ახასიათებს“, – განაცხადა თეა წულუკიანმა.

ის, რისი სურვილიც აქვს ოპოზიციას დაინახოს, ანუ ბნელ ოთახში შავი კატა, ეს აქ ნამდვილად არ არის. არავინ არავის უკრძალავს კარვის დადგმას, – ამის შესახებ „ქართული ოცნების“ დეპუტატმა დავით მათიკაშვილმა ბიუროს სხდომაზე განაცხადა, სადაც შეკრებისა და მანიფესტაციების დროს დროებითი კონსტრუქციების მოწყობასთან დაკავშირებით კანონის გამკაცრებასა და ახალი ამკრძალავი ნორმების ამოქმედების ინიციატივაზე კანონპროექტი დაინიცირდა.

როგორც მათიკაშვილმა აღნიშნა, ქართველმა ხალხმა კარგად იცის, რას ნიშნავს სახელმწიფო უსაფრთხოების საკითხების უგულებელყოფა, სამწუხაროდ, ეს არ იცის, ან შეგნებულად არ იცის ოპოზიციამ.

„სამწუხაროა, ზოგიერთი ჩვენი კოლეგა, ჩვენი ქვეყნის ისტორიის მიმართ, გულმავიწყობას იჩენს. ის აგდებით და ქილიკით საუბრობს ისეთ უსაფრთხოების საკითხებზე, რომელიც აგერ ჩვენ ყველამ გამოვიარეთ 90 -იანი წლებიდან დღემდე. ვნახეთ, რას ნიშნავს სახელმწიფო უსაფრთხოების საკითხების უგულებელყოფა. ქილიკით, ირონიული და ცინიკური დამოკიდებულება და როგორ იწვევს ეს ყველაფერი მაგალითად, თბილისის გადაწვას სამოქალაქო ომის დროს. ქართველმა ხალხმა კარგად იცის, რას ნიშნავს სახელმწიფო უსაფრთხოების საკითხების უგულებელყოფა, სამწუხაროდ, ეს არ იცის, ან შეგნებულად არ იცის ოპოზიციამ. ისინი, სამწუხაროდ, არ იყურებიან კანონპროექტში, სადაც ყველაფერი არის ცალსახად განსაზღვრული და წერია ის, რისი ამოკითხვაც არ სურს ოპოზიციას. კონკრეტულ საკითხებზე არ დავიწყებ საუბარს და პროცედურულ თემაში ნამდვილად შევალ. ის, რისი სურვილიც აქვს დაინახოს ოპოზიციამ, ანუ ბნელ ოთახში შავი კატა, ეს აქ ნამდვილად არ არის. არავინ არავის უკრძალავს კარვის დადგმას, აქ არის კონკრეტული მოცემულობა უსაფრთხოების საკითხიდან გამომდინარე“, – განაცხადა მათიკაშვილმა.