პარლამენტის ადამიანის უფლებათა დაცვის კომიტეტმა „შეკრებებისა და მანიფესტაციების შესახებ“ კანონში დაგეგმილ ცვლილებებს მხარი დაუჭირა. უმრავლესობის დეპუტატებმა მხარდაჭერა ერთხმად გამოხატეს.

კანონპროექტი კომიტეტის სხდომაზე პარლამენტის წევრმა გივი მიქანაძემ წარადგინა, რომლის მტკიცებით, დაგეგმილი ცვლილებები კარვის დადგმას არ კრძალავს, მაგრამ განსაზღვრავს კონკრეტულ საფუძვლებს, თუ რა შემთხვევაში იკრძალება ამის გაკეთება და რა კონკრეტული ნაბიჯები უნდა გადადგან სამართალდამცავი უწყების წარმომადგენლებმა. მისივე თქმით, მოქმედი კანონმდებლობა იძლევა იმის შესაძლებლობას, რომ ამ ყველაფერზე სასამართლო კონტროლი არსებობდეს.

„საუბარია არა მშვიდობიანი პროტესტის აკრძალვაზე, არამედ იმ ნორმების დახვეწაზე, რამაც პრევენციულად უნდა იმოქმედოს.

რისკ-ფაქტორების ახალი კონკრეტული გარემოებები გაჩნდა, რაზეც არამარტო განცხადება გაკეთდა, არამედ გამოძიება მიმდინარეობს, ხოლო დღეს საზოგადოება დარწმუნდა, თუ რა მიზნებს ისახავენ ეს ადამიანები რევოლუციური სცენარით. აბსოლუტურად მყისიერად სამოქმედოა. ამიტომაც მოვითხოვეთ პროექტის დაჩქარებული წესით განხილვა. როგორც პასუხისმგებლიან ხელისუფლებას, ჩვენი ქვეყნისა და საზოგადოების წინაშე ვალდებულება გვაქვს, რათა საზოგადოების უსაფრთხოება და საზოგადოებრივი წესრიგი მაქსიმალურად იქნას დაცული.

სახელმწიფო უსაფრთხოების სამსახურის 18 სექტემბრის განცხადებაში პირდაპირ მითითებულია, რომ დესტაბილიზაცია ოქტომბერ-დეკემბრის პერიოდს უკავშირდება. დღეს უკვე 2 ოქტომბერია. შესაბამისად, საზოგადოებისა და ქვეყნის წინაშე უფლება არა გვაქვს თუნდაც ერთი წუთით ეს პროცესი შევანელოთ“, – განაცხადა გივი მიქანაძემ.

პარლამენტი დაჩქარებული წესით იხილავს “შეკრებებისა და მანიფესტაციების“ შესახებ კანონში ცვლილებებს, რომლითაც შეკრებისა და მანიფესტაციების დროს დროებითი კონსტრუქციების მოწყობასთან დაკავშირებით კანონი მკაცრდება. შემოდის ახალი ამკრძალავი ნორმები.

“ქართული ოცნების“ დეპუტატების ინიციატივით მომზადებული პროექტის გათვალისწინებით, შეკრებისა და მანიფესტაციის მონაწილეებს დროებითი კონსტრუქციების მოწყობა ეკრძალებათ თუ მისი მოწყობა: – საფრთხეს უქმნის შეკრების ან მანიფესტაციის მონაწილეებს ან სხვა პირებს; ხელს უშლის პოლიციის მიერ საზოგადოებრივი წესრიგისა და უსაფრთხოების დაცვას; იწვევს საწარმოს, დაწესებულების ან ორგანიზაციის ნორმალური ფუნქციონირების შეფერხებას; შეკრების ან მანიფესტაციის ჩატარებას არ უკავშირდება.

ამასთან, კანონის პროექტის მიხედვით, „საჯარო სივრცის იერსახის დამახინჯების თავიდან აცილების მიზნით“, შეკრების ან მანიფესტაციის მონაწილეებს დროებითი კონსტრუქციის მოწყობა იმ შემთხვევაშიც ეკრძალებათ, თუ მისი მოწყობის გარეშე შეკრების ან მანიფესტაციის ჩატარება არსებითად არ ფერხდება.

ამ ახალი ამკრძალავი ნორმების დარღვევა გამოიწვევს სამართალდარღვევის საგნის კონფისკაციას და დაჯარიმებას 500 ლარის ოდენობით ან სამართალდარღვევის საგნის კონფისკაციას და ადმინისტრაციულ პატიმრობას 15 დღემდე ვადით, ხოლო თუ დამრღვევი ორგანიზატორია – სამართალდარღვევის საგნის კონფისკაციას და დაჯარიმებას 5000 ლარის ოდენობით ან ადმინისტრაციულ პატიმრობას 15 დღემდე ვადით.

ნათლად ვხედავთ, რომ ქვეყანაში რევოლუციური სიტუაცია არ არსებობს, ამიტომ ვერანაირ რევოლუციაზე ისინი ვერ გადიან, მაგრამ აქ სწორედ ამაზეა საუბარი, რომ გარკვეული საპროტესტო მუხტი და იქ [ სუს-ის მიერ გავრცელებულ კადრებში] ახსნილიც იყო, მცირე მუხტი როგორ უნდა გადაზარდონ უფრო მძლავრ მუხტში, – ამის შესახებ საპარლამენტო უმრავლესობის წევრმა, საპროცედურო საკითხთა კომიტეტის თავმჯდომარემ, ირაკლი ქადაგიშვილმა „ქრონიკაში“ სახელმწიფო უსაფრთხოების სამსახურის მიერ გავრცელებულ კადრებთან დაკავშირებით განაცხადა.

„ვინც ამ ისტორიის თანამონაწილეა და გაიშიფრნენ, ყველა შეეცდება მაქსიმალურად გულუბრყვილოდ წარმოაჩინონ თავი. სინამდვილეში ვხედავთ რასთანაც გვაქვს საქმე. მცირე მონაკვეთებითაც კი, რა კადრებიც იქნა გაშვებული, ნათლად ჩანს, თუ როგორ უნდა მოხდეს პროტესტის რადიკალიზაცია და ამ რადიკალიზაციის პროცესში როგორ უნდა მიმდინარეობდეს სხვადასხვა აქტივობები, რომელიც საბოლოო ჯამში სიტუაციას მიიყვანს კრიტიკული დუღილის წერტილამდე. ამ წერტილის შემდეგ რა მოხდება, ეს კიდევ ცალკე გამოცდილებაა, რომელიც ისედაც დაგროვილია მსოფლიოში. როდესაც ასე ხელოვნურად იქმნება კრიტიკული დუღილი, ხდება იმ ფარული უბედური შემთხვევის ჩართვა, რომელიც პროცესების აბსოლუტურ რადიკალიზაციას იწვევს. ნათლად ვხედავთ, რომ ქვეყანაში რევოლუციური სიტუაცია არ არსებობს, ამიტომ ვერანაირ რევოლუციაზე ისინი ვერ გადიან, მაგრამ აქ სწორედ ამაზეა საუბარი, რომ გარკვეული საპროტესტო მუხტი და იქ [ სუს-ის მიერ გავრცელებულ კადრებში] ახსნილიც იყო, მცირე მუხტი როგორ უნდა გადაზარდო უფრო მძლავრ მუხტში. აქ პირდაპირი ტექსტითაა ყველაფერზე საუბარი, აქ არ არის საუბარი სამოქალაქო განათლებაზე, ადამიანის უფლებების რეალიზაციაზე. არ არის საუბარი როგორი უნდა იყოს მშვიდობიანი მიტინგი ისე, რომ არ დაირღვეს არც მომიტინგის უფლებები და არც კანონი. აქ საუბარია იმაზე, როგორ უნდა გამოვიყენოთ დემოკრატიული თავისუფლების პირობებში მიტინგი პროვოცირებისათვის და პროვოკაციული ქმედებებისათვის. ეს არის მარტივად რომ ვთქვათ, მთელი ამ ტრენინგების შინაარსი“, – აღნიშნა ქადაგიშვილმა.

სახელმწიფო უსაფრთხოების სამსახურმა უწყებაში მიმდინარე გამოძიების ფარგლებში მიღებული ახალი ინფორმაცია გაასაჯაროვა.

მანამდე, 18 სექტემბერს კი სახელმწიფო უსაფრთხოების სამსახურმა გაავრცელა განცხადება, სადაც ნათქვამი იყო, რომ გარკვეული პირები საქართველოში სამოქალაქო არეულობას გეგმავენ, რომლის მიზანია, ხელისუფლების ძალადობრივი გზით შეცვლა და „ევრომაიდნის“ მოწყობა. კერძოდ, დესტრუქციული პროცესების დაწყების პერიოდად ოქტომბერ-დეკემბრი სახელდება, მთავარი შემსრულებლები კი გიორგი ლორთქიფანიძე, მიხეილ ბატურინი და მამუკა მამულაშვილი არიან. გეგმის განხორციელება უცხო ქვეყნების კოორდინაციითა და ფინანსური მხარდაჭერით არის დაგეგმილი.

მოგვიანებით, სახელმწიფო უსაფრთხოების სამსახურში სამოქალაქო არეულობის სავარაუდო დაგეგმვის საქმესთან დაკავშირებით მიმდინარე გამოძიების ფარგლებში, ჯგუფ „კანვასის“ სამი წევრი, სერბეთის მოქალაქეები გამოკითხეს.

შეკრებისა და მანიფესტაციების დროს დროებითი კონსტრუქციების მოწყობასთან დაკავშირებით კანონის გამკაცრებასა და ახალი ამკრძალავი ნორმების ამოქმედების შესახებ კანონპროექტის განხილვა ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე ხმაურის ფონზე მიმდინარეობდა.

სიტყვიერი დაპირისპირება ფრაქცია „ნაციონალური მოძრაობის“ თავმჯდომარე თინა ბოკუჩავასა და მმართველი პარტიის დეპუტატ ალუდა ღუდუშაურს შორის დაიწყო.

თინა ბოკუჩავა კანონპროექტის ფორსირებულად მოსმენის გადადებას ითხოვდა, რადგან, მისი თქმით, ეს კანონპროექტი ე.წ. რუსულ კანონს ძალიან ჰგავს.

„ვითხოვ, რომ ასეთი ფორსირებული მოსმენა არ იყოს ამ მნიშვნელოვანი კანონპროექტის. ერთი საათის წინ რომ ჩატარდა ბიურო, არ არის მიზანშეწონილი, რომ ასე ფორსირებულად მოხდეს ამ მნიშვნელოვანი კანონის განხილვა, რომელიც, დიახ, არის ე.წ. რუსული კანონისნაირი. საზოგადოებას აუხსენით რატომ გეშინიათ პროტესტის, რატომ გეშინიათ მშვიდობიანი პროტესტის?!“- განაცხადა თინა ბოკუჩავამ.

ბოკუჩავას მმართველი გუნდიდან ალუდა ღუდუშაურმა უპასუხა და აღნიშნა, რომ „ნაციონალური მოძრაობის“ წარმომადგენელს მორალური პიედესტალიდან საუბარი არ გაუვა.

„აქ რაზე უნდა ვილაპარაკოთ, „ნაციონალებს“ აქვთ უკურნებელი დემენცია, ესენი ყველანი დემენციით არიან შეპყრობილები, მძიმე მეტალები აქვთ, ყველაფერი აქვთ და ზოგადად, კოლექტიურ „ნაციონალურ მოძრაობას“ პოლიტიკური გვამის სუნი ნამდვილად ასდის. იმაზე რომ საუბრობდნენ, გვამის სუნი ასდისო, მას შემდეგ 2 წელია გრძელდება ხალხის შეურაცხყოფა. თუ ვინმეს პოლიტიკური გვამის სუნი ასდის, ასდის „ნაციონალურ მოძრაობას“, ამათი არავის ეშინია. თინა არის „ნაციონალური მოძრაობის“ რეალური სახე. თავისუფალიაო, რომ ამბობენ, ხომ იცით რაც, იგივეა ესეც. გაიარა, გამოიარა, ხუთი კარები აქვს, ორი კარები აქვს წავიდეს, წამოვიდეს, ჩვენ უნდა ვაკეთოთ საქმე. აქ იმისთვის არ მოვსულვართ, რომ თინას მორალური პიედესტალიდან ვასაუბროთ რაღაცები. სირცხვილია ადამიანი ხალხის სახელით გვესაუბრებოდეს, რომელიც არის სახე იმ რეჟიმის, რომლებიც აუპატიურებდნენ, აწამებდნენ და ტკბობაში იყვნენ. მორალი წაუკითხოს საკუთარ პარტიაში ვაშაძეებს და სხვებს და იმას, ორი წელია ხან ქართული რომ ავიწყდება და ხან ფრანგული. მონებზე საუბარი არ გაგივათ. უნდა ვიყოთ მშვიდად, ეს “ფარჩაკი”, ხალხის მწამებელი პარტია ვერასდროს ეღირსება ხელისუფლებაში მოსვლას“, – განაცხადა ალუდა ღუდუშაურმა.

სიტყვიერი დაპირისპირების შემდეგ თინა ბოკუჩავამ კომიტეტის სხდომა პროტესტის ნიშნად დატოვა.

საქართველოს პრეზიდენტი, სალომე ზურაბიშვილი ბელგიის მეფე ფილიპეს წერილით მიმართავს.

საქართველოს პრეზიდენტი გულისტკივილს გამოხატავს იმის გამო, რომ ვერ მონაწილეობს „ევროპალია საქართველოს“ ინაუგურაციაში.

პრეზიდენტის მიზეზებზე საუბრობს და აღნიშნავს, რომ „მთავრობის დაუსაბუთებელი უარი ღონისძიებაში მონაწილეობის შესახებ მის წინადადებაზე“ და მეორე მხრივ 3 და 4 ოქტომბერს საკონსტიტუციო სასამართლოში მისი იმპიჩმენტის თაობაზე ჩანიშნული წარდგინების განხილვა შეუძლებელს ხდის მისი წარმომადგენლობითი მოვალეობის შესრულებას.

,,თქვენო უდიდებულესობავ,

გულწრფელ გულისტკივილს გამოვხატავ იმის გამო, რომ მიწევს უარის თქმა ჩემი ქვეყნისათვის როგორც კულტურული, ისე პოლიტიკური თვალსაზრისით უდიდესი მნიშვნელობის მქონე ღონისძიების, „ევროპალია საქართველოს“ ინაუგურაციაში თქვენთან ერთად მონაწილეობაზე. ევროპის გულში საქართველოს ევროპული კულტურისა და იდენტობის წარდგენა სწორედ იმ დროს, როდესაც წყდება ისეთი საკვანძო საკითხი, როგორიც არის ჩვენთვის ევროკავშირის წევრობის კანდიდატი ქვეყნის სტატუსის მინიჭება, ჩვენ გვაძლევს შესაძლებლობას, ევროპელ ხალხებსა და ლიდერებს გადავცეთ ერთმნიშვნელოვანი გზავნილი, რომელიც არის ევროპულ ოჯახში ჩვენი ინტეგრაციის სურვილი.

თქვენო უდიდებულესობავ, გთხოვთ, მერწმუნოთ, რომ გულწრფელი სურვილი მქონდა საქართველო უმაღლეს დონეზე ყოფილიყო წარმოდგენილი ჩვენი ორი ქვეყნის ურთიერთობებში ახალი მნიშვნელოვანი ფურცლის გადაშლისას, ისე, როგორც 2021 წლის 21 იანვარს ჩვენი შეხვედრისას შევთანხმდით.

სამწუხაროდ, ჩემი ნებისგან სრულიად დამოუკიდებელი ორი მიზეზი – ერთი მხრივ, მთავრობის დაუსაბუთებელი უარი ღონისძიებაში მონაწილეობის შესახებ ჩემს წინადადებაზე, მეორე მხრივ, სწორედ 3 და 4 ოქტომბერს ჩანიშნული საკონსტიტუციო სასამართლოში ჩემი იმპიჩმენტის თაობაზე წარდგინების განხილვა – აბსოლუტურად შეუძლებელს ხდის შევასრულო ჩემი წარმომადგენლობითი მოვალეობა ამ მნიშვნელოვან ღონისძიებაზე.

თქვენო უდიდებულესობავ, მსურს გულწრფელი ბოდიში მოვიხადო ჩემგან დამოუკიდებელი, გაუთვალისწინებელი ფაქტორების გამო, რომლებიც, სამწუხაროდ, ბოლო წამს აუცილებელს ხდის იმ საპროტოკოლო გადაწყვეტილებების შეცვლას, რომლებზეც დიდი ხანია მიმდინარეობს მუშაობა. მეორე მხრივ, მსურს ჩემი და ქართველი ხალხის სახელით მოგახსენოთ მადლობა ევროპის ცენტრში ქართული კულტურის ესოდენ დიდი პატივით მიღებისათვის. ყველაფრის მიუხედავად, მტკიცედ მჯერა, რომ ეს მოვლენა გადაიქცევა საქართველოსა და ბელგიის სამეფოს ურთიერთობის ისტორიის განსაკუთრებულ ფურცლად.

იმედი მაქვს, რომ თქვენი უდიდებულესობა თქვენი ქვეყნის კეთილდღეობისათვის კიდევ მრავალ წელს იღვაწებს. დიდ წარმატებას ვუსურვებ „ევროპალია საქართველოს“ და მადლობას ვუხდი თქვენს უდიდებულესობას იმ დიდი წვლილისათვის, რომელიც სამეფო ოჯახსა და ბელგიის მხარეს ამ უმნიშვნელოვანესი ღონისძიების ორგანიზებაში შეაქვთ. თქვენო უდიდებულესობავ, გთხოვთ, მიიღოთ თქვენ მიმართ ჩემი უდიდესი პატივისცემა,”-ნათქვამია წერილში.

8 წლის განმავლობაში 1200 მდე წარმატებული სტუდენტი დავაფინანსეთ, ამაში სახელმწიფომ 42 მილიონი ლარის ინვესტიცია განახორციელა, – ამის შესახებ საქართველოს პრემიერ-მინისტრმა ირაკლი ღარიბაშვილმა განათლების საერთაშორისო ცენტრის კურსდამთავრებულებთან შეხვედრაზე განაცხადა.

მთავრობის მეთაურის თქმით, პროექტის მიზანია, ქვეყანაში შეიქმნას ძლიერი, განათლებული ადამიანური კაპიტალი, რომელიც ქვეყნის გასაძლიერებლად მიემართება.

„შედეგები, ვფიქრობ, არის შთამბეჭდავი ვინაიდან 8 წლის განმავლობაში ჩვენ დავაფინანსეთ 1200 მდე წარმატებული, წარჩინებული სტუდენტი. ამაში სახელმწიფომ 42 მილიონი ლარის ინვესტიცია განახორციელა. შერჩეული გვქონდა და გვაქვს საუკეთესო უნივერსიტეტები მთელს მსოფლიოში და მე მიხარია, რომ ამდენი წარმატებული ადამიანის წინაშე გამოვდივარ სიტყვით. მე მინდა ყველას მადლობა გადაგიხადოთ. მინდა გისურვოთ ყველას წარმატებები. რა თქმა უნდა, ეს პროექტი უნდა გაგრძელდეს და ამის თაობაზე ახალ მინისტრთან უკვე გვაქვს საუბარი. მინდა ასევე სიამაყით აღვნიშნო, რომ ახალ მინისტრს აქვს ძალიან კარგი ხედვები, ახალი რეფორმების დაწყებას აპირებს იგივე უმაღლესი განათლების სფეროში და სხვა მიმართულებითაც. ყველა მიმართულებით აქვს ძალიან კარგი იდეები და ხედვები, რომელსაც ახლა რა თქმა უნდა, გაგიზიარებთ. ვფიქრობ, შთამბეჭდავი იყო ეს 8 წელი, მაგრამ მიმაჩნია, რომ კიდევ უფრო მეტად უნდა გავაფართოვოთ, მასშტაბები შეიძლება გაიზარდოს. მთავარი იდეა რაშიც მდგომარეობს, არის ის, რომ ქვეყანაში შეიქმნას ძლიერი, განათლებული ადამიანური კაპიტალი. მთავარი თემა არის, რომ ადამიანური კაპიტალი შევქმნათ ქვეყანაში და რაც მთავარია, ეს ადამიანური კაპიტალი უნდა მივმართოთ ასევე ჩვენი ქვეყნისთვის, ჩვენი ქვეყნის გასაძლიერებლად, მთავარი იდეა სწორედ ამაში მდგომარეობდა. იცით, რომ ყოველთვის მზად ვართ დავეხმაროთ, მხარში დავუდგეთ ჩვენს ახალგაზრდებს, წარჩინებულ სტუდენტებს. მე არაერთხელ აღმინიშნავს, რომ სახელმწიფოს პირდაპირი მოვალეობა და ვალდებულება არის, რომ მაქსიმალურად დავეხმაროთ ახალგაზრდებს და კიდევ ერთხელ მინდა ვთქვა, რომ რა თქმა უნდა, ეს არ არის ერთადერთი შესაძლებლობა, ჩვენ გვაქვს კიდევ სხვა იდეები, რომელზეც მინდა, რომ ახლა გესაუბროთ, დახურულ ფორმატში. რაც მთავარია, მინდა გთხოვოთ, რომ დისკუსია იყოს ჩვეულებისამებრ, ტრადიციისამებრ, ღია, აბსოლუტურად გამჭვირვალე და გულწრფელი და კიდევ ერთხელ მინდა მადლობა გადაგიხადოთ და ყველას წარმატება მინდა გისურვოთ. თქვენი ცოდნა ჩვენი სიძლიერეა. აი ეს კაპიტალი, რაც იქმნება, ქვეყანას უნდა გამოადგეს საბოლოო ჯამში, ჩვენ ქვეყნის საკეთილდღეოდ უნდა გამოვიყენოთ. სწორი გაგებით ვამბობ ამ სიტყვას, რა თქმა უნდა. კიდევ ერთხელ მადლობა მობრძანებისთვის”,- განაცხადა ირაკლი ღარიბაშვილმა.

საზოგადოებამ დაინახა, რომ გეგმა, რაზეც უსაფრთხოების სამსახური საუბრობდა, რეალურია და რადიკალურ ძალებს, რადიკალურ ოპოზიციას, მათ მხარდამჭერებს თუ დამფინანსებლებს რეალურად სურდათ და ახლაც სურთ ქვეყანაში არეულობის, დესტაბილიზაციის მოწყობა, – ამის შესახებ საპარლამენტო უმრავლესობის წევრმა, არჩილ თალაკვაძემ განაცხადა.

თალაკვაძის თქმით, ქვეყანაში დესტაბილიზაციის მოწყობის შესაძლებლობა არავის მიეცემა.

„როგორც ჩანს, სახელმწიფო უსაფრთხოების სამსახურის მიერ ჩატარებული პირველი ბრიფინგი და მასში გაჟღერებული ინფორმაცია, რომელიც ჩვენ მაშინვე ჩავთვალეთ საყურადღებოდ და საგანგაშოდ, რეალური იყო, კონკრეტულ ფაქტებს ეყრდნობოდა. კიდევ ერთი ინფორმაცია გახდა ცნობილი და გასაჯაროვდა დღეს. საზოგადოებამ დაინახა, რომ გეგმა, რაზეც უსაფრთხოების სამსახური საუბრობდა, რეალურია და რომ მართლაც რადიკალურ ძალებს, რადიკალურ ოპოზიციას, მათ მხარდამჭერებს თუ დამფინანსებლებს რეალურად სურდათ და ახლაც სურთ ქვეყანაში არეულობის, დესტაბილიზაციის მოწყობა. კონკრეტულად სავარაუდო პირები არიან გამოვლენილი, ვინც ამზადებდნენ ახალგაზრდებს არეულობისთვის და სურდათ მათი გამოყენება დესტაბილიზაციისთვის, რაც, ბუნებრივია, არის უსაფრთხოების წინააღმდეგ, საქართველოს კონსტიტუციის და კანონის პრინციპების წინააღმდეგ. ამიტომ თითოეულ ასეთ მცდელობას, რომელსაც პროტესტი გადააქვს უკვე ძალადობაში, რომელსაც გამოხატვის თავისუფლება გადააქვს არაკანონიერ სივრცეში, რა თქმა უნდა, ექნება კანონიერი პასუხი სახელმწიფოს მხრიდან. არავის მივცემთ უფლებას და ვერავინ შეძლებს, რომ ჩვენი მოქალაქეების უსაფრთხოებას და მომავალს ძირი გამოუთხაროს, ქვეყანაში მოაწყოს დესტაბილიზაცია.

ბუნებრივია, ეს იმ ძალების მიზნებში შედის, რომლებიც არჩევნებში არიან ხელმოცარულები, წარუმატებლები და ახლა სურთ, საარჩევნო ყუთის გვერდის ავლით როგორმე ხელისუფლებაში დაბრუნდნენ. ეს შეუძლებელია და ამას ვერავინ გააკეთებს იმ მეთოდებით, რომლებზეც არის საუბარი და უკვე ვნახეთ კონკრეტული მტკიცებულებები. ჩვენ აუცილებლად გვექნება სათანადო რეაგირება თითოეულ შემთხვევაზე. განცხადებებიც, რიტორიკაც, ის პროექტები თუ ტრენინგ-სემინარები, რასაც ატარებენ, ყველაფერი ადასტურებს, რომ რადიკალური ოპოზიცია და მათი მხარდამჭერები მართლაც გეგმავდნენ და მათ გეგმებში შედის არეულობა, დესტაბილიზაცია.

ჩემი შეფასებით, „კანვასმა“ ამ ყველაფერს უნდა უპასუხოს სასამართლოში, სადაც გამოძიების კონკრეტული მტკიცებულებები იქნება წარდგენილი. რაც უკვე საჯაროდ ვნახეთ, ნამდვილად შემაშფოთებელი და საყურადღებოა, როდესაც ჩამოყვანილი ადამიანები პირდაპირ ახალგაზრდებს ასწავლიდნენ, ძალადობრივი მეთოდებით როგორ გამოიწვიონ ქვეყანაში დესტაბილიზაცია. ბუნებრივია, ეს ყველაფერი მიმართულია ჩვენი ქვეყნისა და საზოგადოების უსაფრთხოების წინააღმდეგ და არავითარი კავშირი არ აქვს ამას თავისუფლებასთან, ევროპულ მომავალთან, არც მშვიდობასთან. ამიტომ ნურავის ექნება ილუზია, გამოიყენებს ახალგაზრდებს, სხვადასხვა ჯგუფს იმ დესტრუქციული გეგმებისთვის, რომლებიც ძირს უთხრიდა ჩვენს ქვეყანას წარსულში, რაზეც არაერთხელ ჩვენ პრინციპული რეაგირება გვქონდა და დღესაც გვექნება ძალიან პრინციპული რეაგირება“, – განაცხადა არჩილ თალაკვაძემ.

თალაკვაძე ამბობს, რომ საქართველოში პოლიტიკური ასპარეზისთვის არის არჩევნები და საარჩევნო ყუთის გვერდის ავლით ვინც ცდილობს, თავის მიზანს მიაღწიოს, ის ქვეყნისა და მოქალაქეების ინტერესების წინააღმდეგ მოქმედებს.

სახელმწიფო უსაფრთხოების სამსახურში გამართულ ბრიფინგზე დღეს განაცხადეს, რომ ორგანიზაცია „კანვასის“ წევრები სასტუმროში შეხვდნენ NGO-ებს, სამოქალაქო აქტივისტებს, გაიმართა დიდი ჯგუფის გადამზადება, რომელმაც გადამწყვეტი როლი უნდა შეასრულოს ხელისუფლების დამხობის პროცესში. მათივე ცნობით, 26-29 სექტემბერს USAID-ის დაფინანსებით ჩატარებულ კონფერენციას ორგანიზება „კანვას – საქართველომ“ და აღმოსავლეთ-დასავლეთ მართვის ინსტიტუტმა გაუწიეს. სუს-მა „კანვასის“ წარმომადგენლების მიმართ ჩატარებული ფარული საგამოძიებო მოქმედების შედეგად მოპოვებული მტკიცებულებების ნაწილი გამოაქვეყნა.

საქართველოს პრემიერ-მინისტრი ირაკლი ღარიბაშვილი სლოვენიის რესპუბლიკის ეროვნული ასამბლეის პრეზიდენტს, ურშკა კლაკოჩარ ზუპანჩიჩს შეხვდა, – ამის შესახებ ინფორმაციას მთავრობის ადმინისტრაცია ავრცელებს.

მათივე ინფორმაციით, მთავრობის ადმინისტრაციაში გამართულ შეხვედრაზე ორი ქვეყნის წარმატებულ თანამშრომლობასა და მეგობრულ ურთიერთობებზე იმსჯელეს. როგორც პრემიერ-მინისტრმა აღნიშნა, მისასალმებელია ბოლო დროს ორმხრივი კონტაქტებისა და მაღალი დონის ვიზიტების გააქტიურება, რაც მნიშვნელოვან წვლილს შეიტანს თანამშრომლობის წინსვლაში.

საუბარი შეეხო საქართველოს ევროინტეგრაციის პროცესს და ამ გზაზე ჩვენი ქვეყნის მიერ მიღწეულ მნიშვნელოვან პროგრესს. ირაკლი ღარიბაშვილმა აღნიშნა, რომ საქართველო აფასებს ევროპულ და ევროატლანტიკურ სტრუქტურებში საქართველოს ინტეგრაციის პროგრესის მიმართ სლოვენიის მხარდაჭერას. მისი თქმით, ევროკავშირში ინტეგრაცია ქართველი ხალხის არჩევანი და საქართველოს მთავრობის საგარეო პოლიტიკის უმთავრესი პრიორიტეტია. ამ მიზნის მისაღწევად კი ხელისუფლება ყველაფერს აკეთებს. ირაკლი ღარიბაშვილმა ურშკა კლაკოჩარ ზუპანჩიჩს ევროკავშირის 12 რეკომენდაციის შესრულების შესახებ მიაწოდა ინფორმაცია და იმედი გამოთქვა, რომ საქართველოს მომავალშიც ექნება სლოვენიის რესპუბლიკის მტკიცე პოლიტიკური და პრაქტიკული მხარდაჭერა, რაც დაეხმარება საქართველოს, ევროკავშირში გაწევრიანების შემდეგ ეტაპზე გადავიდეს.

ირაკლი ღარიბაშვილმა ურშკა კლაკოჩარ ზუპანჩიჩს საქართველოს სუვერენიტეტისა და ტერიტორიული მთლიანობის მხარდაჭერისათვის მადლობა გადაუხადა. მანვე სლოვენიის რესპუბლიკას გაეროს უშიშროების საბჭოს არამუდმივ წევრად არჩევა მიულოცა.

შეხვედრას ესწრებოდნენ საქართველოში სლოვენიის რესპუბლიკის ელჩის მოვალეობის შემსრულებელი − ბლაჟ მასლე; სლოვენიის რესპუბლიკის ეროვნული ასამბლეის წევრები − მატეი ტონინი და ალექსანდერ პროსენ კრალი; სლოვენიის რესპუბლიკის ეროვნული ასამბლეის გენერალური მდივანი − ურშულა ზორე თავჩარი; საქართველოს მთავრობის ადმინისტრაციის უფროსი − რევაზ ჯაველიძე და საქართველოს საგანგებო და სრულუფლებიანი ელჩი სლოვენიის რესპუბლიკაში − ირაკლი კოპლატაძე.

დღეს ჩვენი ერთ-ერთი მხარდაჭერის პროექტის წინააღმდეგ გაჟღერებული ბრალდებები მცდარია და არსებითად არასწორად ასახავს საქართველოსთვის ჩვენი დახმარების მიზნებს, USAID-ი საქართველოს მოსახლეობას 1992 წლიდან უჭერს მხარს, როგორც ყოველთვის, ეს მხარდაჭერა გამჭვირვალეა და მივესალმებით ნებისმიერ შესაძლებლობას, განვიხილოთ ყველა შეშფოთება, რომელიც მთავრობას შეიძლება ჰქონდეს, – ამის შესახებ საქართველოში აშშ-ის საელჩოს მიერ გავრცელებულ განცხადებაშია აღნიშნული.

როგორც საელჩოს განცხადებაშია ნათქვამი, მოქალაქეების უფლება, თავისუფლად გამოხატონ თავიანთი აზრი და მისწრაფებები ნებისმიერი დემოკრატიის საფუძველი და ის ღირებულებაა, რომელსაც ორივე ქვეყანა იზიარებს.

„ორ წელზე მეტია, USAID-ი თანამშრომლობს CANVAS-თან, რომ დაეხმაროს ადამიანებს ხმა აიმაღლონ იმ საკითხებზე, რომელიც მათი ოჯახებისა და საზოგადოებისთვის მნიშვნელოვანია. CANVAS-თან თანამშრომლობით ტრენინგები ჩაუტარდათ დედებს, რომლებიც ბავშვთა ონკოლოგიური დაავადებების მკურნალობის გაუმჯობესებას ითხოვენ და იმ პირებს, რომლებიც ხანდაზმული მოქალაქეების უფლებებს უწევენ ადვოკატირებას. მიუხედავად დაუსაბუთებელი თავდასხმებისა, კვლავაც მხარს დავუჭერთ იმ ქართულ ორგანიზაციებს, რომელიც ეხმარება ხალხს, დაიცვან მათ მიერ განსაზღვრული და დამსახურებული მომავალი და მათთვის საქართველოს კონსტიტუციით გარანტირებული ფუნდამენტური უფლებები“, – ნათქვამია განცხადებაში.

სახელმწიფო უსაფრთხოების სამსახურში გამართულ ბრიფინგზე დღეს განაცხადეს, რომ ორგანიზაცია „კანვასის“ წევრები სასტუმროში შეხვდნენ NGO-ებს, სამოქალაქო აქტივისტებს, გაიმართა დიდი ჯგუფის გადამზადება, რომელმაც გადამწყვეტი როლი უნდა შეასრულოს ხელისუფლების დამხობის პროცესში. მათივე ცნობით, 26-29 სექტემბერს USAID-ის დაფინანსებით ჩატარებულ კონფერენციას ორგანიზება „კანვას – საქართველომ“ და აღმოსავლეთ-დასავლეთ მართვის ინსტიტუტმა გაუწიეს. სუს-მა „კანვასის“ წარმომადგენლების მიმართ ჩატარებული ფარული საგამოძიებო მოქმედების შედეგად მოპოვებული მტკიცებულებების ნაწილი გამოაქვეყნა.