პირველი დეზინფორმაცია, რომელსაც უნდა ვებრძოლოთ ქვეყანაში არის ის, რომ საქართველოს სახელმწიფო იხრება რუსეთისკენ და ის, რომ საქართველოს ჰყავს რუსული ხელისუფლება, თუმცა ეს არის წარუმატებელი დეზინფორმაცია და ამაზე მეტყველებს არჩევნების შედეგები, – ამის შესახებ ფრაქცია “ქართული ოცნების” თავმჯდომარის მოადგილემ “ღამის კურიერის” ეთერში განაცხადა.

ირაკლი ჩიქოვანის თქმით, მსგავსი დეზინფორმაციის ტირაჟირებას ცდილობს ოპოზიციური სპექტრი და მათთან ასოცირებული არასამთავრობო ორგანიზაციები.

“დღეს, საქართველო კანდიდატის სტატუსი მქონე სახელმწიფოა, რეკომენდაცია გვაქვს ჯერჯერობით. ესეც აჩვენებს, რომ კონკრეტულ შემთხვევაში რეზოლუციები კონკრეტული პოლიტიკური სუბიექტების მონდომების შედეგი იყო, რომლებშიც ბევრი სიცრუე ეწერა. როგორ ვენდოთ იმ რეზოლუციას, რომელშიც დავით კეზერაშვილი წარმოჩენილია ამ ქვეყანაში მედიის განმავითარებელ პერსონად ან, მისი ფინანსური რესურსები არის ისეთ რესურსები, რომელიც გამჭვირვალედ და სუფთად არის მოპოვებული, რაზეც წურბელასავით არის მიმჯდარი მთელი ოპოზიციური სპექტრი”,- განაცხადა ირაკლი ჩიქოვანმა.

“ქართული ოცნების” ერთ-ერთი ლიდერი მიხეილ სააკაშვილთან დაკავშირებითაც საუბრობს და აცხადებს, რომ მისი საკითხი აქტუალური რჩება მხოლოდ იმ კონტექსტში, თუ რა გადაწყვეტილებას მიიღებს სასამართლო იმ ბრალდებებთან მიმართებით, რომელზეც ჯერ კიდევ მიმდინარეობს სასამართლო პროცესი.

“ის გამოხმაურებები, რომელიც იყო საერთაშორისო მედიაში, ყველამ კარგად დავინახეთ, რომ კონკრეტული საფასურ გადახდილი კამპანიის ნაწილი იყო. ამ რეალობაში ვართ ჩვენ. მიხეილ სააკაშვილის დიეტით აცხოვრეს ლამის ერთი წელი სახელმწიფო როდესაც ამბობდნენ, რომ ეს ადამიანი საშინელ მდგომარეობაშია და მის სიცოცხლეს საფრთხე ემუქრება. ყველა კარგად ვხედავთ, რომ ამ ადამიანმა როდესაც ნორმალური ჭამა დაიწყო, ჩვეულებრივად გამოდის და საუბრობს სასამართლო პროცესებზე. ამიტომ, ეს არის მიმდინარე სასამართლო პროცესში და მხოლოდ ამ ნაწილში რჩება სააკაშვილი აქტუალური. მე, არ მესმის როგორ შეიძლება ვინმემ დააყენოს მიხეილ სააკაშვილის ფაქტორი არჩევნებში მნიშვნელოვან გარემოებად, როდესაც მის გარეშე ამ ქვეყანაში, ძალიან ბევრი არჩევნები ჩატარდა”, – განაცხადა ჩიქოვანმა.

ყველას ვულოცავ დღევანდელ დღეს, ვისაც გულწრფელად გაუხარდა ეს აღიარება, რომელიც დღეს საქართველომ ევროკომისიის მხრიდან მიიღო. ეს არის ბევრი ადამიანის შრომისა და ძალისხმევის შედეგი, რომელიც ბრიუსელმა აღიარა, – ამის შესახებ ევროპასთან ინტეგრაციის კომიტეტის თავმჯდომარემ მაკა ბოჭორიშვილმა გადაცემაში „იმედი LIVE“ განაცხადა.

„იმედი მაქვს, რომ დეკემბერში საქართველო უკვე ევროკავშირი წევრი ქვეყნებისგან მიიღებს მწვანე შუქს და ჩვენი ქვეყანა უკვე კანდიდატის სტატუსით გააგრძელებს ევროკავშირის წევრობისკენ სვლას. დღევანდელი გადაწყვეტილება ნამდვილად მნიშვნელოვანია აღიარებაა ჩვენი ქვეყნისთვის. ეს არის საქართველოს ისტორიაში ახალი ეტაპის დასაწყისი, რომელიც მომავალში აუცილებლად გაგრძელდება და ევროკავშირის წევრობით დასრულდება“, – აღნიშნა მაკა ბოჭორიშვილმა.

ნაციონალური მოძრაობის” წევრის, გიორგი ბარამიძის განცხადებით, ევროკომისიის მიერ საქართველოსთვის კანდიდატის სტატუსის მინიჭების რეკომენდაციის გაცემის მიმართულებით, ოპოზიციას დიდი წვლილი მიუძღვის და ეს პროცესი, წლების წინ, მიხეილ სააკაშვილის ხელმძღვანელობით “ნაციონალურმა მოძრაობამ” წამოიწყო.

როგორც გიორგი ბარამიძემ “ღამის კურიერის” ეთერში განმარტა, ევროპულ ოჯახში შესვლა მიხეილ სააკაშვილის იდეა იყო და “ნაციონალურმა მოძრაობამ” დაიწყო ამ საკითხებთან დაკავშირებით მოლაპარაკებები.

“ჩვენი წვლილი იყო კონსტრუქციული წინადადებების შეთავაზება, რომლებიც ამ რეჟიმმა უარყო. ყველა წინადადება, რომელიც მოდიოდა ოპოზიციიდან თუ ევროკავშირის მხარდამჭერი არასამთავრობო ორგანიზაციებიდან, ყველა ეს წინადადება იყო ერთმნიშვნელოვნად უკუგდებული, ყველაზე ითქვა, რომ ეს არის არასწორი და მოღალატეობრივი ნაბიჯი, ყველა ეს ორგანიზაცია გამოცხადებულია აგენტებად და ა.შ. შესაბამისად, ოპოზიციის, კერძოდ კი “ნაციონალური მოძრაობის” წვლილი მთელს ამ წარმატებაში არის ის, რომ “ნაციონალურმა მოძრაობამ” დაიწყო რეალური სვლა, პრეზიდენტ სააკაშვილის ხელმძღვანელობით და თქვენი მონა-მორჩილი გახლდით ამ პროცესის კოორდინატორი, ვიცე პრემიერ-მინისტრი. როდესაც ჩვენ დავიწყეთ მოლაპარაკებები თავისუფალ ვაჭრობასთან დაკავშირებით, ვიზებთან დაკავშირებით და ყველა იმ საკითხთან დაკავშირებით, რომელიც ჩვენთვის მნიშვნელოვანია, აღმოსავლეთ პარტნიორებთან დაკავშირებით. ეს საერთოდ მიხეილ სააკაშვილის იდეა იყო პოლონეთის საგარეო საქმეთა მინისტრისა და შვედეთის საგარეო საქმეთა მინისტრთან ერთად. ეს წვლილი შეიტანა ჩვენმა პარტიამ. მიხეილ სააკაშვილის ხელმძღვანელობით, ჩვენ შევქმენით თანამედროვე სახელმწიფო ინსტიტუტები, რაც საქართველოში არ არსებობდა. ეს რომ მიხეილ სააკაშვილს და ჩვენს გუნდს არ შეექმნა, ვერაფერზე ვერ ვილაპარაკებდით და ამ რეჟიმის დამსახურება არის ის, რომ ჩვენ დღეს ვზეიმობთ იმას, რომ მოგვცეს რეკომენდაცია იმისა, რომ კანდიდატის სტატუსი მივიღოთ და ვზეიმობთ იმას, რომ უკრაინასა და მოლდოვას ერთი საფეხურით ჩამოვრჩებით, რადგან წინა წელს ყველაფერი გააკეთა იმისათის, რომ პროპაგანდა ეწარმოებინა ევროკავშირის წინააღმდეგ”, – განაცხადა ბარამიძემ.

პრეზიდენტმა თუ მოახერხა და საზეიმო შეკრება მოაწყო, კანცელარიასთან ვერ მოხერხდებოდა, ან პარლამენტის წინ?! – მაგრამ როგორც ჩანს, არ ეზეიმება ღარიბაშვილს და „ქართულ ოცნებაში“ ალბათ, ბევრი დამწუხრებულია დადებითი რეკომენდაცია რომ მივიღეთ, – ამის შესახებ „მოქალაქეების“ ლიდერმა ალეკო ელისაშვილმა მედიასთან განაცხადა.

მისი თქმით, თუ რამე შემაფერხებელი იყო ევროინტეგრაციის გზაზე, ეს იყო და არის „ქართული ოცნება“ და მისი ლიდერების განცხადებები.

„ძალიან ზუსტად ხედავენ ვითარებას ქვეყანაში, ძალიან ზუსტად ხედავენ, სად იტყუება „ქართული ოცნება, რა არის გასაკეთებელი და ჩვენ ასე მზამზარეულზე არ მოგვცეს ეს დადებითი რეკომენდაცია, მკაფიო დათქმები გაგვიკეთეს და ევროკავშირმა გვითხრა, რომ ისინი თავს არ იტყუებენ.

ორი მთავარი რამის გამო მოგვცეს დღეს ჩვენ დადებითი რეკომენდაცია – პირველ რიგში, ეს არის ჩვენ ქვეყნის თავგანწირვა და მეორე არის რუსეთის ფაქტორი, რადგან იცოდნენ, რომ დადებითი რეკომენდაცია, რომ არ მოეცათ შეგვატოვებდნენ ამ გამძვინვარებულ რუსეთს, რომელიც ისედაც ვხედავთ როგორ გვექცევა, ხელაღებით ხოცავს და ფეხქვეშ თელავს ჩვენს ღირსებას.

თუ რამე შემაფერხებელი იყო და რჩება შემაფერხებლად ეს არის „ქართული ოცნება“. პრესკონფერენციაზე გახსოვთ, ალბათ, როგორ იქცეოდა ღარიბაშვილი, ბორელს კინაღამ თითი ატაკა. დავალება მოგცეს, 12 რეკომენდაცია დაგავალეს 9 არ შეასრულე და მაინც ჩვენკენ გადმოდგეს ნაბიჯი, რადგან ჩვენს დამსახურებას ხედავს ამ ხნის განმავლობაში. პრეზიდენტმა თუ მოახერხა და საზეიმო შეკრება მოაწყო, კანცელარიასთან ვერ მოხერხდებოდა, ან პარლამენტის წინ?! – მაგრამ როგორც ჩანს არ ეზეიმება ღარიბაშვილს და „ქართულ ოცნებაში“ ბევრი, ალბათ, დამწუხრებულია დადებითი რეკომენდაცია რომ მივიღეთ. რომ ყოფილიყო კანცელარიასთან შეკრება აუცილებლად მივიდოდი. რა მნიშვნელობა აქვს „ქართულ ოცნებას“ და მათ მხარდამჭერებს ხომ არ მიუღიათ დადებითი რეკომენდაცია, ყველამ მივიღეთ. ესეც კი აჩვენებს ჩვენი ხელისუფლების დამოკიდებულებას ევროპისადმი“, – განაცხადა ელისაშვილმა.

“როდესაც 2020 წელს ჩვენ დავაანონსეთ, რომ აუცილებლად დავწერდით განაცხადს და გავხდებოდით ევროკავშირის სრულფასოვანი წევრები, მაშინ ოპოზიციიდან მხოლოდ დაცინვა და ქილიკი გვესმოდა. დღესაც იგივე ხდება. მგონი, ჩვენზე უტიფარი ოპოზიცია არავის ჰყავს“, – ამის შესახებ დიასპორისა და კავკასიის საკითხთა კომიტეტის თავმჯდომარე ბექა ოდიშარიამ სატელევიზიო ეთერში განაცხადა.

ბექა ოდიშარიას თქმით, ოპოზიციის გარკვეული ნაწილი ახალ ნარატივს ქმნის, რომ თითქოს, „ქართულ ოცნებას“ ეწყინა კანდიდატის სტატუსზე რეკომენდაციის გაცემა. მისივე განცხადებით, ოპოზიცია ხელისუფლებას არ აცდიდა სტატუსის მისაღებად მუშაობას, ახლა კი, როდესაც შედეგი მიღწეულია, ოპოზიცია ცდილობს ეს გამარჯვება საკუთარ თავზე მიიწეროს. “მთელი წელი პრაქტიკულად გვბომბავდნენ ხელისუფლებას და ხალხს და ამკვიდრებდნენ ამ სულელურ ნარატივს, რომ ვითომ, ხალხი და ხელისუფლება სხვადასხვაა. კონსტიტუცია მაინც წაიკითხონ. მესამე მუხლში წერია, რომ სახელმწიფო ხელისუფლების წყარო არის ხალხი და ხალხი თავის ძალაუფლებას ახორციელებს თავის წარმომადგენლებით. ჩვენ ვართ ხალხის წარმომადგენლები.

ოპოზიციამ რაც ჩაატარა მთელი წლის განმავლობაში, მე მგონი ასე არ უმტრია ჩვენი ქვეყნისათვის არავის. დღეს დადგა „კაპიტანი“ გიგაური და სალომე სამადაშვილი და თქვეს, რომ ჩვენი მონაპოვარი არისო, ვულოცავ მათაც, მაგრამ ხალხს ალბათ სასაცილოდაც არ ჰყოფნის“, – განაცხადა ბექა ოდიშარიამ. მისივე თქმით, ჯერ კიდევ არის გარკვეული აქტივობები განსახორციელებელი იმისათვის, რომ საქართველო ევროკავშირის სრულფასოვანი წევრი გახდეს და ამ მიმართულებით საქართველოს პრემიერ-მინისტრი, საგარეო საქმეთა სამინისტრო, პარლამენტი და სხვა უწყებები, აქტიურად გააგრძელებენ მუშაობას.