საქართველოს სახალხო დამცველი მოუწოდებს ხელისუფლებას, ყველა საერთაშორისო მექანიზმის გამოყენებითა და საერთაშორისო თანამეგობრობის ჩართულობით, გააძლიეროს ზეწოლა საოკუპაციო რეჟიმზე ოკუპირებულ რეგიონებში მცხოვრები ადამიანების უფლებების დასაცავად – ამავდროულად, ძალისხმევა არ დაიშუროს ხელოვნურად გაყოფილ საზოგადოებას შორის დიალოგის გაფართოებისა და გაძლიერებისკენ,- ამის შესახებ 2008 წლის აგვისტოს ომის 15 წლისთავთან დაკავშირებით საქართველოს სახალხო დამცველის მიერ გავრცელებულ განცხადებაშია აღნიშნული.

როგორც ომბუდსმენის განცხადებაშია აღნიშნული, შეიარაღებული კონფლიქტის შედეგებს დღემდე მწვავედ განიცდის ოკუპირებულ ტერიტორიაზე დარჩენილი და გამყოფი ხაზის მიმდებარედ მცხოვრები მოსახლეობა.

„რუსეთ-საქართველოს 2008 წლის აგვისტოს ომიდან 15 წელი გავიდა. შეიარაღებული კონფლიქტის შედეგებს დღემდე მწვავედ განიცდის ოკუპირებულ ტერიტორიაზე დარჩენილი და გამყოფი ხაზის მიმდებარედ მცხოვრები მოსახლეობა. 2008 წლის საომარი მოქმედებების შედეგად 27 582 იძულებით გადაადგილებული პირია რეგისტრირებული.

2008 წლის რუსეთ-საქართველოს აგვისტოს საომარი მოქმედებების შედეგად საქართველოს მხრიდან დაიღუპა თავდაცვის სამინისტროს 170 მოსამსახურე, 14 პოლიციელი, 224 სამოქალაქო პირი. დაჭრილ/დაშავებულ სამოქალაქო და სამხედრო პირთა რაოდენობა სულ შეადგენს 2 232-ს.

საოკუპაციო რეჟიმი დღემდე დაუსჯელს ტოვებს საქართველოს ოთხი მოქალაქის – დავით ბაშარულის, გიგა ოთხოზორიას, არჩილ ტატუნაშვილისა და ირაკლი კვარაცხელიას მკვლელობაზე პასუხისმგებელ პირებს.

კვლავ გრძელდება საოკუპაციო რეჟიმის მიერ ე.წ. საზღვრის უკანონო კვეთისთვის პირთა უკანონო დაკავებების პრაქტიკა. ოფიციალური მონაცემებით, 2008 წლიდან დღემდე საოკუპაციო რეჟიმმა ე.წ. საზღვრის უკანონო კვეთისთვის უკანონოდ დააკავა 3 439 ადამიანი მათგან, 1 935 ოკუპირებული აფხაზეთის, ხოლო 1 504 ოკუპირებული ცხინვალის მიმართულებით.

განსაკუთრებით ყურადსაღებია, ე.წ. საზღვრის კვეთისთვის ბოლო წლების განმავლობაში გახშირებული უკანონო პატიმრობები. დღეის მდგომარეობით, საქართველოს ოკუპირებულ ტერიტორიებზე უკანონო პატიმრობაში რჩება 9 მოქალაქე.

უკანონო ე.წ. ბორდერიზაციით, გამოწვეული საკუთრების უფლების დარღვევა ყოველდღიურ გამოწვევად რჩება საოკუპაციო ხაზის მიმდებარედ მცხოვრები მოსახლეობისათვის. საოკუპაციო რეჟიმი ცდილობს, ეს უკანონო პროცესი ე.წ. სახელმწიფო საზღვრის მოწყობად წარმოაჩინოს და ოკუპირებული რეგიონები ე.წ. დამოუკიდებელ სუბიექტებად დაამკვიდროს. 2008 წლიდან დღემდე, ოკუპირებული ცხინვალის რეგიონის მიმართულებით რუსეთის საოკუპაციო ძალების მიერ 56 კმ-ზე მეტი სიგრძის მავთულხლართები, ღობეები და სხვადასხვა ხელოვნური ბარიერია გავლებული, ხოლო ოკუპირებული აფხაზეთის მიმართულებით ხელოვნური ბარიერების სიგრძე 49 კმ-ს აღემატება.

ოკუპირებულ ტერიტორიებზე კვლავ ფიქსირდება ეთნიკურად ქართველი მოსახლეობის მიზანმიმართული დისკრიმინაცია და სხვადასხვა უფლებების შელახვა. აღნიშნულთა შორისაა, თავისუფალი გადაადგილების შეზღუდვა, მშობლიურ ენაზე განათლების ხელმისაწვდომობის აკრძალვა, დე ფაქტო დოკუმენტაციის გაცემის შეზღუდვა, სიცოცხლის უფლების ხელყოფა, ჯანდაცვის სერვისებზე და სხვა საარსებო წყაროებზე ხელმისაწვდომობა.

საქართველოს სახალხო დამცველი მოუწოდებს საქართველოს ხელისუფლებას, ყველა საერთაშორისო მექანიზმის გამოყენებითა და საერთაშორისო თანამეგობრობის ჩართულობით, გააძლიეროს ზეწოლა საოკუპაციო რეჟიმზე ოკუპირებულ რეგიონებში მცხოვრები ადამიანების უფლებების დასაცავად. ამავდროულად, ძალისხმევა არ დაიშუროს ხელოვნურად გაყოფილ საზოგადოებას შორის დიალოგის გაფართოებისა და გაძლიერებისკენ.

ოკუპირებულ ტერიტორიებზე ჩადენილი ადამიანის უფლებების დარღვევების გამო პასუხისმგებლობა ეკისრება რუსეთის ფედერაციას, როგორც ეფექტური კონტროლის განმახორციელებელ სახელმწიფოს. ამასთან დაკავშირებით აღსანიშნავია ადამიანის უფლებათა ევროპული სასამართლოს 2021 წლის 21 იანვარს მიღებული გადაწყვეტილება საქმეზე საქართველო რუსეთის წინააღმდეგ II , რომლითაც სასამართლომ ოკუპირებული ცხინვალის და აფხაზეთის რეგიონში, რუსეთის მიერ განგრძობადად ეფექტური კონტროლის განხორციელების ფაქტი დაადგინა. ასევე, 2023 წლის 28 აპრილის გადაწყვეტილება , რომლითაც რუსეთის ფედერაციას სამართლიანი დაკმაყოფილების ფარგლებში საქართველოსთვის თანხის გადახდა დაეკისრა“,- ნათქვამია სახალხო დამცველის განცხადებაში.

18 გარდაცვლილი, 14 იდენტიფიცირებული და 16 დაკარგული – ასეთია 7 აგვისტოს 10 საათის მონაცემებით შოვში დატრიალებული ტრაგედიის შედეგები.

სტიქიის ეპიცენტრია კოტეჯების ტერიტორია, სადაც მაშველებმა ყველაზე მეტ ცხედარს მიაგნეს. სამძებრო სამუშოები უწყვეტად გრძელდება. ადგილზე მუშაობს ცოცხალი ძალა და მძიმე ტექნიკა.

შოვში მეწყერი 3 აგვისტოს ჩამოწვა.

სტიქიის ზონაში, მთელი ღამის განმავლობაში, სპეციალური განათებებით, უწყვეტ რეჟიმში მიმდინარეობდა ძებნა-შველის ღონისძიება.

საგანგებო სიტუაციების მართვის სამსახურის მეხანძრე-მაშველები ონის მუნიციპალიტეტში მეხუთე დღეა სამაშველო ღონისძიებას აწარმოებენ.

დილიდან მუშაობა განაახლა სასაზღვრო პოლიციის ორმა ვერტმფრენმა.

სამუშაოებში ჩართულნი არიან პოლიციის დანაყოფები, საგანგებო სიტუაციების მართვის სამსახურის კინოლოგთა ჯგუფი, თავდაცვის სამინისტროს და ინფრასტრუქტურის სამინისტროს საავტომობილო გზების დეპარტამენტის თანამშრომლები. ადგილზე მუშაობს დრონები და სპეცტექნიკა.

მაშველების მიერ ამ დროისთვის 18 ცხედარია ნაპოვნი.

საქართველოში გლოვის დღეა.

საქართველოს პრემიერ-მინისტრის გადაწყვეტილებით, 3 აგვისტოს, ონის მუნიციპალიტეტში, კურორტ შოვში მომხდარი სტიქიური უბედურების შედეგად დაღუპულთა ხსოვნის პატივსაცემად 7 აგვისტო გლოვის დღედ გამოცხადდა.

გლოვის დღესთან დაკავშირებით მთავრობის ადმინისტრაციის შენობასა და საქართველოს მთელ ტერიტორიაზე სახელმწიფო დროშები დაეშვა.

მთავრობის ადმინისტრაციის ინფორმაციით, ამასთან, სახელმწიფო დროშები დაეშვება 8 აგვისტოს 00:00 საათიდან 9 აგვისტოს 00:00 საათამდე საქართველოს აფხაზეთისა და ცხინვალის რეგიონების უკანონო ოკუპაციის მიზნით რუსეთის ფედერაციის მიერ საქართველოში განხორციელებული ფართომასშტაბიანი სამხედრო ინტერვენციის შედეგად დაღუპულთა ხსოვნის პატივის მიგების ნიშნად.

სახელმწიფო დროშები დაშვებულია ასევე შინაგან საქმეთა სამინისტროს ყველა ადმინისტრაციულ შენობაზე.

“შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველები 24 საათიან რეჟიმში აგრძელებენ სტიქიის დროს დაკარგული ადამიანების ძებნა-შველის ღონისძიებას”, – ნათქვამია შს სამინისტროს მიერ გავრცელებულ ინფორმაციაში.

გლოვის დღესთან დაკავშირებით, სახელმწიფო დროშა ასევე დაეშვა საქართველოს პარლამენტის შენობაზე.

საქართველოს მთელ ტერიტორიაზე 7 აგვისტოს 00:00 საათიდან 8 აგვისტოს 00:00 საათამდე სახელმწიფო დროშები დაშვებული იქნება.

შოვში მეწყერი 3 აგვისტოს ჩამოწვა. ამ დროისთვის არსებული ოფიციალური მონაცემებით, სტიქიის შედეგად 18 ადამიანია დაღუპული.

ვერძი
ეს დღე ცვლილებებთან და ცხოვრების ახალ ეტაპთან ასოცირდება. სავარაუდოდ, ხასიათიც შეგეცვლებათ – უფრო სერიოზული, პასუხისმგებლიანი გახდებით და ღირსეულად შეაფასებთ როგორც საკუთარ თავს, ისე გარშემომყოფებს. შეეცადეთ, ადეკვატურად შეაფასოთ საკუთარი თავი, გარშემომყოფები და ყველაფერი, რაც თქვენს ცხოვრებაში ხდება.

კურო
მშვიდი, ზომიერი პერიოდი გაქვთ, ყოველგვარი ნერვიულობის გარეშე. მეორე ნახევართან ურთიერთობა სინაზითა და სითბოთი იქნება აღსავსე. ვარსკვლავები გირჩევენ, უფრო მეტი დრო დაუთმოთ ოჯახს, გაიხსენეთ ნათესავები, რომლებიც ქალაქგარეთ ცხოვრობენ. მათთან ურთიერთობა წარმოუდგენელ სარგებელს მოგიტანთ.

ტყუპები
ამ დღეს რთულ საკითხებს მარტივად გადაჭრით და ახალ წამოწყებებსაც წარმატებით გაართმევთ თავს. თუკი მივლინებაში მოგიწევთ წასვლა, უარი არ თქვათ, რადგან ეს მივლინება თქვენს საქმიანობას კიდევ უფრო წარმატებულს გახდის. სწრაფი ფიქრისა და გადაწყვეტილების მომენტალურად მიღების ნიჭი გაქვთ. დაელოდეთ ახალ შემოთავაზებას, რომელიც თქვენს საქმიანობას კიდევ უფრო მაღალ დონეზე აიყვანს.

კირჩხიბი
თუკი ცვლილებები გაშინებთ, მაშინ რუტინას ვერსად გაექცევით. საბოლოოდ, ზედმეტად მშვიდი დღე გელოდებათ. თუკი ყურადღებით არ იქნებით, შესაძლოა, შესანიშნავი შესაძლებლობა გაუშვათ ხელიდან. როგორც კი შანსი გამოგიჩნდებათ, აიღეთ ტაიმ-აუტი. მოშორდით საქმეებს, დაისვენეთ, იფიქრეთ მომავალზე და გააანალიზეთ წარსული – ეს ყველაზე გონივრული საქციელი იქნება თქვენგან.

ლომი
კომუნიკაციის ფართო სპექტრი გაქვთ, რომლის დახმარებითაც საჭირო ინფორმაციას მიიღებთ და, შესაბამისად, სწორ გადაწყვეტილებასაც. თუკი შუამავლის როლში აღმოჩნდებით, თქვენს მოვალეობას იდეალურად შეასრულებთ. საყვარელ ადამიანთან ურთიერთობა ჰარმონიული იქნება. დაიწყეთ სერიოზული საოჯახო პრობლემების განხილვა და შეეცადეთ, ნებისმიერი გაუგებრობა მშვიდობიანი გზით დაასრულოთ. ოპონენტების მხრიდან წამოსული წინააღმდეგობა შეარბილეთ. ამის უნარი ნამდვილად შეგწევთ.

ქალწული
შეგიძლიათ, დინების საწინააღმდეგოდ გაცუროთ. ამგვარად, რთული სიტუაციიდან გამოსავალს იპოვით. არ გამოირიცხება ორგანიზმის მოწამვლა. ამიტომ, ნუ მიმართავთ კვებასთან დაკავშირებით ექსპერიმენტებს. გამოიჩინეთ ფსიქოლოგიური მდგრადობა, წინააღმდეგ შემთხვევაში ვერ შეძლებთ სუსტების მხარდაჭერას და მათ გადარწმუნებას იმ საკითხში, რაშიც ეჭვი გეპარებათ.

სასწორი
შესაძლოა, განწყობა გაგიფუჭდეთ და ჯანმრთელობის მხრივაც თავი შეუძლოდ იგრძნოთ. დაუფიქრებელი ქმედება ტრავმებს გამოიწვევს. ვარსკვლავები გირჩევენ, პროფილაქტიკის მიზნით მიმართოთ პირად ექიმს. პრობლემის მოგვარებაში შესაძლოა, მკურნალობის არატრადიციული მეთოდებიც დაგეხმაროთ.

მორიელი
დიდი ფულადი მოგება და საჩუქრები გელოდებათ. შესაძლოა, ოჯახში ახალი წევრი შემოგემატოთ. იფიქრეთ საკუთარი შვილების მომავალზე. დაგეგმეთ და გადაწყვიტეთ, როგორ დააბანდოთ ფული სწორად, რათა მუდმივი შემოსავალი გაიჩინოთ.

მშვილდოსანი
თქვენს საქმიანობაში არ გამოირიცხება შეცდომები, იმედგაცრუება და მსგავსი უსიამოვნებები, რომელთა შედეგი, შესაძლოა, ხანგრძლივად გაგყვეთ. ვარსკვლავები გირჩევენ, არ გაანდოთ საკუთარი გეგმები სხვებს. ისწავლეთ საკუთარი თავის კონტროლი და ფიქრებისა თუ გრძნობების დამალვა.

თხის რქა
თუკი ამ დღეს თქვენთვის შესაფერის ადამიანს იპოვით, მის გამო ბევრ რამეზე შეძლებთ უარის თქმას. ნუ შეგაშინებთ საცხოვრებელი ადგილის შეცვლა, ნურც პარტნიორის შეცვლა. ისწავლეთ, როგორ მოერგოთ ცხოვრებისეულ სიტუაციებს.

მერწყული
დღის მეორე ნახევარში შესაძლოა, პრობლემები შეგექმნათ მეუღლის მშობლებთან. სასურველია, მათთან ურთიერთობის დროს დიპლომატიურობას მიმართოთ და ფსიქოლოგიური დისტანცია შეინარჩუნოთ. ამგვარად, სულ მალე მათთან მეგობრული ურთიერთობა ჩამოგიყალიბდებათ.

თევზები
ემოციების მოთოკვა გაგიჭირდებათ. ნებისმიერ მოვლენას გულთან ახლოს მიიტანთ. სხვის პრობლემებს გულგრილად ვერ შეხვდებით და შეეცდებით, ახლობლებს რთული სიტუაციებიდან გამოსვლაში დაეხმაროთ. ვარსკვლავები გირჩევენ, აკონტროლოთ საკუთარი ემოციები, წინააღმდეგ შემთხვევაში ჯანმრთელობის პრობლემები შეგექმნებათ და ნაყოფიერ მუშაობასაც ვერ შეძლებთ. გახსოვდეთ, რომ თქვენს თანამშრომლებს თქვენი დახმარებისა და მხარდაჭერის იმედი აქვთ.

გარემოს ეროვნული სააგენტო 2023 წლის 3 აგვისტოს მდინარე ბუბისწყლის ხეობაში (მდ. ჭანჭახის აუზი) განვითარებული სტიქიური მოვლენების პირველად შეფასებას აქვეყნებს.

როგორც დასკვნაშია აღნიშნული, 2023 წლის 3 აგვისტოს, მდ. ბუბისწყლის ხეობაში ადგილი ჰქონდა სტიქიური გეოლოგიური და ჰიდრომეტეოროლოგიური მოვლენების (მყინვარის ინტენსიური დნობა, ნალექების მოსვლა წვიმის სახით, სათავეებში კლდეზვავის ჩამოშლა, მეწყრულ-ეროზიული პროცესები და ღვარცოფის გავლა) თანხვედრას, რამაც გამოიწვია ექსტრემალური ხასიათის ღვარცოფული ნაკადის ფორმირება.

„ხეობაში განხორციელებული საველე კვლევების საფუძველზე დადგინდა, რომ მყინვარ ბუბას დასავლეთით, ადგილი ჰქონდა კლდეზვავური მასის ჩამოშლას, რომელიც დინამიკაში მოსვლის შემდეგ შეეჯახა მყინვარს, მოახდინა მისი გარკვეული ნაწილის ჩამონგრევა, რამაც შესაძლოა გამოიწვია მყინვარქვეშა დაგუბებული წყლების  გადმოდინება, რის შემდეგაც წარმოქმნილმა ნაკადმა დიდი სიჩქარით დაიწყო მოძრაობა ხეობის კალაპოტში (სურ. 1-4). აღნიშნულ პროცესს ხელი შეუწყო ბოლო პერიოდში მომატებულმა ჰაერის ტემპერატურულმა ფონმა, კლიმატის ცვლილებით გამოწვეულმა მყინვარების ინტენსიურმა დნობამ და თანმდევმა ატმოსფერულმანალექებმა (ნახ. 4). დინამიკაში მოსული კლდეზვავური მასალა და მყინვარული მასის ნაწილი ხეობის ზედა ნაწილშივე ტრანსფორმირდა გლაციალურ ღვარცოფულ ნაკადად. კალაპოტში დიდი სიჩქარით გავლილმა ნაკადმა, ხეობის შუა და ქვედა ნაწილში, ორივე ბორტის გასწვრივ გამოიწვია ფერდობების ძირის გამორეცხვა და ე.წ. სანაპირო ტიპის მეწყრული სხეულების წარმოქმნა-გააქტიურება (სურ. 5-6). აღსანიშნავია, რომ სხვადასხვა მასშტაბის ახალი მეწყრულ-ეროზიული კერები ჩამოყალიბდა მდ. ბუბისწყლის პრაქტიკულად ყველა შენაკადში. ამრიგად, ხეობის ზემო წელში ფორმირებულ მყარ ნაკადს, მდ. ჭანჭახთან შეერთებამდე, დაემატა როგორც მდ. ბუბისწყლის კალაპოტის გასწვრივ ნაპირგარეცხვის შედეგად ჩამოშლილი მეწყრული მასები, ასევე შენაკადებიდან ტრანსპორტირებული ნაშალი მასალა.

აღსანიშნავია ის ფაქტი, რომ მდინარე ჭანჭახზე არსებული ჰიდროლოგიური სადგურის (ავტომატური წყლის ხარჯის მზომი სენსორი) მონაცემების ანალიზის საფუძველზე მდ. ბუბისწყლის ხეობაში წყლის ხანგრძლივ შეგუბებას არც სტიქიის განვითარებამდე და არც სტიქიის განვითარების პროცესში ადგილი არ ჰქონია (ნახ. 5)“, – აღნიშნულია პირველად შეფასებაში.

როგორც დასკვნაშია ნათქვამი, ღვარცოფული ნაკადის შემადგენლობის, ხეობის დახრილობის (ენერგეტიკული პოტენციალი), მორფოლოგიური პირობების და მანძილის გათვალისწინებით,  სტიქიის ჩასახვა-გააქტიურების ზონიდან, შოვის ე.წ. კოტეჯების უბნამდე ღვარცოფულ ნაკადს წინასწარი გათვლებით უნდა მიეღწია სავარაუდოდ 8-10 წუთში.

„დასკვნები:

1.    ხეობაში განხორციელებული საველე კვლევების საფუძველზე დადგინდა, რომ მყინვარ ბუბას დასავლეთით, ადგილი ჰქონდა კლდეზვავური მასის ჩამოშლას, რომელიც დინამიკაში მოსვლის შემდეგ შეეჯახა მყინვარს, მოახდინა მისი გარკვეული ნაწილის ჩამონგრევა, რამაც შესაძლოა გამოიწვია მყინვარქვეშა დაგუბებული წყლების  გადმოდინება, რის შემდეგაც წარმოქმნილმა ნაკადმა დიდი სიჩქარით დაიწყო მოძრაობა ხეობის კალაპოტში. მდ. ბუბისწყლის ხეობაში 2023 წლის 3 აგვისტოს კატასტროფული ხასიათის გეოლოგიური და ჰიდრომეტეოროლოგიური მოვლენები განაპირობა: მყინვარის ინტენსიურმა დნობამ, მყინვარის სათავეებში კლდეზვავის ჩამოშლამ, მოსულმა ატმოსფერულმა ნალექებმა, მეწყრულ-ეროზიულმა პროცესებმა და გლაციალური ღვარცოფის გავლამ, რაც დაკავშირებულია მხოლოდ ბუნებრივ ფაქტორებთან;

2.    მდინარე ჭანჭახზე არსებული ჰიდროლოგიური სადგურის (ავტომატური წყლის ხარჯის მზომი სენსორი) მონაცემების ანალიზის საფუძველზე:

– სტიქიის განვითარებამდე, მდ. ბუბას ხეობაში წყლის შეგუბებას ადგილი არ ჰქონია (მდ. ჭანჭახზე არსებულ სადგურზე წყლის დონის კლება არ დაფიქსირებულა);

– 2023 წლის 3 აგვისტოს,სტიქიური მოვლენის განვითარების პროცესში უშუალოდ მდინარე ბუბისწყლის ხეობაში  წყლის მასის გრძელვადიან შეგუბებას ადგილი არ ჰქონია;

3.    ზემოთ აღწერილი, 3 აგვისტოს  მყისიერად განვითარებული, კომპლექსური ხასიათის სტიქიური მოვლენის ფორმირება მრავალ ფაქტორზე იყო დამოკიდებული. მთელ მსოფლიოში ამ ტიპის მოვლენების ფორმირების ზუსტი დროის პროგნოზირება პრაქტიკულად შეუძლებელია;

4.    მდ. ბუბისწყლის ხეობაში ღვარცოფების ფორმირებისა და ტრანზიტის ზონის არეალში რაიმე სახის კაპიტალური დამცავი ღონისძიებების გატარება მდინარის ხეობის ჰიდრომორფოლოგიური პარამეტრების გათვალისწინებით, მიზანშეწონილი არ არის“, – ნათქვამია გარემოს ეროვნული სააგენტოს მიერ გამოქვეყნებულ დასკვნაში.

დოკუმენტში აღნიშნულია, რომ გარემოს ეროვნული სააგენტოს სპეციალისტები აგრძელებენ მდინარე ბუბისწყლის ხეობაში დამატებით ჰიდრომეტეოროლოგიურ და გეოლოგიურ კვლევებს, რის საფუძველზეც  შემუშავდება რეკომენდაციები შემდგომი ღონისძიებების განსახორციელებლად.

„წინამდებარე დასკვნა შედგენილია გეოლოგიურ, მეტეოლოგიურ და ჰიდროლოგიურ პარამეტრებზე დაკვირვების, ისტორიული და მიმდინარე მონაცემების მათ შორის სატელიტური, რადარული და აერო ფოტო სურათების დეშიფრირებული ინფორმაციის, აგრეთვე საველე ჰიდრომეტეოროლოგიური/გეოლოგიური კვლევების შედეგად მიღებული მონაცემების კამერალური დამუშავების, ექსპერტული ცოდნის ანალიზის/განზოგადების საფუძველზე და განეკუთვნება პირველადი დასკვნის კატეგორიას“, – აღნიშნულია დოკუმენტში