“პრემიერი ყოველთვის იყენებს შესაძლებლობას, რომ გამართოს პოლიტიკური კონსულტაციები კოლეგებთან და ლიდერებთან”

16
spot_img

ამ შესაძლებლობას საქართველოს პრემიერ-მინისტრი, ირაკლი ღარიბაშვილი ყოველთვის იყენებს, რომ ერთის მხრივ მან პოლიტიკური კონსულტაციები კოლეგებთან და ლიდერებთან გამართოს, ხოლო მეორე მხრივ, საქართველოთი დაინტერესებულ კომპანიებსა და ბიზნესის წარმომადგენლებთან, – ამის შესახებ საგარეო საქმეთა მინისტრმა, ილია დარჩიაშვილმა დავოსში ჟურნალისტებს განუცხადა.

მისი თქმით, პრემიერ-მინისტრს პოლიტიკური შეხვედრები ექნება, პარალელურად, შესაძლებლობა იქნება, რომ მან სხვადასხვა პანელურ დისკუსიებში მიიღოს მონაწილეობა.

„ტრადიციულად, როგორც ყოველთვის, დავოსის ეკონომიკური ფორუმი არის ადგილი, სადაც არის შესაძლებლობა, საქართველო გამოჩნდეს და ჩვენი ქვეყნის შესაბამისი პოზიციონირება მოხდეს. შესაბამისად, ამ შესაძლებლობას საქართველოს პრემიერ-მინისტრი ყოველთვის იყენებს, რომ ერთის მხრივ, მან გამართოს პოლიტიკური კონსულტაციები კოლეგებთან და ლიდერებთან, ხოლო მეორე მხრივ, საქართველოთი დაინტერესებულ კომპანიებსა და ბიზნესის წარმომადგენლებთან. წელსაც, ტრადიციულად, საქართველოს პრემიერ-მინისტრი ორივე მიმართულებით გამართავს შეხვედრებს. იქნება პოლიტიკური შეხვედრები და პარალელურად, შესაძლებლობა იქნება, რომ მან სხვადასხვა პანელურ დისკუსიებში მიიღოს მონაწილეობა, რომელიც ეხება, როგორც ევროპას, ევროკავშირს, არსებულ გამოწვევებს ზოგადად. დღეს უკვე ძალიან მნიშვნელოვანია ჩვენი ქვეყნის პოზიციონირება, როგორც ევროკავშირის წევრი კანდიდატის სტატუსის მქონე ქვეყანა და ვფიქრობ, რომ იქნება ძალიან საინტერესო, შედეგიანი დისკუსიები და საქართველოს დელეგაცია, რომელსაც ხელმძღვანელობს საქართველოს პრემიერ-მინისტრი, წარმოაჩენს ჩვენს ქვეყანას. ქვეყანამ, რომელმაც კანდიდატი ქვეყნის სტატუსი მოიპოვა, მის მიმართ გაზრდილია ინტერესი სხვადასხვა საერთაშორისო ბიზნეს კომპანიების მხრიდან, რადგანაც ჩვენი ქვეყანა საინვესტიციო თვალსაზრისით კიდევ უფრო მიმზიდველი და საინტერესო გახდა და სწორედ, ამ ვიზიტის ფარგლებში პრემიერ-მინისტრის გამართული შეხვედრები მოემსახურება იმას, რომ კიდევ უფრო მეტად წავახალისოთ სხვადასხვა საინვესტიციო კომპანიები, იმისათვის, რომ საქართველოში ჩამოვიდნენ და ინვესტიციები განახორციელონ“, – განაცხადა ილია დარჩიაშვილმა.